Yau - Chapter 3 - Al-Imran

Alif - Lam – Mim

Allah pangali nnungu jwine (jwakuwajilwa kun'galagatila) ikaweje Jwelepejo. Jwaumi wandamo, Jwachiimilecho (pakuchengeta iwumbe Yakwe)

Antuluchiisye mmwejo Chitabu mwakuonaonape, chachikwitichisya yayaliji paujo pakwe, niwatulwisye soni Taurat ni Injil

(Waitulwisye) kala kuti iwe (itabuyo) chongolo kwa wandu, ni watulwisye soni chilekanganyo (chachikulekanganya chilikati cha yakuona ni yaunami jajili Qur’an). Chisimu wandu wakanile ma Aya ga Allah akwete kupata ilagasyo yaukali nnope, sano Allah ni Jwamachili gakupunda, Nkuusya mbusyo syakupoteka kusyene

Chisimu kwa Allah ngachikasasisika chindu chilichose chapasi ni kwinani

Jwalakwe ni Ajula jwaakumpanjilaga kaoneche kenu n'di n’nyitumbo yaakutiji pakusaka (kuti m'be walume kapena wakongwe, waswela kapena wapiliu, walewu kapena wajipi, wakwimbala kapena wachilenje). Pangali nnungu jwine (jwakuwajilwa kun'galagatila) ikaweje Jwelepejo, Jwamachili gakupunda, Jwalunda lwakusokoka

Jwalakwe ni Ajula jwantuluchiisye chitabu (cha Qur’ani), mwalakwemo mwana ma Aya gakupikanika chenene, gele ni chitepo chachitabu (mugagonile malamusi), nambo (ma Aya) gane gangamanyika mate gakwe gasyesyene (mpela kundanda kwa sura sine), sano wandu wamuli m’mitima mwao mwana kupombotala (kwakuleka yakuona), ni akugakuyaga (ma Aya) gangamanyika mate gakwego, pakusachilila fitina (jakwawatanganyichisya wandu nganisyo) ni kusachilila kumanyilila mate gakwe gasyesyene. Nipangali waakumanyililaga mate gakwe chenene ikaweje Allah. Sano watiwiile mu umanyilisi akuwechetaga kuti: “Tujikulupilile (Qur’aniji), josope jene jityochele kwa M’mbuje gwetu (Allah). Ni pangali waakukumbuchilaga (ni kwakamuchisya kumbuchilako), ikaweje wandu waakwete lunda.”

(Watiwiile mu umanyilisio akasatiji): “Ambuje wetu! Ngasin'jipombotasya mitima jetu panyuma pakutujongola, tupani ukoto wakuumila Kukwenu, chisimu Mmwejo ni wan'di Wakupeleka kwannope.”

“Ambuje wetu! Chisimutu Mmwe ni Nkwasonganganya wandu pa Lisiku lyangali kaichila ya lyalakwelyo, chisimu Allah jwangakasa chilanga.”

Chisimu wandu wakanile, ngasichija kwakamuchisya chipanje chao atamose wanache wao chilichose mu (ipotesi) yakuumila kwa Allah, soni wanganyao ni sasu sya ku Moto

(Nyendele ja makafili galeloga jili) chisawu nyendele ja wandu wa Firiauna ni awala wapaujo pao, wakaaniile imanyilo Yetu, basi Allah waakwembekenye ligongo lya sambi syao, sano Allah ni Jwaukali pakupeleka ipotesi

Mwatagulilani awala wakanile kuti: “Pangakawapa chinkomboledwe (pa ngondo), ni chinchisonganganyisidwa wa ku Jahannama, kaje kusakala liuto lyagusama (lyan'ditandichile)!”

Yakuonaonape, kwaliji kwana kukwenu chimanyilo (cha chikulupusyo cha Allah) m’mikutula jiwili jajasimangene (pa ngondo ja Badri), nkutula wine waputaga ngondo petala lya Allah sano wineo waliji wachikafili, (makafiligo) galiji nkwaona (Asilamuo kuti ali wajinji) pakulandanya ni muwawelele wanganyao winji wakawili pa kulola kwameso (kutendaga nambo Asilamuo ali wapanandi). Sano Allah akun'dimbanganyaga ni chikulupusyo Chakwe jwansachile, chisimu mu yalakweyo mwana kuchetelela kusyene kwa wakwete meso (gakulolechesya mwa umanyilisi)

Kusalalisidwe ku wandu kuinonyela isako (yaumi wa duniya) kutandila achimmasyeto, wanache, ni maunjili-maunjili ga golodi ni silifa, ni mahachi gewichidwe imanyilo yanti gamanyicheje (kululila), ni ilango, kwisa soni mbeju. Yalakweyo ni yakusengwasya umi wa duniya, sano Allah ni jwakwete kwakuwujila kwambone

Jilani: “Ana nansalile yambone nnope kumpunda yalakweyo? Wandu wan’jogwepe (Allah), akwete kupata kwa M’mbuje gwao (Allah) Matimbe ga ku Mbepo, gasikujilima cha pasi pakwe sulo, chakawe wandamo mwalakwemo, ni (kupata) achiwammakwao waswejesyedwe, ni chinonyelo chakuumila kwa Allah, sano Allah ni Jwakwalolechesya achikapolo (Wakwe).”

Awala wakutiji: “Ambuje wetu! Chisimutu uwwe tukulupilile, basi tukululuchilani sambi syetu ni ntuwambasye ku ilagasyo ya Moto.”

Wakupilila, wakuwecheta yakuona, wakunda malamusi, wakutola, soni wakuwenda chikululuko kumasikusiku

Allah akuwichila umboni wanti pangali nnungu jwine (jwakuwajilwa kun'galagatila) ikaweje Jwelepejo, soni Achimalaika ni (wandu) wakwete umanyilisi (akuwichila nao wele umboniwu). (Jwalakwe ndawi syosope ni) Nkusimika chilungamiko. Pangali nnungu jwine (jwakuwajilwa kun'galagatila) ikaweje Jwelepejo, Jwamachili gakupunda, Jwalunda lwakusokoka

Chisimu naga dini (jakuona) pameso pa Allah ni Usilamu. Ni nganatindana awala wana kupedwaga chitabu (Ayuda ni Akilisito pa dini syao), ikaweje panyuma pakwaichilila umanyilisi (wa dini jakuona), (watindene) ligongo lya litima lyalyaliji chilikati chao, sano jwachakane ma Aya ga Allah, basi (tachim'balanga ni kun'dipila), chisimu Allah ni Jwachitema pakuwalanjila

Sano naga achikanganaga namwe, basi jilani: “Najipeleche ngope jangu kwa Allah pamo ni wandu wanguyiye.” Soni jilani kwa awala wana kupedwaga chitabu (Ayuda ni Akilisito) kwisa soni wangapakombola kulemba ni kuwalanga (Warabu) kuti: “Ana nsingwiche (ni kwinjila mu Usilamu)?” Sano naga asingwiche nikuti pamasile paajongweche, nambo naga akugalauka (kuleka Usilamu), basi masengo genu ni kulungusya (utenga), sano Allah ni Jwakwalolechesya achikapolo (Wakwe)

Chisimu awala waakukanila ma Aya ga Allah, ni kuulagaga Achimitume mwangali ligongo, ni kuulagaga soni mu wanduwa awala waakulamulaga yakulungamika, mwatagulilani ya ilagasyo yakupoteka nnope

Wele wanganyao ni wagajonasiche masengo gao pa duniya pano ni ku Akhera kwakwe, soni ngasakola wakwakamuchisya

Ana ngankwaona awala wapedwile chipande cha chitabu waakuwilanjidwa ku chitabu cha Allah kuti chaajilanye chilikati chao, kaneka likuga line mwa jamanjao liigalauchila kumbali aku lichisyululaga

Yalakweyotu ligongo lyanti wanganyao akasatiji: “Moto ngauja kutukwaya ikaweje mowa gakuwalanjikape.” Soni yanyenjile mu dini jaomo (yaunami) yaawele ali nkusepelela

Ana ichiwa uli ndema jituchasonganganya pa Lisiku lyangali kaichila ya lyalakwelyo? Soni mundu jwalijose tachilipidwa mwakwana pa yawapanganyisye, soni wanyao ngasatendedwa lupuso

Jilani: “E Allah! Mwasyene uchimwene wosope, nkasimum'bwecha uchimwene jwamunsachile ni kum'bula uchimweneo jwamunsachile, soni nkunchimbichisyaga jwamunsachile ni kunchembulusya jwamunsachile, umbone wosope uli M’myala Mwenu, chisimu Mmwe pa chindu chilichose m'bele Wakombola.”

