Yau - Chapter 26 - Ash-Shuara

Twa-Sin-Mim

Aga ni ma Aya ga m’Chitabu chakusalichisya

Mwinetu mmwe kuwa nkulijonanga mwasyene (ni madandausi) ligongo lyanti wanganyao ngakuwa wakulupilila

Tungasache tungatuluchisye wanganyao kuumila kwinani chisimosimo, basi ngosi syao ni sikaliji syakutetewalila kuchalakwecho (mwanti akaujitiche Usilamu mwakanganisyidwa, nambo ngatukusasaka kwakanganichisya wandu ku Usilamu)

Ni ngachikwaichililaga chikumbusyo chasambano chakuumila kwa (Allah) Jwaukoto wejinji, ikaweje akasawaga wanganyao waachitundumalila chalakwecho

Sano pamasile pakanile, basi sampano tisyaichilile abali sya ayila yaawele ali nkuitendela chipongwe

Ana nganaliona litaka – kuti mmela ulingwa watuumesisye mwalakwemo wa ntundu uliose wakusalala chenene

Chisimu mu yalakweyo mwana chilosyo (cha ukombosi wa Allah), nambo wajinji mwa wanganyao nganawa wakulupilila

Soni chisimu Ambuje wenu, ni wali Wamachili gakupunda, Wachanasa channope

Soni (kumbuchilani) katema kawam’bilasile Ambuje wenu Musa (ni kuntenda kuti): “Jaulani ku wandu walupuso.”

“Wandu wa Firiauna; ana ngakogopa?”

Jwalakwe jwatite: “Ambuje wangu! Chisimu une ngogopa kuti chakanganile.”

“Soni wanganyao akwete magambo ganalewele, ni ngogopa kuti takambulaje.”

(Allah) jwatite: “Ngwamba! Basi jaulani wanawawilimmwe ni isimosimo Yetu. Chisimu Uwwe chitukawe namwe imo (pakunkamuchisya) aku tuchipikanilaga (yatakawecheteje).”

“Basi mun’jaulilani Firiauna ni kuja kuti: ‘Chisimu uwwe (jwalijose mwetuwe) ntenga jwa M’mbuje jwa iwumbe yosospe.’

‘(Tutumidwe) kuti mwaleche tuwigule nao wanache wa Israila (tujauleje nao ku Shami).”

(Firiauna) jwatite (kwa Musa): “Ana nganitunnela kukwetu n’di mwanache, soni ni kutama nowe pa umi wenu yaka yejinji?”

“Ni mwatesile chitendo chenu chamwatesile chila (chakuwulaga mundu) aku n’di wakanila (ukoto wangu kukwenu).”

(Musa) jwatite: “Natesile yalakweyo pajele ndemajo kutendaga une ndili jumpepe mwa wangamanyilila (yakwayana ni Ambuje wangu ni Utume).”

“Basi ni nantisile wanganyammwe ndema janan’jogwepe, basi Ambuje wangu ni ambele lunda lwaulamusi, soni ni andesile kuwa mwa achimitenga.”

“Ana soni weleu ni ukoto wakungumba nao kutendaga mwawisile mu ukapolo wanache wa Israila!”

Firiauna jwatite: “Ana M’mbuje jwa iwumbe yosopejo ni nduni?”

(Musa) jwatite: “M’mbuje jwa kumawunde ni petaka ni yaili chilikati chakwe, nam’baga jenumanja nkwete ntima wakusaka kusimichisya (tinsimichisye yele).”

(Firiauna) jwasalile wawaliji mungulugulu mwakwe (mwachalu) kuti: “Ana ngankupikana (yawanache yajukuwechetayi)?”

(Musa) jwatite: “M’mbuje gwenu jenumanja nambo soni M’mbuje jwa achatati wenu wandanda.”

(Firiauna) jwatite: “Chisimu ntenga jwenu jwatumisyidwe kukwenuju jwamasoka.”

(Musa) jwatite: “M’mbuje jwa kungopoko ni kungapililo ni yaili chilikati chakwe, nam’baga jenumanja wana lunda (timmanyilile yele).”

(Firiauna) jwatite: “Naga nkulitendela nnungu jwinepe jwangawaga une, chisimu chene chinantende kuwa jumpepe mwa akutawidwa.”

