Yau - Chapter 15 - Al-Hijr

Alif-Lam-Ra. Aga ni ma Aya ga m’Chitabu (cha Qur’an) soni ni Chisoomo chakupikanika

Kakajinji katakawe achimakafili (ndema jatakawe ku Moto) ali nkulajila kuti bola angawe Asilamu (pawaliji ku duniya)

Mwalekani agambeje kulya ni kusengwa, ni kwaluyaluya liganichisya (lyakupata yambone kwa Allah), basi taachiika kumanyilila (mbesi ja ukafili wao)

Ni nganituujonanjeje musi uliose ikaweje waliji wana chilamusi chakwe chakumanyika (cha ndema jakuujonanjila)

Nkutula uliose nganiuwa ujilongolele ndema jakwe (jakuwila) kapena kujichelewasya (jili jikwanile)

(Achimakafili) ni watite (pakun’gamba Muhammadi ﷺ): “E mmwe awala wachintuluchile Chikumbusyo (Qur’an)! Chisimu mmwejo wamasoka.”

“Uli ngaikanago kukwetu Malaika naga n’di mwa akuwecheta yakuona?”

(Allah akwasalila kuti): Uwwe wangatulusya Malaika ikaweje mwakuonaonape (kwisa kupeleka ipotesi), soni pajele ndemajo ngaakasawaga (achimakafilio) wakupedwa lipesa

Chisimu Uwwe ni Awala watutulwisye Chikumbusyo (Qur’an) soni Uwwe chisimu chene tuchigose

Soni chisimu chene twaatumisye (Achimitume) paujo penu (mmwe Muhammadi ﷺ) m’mikutula (jawandu) wandanda

Ni nganijwaichililaga ntenga jwalijose ikaweje waliji nkuntenda chipongwe

Iyyoyopeyo tukuupitisyaga (nteto wachipongwewo) m’mitima mwa akulewa

Ngakasajikulupililaga jalakwe (Qur’an) kutendaga pamasile payapite ilandanyo ya (wandu) wandanda (yawatite kapedwe ipotesi)

Soni tungaaugulile (achimakafilio) nnango wakwinani, ni kuwa wanganyao ali nkukwela kwalakweko chitetete (mwaakusachila, kuti chiwe chisimosimo cha Muhammadi ﷺ)

Basi angatite: “Chisimu meso getu gantesile ndandagasi. (Ngwamba), nambo kuti uwwe ni wandu wakulogwa (tukuiona ikaliyo).”

Soni chisimu chene tuwisile kwinani ndondwa syekulungwakulungwa ni mwakwenda mwakwe, ni tukusalalisye kwa waakuona

Ni tukugosile ku shetani jwalijose jwakuwinjidwa

Ikaweje jwaakupikanilaga mwawiyi, basi papopo chisinga (cha moto) chakuonechela ni kunkuya

Sano litaka twalijasesye ni kuwika mwalakwemo yakunyichisya (gagali matumbi gausito), ni tumesisye mwalakwemo chindu chilichose chepimepime

Ni tum’bichile mwalakwemo yakulamila wanganyammwe ni ichindu yanganim’ba jenumanja kuti mpaka nkombole kuipatila lisiki (mpela inyama ni ilango ni ine yosope yaumi)

Ni pangali chindu chilichose ikaweje imatiilo yakwe ili Kukwetu, ni ngatukasachitulusyaga ikaweje kwa chipiimo chakumanyika

Soni tukasasitumisyaga mbungo syakuwelekasya (mawunde mesi gawula), basi ni tukasagwisyaga kuumila kwinani mesi (gawula), ni tukasampaga kumwa wanganyammwe galakwe, sano jenumanja ngawa ni wankugasungaga galakwe (mesigo)

Soni chisimu Uwwe ni Awala watukupeleka umi ni chiwa, soni Uwwe ni Wawinjila

Soni pamasile patwamanyi kusyene wawalongolele mwa jenumanja (wawawile kala), soni pamasile patwamanyi kusyene waasigalile (waali chijumi kwisa soni wanganapagwe)

Soni chisimu Ambuje wenu Walakwe ni watachasonganganya wanganyao, chisimu Walakweo ni Walunda lwakusokoka, Wakumanyilila nnope

Soni chisimu chene mundu twan’gumbile ni lilongo lyejumu lyakulilaga (nkuligombamo) lyakuumila m’matope gakupiililila geunde

Sano lijini twaligumbile kala kuumila ku malamba ga moto gangali lyosi

Soni (kumbuchilani) katema kawawechete Ambuje wenu kwa Achimalaika kuti: “Chisimu Une tingumbe mundu ni lilongo lyejumu lyakulilaga (nkuligombamo) lyakuumila m’matope gakupiililila geunde.”

“Sano patimale kunkolosya ni kumpepelela nsimu wakuuma Kukwangu, basi munsenjelemukuchile pakunsujudila.”

