Yau - Chapter 39 - Az-Zumar

Kutulusyidwa kwa Chitabu (Qur’an) kukuumila kwa Allah, Jwamachili gakupunda, Jwalunda lwakusokoka

Chisimu Uwwe tuntuluchisye (mmwe Muhammadi ﷺ) Chitabu mwakuonaonape, basi mun’galagatilani Allah mwakunswejechesya dini Jakwe

Manyililani yanti Allah akasapochelaga dini jeswela (jangawanganya ni isanamu). Sano awala walitendele akwakamuchisya wanepe kunneka Jwalakwe (Allah, akasatiji): “Ngatukwagalagatila wanganyawa ikaweje kuti atuwandichisye kwa Allah nnope.” Chisimu Allah tachijilanya chilikati chao pa ichindu yawaliji nkutindana pa yalakweyo. Chisimu Allah wangan’jongola mundu jwali jwaunami soni jwakufulu nnope

Allah angasache kulitendela mwanache angasagwile mu ichindu yaagumbile chaakuchisaka. Kuswejela ni Kwakwe, Jwalakwe ni Allah, Jumpepe, Jwamachili gangalimbana nago

Jwagumbile mawunde ni mataka mwakuonaonape, akasachiwiligaga chilo m’muusi ni kuuwiliga muusi m’chilo, ni alijepepesye lyuwa ni mwesi, yosope yene ikwenda mpaka pandema jekolanjidwe, manyililani yanti Jwalakwe (Allah) ni Jwamachili gakupunda, Jwakululuka kusyene

Wan’gumbile jenumanja kuumila mwa mundu jumpepe (Adam), ni wagumbile kuumila mwa jwalakwejo wankwakwe (Hawa), ni antuluchisye wanganyammwe kuumila mu ilango mitundu nsano najitatu (ngamiya, ng’ombe, ngondolo ni mbusi chilichose chelume ni chekongwe). Akasan’gumbaga jenumanja mu itumbo ya achimama wenu kagumbidwe kane panyuma pa kagumbidwe kane, mu ipi itatu. Jwalakwejotu ni Allah M’mbuje gwenu, Uchimwene ni Wakwe, pangali nnungu jwine (jwakuwajilwa kun’galagatila) ikaweje Jwalakwe, basi ana nkugalausyidwa chinauli (kuleka yakuona)

Naga nkufulu, basi chisimu Allah ngaakunnajila jenumanja, soni ngaakuunonyela ukafili wa achikapolo Wakwe. Sano naga nkutogolela taisengwele yalakweyo kukwenu. Soni jwaatwiichiile nsigo (wasambi) ngasaja kutwichila nsigo wajwine, kaneka kwa M'mbuje gwenu (Allah) ni kwakuujila kwenu, basi ni tachintagulila ichindu yamwaliji nkupanganya. Chisimu Jwalakwe ni Nkumanyilila yaili m’mitima

Sano naga mundu chili chinkwayiye chakusausya chilichose akasam’bendaga M’mbujegwe (Allah) mwakuujila Kukwakwe (pakutenda toba). Kaneko nkumpa ukoto wakuuma Kukwakwe, basi jukasaliwalilaga ayila yajwaliji nkwawilanjila ku yalakweyo (Ambujegwe) kalakala (kuti antyochesye). Ni akum’bichilaga Allah milungu kuti wasokonesye (najo wandu) kuleka litala Lyakwe. Jilani: “Sengwagani ni ukafili wenuo panandipe, chisimu mmwejo n’di mu wandu wa ku Moto.”

Ana jwaakulinandiya (kwa Allah ni kuswaliji) nkati mwa chilo pa kusujudu ni kwima ali nkujijogopa Akhera, ni kwembecheya chanasa cha Ambujegwe (mpaka julandane ni jwakunyosya)? Jilani: “Ana mpaka alandane awala waakumanyilila ni awala wangaakumanyilila?” Chisimu waakwete lundape ni waakukumbuchilaga

Jilani: “E achikapolo Wangu awala waakulupilile! Mun’jogopani M’mbuje gwenu (Allah). Akwete kupata yambone awala waakolosyisye (itendo yao) pa duniya pano, sano chilambo cha Allah chiwele chakusapanguka (naga nkulepela kutenda ibada upande wine, basi jawulani upande wine). Chisimu akupilila tachipedwa mwakwana malipilo gao mwangawalanjila.”

