Yau - Chapter 21 - Al-Anbiya

Chiwandichile ku wandu chiwalanjilo chao (chakwawalanga pa Kiyama), kutendaga wanganyao ali nkulilechelela ni kunyosya

Ngachikwaichililaga chikumbusyo chilichose chasambano chakuumila kwa M’mbuje gwao, ikaweje kuti akasachipikanilaga aku alinkutenda chanache

Mitima jao jichinyosyelaga, ni kusongonelanaga mwaasili awala walitendele lupuso kuti: “Ana aju (Muhammadi ﷺ) ninduni, pangawaga mundu mpele jenumanja? Ana nkuuwichilila usawi kutendaga jenumanja n’di nkulola?”

Jwalakwe (Muhammadi ﷺ) jwatite: “Ambuje wangu akumanyilila lilowe (lililyose lyalikuwechetedwa) kumawunde ni petaka, soni Jwalakwe ni Jwakupikanichisya, Jwakumanyilila nnope.”

Nambo wanganyao watite: “(Ayi yaakuwecheta Muhammadi ﷺ iwele) sagamisi syewanganyichilane.” (Ndawi jine akutiji): “Nambo jute kuilukanya (nsyene).” (Pane ni akutiji): “Nambo jwalakweju nkwimba ilaanga, basi ayiche nacho kukwetu chisimosimo mpela yawatite pakutumisyilidwa (achimitume) wandanda.”

Nganiukulupilileje paujo pao musi uliose m’misi jatwajijonasile (namuno kuti twajitumichisye isimosimo), ana wanganyao ni takulupilile

Ni nganitutumisyeje paujo penu (mmwe Muhammadi ﷺ) ikaweje wandu (ngawaga malaika) watwaliji nkwajuwulila (malowe), basi mwawusyani achimisyene lukumbukumbu (lwaindu yakala), nam’baga jenumanja ngankumanyilila

Soni nganitwatenda (achimitumeo) kuwa ilu yangalya yakulya, nambo soni nganawa wandamo

Kaneko twasimichisye chilanga chao (chakwakamuchisya kwa amagongo wao), basi ni twajokwele (achimitumeo) ni watwasachile (mwa akwakuya wao), ni twajonasile wakupelenganya malile (pasambi)

Chisimu pamasile patuntuluchisye wanganyammwe Chitabu (Qur’an), mwalakwemo mwana chikumbusyo chenu, ana wangali lunda

Ana misi jilingwa ja twajijonasile jajaliji nkutenda lupuso, ni twagumbile panyuma pao wandu wane

Basi ndema jawaiweni ipotesi Yetu (kuti ikwika), jele ndemajo wanganyao walinjilile kuitila

Nkatila, nambo m’bujile ku ayila (yasambi) yamwaliji nkusengwa nayo, ni m’malo mwenu, kuti m’buusyidwe (yachindimba champele Allah)

Wanganyao watite (pagumila): “Ipotesi yetuwe! Chisimu uwwe twaliji walupuso.”

Ni nganikuleka gumila kwaoko mpaka twatesile chisawu n’gunda wegungule, (soni mpaka) walitile (mwaukasalitilaga moto, wawile)

Soni Uwwe nganitugumba mawunde ni mataka kwisa soni yaili chilikati chakwe mwamasanje

Tungasache kulitendela chakunguluchila (mpela wakongwe ni mwanache), tungalitendele chalakwecho kuumila Kukwetu (mpela achakongwe waku Mbepo kapena achimalaika) tungawe wakuti tutende (yalakweyo)

Nambo tukasachiponyaga chakuona pa chaunami ni kuchikasa wongo, basi pajele ndemajo chalakwe (chaunamicho) chikasatyoka. Soni ipotesi ni yenu ligongo lya yankusimbayo (yakunnambuchisya Allah kuti akwete wakongwe ni mwanache)

Soni awele Wakwe (Allah) wosope wali kumawunde ni petaka, soni wali Kukwakwe (Achimalaika), wangalikwesya kuleka kun’galagatila soni wangapela (ni ibada)

