Yau - Chapter 4 - An-Nisa

E jenumanja achinawandu! Mun'jogopani M'mbuje gwenu jwawan'gumbile kuumila mwa mundu jumpempe (Adamu), ni jwagumbile kuumila mwa jwalakwejo wankwakwe (Hawa), ni jwajenesye kuumila mu wawiliwo achalume wajinji kwisa soni achakongwe, ni mun'jogopani Allah Jwankasawendanaga kupitila mu Jwalakwejo, ni (jogopani soni kata) maulongo ga kupagwana. Chisimu Allah pa jenumanja awele Nkung'unulila kusyene (jwaakuwa ali nkukalolechesya kalikose kankutenda)

Soni mwapani wawina chipanje chao, ni ngasintindanya yakusakala (yenu) ni yambone (yao), soni ngasin'dya chipanje chao (pakuchiwanganya) ku chipanje chenu, chisimu wele uli ulemwa wekulungwa

Nambo naga nkogopa kuti ngannungamika pa wawina (wachikongwe wankutama nao wankusaka kwalomba mwalekani), basi lombelani (wanepe) mwa achakongwe wamwanonyele; wawili, kapena watatu, kapena ncheche. Nambo naga nkogopa kuti ngampakombola kwilanya, basi (gambani kulombela) jumpepe, kapena (mateeka) gagapatile magasa genu gakun'dyo. Yalakweyo ni yakuwandichila (kuntendekasya) kuti nkapendechela (ku ungajilanya)

Soni mwapani achimmasyeto mahari gao (mbiya syandowa kapena chilichose chakwalombelela) kuwa ntuuka, nambo naga ali anonyelwe m’mitima mwao yakumpa chinechakwe m'maharigo, basi chilyaani mwakusengwa ni mwangachijogopela (ngati Allah ankundisye)

Ni nkaapa wawawate chipanje chenu chaachitesile Allah kuwa chakun'dimbanganya, nambo mwaaliichisyani nacho ni kwawecha, ni mwawecheteleje malowe gambone

Soni mwalingani wawina (pa lunda lwao lwakwendechesya chipanje) kwikanila ali ayiche ndema ja (kusaka) ulombela, sano naga n'di nkuweni kwa wanganyao komangala kwa lunda, basi mwapani chipanje chao. Ni ngasinchilya (chipanjecho) mwakonanga ni mwachitema pakogopela kuti atakwika mwaakusile. Sano mundu jwali jwakuliipatila basi aliwambasye (kujigala malipilo mu chipanjecho pakuchigosa kwakwe), nambo mundu jwali jwakulaga, basi chakomboleche kulya (chipanjecho) mwakwilanila (ni mwaakuchigosela), sano ndema jankwapa chipanje chao basi mwasoselani mboni pameso pao (syakutendela umboni wanti apocheele chipanje chakwana, kogopela atakwisa mwaakaaniile panyuma pakwe), sano Allah jukwanila kuwa Nkuwalanjila chenene (chipanjecho kuti chigosedwe chenene kapena chepungule)

Akwete kupata achalume liunjili mu chipanje chalesile achinangolo ni waulongo wakuwandichila, nombe nao achakongwe akwete kupata liunjili mu chipanje chalesile achinangolo ni waulongo wakuwandichila, muchichiwele (chipanjecho) chapanandi kapena chejinji, (gawele) maunjili gepanjepanje (Allah)

Sano ndema jagawanya (chipanjecho) naga akwika wapaulongo, ni wawina, kwisa soni masikini (wanganakola liwunjili lyao), basi mwapani (kachinandipamuno) kuumila mu chipanjecho, nimwawecheteleje malowe gambone

Ni ajogope awala (walecheledwe chipanje kwakalamusya wawinao, ligongo nombe nao ali) wanti ingawe walesile munyuma mwao wanache wangalikombolela akajogopele (kalamusyidwa), basi an'jogopeje Allah ni awecheteje malowe gagoloka

Chisimu wandu waakulya chipanje cha wanache wawina mwa lupuso, chisimu chene wanganyao akulya (ni kutaga) moto m’matumbo mwao, soni chakajinjile ku Moto Wakulapuka

Allah akunnamula (ya kagawanye ka chipanje chamalekwa) kuwanache wenu, kuti mwanache jwannume akwete kupata liunjili lyakulandana ni liunjili lya wanache wachikongwe wawili (:1). Sano naga ali wachikongwepe (wawili kapena) kupunda pawawili, nikuti chapate maunjili gawili m’maunjili gatatu(⅔) gachipanje chalesile (nkuwa), nambo naga (mwanache jwankongwejo) ali jumpepe, nikuti chapate litika (½ lya chipanje chosope). Sano achinangolo wa nkuwa jwalijose mu wawiliwo chapate liunjili limo m’maunjili nsano na limo (⅙) nchipanje chalesile (nkuwajo) naga julesile mwanache (kapena chisukulu), nambo naga nganijuleka mwanache (kapena chisukulu) nantawaliile (chipanje chakwecho) achinangolo wakwe pe, nikuti mamagwe chapate liunjili limo m’maunjili gatatu (gachipanje chosope ⅓, sano babagwe nichajigale maunjili gawili gakusigalago ⅔), nambo sano naga julesile achachimwenegwe (kapena achalumbugwe), nikuti mamagwewala chapate liunjili limo m’maunjili nsano na limo (⅙ gachipanje chosope, gawanya kwalakweku kutendekwe) panyuma pakupitisya wasiya wachaleche (nkuwa wanti chindu chanti apedwe chenono) kapena (kun'dipilila) ngongole (syakwe). Achinangolo wenu ni wanache wenu ngankupata kumanyilila kuti ana wani mwa wanganyao wali wakuwandichila nnope kukwenu pa chikamuchisyo. (Awu ni) mpango (wa kagawanye) waupanjidwe ni Allah, chisimu Allah awele Jwakumanyilila nnope, Jwalunda lwakusokoka

Sano jenumanja (achalume) nkwete kupata litika (½) lyachipanje chalesile achiwammakwenu naga nganaleka wanganyao mwanache (kapena chisukulu), nambo naga alesile mwanache (kapena chisukulu), nikuti chimpate liunjili limo m’maunjili ncheche (¼) nchipanje chalesile wanganyao, (gawanya kwalakweku kutendekwe) panyuma pakupitisya wasiya wachaleche (achiwammakwenuo) kapena (kwalipilila) ngongole (syao). Nombe nao (achiwammakwenu) akwete kupata liunjili limo m’maunjili ncheche (¼) nchipanje channesile wanganyammwe naga nganinneka mwanache (kapena chisukulu), nambo naga nnesile mwanache (kapena chisukulu), nikuti chapate liunjili limo m’maunjili nsano na gatatu (⅛) mu chipanje channesile, (gawanya kwalakweku kutendekwe) panyuma pakupitisya wasiya wachinneche wanganyammwe kapena (kun'dipilila) ngongole (syenu). Sano nawaga walume kapena wakongwe akutawalwa (chipanje chao) kutendaga ali wangali mwanache (kapena chisukulu) ni achinangolo wakwe wanawawili, nambo ni alesile nchimwenegwe (jwakuchimama) kapena nnumbugwe (jwakuchimama), nikuti jwalijose mu wawiliwo chapate liunjili limo m’maunjili nsano na limo (⅙ gachipanje chosope), nambo nawaga ali wakutupila kupunda pele, nikuti chagawane liunjili limo m’maunjili gatatu (⅓ gachipanje chosope), (gawanya kwalakweku kutendekwe) panyuma pakupitisya wasiya wachiulechedwe kapena (kulipilila) ngongole (sya akuwa), mwangali kupeleka isausyo, achi ni chilamusi chakuumila kwa Allah, sanotu Allah ni Jwakumanyilila kusyesyene, Jwakutulala nnope ntima

Jalakwejo ni mipika ja Allah, sano jwachampikanile Allah ni Ntenga Jwakwe ﷺ, nikuti chachin'jinjisya ku Matimbe ga ku Mbepo gasikujilima cha pasi pakwe sulo, chakawe wandamo mwalakwemo, sano kwalakweko ni kupunda kwekulungwa nnope

Nambo jwachannyosye Allah ni Ntenga Jwakwe ﷺ ni gulukaga mipika Jakwe, chakan'jinjisye ku Moto, chijukawe jwandamo mwalakwemo, soni akwete kupata jwalakwejo ilagasyo yakwalusya

