Back to Languages
Yau - Chapter 37 - As-Saffat
Translation by Muhammad Bin Abdul Hamid Silika — Permalink
Verse 1 — Surah As-Saffat 37:1
Ngwalumbila awala (Achimalaika) waakwima m’miselamisela (pakuswali)
Verse 2 — Surah As-Saffat 37:2
Kwisa soni awala (Achimalaika) waakasakalipilaga mwamachili (kugakalipila mawunde gawula pakugajendesya)
Verse 3 — Surah As-Saffat 37:3
Kwisa soni awala (Achimalaika) waakusoomaga chikumbusyo (chitabu pakwikanacho kwa Achimitume kuumila kwa Allah)
Verse 4 — Surah As-Saffat 37:4
Chisimu Nnungu jwenu ni Jumpepe
Verse 5 — Surah As-Saffat 37:5
M’mbuje jwa kumawunde ni petaka ni yaili chilikati chakwe, soni M’mbuje jwa kungopoko kosope
Verse 6 — Surah As-Saffat 37:6
Chisimu Uwwe tulisalalisye liwunde lya duniya ni isalalisyo yandondwa
Verse 7 — Surah As-Saffat 37:7
Ni kuligosa ku shetani jwalijose jwakunyosya
Verse 8 — Surah As-Saffat 37:8
Kuti akapikanila ya nkutula wa kwinani (wa Achimalaika), ni akasasomedwaga (ni yenje yandondwa) kuumila upande wa mbali ni mbali
Verse 9 — Surah As-Saffat 37:9
Kuwinjidwa mwamachili, soni akwete kupata wanganyao ilagasyo yakupoteka nnope ni kwendelechela
Verse 10 — Surah As-Saffat 37:10
Ikaweje jwasombwele lilowe mwawiyi, basi ni kunkuya chenje chakuwala nnope
Verse 11 — Surah As-Saffat 37:11
Basi mwawusyani (achimakafilio kuti): “Ana wanganyao ni wali wakusausya nnope kagumbidwe, kapena ayila (ine mpela mawunde, mataka ni matumbi) yatwaigumbile?” Chisimu Uwwe twagumbile jamanjao kuumila mwilongo lyakunyata
Verse 12 — Surah As-Saffat 37:12
(Ngwamba), nambo mmwe (Muhammadi ﷺ) nkusimonga (kanila kwao yakwimuka m’malembe), sano wanganyao ni akutenda chipongwe (kuntenda mmwe Muhammadi ﷺ ni Qur’an)
Verse 13 — Surah As-Saffat 37:13
Soni naga ali akumbusyidwe wangakumbuchila
Verse 14 — Surah As-Saffat 37:14
Soni naga ali achiweni chisimosimo akasachitenda chipongwe
Verse 15 — Surah As-Saffat 37:15
Ni akasatiji: “Nganichiwatu achi ikaweje usawi wakuonechela.”
Verse 16 — Surah As-Saffat 37:16
“Ana patuchiwapo ni kusyuka uwwejo litaka ni maupa, nambo yakuona kuti uwwe tuchiukulidwa (m’malembe)?”
Verse 17 — Surah As-Saffat 37:17
“Mpaka ni achatati wetu wandanda (nombenao tachiukulidwa)?”
Verse 18 — Surah As-Saffat 37:18
Jilani (mmwe Muhammadi ﷺ): “Elo (tinchiukulidwa), soni jenumanja n’di wakunyosyeka.”
Verse 19 — Surah As-Saffat 37:19
Basi chisimu kwalakwe (kuukulidwako) kuchiwa ni n’gumilo umpepe (walipenga lyawili), basi papopo wanganyao tachiwa ali nkulola
Verse 20 — Surah As-Saffat 37:20
Ni tachiti: “Ipotesi yetuwe! Ali ni Lisiku Lyamalipilo.”
Verse 21 — Surah As-Saffat 37:21
(Tachisalilidwa yanti): “Ali ni Lisiku Lyachiilanyo alila lyamwaliji jenumanja n’di nkulikanila.”
Verse 22 — Surah As-Saffat 37:22
(Achimalaika tachisalilidwa yanti): “Mwasonganganyani awala wawalitesile lupuso, pamo ni achimijao (wachijini), kwisa soni (isanamu) ayila yawaliji nkuigalagatila.”
