Yau - Chapter 30 - Ar-Rum

Alif-Lam-Mim

M’chilambo chakuwandika (cha Shami), nambo nombe nao (Aroma) panyuma pakupundidwa tachipunda (kwapunda Afaarisio)

Mu yaka igala (yapachilikati cha itatu ni nsano nancheche), chilamusi ni cha Allah paujo ni panyuma (pakupundako), soni lyele lisikulyo (lyatachipunda Aroma kwapunda Afaarisi) wakulupilila (Asilamu) tachisengwa

Ni chikamuchisyo cha Allah. Akunkamuchisyaga jwaakunsaka, soni Jwalakwe ni Jwamachili gakupunda, Jwachanasa channope

(Achi ni) chilanga cha Allah. Allah jwangakasa chilanga Chakwe, nambo wandu wajinji ngakumanyilila

Akumanyilila yakuonechelape ya umi wa duniya (mpela yamalonda, yaunamalima, yakutawatawa ni ine), sano wanganyao ya Akhera akuwa nkuikwanjila

Ana wanganyao ngakuchetelela (m’mitima mwao) yakwamba achimisyene (yajwatite Allah pa kwagumba kuumila mungapagwa, kuti iyyoyopeyo soni juchajimusya m’malembe)? Allah nganijugumba mawunde ni mataka ni yaili chilikati chakwe ikaweje mwakuonaonape ni ndema jekolanjidwe, soni chisimu wandu wajinji yakusimangana ni M’mbuje gwao akukanila

Ana ngakwendajenda pa chilambo ni kupitaga nchilola mujawelele mbesi ja awala wapaujo pao? Waliji wamachili nnope kwapunda wanganyao, ni wagugudaga litaka nambo soni kutawapo yakutawatawa ni kutamapo mwawinji kupunda mwatawile ni kutamapo wanganyao, ni waichilile achimitenga wao ni ilosyo yakuonechela. Basi ni nganijuwa Allah jwanti ni kwatenda lupuso wanganyao, nambo kuti achimisyene ni wawaliji ali nkulitenda lupuso

Kaneka yakusakala niyaliji mbesi ja awala wawasakesye, ligongo lyanti wakaaniile ma Aya ga Allah ni waliji ali nkugatenda chipongwe

Allah ni jwaakutandisyaga gumba iwumbe, kaneka juchiiwusyawusya (kuigumba panyuma pakuwa), kaneko Kukwakwe tinchiuchisyidwa

Sano lisiku lyajichijima Kiyama, akulewa tachikata tama

Ni ngasakola wanganyao akuchondelela kuumila mwa akwawanganya wao (ni Allah), ni tachiwa (akwawanganya waowo yaili isanamu) wakwakana akuwanganya wao

Sano lisiku lyajichijima Kiyama, lyele lisikulyo wanganyao tachilekangana (wane wa ku Mbepo wane wa ku Moto)

Basi awala waakulupilile ni kutendaga yambone tachiwa mu Litimbe lyakusangalasya (lya ku Mbepo) ali nkusengwasyidwa

Sano awala waakufuulu ni kanila ma Aya Getu ni yakusimangana ni Akhera, basi wanganyao ku ilagasyo tachiika nao

Basi munswejesyani Allah ndema jankuswelwa (pakuswali swala ja Magrib ni Isha), ni ndema jankuchelwa (pakuswali swala ja Fajr)

Soni Jwalakwe jukwete lumbili losope lwene kumawunde ni petaka, ni (munswejesyeje soni) kwigulo (pakuswali swala ja Asr), ni ndema jankuutanda muusi (pakuswali swala ja Dhuhr)

Jwalakwe jukasakoposyaga chaumi kuumila mu chachiwe, ni koposya chachiwe kuumila mu chaumi, ni kulisyusya litaka panyuma pakuwa kwakwe, soni iyyoyopeyo tinchikoposyedwa wanganyammwe (m’malembe ni kuwa ni umi soni)

Soni mu imanyilo Yakwe (yakulosya uchimbichimbi ni ukombosi Wakwe) ni yanti, wan’gumbile jenumanja kuumila mwitaka, kaneka jenumanja ni kuwa wandu wankwenela (posepose)