Akunswejesyaga chilo ni muusi wangatondowela

Kapena (achimakafilio) alitendele milungu kuumila mwitaka, jalakwejo ni jikwimusya (wandu wawe)

Ingawe mwalakwemo (kwinani ni pasi) mwana milungu jine jwangawaga Allah; mukajonasiche. Basi aswejele Allah M’mbuje jwa Arishi (Chindanda Chaulungu) ku (yakusakala) yaakusimba (achimakafili yakwayana ni Jwalakwe)

Jwalakwe jwangawa nkuwusyidwa yajukutenda, nambo wanganyao ni watachiwusyidwa

Kapena wanganyao alitendele milungu jinepe jwangawaga Jwalakwe? Jilani: “Ikani nao umboni wenu (payankuwechetayo). Achi ni chikumbusyo kwa wandinao (jajili Qur’an mwangalimo yankuwechetayo), nambo soni chikumbusyo kwa wa m’bujo mwangu (jajili Taurat, Zabur kwisa soni Injil mwangali soni yankuwechetayo).” Nambo kuti wajinji mwa wanganyao ngaakuchimanya chakuona, basi wanganyao ni akuwa wakunyosya

Soni nganitutumisyeje ntenga jwalijose paujo penu (mmwe Muhammadi ﷺ) ikaweje kuti twan’juwulilaga yanti: “Pangali nnungu jwine (jwakuwajilwa kun’galagatila) ikaweje Une pe, basi ngalagatilani.”

Soni wanganyao watite: “(Allah) Jwaukoto wejinji alitendele mwanache.” Kuswejela ni Kwakwe. Nambo (awala wakwagalagatila mpela Achimalaika, Isa ni Uzair awele) achikapolo wakuchimbichikwa

Wanganyao wangannongolela Jwalakwe (Allah) kuwecheta, ni akupanganyaga (chilichose) kwa lilamusi Lyakwe

Jwalakwe jukuimanya yaili paujo pao ni yamunyuma mwao, soni wanganyao wangachondelela (pajwalijose) ikaweje pamundu jwannonyele (Allah), soni wanganyao akuwa wakuligandasya ligongo lyakun’jogopa Jwalakwe

Sano jwatawechete mwa wanganyao kuti: “Chisimu une ni nnungu ngawaga Jwalakwe (Allah).” Basi jwalakwe chitun’dipile Jahannama, iyyoyopeyo ni yatukasatiji pakwalipila walupuso

Ana nganaiona awala achimakafili yanti mawunde ni mataka galiji genyambatikane, basi ni twaganyambatukulenye? Soni tugumbile kuumila m’mesi chaumi chilichose. Ana ngakukulupilila

Ni tuwisile petaka yakunyichisya (gagali matumbi gausito), kuti litakwika mulyagwedanyichile wanganyao (litakalyo), nituwisile soni palakwepo matala gakusapanguka kuti wanganyao alijongolele (achimisyene kwakuja)

Soni tuliwisile liwunde kuwa nsakasa wagosedwa, sano wanganyao akuitundumalila ilosyo yakwe (mpela lyuwa mwesi ni ndondwa pangaichetelela)

Soni Jwalakwe ni Ajula juwagumbile chilo ni muusi, kwisa soni lyuwa ni mwesi, chilichose ching’ambila mwitala lyasyungulilo

Soni nganitum’bicheje mundu jwalijose paujo penu (mmwe Muhammadi ﷺ) kuwa jwandamo, ana naga mmwe kuwa, wanganyao nichawe wandamo

Ntima uliose uchipasya chiwa, ni tukun’dingaga ni yakusakala nambo soni ni yambone kuwa mayeso (gakun’dinjila kupilila kwenu ni kutogolela kwenu), soni Kukwetu tinchiuchisyidwa

Soni pati am’bweni mmwe (Muhammadi ﷺ) awala wakanile, ngaakuntendelaga inepe ikaweje chipongwe (pakuwecheta kuti): “Ana aju ni jwaakwakolanga achimilungu wenu (mwachalu)?” Kutendaga wanganyao yakunkolanga (Allah) Jwaukoto wejinji wanyao akukana

Mundu jugumbidwe kuwa jwakupupuluma. Sampano chinannosye wanganyammwe ilosyo Yangu (yakaiche ka ipotesi), basi ngasimunyanguya

(Achimakafili) ni akasatiji: “Ana chele chilangachi chiyiche chakachi nam’baga jenumanja nkuwecheta yakuona?”