Sano wataiche mwakutenda chakunyalaya (chigwagwa) mwa achimmasyeto wenu, mwawilanjilani mboni ncheche mwa jenumanja, sano naga sipeleche umboni (wanti waweni ali nkutenda chigwagwacho), basi mwaugalilani m’majumba mpaka tichasimane chiwa, kapena Allah chiwawichile litala line

Nombe nao achalume wawili mwa jenumanja wataiche mwakuchitenda (chausakwacho mpela matanyula) basi mwalagasyani, nambo naga akutenda toba ni kolosya (ndamo syao) basi mwalekani, chisimu Allah awele Jwakupochela nnope toba Jwachanasa channope

Chisimu toba jakundidwa ni Allah ni ja awala waakutendaga yakusakala mwaujinga, kaneka ni akutendaga toba mwachitema-chitema, basi wanganyao niwaakwapochelaga Allah toba jao, ni awele Allah Jwakumanyilila nnope, Jwalunda lwakusokoka

Ni nganijiwa (jikundidwe) toba ja wandu waakutendaga yakusakala kwikanila chiwa chili chim’bichilile jumo jwao nikutiji: “Chisimu une ndesile toba sano,” atamose awala waakuwa ali makafili. Wanganyao twalinganyichisye ilagasyo yakupoteka nnope

E jenumanja wankulupilile! Ngayiikundisyidwa kwa jenumanja (wakuchilume) kuti mwatawalile achimmasyeto mwakwakanganichisya (panyuma pakuwa achiwammakwao). Ni nkasimwalagasyaga (achiwammakwenu pandamo naga n'di ngankwasaka, kuti mpaka ayikane mwakuliombola) pakusaka kwasumula ichindu ine yamwapele, (nteto walakweu uli wakanyisyidwa), ikaweje naga ayikene mwakutenda chakunyalaya chakuonechela (mpela chigwagwa). Soni tamagani nao (achiwammakwenuwo) mwaumbone, natamuno n'di mwawenjile (nkautuchila kwaleka), mwinetu tinkomboleche kuchiwenga chindu chaawisile Allah nkati mwakwe umbone wejinji

Sano naga mkusaka kunnomba jwankongwe jwine pakunneka jwankongwe (jwakala) kutendaga jumpepe mwa jamanjao (jwankunnekajo) n'di mumpele liunjili (lyambiya syandowa) kasin'jigala kutyochela mwalakwemo chilichose, ana nkuchijigala mwalupuso ni mwaulemwa wakuonechela

Ana soni chinchijigale chinauli kutendaga pamasile pamwajinjilene wane mwa wane (mwaikene mwagona ulombela), soni (achakongwewo) wajigele kuumila kukwenu chilanga chakulimbangana (pandowa chakuti chintame nao chenene)

Soni nkalombela achakongwe walombedweje ni achatati wenu, ikaweje yayapite kala (ninkaiwilisya soni kuitenda), chisimu wele (ntetowu) uwele wakunyalaya ni wakuwenjedwa kusyene soni ni litala lyakusakala nnope

Iwele haraam kukwenu (kwalomba) achimama wenu (wakum'beleka), wanache wenu (wakuliwelechela), achalumbu wenu (wakupagwana), achibaba wenu wachikongwe, achimama wenu wanandi kapena wakulungwa, wanache wanchimwene gwenu, wanache wannumbu gwenu, achimama wenu wawan'jonjesye, achalumbu wenu wamwajonjile liwele limo, achakwegwe wawaweleche achiwammakwenu, wanache wakwasimana wankwalela wakupagwa kutyochela mwa achiwammakwenu wan'jinjilene nao (pagona ulombela), nambo naga nganin'jinjilana nao, basi chipawe pangali ulemwa kukwenu (kwalomba wanache waowo), achiwammakwao wanache wenu wachilume wakutyochela m’migongo mwenu, soni nikuti mpwatikanye chilikati cha mundu ni mpwakwe (wakupagwana), ikaweje yayapite kala (ninkaiwilisya soni kuitenda). Chisimu Allah awele Jwakululuka kusyene, Jwachanasa channope

Soni ni (iwele haraam kukwenu kwalomba) achimmasyeto walombedwe, ikaweje (mateeka) gagapatile magasa genu gakun'dyo, achi ni chilamusi cha Allah chachili pa jenumanja. Ni iwele halaal (kwalomba achakongwe) wanganawa wele (wasalidwewo). Mwasosagani (achakongwewo) ni chipanje chenu mwakwalomba ngawaga mwachikululu, sano wam'biche mwakulisengwasya nao mwa wanganyao (pakwalomba), basi mwapani mahari gao yagatite pakulamulidwa, soni chipawe pangali ulemwa kukwenu pa yampikanganene (kutola) panyuma pa kulamulidwa (mahari), chisimu Allah awele Jwakumanyilila nnope, Jwalunda lwakusokoka

Sano jwachatende ngapakombola mwa jenumanja kupata chipanje chakulombelela alukosyo wakulupilila (wachisilamu), basi (gambani kulombela) mwa awala wagapatile magasa genu gakun'dyo mu wesichana wenu wakulupilila (wachisilamu). Soni Allah ni jwaakumanyilila nnope ya chikulupi chenu, (pakuti jenumanjammwe wanakajumo) wane mwa jenumanja akuumila mwa wane, basi mwalombani kwa lusa lwa mabwana gao soni mwapani mahari gao (mbiya syandowa kapena chilichose chakwalombelela) mwakwilanila, (mwalombani) wakuligosa ngawaga wachigwagwa kapena wakutenda maganja. Sano pati aligosile (achimateekao pakulombedwa) nikwisa kutenda chakunyalaya (chigwagwa), basi chapedwe litika lya ilagasyo yaakupedwaga nnukosyo (channyesye ikoti makumi nsano), yalakwe (yakulombela mateekayo) ili yaajula jwaakogopa kuti atakwisa mwatesile chikululu mwa jenumanja, nambo naga n'di mpilile (nikuleka kugalomba mateekago) mpaka iwe yambone kukwenu, sano Allah ni Jwakululuka kusyene, Jwachanasa channope

Allah akusaka kunsalichisya wanganyammwe ni kun'jongolela ku matala ga awala wawaliji paujo penu, ni kumpochela toba jenu, sano Allah ni Jwakumanyilila nnope, Jwalunda lwakusokoka

Soni Allah akusachilila kuti ampochele toba jenu, nambo wandu waakukuya isako (yao) akusachililaga n'di mpombotele kupombotala kwekulungwa nnope

Allah akusachilila kuti an'jepepachisye, pakuti mundu jwagumbidwe jwangali machili

E jenumanja wankulupilile! Kasillyaganilana chipanje chenu mwaukoleko, ikaweje gali malonda (gankusumana) mwakupikanganana chilikati chenu, soni ngasilliulaga mwachimisyene, chisimu Allah awele Jwachanasa kwa jemanja

Soni jwachaiche mwakutenda yele mwakusumba mpika ni mwalupuso basi tuchija kun'jinjisya ku Moto, soni yalakweyo kwa Allah iwele yakwepepala kusyene

Naga n'diwambasyeje (ilemwa) yekulungwakulungwa yankulekasyidwa, chitunsimachisye yakusakala yenu (yamwanamwana) ni tuchin'jinjisya kumalo kwauchimbichimbi (ku Mbepo)

Soni ngasinyyilupataga ichindu yaapeleche Allah mwawinji kwa wane mwa jenumanja kwapunda wane, akwete kupata achalume liunjili lya (malipilo ga) yapanganyisye, nombe nao achakongwe akwete kupata liunjili lya (malipililo ga) yapanganyisye, ni mum'bendeje Allah ukoto Wakwe, chisimu Allah chindu chilichose awele Jwaachimanya chenene

Soni kwa jwalijose (mwa jenumanja) tutomeche nkuntawalila (jwakwe) pa chipanje chalesile achinangolo wawili ni waulongo, sano awala wamwatawene nao chilanga (chakuntawalila chipanje chenu), mwapani liunjili lyao (kupitila mu wasiya wachimwalechele), chisimu Allah pa chindu chilichose awele Jwakutendela umboni

Achalume niwali wakwajimila achakongwe (walume ni ntwe wewasa), ligongo lyanti Allah wachimbichisye wane mwa jamanjao kwapunda wane (achalume kwapunda achakongwe), soni ligongo lya chipanje chao chaakuwa ali nkutola. Sano achimmasyeto wambone niwali wakumanya, wakuligosa (yilu yao nigosa yipanje yaliwasa) atamuno achiwammakwao pali pangali, ligongo lyanti Allah wagosile (achimmasyetowo kupitila mwa achiwammakwao waakwapaga yaakulajila). Sano awala (achimmasyeto) wankukujogopa kuliikwesya kwao basi mwajamukani, (naga ngaakupikana) mwawunduchilani pagona, (naga kuunduka ngakukamuchisya) mwaputani (kwangaulasya), sano naga ali nkumpikanila, basi ngasimwasosela matala (gakwalagachisya). Chisimu Allah ni jwaali Jwapenani kusyene, Jwankulungwa nnope