Soni mu imanyilo Yakwe (yakulosya ukoto Wakwe) ni yanti, an’guumbiile wanganyammwe kuumila mwa jenumanja achimisyene achiwammakwenu kuti ntulalileje kwa jamanjao, ni awisile chilikati chenu chinonyelo kwisa soni chanasa. Chisimu mu yalakweyo mwana imanyilo kwa wandu waakuchetelelaga

Soni mu imanyilo Yakwe (yakulosya ukombosi Wakwe) gumba mawunde ni mataka, ni kutindana kwa iwecheto yenu kwisa soni mitundu jenu. Chisimu mu yalakweyo mwana imanyilo kwa waakumanyilila

Soni mu imanyilo Yakwe (yakulosya ukoto ni ukombosi Wakwe) gona kwenu kwa chilo ni muusi (kuti mpapumuleje), ni kupita nchisosasosa kwenu umbone Wakwe. Chisimu mu yalakweyo mwana imanyilo kwa wandu waakupikana

Soni mu imanyilo Yakwe (yakulosya machili Gakwe gakupunda ni yanti), akunnosyaga kumesya mwakuntesya woga ni kumpa tama (jakwika kwa wula), ni akutulusyaga kuumila kwinani mesi (gawula), basi ni akasasyuchisyaga nago litaka panyuma pakuwa kwakwe. Chisimu mu yalakweyo mwana imanyilo kwa wandu wakwete lunda

Soni mu imanyilo Yakwe (yakulosya umbuje Wakwe) ni kwima kwa mawunde ni mataka kwa ulamusi Wakwe. Kaneko ndema jatachim’bilanga ni m’bilango umpepe kuumila mwitaka, jele ndemajo jenumanja tinchikopokanganaga

Soni awele Wakwe Jwalakwe wosope wali kumawunde ni petaka, soni wosopewene akwitika Kukwakwe mwakulinandiya

Soni Jwalakwe ni Ajula jwaakutandisyaga gumba iwumbe kaneka ni tachiiwusyawusya (kuigumba panyuma pakuwa) soni yalakweyo (yakuiwusyawusyayo) ni yaili yakwepepala nnope Kukwakwe, soni Jwalakwe jukwete lumbili lwapenani nnope kumawunde ni petaka (kwanti pangali chakunnandanyichisya nacho), soni Jwalakwe ni Jwamachili gakupunda, Jwalunda lwakusokoka

Jwalakwe ampele jenumanja chilandanyo kuumila mu jenumanja mwachimisyene: Ana jenumanja nkwete wakamusyangana nao mwa (achikapolo) wagapatile magasa genu gakun’dyo pa (ipanje) yatumpele, mwanti jenumanja payalakweyo nkulandana (kagawane), ni kwajogopaga (achikapolowo) yankuti pakogopana mwachimisyene (alukosyo? Nambi uli nkum’bichila Allah akukamusyangana nao mwa achikapolo Wakwe)? Iyyoyopeyo ni yatukuti pagopolanya ma Aya kwa wandu wakwete lunda

Nambo awala walitesile lupuso akuyiye isako yao mwangali umanyilisi. Ana ninduni jwampaka an’jongole mundu jwannechelele Allah kusokonechela? Soni nganakola wanganyao akwajokola waliose

Basi lungamisyani ngope jenu (mmwe Muhammadi ﷺ) mwakulungamika chenene ku Dini - chipago cha Allah achila chiwaapagwisye wandu pa chalakwecho, pangali galausya kagumbe ka Allah, jalakwejo ni Dini jagoloka, nambo wandu wajinji ngaakumanyilila

(Soni ndema ni katema m’beje jenumanja) wakuujila Kukwakwe pakutenda toba, ni mun’jogopeje, nambo soni n’jimicheje Swala mwakolosya, ni ngasim’ba mwa akuwanganya (Allah ni isanamu)

Mwa awala wagawenye dini jao ni kuwa mikutula-mikutula, likuga lililyose likusengwela yalili nayo