Verse 23 — Surah As-Saffat 37:23
“Kunneka Allah; basi mwajongolelani kwitala lya ku Moto Waukali.”
Verse 24 — Surah As-Saffat 37:24
“Soni mwajimikani, chisimu wanganyao ali wakuwusyidwa.”
Verse 25 — Surah As-Saffat 37:25
“Chipali chichi kukwenu, uli ngankukamusyangana?”
Verse 26 — Surah As-Saffat 37:26
(Ngwamba), nambo wanganyao lyele lisikulyo tachiwa wakulipeleka (kuchilamusi cha Allah)
Verse 27 — Surah As-Saffat 37:27
Ni tachigalauchilana wane kwa wane achiwusyanaga
Verse 28 — Surah As-Saffat 37:28
(Wangalikombolela) tachiti (pakwadandaula achinkulungwa wao): “Chisimu wanganyammwe mwaliji nkutuyichilila chakun’dyo (mukayiche kanti mpela kambone, kwekula kwaliji kutulowesya)!”
Verse 29 — Surah As-Saffat 37:29
(Achinkulungwa) tachiti: “(Ngwamba), nambo jenumanja nganim’ba wakulupilila.”
Verse 30 — Surah As-Saffat 37:30
“Soni uwwe nganitukola machili galigose pa jenumanja (gakunkanganichisya ukafili), nambo kuti jenumanja mwaliji wandu wakusumba mpika (pa ukafili mpela uwwewe).”
Verse 31 — Surah As-Saffat 37:31
“Basi lilowe lya Ambuje wetu (Allah lyakupedwa ilagasyo) lisimichiche petuwe, chisimu uwwe chitupasye (ilagasyoyo).”
Verse 32 — Surah As-Saffat 37:32
“Basi twansochelesye (ligongo lyanti nombe) uwwe chisimu chene twaliji wasochelele.”
Verse 33 — Surah As-Saffat 37:33
Basi chisimu wanganyao lyele lisikulyo tachiwa yalumo mu ilagasyo
Verse 34 — Surah As-Saffat 37:34
Chisimu Uwwe mwele ni mutukwatendelaga wakulewa
Verse 35 — Surah As-Saffat 37:35
Chisimu wanganyao ndema jakuwechetedwa kukwao yanti: Pangali nnungu jwine (jwakuwajilwa kun’galagatila) ikaweje Allah; waliji nkulikwesya
Verse 36 — Surah As-Saffat 37:36
Ni kuwechetaga yanti: “Ana chisimu uwwe tuleche milungu jetu ligongo lya nkwimba ilaanga, jwamasoka?”
Verse 37 — Surah As-Saffat 37:37
(Ngwamba), nambo juyiche ni yakuona, soni jwajitichisye Achimitenga (wawalongolele)
Verse 38 — Surah As-Saffat 37:38
Chisimu wanganyammwe (achimakafili wa pa Maaka), timpasye ilagasyo yakupoteka nnope
Verse 39 — Surah As-Saffat 37:39
Soni ngallipidwa ikaweje yamwaliji nkupanganya
Verse 40 — Surah As-Saffat 37:40
Ikaweje achikapolo wa Allah wakuswejesyedwa
Verse 41 — Surah As-Saffat 37:41
Wanganyao akwete kupata lisiki lyakumanyika
Verse 42 — Surah As-Saffat 37:42
Isogosi (yantundu uliose), soni wanyao takachimbichisyidwe
Verse 43 — Surah As-Saffat 37:43
Ku Matimbe Gachindimba (ku Mbepo)
Verse 44 — Surah As-Saffat 37:44
Ali (atemi) pa itengu yauchimbichimbi mwakulolegana
Verse 45 — Surah As-Saffat 37:45
Tiikaweje ili nkwasyungula ipanda ya ukana wakulenjela
Verse 46 — Surah As-Saffat 37:46
Weswela wakulyolyopela kwa akumwa
Verse 47 — Surah As-Saffat 37:47
Mwangali mwele (mu ukanamo) yakupotekasya (ntwe namuno m’matumbo), nambo soni wanganyao ngasakolelwa nao
Verse 48 — Surah As-Saffat 37:48
Soni kukwao tikukawe kwana (achiwammakwao) wakulola pejipi (wakwalola achalume waope wangatenda meso mwamwamwa kwa achalume wane), achakulungwa meso mwakusalalila
Verse 49 — Surah As-Saffat 37:49
Gamba kuwa (kaswejele kao) wanganyao nti chisawu mandanda gagasunjidwe (m’mapapiko)
Verse 50 — Surah As-Saffat 37:50
Basi tachigalauchilana wane kwa wane achiwusyanaga
Verse 51 — Surah As-Saffat 37:51
Nkuwecheta jumpepe mwa wanganyao tachiti: “Chisimu une nakwete n’jangu (kuduniya).”