Jilani: “Chisimu une namulidwe kuti nan’galagatileje Allah mwakunswejechesya dini Jakwe.”

“Ni namulidwe soni kuti mbe jwandanda mwa wakulipeleka (pakunda Usilamu).”

Jilani: “Chisimu une ngogopa ilagasyo ya Lisiku Lyekulungwa naga naanyosye Ambuje wangu (Allah).”

Jilani: “Allah pe ni jungun’galagatila mwakunswejechesya dini jangu.”

“Basi jenumanja galagatilagani chilichose chanchisachile changawaga Jwalakwe.” Jilani: “Chisimu wakwasika ni awala watachilijasikasya (Mbepo) achimisyene kwisa soni mawasa gao lisiku lya Kiyama (ligongo lya itendo yao yangalumbana yawaliji nkutenda kuduniya), manyililani yanti kwalakweko ni kwasika kwakuonechela.”

Takakole wanganyao pachanya pao yakusajikanya ya moto, ni pasi pao yakusajikanya (ya moto). (Ni ilagasyo) yalakweyi Allah akwajogoyechesya nayo achikapolo Wakwe. “E achikapolo Wangu! Basi njogopani.”

Sano awala waaliwambesye ku shetani kuti akan’galagatila, ni galauchila kwa Allah (pakutenda toba), akwete kupata wanganyao abali jakusengwasya (ja kuja kwinjila ku Mbepo), basi mwapani abali jakusengwasya achikapolo Wangu

Awala waakupikanilaga malowe, ni kugakuyaga gagali gambone nnope. Wanganyao ni awala wawajongwele Allah, soni wanyao ni waakwete lunda

Ana ajula jwalisimichiche pa jwalakwejo lilowe lya ilagasyo, ana mmwe mpaka mun’jokole jwali m’Moto

Nambo awala waakun’jogopa M’mbuje gwao (Allah), akwete kupata yumba yapenani yaitawidwe mwakusajikanya ine pachanya pa ijakwe, sulo sikajilimeje chapasi pakwe. (Achi ni) chilanga cha Allah, Allah jwangakasa chilanga

Ana ngankuiona yanti Allah akasatulusyaga mesi (gawula) kuumila kwinani, ni akugajinjisyaga mu achitutumule nkati mwetaka, kaneka ni akasakopochesyaga nago mmela wakulekangana ntundu wakwe, kaneka ni ukasajumulaga ni nkuuwonaga uli wam’bilichila, kaneko ni akasautenda kuwa wakuteketuka. Chisimu muyalakweyo muwele mwana chikumbusyo ku waakwete lunda

Ana mundu jwansapangulile Allah ntima wakwe ku Usilamu, basi jwalakwe ni juli pelanguka lyakuumila kwa M’mbujegwe (mpaka julandane ni kafili)? Ipotesi ili kwa awala wajijumwile mitima jao pa yakunkumbuchila Allah, wanganyao ali mu kusokonechela kwakuonechela

Allah atulwisye ngani jambone nnope (jajili) Chitabu (cha Qur’an) chakulandana-landana soni chakuwilisya-wilisya. Mapende ga awala waakun’jogopaga M’mbuje gwao (Allah) gakasajilijitikaga najo, kaneka ni gakasatependalaga mapende gao ni mitima jao ku yakunkumbuchila Allah, chele ni chongoko cha Allah akasan’jongolaga nacho jwansachile. Sano jwaakunnechelelaga Allah kusokonechela, basi nganakola nkun’jongola

Ana ajula jwatakaichijeje ni ngope jakwe ilagasyo yakusakala nnope lisiku lya Kiyama (takawe nti chisawu jwatakajinjile ku Mbepo)? Ni takasalilidwe walupuso kuti: “Pasyani ayila yamwaliji nkupanganya.”