Ingawe kuti akumanyilila awala wakanile ndema jatachitenda ngauchiga Moto kungope kwao, namuno kunyuma kwao (nganganawecheta yalakweyo), soni wanganyao ngasawa wakamuchisyidwa

Nambo (Motowo) uchaichilila mwachisupuchisya ni uchamasya lunda, basi ngasakombola kuuwusya, nambo soni wanganyao ngasapedwa lipesa

Soni chisimu chene achimitenga (wajinji) watendedwe chipongwe paujo penu (mmwe Muhammadi ﷺ), nambo (mbesi jakwe) awala wawaliji nkutenda chipongwe mwa jamanjao, yasyungwile (ipato) yawaliji nkuitendela chipongwe

Jilani: “Ana nduni jwampaka an’gose jenumanja chilo ni muusi ku (ilagasyo ya Allah) Jwaukoto wejinji?” Nambo wanganyao akuwa wakukutundumalila kunkumbuchila M’mbuje gwao

Kapena akwete wanganyao milungu jakwasiwilila (kuilagasyo) wangawaga Uwwe? Jalakwe (milungu jaojo), jangawa nkupakombola kulikamuchisya jisyene (nimpaka jikombole kwakamuchisya wane)? Soni jalakwejo nganijiwa jigosedwe Kukwetu

Nambo kuti twasengwasisye wanganyao ni achatati wao mpaka jalewipe kukwao ndawi (jaumi wao). Ana ngaakuiona yanti Uwwe tukuliyichilila litaka ni kulinandiyaga mpika wakwe (wa ulamusi wao waukafili)? Ana wanganyao ni watawe wakupunda

Jilani (mmwe Muhammadi ﷺ): “Chisimu une nguntetela wanganyammwe ni malowe (ga Allah).” Nambo asiiwa nganawa apikene m’bilango, (namuno) achiteteledwaga

Nambo kalikatite kaakwaye kambungo kaipotesi ya Ambuje wenu, chisimu chene mpaka ajile: “Ipotesi yetuwe! Chisimu uwwe twaliji waalitenda lupuso.”

Ni tuchiwika masikelo gachilungamiko pa lisiku lya Kiyama, basi mundu jwalijose ngasatendedwa lupuso pachilichose, natamuno (chinducho) chichiwe chausito wati mpela lupele lwa mbumbi (tanaposi), tuchiika nacho; soni Uwwe tukwanila kuwa Akuwalanjila

Soni chisimu chene Uwwe twampele Musa ni Haruna (Chitabu), chakulekanganya (chilikati cha yakuona ni yaunami, chachaliji) soni lumuli ni chikumbusyo kwa wandu wawoga (wakun’jogopa Allah)

Awala waakun’jogopa M’mbuje gwao mwangali kum’bona, soni wanyao Kiyama akasajijogopaga

Sano aji (Qur’an) ni chikumbusyo chaupile chatuchitulwisye; ana jenumanja chalakwechi ni nkuchikana

Soni chisimu chene Uwwe twampele Ibrahima chongoko chakwe kala (kuuchanda), nitwaliji nkummanya chenene

Pandema jawawechete kwa babagwe ni wandu wakwe kuti: “Ana niyapi ayi isanamu yankuwa jenumanja nchijendelechelaga kuigalagatila?”

Wanganyao watite: “Twasimene achatati wetu achiigalagatilaga.”

Jwalakwe jwatite: “Chisimu chene jenumanja ni achatati wenu m’bele mukusokonechela kwakuonechela.”

Wanganyao watite: “Ana ntuwichilile niyakuona kapena n’di mwa akutenda chanache?”