Verse 52 — Surah As-Saffat 37:52
“Juwaliji nkuti: ‘Ana mmwe chisimu chene n’di mwa akwitichisya?’
Verse 53 — Surah As-Saffat 37:53
‘(Yanti) patuchiwapo ni kusyuka litaka ni maupa, nambo yakuona uwwe tuchilipidwa (pa itendo yetu)?”
Verse 54 — Surah As-Saffat 37:54
(Nkuwecheta jula) tachiti: “Ana jenumanja chin’dingule (none ku Moto kuti mum’bone yajukuti pakulagasika?” Wanganyao tachiti: “Iyayi.”)
Verse 55 — Surah As-Saffat 37:55
Basi jwalakwe ni juchilingula, basi ni tachim’bona (n’jakwejula) juli nkatikati mwa Moto Waukali
Verse 56 — Surah As-Saffat 37:56
Juchiti: “Ngunnumbila Allah! Mmwetu mwasigele panandi kuti munyonanje (ngampikanile).”
Verse 57 — Surah As-Saffat 37:57
“Soni ungawaga ukoto wa Ambuje wangu (Allah), ningaliji mwa akwika nao (ku Moto).”
Verse 58 — Surah As-Saffat 37:58
(Wandu wa ku Mbepo tachiti): “Ana uwweji nikuti ngatuwa (soni)?”
Verse 59 — Surah As-Saffat 37:59
“Ikaweje chiwa chetu chandandapechila, soni uwwe ngatulagasyidwa?”
Verse 60 — Surah As-Saffat 37:60
Chisimu kwalakweku ni kupunda kwekulungwa nnope
Verse 61 — Surah As-Saffat 37:61
Pa (kusaka kupata) yanti mpela ayi, basi apanganye masengo (gambone) akupanganya
Verse 62 — Surah As-Saffat 37:62
Ana yalakweyi ni mbiko jambone, kapena chitela cha Zakkum
Verse 63 — Surah As-Saffat 37:63
Chisimu Uwwe tuchitesile chele (chitelacho) kuwa mayeso ku walupuso (pakuwecheta wanganyao kuti: “Mpaka ikomboleche uli chitela kumela m’moto)?”
Verse 64 — Surah As-Saffat 37:64
Chisimu chalakwecho ni chitela chachikopoka kuumila pasi pasyesyene pa Moto Waukali
Verse 65 — Surah As-Saffat 37:65
Soso sya isogosi yakwe (siwele syakunyalaya nnope) mpela mitwe ja mashetani
Verse 66 — Surah As-Saffat 37:66
Basi chisimu wanganyao takalyeje chele (chitelacho), ni chalakwecho takagumbasyeje ndumbo syao
Verse 67 — Surah As-Saffat 37:67
Kaneko chisimu akwete kupata wanganyao kupwatika pa chele (chitelacho) chakuwanganyichisya gagali mesi gamasemule nnope
Verse 68 — Surah As-Saffat 37:68
Kaneko chisimu kwakuwujila kwao ni ku Moto Waukali
Verse 69 — Surah As-Saffat 37:69
Chisimu wanganyao wasimene achatati wao ali wapotele
Verse 70 — Surah As-Saffat 37:70
Sano wanganyao mu sajo syao akutugala (pakwakuya mwachitemachitema mwangali kusosa kaje umboni)
Verse 71 — Surah As-Saffat 37:71
Soni chisimu wapotele paujo pao wajinji (mu wandu) wandanda
Verse 72 — Surah As-Saffat 37:72
Soni chisimu twatumisye mwa wanganyao akutetela
Verse 73 — Surah As-Saffat 37:73
Basi nnole mujawelele mbesi ja akuteteledwa
Verse 74 — Surah As-Saffat 37:74
Ikaweje achikapolo wa Allah wakuswejesyedwa