Basi ni wasujudu Achimalaika wosope wene nakamo

Pangawaga Ibulisu; jwakanile kuti awe pamo ni akusujudu

(Allah) jwatite: “E mmwe Ibulisu! Chipali chichi kukwenu chintendekasisye kuti nkawa pamo ni akusujudu?”

Jwalakwe jwatite: “Une nganimba jwanti nikunsujudila mundu jwamun’gumbile ni lilongo lyejumu lyakulilaga (nkuligombamo) lyakuumila m’matope gakupiililila geunde.”

(Allah) jwatite: “Basi kopokani mwalakwemo, mwanti chisimu mmwe (sano) n’di wakuwinjidwa.”

“Soni chisimu pachanya penu pana malweso mpaka Lisiku Lyamalipilo.”

Jwalakwe jwatite: “Ambuje wangu! Mumbanitu lipesa (lyakuti ngawa) mpaka lisiku lyatachiukulidwa (m’malembe achiiumbe wosope).”

(Allah) jwatite: “Basi chisimu mmwe n’di mwa akupedwa lipesa.”

“Kwikanila lisiku lya ndema jakumanyika (jagombedwa lipenga lyandanda, pele ni patinchiwila).”

Jwalakwe jwatite: “Ambuje wangu! Ligongo lyanti munechelele kusokonechela, basi chinasalalichisye kwene wanganyao pa chilambo (litala lyesokonechele), ni chinasokonesye kwene wanaose.”

“Pangawaga achikapolo Wenu wakuswejesyedwa mwa wanganyao.”

(Allah) jwatite: “Ali nilitala lya Kukwangu lyalili lyagoloka.”

“Chisimu achikapolo Wangu nganinkola mmwejo pa wanganyao machili, ikaweje awala watakankuyeje (mwakusaka kwao) mwa akusokonechela.”

Soni chisimu Jahannama ni malo gao gaakupedwa chilanga wanaose

Jikwete milango nsano najiwili, nnango uliose ukwete liunjili mwa wanganyao lyegawidwegawidwe

Chisimu waoga (wakun’jogopa Allah) tachiwa m’Matimbe ga ku Mbepo ni sulo (syasichijilimaga chapasi pakwe)

(Tachisalilidwa kuti) gajinjilani mwantendele n’di wagosedwa

Ni tuchityosya iwundo (ya uchimwa ni litima) yayaliji m’mitima mwao, tachiwa (wakunonyelana) mwaulongo ali (atemi) pa itengu yauchimbichimbi mwakulolegana

Ngagaja kwakwaya mwalakwemo masausyo galigose, soni wanganyao ngaaja koposyedwamo

Mwatagulilani achikapolo Wangu yanti chisimu Une ni jwandi Jwakululuka kusyene, Jwachanasa channope

Soni kuti chisimu ilagasyo Yangu ni yaili ilagasyo yakupoteka nnope

Soni mwatagulilani ya achalendo wa Ibrahima

Pandema jawajinjile kukwakwe ni kuwecheta kuti: “Ntendele!” Jwalakwe (panyuma pakwajanga ni kwaona kuti ngakulya yakulya yajwawichile) jwatite: “Chisimu uwwe tukun’jogopa wanganyammwe.”

Wanganyao watite: “Nkajogopa! Chisimu uwwe tukumpa abali jakusengwasya janti chinkole mwanache jwakumanyilila nnope.”

Jwalakwe jwatite: “Ana nkundagulila jele abali jakusengwasyaji kutendaga uchekulu uli ungwayiye kala? Ana abali jamboneji nkundagulila m’matalachi?”

Wanganyao watite: “Tukuntagulila abali jamboneji mwakuonaonape; basi ngasim’ba mwa wakata tama.”

Jwalakwe jwatite: “Ana ninduni jwampaka akate tama kuchanasa cha Ambujegwe, pangawaga wakupotela?”

(Kaneka) jwatite: “Abali jao (jine) jaichile nijapi jaomanja akutumidwa?”

Wanganyao watite: “Chisimu uwwe tutumisyidwe ku wandu wakulewa.”

“Ikaweje waliwasa lya Lutwi, chisimu uwwe chitukajokole wanawose.”

“Pangawanga wankwao, twapimichisye yanti walakweo chawe mwa akusigalila munyuma (chajonanjidwe).”

Basi ndema jawaiche akutumidwa kwiwasa lya Lutwi

Jwalakwe jwatite: “Chisimu wanganyammwe ni wandu wangamanyika (kukwangu).”

Wanganyao watite: “Basi tum’bichilile ni ayila (ilagasyo) yawaliji nkuikaichila.”

“Soni tun’jigalile (abali) jakuonaonape, soni chisimu uwwe wakuonaonape.”