Sano naga (jenumanja akwiilanya) nkuujogopa ukangani wauli chilikati chao (walume ni wankwao), basi tumisyani namangoswe jwakuchilume ni namangoswe jwakuchikongwe (kuti akachengulanye), naga wanawawiliwo ali asachile kwilanya, Allah tiwakombolasye, chisimu Allah awele Jwakumanyilila nnope, Jwaasimanya abali syosope

Soni mun'galagatilani Allah ni nkam'bwanganyaga ni chilichose, nombe achinangolo wanawawili mwatendelani yambone, kwisa soni waulongo, wawina, masikini, jwakuwandikana najo nyumba niali jwaulongo, jwakuwandikana najo nyumba niali mundu nsape, n'jenu jwakutama najo imo, jwapaulendo ni (mateeka) gagapatile magasa genu gakun'dyo. Chisimu Allah ngakasawanonyela awala wali wakulikwesya ni kuliiti

Awala waakutenda ubayili ni kwachisyaga soni wandu kutenda ubayili, ni akusisaga yawapele Allah kuumila mu ukoto Wakwe. Ni twalinganyichiisye achimakafili ilagasyo yakwalusya

Ni awala waakutolaga ipanje yao mwakulilochesya ku wandu, ni ngakunkulupilila Allah ni Lisiku Lyambesi. Sano mundu jwachawe shetani n'jakwe, nikuti tawe akwete n'jakwe jwakusakala nnope

Ana soni chichi chikaasawisye wanganyao ingawe wankulupilile Allah ni Lisiku Lyambesi, nikutolaga mu ichindu yawapele Allah? Sanotu Allah ni jwali Jwakwamanya chenene wanganyao

Chisimu Allah jwangatenda lupuso (ku iwumbe Yakwe atamuno pachitendo chamwana chanti chisawu) usito wa lunyilili, sano nachiwaga chambone, akasachitupiyaga nikupeleka kuumila Kukwakwe malipilo gamakulungwa nnope

Nambi ichiwa uli ndema jatuchiika najo mboni kutyochela mu nkutula uliwose (jakuutendela umboni nkutulao), nikwika namwe (mmwe Muhammadi ﷺ) kuwa mboni pa wanganyawa

Lyele lisikulyo awala wawakufuulu, ni kunnyosya Ntenga ﷺ chachilajila yanti: Bolaga likagambe kwasimasya litaka (ningasyuka soni), ni ngasakombola kunsisa Allah lilowe lililyose (lyakwamba yawapanganyisye)

E jenumanja wankulupilile! Ngasin'jiwandichila Swala kutendaga n'di nkolelwe, mpaka mmanyilile kaje yankuwecheta, atamuno soni n'di ni janaba (ngasin'jinjila mu nsikiti kukuswaali) mpaka nkajoje, ikaweje jwagamba kutumbulukanya litala (mu nsikitimo pakwinjilila aku ni kopochela aku). Sano naga n'di wakulwala, kapena pa ulendo, kapena jumo mwa jenumanja ayiiche kutyochela kukawenduka (kuchimbusi), kapena nkwayanile ni achimmasyeto (pakutenda nsangu), ni nganin'gapata mesi, basi gambani kutenda Tayammamu ni litaka lyambone, basi pakaani kungope kwenu ni m’makono mwenu. Chisimu Allah awele Nkusiimaasya (ilemwa), Jwakululuka kusyene

Ana ngankwaona awala wapedwile chipande cha chitabu waakulisagulila kusokonechela, nikusachililaga soni kuti n'di nsokonechele wanganyammwe (kuleka) litala (lyagoloka)

Soni Allah akumanyilila chenene ya amagongo wenu, ni akukwanila Allah kuwa Nkugosa, soni Allah akukwanila kuwa Nkukamuchisya

Mwa wandu wali mu chiyuda, pana waakugapitikusyaga malowe pakugatyosya mmangwakwe, ni akutiji (pakunsalila Muhammadi ﷺ): “Tupikene nambo tunyosyisye, soni pikanani n'di wangapikana.” (Kwakuli kulwesa). Soni (akuntendaga kuti): “Tuchiingaani.” (Achambaga nkuchiinga jwakwe jwangali lunda, akuwecheta gele malowega) mwakupinda ndimi syao (kuti Muhammadi ﷺ ajileje: “Akunjimbichisya,” kutendaga ali nkunchindimbula), ni kusaka kujinyosya Dini (ja Usilamu). Nambo chisimu wanganyao ingawe waliji ali nkuti: “Tupikene soni tukundile, ni pikanani soni ntukosowalile, (mmalo mwakuti ‘Tuchiingaani),” ingaliji yambone kukwao ni yagoloka nnope, nambo kuti Allah ate kwalwesa ligongo lya ukafili wao, ni ngaakukulupilila ikaweje panandipe

E jenumanja wamwapedwile chitabu (cha Baibulo Ayuda ni Akilisito)! Ikulupililani yatutulwisye (kwa Muhammadi ﷺ) yaikwitichisya yan'di nayo, nkanituiche mwakusigalausya ngope (kuwa syangali meso, ngwimbi, mbula, pakamwa ata chipundi), kaneka nikusipombotachisya kunyuma kwakwe (kundungu), kapena nkanitwalwese wanganyao yatwatite pakwalwesa achinsyene (kasa uchimbichimbi wa lisiku) Lyakuweluka. Sano chilamusi cha Allah ni chiwele chakutendekwape basi

Chisimu Allah nganawa akululwiche (sambi sya) kum'bwanganya (ni indu ine), nambo akasakululukaga (sambi sine) syanganisiwa syalakwesi kwa mundu jwansachile. Sano jwachaiche mwakum'bwanganya Allah (ni indu ine), nikuti chawe pamasile papanganyisye chikansambi chekulungwa

Ana ngankwaona awala (Ayuda ni Akilisito) waakuliswejesyaga achimisyene? Nambo Allah ni jwaakunswejesya jwansachile, soni ngasaja kutendedwa lupuso atamose pa (kachindu kamwana kanti chisawu) kawuusi kankati mwa lupele lwatende

Nnole, yaakuti pakunsepela Allah unami! Sanotu ayi ikwanila kuwa sambi syakuonechela (syakuja kwajinjichisya ku Moto)

Ana ngankwaona awala wapedwile chipande chachitabu, waakuwa ali nkukulupilila isanamu ni shetani, ni akuwechetaga ni achimakafili kuti: wanganyao (achimakafiliwo) ni wali petala lyagoloka nnope kwapunda wandu wakulupilile (Asilamu)

Wanganyao ni awala wawalwesile Allah. Sano jwaakwika mwakulwesedwa ni Allah, nikuti nganim'ba mumpatiile nkulupusyo

Kapena akwete wanganyao chipande cha uchimwene (wa Allah)? Ingawetu iyyo, nikuti nga nganiwapa wandu (ata kachindu kannono kanti chisawu) chisowu cha lupele lwa tende

Kapena akwatendela litima wandu (Asilamu) pa ichindu yawapele Allah (wauli utume) kuumila mu okoto Wakwe? Basi pamasile patwalipele liwasa lya Ibrahima Chitabu ni lunda lwakusokoka, ni twapele soni wanganyao uchimwene wekulungwa nnope

Basi wane mwa wanganyao pana waikulupilile yalakweyi, nambo soni wane mwa wanganyao pana waliwambesye nayo, ni jikwanila Jahannama kuwa jakwachomela

Chisimu wandu wakaaniile ma Aya Getu, tuchija kwajinjisya ku Moto. Ndawi ni katema kachigakatinicheje mapende gao, chitukaatindanichisyeje ni mapende gane kuti akapasyejepe ilagasyo. Chisimu Allah awele Jwamachili gakupunda, Jwalunda lwakusokoka

Sano wandu waakulupilile nikutendaga yambone, chitukaajinjisye ku Matimbe ga ku Mbepo gasikujilima cha pasi pakwe sulo, chakawe wandamo mwalakwemo kwayaka ni yaka. Akwete kupata wanganyao mwalakwemo achiwammakwao waswejesyedwe, nitukaajinjisye soni kumiwulili jakusisimila chenene