Verse 75 — Surah As-Saffat 37:75
Soni chisimu Nuhu jwatuwilasile (kuti tun’jokole), basi ni Akwanga Wambone nnope (twaliji Uwwe)
Verse 76 — Surah As-Saffat 37:76
Ni twan’jokwele jwalakwe ni wapewasa wakwe ku taabu jekulungwa
Verse 77 — Surah As-Saffat 37:77
Ni twatesile wanache wakwe kuwa sigasiga (wawasigele ali nkuwelekana paduniya)
Verse 78 — Surah As-Saffat 37:78
Ni twannechele (mbili syambone) kwa (wandu wosope) wakwika munyuma
Verse 79 — Surah As-Saffat 37:79
Ntendele uwe kwa Nuhu mu iwumbe yosope
Verse 80 — Surah As-Saffat 37:80
Chisimu Uwwe iyyoyopeyo ni yatukutiji pakwalipila wakolosya
Verse 81 — Surah As-Saffat 37:81
Chisimu jwalakwe (Nuhu) jwaliji mwa achikapolo Wetu wakulupilila
Verse 82 — Surah As-Saffat 37:82
Kaneko ni twamisyisye wane (wosope mwa wangakulupilila)
Verse 83 — Surah As-Saffat 37:83
Soni chisimu mwa awala wawakuyiye litala lyakwe (lya Nuhu lya Tauhidi) jwaliji Ibrahima
Verse 84 — Surah As-Saffat 37:84
Ndema ja waichilile Ambujegwe (Allah) ni ntima wambonembonepe
Verse 85 — Surah As-Saffat 37:85
Ndema ja jwatite kwa babagwe ni wandu wakwe: “Ana nkugalagatila chichi?”
Verse 86 — Surah As-Saffat 37:86
“Ana mwaunaminamipe milungu jangawaga Allah ni jankujisaka?”
Verse 87 — Surah As-Saffat 37:87
“Ana nganisyo syenu sili uli pa ya M’mbuje jwa iwumbe yosope?”
Verse 88 — Surah As-Saffat 37:88
Kaneka ni jwalolite kulola (kwakuchetelela) ku ndondwa
Verse 89 — Surah As-Saffat 37:89
Ni jwatite: “Chisimu une jwakulwala.”
Verse 90 — Surah As-Saffat 37:90
Basi wanganyao wantundumalile jwalakwe mwakunnochesya migongo
Verse 91 — Surah As-Saffat 37:91
Basi jwalakwe ni jwapite mwagwala ku milungu jao, ni jwatite: “Uli ngankulya (yakulya yam’bichileyi)?”
Verse 92 — Surah As-Saffat 37:92
“Chipali chichi kukwenu, uli ngankuwecheta?”
Verse 93 — Surah As-Saffat 37:93
Kaneka ni jwajigalauchile pakujiputa ni nkono wakwe wan’dyo (kwamachili gakwe gosope)
Verse 94 — Surah As-Saffat 37:94
Basi (pawapikene achinsyene isanamuyo) wam’bichilile ali nkutugala
Verse 95 — Surah As-Saffat 37:95
(Jwalakwe) jwatite: “Ana nkuigalagatila yankuisepa (mwachimisyene)?”
Verse 96 — Surah As-Saffat 37:96
“Kutendaga Allah ni juwan’gumbile jemanjammwe ni yankupanganya!”
Verse 97 — Surah As-Saffat 37:97
Wanganyao watite: “Muntawilani chakutawa (chiwukuta) ni mumponye m’moto waukali.”
Verse 98 — Surah As-Saffat 37:98
Basi wasachile kuntendela jwalakwe malindi, ni twatesile kuwa wapasi kusyene
Verse 99 — Surah As-Saffat 37:99
(Ibrahima) ni jwatite: “Chisimu une ngwaula kwa Ambuje wangu (Allah), takanjongole.”