Waakaaniile awala wapaujo pao, basi ni yaichilile ilagasyo kuumila upande wanganaumanyilila

Basi Allah wapele kupasya kwaluka pa umi waduniya, sano ilagasyo ya ku Akhera ni yaikulungwa nnope ingawe wamanyililaga

Soni chisimu pamasile patupeleche ku wandu mu aji Qur’an chilandanyo chilichose kuti wanganyao akumbuchile

Qur’an ja Charabu jangali kupombotala, kuti wanganyao aligose (ku ilemwa)

Allah apeleche chilandanyo cha mundu jwajukwete mabwana gakamusyangana gagakangana (mpela mundu jwagalagatila isanamu), ni mundu jwaagamba kuntumichila bwana jumpepe (mpela mundu jwagalagatila Allah pe), ana wawiliwa mpaka awe yalumo (kawe kao) nkwalandanyamo? Lumbili losope lwene alapikwe Allah, nambo wajinji mwa wanganyao ngaakumanyilila

Chisimu mmwejo wakuwa, nombe nao soni chisimu wakuwa

Kaneka chisimu wanganyammwe lisiku lya Kiyama kwa M’mbuje gwenu (Allah) tinchiwa nkukangana

Ana nduni jwali jwalupuso nnope kwakumpunda mundu jwansepele Allah unami, ni kuikanila yakuona pati im’bichililemo? Ana ku Jahannama nganikuwa kwiuto lya achimakafili

Sano ajula (Muhammadi ﷺ) jwaayiche ni yakuona ni waijitichisye yalakweyo (maswahaba ni wamunyuma mwao), wanganyao ni wali wawoga (wakun’jogopa Allah)

Akwete kupata wanganyao iliyose yatakaisacheje kwa M’mbuje gwao (Allah), gele ni malipilo ga wakolosya (masengo)

Kuti Allah akaasiimaachisye wanganyao yakusakala yawapanganyisye, ni kwalipila malipilo gao pa yambone nnope yawaliji nkupanganya

Ana Allah nganawa Jwakunkwanila kapolo Jwakwe? Ni akun’jogoyechesya wanganyao ayila (yaakuigalagatila) yangawaga Jwalakwe (Allah). Sano jwannechelele Allah kusokonechela, basi nganijukola nkun’jongola

Soni jwatite Allah an’jongole, basi nganapagwa kukwakwe jwanti nikunsochelesya. Ana Allah nganawa Jwamachili gakupunda, Nkuusya mbusyo syakupoteka kusyene

Soni naga n’di mwawusisye wanganyao (kuti): “Ana nduni juwagumbile mawunde ni mataka?” Chisimu chene tajile: “Allah.” Jilani: “Ana nkuiona uli (isanamu) yankuilumbanjila kunneka Allah, naga Allah ali asachilile kumba masausyo, ana yalakweyo mpaka ikungunukule masausyo Gakwego? Kapena ali asachilile kumba ukoto, ana yalakweyo mpaka isiwilile ukoto Wakweo?” Jilani: “Allah akungwanila, Kukwakwe pe ajegamile akwegamila.”

Jilani: “E wandu wangu! Kamulani masengo yatin'jile paakamula (ni ukombosi wenu wosope), none jwakwe ngukamula (mwangukamulila), basi sampano timmanyilile,”

“Kuti nduni jwatiyim’bichilile ilagasyo yatiyin’jalusye, ni kuntuluchila ilagasyo yakwendelechela.”

Chisimu Uwwe tuntuluchiisye mmwe (Muhammadi ﷺ) Chitabu (Qur’an) ligongo lyawandu mwakuonaonape. Basi jwaajongweche nikuti akongoka kwaalikamuchisya nsyene, ni jwaapoteele nikuti akupotela kwalikonya nsyene, soni mmwe nganim'ba nkwachengeta jwao

Allah ni jwaakujityosyaga misimu ndema jakuwa kwakwe. Sano ajila (misimu) janganijim’biche chiwa (akasajityosyagape) ku lugono kwakwe. Ni akasajisiwililaga ajila jaajilamulile chiwa (kulugono peko kuti jikaujila soni ku yiiilu yakwe, mundu ni akasawilaga kulugono), ni akasajitumisyaga jine josope (ku yiilu yakwe) mpaka pandema jekolanjidwe (jakuwiila). Chisimu mu yalakweyo muwele mwana ilosyo (yakulosya ukombosi wa Allah) kwa wandu waakuchetelela

Ana kapena alitendele (inepe) yangawaga Allah kuwa yakwachondelela (kwa Allah)? Jilani: “Ana nantimuno ili yangali ulamusi pa chilichose soni yangali lunda?”