Chisimu Allah akunnamula yanti, mwauchisyeje achimisyene ichindu yampele kusalasya, soni ndema jankwilanya chilikati cha wandu, jilanyani mwagolosya, chisimu Allah (misyungu) jaakuwa ali nkum'bunda najo jiwele jambone nnope, chisimu Allah awele Jwakupikanichisya, Jwakulolechesya

E jenumanja wankulupilile! Mumpikanilani Allah soni ni mumpikanile Ntenga ﷺ, kwisa soni waakwete ulamusi mwa jenumanja (Asilamu). Sano naga ntindene pa chindu chilichose, basi chiuchisyani kwa Allah ni kwa Ntenga ﷺ nam'baga wanganyammwe nkunkulupilila Allah ni Lisiku Lyambesi, yalakweyo ni yaili chenene (pakumasya ukangani) soni ni yaikwete yakuichisya yambone nnope

Ana ngankwaona awala (achinakunaku) waagamba kuwecheta mwaukoleko kuti wanganyao ayikulupilile yaitulusyidwe kukwenu, ni yayatulusyidwe paujo penu? Akusaka wanganyao kuti akalamulidwe (magambo gao) ni malamusi gangajilana ni Sharia, kutendaga pamasile palamulidwe yagakana gele (malamusigo), sanotu shetani ni akusaka kuti wasokonesye wangayao kusokonechela kwanaula

Soni pati asalilidwemo kuti: “Ikani kuyatulwisye Allah, soni (ikani) kwa Ntenga ﷺ.” Chimwaone achinakunaku ali nkuntundumalila kusyesyene

Ana mpaka iwe uli ndema jakwapata ipato ligongo lya yagalongwesye makono gao, (nikuwa pangali wane wakwajilanyichisya ikaweje mmwejo Muhammadi ﷺ)? Kaneko nikum’bichilila aku achilumbilaga (mwakulipembechela) kuti: “Tukunnumbila Allah, nganitusakaga (kuujitichisya ulamusi wa wanganyao pakuja kwalawila kunneka mwwe), nambo (twagambaga kusaka kulosya) umbone ni kupikanganana!”

Wanganyao ni awala waakuimanya Allah yaili m’mitima mwao, basi mwalekani (nkaapa ilagasyo), nambo mwajamukani ni kwawechetela malowe gakwinjilisya m’mitima mwao

Ni nganitutumisyeje ntenga jwalijose ikaaweje kuti akundidweje kwa lisosa lya Allah. Sano wanganyao pandema jawalitendele lupuso achimisyene, ingawe wam’bichilile (mmwe Muhammadi ﷺ) ni kum'benda Allah chikululuko, nombe najo Ntenga ﷺ nikwawendela chikululuko, chisimu chene angansimene Allah ali Jwakupochela nnope toba, Jwachanasa channope

Nambo ngawa (mwaakuwechetelamo kuti akulupiliile), ngwalumbila Ambuje wenu! Ngawa nkuwa wakulupilila wanganyao ni ikaweje ali antesile (mmwe Muhammadi ﷺ) kuwa nkwaajilanya jwao pa ichindu yalekangene chilikati chao, soni ni akasimana usito m’mitima mwao pa ulamusi wannamwile, ni alipeleche kusyesyene (paakunda ulamusi wenuwo)

Soni Uwwe tungawe twalamwile wanganyao yanti: “Ulaganani mwachimisyenepe,” kapena: “Kopokani m’majumba mwenu,” nga nganatenda yalakweyo ikaweje wannonope mwa jamanjao. Nambo ingawe wanganyao watesile yawaliji nkusalilidwa, ingaliji yambone kukwao ni yakupundanganya nnope kulimbanganya (chikulupi chao)

Soni pa jele ndemajo, chisimu chene tungapele wanganyao kuumila Kukwetu malipilo gamakulungwa nnope

Soni tungajongolele kwitala lyagoloka (lyakuja kwaikasya ku Mbepo)

Sano wachampikanile Allah ni Ntenga ﷺ, basi wanganyao ni wachachiwa pamo ni wandu wawapele Allah chindimba, kutandila Achimitume, ni wakulungamika kusyene (pachikulupi), ni wakuwila kungondo (jakumenyana ni makafili), kwisa soni (wandu) wambone, kaje kusalala kuwa nao imo wanganyao

Walakweo ni ukoto wakuumila kwa Allah, sano Allah akukwanila kuwa Nkumanyilila Nsyesyene

E jenumanja wankulupilile! Jigalani yakuligosela (ku amagongo wenu), basi ni m’biguleje (wa kungondo) makuga-makuga kapena wigulani wanaose nakamo

Soni chisimu mu wanganyammwe, pana jwaakusigalila munyuma (ngajaula kungondoko nikwagwisyaga soni ulesi wane), sano pati yimpatile ipato wanganyammwe akasatiji: “Chisimu Allah ambele chindimba pangapatikana une (kwalakweko) imo ni wanganyao.”

Nambo naga umpatile umbone wakuumila kwa Allah (mpela kupata chipanje chakuchileka amagongo), chisimu akasawechetaga mpela paliji pangali chinonyelo chilikati chenu ni jwalakwejo: “Nkongwene! Ngawe imo ni wanganyao ngati ngapundile kupunda kwekulungwa nnope (pakungawila chipanjecho).”

Basi (jwapite kungondoko), apute ngondo petala lya Allah (kwaputa) wandu waakusagula wumi wa duniya pakusumanya ni Akhera (ligongo lya ukafili wao), sano jwataiche mwakuputa ngondo petala lya Allah, nikuulajidwa kapena kupunda, basi tuchijisa kumpa malipilo gamakulungwa nnope

Ana chichi chisawisye kukwenu (chakuntendekasya) kuti nkaputa ngondo petala lya Allah, ni (kwakulupusya) wali wangalikombolela mwa achalume, achakongwe ni wanache, wakasatiji: “Ambuje wetu! Tukoposyani m'musiwu (wa Maaka) wauli achinsyene wakwe walupuso, soni tuwichilani kuumila Kukwenu nkutugosa, soni tuwichilani kuumila Kukwenu nkutukamuchisya.”

Wandu wakulupilile akuputaga ngondo petala lya Allah, nambo achimakafili akuputaga ngondo petala lya shetani, basi iputani ngondo isyowe ya shetani, chisimu malindi ga shetani gawele gangali machili

Ana ngankwaona awala wana kusalilidwaga kuti: “Gakanyani makono genu (kuti gakaaputa achimakafili mpaka chalamule kaje Allah), nambo gambagani kwimika Swala mwakolosya ni kutolaga Zaka?” Sano ndema jakwalamulidwe kwa wanganyao kuputa ngondo, yeti likuga line mwa jamanjao lyaliji nkwajogopa wandu (makafili) yalikutiji pakun’jogopa Allah kapena woga wakupunda pele. Ni watite: “Ambuje wetu! Ligongo chichi ntulamwile kuputa ngondo? Ngati bola nkaatuchelewasye ndema jannono (ikaliji yambone)!” Jilani: “Kusengwa kwa pa duniya kuwele kwannono, nambo Akhera ni jajili jambone nnope kwa mundu jwali jwawoga (wakun'jogopa Allah), soni ngasin'ja kutendedwa lupuso atamose pa (kachindu kamwana kanti chisawu) kawuusi kankati mwa lupele lwa tende.”

Palipose pachim'be chiwa chichimpatepe, atamose n'di m’makome geliye mwa kunyang'amasya, naga umbone uli wapatile (achimakafili ni achinakunaku) akasatiji: “Walakweu ukumila kwa Allah.” Nambo naga chapatile chakusakala ni akasatiji: “Chalakwechi chikuumila kukwenu (mmwe Muhammadi ﷺ). Jilani: “Yosope ikuumila kwa Allah (mu lisosa Lyakwe).” Ana kwa wele wanduwa chipali chichi chikwatendekasya kuti alepele kupikanichisya abali (jilijose)

Umbone uliose waumpatile nikuti ukuumila kwa Allah (ligongo lya ukoto Wakwe), nambo chakusakala chilichose chachimpatile nikuti chikuumila kukwenu mwasyene (ligongo lya itendo yenu yakusakala). Ni tuntumisye (mmwe Muhammadi ﷺ) kuwa ntenga kwa wandu, sano Allah akukwanila kuwa Mboni

Jwatampikanile Ntenga ﷺ nikuti tawe pamasile pampikanile Allah, nambo jwatagalauche (kuleka yele), basi nganituntumisya (mmwejo Muhammadi ﷺ) kuwa jwakwalolela wanganyao

