Back to Languages
Yau - Chapter 36 - Ya-Sin
Translation by Muhammad Bin Abdul Hamid Silika — Permalink
Verse 1 — Surah Ya-Sin 36:1
Verse 2 — Surah Ya-Sin 36:2
Ngujilumbila (aji) Qur’an jegumbale lunda lwakusokoka
Verse 3 — Surah Ya-Sin 36:3
Chisimu mmwe (Muhammadi ﷺ) n’di mwa Achimitenga
Verse 4 — Surah Ya-Sin 36:4
(Soni n’di) pachanya petala lyagoloka
Verse 5 — Surah Ya-Sin 36:5
(Aji ni Qur’an) jajitulusyidwe ni (Allah) Jwamachili gakupunda, Jwachanasa channope
Verse 6 — Surah Ya-Sin 36:6
Kuti mwatetele wandu wanganateteledweje achatati wao, basi wanganyao ali wakwanjila (chikulupi).Chisimu lilowe (lya ipotesi) pamasile palisimichiche pa wajinji mwa wanganyao, mwanti wanganyao ngaakulupilila
Verse 7 — Surah Ya-Sin 36:7
Chisimu lilowe (lya ipotesi) pamasile palisimichiche pa wajinji mwa wanganyao, mwanti wanganyao ngaakulupilila
Verse 8 — Surah Ya-Sin 36:8
Chisimu Uwwe tuwisile mu ngosi mwao makongwa ni gayiche mpaka mu ipundi, mwanti mitwe jao jinyakulidwe (wangakombola galausya kapena kutulusya mitwe jao kuti achione chikulupi)
Verse 9 — Surah Ya-Sin 36:9
Ni tuwisile m’bujo mwao chakusiwilila ni munyuma mwao chakusiwilila, ni twaunichile, mwanti wangawa nkulola
Verse 10 — Surah Ya-Sin 36:10
Soni yalumope kwa jamanjao mwatetele kapena nkatetela, ngaakulupililape
Verse 11 — Surah Ya-Sin 36:11
Chisimu mmwe mpaka muntetele (ni kunkamuchisya kutetelako) ajula jwaakukuya chikumbusyo (Qur’an), ni kun’jogopaga (Allah) Jwaukoto wejinji mwangali kum’bona, basi munsengwasyani ya (kupata) chikululuko kwisa soni malipilo gakuchimbichika
Verse 12 — Surah Ya-Sin 36:12
Chisimu Uwwe ni watuchijimusya wawe, ni tukulembaga yawalongwesye (kupanganya ni katika malipilo gakwe), ni sajo syao (syawaliji nkwenda kuja kutenda ibada, ni masengo gawapanganyisye gagakwendelechela malipilo gakwe), sano chindu chilichose tuchisunjile (pakuchilemba) m’chitabu chakusalichisya (chilichose Al-Lauh Al-Mahfuz)
Verse 13 — Surah Ya-Sin 36:13
Mwapani wanganyao chilandanyo cha achinsyene musi (wa Antwakia), pandema jawauwichilile Achimitenga
Verse 14 — Surah Ya-Sin 36:14
Pandema jatwatumichisye (Achimitenga) wawili, ni waakaaniile, basi ni twalimbangenye pa (kwatumichisya Ntenga) jwatatu, basi (wanawatatu) ni watite: “Chisimu uwwe tutumidwe kukwenu.”
Verse 15 — Surah Ya-Sin 36:15
(Achinsyene musi) watite: “Nganim’batu jenumanja ikaweje wandu mpela uwwewe, soni (Allah) Jwaukoto wejinji nganatumisya chilichose, nganim’ba jenumanja ikaweje kuti nkulambusya.”
Verse 16 — Surah Ya-Sin 36:16
(Achimitenga) watite: “Ambuje wetu akumanyilila yanti chisimu uwwe tutumisyidwe kukwenu.”
Verse 17 — Surah Ya-Sin 36:17
“Ni nganiyiwa kukwetu ikaweje kulungusya (utenga) mwakupikanika.”