Verse 100 — Surah As-Saffat 37:100
“Ambuje wangu! Mumbani (mwanache jwa) mu wandu wambone.”
Verse 101 — Surah As-Saffat 37:101
Basi ni twansengwasyisye ni abali ja (kola) mwanache jwakulitimalika (jwali Ismaila)
Verse 102 — Surah As-Saffat 37:102
Basi ndema jajwayiche (mwanachejo) pa nsingu wakwenda najo imo, (Ibrahima) jwatite: “E mwanangu! Chisimu une naiweni kulugono yanti une ngunsikita mmwe (kuwa mbepesi jakupeleka kwa Allah), basi nnole (nganisyo syenu), nkuiona uli?” (Mwanache) jwatite: “E baba wangu! Tendani yannamulidwe, timusimane une nasakaga Allah ndili mwa akupilila.”
Verse 103 — Surah As-Saffat 37:103
Basi ndema jawalipeleche wanawawili (ku chilamusi cha Allah), (Ibrahima) ni wan’goneche chamakuku (Ismaila kuti ansikite)
Verse 104 — Surah As-Saffat 37:104
Uwwe ni twam’bilasile kuti: “E mmwe Ibrahima!”
Verse 105 — Surah As-Saffat 37:105
“Chisimu pamasile pankwanilisye sagamisi.” Chisimu Uwwe iyyoyopeyo ni yatukasatiji pakwalipila wakolosya
Verse 106 — Surah As-Saffat 37:106
Chisimu galakwega ni mayeso gakuonechela
Verse 107 — Surah As-Saffat 37:107
Ni twam’bombwele (nkusikitidwajo) ni chakusikitidwa chekulungwa (ngondolo)
Verse 108 — Surah As-Saffat 37:108
Ni twannechele (mbili syambone) kwa (wandu wosope) wakwika munyuma
Verse 109 — Surah As-Saffat 37:109
Ntendele uwe kwa Ibrahima
Verse 110 — Surah As-Saffat 37:110
Iyyoyopeyo ni yatukutiji pakwalipila wakolosya
Verse 111 — Surah As-Saffat 37:111
Chisimu jwalakwe jwaliji mwa achikapolo Wetu wakulupilila
Verse 112 — Surah As-Saffat 37:112
Ni twansengwasyisye ni abali ja (kum’beleka) Isihaka, Ntume jwa mu wandu wambone
Verse 113 — Surah As-Saffat 37:113
Ni twampele upile jwalakwe ni Isihaka jwakwe. Sano mu wanache wao mwana nkukolosya (itendo yakwe) ni nkulitenda lupuso nsyene mwakuonechela
Verse 114 — Surah As-Saffat 37:114
Soni chisimu chene twampele ukoto Musa ni Haruna
Verse 115 — Surah As-Saffat 37:115
Ni twajokwele wanawawilio ni wandu wao ku taabu jekulungwa
Verse 116 — Surah As-Saffat 37:116
Ni twakamuchisye, basi ni waliji wanganyao wakupunda
Verse 117 — Surah As-Saffat 37:117
Ni twapele wanawawilio chitabu chakusalichisya
Verse 118 — Surah As-Saffat 37:118
Ni twajongolele kwitala lyagoloka
Verse 119 — Surah As-Saffat 37:119
Ni twalechele (mbili syambone) kwa (wandu wosope) wakwika munyuma
Verse 120 — Surah As-Saffat 37:120
Ntendele uwe kwa Musa ni Haruna
Verse 121 — Surah As-Saffat 37:121
Chisimu Uwwe iyyoyopeyo ni yatukutiji pakwalipila wakolosya
Verse 122 — Surah As-Saffat 37:122
Chisimu wanawawilio waliji mwa achikapolo Wetu wakulupilila
Verse 123 — Surah As-Saffat 37:123
Soni chisimu Iliyasa jwaliji mwa Achimitenga
Verse 124 — Surah As-Saffat 37:124
(Kumbuchilani) ndema jajwatite ku wandu wakwe: “Ana ngankogopa?”
Verse 125 — Surah As-Saffat 37:125
“Ana nkum’bomba Ba’la ni kunneka jwali Jwambone nnope mwa akugumba,”
Verse 126 — Surah As-Saffat 37:126
“Allah, M’mbuje gwenu nambo soni M’mbuje jwa achatati wenu wandanda?”