Ni akasatiji: “Tuukuunda.” Nambo naga atyosile kukwenu likuga line mwa jamanjao likasachesyaga kutawana (inepe) yangawaga yankuwecheta, sano Allah ni akulemba yaakuchesya kutawanayo. Basi mwalekani (nkaapa ilagasyo) ni n'jegamile kwa Allah, sano Allah akukwanila kuwa Nkun'jegama

Ana ni ngaakujichetelela Qur’an? Mwanti jingawe jikuumila kwangawaga kwa Allah, angausimene mwalakwemo nkanikani wejinji (mwanti jikaliji nkukanilana jisyenepe, nambo nganijiwa iyyo ata panandi)

Soni pati chaichilile chindu chakwayana ni ntunjelele kapena woga, akasachinadiji (kwa wandu), mwanti akajiuchisye (abalijo) kwa Ntenga ﷺ ni kwa awala waakwete ulamusi mwa jamanjao, akajimanyi awala waakujiungunyaga (abali jilijose) mwa jamanjao (kuti aji jakuwajilwa kujinadi kapena iyayi). Soni ungawaga umbone wa Allah kuti uli pa jenumanja kwisa soni chanasa Chakwe, nkankuyiye shetani, ikaweje wannono (mwa jenumanja)

Basi putani ngondo (mmwe Muhammadi ﷺ) petala lya Allah, ngankukanganisyidwa (ya wandu wane) ikaweje mwasyene, soni mwachisyani wakulupilila, mwine Allah kuwa nkugachiga machili ga ngondo ga awala wakanile, sano Allah ni Jwakupundanganya nnope machili, soni Jwakupundanganya nnope pakupeleka ipotesi

Jwatam'bombele (jwine) duwa jambone (janti inkombolechele ichindu yambone), takole liunjili lya (yambone) yakuumila mu jalakwejo, nombe soni jwatam'bombele (jwine) duwa jakusakala, takole liunjili lya (yakusakala) yakuumila mu jalakwejo, sano Allah pa chindu chilichose awele Jwakombola (kuchitendela umboni ni kuchisunga)

Soni naga nkomasyidwe ni ukomasye uliose, basi jitikani ni ukomasye wambone nnope kuupunda wele, kapena gambani kuwusya wanti chisawu uwwowo, chisimu Allah pachindu chilichose awele Nkuwalanjila mwakosowalila

Allah pangali nnungu jwine (jwakuwajilwa kun'galagatila) ikaweje Jwelepejo, tachinsonganganya kusyene pa lisiku lya Kiyama lyangali kaichila ya lyalakwelyo, ana ni nduni jwali jwakuona nnope pa kawechete kumpunda Allah

Ana nkwete chichi chikuntendekasya kuti m'be mikutula jiwili pa ya achinakunaku, kutendaga Allah wausisye wanganyao (ni kwagwichisya mu ukafili) ligongo lya yapanganyisye? Ana nkusaka kun'jongola mundu jwannechelele Allah kusokonechela? Sano jwaakwika Allah mwakunnechelela kusokonechela, basi nganim'ba mumpatiile litala (lyakongochela)

Akasasachililaga n'di nkufuulu wanganyammwe yatite pakufulu wanyao ni m'be yalumo (kakufulu kakwe), basi ngasimwatenda mwa wanganyao kuwa isyowe mpaka akasame petala lya Allah, nambo naga akugalauka (kuleka yakusamayo), basi mwakamulani ni kwaulaga palipose pa mwasimene, soni ngasimuntenda (jwalijose) mwa wanganyao kuwa nsyowe kapena nkukamuchisya

Akaweje awala waakuliwanga ku wandu wapali pachilikati chenu ni jemanjao pana chilanga (chantunjelele), kapena waakum’bichilila idali yao ili yakutawika (ngasaka) kumenyana namwe kapena kumenyana ni wandu wao, (wele nkaputa ngondo), mwanti Allah angasache angapele machili gakunkombolela wanganyammwe, basi ni akamenyene namwe, sano naga ali am'bambele ni ngamenyana namwe soni ni kumpa ntunjelele, basi Allah nganam'bichila pa jamanjao litala (lyakumenyana nao)

Chimwasimane wane waakusaka kupata ntunjelele kukwenu ni kupata soni ntunjelele ku wandu wao, ndawi ni katema jaakwawuchisya (achimijao) ku ukafili akasagwilagamo chose, nambo naga ngaakum'bambala jenumanja, ni ngampa ntunjelele, soni ni ngagachiga makono gao, basi mwakamulani ni kwaulaga palipose pamwasimene, soni wanyao ni awala watum'bichile pa wanganyao umboni wakuonechela (wakunkundisya kwaputa ngondo)

Jwakulupilila nganawa am'buleje jwakulupilila (n'jakwe melepe) ni ikaweje mwakulemwa, sano jwam'buleje jwakulupilila mwakulemwa, basi agopole kapolo jwakulupilila kwisa soni malipilo gagapelechedwe kwa akuwilwa, ni ikaweje ali akululwiche (akuwilwao) mwasadaka. Sano nawaga (nkuulajidwajo) jukutyochela ku wandu wali amagongo wenu, nambo ni juli jwakulupilila, basi tin'gambe gopola kapolo jwakulupilila (mwangali kutola malipilo gane), nambo naga (nkuulajidwajo) juli jwakutyochela ku wandu wapali pachilikati chenu ni jemanjao pana chilanga (changamenyana ngondo), basi gapatikane malipilo gakupelechedwa kwa akuwilwa ni gopola kapolo jwakulupilila, sano jwanganapata (yalakwei), basi chatawe myesi jiwili jakulondongana, (aji ni) toba jakuumila kwa Allah, ni awele Allah Jwakumanyilila nnope, Jwalunda lwakusokoka

Sano jwacham'bulaje jwakulupilila melepe, basi malipilo gakwe ni Jahannama, chijukawe jwandamo mwalakwemo, soni Allah antumbilile ni kunnwesa, soni an'dinganyichisye ilagasyo yekulungwa nnope

E jenumanja wankulupilile! Pati n'jesile petala lya Allah (kukupuuta ngondo) basi lolechesyani (nkanintende chilichose), soni ngasim'becheta kwa mundu jwampele salamu (yanti): “Nganim'ba wakulupilila mmwejo,” (ni kum'bulaga). Nkusachilila ichindu yakumala ya umi wa duniya! Nambotu kwa Allah ni kwaili yakupata yejinji. Mmomopemo ni mwamwawelele wanganyammwe kalakala, basi Allah niwantendele ukoto (pakun'jinjisya mu Usilamu), basi lolechesyani. Chisimu Allah abali syosope sya yankutenda awele Jwaasimanya chenene

Nganawa alandene wakulupilila wagamba kutama (ngajaula ku ngondo) kwatyosya wakwete ipaka (mpela kuulala, ungalola ni kulemala), (ngawa nkulandana) ni akuputa ngondo petala lya Allah ni chipanje chao ni achimisyene wakwe, Allah wanyakwile pa uchimbichimbi akuputa ngondo petala lya Allah ni chipanje chao ni achimisyene wakwe kwapunda wagamba kutama, sano wanaose Allah wapele chilanga cha yambone, nambo kuti Allah wajonjechesye malipilo gamakulungwa nnope akuputa ngondo kwapunda wagamba kutama

(Chachipata) mauchimbichimbi gakuumila Kukwakwe kwisa soni chikululuko ni chanasa, ni awele Allah Jwakululuka kusyene, Jwachanasa channope

Chisimu wandu waakwatyosyaga Achimalaika mitima jao (pa kuwa) ali walitenda lupuso achimisyene (pangasama pa Maaka), akwawechetaga kuti: “Mukawechi mwaliji?” Wanganyao akutiji: “Twaliji wangalikombolela (ni wakuwanidwa) pa chilambo.” (Achimalaika) akutiji: “Ana chilambo cha Allah nganichiwa chakusapanguka mwanti jenumanja nikomboleka kusamila (kwine) mwalakwemo?” Basi wanganyao mauto gao ni Jahannama, kaje kunyalaya malo gakuwujila gakwe

Ikaweje wangalikombolela (kusyene) mwa achalume, achakongwe ni wanache wangawa nkupakombola kutenda ulaamba (uliose), soni wangawa nkulilungama litala (lyakuja ku Madina)

Basi wanganyao chisimu chene Allah chiwasimachisye (ilemwa yao), ni awele Allah Jwakusiimaasya (ilemwa), Jwakululuka kusyene