“Nkasachijinjisyaga chilo m'muusi (ni kuleupa muusiwo kwipipa chilo mpela ndema jachitukuta), ni nkuujinjisyaga soni muusi m'chilo (nikuleupa chilocho kwipipa muusi mpela ndema jakusisima). Soni nkasakoposyaga chaumi kuumila mu chachiwe, nikoposya chachiwe kuumila mu chaumi (mpela nguku kopoka mwindanda lindanda kopoka mu nguku). Ni nkumpaga lisiki jwamunsachile lyangawalanjika.”

Wakulupilila akatomana nago ulongo makafili kwaleka wakulupilila (achin'jao), basi jwachatende yele nikuti ngasakola chilichose chakuuma kwa Allah, ikaweje (kutomana nago ulongo wapachanyape) pakuliigosa wanganyammwe ku yakusakala yao yankwiijogopa, sano Allah ni akuntetela ya Nsyenejo (pa ilagasyo Yakwe), soni kwa Allah pe ni kwakuujila

Jilani: “Kanga chinyyisise yaili mu idali mwenu kapena kuilochesya papaswela Allah tayimanyepe, soni akumanyilila yaili kumawunde ni yaili petaka, sano Allah pa chindu chilichose awele Jwakombola.”

Lisiku lyatachiisimana mundu jwalijose yambone yajwapanganyisye ili isonganganyisyidwe, ni yakusakala yakwe yajwapanganyisye, ni juchilajila yanti pakawe pana nkuuli welewu chilikati cha yakusakalayo ni jwalakwejo. Sano Allah ni akuntetela ya Nsyenejo (pa ilagasyo Yakwe), soni Allah ni Mpole kwa achikapolo (Wakwe)

Jilani (mmwe Muhammadi ﷺ): “Nam’baga jenumanja nkunnonyela Allah, basi munguyani; Allah channonyele soni chankululuchile sambi syenu, sano Allah ni Jwakululuka kusyene, Jwachanasa channope.”

Jilani: “Mumpikanilani Allah ni Ntenga ﷺ.” Nambo naga akugalauka, basi (chachipedwa ipotesi) chisimu Allah jwangaganonyela makafili

Chisimu Allah wansagwile Adam, Nuhu, liwasa lya Ibrahima ni liwasa lya Imrani pa iwumbe yosope

(Waliji) wanache; (wakupagwana) wane kuumila mwa wane chilikati chao, sano Allah ni Jwakupikanichisya, Jwakumanyilila nnope

(Kumbuchilani) katema kawawechete wankwao Imrani (wali mamawao Maryam jwali mamagwe Isa) kuti: “Ambuje wangu! Chisimu une nantawiile nasili janti; (mwanache) jwali nchitumbo changuchi chachiwa pepesa (lyakutumichila kunsikiti wa Baitul Muqaddas) basi mbochelani (nasili janguji), chisimu Mmwejo niwan'di Wakupikanichisya, Wakumanyilila nnope.”

Basi ndema jawam'beleche watite: “Ambuje wangu! Unetu mbeleche jwankongwe!” - Sano Allah ni Nkuchimanya chenene chawawelechecho - “Nambo jwannume (junyembecheeyeeje kuti chimbeleche) nganijuwa mpela jwankongwe (jwambeleche, ngati jwankongwe jwakuujilila machili soni ngawa nkutumichila mwakwanila ku nsikiti). Sano une nampele lina lyakuti ‘Maryam’, sonitu une ngun'juya jwalakweju ni wanache wakwe Kukwenu kutyochela ku shetani jwakuwinjidwa.”

Basi (Allah) M’mbujegwe wampochele kapochele kambone, soni ni wankusisye kakusye kambone, ni wantesile Zakariya kuwa nkunchengeta jwakwe. Ndawi ni katema kawaliji Zakariya ali nkun'jinjilila (Maryamujo) ku chigunguli cha mu nsikitimo, waliji nkuisimana kwa jwalakwejo yakulya. Watiji (pakum'busya): “E Maryam! Kwapi nkuipata ayi?” Jwalakwe jwatiji: “Yalakweyi yikutyochela kwa Allah. Chisimu Allah akumpaga lisiki jwansachile mwangawalanjila.”

Papopo Zakariya jwaawendile Ambujegwe (Allah) kuti: “Ambuje wangu! Mumbani kuumila Kukwenu mwanache jwambone, chisimu Mmwejo ni Wakupikana kuwenda.”

Sambano jwalakwe ali ajimi kuswali ku chigunguli cha mu nsikiti, Achimalaika wam'bilasile (pakunsalila kuti): “Chisimu Allah akumpa abali jakusengwasya ja (kuti chim'beleche mwanache lina lyakwe) Yahaya, juchachigombelechesya (ya ntume juchachipagwa ni) lilowe lyakuumila kwa Allah (lyakuti ‘M'be! Nikuwa’ jwali Isa) ni chachiwa soni (Yahayajo) jwakuchimbichika, jwakuligosa ku yansese soni (chachiwa) Ntume jwa mwa wandu wambone.”

Jwalakwe jwatite: “Ambuje wangu! Chingole chantiuli mwanache kutendaga pamasile paumbichilile uchekulu, nombe soni wankwangu wapalale?” (Lilaika) lyatite: “Mwele (nimuchiiwele); Allah akutendaga yasachile.”

Jwalakwe jwatite: “Ambuje wangu! Mumbichilani chimanyilo (chachiimanyisye yanti wankwangu ajigele chilu)!” (Lilaika) lyatite: “Chimanyilo chenu nichanti ngasinkombola kwawechetekasya wandu mowa gakwana gatatu ikaweje mwagamba kulanjilape basi. Ni mwaakolanjeje Ambuje wenu kwejinji soni mwaaswejesyeje (pakuswali) kwigulo ni kundawi.”

Soni (kumbuchilani) katema kawawechete Achimalaika kuti: “E mmwe Maryam! Chisimutu Allah ansagwile mmwejo, ni answejesye, soni ansagwile pa uchimbichimbi kwaapunda achakongwe wamitundu josope jawandu.”

“E mmwe Maryam! Linandiyani kwa Ambuje wenu, soni nsujuduji ni kwinamaga (kuswali) pamo ni akwinama.”

Syalakwesi ni sine mwa abali syakusisika syatukun'juwulila, ni nganim'ba nao wanganyao ndema jawaponyaga yakulembela yao (m'mesi kuwa ndoto janti amanyilile) kuti wani mwa jamanjao wachanchengete Maryam, soni nganim'ba nao ndema jawaliji nkukangana

(Kumbuchilani) katema kawawechete Achimalaika kuti: “E mmwe Maryam! Chisimutu Allah akuntagulila abali jakusengwasya ja (kuti chim'beleche mwanache ni) lilowe lyakuumila Kukwakwe (mwangali kusimangana ni walume, nambo pagamba kunsalila kuti: ‘welekani’ mmwe ni kuweleka), lina lyakwe chachiwa Masihi Isa mwanache jwa Maryam, jwakuchimbichika pa duniya ni ku Akhera kwakwe, soni ni jumpepe mu wakuwandichisyidwa (kwa Allah).”

“Soni chachiwecheta ni wandu ali nnuuli kwisa soni ali akusile, ni chachiwa mu wandu wambone.”

(Maryam) jwatite: “Ambuje wangu! Chingole chantiuli mwanache kutendaga nganangwayeje mundu jwalijose (jwannume)?” (Lilaika) lyatite: “Mwele (nimuchiiwele), Allah akasagumba chasachile. Pati asachile chilichose (kuti chipatikane), basi agambaga kuchisalila kuti ‘M'be!’ nichikasawaga.”

“Soni chachin'jiganya kulemba ni lunda lwakusokoka, kwisa soni Taurat ni Injil.”