Sano wandu ndema jagakwakwayaga masausyo akasam’bombaga M’mbuje gwao mwakuujila Kukwakwe pakutenda toba, kaneko nkwapa kupasya kuumila Kukwakwe ukoto, pajele ndemajo likuga line mwa jamanjao likasam’bwanganyaga M’mbuje gwao (ni isanamu)

Pangatogolela yatwapele. Basi sengwagani (ni umi wenu wejipio); mwanti pangakawapa timmanyilile (kusakala kwakwe)

Ana kapena twatuluchiisye wanganyao umboni (chitabu), basi walakweo ni ukuwecheta yakwayana ni yaawele wanganyao ali nkum’bwanganya nayo (Allah)

Soni naga tuli twapele kupasya wandu ukoto akasasengwaga nao, nambo naga chili chapatile chakusakala chilichose ligongo lya yagalongwesye makono gao, pajele ndemajo wanganyao akasawa wakata tama

Ana wanganyao ngakuiona yanti Allah akasansapangulila lisiki jwaakunsaka, ni kunandiya (lisikilyo kwa jwaakunsaka). Chisimu mu yalakweyo mwana imanyilo kwa wandu waakukulupilila

Basi jwaulongo mumpani liunjili lyakwe, kwisa soni masikini ni jwapaulendo. Yalakweyo ni yaili yambone nnope kwa awala waakusachilila ngope ja Allah, soni wanyao ni wali wakupunda

Sano ntuuka uliose wantosile (kwapa wane) kuti utupiye (chipanje chenu pakwembecheya kum’buchisya yejinji kuumila) m’chipanje cha wandu, basi ngaukasatupaga kwa Allah. Nambo Zaka jilijose janwanganyao ni watachijonjechesyedwa (malipilo gao).tosile nchisachililaga ngope ja Allah (ni jajikasatupaga kwa Allah), basi

Allah ni Ajula juwan’gumbile jenumanja, kaneko ni kumpa lisiki, kaneko tachimpa chiwa, kaneko ni tachimpa umi (soni pakun’jimusya m’malembe). Ana mwa akwawanganya wenu (ni Allah) pana jwaakutendaga chilichose mu yalakweyi? Kuswejela ni Kwakwe soni jutalikangene kusyene ni yaakum’bwanganya nayo

Chiwatanganyo chionechele pankuuli ni pambwani ligongo lya (yangalumbana) yagapanganyisye makono ga wandu, kuti (Allah) wape kupasya wanganyao (ilagasyo ya) ine mwa ayila yapanganyisye, kuti wanganyao awujile (kwa Allah pakutenda toba)

Jilani (mmwe Muhammadi ﷺ): “Jendagani pa chilambo ni kupita nchilola mujawelele mbesi ja awala wakala. Wajinji mwa jamanjao waliji akuwanganya (Allah ni isanamu).”

Basi lungamisyani (mmwe Muhammadi ﷺ) ngope jenu ku Dini jagoloka, nkaniliyiche lisiku lyakuumila kwa Allah lyangali jwakuliusya. Lyele lisikulyo (wandu) tachigawikana (ni kuwa mikutula jiwili; wa ku Mbepo ni wa ku Moto)

Mundu jwaakufuulu, basi gali kukwakwe (makungu ga) ukafili wakweo, sano watesile yambone, basi ni kuti akulitandichila achimisyene mauto gagusama (ku Mbepo)

(Tachigawikana wandu pa Kiyama) kuti akalipile awala waakulupilile ni kutendaga yambone kuumila mu umbone Wakwe. Chisimu Jwalakwe jwangaganonyela makafili

Soni mu imanyilo Yakwe (yakulosya ukombosi ni ukoto Wakwe) ni yanti, akutumisyaga mbungo kuwa jakupeleka abali jakusengwasya (ja kwisa kwa wula) kuti ampe kupasya ukoto Wakwe, ni kuti yombo ijendeje mwa ulamusi Wakwe, ni kuti nsosejesoseje umbone Wakwe, ni kuti soni jenumanja m’beje wakutogolela