Jwalakwe jwatite: “(Ngwamba), nambo m’mbuje gwenu ni M’mbuje jwa kumawunde ni petaka Ajula juwaigumbile yalakweyo, soni une payalakweyo ndili mwa akutendela umboni.”

“Soni ngunnumbila Allah! Chisimu une chindende malindi (gakuijonanga) isanamu yenu panyuma pagalauka ni kulosya migongo jenu (kwaulaga kwakuja kwenu).”

Basi ni waitesile (isanamu ila) kuwa ipande-ipande ni kusigasya chachikulungwa chakwe, kuti wanganyao awujile ku chalakwecho

Wanganyao watite: “Ana nduni jwatesile yalakweyi ku milungu jetu? Chisimu jwalakwejo juwele mwa akutenda lupuso kusyene.”

(Wane) watite: “Tumpikene nchanda jwinejwakwe juli nkwapakana wanganyao, jukuwilanjikwa Ibrahima.”

Wanganyao watite: “Ikani najo pameso pa wandu kuti atendele umboni.”

Wanganyao watite: “Ana ni mmwe wantesile yalakweyi ku milungu jetu, E mmwe Ibrahima?”

Jwalakwe jwatite: “(Ngawa une), nambo aju jwankulungwa jwaoju ni jwatesile yalakweyi, basi mwawusyani wanganyawa nawaga wakuwechetaga.”

Basi wagalauchilene achimisyene niwatite: “Chisimu wanganyammwe ni wan’di walupuso (pangajigosa milunguji).”

Kaneko wajinamisye mitwe jao (nikuujila kunganisyo syao syachijinga) ni watite: “Chisimu chene mmwe nkumanyilila yanti wanganyawa nganawa awechete (uli kututenda chipongwe chanti iyyo)?”

Jwalakwe jwatite: “Ana ni nkuigalagatila ichindu yangawa nkunkamuchisya chilichose kunneka Allah, soni yangawa nkumpa ilagasyo?”

“Kunyosyeka ni kwenu pamo ni ayila yankuigalagatila kunneka Allah, ana wangali lunda?”

Wanganyao watite: “Munchomani moto, ni nkulupusye milungu jenu, naga jenumanja nkusaka kutenda (chitendo basi tendani yele).”

Uwwe twatite: “E mmwe amoto! Um’be wakusisima ni wantendele kwa Ibrahima.”

Ni wansosele jwalakwe yakusakala, nambo Uwwe twatesile wanganyao kuwa wakwasika kusyene

Ni twan’jokwele jwalakwe ni Lutwi (ni kwapeleka) ku chilambo achila (cha Shami) chatwachipele upile ligongo lya iwumbe (yakutama mwalakwemo)

Ni twampele jwalakwe Isihaka, ni ntuka wakonjechesya (chachili chisukulu chakwe) Yaakuubu, soni wosope wene twatesile kuwa wambone

Ni twatesile kuwa achinnongola, wawaliji nkwajongola (wandu) ni ulamusi Wetu, ni twajuwulile wanganyao yakupanganya yambone, ni kwimika Swala mwakolosya, ni kutola Zaka, nambo soni waliji nkutugalagatila Uwwe pe

Nambo soni Lutwi twampele lunda lwakusokoka kwisa soni umanyilisi, nitwan’jokwele ku Musi wawaliji nkutenda yausakwa, chisimu wanganyao waliji wandu wakusakala, wakunyosya

Nitwan’jinjisye jwalakwe mu ukoto Wetu, chisimu jwalakwe jwaliji muwandu wambone

Soni (munkumbuchilani) Nuhu, ndema ja jwawilasile kalakala (pakutuwenda), basi Uwwe ni twan’jitiche, soni ni twan’jokwele jwalakwe ni wapewasa wakwe ku taabu jekulungwa

Ni twanchenjele kuwandu wawaliji nkukanila ma Aya Getu, chisimu wanganyao waliji wandu wakusakala. Basi ni twamisisye wosope wene

Soni (munkumbuchilani) Daudi ni Sulaimana, pandema jawaliji nkwilanya magambo ga n’gunda. Ndema jasyalilemo chilo mbusi sya wandu wane. Sano Uwwe nitwaliji Mboni pachiilanyo chaocho