(Musa) jwatite: “Atamose ndili nam’bichilile nacho chindu chakuonechela palangulangu?”

(Firiauna) jwatite: “Wikani nacho, naga n’di mwa akuwecheta yakuona.”

Basi (Musa) ni jwaponyisye simbo jakwe (pasi). Naalole! Jasyuchile lijoka lyakuonechela

Soni ni jwakopwesye ligasa lyakwe. Naalole! Lyasyuchile lyeswela (lyakumelemenda) kwa akulola

(Firiauna) jwasalile achinkulungwa wawaliji mungulugulu mwakwe kuti: “Chisimu jwalakweju nsawi jwakumanyilila nnope (usawi).”

“Jukusaka kuti junkopokasye m’chilambo mwenu ni usawi wakweo, ana ni tinnamule yantiuli?”

Wanganyao watite (pakwapanga lunda Afiriauna): “Munnechelesyani panandi jwalakwe ni nkulugwejo (nkaawulaga chitema) ni ntumisye m’misinda akusonganganya.”

“Kuti ayiche najo kukwenu nsawi jwalijose jwali jwakumanyilila nnope (usawi).”

Basi asawi ni wasonganganyisidwe pa ndema jisyesyene ja lisiku lyakumanyika

Wandu nombe ni wawusyidwe kuti: “Ana jenumanja tinsongangane?”

“Kuti mwine uwwejo twakuye asawi naga wanganyao awe wakupunda.”

Basi ndema jawaiche asawi watite kwa Firiauna: “Ana chisimu kukwetu chikuwe kwana malipilo (gambone) natuwaga uwwejo ni wakupunda?”

(Firiauna) jwatite: “Elo, konjechesya soni pelepo chisimu wanganyammwe pajele ndemajo chim’be mwa akuwandichisyidwa (kukwangu).”

Musa jwasalile wanganyao kuti: “Ponyani jenumanja yankusaka kuponyayo.”

Basi ni waponyisye ngonji syao ni simbo syao, niwatite: “Kwa machili ga Firiauna chisimu uwwe ni wachituwe wakupunda.”

Sano Musa ni jwaponyisye simbo jakwe. Naalole! Jalakwe jamisile mwanakamo yaunami yawaliji nkulosya

Basi asawi wasenjelemukwiche kusujudu

Watite: “Tunkulupilile M’mbuje jwa iwumbe yosope.”

“M’mbuje jwa Musa ni Haruna.”

(Firiauna) jwatite: “Munkulupilile jwalakweju une nkaninampe lusa? Chisimu jwalakweju ni jwankulungwa jwenu jwan’jiganyisye usawi. Basi chisimu pangakawapa chiyyimanye (yachinantende). Chisimu chingate makono genu ni ngongolo syenu mwakutindanya (ligasa lyakun'dyo ni likau lyakunchiji, kapena ligasa lyakunchiji ni likau lyakun'dyo), kaneka ni chinankomele pansalaba wanaose.”

Wanganyao watite: “Yangali kandu, chisimu uwwe kwa M’mbuje gwetu tukuujila.”

“Chisimu uwwe tukwete chikulupi chanti, M’mbuje gwetu jutukululuchile sambi syetu ligongo lyakuwa wandanda mwa akukulupilila.”

Ni twan’juwulile Musa (malowe ganti): “Wigulani lwachilo ni achikapolo Wangu, chisimu wanganyammwe tinkuuyidwe.”

Basi Firiauna ni jwatumisye m’misinda (josope) akusonganganya

(Wawapitaga nchigombelesya yanti): “Chisimu wanganyawa (wanache wa Israila) ali kwene kankutula kannono.”

“Soni chisimu wanganyao akutupikasya ntima.”

“Soni chisimu uwwe tuli wosope (wajinji nambo soni) tuli mesope (tukwalolechesya wanganyao kuti akatupatisya ipato iliyose).”