Verse 18 — Surah Ya-Sin 36:18
(Achinsyene musi) watite: “Chisimu uwwe tutapene ligongo lya jenumanja, nambo naga ngankuleka, chisimu chene chitunsome maganga, soni tiyinkwaye kwene kuumila kukwetu ilagasyo yakupoteka nnope.”
Verse 19 — Surah Ya-Sin 36:19
(Achimitenga) watite: “Chitapani chenu chili ni mwachimisyene (ligongo lya ukafili wenu), ana ligongo lyanti nkumbusyidwe (ni nkuti tuntapenye ni kutujogoyaga)? (Ngwamba), nambo jenumanja ni wandu wakupundanganya malile (pa ukafili).”
Verse 20 — Surah Ya-Sin 36:20
Ni jwayiche mundu anankutugala kuumila ku upande wakutalichila wa nsinda. Jwalakwe jwatite: “E wandu wangu! Mwakuyani Achimitenga.”
Verse 21 — Surah Ya-Sin 36:21
“Mwakuyani wandu wangaakun’juga malipilo, nambo soni wanganyao ali wakongoka.”
Verse 22 — Surah Ya-Sin 36:22
“Ana chipali chichi kukwangu chachindendekasye kuti ngan’galagatila Ajula (Allah) juwangumbile une, soni Kukwakwe jenumanja tinchiuchisyidwa?”
Verse 23 — Surah Ya-Sin 36:23
“Ana nalitendele milungu jine kunneka Jwalakwe? Naga ali asachilile (Allah) Jwaukoto wejinji kumba isausyo chondechonde jao (achiisanamuo) nganijiwa jingamuchisye une chilichose, soni wanganyao nganawa anjokwele.”
Verse 24 — Surah Ya-Sin 36:24
“Chisimu une njiyikaga mwakutenda yele timbe mukusokonechela kwakuonechela.”
Verse 25 — Surah Ya-Sin 36:25
“Chisimu une nankulupilile M’mbuje gwenu (Allah), basi mbikanilani.” (Ni nganampikanila nambo wam’buleje)
Verse 26 — Surah Ya-Sin 36:26
Yawechetedwe yanti: “Jinjilani ku Mbepo.” Jwalakwe jwatite: “E nabola wandu wangu angamanyilile,”
Verse 27 — Surah Ya-Sin 36:27
“Yatite kaangululuchile kakwe Ambuje wangu (Allah) ni kundenda kuwa mwa wakuchimbichika!”
Verse 28 — Surah Ya-Sin 36:28
Soni nganitutulusya pa wandu wakwe panyuma pa jwalakwejo asilikali kuumila kwinani (wakwisa kwajonanga), soni nganikuwa kwakusosekwa Kukwetu kuti mpaka tutulusye (asilikali)
Verse 29 — Surah Ya-Sin 36:29
Nganikuwa (konanjidwa kwao) ikaweje ni n’gumiilo umpepe (uwagumisile Jibulilu), basi papopo waliji wakulita (wawile)
Verse 30 — Surah Ya-Sin 36:30
Ha! Yakudandaulisya kwa achikapolo (wa Allah)! Nganiwaichilileje ntenga jwalijose, ikaweje waliji nkuntenda chipongwe
Verse 31 — Surah Ya-Sin 36:31
Ana ngakulola (yanti) mikutula jilingwa jatujijonasile paujo pao? (Ana ngakulola) yanti wanganyao ngaakuujila kukwao
Verse 32 — Surah Ya-Sin 36:32
Soni pangali (iwumbe) iliyose ikaweje yosope yene ichiyika pameso Petu
Verse 33 — Surah Ya-Sin 36:33
Soni chilosyo (chachili) kwa wanganyao (chakulosya ukombosi wa Allah wakwajimusya wawe) ni litaka lyaliwe, tukasalisyusyaga, ni koposyamo songolo, basi sine mu syalakwesyo akasalyaga
