Yau - Chapter 40 - Ghafir

Ha. Mim

Kutulusyidwa kwa Chitabu (Qur’an) kukuumila kwa Allah, Jwamachili gakupunda, Jwakumanyilila nnope

Jwakululuka sambi ni Jwakupochela toba, Jwaukali pakupeleka ipotesi, Nsyene kupeleka mituka jejinji, pangali nnungu jwine (jwakuwajilwa kun’galagatila) ikaweje Jwalakwe, soni Kukwakwe pe ni kwakuujila

Ngaakasakanganaga pa ma Aya ga Allah ikaweje awala waakufuulu, basi kukannyenga kwendajenda kwao mu ilambo (kupita nchisosa yaakusaka mwantunjelele, chisimu mbesi jao ni ku Moto)

Waakaaniile paujo pao wandu wa Nuhu kwisa soni mikutula (jine) panyuma pao, sano umati uliose wasachilile (yangalumbana) kwa ntenga jwao kuti ankwembekanye (am’bulaje), ni wakanganile ni yaunami kuti atyochesye nayo yakuona, basi nakwembekenye. Ana ipotesi Yangu yaliji uli

Soni iyyoyopeyo lisimichiche lilowe lya Ambuje wenu pa awala wakanile lyanti wanganyao ni wandu wa ku Moto

Awala (Achimalaika) waakutwichila Arishi (Chindanda Chaulungu) ni wali mungulugulu mwakwe, akuluswejesyaga lumbili lwa M’mbuje gwao (Allah), ni akunkulupililaga Jwalakwe, ni akwawendelaga chikululuko awala waakulupilile (achitiji): “Ambuje wetu! Nchijenele chindu chilichose pa ukoto ni umanyilisi, basi mwakululuchilani awala watesile toba ni kuya litala Lyenu, ni mwagosani ku ilagasyo ya Moto Waukali.”

“Ambuje wetu! Soni mwajinjisyani wanganyao ku Matimbe Gandamo agala gamwapele chilanga, kwisa soni awala wawatesile yambone mwa achatati wao, achiwammakwao ni wanache wao, chisimu Mmwe ni Wamachili gakupunda, Walunda lwakusokoka.”

“Ni mwagose ku yakusakala, sano jwatimun’gose ku yakusakala lyele lisikuli, chisimu tim’be muntendele chanasa, soni kwalakweko ni kupunda kwekulungwa nnope.”

Chisimu awala wawakufuulu takawilanjidwe (ni kusalilidwa kuti): “Chisimu kunchima kwa Allah (kumwanchimaga jenumanja ndema jamwankanaga ku duniya) kwaliji kwekulungwa kupunda kulichima kwenu (lelo) mwachimisyene (m’Motomo). (Kumbuchilani) ndema jamwawilanjidwaga ku chikulupi basi jenumanja nikanaga.”

Wanganyao tachiti: “Ambuje wetu! Mwatupele chiwa kawilikose (m’migongo ja achatati wetu ni panyuma pa umi wa duniya), ni ntupele umi kawilikose (pa duniya ni ku Akhera), basi tujitichiisye sambi syetu. Ana nipana litala lyakopochela (ku Moto kuno?” Tachisalilidwa kuti: “Pangali.)”

(Tachisalilidwa kuti): “Yalakweyi niligongo lyanti ndema jajwalumbanjidwaga Allah Jikape mwakanilaga, nambo naga nkum’bwanganya Jwalakwe (ni isanamu) ni mwakulupililaga, basi chiilanyo chosope chili cha Allah Jwapenani kusyene, Jwankulungwa nnope.”

Jwalakwe ni Ajula jwaakunnosya wanganyammwe ilosyo Yakwe (yakulosya ukombosi Wakwe), ni akuntuluchisya lisiki (wula) kuumila kwinani, ni ngaakukumbuchila (kusyesyene) ikaweje ajula jwaakuwujila (kwa Allah pakutenda toba)

Basi munnumbanjileje Allah mwakunswejechesya dini Jakwe, namuno achimakafili yachime

(Jwalakwe Allah ni) Nsyene mauchimbichimbi gapenani kusyene, Nsyene Arishi (Chindanda Chaulungu), jukupelekaga malowe kwa lilamusi Lyakwe ku jwansachile mwa achikapolo Wakwe, kuti jutetele ya lisiku lyakusimangana (lisiku lya Kiyama)

Lisiku lyatachionechela papaswela wanganyao, chindu chilichose chakuumila kukwao ngasichisisika kwa Allah. (Allah tachiwusya kuti): “Ana lelo uchimwene wosope wacheni?” (Ni tachilijanga Nsyene kuti): “Wa Allah Jumpepe, Jwamachili gangalimbana nago.”