Ni twantesile Sulaimana kuwa jwagamanya chenene (magambogo kajilanye kakwe kwapunda babagwe), sano jwalijose mwa wanganyao twampele chiilanyo chambone ni umanyilisi. Ni twagajepepesye matumbi ni ijuni kuti iweje inankunswejesya (Allah) pamo ni Daudi, ni twalijitu Uwwe Akutenda (yosope yeneyi)

Ni twan’jiganyisye (Daudi) kapanganye ka iwaalo yachisyano (yapangondo) ligongo lya jenumanja, kuti iwe inankun’gosa pa kumenyana kwenu, ana jenumanja n’di wakutogolela

Sano nombe najo Sulaimana twan’jepepachisye mbungo jachimbunga, jajaliji nkwenda kwa ulamusi wakwe kuja kuchilambo chatwachipele upile (chilambo cha Shami), nitwalijitu Uwwe pachindu chilichose Wachimanya chenene

Nambo soni m’mashetani mwaliji mwana wawaliji nkuntiwilila (Sulaimanajo m’mbwani kuja kunsosela ngalekale), ni waliji nkupanganya soni masengo gane gangawaga gele (mpela yakutawatawa). Ni twaliji Uwwe tuli nkwalonda wanganyao

Soni (munkumbuchilani) Ayyubu, ndema jajwawilasile Ambujegwe (pakwawenda) kuti: “Chisimu une gangwayiye masausyo, sano Mmwe ni Wachanasa channope kwapunda wachanasa wosope.”

Basi ni twan’jitiche, ni twantyochesye masausyo gajwaliji nago, ni twampele wapewasa wakwe, ni konjechesya soni pawanganyao wane wanti mpela wawowo, (twantendele yosope yeneyi kuwa) ukoto wakuumila Kukwetu, ni (kuti chiwe) chikumbusyo kwa akutenda ibada

Soni (munkumbuchilani) Ismaila, Idrisa ni Dhul-Kifli (Yesaya), wosope wenewa waliji mwa akupilila

Soni twajinjisye mu ukoto Wetu, chisimu wanganyao waliji mu wandu wambone

Soni (munkumbuchilani) Dhun-Nun (Yunusu), ndema jajwauwigwisye ulendo juli jugasabiche, basi ni jwaganichisyaga yanti Uwwe ngatumpa ipotesi iliyose, ni jwagumisile m’chipi (cha m’matumbo mwasomba jajammisile) juchitiji: “Pangali nnungu jwine (jwakuwajilwa kun’galagatila) ikaweje Mmwe, kuswejela ni Kwenu. Chisimu une mbele mwa akulitenda lupuso.”

Basi ni twan’jitiche, ni twan’jokwele kumadandausi, soni iyyoyopeyo ni yatukasatiji pakwajokola wakulupilila

Soni (munkumbuchilani) Zakariya, ndema jajwawilasile Ambujegwe (pakwawenda) kuti: “Ambuje wangu! Ngasimuneka jikape (jwangali mwanache), soni Mmwe ni Wambone nnope kwapunda wawinjila wosope.”

Basi ni twan’jitiche, ni twampele Yahaya, ni twankolochesye soni wankwakwe (kuti awisikale). Chisimu wanganyao waliji wachitema pakutenda yambone, soni waliji nkutuwenda mwakusachilila umbone nambo soni mwawoga, ni waliji soni wakulinandiya Kukwetu

Soni (munkumbuchilani Maryam) ajula jwawaugosile utukani wakwe, ni twapepelele mwa jwalakwe (umi) kuumila kwa Nsimu Wetu (Jibulilu ni kupagwa Isa jwangali babagwe), ni twantesile jwalakwe ni mwanagwe kuwa chilosyo kwa iwumbe yosope

Chisimu awu nkutula wenu (wa Usilamu), ni nkutula umpepe, soni Une ni M’mbuje gwenu, basi mungalagatilani Une (Jikape)