Basi Uwwe ni twakopwesye wanganyao (wanya Afiriauna) m’matimbe ni achitutumule

Kwisa soni mu imatiilo yachipanje ni m’malo mwakuchimbichika

Mwele (ni mutwatendele), ni twaitesile kuwa yawinjilwa ni wanache wa Israila

Basi wanganyao ni wakuyiye (wanache wa Israilao) pakopoka kwa lyuwa

Basi ndema jagaonegene makuga ganagawili (likuga lya Firiauna ni lya Musa), wandu wa Musa watite: “Chisimu uwwe chitukamulwe.”

Jwalakwe jwatite: “Ngwamba! Chisimu Ambuje wangu ali none, chanjongolele (yakutenda kuti mpaka tujokoche).”

Basi ni twan’juwulile Musa (malowe ganti): “Putani mbwani ni simbo jenujo.” Ni jagawanyiche, upande uliose waliji nti chisawu litumbi lyekulungwa

Ni twawandichisye palakwepo waneo (Firiauna ni wandu wakwe)

Ni twan’jokwele Musa ni wawaliji najo imo wosopewene

Kaneka ni twamisisye waneo (Firiauna ni wandu wakwe)

Chisimu mu yalakweyi mwana chimanyisyo (cha ukombosi wa Allah). Nambo wajinji mwa wanganyao nganawa wakulupilila

Soni chisimu Ambuje wenu niwali Wamachili gakupunda, Wachanasa channope

Soni mwasoomelani wanganyao abali ja Ibrahima

Pandema jajwawusisye babagwe ni wandu wakwe kuti: “Chichi nkuchigalagatila?”

Wanganyao watite: “Tukugalagatila isanamu, basi ni tukwendelechela kuigalagatila ndema ni katema.”

(Ibrahima) jwatite: “Ana akasampikanaga pati nchawilangaga?”

“Kapena akasampaga chikamuchisyo (pati nchagalagatilaga) kapena kupeleka masausyo (naga ngaagalagatila)?”

Wanganyao watite: “(Ngwamba,) Nambo twasimene achatati wetu achitendaga mwatukutendelamu.”

(Ibrahima) jwatite: “Ana nkwaona awa wam’bele n’di nkwagalagatila,”

“Jenumanja ni achatati wenu wawalongolele?”

“Basi chisimu wanganyao ni amagongo wangu, ikaweje M’mbuje jwa iwumbe yosope.”

“Ajula juwangumbile, nambo soni Jwalakwe ni jwaakunjongolela (kwitala lyagoloka).”

“Nambo soni Jwalakwe ni Ajula jwaakundisyaga ni kumwesya.”

“Soni pati nwasile basi Jwalakwe ni jwaakumbosyaga.”

“Nambo soni Ajula jwatambe chiwa, nikwisa kumba umi soni (ku Kiyama).”

“Nambo soni Ajula jwangukolela tama janti tachingululuchila ilewi yangu Lisiku Lyamalipilo.”

“Ambuje wangu! Mumbani lunda lwakwilanyichisya (ichindu), ni musimanganye ni wandu wambone.”

“Soni mumbani kusaalidwa kwambone m’mikutula jamunyuma.”

“Ni mundende kuwa mwa akujitawala Mbepo Jachindimba.”

“Ni mwakululuchile atati wangu, chisimu walakweo awele wampepe mwa akusokonechela.”

“Soni nkaja kunjalusya pa Lisiku lyatachijimusyidwaga wandu m’malembe.”

“Lisiku lyangakamuchisya chipanje namuno wanache,”

“Ikaweje jwatachiika kwa Allah ni ntima weswela.”

Ni jichiwandichisyidwa Mbepo kwa wakun’jogopa (Allah)

Ni uchionesyedwa Moto Waukali kwa wapombotale

Ni kuchiwechetedwa kukwao: “Ali kwapi awala wamwaliji nkwagalagatila,”

“Kunneka Allah? Ana mpaka akombole kunkamuchisya wanganyammwe kapena kulikamuchisya achimisyene?”

Basi ni tachiponyedwa chamakuku mwalakwemo wanganyao ni akupombotala (wane)

Kwisa soni asilikali wa Ibulisu wosopewene

Tachiti, aku wanganyao achikanganaga mwalakwemo

“Tukunnumbila Allah! Chisimu uwwe twaliji nkusokonechela kwakuonechela.”

“Pandema jatwannandanyaga wanganyammwe ni M’mbuje jwa iwumbe yosope.”