Lelo mundu jwalijose tijulipidwe yajwapanganyisye, pangali lupuso lelo, chisimu Allah ni Jwachitema pakuwalanjila

Soni mwatetelani ya lisiku (lya Kiyama) lyalikuwandichila, pandema jajichiyika mitima kungulo (ligongo lya woga) jili jin’gumbele madandausi, walupuso ngasakola nsyowe jwa pantima (jwanti nikwakamuchisya lyele lisikulyo), namuno nkuchondelela jwaakundidwa (kuchondelela kwakwe)

(Allah) akumanyilila chinyengo cha meso, ni yajikusisa mitima

Soni Allah akwiilanyaaga mwakuonaonape, sano awala waakwalumbanjila kunneka Jwalakwe nganawa apakombwele kwiilanya chilichose. Chisimu Allah ni Jwakupikanichisya, Jwakulolechesya

Ana ngakwendajenda pachilambo ni kupitaga nchilola mujawelele mbesi ja awala wawaliji paujo pao? Waliji wamachili nnope kwapunda wanganyao, ni (walesile) ipasipasi (yejinji) pachilambo (mpela yakutawatawa kwapunda Makuraishi), basi Allah wakwembekenye ligongo lyasambi syao, ni nganakola nkwagosa jwalijose kwa Allah

Yalakweyi nilogongo lyanti wanganyao waliji nkwaichilila Achimitenga wao ni ilosyo yakuonechela ni waakaaniile, basi Allah niwakwembekenye. Chisimu Jwalakwe ni Jwakulimbangana nnope, Jwaukali kusyene pakupeleka ipotesi

Soni chisimu chene twantumisye Musa ni isimosimo Yetu kwisa soni maumboni gakuonechela

Kwa Firiauna, Hamana ni Karuna, wanganyao ni watite: “(Aju ni) nsawi, jwaunami kusyene.”

Basi ndema jajwaichilile ni yakuona kuumila Kukwetu, watite: “Mwaulagani wanache wachilume wa awala waakulupilile najo imo, ni mwalecheje umi wanache wao wachikongwe.” Ni nganigawa malindi ga achimakafili ikaweje mu kusokonechela

Ni jwawechete Firiauna kuti: “Munekani kuti nam’bulaje Musa, ni wawilanje Ambujegwe (kuti anchenjele). Chisimu une ngogopa kuti atakwika mwaagalawisye dini jenu, kapena atakutandikasya kuwatanganya kwa kuonechela pa chilambo.”

Musa jwatite: “Chisimu une ngulijuya mwa M’mbuje gwangu nambo soni M’mbuje gwenu (Allah), ku jwakulikwesya jwalijose jwangakukulupilila ya Lisiku Lyachiwalanjilo.”

Ni jwawechete mundu jwakulupilila jwa kwiwasa lya Firiauna juwasisaga chikulupi chakwe: “Ana nkusaka kum’bulaga mundu ligongo lyakuwecheta kuti: ‘M’mbuje gwangu ni Allah?’ Kutendaga soni jwalakwe pamasile pam’bichilile ni ilosyo yakuonechela kuumila kwa M’mbuje gwenu? Sano najuwaga jwaunami, basi unami wakweo tiun’jonanje nsyene, nambo naga juli jwakuona nikuti tiyimpate ine mu yaakumpa chilanga (kuti tiyimpate pa duniya pepano). Chisimu Allah jwangan’jongola mundu jwali jwakupelenganya malile (pakonanga), jwaunami kusyene.”

“E wandu wangu! Uchimwene ni wenu lelo, n’di wakupunda pa chilambo. Ana niwani wampaka atujokole ku ipotesi ya Allah naga ili ituyichilile?” Firiauna jwatite: “Ngangumpanga ikaweje yanguiona (kuti yambone), soni ngangun’jongolela ikaweje kwitala lyagoloka.”

Ajula juwakulupilile ni jwatite: “E wandu wangu! Chisimu une ngun’jogopela wanganyammwe chisawu lisiku (lya ipotesi yanakumpataga) mikutula (ja makafili gakalakala).”

“Chisawu nyendele (jakapedwe ka ilagasyo) ja wandu wa Nuhu, Adi ni Samuda kwisa soni awala wamunyuma mwao, ni nganawa Allah jwakusaka kwatenda lupuso achikapolo (Wakwe).”

