Yau - Chapter 32 - As-Sajdah

Alif-Lam-Mim

Kutulusya kwa Chitabu (Qur’an) changali kaikasya nkati mwakwe kutyochele kwa M’mbuje jwa iwumbe yosope

Kapena wanganyao akuti: “Jwalakwe (Muhammadi ﷺ) ni jwaachitunjile?” (Ngwamba)! Nambo chalakwecho chiwele chakuona chakuumila kwa Ambuje wenu (Allah), kuti mwatetele wandu wanganijwaichilileje nkutetela paujo penu, kuti wanganyao ajongoche

Allah ni Ajula juwagumbile mawunde ni mataka ni yaili chilikati chakwe m'mowa nsano nalimo, kaneka ni jwatenjele pa Arishi (Chindanda Chaulungu). Nganinkola jenumanja jwangawaga Jwalakwe akun’gosa waliose namuno akun’jokola, ana ngankukumbuchila

(Jwalakwe) jukasalondesyaga ichindu (yosope) kutyochela kwinani mpaka pasi, kaneka ni ikasakwelaga Kukwakwe, pa lisiku limpepe lyachiwele chipiimo chauleu wakwe yaka sausande yankuti pakuwalanjila jenumanja (ni yaka yenu ya pa duniya)

Jwalakwejo ni Nkumanyilila yakusisika ni yakuonechela, Jwamachili gakupunda, Jwachanasa channope

Ajula juwachikolosyisye chindu chilichose kagumbidwe kakwe, ni jwakutandite gumbidwa kwa mundu kuumila mwilongo

Kaneko jwautesile uwelesi wakwe (mundujo) kuwa wakuumila m’mesi gasyesyene gakunyosyeka

Kaneko ni wankolosyisye ni kumpepelela nsimu wakuumila Kukwakwe. Ni am’biichiile jenumanja mawiwi (gakupikanila), meso (gakulolela) kwisa soni mitima (jaganichisya), nambo kutogolela kwenu kuli kwannonope

Sano wanganyao ni akutiji: “Ana patuchipotela mwitaka, (panyuma pakuwa ni kuwanganyichilana ni litaka), nikuti chisimu uwwe mpaka tuchiwa soni mu kagumbidwe kasambano?” (Elo tachiwa), nambo wanganyao yakusimangana ni M’mbuje gwao (Allah) akuikanila

Jilani: “Lilaika lya chiwa lyaliwichidwe kukwenu lichityosya umi wenu, kaneko kwa M’mbuje gwenu tinchiuchisyidwa.”

Ingawe mwajile kwaona akulewa achijinamisyaga mitwe jao kwa M’mbuje gwao (Allah aku achitiji): “Ambuje wetu! Sano tulolite nambo soni tupikene, basi tuwuchisyani (ku duniya kuti) tukapanganye yambone, chisimu uwwe (sano) tukulupilila kusyesyene.” (Nkajile kuiona yanchesela kusyene)

Soni tungasache tungampele mundu jwalijose chongoko chakwe, nambo kuti lyasimichiche lilowe Kukwangu lyanti: Chisimu chinjigumbasya Jahannama ni majini kwisa soni wandu wosope (wali wakusakala)

(Tachisalilidwa yanti): Basi pasyani (ilagasyo) ligongo lyakuliwalila kwenu yakusimangana ni lisiku lyenu lyelino. Uwwe Nowe tun’diwaliile. Sano pasyani ilagasyo yandamo, ligongo lya yamwaliji nkupanganya

Chisimu wakasagakulupilila ma Aya Getu, ni awala wanti naga ali akumbusyidwe nago akasasenjelemukukaga kusujudu, ni akasaluswejesyaga lumbili lwa M’mbuje gwao (Allah), soni wanganyao wangalikwesya

Mbalati syao sikasatalikanganaga ni maugono (ndema jakwimuchila kuswali Tahajjudi), achim’bombaga M’mbuje gwao mwaoga (wakun’jogopa Jwalakwe), nambo soni mwakola tama (ja ukoto Wakwe), nambo soni mu ichindu yatwapele akasatolaga

Ni ngakumanyilila mundu jwalijose yawaasisiile wanganyao (ku Mbepo) mu yakutetewachisya meso, kuwa malipilo ga yawaliji nkupanganya

Ana jwali jwakulupilila mpaka awe mpela jwakunyosya? Nganawa alandene

Sano awala wakulupilile ni kutendaga yambone, basi akwete kupata wanganyao Matimbe Gakutamilichikamo (ku Mbepo), kuwa mbiiko pa yawaliji nkupanganya

Sano soni awala wawanyosyisye, basi mauto gao ni ku Moto. Ndawi ni katema katakasacheje kuti akopochemo, takawuchisyidweje mmomo, ni takasalilidweje yanti: “Pasyani ilagasyo ya Moto ayila yamwaliji nkuikanila.”

Soni chisimu chitwape kupasya wanganyao ilagasyo yakuwandika (ya pa duniya), nkaniyiwe ilagasyo yekulungwa (ya ku Akhera), kuti wanganyao awujile (kwa Allah pakutenda toba)

Ana nduni jwali jwalupuso nnope kwakumpunda mundu jwakumbusyidwe ni ma Aya ga Ambujegwe, kaneka ni kugatundumalila? Chisimu Uwwe kwa akulewa tuwele Wakuusya mbusyo

Soni chisimu pamasile patwampele Musa Chitabu (cha Taurat), basi ngasim’ba wakaichila yakusimangana najo (Musa kwa mwasimangene najo chilo cha Al-Isra’ ni Al- Mi‘raj). Ni twachitesile (Chitabucho) kuwa chongolo ku wanache wa Israila

Ni twatesile wane mwa wanganyao kuwa achinnongola wawaliji nkwajongolela (wandu) ni ulamusi Wetu, pandema ja wapilile ni kuwaga soni ali nkugakulupilila kusyesyene ma Aya Getu

Chisimu Ambuje wenu (Allah) ni watachijilanya chilikati chao lisiku lya Kiyama, pa ichindu yawaliji wanganyao ali nkutindana pa yalakweyo

Ana nganiyimanyukuchepe kukwao yanti mikutula jilingwa jatwajijonasile paujo pao? Soni wanganyawa (achimakafili walelowa), akwendaga mu watamaga wanganyao, (ana ngaakuionaga imanyilo yakonanjidwa kwao)? Chisimu mu yalakweyo mwana ilosyo. Ana ngakupikana

Ana ngakuiona yanti Uwwe tukugapelekaga mesi kwitaka lyejumu, ni tukasakoposyaga ni galakwego mmela waikulyaga ilango yao mpaka ni achimisyene wakweo, ana ngakulola

Sano wanganyao ni akutiji: “Ana kwele kulamulidwa (kwakuti uwwe tupate ipotesi) kuchiwa chakachi, nam’baga jenumanja nkuwecheta yakuona?”

Basi mwalekani wanganyao (mmwe Muhammadi ﷺ), ni n’jembecheyeje (yachiwatende wanganyao Allah), chisimu wanganyao akwembecheya (yakuti gampate jenumanja makungu)