Yau - Chapter 48 - Al-Fath

Chisimu Uwwe tum’buguliile mmwe (Muhammadi ﷺ) kuwugula kwakuonechela (wauli nkamulano wa pa Hudayibiya wawatendekasisye kuti Maaka gaugulidwe)

Kuti Allah ankululuchile sambi syenu syam’bujo ni syamunyuma, ni kunkwanilichisya chindimba Chakwe, ni kun’jongolela kwitala lyagoloka

Nikuti Allah ankamuchisye kamuchisya kwamachili

Jwalakwe ni Ajula juwatulwisye kutulala m’mitima mwa wakulupilila kuti ajonjechesye chikulupi pa chikulupi chao (chakalape). Sano Allah ni Nsyene asilikali wa kumawunde ni petaka, ni awele Allah Jwakumanyilila nnope, Jwalunda lwakusokoka

(Allah atesile yalakweyi) kuti akaajinjisye wakulupilila wachilume ni wachikongwe ku Matimbe ga ku Mbepo, gasikujilima chapasi pakwe sulo, takawe wandamo mwalakwemo, nikuti wasimachisye ilewi yao. Ni kuwele kwalakweko pameso pa Allah kupunda kwekulungwa nnope

Nikuti wape ilagasyo achinakunaku wachilume ni wachikongwe, kwisa soni wakuwanganya (Allah ni isanamu) wachilume ni wachikongwe, waakun’ganichisyaga Allah nganisyo syangalumbana, pa wanganyao pana mpupulusi wakusakala, soni Allah wakasilichile, walwesile, ni walinganyichisye Jahannama, kaje kusakala malo gakuwujila gakwe

Soni Allah ni Nsyene asilikali wa kumawunde ni petaka, ni awele Allah Jwamachili gakupunda, Jwalunda lwakusokoka

Chisimu Uwwe tuntumisye mmwe (Muhammadi ﷺ) kuwa mboni, ni jwakutagulila abali jakusengwasya, nambo soni jwakutetela

Kuti jenumanja munkulupilile Allah ni Ntenga Jwakwe ﷺ, ni kunkamuchisya (Ntengajo) nambo soni kunchimbichisya, nikuti munswejesyeje (Allah) kundawi ni kwigulo

Chisimu awala waakutawana namwe chilanga (mmwe Muhammadi ﷺ), chisimu akutawana chilanga ni Allah, nkono wa Allah uli pachanya pa makono gao, sano jwatakase (chilanga chakwecho), nikuti akukasa kwalikonya nsyene, sano jwatakwanilisye yajwatawene najo Allah, basi (Allah) tachimpa malipilo gamakulungwa nnope

Tansalile (mmwe Muhammadi ﷺ) akusigalila munyuma (pangalongana namwe wa ku Maaka) mu warabu wanchimisi: “Yatuwijikenye ipanje yetu kwisa soni mawasa getu, basi tuwendelani chikululuko (kwa Allah).” Akuwecheta ni ndimi syao yanganiyiwa m’mitima mwao. Jilani: “Ana ni nduni jwampaka akombole kunkamuchisya chilichose kwa Allah nasakaga kumpa masausyo kapena nasakaga kunkamuchisya? Nambo Allah awele Jwaasimanya chenene abali syosope sya yankutenda.”

Sano jwangaakunkulupilila Allah ni Ntenga Jwakwe ﷺ, basi chisimu Uwwe tugalinganyichisye makafili Moto Wakulapuka

Soni Allah ni Nsyene uchimwene wa kumawunde ni petaka, akunkululuchilaga jwansachile, ni kumpa ilagasyo jwansachile, ni awele Allah Jwakululuka kusyene, Jwachanasa channope

Tawechete akusigalila munyuma pandema jatim’bigule kuja kuchipanje chakupalagula (cha ku Khaibara) kuti nkachijigale: “Tulekaani tunkuuye.” Akusaka agalawusye malowe ga Allah. Jilani: “Nganim’ba ntukuyiye. Mwele ni muwawechetele kalape Allah.” Basi wanganyao tajile: “(Ngwamba), nambo nkututendela litima.” (Ngwamba), nambo awele akakumanyilila ikaweje panandipe

Mwasalilani akusigalila munyuma mu warabu wanchimisi (kuti): “Sampano tim’bilanjidwe wa (kumenyana nao) wandu waakwete machili gakuputila ngondo mwaukali, tinkamenyane nao kapena takagambe kulipeleka. Basi naga nkunde, Allah tampe malipilo gambone, nambo naga n’galauche (kuleka kumenyana nao) yamwatite paagalauka kalakala, tannagasye ni ilagasyo yakupoteka nnope.”