Sano jwatasame petala lya Allah tapate pa chilambo malo gakusamila gamajinji ni kusimana chenene, sano jwatawigule pa nyumba jakwe kusama wa kwa Allah ni Ntenga Jwakwe ﷺ, kaneka chiwa ni kunsimana (petala), basi pamasile pagapatikene malipilo gakwe kwa Allah, ni awele Allah Jwakululuka kusyene, Jwachanasa channope

Sano pati nchijendaga pa chilambo, basi tipawe pangali ulemwa kukwenu kupungula swala, naga n'di nkogopa kum'bwatanganya awala wakanile, chisimu achimakafili kukwenu awele amagongo wakuonechela

Sano naga n'di nao imo (Asilamuo pa ngondo) ni kusaka kwaswalisya swala, basi lijime namwe likuga line mwa jamanjao soni ajigale yida yao, sano pati amasile kusujudu, basi awe (nkutenda ulinda) kunyuma kwenu, ni liiche likuga line lyanganiliswali, basi ni liswali namwe, nombe nao akalamuche nikujigala yida yao (achiswaliji), awala wakanile akasasachililaga yanti n'di nyyipwanyile yida yenu ni ndundu syenu, basi ni an'gungumuchile mwanakamo (tichi!) Sano chipawe pangali ulemwa kukwenu kutuula yida yenu naga n'di nkwete isausyo ya wula kapena n'di wakulwala, nambo kalamukani. Chisimu Allah walinganyichisye achimakafili ilagasyo yakwalusya

Sano pati mmasile kuswali, basi munkumbuchilagani Allah chiimile, chitamile kapena n'di n'gonele mbalati syenu, sano naga n'di pa ntunjelele basi jimikani Swala mwakolosya, chisimu Swala kwa wakulupilila jiwele chilamusi chepanjile ndawi

Soni ngasimpela pa (kupita nchikonangona) kwakuya wandu (amagongo). Nam'baga nkupikana kupoteka, basi nombenao chisimu chene akupikana kupoteka yankuti pakupikana kupoteka wanganyammwe, nambo jenumanja nkwembecheya (kupata) kwa Allah yangakwembecheya wanganyao, ni awele Allah Jwakumanyilila kusyene, Jwalunda lwakusokoka

Chisimu chene Uwwe tutulwisye kukwenu Chitabu mwakuonaonape kuti n'jilanye chilikati cha wandu ni yannosisye Allah (gagali malamusi ga Dini), ni ngasim'ba mmagambo jwa wakanyengano (ngasim’ba wakwajimila)

Ni mum'bendeje Allah chikululuko, chisimu Allah awele Jwakululuka kusyene, Jwachanasa channope

Ngasimwakagulila (ngasimwajimila) wandu waakulinyenga achimisyene, chisimu Allah jwangannonyela mundu jwali jwakanyengano nnope, jwasambi syejinji

Akulisisaga kwa wandu (pa yakusakala yao) kutendaga nganawa akombwele kulisisa kwa Allah, ngati Jwalakwe akasawa nao imo (ni umanyilisi Wakwe) pandema jaakulanganaga chilo pa malowe gangannonyela (Jwalakwe), ni awele Allah pa ichindu yaakutenda Jwakuisyungula (kwaimanya chenene)

Ha! Jenumanja niawala wankuwa nkwakagulila wanganyao pa umi wa duniya, ana ni nduni jwataakakagulile wanganyao kwa Allah lisiku lya Kiyama? Kapena nduni jwatakawe nkwachenjela jwao

Sano jwachatende chakusakala chilichose kapena kulitenda lupuso nsyene, kaneka nikum'benda chikululuko Allah, chansimane Allah ali Jwakululuka kusyene, Jwachanasa channope

Sano jwachapanganye chasambi chilichose nikuti akulipanganyichisya nsyene, ni awele Allah Jwakumanyilila nnope, Jwalunda lwakusokoka

Sano jwachapanganye chilemwa kapena chasambi chilichose kaneka nikunnambuchisya nkotokotope, basi pamasile patwichile n’gogolo (unami wekulungwa) ni sambi syakuonechela

Mwangali yambone m’mitemela jao jejinji, ikaweje jwaakuchisya kutola sadaka kapena kutenda yambone kapena kwilanya chilikati cha wandu, sano jwachatende yele pakusachilila chinonyelo cha Allah, basi tuchijisa kumpa malipilo gamakulungwa nnope

Sano jwachansiisye Ntenga ﷺ panyuma pakumanyukuka kukwakwe chongoko, niikuya linepe lyangawaga litala lya wakulupilila, chitun'galauchisye kwaagalauchile (nsyeneko), ni tukan'jinjisye ku Jahannama, kaje kusakala nnope malo gakuwujila gakwe

Chisimu Allah nganawa akululwiche (sambi sya) kum'bwanganya (ni indu ine), nambo akasakululukaga (sambi sine) syanganisiwa syalakwesi kwa jwansachile. Sano jwakwika mwakum'bwanganya Allah (ni indu ine), nikuti amasile mwapotele kupotela kwakutalikangana (ni yakuona)

Ngaakuilumbanjila inepe yangawaga Jwalakwe (Allah) ikaweje isanamu yachikongwe, ni ngaakunnumbanjila jwinepe ikaweje shetani jwakuchalila pa unampitiku

Allah wannwesile (shetanijo). Ni jwatite: “Chisimu chingalisapulile mwa achikapolo Wenu liunjili lyakumanyika.”

“Ni tingaasokonesyeje kusyene, soni tingaatandikasyeje isako yaunami, ni tingaachisyeje kuti akasijeje mawiwi ga ilango, ni tingaachisyeje soni kuti akagalausyeje chipago chagumbidwa ni Allah.” Sano jwachantende shetani kuwa nkun'gosa jwakwe kunneka Allah, nikuti pamasile paapelelwe kupelelwa kwakuonechela

Akwapaga ilanga ni kwatandikasya isako yaunami, ni ngakwapaga shetani ilanga ikaweje yaulaamba

Wanganyao liuto lyao ni ku Jahannama, soni ngasapata pakutilila kopoka mwalakwemo

Sano awala wakulupilile ni kutendaga yambone chitukaajinjisye ku Matimbe ga ku Mbepo gasikujilima cha pasi pakwe sulo, chakawe wandamo mwalakwemo kwa yaka ni yaka, (achi ni) chilanga cha Allah chakuonaonape, ana ni malowe gacheni gampaka gawe gakuona nnope kugapunda ga Allah

(Kwinjila ku Mbepo) nganikuwa pa chisako chenu kapena chisako cha achinsyene Chitabu (Ayuda ni Akilisito, nambo kuti) jwachatende chakusakala chachilipidwa nacho, soni ngasampata nkun'gosa namuno nkunkamuchisya jwangawaga Allah

Soni jwachapanganye masengo gambone kutandila jwannume kapena jwankongwe kutendaga jwalakwejo ali jwakulupilila, basi wanganyao niwatakajinjile ku Mbepo, soni ngasaja kutendedwa lupuso atamose pa (kachindu kamwana kanti chisawu) chisou cha lupele lwa tende

Ana ni nduni jwali ni Dini jambone nnope kwa kumpunda mundu jwaajipeleche ngope jakwe kwa Allah (pakunda Usilamu) aku ali jwakolosya (pa Usilamu wakwe), soni achikuyaga Dini ja Ibrahima jwakongoka, sano Allah ni wantesile Ibrahima kuwa nsyowe (Jwakwe)

Soni yaili kumawunde ni yaili petaka nsyene jwakwe Allah, ni awele Allah pa chindu chilichose Jwaachisyungula (kwachimanya chenene)

Soni akum'busya ya achakongwe, jilani: “Allah akusaka kuntagulila ya wanganyao, ni yaikusoomedwa kukwenu m'Chitabu (cha Qur’an), ya wawina wachikongwe awala wangankwapaga yailembedwe kukwao (kuti apochele mpela mahari), nambo ni nkusachililaga kwalomba, kwisa soni ya wanache wangalikombolela, ni kuti n'jimilichiche pa (kwagolochesya) wawina mwakulungamika. Soni chambone chilichose chankutenda chisimu chene Allah awele Jwakuchimanya chenene

Sano naga wammasyeto akogopa kwa wankwao uchimwa kapena kutimbuka, basi chipawe pangali ulemwa kwa wanawawilio kutawana chilikati chao ya nkamulano, sano nkamulano ni wambone (kulekangana ni kulekana ulombela), ngati mitima jitawelwe ni usuchi (nambo soni kokomochela ya jikusaka), nambo naga n'di nkolosisye (masengo) ni kuwa ni woga (wakun'jogopa Allah), basi (ni yambone), chisimu Allah abali syosope sya yankutenda awele Jwaasimanya chenene