Soni chisimu pamasile patwatumisye paujo penu (mmwe Muhammadi ﷺ nkanim’biche) achimitenga ku wandu wao, ni waichilile ni ilosyo yakuonechela (yakulosya ukuona wao, nambo waikaaniile). Basi ni twauchisye mbusyo syakusakala awala wawalewile. Ni kwaliji kwakuwajilwa Kukwetu kwakulupusya wakulupilila

Allah ni Ajula jwaakutumisyaga mbungo, basi ni jikasawunga mawunde gawula (kuumila nnuwundu lwamesi ga m’mbwani ni sulo), basi ni akasagajasasyaga kwinani yaakuti pakusaka, ni akasagagawanyaga kuwa ipande-ipande, mpaka mmwe nkasajionaga wula jinankopoka mkatikati mwakwe. Sano naga ali waatuluchisye jalakwejo waakwasaka mwa achikapolo Wakwe, pajele ndemajo wanganyao akasawa wakusengwa

Namuno kuti waliji wanganyao paujo pakwe nkanijatuluchile (wulajo) wakata tama

Basi ilolani yakuichisya ya ukoto wa Allah yaakuti pakulisyusya litaka panyuma pa kuwa kwakwe. Chisimu Jwalakwe ni jutachijimusya wawe, soni Jwalakwe pa chindu chilichose juwele Jwakombola

Soni chisimu naga tuli tutite tutumisye mbungo (jakwisa kuujonanga mmela wao), basi ni kuuwona (mmelao) uli wam’bilichila; chisimu wanganyao mpaka awe panyuma pakwe wakufulu

Basi chisimu mmwe nganim’ba mwapikanisye wawe (achimakafili), nambo soni nganim’ba mwapikanisye asiiwa m’bilango ndema jaakugalauka kulosya migongo jao (pangasaka kupikana yankwasalila)

Nambo soni mmwe nganim’ba mwajongolele wangalola mu kusokonechela kwao. Nganim’ba mwapikanisye ikaweje awala waakukulupilila ma Aya Getu aku ali wakulipeleka (kwa Allah pakuwa Asilamu)

Allah ni Ajula juwan’gumbile wanganyammwe mu kawe kakulepetala (kangali machili), kaneka ni akasampaga machili panyuma pakulepetala, kaneka ni akasampaga kutochomala ni wuuli panyuma pakola machili. Akasagumbaga yaakusaka, soni Jwalakwe ni Jwakumanyilila nnope, Jwakombola kusyene

Sano lisiku lyajichijima Kiyama, akulewa tachilumbila yanti: Nganatama (pa duniya) ikaweje ndawi jimpepe, iyyoyopeyo ni yawatiji pagalausyidwa (kuleka yakuona)

Ni tachiwecheta awala wawapedwile umanyilisi ni chikulupi kuti: “Chisimu wanganyammwe mwatemi m’chilamusi cha Allah kwikanila lisiku lyakuwukulidwa (m’malembe), sambano ali ni lisiku lyakuwukulidwa (m’malembe alila lyamwalikanilaga), nambo wanganyammwe mwaliji nkakumanyilila (yakupatikana kwakwe).”

Basi lyele lisikulyo ngasikwakamuchisya awala wawalitesile lupuso kuliwalanga kwao, soni wanganyao ngasakundidwa (kuujila ku duniya) kuti akatende toba ni kuwenda chikululuko (kwa Allah)

Soni pamasile patupeleche ku wandu mu aji Qur’an ntundu uliose wachilandanyo. Nambo naga n’di ntite mwaichilile nacho (mmwe Muhammadi ﷺ) chisimosimo chilichose (chakulosya ukuona wa utume wenu), awala waakufuulu chisimu chene mpaka ajile (pakwasalila wakulupilila): “Nganim’ba jenumanja ikaweje wakuya yaunami.”

Iyyoyopeyo ni yaakutiji Allah pakudinda (chidindo) m’mitima mwa awala wangali chachimanyi

Basi pililani (mmwe Muhammadi ﷺ), chisimu chilanga cha Allah (chakunkamuchisya mmwejo) chiwele chakuonaonape. Soni akantesya ulesi (wakuleka kulungusya utenga) awala wangakukulupilila kusyesyene