Jilani: “Chondechonde chosope chili kwa (malamusi ga) Allah, uwele Wakwe uchimwene wa kumawunde ni petaka, kaneka Kukwakwe tinchiuchisyidwa.”

Sano pati achikolanjidwaga Allah Jikape jikasanyalaisyidwaga mitima ja awala wangakukulupilila ya Akhera, nambo pati achikolanjidwaga awala wanganawa Jwalakwe, jele ndemajo wanganyao akasasengwaga

Jilani: “E Allah! Nkugumba mawunde ni mataka! Nkumanyilila yakusisika ni yakuonechela! Mmwe tinchijiilanya chilikati cha achikapolo Wenu pa ichindu yawaliji wanganyao pa yalakweyo ali nkutindana.”

Namuno wandu walupuso angaje kola (pa Kiyama) yosope yaili pa chilambo ni yanti mpela yeleyo soni yalumo, angajile kusaka kuliombolela nayo ku ilagasyo yakusakala ya lisiku lya Kiyama (nambo nga nganiyija kwakamuchisya), ni tiyikaonechele kwa wanganyao kuumila kwa Allah yanganayiganichisyaga

Ni kuchionechela kukwao kusakala kwa ayila yawapanganyisye, ni ichasyungula wanganyao ayila yawaliji nkuitendela chipongwe

Basi naga mundu ili inkwayiye ipotesi akasatuwilangaga (kuti tuntyochesye), kaneko naga tuli tumpele ukoto wakuuma Kukwetu, jukasatiji: “Chisimu mbedwile yalakweyi ligongo lya umanyilisi (wangu, mwanti pangali ligongo lyakuntogolelela Allah).” (Ngwamba), nambo galakwego gagambile kuwa mayeso, nambo wajinji mwa jamanjao ngakumanyilila

Chisimu wawechete yalakweyi awala wapaujo pao, basi ni nganiyakamuchisya yawaliji nkupanganya

Basi ni yapatile yakusala ya yawapanganyisye, soni awala walitesile lupuso mwa wanganyawa (wantumisyidwe kukwao mmwe Muhammadi ﷺ) tiyapate yakusakala ya yaapanganyisye, soni nganawa wanganyao wanti nikunnepelekasya (Allah kwapa ilagasyo)

Ana nganamanyilila yanti Allah akasansapangulila lisiki jwansachile, ni kunandiya (lisikilyo kwa jwansachile)? Chisimu mu yalakweyo muwele mwana ilosyo (yakulosya ukombosi Wakwe) kwa wandu waakukulupilila

Jilani: “E achikapolo Wangu wan’ditendele yakusakala mwachimisyene! Ngasinkata tama ku chanasa cha Allah, chisimu Allah akasakululukaga sambi syosope syene, chisimu Jwalakwe ni Jwakululuka kusyene, Jwachanasa channope.”

“Soni ujilaani kwa M’mbuje gwenu (Allah pakutenda toba), soni lipelekaani Kukwakwe, nkaniyim’bichilile ilagasyo kaneka ningajokoledwa.”

“Soni kuyani yambone nnope yayitulusyidwe kukwenu kuumila kwa M’mbuje gwenu (Allah), nkaniyim’bichilile ilagasyo mwachisupuchisya kutendaga jenumanja nkakumanyilila.”

Kuti ngasaja kuwecheta mundu jwalijose yanti: “Kudandaula kwangune! Ligongo lya ayila yanapungwisye ku mbali ja Allah, soni chisimu naliji mwa akutenda chipongwe.”

Kapena kuja kuwecheta yanti: “Ingawe kuti Allah wanjongwele, ningaliji mwa wandu wawoga (wakun’jogopa Jwalakwe)

(Tachisalilidwa yanti): “Elo, chisimu ma Aya Gangu gam’bichilile, nambo mwagakaaniile, ni mwalikwesyisye, soni mwaliji mwa achimakafili.”

Soni lisiku lya Kiyama tinchaona awala wawannambuchisye Allah (yanti akwete mwanache kapena wakamusyangana nao) ngope syao sili syakupiilila. Ana ku Jahannama nganikuwa kwiuto lya wakulikwesya

Ni tachajokola Allah awala wawaliji ni woga (wakun’jogopa Jwalakwe) ligongo lyakupunda kwao (kwakupata ntendele wa ku Mbepo), yakusakala ngasiyakwaya, nambo soni wanganyao ngasawa wakudandaula

Allah ni Nkugumba chilichose, soni Jwalakwe pa chindu chilichose juwele Nkuchengeta

Gawele Gakwe makiyi ga kumawunde ni petaka. Sano awala waakaaniile ma Aya ga Allah, wanganyao niwali wakwasika

Jilani (mmwe Muhammadi ﷺ): “Ana jwangawaga Allah ni jwankuunamula kuti nan’galagatileje? E jenumanja ajinga?”