“Soni (chachiwa) Ntenga (juchachitumisyidwa) ku wanache wa Israila (ni chachiwaga ali nkwasalila yanti): ‘Chisimutu une nam’bichilile ni chisimosimo kuumila kwa M'mbuje gwenu, mwanti chingombolecheje kun'gumbila kutyochela mwilongo chitusitusi cha chijuni nikuchipepelela, basi nikusyuka chijuni chisyesyene mu lisosa lya Allah, ni chimbosyeje wangalola kwachipago, wachinawa, ni kusyusyaga wawe mu lisosa lya Allah, chinansalileje soni yachin'dyeje ni yachinsunjeje m’majumba mwenu. Chisimu mu yalakweyi muwele mwana chimanyilo kukwenu nam'baga jenumanja wakulupilila (kusyene).’

‘Soni (chimbe) jwakwitichisya yaili paujo pangu yakutyochela m'Taurat, nikuti soni nankundisye yine yayakanyisyidwe kukwenu, ni nam’bichiiliile ni chisimosimo kuumila kwa M'mbuje gwenu (kuwa chimanyilo cha utume wangu), basi mun'jogopani Allah ni kungunda une.’

‘Chisimu Allah ni M'mbuje gwangu soni M'mbuje gwenu, basi mun'galagatilani Jwalakwejo, lyalakweli nilitala lyagoloka.”

Nambo ndema jawauweni Isa mwa jamanjao ukafili (kuti ukwendelechela) watite: “Ana wani wachawe akungamuchisya wangu (pa kuwilanjila) kwa Allah?” Wakulijiganya wakwe watite: “Uwwetu ni watuli wakunkamuchisya Allah, tunkulupilile Allah, soni wichilani umboni wanti uwwe chisimu chene tuli Asilamu.”

“Ambuje wetu! Uwwe tuikulupilile yantulwisye, ni tunkuyiye Ntenga, basi tulembani pamo ni akuwichila umboni (pa ya ujika Wenu).”

Ni watesile malindi (Ayuda gakusaka kum'bulaga Isa), nambo Allah walepelekasyisye malindigo (pakun'jigala Isa kujanajo kwinani nkanaiche mwakunkamula), sano Allah ni Jwambone nnope pakulepelekasya malindi ga amalindi

(Kumbuchilani) katema kajwawechete Allah kuti: “E mmwe Isa! Chisimutu Une chinan'jigale ni kunkwesya Kukwangu, soni chinanswejesye ku wandu makafili, ni chinaatende wandu wankuyiye kuwa pachanya pa wandu makafili mpaka lisiku lya Kiyama. Kaneko Kukwangu nikwakuujila kwenu ni tinjijiilanya chilikati chenu mu ichindu yamwaliji nkulekangana.”

“Sano awala waakanile, basi chinalagasye ni ilagasyo yaukali nnope pa duniya pano ni ku Akhera kwakwe, soni ngasakola wakwakamuchisya.”

Nambo awala waakulupilile ni kutendaga yambone, basi chachalipila malipilo gao mwakwana, sano Allah ni jwangaanonyela wakulitenda lupuso

Ayi yatukunsoomelayi (mmwe Muhammadi ﷺ) gawele ma Aya ni chikumbusyo chalunda lwakusokoka

Chisimu chilandanyo cha Isa kwa Allah chiwele chisawu Adam; wan'gumbile kuumila mwitaka kaneko niwantesile kuti: “Wani (mundu!)” Basi niwawele

(Yalakweyi ni) yakuona yakutyochela kwa Ambuje wenu (Allah), sano ngasim'ba mwa wakaichila

Sano wachakangane nomwe mu jele nganiji panyuma pa umanyilisi waum’bichililewu, basi jilani: “Ikani, twawilanje wanache wetu ni wanache wenu, achimmasyeto wetu ni achimmasyeto wenu, twachimisyewe ni mwachimisyene wakwe, kaneko ni tuwende (kwa Allah) mwakutetewala, basi ni tugatende malweso ga Allah kuti gawe kwa wali waunami (mwetuwe).”

Chisimu jalakweji ni ngani jakuonaonape, ni pangali nnungu jwine (jwakuwajilwa kun'galagatila) ikaweje Allah, soni chisimu Allah ni Jwamachili gakupunda, Jwalunda lwakusokoka

Nambo naga akugalauka (kuleka yele yakuonayi), basi (tachapa ipotesi), chisimu Allah ni Jwaakwamanya chenene akuwatanganya

Jilani: “E jenumanja achimisyene chitabu (Ayuda ni Akilisito)! Ikani kulilowe lyakulungamika (lyachitulandane) chilikati chetuwe ni jenumanja, lyanti ‘Tukan'galagatilaga (jwinepe) ikaweje Allah, ni tukam'bwanganyaga ni chilichose, soni wane mwetuwe akatenda wane kuwa milungu kunneka Allah.” Nambo naga akugalauka (kuleka lyele liloweli), basi jilani: “Wichilani umboni wanti uwwe chisimu chene tuli Asilamu (wakulipeleka kwa Allah).”

E jenumanja achimisyene chitabu (Ayuda ni Akilisito)! Anauli nkukanilana pa ya Ibrahima, kutendaga (itabu ya) Taurat ni Injil nganiitulusyidwa ikaweje panyuma pakwe, ana wangali lunda

Nnole! Wanganyammwe ni awalawala wamwakaanilene pa ichindu yamwakwete nayo umanyilisi, nambi uli (sano) nkukaanilana pa ichindu yanganinkola nayo umanyilisi, sano Allah ni Jwaakumanyilila nambo wanganyammwe ngankumanyilila

Ibrahima nganawa Myuda kapena Mkilisito, nambo waliji jwakongoka (pakulekangana nasyo dini syepombotale, waliji soni) Nsilamu (jwakulipeleka); soni nganawa mwa akuwanganya (Allah ni isanamu)

Chisimu wandu wali wakuwajilwa kulumbikana najo Ibrahima, ni awala wawankuyiye (pa ndema ja utume wakwe), ni aju Ntumeju (Muhammadi ﷺ), kwisa soni wandu waakulupilile (pakunda Usilamu), sano Allah ni Nkwaagosa wakulupilila

Likuga line lya wandu wawapedwile chitabu (Ayuda ni Akilisito), likasasachililaga lili linsokonesye (pakunkoposya mu Usilamu), ni pangali wampaka wasokonesye ikaweje achimisyene, nambo ngakumanyilila

E jenumanja achimisyene chitabu (Ayuda ni Akilisito)! Ligongo chichi nkugakana ma Aya ga Allah (Qur’an) kutendaga jenumanja nkutendelaga umboni (kuti gakuonaonape)

E jenumanja achimisyene chitabu (Ayuda ni Akilisito)! Ligongo chichi nkuwanganyaga yakuona ni yaunami ni kusisaga yakuona kutendaga jenumanja nchimanyililaga

Soni likuga line lya wandu wawapedwile chitabu lyatite (pakwasalila achimijao): “Ikulupililani yaitulusyidwe kwa wandu wakulupilila (Asilamu) kundanda kwa muusi (kundawi) ni n’nyikane kumbesi kwakwe (kwigulo) kuti mwine wanganyao chaujile (munyuma kuleka Usilamu).”

“Soni nkasimunkulupilila jwalijose ikaweje jwaakuyiye dini jenu (ja Chiyuda kapena Chikilisito).” Jilani: “Chisimu naga chongoko chisyesyene ni chongoko cha Allah basi.” (Ayuda ni Akilisitowo akasatiji sikati jao: “Nkasinkulupilila) ataakwika mwapedwile jwalijose yakulandana ni yampedwile wanganyammwe, kapena kuti ataakwika mwan'gomeche kwa M'mbuje gwenu.” Jilani: “Chisimu umbone wosope uli m’Myala mwa Allah akasampaga jwansachile, sano Allah ni Jwakwanila kusyene (ku iwumbe Yakwe), Jwakumanyilila nnope.”