Pangali gambidwa kwa jwangalola, soni pangali gambidwa kwa jwannemale, nambo soni pangali gambidwa kwa jwakulwala (naga ngaakwaula kungondo). Soni jwatampikanile Allah ni Ntenga Jwakwe ﷺ, takan’jinjisye ku Matimbe ga ku Mbepo gasikujilima sulo chapasi pakwe. Sano jwatagalauche, nikuti tannagasye ni ilagasyo yakupoteka nnope

Chisimu pamasile pawasengwele Allah wakulupilila ndema jawatawanaga namwe (mmwe Muhammadi ﷺ) chilanga pasi pachitela, basi ni jwamanyilile yayaliji m’mitima mwao, ni watuluchisye kutulala, ni walipile kuwugula kwakuwandika (kwakuwugula nsinda wa Khaibara ni Maaka)

Ni ipanje yakupalagula yaijinji yatachiyijigala, ni awele Allah Jwamachili gakupunda, Jwalunda lwakusokoka

Ampele chilanga Allah cha ipanje yakupalagula yaijinji yatinchiyijigala, basi ni an’janguyichisye kaje ayi (ya ku Khaibara), ni agachijile makono ga wandu kuti gakanyyichila, nikuti chiwe chilosyo kwa wakulupilila (chakulosya chikamuchisyo Chakwe), soni kuti an’jongolele kwitala lyagoloka

Ni yine (mu ipanje yakupalagula) yanganinyyikombola (kuipata), chisimu Allah pamasile paayisyungwile yalakweyo, ni awele Allah pa chindu chilichose Jwakombola kusyene

Soni angajile ampute ngondo awala waakufuulu, angalosisye migongo (kutila), kaneka nga nganampata nkugosa jwalijose namuno nkukamuchisya

(Jalakwejo ni) nyendele ja Allah ajila jajalongolele kala, ni ngankusimana kupitikuka kulikose pa nyendele ja Allah

Jwalakwe ni Ajula juwagachijile makono gao kukwenu, ni makono genu kukwao nkati mwa (chiwata cha) Maaka, panyuma pakumpundikasya pa jamanjao, ni juwele Allah pa ichindu yankutenda Jwakuilolechesya

Wanganyao ni awala waakufuulu, ni kunsiwilila wanganyammwe ku Nsikiti Wakuchimbichika (wa Maaka), ni kuisiwilila inyama yambepesi kuti ikayika pamalo pakwe (pakusikitilidwa). Sano angawaga achalume wakulupilila ni achakongwe wakulupilila wanganimwamanya, kuti ntakwika mwamwawuleje nikupata jenumanja ligongo lya wanganyao sambi nkakumanyilila (nga nganagachiga makono genu pa wanganyao), (nambo jwatesile yalakweyo) kuti Allah an’jinjisye jwaakunsaka mu ukoto Wakwe. Ingawe kuti wanganyao (Asilamu ni makafili) watalikangene, tungaapele awala wawakufuulu mwa jamanjao ilagasyo yakupoteka nnope

Pandema jawawisile awala wawakufuulu m’mitima mwao mbapata syagasabu, mbapata syagasabu syachijinga, basi Allah ni watulwisye kutulala Kwakwe pa Ntenga Jwakwe ﷺ ni pa wakulupilila, ni watendekasyisye kulikanganichila lilowe lya woga (wakun’jogopa Allah lya La ilaha illallah [Pangali nnungu jwine jwakuwajilwa kun’galagatila ikaweje Allah]), ni waliji wakuwajilwa ni lyalakwelyo nambo soni ni achinsyene (lilowelyo), ni awele Allah chindu chilichose Jwaachimanya chenene

Chisimu pamasile pansimichisye Allah Ntenga Jwakwe (Muhammadi ﷺ) sagamisi mwakuonaonape, chisimu wanganyammwe tinchijinjila mu Nsikiti Wakuchimbichika (wa Maaka) nasakaga Allah mwantunjelele, n’di mmyosile mitwe jenu ni kupungusya (wumbo syenu), nkaakogopa. Basi Jwalakwe (Allah) jukumanyilila yangankuimanyilila jenumanja, basi ni juwisile nkaniyiwe yalakweyo (yakuujinjila Nsikiti Wakuchimbichika wa Maaka) kuwugula kwakuwandika (kwa nsinda wa Khaibara)

Jwalakwe ni Ajula jwaatumisye Ntenga Jwakwe (Muhammadi ﷺ) ni chongolo kwisa soni Dini jakuona kuti ajikwesye pachanya pa dini syosope, sano Allah ni akukwanila kuwa Mboni

Muhammadi ﷺ ni Ntenga jwa Allah. Sano awala wali pamo ni jwalakwe ali wamachili nnope kwa achimakafili, (nambo) wakutendelana chanasa sikati jao. Timwaone achijinamaga ni kusujudu (kuswali), achisachililaga umbone wakuumila kwa Allah ni chinonyelo (Chakwe). Imanyilo yao ili kungope kwao ligongo lya kusujudu (pa kuswali). Ayi ni yatite kasimbidwe mu Taurat. Sano yatite kasimbidwe mu In’jil; (wanganyao) ali chisawu mmela waukopwesye nyambi syakwe, sano (nyambisyo) ni kuwulimbanganya (mmelao), ni komangala, ni kwimilichika pepata lyakwe, ni kwasengwasya akuupaanda, kuti agapikasye ntima makafili ligongo lya wanganyao. Allah wapele chilanga awala waakulupilile ni kutendaga yambone mwa wanganyao cha chikululuko ni malipilo gamakulungwa nnope