Verse 34 — Surah Ya-Sin 36:34
Ni tukasawikaga mwalakwemo migunda ja mitende ni mizabibu, ni tukasapitisyaga soni mwalakwemo achitutumule
Verse 35 — Surah Ya-Sin 36:35
Kuti alyeje isogosi yakwe, kutendaga nganiyipanganyidwa ni makono gao, ana ngakutogolela
Verse 36 — Surah Ya-Sin 36:36
Kuswejela ni Kwakwe Ajula (Allah) jwagumbile chachilume ni chachikongwe mu indu yosope, kutandila yaikumesya litaka, ni mwa achimisyene wakweo (wandu), ni mu ichindu yangakuimanyilila
Verse 37 — Surah Ya-Sin 36:37
Soni chilosyo (chine chachili) kwa wanganyao (chakulosya ukombosi wa Allah) ni chilo, tukasawuwulaga mwalakwemo muusi, basi papopo wanganyao ni akasawaga m’chipi
Verse 38 — Surah Ya-Sin 36:38
Sano lyuwa likasajendaga mpaka pakutulalila pakwe. Walakweo ni mpango wa (Allah) Jwamachili gakupunda, Jwakumanyilila nnope
Verse 39 — Surah Ya-Sin 36:39
Nombe nao mwesi twaupimile mauto (makumi gawili kwisa nsano nagatatu), mpaka ukasaujaga kuwa mpela chikole cha tende chakalakala (chepindiche)
Verse 40 — Surah Ya-Sin 36:40
Nganiyiwa yakuwajilwa lyuwa kuwuyika mwesi, namuno chilo kuwulongolela muusi. Soni chilichose ching’ambila mwitala lyasyungulilo
Verse 41 — Surah Ya-Sin 36:41
Soni chilosyo (chine chachili) kwa wanganyao (chakulosya ukombosi wa Allah) ni chanti: Uwwe twajigele achatati wao m’chombo chepachile (cha ndawi ja Nuhu)
Verse 42 — Surah Ya-Sin 36:42
Ni twaguumbiile wanganyao (yombo) yakulandana mpela chalakwecho yaakukwela
Verse 43 — Surah Ya-Sin 36:43
Sano Uwwe naga tuli tusachile mpaka twamisye, ni pangali nkwakamuchisya wanganyao (jwampaka apikane gumila kwao), soni wanganyao ngawa nkokoledwa
Verse 44 — Surah Ya-Sin 36:44
Ikaweje kwa chanasa chakuuma Kukwetu, ni kusengwa kwa ndema jannono
Verse 45 — Surah Ya-Sin 36:45
Sano pati iwechetedwe kukwao yanti: “Jogopani yaili paujo penu ni yaili panyuma penu kuti ntendeledwe chanasa;” (ngakasapikana)
Verse 46 — Surah Ya-Sin 36:46
Ni changaichilila chilosyo chilichose mu ilosyo ya M’mbuje gwao (Allah), ikaweje wanganyao akasawaga wakuitundumalila yalakweyo
Verse 47 — Surah Ya-Sin 36:47
Soni pati iwechetedwe kukwao yanti: “Tolani mu yampele Allah.” Awala waakufuulu akasatiji pakwasalila (mwachipongwe) awala waakulupilile: “Ana twalisye awala wanti Allah angasache angalisyisye (Nsyene)? Nganim’ba jenumanja ikaweje mu kusokonechela kwakuonechela.”
Verse 48 — Surah Ya-Sin 36:48
Wanganyao ni akasatiji: “Ana chele chilanga (chakwika Kiyamachi) chiyiche chakachi nam’baga jenumanja nkuwecheta yakuona?”