Akunsagulilaga ukoto Wakwe jwansachile, soni Allah ni Nsyene umbone wekulungwa

Soni mu wandu wawapedwile chitabu mwana wanti naga n'di mwasunjisye maunjili-maunjili ga chipanje mpaka am'buchisye, ni mwana wane mwa jamanjao wanti naga n'di mwasunjisye Dinari (mbiya jimpepe), nganawa am'buchisye ni ikaweje n'di mwaajimilile (pa kwawilasya mwa kwakwekweteka). Yalakweyo ligongo lyanti wanganyao akasatiji: “Pangali litala lililyose lyakutugambila uwwe ligongo lya (kwaaliila) ajinga (wanganituwa nao imo mu dini ligongo Allah atukundisye).” Ni akunnambuchisyaga Allah aku achimanyililaga (kuti akulambusya)

(Ngwamba!) Nambo jwaakukwanisya chilanga chakwe, ni kuwaga ali nkun'jogopa (Allah pakuligosa ku ilemwa, jwele nijuchawe jwakunonyeledwa ni Allah), basi Allah chisimu chene akwanonyela wakun'jogopa (Jwalakwe)

Chisimu wandu waakusagula (ya duniya) yantengo wannono pakusumanya ni chilanga cha Allah kwisa soni kulumbila kwao, wanyao ngasakola liunjili lililyose (lya yambone) ku Akhera, soni Allah ngaaja kwawechetekasya, ata nikwalola kose ngaaja kwalola lisiku lya Kiyama, soni ngaaja kwaswejesya. Ni akwete kupata wanganyao ilagasyo yakupoteka nnope

Soni mwa jamanjao chisimu chene mwana likuga line likasapindaga ndimi syao pakusooma chitabu kuti nyyiganichisyeje (yaakusoomayo) kuti ya m’chitabu, kutendaga nganiiwa ya m’chitabu. Ni akutiji: “Yalakweyi iwumile kwa Allah.” Kutendaga nganiyiuma kwa Allah. Ni akunnambuchisyaga Allah aku achimanyililaga (kuti akulambusya)

Nganiiwa yakuwajilwa kwa mundu (mpela Isa mwanache jwa Maryam) juwapedwile chitabu, umanyilisi wakwilanyichisya ni utume, panyuma pakwe ni kwatendaga wandu kuti: “M'beje wakungalagatila une mmalo mwa Allah.” Nambo (yawasalilaga yakwe niyanti): “M'be jenumanja wakutumichila Ambuje Nnungu (mwalunda ni umanyilisi) ligongo lyanti nkwiganyaga chitabu soni ligongo lyanti nkuchisoomaga (chitabucho).”

Soni nganawa annamulile yanti mwatendeje Achimalaika ni Achimitume kuwa milungu. Ana mpaka annamulile ya ukafili panyuma panti n'di Asilamu

Soni (kumbuchilani) katema kajwatawene Allah chilanga ni Achimitume (pakwatenda kuti): “Chisimu mulimose mwachinampele chitabu ni lunda lwakusokoka (nikuwa ni umanyilisi kwisa soni uchimbichimbi wakupunda), kaneko ni kwisa kum’bichilila Ntenga jwakwitichisya yan'di nayo, ichiwajilwa kukwenu kunkulupilila ni kunkamuchisya.” (Jwalakwe) jwaawusisye kuti: “Ana nkundile ni kujigala pa yalakweyi chilanga Changuchi?” Wanganyao watite: “Tukundile.” (Jwalakwe) jwatite: “Basi tendelani umboni (yachilangachi), nombe Une ndinamwe pakutendela umboni.”

Nambo wachagalauche panyuma pa yele, basi wanyao niwali wakunyosya

Ana akusaka dini jinepe jangawaga ja Allah, kutendaga chilichose cha kumawunde ni petaka chikwitika Kukwakwe mwakusaka ni mwangasaka? Soni Kukwakwe chachiuchisidwa

Jilani: “Tukulupilile mwa Allah, ni yaitulusyidwe kukwetu (jajili Qur’an) ni yayatulusyidwe kwa Ibrahima, Ismaila, Isihaka, Yaakubu ni isukulu yakwe, ni yawapedwile Musa ni Isa, ni Achimitume kuumila kwa Ambuje wao, ngatukulekanganya chilikati cha jumpepe mwa wanganyao, soni uwwe Kukwakwe tukulipeleka.”

Soni jwachasache dini jinepe jangawaga ja Usilamu, nikuti ngasijipocheledwa kuumila kukwakwe, soni jwalakwejo ku Akhera tachiwa mu wakwasika

Ana Allah mpaka wajongole chinauli wandu wakanile panyuma paakulupilila kwao ni kutendela umboni yanti chisimu Ntenga (Muhammadi ﷺ) jwakuonaonape, ni kwaichilila soni ilosyo yakuonechela palangulangu? Sano Allah jwangawa nkwajongola wandu wakulitenda lupuso

Wanganyao malipilo gao niganti; chisimu malweso ga Allah, Achimalaika ni wandu wosope gali pa jamanjao

Mwele (mmalweso ga ku Motogo) chakawe wandamo, ilagasyo ngaija kupungusyidwa kwa jamanjao, soni wanyao ngaaja kupedwa lipesa

Ikaweje awala watesile toba panyuma pa yalakweyo, ni kwilanya (itendo yao), basi chisimu Allah ni Jwakululuka kusyene, Jwachanasa channope

Chisimu awala wakanile panyuma pa chikulupi chao, kaneko nikonjechesya soni kanila, toba jao ngasijipocheledwa ata panandi, soni wanyao niwali wakusokonechela

Chisimu awala wakanile ni kwikanila kuwa ali makafili, nikuti ngasijipocheledwa kutyochela kwa jwalijose mwa jamanjao golodi jagumbala chilambo cha pasi atamuno ali aliwombolele najo, wanganyao akwete kupata ilagasyo yakupoteka nnope, soni ngasakola wakwakamuchisya

Nganim'ba mpatile umbone (usyesyene) mpaka nkaatoole mu yankuinonyela, sano mu chilichose chachintole, basi chisimu chalakwecho Allah akuchimanya chenene

Yakulya yosope yaliji ya halaal ku wanache wa Israila, ikaweje yawalitendele kuwa ya haraam Israilajo nsyene Taurat nkanijitulusyidwe. Jilani: “Basi ikani najo Taurat ni n'jisoome naga jenumanja nkuwecheta yakuona.”

Sano juchansepele Allah unami panyuma pa yalakweyi, basi wanganyao niwachawe wakulitenda lupuso

Jilani: “Allah awechete yakuona, basi kuyani dini ja Ibrahima jwakongoka soni nganawa mwa akuwanganya (Allah ni isanamu).”

Chisimu naga nyumba jandanda jajawichidwe kwa wandu (kuwa jagalagatilamo Allah) ni jajili pa Bakkah (ku Maaka), jaupile soni (jiwele) chongolo ku iwumbe yosope (wandu ni majini)

Mwalakwemo mwana imanyilo yakuonechela (yakulosya kuchimbichika kwakwe ni uchikala wakwe), mpela pamalo pawaliji nkwima Ibrahima (ndema jawaliji nkutawa Likaabalyo), soni jwachajijinjile (jele nyumbaji) chawe mu ntunjelele. Sano kwa lilamusi lya Allah iwele yakusosekwa kwa wandu kuja kutenda Hija ku nyumbajo wampaka akombole kupata litala lyakwaulila kwele, nambo jwatakane (kujakutenda Hija mwangali chipaka chisyesyene nikuti chawe kafili) basi chisimu Allah ni Jwankwanekwane jwangalajila iwumbe Yakwe

Jilani: “E jenumanja achimisyene chitabu (Ayuda ni Akilisito)! Ligongo chichi nkukanila ma Aya ga Allah kutendaga Allah awele Mboni pa ichindu yankutenda?”

Jilani: “E jenumanja achimisyene chitabu (Ayuda ni Akilisito)! Ligongo chichi nkwasiwilila wandu wakulupilile kuti akakuya litala lya Allah (wauli Usilamu)? Nkulisosela lyalakwelyo kupombotala (kuti lionecheje mpela lyakusakala) kutendaga jenumanja nkuwichila umboni (wanti Usilamu ni litala lyagoloka)? Sanotu Allah nganawa jwanti ni ngaimanya yankutenda.”