“Ni nganatusokonesya ikaweje akulewa.”

“Ni nganitukola akutuombola.”

“Namuno nsyowe jwapantima (jwanti ni kutukamuchisya.)”

“Mwanti tungakole upile wakuujila (ku duniya), basi tungajiile kuwa mwa akukulupilila.”

Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Wandu wa Nuhu waakaaniile achimitenga

Ndema jawasalile nnongo n’jao Nuhu kuti: “Ana ngankogopa?”

“Chisimu une kukwenu ni Ntenga jwakulupichika.”

“Basi mun’jogopani Allah ni kumbikanila une.”

“Soni ngangun’juga pa yalakweyi malipilo, nganigawatu malipilo gangu ikaweje kwa M’mbuje jwa iwumbe yosope.”

“Basi mun’jogopani Allah ni kumbikanila une.”

Wanganyao watite: “Ana tunkulupilile mmwe kutendaga waakunkuya ni wandu wapasi?”

Jwalakwe jwatite: “Ana umanyilisichi ungwete pa yawaliji nkutenda wanganyao?”

“Nganichiwatu chiwalanjilo chao ikaweje kwa Ambuje wangu, ingawe mwamanyililaga.”

“Soni nganimba une jwanti ni kwawinga wakulupilila.”

“Nganimba une ikaweje nkutetela jwakuonechela.”

Wanganyao watite: “Naga ngankuleka E mmwe Nuhu! Chisimu chene chim’be mwa akusomedwa maganga.”

Jwalakwe jwatite: “Ambuje wangu! Chisimu wandu wangu angaaniile.”

“Basi jilanyani chilikati changune ni wanganyao ni chilanyo (chambone), ni munjokole une ni wandu wali none mu wakulupilila.”

Basi ni twan’jokwele jwalakwe pamo ni wawaliji najo m’chombo chepachile

Kaneko ni twamisisye wakusigalao panyuma pakwe

Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Achina Adi wakaaniile achimitenga

Ndema jawasalile nnongo n’jao Hudu kuti: “Ana ngankogopa?”

“Chisimu une kukwenu ni Ntenga jwakulupichika.”

“Basi mun’jogopani Allah ni kumbikanila une.”

“Soni ngangun’juga pa yalakweyi malipilo, nganigawatu malipilo gangu ikaweje kwa M’mbuje jwa iwumbe yosope.”

“Ana nkutawa pachikwesya palipose pakusalala nyumba syeleuleu mwamasanje (pagamba kusaka kulosya machili ngawa syagonamo)?”

“Ni nkulitawila makome gamakulungwakulungwa nti chisawu tinnonjele?”

“Soni ntite mpute ngondo nkasaputa mwakulikwesya.”

“Basi mun’jogopani Allah ni kumbikanila une.”

“Soni mun’jogopani Ajula jwampele ichindu (yambonembone) yankuimanyilila.”

“Ampele ilango ni wanache.”

“Kwisa soni migunda ni sulo syatutumule.”

“Chisimu une ngun’jogopela wanganyammwe ilagasyo ya lisiku lyekulungwa.”

Wanganyao watite: “Yalumope kukwetu, n’jamuche kapena nkawa mwa akwamuka.”

“Nganiyiwatu ayi (yatukutendayi) ikaweje nyendele ja wandu wandanda.”

“Soni nganituwatu uwwe wanti ni kupedwa ilagasyo.”

Basi wankaaniile, ni twajonasile. Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Achina Samuda wakaaniile achimitenga

Ndema jawasalile nnongo n’jao Swaleh kuti: “Ana ngankogopa?”

“Chisimu une kukwenu ni Ntenga jwakulupichika.”

“Basi mun’jogopani Allah ni kumbikanila une.”

“Soni ngangun’juga pa yalakweyi malipilo, nganigawa malipilo gangu ikaweje kwa M’mbuje jwa iwumbe yosope.”

“Ana (nkuganichisya kuti) tin’gambe kulechedwa mwantunjelele pa yaili pepanoyi.”

“M’migunda ni sulo syatutumule,”

“Ni mmela kwisa soni mitende itungatunga yakwe yakutependala?”

“Soni nkusepa m’matumbi majumba mwa ufundi.”