“E wandu wangu! Chisimu une ngun’jogopela wanganyammwe lisiku lyakuwilangana (lisiku lya Kiyama).”

“Lisiku lyatinchilosya migongo kutila, n’di nganinkola wakunchenjela kwa Allah, sano jwannechelele Allah kupotela, basi nganijukola nkun’jongola jwalijose.”

“Soni chisimu chene wam’bichilile Yusufu kalakala ni ilosyo yakuonechela, basi ninganinneka kuwa mu kaichila pa yajwaiche nayo kukwenu, kwikanila ndema jajwawile mwatite: ‘Allah nganawa atumisye panyuma pakwe ntenga jwalijose.” Iyyoyopeyo niyaakutiji Allah pakunnechelela kupotela mundu jwali jwakupelenganya malile (pakonanga), jwakaichila

Awala waakukangana pa ma Aya ga Allah mwangali umboni uliose wawaichilile, (kangana kwaoko) kukusile nnope kuwenjedwa (kwakwe) pameso pa Allah kwisa soni pameso pa awala waakulupilile. Iyyoyopeyo ni yakasatiji Allah pakudinda chidindo pa ntima uliose wa jwakulikulungusya, jwakulikwesya

Firiauna ni jwatite: “E mmwe Hamana! Mundawilani chipilala, kuti mwine une tinagaiche matala.”

“Matala ga kumawunde, kuti ngan’dingule Nnungu jwa Musa, soni chisimu une ngun’ganichisya jwalakwe kuti jwaunami.” Iyyoyopeyo yasalalisyidwe kwa Firiauna itendo yakwe yangalumbana, ni jwasiwilidwe kwitala (lyagoloka), ni nganigawa malindi ga Firiauna ikaweje mu konasika

Ajula juwakulupilile ni jwatite: “E wandu wangu! Munguyani une nan’jongolele kwitala lyachongoko.”

“E wandu wangu! Chisimu awu umi wa duniya uwele chisengwasyo (chandema jannono), sano chisimu Akhera nijajili Nyumba Jakutamilichika.”

“Jwatapanganye chakusakala chilichose, basi ngaalipidwa ikaweje chakulandana mpela chichocho, soni juchapanganye chambone chilichose, kwali tawe jwannume kapena jwankongwe aku juli tachipedwaga lisiki kwalakweko mwangawalanjila.”jwakulupilila, basi wanganyao tachijinjila ku Mbepo

“Soni E wandu wangu! Ligongo chichi une ngum’bilanjila jenumanja ku chokoko, sano jenumanja ni nkumilanjila une ku Moto!”

“Nkumilanjila une kuti nankaane Allah ni nam’bwanganye Jwalakwe ni ichindu yanganingola nayo umanyilisi, kutendaga une ngum’bilanjila ku (Allah) Jwamachili gakupunda, Jwakululuka kusyene!”

“Pangali kaichila yanti wankumilan’jila kuti nagalagatilejeo, nganakola duwa (janti mpaka ajijanje) pa duniya namuno ku Akhera, soni kuti kwakuujila kwetu ni kwa Allah, soni kuti wakupelenganya malile (pakonanga) ni watachiwa wandu wa ku Moto.”

“Basi tinchiyikumbuchila yangunsalilayi, ni ngwegamisya indu yangu kwa Allah. Chisimu Allah ni Jwakwalolechesya achikapolo (Wakwe).”

Basi Allah ni wan’gosile ku yakusakala ya malindi gawantendele, ni yasyungwile wandu wa Firiauna ilagasyo yakusakala nnope

Moto, akulosyedwa wanganyao ku walakweo kundawi ni kwigulo (m’malembe mwao). Sano lisiku lyajichijima Kiyama (kuchiwechetedwa yanti): “Mwajinjisyani wandu wa Firiauna ku ilagasyo yakupoteka nnope.”

Soni (mwakumbusyani) katema katachikanganaga m’Moto. Basi nitachiti wangalikombolela kwa awala wawalikwesyisye: “Chisimu uwwe twaliji akunkuya wenu, ana jenumanja ni chintutyochesye upande wine wa Moto?”

Awala wawalikwesyisye ni tachiti: “Chisimu uwwe wosope wene tuli mwemuno, chisimu Allah pamasile paajiileenye chilikati cha achikapolo (Wakwe).”

Awala watachiwa m’Moto tachiti pakwasalila akujisunga Jahannama (Achimalaika): “Mum’bendani M’mbuje gwenu (Allah) kuti atupunguchisye uwwe ilagasyo lisiku limpepe.”