E jenumanja wankulupilile! Naga nkwika mwakulipikanila likuga line mu wandu wawapedwile chitabu, cham'buchisye ku ukafili panyuma pakulupilila kwenu

Ana chim'be makafili chanti uli kutendaga ma Aya ga Allah gakusoomedwa kukwenu nombenajo Ntenga ﷺ ali chilikati chenu? Sano jwachalikamulile chenene mwa Allah, nikuti pamasile paajongoleledwe kwitala lyagoloka

E jenumanja wankulupilile! Mun'jogopani Allah kun'jogopa kusyesyene, soni nkaika mwa kuwa ikaweje n'di Asilamu

Soni kamulisyani wanaose lukonji lwa Allah (jajili Qur’an) ni ngasinnekangana. Soni kumbuchilani chindimba cha Allah pa jenumanja; pandema jamwaliji wakuwengana, basi ni jwalumbikenye chilikati cha mitima jenu mwanti mwa chindimba Chakwe mwasyuchile kuwa waulongo. Soni mwaliji mungulugulu mwalisimbo lya Moto, ni wan'jokwele mwalakwemo. Iyyoyopeyo ni yakutiji Allah pakusalichisya kukwenu ma Aya Gakwe kuti n'jongoche

Soni lipatikane mwa jenumanja likuga lyakuwilanjila ku umbone (Usilamu), ni lilamuleje (kutenda) yambone ni kanyaga yakusakala, sano wanganyao niwachawe wakupunda

Ni ngasim'ba chisawu awala wawagawikene ni kulekangana panyuma pa kwaichilila ilosyo yakuonechela palangulangu, soni wanganyao akwete kupata ilagasyo yekulungwa nnope

Lisiku lya sichiswejela ngope sine ni kupiilila ngope sine, sano awala wasichipiilila ngope syao (chachatenda kuti): “Ana mwakaaniile panyuma pakulupilila kwenu? Basi pasyani ilagasyo ligongo lya ayila yamwaliji nkuikana.”

Sano nambo awala wasiichiswejela ngope syao, basi tachiwa mu ukoto wa Allah, wanyao mwalakwemo tachiwa wandamo

Gele ni ma Aya ga Allah gatukunsoomela mwakuonaonape, ni nganawa Allah jwakusaka kuitenda lupuso iwumbe (Yakwe)

Soni yosope yaili kumawunde ni yaili petaka nsyene jwakwe Allah, soni kwa Allah ni kwakuujila indu yosope

Jenumanja (Asilamu) m'bele nkutula wambone nnope waukoposyedwe (pakusagulidwa chilikati cha mikutula josope kuti uwe wakamuchisya) ku wandu, nkulamulaga (kutenda) yambone ni nkukanyaga yakusakala, soni ni nkukulupililaga mwa Allah. Mwanti wawapedwile chitabu (Ayuda ni Akilisito) ingawe wakulupilile (pakunda Usilamu), ingaliji yambone kukwao, wane mwa jamanjao wana chikulupi, nambo wajinjio wakunyosya

Nganawa annagasisye wanganyao ikaweje ni ilagasyo (yannonope), soni naga ali atite ampute ngondo mpaka annosye migongo (kutiila), soni wanyao ngawa nkukulupusyidwa

Kuwichidwe pa jamanjao kuchembulusyidwa palipose paakupatikana ikaweje (naga ali alikamulile) ni lukonji lwa Allah (pakuya dini jakwe ja Usilamu) kapena lukonji lwa wandu, (pakamuchisyidwa ni wandu wane mu yakutenda yao, nambo pajika ngawa nkola machili). Ni awajilwe kupata gasabu ja kuumila kwa Allah, soni ni kuwichiidwe pa jamanjao kulaga (kwangalekangana nako), yalakweyo ligongo lyanti wanganyao waliji nkukanila ma Aya ga Allah, nikuwaga soni ali nkuulaga Achimitume mwangali ligongo. Basi yeleyo ni ligongo lya kunyosya kwao soni waliji ali nkusumba mipika

Nganawa wosope wene kuti wakulandana, nkutula wine mu wawapedwile chitabu (Ayuda ni Akilisito) uwele wakwimilichika (pa yakuona yakuya Usilamu panyuma pakusinguka kwao), akasasoomaga ma Aya ga Allah ndawi syaachilo aku achisujuduji (kuswali)

Akasakulupililaga mwa Allah ni Lisiku Lyambesi, ni akasalamulaga (kutenda) yambone nikanyaga yakusakala, soni ni akasatendaga chitema pa masengo gambone. Sano wanganyao ni wali mu wandu wambone

Soni chilichose chachapanganye mu ichindu yambone basi ngaaja kwakana nacho (nambo chaakaalipile malipilo gambone). Sano Allah ni Jwaakwamanya chenene wakun'jogopa (Jwalakwe)

Chilandanyo cha indu yaakutola pa awu umi wa duniya uno, chili chisawu mbungo jajili nkati mwakwe mwana kusisima kwakogoya jajipujiile n'gunda wa wandu waalitendele lupuso achimisyene ni kuujonanga, ni nganiwatenda Allah lupuso nambo achimisyene ni waakulitenda lupuso

E jenumanja wankulupilile! Ngasimwatenda wanganawa mwa jenumanja kuwa isyowe yakwisalila asili syenu, ngati wanyao ngawa nkuleka kulimbichila kutenda yakun'jonanga (naakailochesye pameso), ikwanonyelaga yaikunnagasyaga, umasile pauwonechele umagongo kuumila pakamwa pao, nambo soni yayikusisa mitima jao (nganisyo syakusakala) iwele yekulungwa nnope. Pamasile patusalichisye ma Aya kukwenu nam'baga jenumanja wakumanyililaga

Ha! Ana jenumanja ni wankwanonyela wanganyao kutendaga wanyao ali ngaakunnonyela atamuno kuti jenumanja nkuikulupililaga itabu yosope? Soni naga ali asimangene namwe akasatiji: “Tukulupilile.” Nambo naga ali pakasyepela akasannumilaga songa sya yala ligongo lya ukali. Jilani: “Wani ni ukali wenuo, chisimu Allah ni Nkuimanya chenene yayili m’mitima.”

Naga chili chim’bichilile (chindu) chambone chikasachasakalisyaga, nambo naga chili chimpatile chakusakala akasasengwaga nacho, nambo naga mpilile nikuwa niwoga (wakun'jogopa Allah), nikuti malindi gao ngawa nkuntenda chilichose. Chisimu Allah ichindu yaakutenda wanganyao juwele Jwaisyungula (kwaimanya chenene)

Soni (kumbuchilani mmwe Muhammadi ﷺ) katema kamwaalaawiile kutyochela kwiwasa lyenu kuti nkaalinganyichisye wakulupilila mauto gakumenyanila (ngondo ja Uhudi), sano Allah ni Jwakupikanichisya, Jwakumanyilila nnope

Katema kagasachilile makuga gawili mwa jenumanja kuti ganyambe (ligongo lya woga nikutila muwatilile achinakunaku), nambo Allah nijuwaliji Jwaagagosa (makuga) ganagawiligo (mwanti wagasunjile kuti gakatila), sano wakulupilila ajegamileje kwa Allah pe basi

Soni Allah chisimu chene wankulupwisye pa (ngondo ja) Badri kutendaga jenumanja n'di wangali machili (ligongo lya unandi wenu ni kupelembelwa ida yangondo), basi mun'jogopani Allah kuti m'be wakutogolela

Katema kamwasalilaga wakulupilila kuti: “Ana ngaiwa yakunkwana jenumanja kuti M'mbuje gwenu junkamuchisye ni Achimalaika wakwana masausande gatatu wakutulusyidwa?”

“Elo! Naga mpilile ni kuligosa (ku ilemwa) soni (amagongo wenuwo) ni kunyyichilila mwa chitema chao chalakwechi, M'mbuje gwenu junkamuchisye ni Achimalaika wakwana masausande nsano wana imanyilo.”