“Basi wigulani niliwasa lyenu mu upande wachilo, sano mmwe mwakuyeje munyuma mwao, nambo akasagalauka jwalijose mwa jenumanja (kulola munyuma ndema jakupikana kulindima kwaipotesi yakuuma kwinani, atakwisa mwaawile), ni n’jendelechele (mwakangamala) kuja kunnamulidwe.”

Ni twammanyisye jwalakwe (Lutwi) lilamusi lyalakweli lyanti: Chisimu njinga sya wanganyao (achimakafilio) chisikatidwe (tajonanjidwe) kumasikusiku

Niwaiche (kwa Lutwi) wandu wa mu nsinda ali wakusengwa (pakupikana kuti ayiche achachanda wakusalala kuti watende yausakwa)

(Lutwi) jwatite: “Chisimu wanganyawa achalendo wangu, basi nkandesya soni (pakwatenda yakusakala).”

“Ni mun’jogope Allah soni nkanjigasya nchesela (pameso pao).”

Wanganyao watite: “Ana nganitunkanya kupochela wandu (wachilendo)?”

Jwalakwe jwatite: “Awa wanache wangu wachikongwe (achakongwe wa m’chilambo muno mwalombani), naga jenumanja n’di wakutenda (yannamulidwe).”

Nguulumbila umi wenu (mmwe Muhammadi ﷺ), chisimu wanganyao nkukolelwa mwao (ni yakusakala) waliji pupulipupuli

Basi ni wakwembekenye n’gumilo (waipotesi) ndema jakopoka lyuwa

Basi ni twajitesile (misi ja Sodomu ni Gomora kuwa jagalausyidwa) kwinani kwakwe kuwa pasi, ni twagwichisye wanganyao wula jamaganga gelongo lya ku Moto

Chisimu mu yalakweyi mwana ilosyo kwa wakulola ni kuchetelela (mu ilosyo ya Allah)

Soni chisimu jalakwe (misijo) jatamilichiche mwitalatalape (lyakutyochela ku Maaka kuja ku Shami mwanti wanganyao akuionaga imanyilo yakwe)

Chisimu mu yalakweyo mwana chilosyo kwa wakulupilila

Soni chisimu wandu wa mu itekete (ku Madiyana) waliji walupuso (pakunkana Ntume jwao Shuaibu)

Basi ni twauchisye mbusyo wanganyao (pakwapa ipotesi), soni chisimu yalakwe (ilambo) iwiliyi (chilambo chawandu wa Lutwi ni chawandu wa Shuaibu) yaliji mwitalatalape lyakuonechela (kwa Makuraish)

Soni chisimu chene achinsyene chiwata cha Hijri (chamaganga wali achina Samuda) wakaaniile achimitenga

Ni twapele wanganyao ilosyo Yetu (mpela ngamiya jana kopokaga pa lwala), basi ni waliji wakuitundumalila

Soni waliji nkusepa m’matumbi majumba mwantunjelele

Basi n’gumilo (waipotesi) wakwembekenye wanganyao kumasikusiku

Mwanti nganiyakamuchisya yawaliji nkupanganya

Ni nganitugumba mawunde ni mataka ni yaili chilikati chakwe ikaweje mwakuonaonape, soni chisimu chene Kiyama jikwika. Basi kululukani (mmwe Muhammadi ﷺ) kululuka kwambone

Chisimu Ambuje wenu ni wali Akugumba kusyene, Wakumanyilila nnope

Soni chisimu chene tumpele mmwejo (ma Aya) nsano nagawili gakusoomedwasoomedwa (Surat Al-Fatihah) kwisa soni Qur’an jakuchimbichika

Ngasinyyikolondochesya ata panandi meso genu yatujisengwachisye nayo mikutula jakulekanganalekangana ja wanganyao (achimakafilio), soni ngasimwadandaulila. Ni mwatuluchisyeje lipapiko lyenu wakulupilila (pakwatendela chanasa)

Soni jilani: “Chisimu une ni nkutetela jwakuonechela (ngangusisa chilichose kogopela kuti itakwisa muimpatile ilagasyo).”

Mpela yatwatite pakutulusya (ilagasyo) kwa akugawanya

Awala waajitesile Qur’an kuwa ipande-ipande (ine kuikunda ine ni kuikana)

Basi ngwalumbila Ambuje wenu, tuchawusya kwene wosope wene (lisiku lya Kiyama)

Pa yawaliji nkutenda

Basi jenesyani mwakunyanyisya yannamulidwe, ni mwatundumalile wakuwanganya (Allah ni isanamu)

Uwwe tukwanila kun’gosa (ku yakusakala ya) wachipongwe

Awala waakuwika pamo ni Allah nnungu jwine, basi sampano taimanye (yakuyichisya yakwe)

Soni chisimu chene tukumanyilila yanti chidali chenu chikuwanikwa ni yaakuwecheta

Basi luswejesyani lumbili lwa Ambuje wenu, ni m’beje mwa akusujudu (kuswali)

Ni mwagalagatileje Ambuje wenu mpaka chim’bichilile chiwa