(Akujisunga Jahannama) tachiti: “Ana achimitenga wenu nganawa nkum’bichilila ni ilosyo yakuonechela?” Wanganyao tachiti: “Elo.” (Akujisunga Jahannama) tachiti: “Basi wombani.” Ni nganijiwa duwa jamakafili ikaweje mu kusokonechela

Chisimu Uwwe chitwachenjele Achimitenga Wetu kwisa soni awala wakulupilile pa umi wa duniya ni lisiku lyasichijima mboni (lisiku lya Kiyama)

Lisiku lyaangaakamuchisya walupuso kuliwalanga kwao, ni tachikola wanganyao malweso, ni tachikola soni nyumba jakusakala nnope (Jahannama)

Soni chisimu chene Musa twampele chongoko, ni twapele wanache wa Israila kuchitawalila Chitabu (Taurat)

(Chachaliji) chongolo kwisa soni chikumbusyo kwa wakwete lunda

Basi pililani (mmwe Muhammadi ﷺ), chisimu chilanga cha Allah chakuonaonape, soni wendani chikululuko ku sambi syenu, ni nnuswejesyeje lumbili lwa Ambuje wenu (Allah) kwigulo ni kundawi

Chisimu awala waakukangana pa ma Aya ga Allah mwangali umboni uliose wawayichilile, m’mitima mwao mwangali ikaweje kulikwesya, (akusosa ukulu wakumpunda Muhammadi ﷺ) nambo nganawa awuwiche wanganyao, basi lijuyani mwa Allah, chisimu Jwalakwe ni Jwakupikanichisya, Jwakulolechesya

Chisimu gumba mawunde ni mataka kuwele kwekulungwa nnope kupunda gumba wandu, nambo wandu wajinji ngaakumanyilila

Soni nganawa alandene jwangalola ni jwakulolaga, namuno awala waakulupilile ni kutendaga yambone (nganawa alandene) ni akusakasya. Yannonope ni yankukumbuchilaga

Chisimu Kiyama jikwisa kwene, jangali kaikasya (yakwika kwakwe), nambo wandu wajinji ngaakukulupilila

Ambuje wenu (Allah) ni akuti: “Mumombani Une tinan’janje. Chisimu awala waakulikwesya pakuleka kungalagatila Une, tachijinjila ku Jahannama ali wakunyosyeka.”

Allah ni Ajula jwam’bichile chilo kuti ntulalilejemo, muusi nikuwa wakuloleka, chisimu Allah ni Nsyene umbone wakwatendela wandu, nambo wandu wajinji wangatogolela

Jwalakwe ni Allah M’mbuje gwenu, Nkugumba chindu chilichose, pangali nnungu jwine (jwakuwajilwa kun’galagatila) ikaweje Jwelepejo, ana nkugalausyidwa chinauli (kuleka yakuona)

Iyyoyopeyo ni yawatite pakugalausyidwa awala wawaliji nkugakanila ma Aya ga Allah (kalakala)

Jwalakwe ni Jwaumi wandamo, pangali nnungu jwine (jwakuwajilwa kun’galagatila) ikaweje Jwelepejo, basi mum’bombani Jwalakwe mwakunswejechesya dini Jakwe. Lumbili losope lwene alapikwe Allah, M’mbuje jwa iwumbe yosope

Jilani: “Chisimu une nganyisyidwe kwagalagatila awala wankwalumbanjila kunneka Allah payimbichilile ilosyo yakuonechela kuumila kwa Ambuje wangu, ni namulidwe kuti nalipeleche kwa M’mbuje jwa iwumbe yosope.”

Jwalakwe ni Ajula juwan’gumbile jenumanja kuumila mwitaka (baba wenu Adam), kaneka (akun’gumbaga) kuumila mwindondwa lya mesi (ga walume ni wakongwe), kaneka kuumila m’chipande cha myasi jekamatane, kaneka akunkoposyaga n’di makandi, kaneka (akunnechelelaga) kuti m’biche ndema jaakomangala kwenu, kaneko kuti m’be wachekulupe, ni pana wane mwa jenumanja waakuwaga nkanayiche (ndema jauchekulu, wane namuno ndema jakomangala), ni (antendele yalakweyi) kuti n’jiyiche ndema jekolanjidwe (jakuwila jawannembele), nambo soni kuti jenumanja nkole lunda (lwakumanyililila kuti Allah jwapakombwele kutenda yele mpaka akombole kwajimusya wandu wawe)

Jwalakwe ni Ajula jwaakupelekaga umi ni chiwa, sano pati asachile chilichose (kuti chipatikane), basi agambaga kuchisalila kuti “M'be!” Ni chikasawaga