Ni nganaitenda yalakweyi Allah ikaweje kuti iwe abali jakusengwasya kukwenu, ni kuti soni jipate kutulala mitima jenu ni yalakweyo, sano chikulupusyo nganichiwa chityochele kwinepe ikaweje kwa Allah, Jwamachili gakupunda, Jwalunda lwakusokoka

(Watesile yalakweyi) kuti akate chipande cha wandu makafili (pakwaulaga wane mwa wanganyao), kapena kwajigasya nchesela (wakusigalao) ni galauka yalayalape (pangapata yasachileje)

Nganinkola (mmwe Muhammadi ﷺ) chilamusi chilichose (pa wanganyao), mwine (Allah) komboleka kwapochela toba jao (ni kwajongola panyuma pa ukafili wao) kapena kwapa ilagasyo, pakuti wanganyao chisimu chene ali wakulitenda lupuso

Soni yosope yaili kumawunde ni yaili petaka nsyene jwakwe Allah, akunkululuchilaga jwansachile ni kumpa ilagasyo jwansachile, sano Allah ni Jwaakululuka kusyene, Jwachanasa channope

E jenumanja wankulupilile! Ngasin'dyaga (chipanje cha) katapila mwakonjechesya-jonjechesya, ni mun'jogopani Allah kuti m'be wakupunda

Soni ujogopani Moto waulinganyisyidwe kuwa wa makafili

Ni mumpikanilani Allah kwisa soni Ntenga ﷺ kuti ntendeledwe chanasa

Soni kangamalani ku (masengo gagantendekasye kupata) chikululuko chakuumila kwa M'mbuje gwenu, ni Litimbe (lya ku Mbepo) lyalili kusapanguka kwa nchijiipi mwakwe kuli chisawu kwinani ni pasi, lyalilinganyisyidwe kuwa lya wakun'jogopa (Allah)

Awala waakutolaga (ipanje yao) ili nkwajendela chenene atamuno ili yakanganiche, ni waakusisaga ukali wao ni waakwakululuchilaga wandu, sano Allah ni akwanonyelaga wakolosya

Ni awala wanti naga atesile chakunyalaya (chachili chilemwa chekulungwa mpela chikululu), kapena kulitenda lupuso achimisyene (pakutenda ilemwa yamwanamwana), akasankumbuchilaga Allah ni kuwenda chikululuko pa sambi syao – Ana ni nduni jwampaka akululuche sambi pangawaga Allah? - Soni ni ngakasapitilisyaga pa yatesilejeyo kutendaga achimanyililaga

Wanganyao malipilo gao nichikululuko chakuumila kwa M’mbuje gwao kwisa soni Matimbe ga ku Mbepo gasikujilima cha pasi pakwe sulo, chakawe wandamo mwalakwemo, soni kaje kusalala malipilo ga akupanganya (masengo gambone)

Paamasile pagaapiite kalakala jenumanja nkanimpagwe matala (gakulekangana-lekangana gaipotesi), basi jendagani pa chilambo kupita nchilola mujawelele mbesi ja akukanila

Aku kuwele gombelesya ku wandu (wosope), ni chongolo kwisa soni chamuko kwa wakun'jogopa (Allah)

Ni ngasimpela (pakumenyana ni amagongo wenu), soni ngasin'dandaula (pa ipato yayimpatile), soni jenumanja niwachim'be wapenani naga n'di wakulupilila (kusyene)

Nagawaga gampatile mawanga, nikuti nombe wandu waneo pakwete pagapatile mawanga ganti chisawu gelega, sano galakwego ni masiku gatukugagalausyagalausya chilikati cha wandu (lelo kwajendela ichindu chenene wane malawi nikwisa kwajendela chenene wane), soni Allah (atesile yalakweyi) kuti waamanyukule wandu wakulupilile (kusyesyene, pangatila pa ngondojo), nikuti soni watende wane mwa jemanja kuwa wakuwila pa ngondo ja dini, sano Allah jwangaanonyela wakulitenda lupuso

Soni kuti Allah waswejesye awala wakulupilile nikugamala makafili (pakugajonanga)

Ana nkuganichisya yanti chinkajinjile ku Mbepo, kutendaga Allah nkaniwamanyukule wandu waamenyene ngondo (petala Lyakwe) mwa jenumanja, ni kwamanyukula soni wakupilila (pa ngondojo)

Soni chisimu chene wanganyammwe mwaliji nkuchilajila chiwa (chakuwila pa ngondo ja Allah) nkaninsimangane nacho, sano ni nchiweni kusyene (pa kuulajidwa achimijenu) aku n'di nkulola

Ni nganawa Muhammadi ﷺ ikaweje Ntenga basi, Achimitenga (wajinji) wapite paujo pakwe. Ana naga ali awile kapena kuulajidwa mpaka n'galauchile ku indende yenu (kuujila ku ukafili)? Sano jwampaka agalauchile ku indende yakwe nganawa apeleche chisausyo chilichose kwa Allah, sano Allah ni chachalipila wakutogolela

Soni nganiiwa yanti mundu jwalijose ni komboleka kuwa, ikaweje mu lisosa lya Allah pandema jakwe jelembedwe, sano jwaakusaka malipilo ga pa duniya chitumpele papopo, nombe soni jwaakusaka malipilo ga ku Akhera chitukampele kukoko, ni chitwalipila (yambone) wakutogolela

Ana soni walingwawalingwa mwa Achimitume wawamenyene ngondo ali imo ni wandu wajinji waumanyilisi (wa dini)! Nambotu nganatenguka ligongo lya ipato yayapatile petala lya Allah, soni nganatenda ulesi, nambo soni nganalitulusya (pameso pa amagongo wao), sano Allah ni akwanonyela wakupilila

Ni nganiiwaga yakuwecheta yao ikaweje watiji: “Ambuje wetu! Tukululuchilani ilewi yetu ni kupelenganya kwetu mpika pa indu yetu, soni n'galimbanganye makawu getu, ni ntukulupusye ku wandu achimakafili.”

Basi Allah niwapele malipilo ga pa duniya ni malipilo gambone nnope ga ku Akhera, sano Allah ni akwanonyela wakolosya

E jenumanja wankulupilile! Naga nkwiika mwakwapikanila awala wakanile, cham'buchisye ku indende yenu (ku ukafili), ni chin'galauche (kuumila ku chikulupi) n'di wakwasika

Nambo Allah ni M'mbuje gwenu (jwakunkamuchisya), soni Jwalakwe ni Jwambone nnope kwapunda akukamuchisya (wosope)

Chituponye woga m’mitima mwa awala wakanile ligongo lyakum'bwanganya kwao Allah ni ichindu yanganaituluchisya umboni (wakulosya ulungu wakwe). Sano mauto gao (gakutamilichika) chigakawe ku Moto, kaje kusakala mauto ga wakulitenda lupuso

Soni Allah pamasile pawankwanilichisye mwakuonaonape chilanga Chakwe (cha kwakombola amagongo wenu) ndema jamwaliji nkwaulaga mu lisosa Lyakwe, kwikanila ndema jamwalepele ni kulekangana nganisyo palilamusi (lya Ntume ﷺ lyangalekangana nalyo litumbi) ni mwanyochesye panyuma pakunnosya yamwaliji nkuinonyela, wane mwa jenumanja pana waakunonyelwa ni duniya soni wane mwa jenumanja pana waakunonyelwa ni Akhera, kaneka (Allah) wantyosyisye ku wanganyao (pakutiila) kuti an'dinje (kupilila kwenu), sano pamasile pankululuchile, soni Allah ni Nsyene umbone wakwatendela wakulupilila

(Kumbuchilani) katema kamwaliji nkukwela (mwitumbi pakwatiila amagongo wenu), soni n'di ngankugalauka kuti mpikane ya jwalijose, kutendaga Ntenga ﷺ ali nkum'bilanga munyuma mwenu, (Allah) niwan'dipile pakumpa madandausi pachanya pa madandausi, (nambo wankululuchile) kuti nkadandaula pa (yambone) yayimpite soni atamuno pa (ipato) yayimpatile, sano Allah ni Nkusimanya chenene abali syosope sya yankutenda