Ni nganim'ba mpakombwele kwilanya (kusyesyene) chilikati cha achimmasyeto ata nkaalimbichiile chantiuli, nambo ni kasimpendechela (ku wamo) kupendechela kwa chose, mwanti ni kunneka jwinejo nti chisawu jwankolechedwe (ngamanyika kuti jwannombedwe kapena jwewuli), nambo naga n'di nkamulene ni kuwa ni woga (wakun'jogopa Allah), basi (ni yambone), chisimu Allah awele Jwakululuka kusyene, Jwachanasa channope

Nambo naga akulekangana (pakulekana ulombela), Allah tansichilisye jwalijose (mwa wanawawiliwo) kuumila muukoto Wakwe wakusapanguka, ni awele Allah Jwakwanila kusyene (ku iwumbe Yakwe), Jwalunda lwakusokoka

Soni yaili kumawunde ni yaili petaka nsyene jwakwe Allah, soni chisimu chene pamasile pa twaachisyisye awala wana kupedwaga chitabu paujo penu (Ayuda ni Akilisito) ni jenumanja wakwe yanti mun'jogopani Allah, nambo naga nkufulu, basi (ni yenu), chisimu Allah iwele Yakwe yaili kumawunde ni yaili petaka, ni awele Allah Jwakupata kwejinji Jwakulapilidwa kusyesyene

Soni yaili kumawunde ni yaili petaka nsyene jwakwe Allah, sano Allah akukwanila kuwa Nkun'jegama

Naasakaga Jwalakwe mpaka antyosye jenumanja achinawandu ni kwika nao wane, ni awele Allah pa yalakweyo Jwakombola kusyene

Jwaakuwa ali nkusaka malipilo ga duniya, basi kwa Allah nikwakuli malipilo ga duniya ni Akhera, ni awele Allah Jwakupikanichisya, Jwakulolechesya

E jenumanja wankulupilile! Wani wakwimilichika pa chilungamiko, wakupeleka umboni ligongo lya Allah namuno uli wakun'galauchila mwachimisyene, kapena achinangolo wawili ni waulongo, namuno ali jwakupata kapena jwakulaga (mmwe kasinkosowalila yele), ngati Allah ni jwali jwakuwajilwa kosowalila ya wanawawilio, basi kasinkuya isako ni kuleka chilungamiko, nambo naga mpombotasye (umboni) kapena kana (kupeleka umbonio), basi (ni yenu), chisimu Allah abali syosope sya yankutenda awele Jwasimanya chenene

E jenumanja wankulupilile! Munkulupililani Allah ni Ntenga Jwakwe ﷺ kwisa soni Chitabu chaatulwisye kwa Ntenga Jwakwe ﷺ ni Chitabu chawatulwisye kalakala, sano jwaakwika mwakunkana Allah, malaika Gakwe, itabu Yakwe, achimitenga Wakwe ni Lisiku Lyambesi, nikuti amasile mwapotele kupotela kwakutalikangana (ni yakuona)

Chisimu awala wakulupilile kaneka nikufulu, soni nikwisa kulupilila kaneka ni kufulu soni, kaneko nikwisa konjechesya nnope kufulu, Allah nganawa wakululuchile wanganyao namuno kwajongolela kwitala (lyagoloka)

Mwatagulilani achinakunaku yanti akwete kupata wanganyao ilagasyo yakupoteka nnope

Awala waakwatenda achimakafili kuwa isyowe yao kwaleka wakulupilila. Ana akusakaga kwa wanganyao uchimbichimbi? Basi uchimbichimbi wosopetu nsyene jwakwe ni Allah

Soni pamasile paitulusyidwe kukwenu m’Chitabu (Qur’an) yanti: “Ndema jankupikana ma Aya ga Allah gali nkukanidwa ni kutendedwa chipongwe, basi ngasintama nao imo mpaka ajinjile mu ngani jine jangawaga jele, (nambo kwika mwakutama nao imo), nikuti pajele ndemajo mpaka m'be chisawu wanganyao.” Chisimu Allah ni Nkwasonganganya ku Moto achinakunaku ni achimakafili wosope wene

Awala waakuwa ali nkun'jembecheya wanganyammwe (kuti impate ipato), basi naga kupunda kwakuumila kwa Allah kuli kukwenu akasatiji: “Ana nganituwa namwe imo?” Nambo naga achimakafili apatile kaupile (panandi ka kwakombola Asilamu, achinakunakuo) akutiji: “Ana nganitusigala panandi kuti tun'guwatile (pa ndema jatwaliji ni Asilamu), soni ni twaliji nkunsiwilila ku wakulupilila (kuti akaika mwankombwele)!” Basi Allah tachijilanya chilikati chenu lisiku lya Kiyama, soni Allah nganawa awisile litala kwa achimakafili lyakwapundila wakulupilila

Chisimu achinakunaku akuntenda chinyengo Allah, sano Jwalakwe ni tachalipila pa chinyengo chaocho, soni pati ajimi kuswali akwimaga mwaulesi, akutenda ndola kwa wandu soni ni wangankolanga Allah ikaweje panandipe

Akuwa nkutogandoga chilikati cha yalakweyi (ya chikulupi ni ukafili), nganawa kwa wanganyawa namuno kwa wanganyao, sano jwannechelele Allah kuti asokonechele, basi nganim'ba mumpatiile litala (lyagoloka)

E jenumanja wankulupilile! Ngasimwatenda achimakafili kuwa isyowe yenu kwaleka wakulupilila, ana nkusaka kuti mum'bichile Allah umboni wakuonechela pa jenumanja (kuti wakusakala)

Chisimu achinakunaku chachiwa pasi pasyesyene pa Moto, soni nganim'ba mwapatiile wanganyao nkwajokola

Ikaweje awala watesile toba (pa kuleka unakunaku wao), ni kwilanya (ndamo syao), ni kulikamulichisya mwa Allah, ni kunswejechesya Allah Dini jao, basi wanganyao ni wali pamo ni wakulupilila, sano Allah ni tachijisa kwapa wakulupilila malipilo gamakulungwa nnope

Ana Allah mpaka annagachisye ya, naga n'di ntogolele ni kulupilila? Ni awele Allah Jwakutogolela kusyene, Jwakumanyilila nnope

Allah jwangannonyela kuinadi (mundu) yakusakala (ya jwine) ikaweje jwatendeledwe lupuso, ni awele Allah Jwakupikanichisya, Jwakumanyilila nnope

Kanga tinchilosye chambone chilichose (pakutenda) kapena tinchisise, kapena tinsiimaasye chakusakala chilichose (chantendele jwine), basi (yosope chiiwe yambone), chisimu Allah awele Jwakusiimaasya (ilemwa), Jwakombola kusyene

Chisimu awala waakunkana Allah ni achimitenga Wakwe, ni kusakaga ali nkulekanganya chilikati cha Allah ni achimitenga Wakwe, nikuwechetaga (yanti): “Wane tukwakulupilila nambo wane tukwakana,” ni kusakaga kujigala litala lya chilikati cha yalakweyi (ngawa lya Usilamu usyesyene kapena lya ukafili)

Wanganyao ni wali makafili gasyesyene, ni twalinganyichisye achimakafili ilagasyo yakwalusya

Sano awala wankulupilile Allah ni achimitenga Wakwe, ni ngalekanganyaga chilikati cha jwalijose mwa wanganyao, jamanjao tachija kwapa malipilo gao, soni ni awele Allah Jwakululuka kusyene, Jwachanasa channope

Achinsyene chitabu (Ayuda) akum'benda (mmwe Muhammadi ﷺ) yanti mwatuluchisye chitabu kuumila kwinani, chisimu chene wanganyao pakwete pam'bendile Musa yekulungwa kupunda yele, pandema jawatite: “Tulosyani Allah mesonkulola.” Basi nichakwembekenye chikokomo cha moto (wanjasi) ligongo lya lupuso lwao, kaneka ni wakatesile kang'ombe (kuwa kannungu kao) panyuma pakwaichilila ilosyo yakuonechela, nambo twakululwichepe yalakweyo, ni twampele Musa umboni wa ulamusi wakuonechela

Ni twalinyakwile litumbi pachanya pao pakutawana nao chilanga (chaakuya Taurat). Ni twasalile kuti: “Jinjililani pannango (wa chilambo cha Shami) chiinamile.” Nambo soni twasalile kuti: “Ngasinsumbaga mpika pa (kasa uchimbichimbi wa lisiku) Lyakuweluka.” Ni twajigele kutyochela kukwao chilanga chakulimbangana