“Basi mun’jogopani Allah ni kumbikanila une.”

“Ni ngasimpikanila chilamusi cha akupunda malile (pasambi).”

“Awala waakuwatanganya pa chilambo, soni wangajilanya.”

Wanganyao watite: “Chisimu mmwe n’di mwa akulojedwa.”

“Nganim’ba mmwe ikaweje mundu mpela uwwewe, basi ikani nacho chisimosimo naga n’di mwa akuwecheta yakuona.”

Jwalakwe jwatite: “Aji ngamiya jajikongwe; jikwete kumwa (mesi), nombe jenumanja nkwete kumwa (mesi) palisiku lyakumanyika (ngamiya lisiku lyakwe nombe jenumanja lisiku lyenu).”

“Ni ngasin’jikwaya ni yakusakala iliyose itakwisa mwainkwembekenye ilagasyo yalisiku lyekulungwa.”

Nambo wanganyao wajisikite, mwanti wasyuchile kuwa wakuligamba

Basi ni yakwembekenye ilagasyo. Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Wandu wa Lutwi wakaaniile achimitenga

Ndema jawasalile nnongo n’jao Lutwi kuti: “Ana ngankogopa?”

“Chisimu une kukwenu ni Ntenga jwakulupichika.”

“Basi mun’jogopani Allah ni kumbikanila une.”

“Soni ngangun’juga pa yalakweyi malipilo, nganigawa malipilo gangu ikaweje kwa M’mbuje jwa iwumbe yosope.”

“Ana nkwaichilila achalume (achimijenu pakwatenda matanyula) mu iwumbe,”

“Ni nkwaleka awala wan’guumbiile Ambuje wenu kuti aweje achiwammakwenu? Nambo jenumanja ni wandu wakusumba mpika.”

Wanganyao watite: “Naga ngankuleka (yakutukanya matanyula) mmwe Lutwi! Chisimu chene chim’be mwa akukoposyedwa.”

Jwalakwe jwatite: “Chisimu une ni jumpepe mwa akuiwenga mwaukali itendo yenu (yamatanyulai).”

“Ambuje wangu! Munjokolani une ni liwasa lyangu ku yaakupanganya wanganyawa.”

Ni twan’jokwele jwalakwe ni liwasa lyakwe lyosopelyene

Ikaweje kangalamba kachikongwe (wankwao Lutwi wawaliji) mwa akusigalila munyuma

Kaneko ni twajonasile waneo

Ni twagwichisye wanganyao wula (jamaganga). Kaje kusakala wula ja akuteteledwa

Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Achinsyene itekete (wandu wa ku Madiyana) wakaaniile achimitenga

Ndema jawasalile Shuaibu kuti: “Ana ngankogopa?”

“Chisimu une kukwenu ni Ntenga jwakulupichika.”

“Basi mun’jogopani Allah ni kumbikanila une.”

“Soni ngangun’juga pa yalakweyi malipilo, nganigawa malipilo gangu ikaweje kwa M’mbuje jwa iwumbe yosope.”

“Gumbasyani chipiimo chambale ni ngasim’ba mwa akupungusya.”

“Ni mpimeje ni sikelo jakulungamika.”

“Soni ngasimwapunguchisyaga wandu indu yao, ni ngasin’jendagajendaga pa chilambo kupita nchiwatanganya.”

“Soni mun’jogopani Ajula juwan’gumbile wanganyammwe kwisa soni mikutula ja wandu wandanda.”

Wanganyao watite: “Chisimu mmwe n’di mwa akulojedwa.”

“Soni nganim’ba mmwe ikaweje mundu mpela uwwewe. Soni uwwe tukun’ganichisya kwene kuti n’di jumpepe mwa wandu waunami.”

“Basi tugwichisyani uwwe chipande cha liwunde (kuti chitujonanje) nam’baga mmwejo n’di mwa akuwecheta yakuona.”

Jwalakwe jwatite: “Ambuje wangu ni waakumanyilila chenene yankupanganya.”