Kaneko panyuma pa madandausi wantuluchisye ntunjelele walugono lwana kulikupulaga likuga line mwa jenumanja, kutendaga likuga line nganisyo sya m’mitima mwao syapele mbumu kusyene (mwanti ata lugono nganilwakupula), waliji nkun'ganichisya Allah yangawa yakuona, nganisyo syachijinga; waliji nkuwecheta kuti: “Ana mpela tukwete uwwe mu aji nganiji chilichose (chagundana ni ulamusi)?” Jilani: “Ichindu yosope yene nsyene jwakwe Allah.” Akusisa m’mitima mwao yangaakwilosya kukwenu, pakuwecheta akuti: “Tungakole mu aji nganiji chilichose (chagundana ni ulamusi) nga nganituulajidwa pepano.” Jilani: “Atamuno nkawe n'di m’majumba mwenu, angakopweche wandu walembedwe kuti awulajidwe kwaula m’mauto mwao mwakuwila, nambo Allah (jwatesile yalakweyi) kuti juimanyukule yayili mu idali mwenu, ni kuti soni juiswejesye yaili m’mitima mwenu, sano Allah ni Nkuimanya chenene yaili mu idali

Chisimu wandu wawagalawiche (kutiila) mwa jenumanja lisiku lyagaasimangene makuga gawili (pa ngondo ja Uhudi), chisimu shetani ni juwatelesyasisye ligongo lya ine (mwa ilemwa) yawapanganyisye, sano Allah pamasile pawakululuchile wanganyao, chisimu Allah ni Jwakululuka kusyene, Jwakutulala nnope ntima

E jenumanja wankulupilile! Ngasim'ba chisawu awala wakanile (achinakunaku), soni wakutiji pakwagamba achimijao pati ajesilejesile pa chilambo kapena kuja ku ngondo (nikuwila kukoko): “Angawe waliji nowe, nga nganawa kapena kuulajidwa.” Allah (jwapele syele nganisyosyo) kuti jusitende kuwa syakutendekasya kuligamba m’mitima mwao, sano Allah ni jwaakupelekaga umi ni chiwa, soni Allah ichindu yankutenda juwele Jwakuilolechesya

Sano naga n'di m'bulajidwe petala lya Allah kapena kuwa chisimu chikululuko chakuumila kwa Allah ni chanasa iwele yambone nnope ku ipunda yaakusonganganya wanganyao (pa umi wa duniya)

Soni naga n'di m'bwile kapena kuulajidwa, chisimu kwa Allah chinchisonganganyisyidwa

Sano ligongo lya ukoto wakuumila kwa Allah m'bele (mmwe Muhammadi ﷺ) wakupepa ntima kwa wanganyao, nambo nkawe waukali, wakalalisya ntima, akapwilingene mumbali mwenu, basi mwalekani ni kwawendela chikululuko, soni mwawusyani nganisyo pa ichindu, nambo naga n'di nsimichisye, basi jegamilani kwa Allah (ni kutenda yansimichisyeyo), chisimu Allah jukwanonyela wakwegamila (Kukwakwe)

Naga Allah ali atite ankamuchisye basi pangali wampaka ankombole, nambo naga ali atite anneche (ngankamuchisya) ana niwani wampaka ankamuchisye panyuma pa (kunneka) Jwalakwe? Sano kwa Allah pe ajegamile wakulupilila

Soni nganiiwa yakomboleka kwa ntume jwalijose gwasya (chindu chakupata kungondo), mwanti jwalijose jwachagwasye (chindu) tachiikanacho chawagwasyisyecho lisiku lya Kiyama, kaneka mundu jwalijose tachilipidwa mwakwanila pa yawapanganyisye, soni wanyao ngasaja kutendedwa lupuso

Ana jwaakukuya chinonyelo cha Allah mpaka alandane ni jwajim'bajile gasabu jakuumila kwa Allah, soni liuto lyakwe nikuwa ku Jahannama? Kaje kusakala malo gakuujila gakwe

Wanganyao akwete mauchimbichimbi (gakulekangana) kwa Allah, sano Allah ni Jwakuilolechesya yaakutenda

Chisimu Allah pamasile pawatendele wakulupilila ukoto wekulungwa nnope pakwatumichisya Ntenga jwakuumila mu wanganyapeo, jwaakuwa nkwasoomela ma Aya Gakwe, ni kwaswejesyaga, ni kwajiganyaga soni Chitabu ni lunda lwakusokoka, kutendaga kala waliji mu kusokonechela kwakuonechela

Ana uli ndema jachampatile chipato chanti pakwete pamwapatisye (amagongo wenu) chanti iyyoyocho mwa winji wakawili mwatite: “Chityochele kwapi achi (chipatochi)?” Jilani: “Chalakwecho chityochele kwa jenumanja mwachimisyene (ligongo lyakunyosya kwenu). Chisimu Allah pa chindu chilichose awele Jwakombola

Soni yayampatile (pa ngondo ja Uhudi) lisiku lyagasimangene makuga gawili ga asilikali, yaliji mu lisosa lya Allah nikuti waamanyukule wakulupilila

Nikuti wamanyukule soni wandu wawele ali nkutenda unakunaku. Ni wasalilidwe (yanti): “Ikani mmenyane (ngondo) petala lya Allah kapena mwaasiwilile (amagongo kukwetu).” Wanganyao watite: “Tungaimanye yanti kwana kumenyana, chisimu chene tungankuyiye (nambo ngati kuulajidwape tukukuona kwalakweko)!” Wanganyao ku ukafili lyele lisikulyo wawandichile nnope kulekangana ni ku chikulupi. Akuwechetaga ni ngamwa syao yanganiiwa m’mitima mwao, sano Allah ni jukuimanya chenene ichindu yaakusisa

(Wanganyao ni) awala wana kuwechetaga yakwamba achimijao (wawaulajidwe pa ngondo ja Uhudi) kutendaga (akuwechetao) watemi (ngajaula kungondoko): “Angawe watukundile (yakuti akajaula) nga nganaulajidwa.” Jilani: “Basi lityochesyani mwachimisyene chiwa (kuti nkawa) naga nkuwecheta yakuona.”

Soni ngasimwaganichisya ata panandi awala waaulajidwe petala lya Allah kuti wawe, nambo wachijumi, akulisyidwa kwa Ambuje wao

Aku achisengwaga ni yawapele Allah kuumila mu ukoto Wakwe, ni akwasangalalilaga wandu wanganasimangane nao wali munyuma mwao (waakusaka nombe kuwila petala lya Allah), kuti wanganyao ngasaja kuwa ni woga soni ngasaja kuwa wakudandaula

Akuchisangalalila chindimba chakuumila kwa Allah ni umbone, chisimu soni Allah jwangasokonesya malipilo ga wakulupilila

Awala wawan'jitiche Allah ni Ntenga ﷺ panyuma pakwapata mawanga, sano wakolosisye (itendo yao) mwa wanganyao ni kun'jogopa Allah, akwete kupata malipilo gamakulungwa nnope

Awala wana kusalilidwaga ni wandu (achinakunaku) kuti: “Chisimu wandu (makafili) ansonganganyichisye (asilikali wajinji) basi mwajogopani.” Nambo (gele malowego) gajonjechesye chikulupi, ni watite: “Allah akutukwanila (pakutugosa) soni ni Nkun'jegama Jwambone nnope.”