Verse 49 — Surah Ya-Sin 36:49
Ngakwembecheya ikaweje n’gumilo umpepe (lipenga lyandanda) wauchakwembekanya (mwachisupuchisya) aku ali nkukangana
Verse 50 — Surah Ya-Sin 36:50
Basi ngasakombola kuleka wasiya, namuno kumawasa kwao ngasaujila
Verse 51 — Surah Ya-Sin 36:51
Ni lichigombedwa lipenga (lyawili), basi papopo wanganyao kuumila m’malembe tachikopokangana mwachitemachitema wa kwa M’mbuje gwao (Allah)
Verse 52 — Surah Ya-Sin 36:52
(Aku) achitiji: “Ipotesi yetuwe! Ana wani waatujimwisye pagona petu?” (Tachisalilidwa yanti): “Ayi ni ayila yajwapeleche chilanga (Allah) Jwaukoto wejinji ni kuwecheta mwakuona Achimitenga.”
Verse 53 — Surah Ya-Sin 36:53
Ngasiyiwa ikaweje n’gumilo umpepe, basi ajile sayi wosopewene tachisimanikwa kuti ayiche pameso Petu
Verse 54 — Surah Ya-Sin 36:54
(Ni tachisalilidwa yanti): “Basi lelo (lisiku lya Kiyama) ngatendedwa lupuso mundu jwalijose pa chilichose, soni ngan’dipidwa ikaweje yamwaliji nkupanganya.”
Verse 55 — Surah Ya-Sin 36:55
Chisimu wandu wa ku Mbepo lelo tawe mu shuguli (syao) achisengwaga
Verse 56 — Surah Ya-Sin 36:56
Wanganyao ni achiwammakwao tawe m’miwulili, ali ajegeme mu indanda yetandiche chenene
Verse 57 — Surah Ya-Sin 36:57
Akwete kupata wanganyao mwalakwemo isogosi (yantundu uliose), soni akwete kupata chilichose chaakuchisaka
Verse 58 — Surah Ya-Sin 36:58
(Tachisalilidwa yanti): “Salam (Ntendele uwe kwa jaomanja!)” – Lilowe lyakuumila kwa (Allah) M’mbuje Jwachanasa channope
Verse 59 — Surah Ya-Sin 36:59
Sano (wangalumbana ni tachisalilidwa kuti): “Litukusyani lelo jenumanja akulewa (ku wakulupilila)!”
Verse 60 — Surah Ya-Sin 36:60
“Ana nganinan’jamuka, E Jenumanja wanache wa Adam! Yanti ngasimun’galagatilaga shetani, chisimu jwalakwejo kukwenu juwele mmagongo jwakuonechela?”
Verse 61 — Surah Ya-Sin 36:61
“Ni kuti mungalagatileje Une (Jikape), lyalakweli ni litala lyagoloka?”
Verse 62 — Surah Ya-Sin 36:62
“Soni chisimu pamasile pajwaisochelesye mu jenumanja iwumbe yejinji, ana nganim’baga wakola lunda?”
Verse 63 — Surah Ya-Sin 36:63
“Aji ni Jahannama ajila jamwaliji nkupedwa chilanga.”
Verse 64 — Surah Ya-Sin 36:64
“Jijinjilani lelo, ligongo lya ukafili wamwaliji nkutenda.”