Basi (twalwesile) ligongo lyakasa kwao chilanga ni kanila kwao ma Aya ga Allah, ni kuulaga kwao achimitume mwangali ligongo, ni kuwecheta kwao kwanti: “Mitima jetu jewunichilidwe (kwanti ikulepeleka kwinjila yankulalichila mmwe Muhammadi ﷺ).” (Ngawa jewunichile,) nambo Allah atekudinda idindo pa jalakwejo ligongo lya ukafili wao, ni ngakukulupilila ikaweje panandipe

Soni ligongo lyaukafili wao ni kunnambuchisya kwao Maryam unami wekulungwa nnope (wakuti wakwete mwanache jwapetinji - achambaga Isa)

Ni kuwecheta kwao (mwakutwanga kuti): “Uwwe twam'buleje Masihi Isa mwanache jwa Maryam ntenga jwa Allah,” kutendaga nganam'bulaga soni nganankomela pansalaba, nambo kuti wagambile kupupuliganyisyidwa (pakuwulaga mundu jwinepe kupelaga Isa ligongo lya kulandana), soni chisimu awala watindene mu ngani (ja kuwulajidwa kwa Isa) ali mu liwaniwani ni yalakweyi. Nganakola wanganyao pa yalakweyi umanyilisi (usyesyene) ikaweje agamba kuya liganichisya (basi), soni chisimu chene nganam'bulaga (Isajo)

Nambo Allah wankwesisye Kukwakwe, ni awele Allah Jwamachili gakupunda, Jwalunda lwakusokoka

Soni pangali jwalijose mwa achinsyene chitabu (Ayuda ni Akilisito) ikaweje chachinkulupilila kusyene (Isajo kuti jwaliji ntume jwa Allah ngawa mwanache Jwakwe soni kuti waliji mundu ngawa Nnungu, chachikulupilila yalakweyi) chiwa chakwe chili chisigele panandi (nambo ngasichinkamuchisya chikulupicho), sano lisiku lya Kiyama tachiwa (Isajo) mboni pa wanganyao (pakwakana wawankaaniile ni kwajitika wawan'jiitiiche)

Sano ligongo lya lupuso lwakuliitenda awala Ayuda, twaitesile kuwa ya haraam kukwao yambone yayaliji ya halaal kwa wanyao, ni ligongo lyakwasiwilila kwao (wandu) wajinji kwitala lya Allah

Ni ligongo lya kujigala kwao katapila kutendaga wakanyisyidwe yalakweyo, ni kulya kwao soni chipanje cha wandu mwaukoleko, ni twalinganyichisye achimakafili mwa wanganyao ilagasyo yakupoteka nnope

Nambo watiwiile mu umanyilisi mwa wanganyao, ni wakulupilila wakwe (Asilamu), akukulupilila yayitulusyidwe kukwenu (mmwe Muhammadi ﷺ) ni yayatulusyidwe paujo penu (mmwe nkanim’biche). Sano waakwimika Swala mwakolosya, ni kutolaga Zaka, ni waakunkulupilila Allah ni Lisiku Lyambesi, wanganyao tuchapa malipilo gamakulungwa nnope

Chisimu Uwwe tujuuwiile kukwenu (mmwe Muhammadi ﷺ malowe gakusisika), yatwatite pakuuwula kwa Nuhu ni achimitume wawaiche panyuma pakwe, twaajuuwiile soni kwa Ibrahima, Ismaila, Isihaka, Yaakubu pamo ni isukulu yakwe, (soni kwa) Isa, Ayyubu, Yunusu, Haruna ni Sulaimana, ni twampele Daudi Zaburi

Ni achimitenga watuntagulile kala kwisa soni achimitenga wanganituntagulila, ni wam'bechetekasisye Allah Musa mwachindonda (mwangali jwakulungusya malowe)

Achimitenga wakutagulila abali syakusengwasya, soni wakutetela kuti kasaja kola wandu malowe gakuliwalanga kwa Allah panyuma pa (kwika) achimitenga, ni awele Allah Jwamachili gakupunda, Jwalunda lwakusokoka

Nambo Allah akutendela umboni yatulwisye kukwenu (mmwe Muhammadi ﷺ kuti yakuonaonape) ayitulwisye mwa umanyilisi Wakwe, nombe nao Achimalaika akuwichila umboni, sano Allah akukwanila kuwa Mboni

Chisimu awala wakanile ni kusiwililaga (wandu) kwitala lya Allah, nikuti amasile mwapotele wanganyao kupotela kwakutalikangana (ni yakuona)

Chisimu awala wakanile ni kutendaga lupuso, Allah nganawa wakululuchile kapena kwajongolela kwitala lililyose

Ikaweje litala lya ku Jahannama, chakawe wandamo mwalakwemo kwa yaka ni yaka, soni yalakweyo kwa Allah iwele yakwepepala kusyene

E jenumanja achinawandu! Pamasile pam’bichilile Ntenga (Muhammadi ﷺ) ni yakuona kuumila kwa M'mbuje gwenu, basi kulupililani; chiyiwe yambone kukwenu, nambo naga nkane, basi (niyenu), chisimu Allah iwele Yakwe yosope yaili kumawunde ni petaka, ni awele Allah Jwakumanyilila nnope, Jwalunda lwakusokoka

E jenumanja achinsyene chitabu (Ayuda ni Akilisito)! Ngasinsumbanga mpika pa dini jenu, soni ngasimum'bechetelaga Allah ikaweje yakuonaonape. Chisimu Masihi Isa mwanache jwa Maryam ntenga jwa Allah, soni (juwele chiumbe chagumbidwa ni) lilowe Lyakwe (lya Allah lyakuti: “M'be!”) lyawaliponyisye kwa Maryam, soni (jukwete) nsimu wakuumila Kukwakwe (mujiwelele misimu jine josope). Basi munkulupililani Allah ni achimitenga Wakwe, soni nkatiji: “Watatu,” lekani (chikulupi cha utatu wa Allah) chiiwe yambone kukwenu, chisimu Allah ni Nnungu Jumope, kuswejela ni Kwakwe kwakuwambalana nayo yakola mwanache, iwele Yakwe yosope yaili kumawunde ni yaili petaka, soni Allah akukwanila kuwa Nkun'jegama

Masihi nganawa alikwesisye kwakana kuwa kapolo jwa Allah, namuno Achimalaika wawandichisyidwe (kwa Allah), sano wataiche mwakana kun'galagatila Jwalakwe ni kulikwesya, basi tachasonganganya Kukwakwe wanawose

Sano nambo awala wakulupilile ni kutendaga yambone, basi chachalipila malipilo gao mwakwana ni kwajonjechesya mu ukoto Wakwe, nambo awala wakanile (kun'galagatila Allah) ni kulikwesya, basi tachalagasya ni ilagasyo yakupoteka nnope, soni ngasampata nkwagosa namuno nkwakamuchisya jwangawaga Allah

E jenumanja achinawandu! Pamasile paum’bichilile umboni wakusimichika (Muhammadi ﷺ) kuumila kwa M'mbuje gwenu, ni tuntuluchisye lilanguka lyakuonechela (Qur’an)

Sano nambo awala wankulupilile Allah ni kulikamulichisya Kukwakwe, basi tachajinjisya mu chanasa chakuumila Kukwakwe ni ukoto, soni tiwajongolele Kukwakwe ni litala lyagoloka

Akum'buusya (mmwe Muhammadi ﷺ ya kagawanye ka chipanje chamalekwa), jilani: “Allah akumpa lilamusi lya (kagawanye ka chipanje cha) mundu jwaakuwa ali jwangali mwanache (kapena chisukulu) namuno achinangolo wakwe wanawawili, (kuti) naga mundu awile jwangali mwanache nambo akwete nnumbugwe (jwakuchibaba), nikuti akwete kupata (nnumbugwejo) litika (½) lya yalesile (nchimwenegwejo). Nombenajo (nchimwene naga nkuwajo juli nnumbugwe jwakuchibaba), chajigale chipanje chosope cha nnumbugwejo naga jwangali mwanache. Sano naga waliji (akusigalao achalumbugwepe) wawili, nikuti akwete kupata maunjili gawili mmaunjili gatatu (⅔) ga yalesile (nchimwenegwaojo). Nambo naga waliji (akusigalao) wachilumbu (wawanganyichilane) achalume ni achakongwe, nikuti jwannume akwete kupata liunjili lyakulandana ni liunjili lya achakongwe wawili (:1). Allah akunsalichisya (malamusi Gakwe) ntakwika munsokonechele, soni Allah chindu chilichose awele Jwakuchimanya chenene.”