Basi wagalawiche ni chindimba chakuumila kwa Allah ni umbone, nganichakwaya chakusakala (chilichose), ni wakuyiye chinonyelo cha Allah. Sano Allah ni Nsyene umbone wekulungwa nnope

Chisimu jwalakwe (jwana kun'jogoyagajo) nishetani jwaakuntendekasya kuti mwajogopeje achimijakwe, basi ngasimwajogopaga wanganyao nambo munjogopeje Une naga n'di wakulupilila (kusyene)

Soni akan'dandaulikasya awala waakuutuchila ku ukafili, chisimu wanganyao nganawa apeleche chisausyo chilichose kwa Allah. Allah akusaka kuti akaawiichila wanganyao liunjili lililyose (lya yambone) ku Akhera, soni akwete kupata wanganyao ilagasyo yekulungwa nnope

Chisimu awala wasagwile ukafili pakusumanya ni chikulupi, nganawa apeleche chisausyo chilichose kwa Allah, soni akwete kupata wanganyao ilagasyo yakupoteka nnope

Soni awala wakanile akaganichisya ata panandi kuti ndawi jelewu jatukwapaji jili jambone kukwao, chisimu chene tukwapa ndawi jelewuji kuti ajonjechesyeje ulemwa, soni akwete kupata wanganyao ilagasyo yakwalusya

Nganawa Allah jwanti ni gamba kwaleka wakulupilila mu kawe kan'diika mpaka ali alekangenye (chilikati cha) wakusakala ni wambone. Soni nganawa Allah jwanti ni gamba kummanyisya yakusisika, nambo kuti Allah akasasagulaga mwa Achimitenga Wakwe jwansachile (nikummanyisya ine mwa yalakweyo). Basi munkulupililani Allah ni Mitenga Jakwe. Sano naga nkulupilile ni kun'jogopa (Allah), nikuti nkwete kupata malipilo gamakulungwa nnope

Soni awala waakutendela ubaili ichindu yawapele Allah kuumila mu umbone Wakwe (ni ngapelekaga Zaka) akaganichisya ata panandi kuti kutenda yele kuwele kwambone kukwao, nambo kwalakweko kuwele kwakusakala kukwao, chachitawidwa makongwa (mu ngosi mwao) gaichindu yawaliji nkutendela ubailiyo lisiku lya Kiyama, sano Allah ni Nsyene kutawalila ya kumawunde ni petaka, soni Allah abali syosope sya yankutenda awele Jwaasimanya chenene

Chisimu Allah pamasile paalipikene lilowe (lyachalu) lya wandu (Ayuda) watite: “Chisimu Allah jwakulaga nambo uwwe niwatuli wakusichila.” Chituilembe yaawecheteyo ni kuulaga kwao Achimitume mwangali ligongo, soni tuchiti: “Pasyani ilagasyo ya (Moto wa) koocha.”

“Yalakweyi ni ligongo lya (yakusakala) yagaalongwesye makono genu, soni chisimu Allah nganijuwa jwakwaatenda lupuso ata panandi achikapolo (Wakwe).”

Awala (Ayuda) wawechete kuti: “Chisimu Allah watulamwile uwwe yanti; tukankulupilila ntenga jwalijose mpakana ali ayiche najo mbepesi jakutinisyidwa ni moto.” Jilani: “Pamasile pawam’bichilile achimitenga paujo pangu ni ilosyo yakuonechela palangulangu kwisa soni yankwambayo, nambi uli mwaawuleje, naga jenumanja nkuwecheta yakuona?”

Nambo naga achinkanilaga (mmwe Muhammadi ﷺ ningawa yachilendo), ngati wakanilidwe achimitenga paujo penu, wawaiche ni ilosyo yakuonechela palangulangu ni itabu yalunda lwakusokoka kwisa soni itabu yakulanguka

Mundu jwalijose tachipasya chiwa, nambo kuti tinchipedwa malipilo genu mwakwana lisiku lya Kiyama. Sano jwatakawambasyidwe ni Moto ni kwinjisyidwa ku Mbepo, basi tachiwa pamasile papundile (kusyene), sano umi wa duniya nganiuwa (chilichose) nambo chisengwasyo chakulowesya

Chisimu wanganyammwe chin'dinjidwe mu ipanje yenu ni maumi genu, soni ni timpikane kwene ilagasyo yayijinji kuumila kwa awala wawapedwile chitabu paujo penu (Ayuda ni Akilisito), ni kuumila soni kwa akuwanganya Allah ni isanamu, nambo naga mpilile ni kun'jogopa (Allah chim'be ntesile yambone), basi chisimu yalakweyo ni yaili mu ichindu yakusosekwa kuwichila ntima

Soni (kumbuchilani) katema kajwatawene Allah chilanga ni awala wana kupedwaga chitabu (cha Baibulo pakwatenda kuti): “Chisimu chene chinchisalichisye wanganyammwe (chitabucho) ku wandu soni ngam'ba wakuchisisa.” Nambo wachiponyisye kunyuma kwa migongo jao, ni wasagwile (ya duniya) yantengo wannono pakusumanya ni chalakwecho, kaje kusakala yaakusagula yakwe

Nkaganichisya ata panandi kuti wandu waakuwa ali nkupoochela pa ichindu (yakusakala) yatesile, nikuwaga soni ali nkunonyelwa kuti alapilidweje pa ichindu yanganapanganya, ngasimwaganichisya wanganyao ata panandi kuti chakakulupuche ku ilagasyo, nambo akwete kupata wanganyao ilagasyo yakupoteka nnope

Soni Allah ni Nsyene uchimwene wa kumawunde ni petaka, soni Allah pa chindu chilichose awele Jwakombola

Chisimu chene mu kagumbidwe ka mawunde ni mataka, ni kupisyangana kwa chilo ni muusi, muwele mwana ilosyo kwa wandu waakwete lunda

Awala waakunkumbuchilaga Allah (pakunkolanga) chiimile, chitamile kwisa soni (ali chigonele) cha mu mbalati mwao, ni akuchetelelaga mu kagumbidwe ka mawunde ni mataka, (ni akutiji): “Ambuje wetu! Nganin'gamba gumba yalakweyi mwa masanje, kuswejela ni Kwenu, basi tuwambasyani ku ilagasyo ya Moto.”

“Ambuje wetu! Chisimutu Mmwe mundu jwachinkan'jinjisye ku Moto nikuti pamasile pamun'jalwisye, soni wandu walupuso ngasakola wakwakulupusya.”

“Ambuje wetu! Chisimutu uwwe tumpikene nkuwilanga ali nkuwilanjila ku chikulupi achitiji: ‘Munkulupililani M’mbuje gwenu.’ Basi uwwe ni tukulupilile. Ambuje wetu! Ni tukululuchilani sambi syetu, soni ntusimachisye yakusakala yetu, ni ntupe chiwa pamo ni atenda ngoto.”

“Ambuje wetu! Tupani soni ayila yamwatupele chilanga kupitila mwa Achimitenga Wenu (kuti chinchitupa), ni ngasin'ja kutujalusya lisiku lya Kiyama, chisimu Mmwejo wangakasa chilanga.”

Basi Ambuje wao ni waajiitiiche wanganyao (duwa syawosyo pakwatenda kuti): “Chisimu Une ngaanja kusokonesya masengo gankupanganya jwalijose mwa jenumanja kutandila jwannume atamose jwankongwe, (pakuti jenumanjammwe wanakajumo) wane mwa jenumanja akuumila mwa wane. Basi wandu wasamile, ni koposyedwa m’misi jao, ni kulagasyidwa petala Lyangu, ni kumenyana ngondo, ni kuulajidwa, chisimu wanganyao chinasimachisye yakusakala yao, ni kuja kwajinjisya ku Matimbe ga ku Mbepo gasikujilima cha pasi pakwe sulo, (galakwego ni) malipilo gakuumila kwa Allah, sano Allah Kukwakwe nikugali malipilo gambone nnope

Chisimu kukannowesya mmwejo kwendajenda kwa wandu makafili pa chilambo

(Kweleko kuwele) kusengwa kwannonope, kaneko liuto lyao ni ku Jahannama, kaje kusakala liuto lyagusama (lyalitandichile)

Nambo wandu wan’jogwepe M’mbuje gwao, akwete kupata Matimbe ga ku Mbepo gasikujilima cha pasi pakwe sulo, chakawe wandamo mwalakwemo, (jalakwejo ni) mbiiko jakuumila kwa Allah, sano ichindu yaili kwa Allah ni yambone nnope kwa atenda ngoto

Soni chisimu chene, mwa wandu wawapedwile chitabu (Ayuda ni Akilisito), mwana waakunkulupililaga Allah ni yaitulusyidwe kukwenu, kwisa soni yayatulusyidwe kukwao, achilinandiyaga kwa Allah, ngakusagulaga (ya duniya) yantengo wannono pakusumanya ni ma Aya ga Allah, wanganyao akwete kupata malipilo gao kwa M’mbuje gwao, chisimu Allah ni Jwachitema pa kuwalanjila

E jenumanja wankulupilile! Pililani (pakutenda ibada), soni mwapundani amagongo wenu pakupilila, soni gosani mipika jenu (kuti amagongo akan'jinjilila), ni mun'jogopeje Allah kuti m'be wakupunda