Verse 65 — Surah Ya-Sin 36:65
Lelo chitusiwe ngamwa syao, ni gatuwechetekasye makono gao, ni kuwichila umboni ngongolo syao pa ayila yawaliji nkupanganya
Verse 66 — Surah Ya-Sin 36:66
Sano tungasache chisimu tungafufwite meso gao, mwanti angalimbanilene litala, nambo angalolite chantiuli
Verse 67 — Surah Ya-Sin 36:67
Soni tungasache tungasyusisye (kuwa inyama kapena maganga) pamalo pao pepo, ni nganganakombola kuja m’bujo namuno kuwujila munyuma
Verse 68 — Surah Ya-Sin 36:68
Soni jwatukumpaga umi (welewu) tukum’buchisyaga munyuma mukagumbidwe (kakwe, ni jukasawa nti chisawu mwanache). Ana ngakuitagaga mulunda (yalakweyi)
Verse 69 — Surah Ya-Sin 36:69
Soni nganitun’jiganya jwalakwe (Muhammadi ﷺ) kwimba ilaanga, nambo soni ngaikuwajilwa kukwakwe (kuwa nkutunga ilaanga). Nganiyiwatu ayi (yayiche nayo Muhammadi ﷺ) ikaweje chikumbusyo kwisa soni Qur’an jakusalichisya (chilichose)
Verse 70 — Surah Ya-Sin 36:70
Kuti antetele jwali chijumi (jwakulupila), ni lisimichiche lilowe (lya ilagasyo) pa achimakafili
Verse 71 — Surah Ya-Sin 36:71
Ana ngakuiona wanganyao yanti Uwwe twaguumbiile ilaango, mu ayila yaipanganyisye makono Getu, basi wanganyao ni akuwa ali nkuitenda kuwa yao
Verse 72 — Surah Ya-Sin 36:72
Ni twajepepachisye yalakweyo wanganyao, basi ine mu yalakweyo iwele yakwela yao, soni ine mu yalakweyo akasailyaga
Verse 73 — Surah Ya-Sin 36:73
Soni akwete wanganyao mwalakwemo yakamuchisya (ine yejinji), kwisa soni yakumwa (mpela nkaka). Ana ngakutogolela
Verse 74 — Surah Ya-Sin 36:74
Ni alitendele wanganyao milungu (jaunami) kunneka Allah kuti mwine wanganyao takamuchisyidwe (ni jalakwejo)
Verse 75 — Surah Ya-Sin 36:75
(Nambo) nganijiwa jikombwele (milungujo) kwakamuchisya wanganyao, soni jalakwejo jichisonganganyisyidwa ku wanganyao (ndema jakwawalanga itendo yao) kuwa asilikali (wakwachonjela)
Verse 76 — Surah Ya-Sin 36:76
Basi ikan’dandaulikasya mmwe (Muhammadi ﷺ) yakuwecheta yao. Chisimu Uwwe tukuimanya yaakusisa ni yaakulosya
Verse 77 — Surah Ya-Sin 36:77
Ana mundu ngajukuiona yanti Uwwe tun’gumbile kuumila mwindondwa lya mesi (ga walume ni wakongwe), yeti kaneko jwalakwe ni jukuwaga mmakaani jwakuonechela (jwakunkanila Allah)
Verse 78 — Surah Ya-Sin 36:78
Ni akutupa Uwwe chilandanyo, ni kuliwalila kagumbidwe kakwe (kakuumila m’mesi gangali mate). Akutiji: “Wani watachigapa umi maupa kutendaga gali gepukuswepukuswe?”
Verse 79 — Surah Ya-Sin 36:79
Jilani (mmwe Muhammadi ﷺ): “Tachigapa umi Ajula juwagagumbile kandanda, soni Jwalakwe chiumbe chilichose juwele Jwakuchimanya chenene.”
Verse 80 — Surah Ya-Sin 36:80
Ajula jwam’biichiile jenumanja moto m’chitela chewisi, basi jenumanja ni nkasakolesyaga (motowo) kuumila muchalakwecho
Verse 81 — Surah Ya-Sin 36:81
Ana nganawa Ajula (Allah) juwagumbile mawunde ni mataka jwakombola kuti wagumbe (soni wandu) wanti mpela wanganyao? Elo (juwele Jwakombola kusyene), soni Jwalakwe ni Nkugumba kusyene, Jwakumanyilila nnope
Verse 82 — Surah Ya-Sin 36:82
Chisimu chilamusi Chakwe pati asachile chindu (kuti chipatikane), agambaga kuchisalila kuti: “M’be.” Basi ni chikasawaga
Verse 83 — Surah Ya-Sin 36:83
Basi kuswejela ni Kwakwe Ajula jwamuli mu Nkono Mwakwe mwana uchimwene wakuchilamulila chindu chilichose, soni Kukwakwe tinchiuchisyidwa (wosope wene)