Ni wankaaniile, basi ni yakwembekenye ilagasyo yalisiku lyam’bulili (waliwunde lyaipotesi), chisimu yalakweyo yaliji ilagasyo ya lisiku lyekulungwa

Chisimu mu yalakweyi mwana chilosyo, nambo wajinji mwa wanganyao nganawa wakulupilila

Soni chisimu Ambuje wenu ni wali Wamachili gakupunda, Wachanasa channope

Soni chisimu jele (Qur’aniji) jiwele jakutulusyidwa kuumila kwa M’mbuje jwa iwumbe yosope

Watulwiche najo Nsiimu (Jibulilu) wakulupichika

Pantima penu (mmwe Muhammadi ﷺ), kuti m’be mwa akutetela

Mu chiwecheto cha Charabu chakupikanika chenene

Soni yalakweyi yili mu itabu ya (wandu) wandanda

Ana nganichiwa chilosyo kukwao chanti walijiganye wa wanache wa Israila (mpela Abdullah bin Salam wawaujitiche Usilamu) ni kujimanya jalakwe (Qur’aniji kuti jakuona)

Soni tungajitulusye (Qur’aniji) kwa wanepe wangawa warabu

Basi ni kujisooma kukwao, nga nganawa wakujikulupilila jalakwe

Iyyoyopeyo tukupitisye (kujikanila Qur’an) m’mitima mwa akulewa (atamose kuti jukwasoomela mwarabu n’jao)

Ngaajikulupilila jalakwe mpaka akaiwone ilagasyo yakupoteka nnope

Basi ni tiichaichilila mwachisupuchisya wanganyao akakumanyilila

Ni tachiti: “Ana uwwe ngakomboleka kupedwa lipesa (kuti tutende toba)?”

Ana akuijanguya ilagasyo Yetu

Ana nkuiona uli, naga tuli twasengwasisye wanganyao kwa yaka (yejinji)

Kaneka ni kwaichilila (ipotesi) yawaliji nkupedwa chilanga

Ngasiyakamuchisya ayila yawele ali nkusengwasyidwa nayo

Soni Uwwe nganituujonanjeje musi uliose ikaweje wakolaga akutetela

Kuwa chikumbusyo, soni Uwwe nganituwa walupuso (pakwajonanga wandu nkanitwatetele)

Soni mashetani ngawa ni gagatulwisye jalakwe (Qur’aniji mwaakuwechetela achimakafili)

Soni ngaikuwajilwa kukwao, nambo soni nganawa akombwele (kujitulusya)

Chisimu wanganyao yakupikanila (Qur’an kumawunde jichitulukaga) asiwiiliidwe

Basi ngasimunnumbanjila pampepe ni Allah nnungu jwine, ntakwika mum’bele mwa akulagasyidwa

Ni mwatetelani walukosyo lwenu wali wakuwandichila

Nimwagoyechesye lipapiko lyenu (lya chanasa) awala wankuyiye mwa wakulupilila

Sano naga akunnyosya basi jilani: “Chisimu une mambalene nayo ichindu yankutenda.”

Nin’jegamile kwa (Allah) Jwamachili gakupunda, Jwachanasa channope

Ajula jwaakum’bona ndema jankwima (jikape kuswali patahajjudi)

Ni kutenganyikatenganyika kwenu (pakuswali ipindi nsano) pamo ni akusujudu (akuswali wane)

Chisimu Jwalakwe ni Jwakupikanichisya, Jwakumanyilila nnope

Ana nantagulile wanganyammwe jwagakuntuluchilaga mashetani

Gakuntuluchilaga jwalijose jwaunami wejinji, jwasambi nnope

Gakuponyaga yagapikene (kwinani kwaponyela achibimbi) nambo wajinji mwa wanganyao waunami

Akwimba chilaanga waliose akasawakuyaga wasokonechele

Ana ngankuiona yanti wanganyao m’chiwata chilichose (chamalowe) akuwa nkupojola

Soni kuti wanganyao akasawechetaga yangakutendaga

Ikaweje awala waakulupilile ni kutendaga yambone, ni kunkolangaga Allah kwejinji, ni kulikulupusya achimisyene panyuma pakutendeledwa lupuso (pakwajanga achimakafili ni ilaanga pa ilaanga yao yaakwimba yakwagamba Asilamu). Sano pangakawapa tamanyilile awala watesile lupuso kwagalauchila kutagalauchile