Ni watindene wanganyao (wandu wakwakuya achimitume) yakwayana ni dini jao (ni kuwa mikutula-mikutula). Wosope weneo Kukwetu tachiujila

Sano jwachatende itendo yambone kutendaga juli jwakulupilila, nikuti masengo gakwego ngasigakanidwa, soni chisimu Uwwe tukunnembela jwalakwe (masengo gakwego m’chitabu mwakwe)

Soni ikanyisyidwe ku (wandu wa) musi uliose watwaujonasile kuti wanganyao nganawa awujiile (ku duniya Kiyama nkanijiyiche)

Kwikanila ndema jatachiugulidwa Yaajuju ni Maajuju, soni wanganyao tachiwa ali nkutuluka mwakangamala pachikwesya chilichose (wakukuwatanganya)

Ni chichiwandichila chilanga chakuona (Kiyama), basi pajele ndemajo ichiwa yanti meso ga awala wawakanile gachikolondoka aku achitiji: “Ipotesi yetuwe! Chisimu uwwe twaliji nkuikwanjila yalakweyi, nambo soni twaliji waalitenda lupuso.”

Chisimu wanganyammwe ni ayila yankuigalagatila kunneka Allah tinchiwa sasu sya ku Jahannama, wanganyammwe jalakwejo tinchijijinjila

Ingawe yalakwe (isanamuyo) kuti ili milungu (jisyesyene) nga nganiyija kuwujinjila (Motowo), soni wosope wene (isanamu ni akuigalagatila wakwe) takawe wandamo mwalakwemo

Tachikola wanganyao mwalakwemo koloma, soni wanganyao mwalakwemo ngasajaga kupikana (tachiwa asiiwa)

Chisimu awala wawalongolele umbone ku wanganyao wakuumila Kukwetu (mpela Isa, Maryam ni Uzair), wanyao tachitalichisyidwa ni walakweo (Moto)

Ngaja kupikana kulilima kwakwe kwalwapasipasi (kwa Motowo), soni wanyao takawe wandamo mu ichindu yajisachile mitima jao

Ngasichadandaulikasya wanganyao chogoyo chekulungwa (cha lisiku lya Kiyama), ni tachachingamila Achimalaika (achasalilaga kuti): “Ali ni lisiku lyenu alila lyamwaliji nkupedwa chilanga (chakwika kwakwe).”

Lisiku lyatuchiwiliga liwunde chisawu yaikasatiji kawilije ikalakala ilembo, mpela yatwatite katande gumba kwandanda tuchikuwilisya soni. (Chalakwechi ni) chilanga chachili Petuwe. Chisimu Uwwe tuwele wakutenda (yalakweyo)

Soni chisimu Uwwe twalembile mu Zabur panyuma pakulemba mu Chikumbusyo (Al-Lauh Al-Mahfuz) yanti litaka tachilitawalila achikapolo Wangu wambone

Chisimu mu aji (Qur’an) mwana utenga wakupikanika kwawandu wagalagatila (Allah)

Ni nganituntumisya mmwe (Muhammadi ﷺ) ikaweje kuwa ukoto ku iwumbe yosope

Jilani (mmwe Muhammadi ﷺ): “Chisimu ikujuwulidwa kukwangu yanti nnungu jwenu (jwakuwajilwa kun’galagatila) ni Nnungu Jumo. Ana jenumanja chim’be wakulipeleka (pakuwa Asilamu wakun’galagatila Jwele pejo)?”

“Chisimu Jwalakwe (Allah) jukumanyilila malowe gakunyanyika, ni jukumanyilila soni yankusisa.”

“Soni ngangumanyilila, mwine kwele (kunchelewachisya ipotesiko) kuwele mayeso gakun’dinga wanganyammwe, ni kusengwa kwandema jannono.”

(Muhammadi ﷺ) jwatite: “Ambuje wangu! Jilanyani mwakuonaonape, soni M’mbuje gwetu ni (Allah) Jwaukoto wejinji, (soni Jwalakwe ni) Nkuwendedwa chikamuchisyo pa yankusimbayo.”