Verse 127 — Surah As-Saffat 37:127
Basi wankaaniile, basi chisimu wanganyao tachiika nao (ku ilagasyo)
Verse 128 — Surah As-Saffat 37:128
Ikaweje achikapolo wa Allah wakuswejesyedwa
Verse 129 — Surah As-Saffat 37:129
Ni twannechele (mbili syambone) kwa (wandu wosope) wakwika munyuma
Verse 130 — Surah As-Saffat 37:130
Ntendele uwe kwa Ilyaasiin
Verse 131 — Surah As-Saffat 37:131
Chisimu Uwwe iyyoyopeyo ni yatukutiji pakwalipila wakolosya
Verse 132 — Surah As-Saffat 37:132
Chisimu jwalakwe jwaliji mwa achikapolo Wetu wakulupilila
Verse 133 — Surah As-Saffat 37:133
Soni chisimu Lutwi jwaliji mwa Achimitenga
Verse 134 — Surah As-Saffat 37:134
(Kumbuchilani) ndema jatwan’jokwele jwalakwe ni liwasa lyakwe lyosopelyene
Verse 135 — Surah As-Saffat 37:135
Ikaweje kangalamba kachikongwe (wankwao Lutwi wawaliji) mwa akusigalila munyuma
Verse 136 — Surah As-Saffat 37:136
Kaneko ni twajonasile waneo
Verse 137 — Surah As-Saffat 37:137
Soni chisimu wanganyammwe nkwapitaga wanganyao (misi jao) kundawi
Verse 138 — Surah As-Saffat 37:138
Ni chilo chakwe, ana wangali lunda
Verse 139 — Surah As-Saffat 37:139
Soni chisimu Yunusu jwaliji mwa Achimitenga
Verse 140 — Surah As-Saffat 37:140
(Kumbuchilani) ndema ja jwatilile m’chombo chepachile
Verse 141 — Surah As-Saffat 37:141
Basi ni watesile ndoto (kuti watijagwile ndotojo aponyedwe m’mesi), basi ni jwaliji (Yunusu) mwa akwagwila (ndoto)
Verse 142 — Surah As-Saffat 37:142
Basi ni chammisile chinsomba aku juli jwagambidwa
Verse 143 — Surah As-Saffat 37:143
Basi ingawa kuti jwalakwe jwaliji mwa akunswejesya (Allah)
Verse 144 — Surah As-Saffat 37:144
Chisimu jungatemi m’matumbo mwakwe kwikanila lisiku lyakuwukulidwa (wandu m’malembe)
Verse 145 — Surah As-Saffat 37:145
Basi twamponyisye munjengwe jambembembe juli jwakulwala
Verse 146 — Surah As-Saffat 37:146
Ni twammechesye chitela cha mongumbondu (mbonda syekulungwa syati mpela mongu)
Verse 147 — Surah As-Saffat 37:147
Ni twantumisye ku (wandu) masausande gakwana lichila (,000) nambo soni wakupunda pele
Verse 148 — Surah As-Saffat 37:148
Ni wakulupilile, basi ni twasengwasyisye kwikanila ndema (jao jakuwila)
Verse 149 — Surah As-Saffat 37:149
Basi mwawusyani (achimakafili wa pa Maaka mmwe Muhammadi ﷺ kuti): “Ana Ambuje wenu ni akwete wanache wachikongwe, sano wanganyao ni akwete wanache wachilume?”
Verse 150 — Surah As-Saffat 37:150
“Kapena twagumbile Achimalaika kuwa achakongwe aku wanganyao achitendelaga umboni?”