Ana ngankwaona awala waakukangana pa ma Aya ga Allah? Ana akugalausyidwa chinauli (kuleka yakuona)

Awala waachikaaniile Chitabu (cha Qur’an), ni ayila yatwaatumiisye nayo Achimitenga Wetu (ya chikulupi cha Tauhidi ni yakwimuka m’malembe). Basi tachiika kumanyilila (ipotesi yakanila kwao)

Ndema jagachiwa makongwa mu ngosi mwao, kwisa soni unyolo (mu ngongolo mwao) ali nkuwutidwa

M’mesi gamasemule kusyene, kaneko tachiwa nkuchomedwa m’Moto

Kaneko ichiwechetedwa kukwao yanti: “Ili kwapi ayila yamwaliji nkuiwanganya (pa kuigalagatila)?”

“Kunneka Allah?” Wanganyao takajile: “Itusokonechele. (Ngwamba), nambo kutandila kalakose nganituweje tuli nkuchilumbanjila chindu chilichose (changawaga Mmwe Ambuje).” Iyyoyopeyo niyaakutiji Allah pakwalechelela kusokonechela achimakafili

“Yalakweyi (yaimpatile lelo m’Moto) niligongo lyanti mwaliji nkutwanga pa chilambo mwangawajilwa (pagalagatila isanamu ni kanila ya kwimuka m’malembe), ni ligongo lyanti mwaliji nkuchina.”

“Jinjilani milango ja ku Jahannama, tim’be wandamo kwalakweko. Kaje kusakala nnope mauto ga wakulikwesya!”

Basi pililani (mmwe Muhammadi ﷺ), chisimu chilanga cha Allah chakuonaonape. Soni kanga chitunnosye (mmwe Muhammadi ﷺ pa duniya pepano) ine mwa ayila (ipotesi) yatukwatetela kapena kumpa chiwa (nkanitunnosye; tiyapatepe), basi Kukwetu taachiuchisyidwa

Soni chisimu chene twatumisye Achimitenga paujo penu (mmwe Muhammadi ﷺ). Wane mwa jamanjao twansimbile (ngani syao), wane soni mwa jamanjao nganitunsimbila (ngani syao). Ni nganiyiwa kwa ntenga julijose yanti nikwikanacho chisimosimo ikaweje mu lisosa lya Allah. Sano patichiyika chilamusi cha Allah (chakwapa ipotesi wakanila); kuchilamulidwa mwakuonaonape, ni tachipelelwa jele ndemajo wakuya yaunami

Allah ni Ajula jwam’bichile jenumanja ilango kuti ine mu yalakweyo nyyikweleje, ni kuti ine muyalakweyo nyyilyeje

Soni nkwete jenumanja mu yalakweyo ikamuchisyo (yaijinji mpela kuikama nkaka), nambo soni kupitila mu yalakweyo nkombolecheje kuyiyika isako yaili m’mitima mwenu (mpela kutwichilila misigo jenu), nambo soni pa yalakweyo kwisa soni pa yombo nkasanyakulidwaga

Ni akunnosyaga (Allah) ilosyo Yakwe (yakulosya ukombosi Wakwe). Ana niyapi mu ilosyo ya Allah yankuikana

Ana ngakwendajenda pa chilambo ni kupitaga nchilola mujawelele mbesi ja awala wawaliji paujo pao? Waliji wajinji kwapunda wanganyawa (Makuraishi), nambo soni wamachili nnope, ni (walesile) ipasipasi (yejinji) pachilambo (mpela yakutawatawa), nambo nganiyakamuchisya wanganyao ya waliji nkupanganya

Basi ndema jawaichilile wanganyao Achimitenga wao ni ilosyo yakuonechela, watwanjile ni umanyilisi wawaliji kukwao (wakumanyilila ya duniya, ni kuichembulusya yawaiche nayo Achimitenga), ni yasyungwile wanganyao (ipato) ayila yawaliji nkuitenda chipongwe

Sano ndema jawaiweni ipotesi Yetu watite: “(Sano) tunkulipilile Allah Jumpepe, ni tuikaaniile ayila yatwaliji nkuiwanganya ni Jwalakwe (pa kuigalagatila).”

Basi nganichiwa chanti nikwakamuchisya chikulupi chao ndema ja waiweni ipotesi Yetu. (Aji ni) nyendele ja Allah jajapite pa achikapolo Wakwe (janti naga ayikene mwa kuiona ipotesi toba jao nganijipocheledwaga). Ni wapelelwaga jele ndemajo achimakafili