Soni chisimu pamasile paijuwulidwe kukwenu (mmwe Muhammadi ﷺ) ni kwa awala (Achimitenga) wa paujo penu (yanti): “Chisimu naga nkuwanganya (Allah ni isanamu), masengo genu tigajonasiche kwene, soni tim’be kwene mu wakwasika.”

Nambo basi mun’galagatileje Allah pe, ni m’beje mwa akutogolela

Ni ngananchimbichisya Allah uchimbichimbi Wakwe usyesyene. Sano litaka lyosope lyene lichiumbatidwa mwigasa Lyakwe lisiku lya Kiyama, ni mawunde gachiwilijidwa ni Nkono Wakwe wan’dyo, kuswejela ni Kwakwe soni jutalikangene kusyene ni yaakum’bwanganya nayo

Ni lichigombedwa lipenga, basi tachiwa wosope wali kumawunde ni wali petaka, ikaweje watachasaka Allah (kuti akawa). Kaneka lichigombedwa soni line, basi ajilesayi wanganyao tachiwa ali ajimi aku ali nkulola

Sano litaka (lyele lisikuli) lichiwala ni lilanguka lya M’mbujegwe (Allah, ndema jatachiyika kukwiilanya magambo), ni chichiwichidwa chitabu (chamasengo ga wandu), ni taachiyika nao Achimitume kwisa soni mboni, ni kuchijilanyisyidwa chilikati chao mwakuonaonape, soni wanganyao ngasatendedwa lupuso

Soni mundu jwalijose tachilipidwa mwakwana chenene ya jwapanganyisye, soni Jwalakwe (Allah) ni jwaakumanyilila chenene yaakutenda wanganyao

Ni tachichinjidwa awala wawakufuulu wa ku Jahannama ali mikutula-mikutula, mpaka pandema jatachijiyika, jichiugulidwa milango jakwe (mwachitemachitema), ni tachawusya wanganyao akujichengeta wakwe kuti: “Ana nganam’bichilila Achimitenga wakuumila mwa jenumanja pemmwe, wawaliji nkunsoomela ma Aya ga M’mbuje gwenu (Allah), ni kuntetelaga ya kusimangana ni lisiku lyenu lyelino?” Wanganyao tachiti: “Elo (watuyichilile), nambo kuti lyasimichiche lilowe lya ilagasyo pa achimakafili.”

Ichiwechetedwa yanti: “Jijinjilani milango ja Jahannama, tim’be wandamo mwalakwemo.” Kaje kusakala nnope mauto ga wakulikwesya

Ni tachichinjidwa awala wawan’jogwepe M’mbuje gwao (Allah) wa ku Mbepo ali mikutula-mikutula, mpaka pandema jatachijiyika, ni jichiugulidwa milango jakwe (wanganyao nkanakopochele), ni tachasalila wanganyao akujichengeta wakwe (mwakwakalibuchisya): “Ntendele uwe kukwenu! M’bele wambone (pa itendo ni iwecheto yenu, mwanti sengwagani), basi jijinjilani (Mbepo), tim’be wandamo (mwalakwemo).”

Wanganyao ni tachiti: “Lumbili losope lwene alapikwe Allah Ajula jwaatukwanilichisye chilanga Chakwe, ni kututawalikasya litaka (lya mu Mbepo muno), chitukombolecheje kutama mu Mbepo palipose patusachile.” Kaje kusalala nnope malipilo ga akupanganya (masengo gambone)

Ni tinchaona Achimalaika achisyungulaga mungulugulu mwa Arishi (Chindanda Chaulungu) aku ali nkuluswejesya lumbili lwa M’mbuje gwao (Allah). Ni kuchijilanyisyidwa chilikati chao mwakuonaonape, ni kuchiwechetedwa yanti: “Lumbili losope lwene alapikwe Allah M’mbuje jwa iwumbe yosope.”