Verse 151 — Surah As-Saffat 37:151
Manyililani yanti, wanganyao ni unami wao akuwechetaga yanti
Verse 152 — Surah As-Saffat 37:152
“Allah aweleche (wanache wachikongwe wali Achimalaika).” Soni chisimu wanganyao waunami kusyene
Verse 153 — Surah As-Saffat 37:153
Ana (Allah) jusagwile wanache wachikongwe kwaleka wachilume
Verse 154 — Surah As-Saffat 37:154
Chipali chichi kukwenu, ana nkulamula chinauli
Verse 155 — Surah As-Saffat 37:155
Ana ngankukumbuchila (yanti Allah juwambalene nayo yakola mwanache)
Verse 156 — Surah As-Saffat 37:156
Kapena jenumanja nkwete umboni wakuonechela (wa yankuwechetayi)
Verse 157 — Surah As-Saffat 37:157
Basi ikani nacho chitabu chenu nam’baga jenumanja nkuwecheta yakuona
Verse 158 — Surah As-Saffat 37:158
Ni asepelele wanganyao ulongo chilikati cha Jwalakwe (Allah) ni majini. Nambo majini ni gamanyiliile kusyene yanti chisimu wanganyao (achimakafilio) tachija kuonechela (kwa Allah kuti akajiilanye magambo ga unami wao)
Verse 159 — Surah As-Saffat 37:159
Allah awambalene nayo kusyene yaakusimba wanganyao
Verse 160 — Surah As-Saffat 37:160
Ikaweje achikapolo wa Allah wakuswejesyedwa (wanganyao ni waakunswejesya Allah ku yaakunnambuchisya achimakafili)
Verse 161 — Surah As-Saffat 37:161
Sano chisimu jenumanja (achimakafili) ni yankuigalagatila (isanamu)
Verse 162 — Surah As-Saffat 37:162
Nganim’ba jenumanja wanti ni kunsochelesyanayo (jwalijose mu wakulupilila kuti anneche Allah)
Verse 163 — Surah As-Saffat 37:163
Ikaweje ajula jwatakajinjile ku Moto Waukali
Verse 164 — Surah As-Saffat 37:164
Soni pangali jwalijose mwetuwe (Achimalaika) ikaweje jukwete malo gakumanyika (kwinani gakutendela ibada)
Verse 165 — Surah As-Saffat 37:165
Soni chisimu uwwe (Achimalaika) tukwimaga m’misela (pakuswali)
Verse 166 — Surah As-Saffat 37:166
Soni chisimu uwwe (Achimalaika) tukunswejesyaga (Allah pa kuswali)
Verse 167 — Surah As-Saffat 37:167
Soni chisimu wanganyawa (achimakafili wacharabu) watiji
Verse 168 — Surah As-Saffat 37:168
“Ingawe twakwete uwwe chikumbusyo muwakolele wandu wandanda,”
Verse 169 — Surah As-Saffat 37:169
“Chisimu tungaliji achikapolo wa Allah wakuswejesyedwa.”
Verse 170 — Surah As-Saffat 37:170
Basi (pachaichilile chikumbusyo) wachikanile, basi tachiyika kumanyilila (yatinjatenda)
Verse 171 — Surah As-Saffat 37:171
Soni chisimu chene pamasile pa lyalongolele lilowe Lyetu kwa achikapolo Wetu Achimitenga
Verse 172 — Surah As-Saffat 37:172
(Lyanti) chisimu wanganyao ni watakamuchisyidwe
Verse 173 — Surah As-Saffat 37:173
Nambo soni kuti asilikali Wetu chisimu ni watawe wakupunda
Verse 174 — Surah As-Saffat 37:174
Basi mwatundumalilani kwa kandawi kannono
Verse 175 — Surah As-Saffat 37:175
Soni gambagani kwalola; basi sampano taione
Verse 176 — Surah As-Saffat 37:176
Ana akuijanguya ilagasyo Yetu
Verse 177 — Surah As-Saffat 37:177
Basi (ilagasyo) patiichituluchila paluwala pao (tachijonanjidwa), ni kuchiwa kundawi kwakusakala nnope kwa akuteteledwa
Verse 178 — Surah As-Saffat 37:178
Soni mwatundumalilani kwa kandawi kannono
Verse 179 — Surah As-Saffat 37:179
Soni gambagani kwalola; basi sampano taione
Verse 180 — Surah As-Saffat 37:180
Awambalene kusyene Ambuje wenu (Allah), Ambuje wamachili gakupunda ku yaakwasimba nayo (achimakafili)
Verse 181 — Surah As-Saffat 37:181
Soni ntendele uwe kwa Achimitenga
Verse 182 — Surah As-Saffat 37:182
Soni lumbili losope lwene alapikwe Allah M’mbuje jwa iwumbe yosope