Yau - Chapter 49 - Al-Hujurat

E jenumanja wankulupilile! Ngasinnongolela (kupeleka nganisyo syenu) pameso pa Allah ni Ntenga Jwakwe ﷺ, ni mun’jogopeje Allah, chisimu Allah ni Jwakupikanichisya, Jwakumanyilila nnope

E jenumanja wankulupilile! Ngasinnyakulaga malowe genu pachanya pa lilowe lya Ntume ﷺ, nambo soni ngasimunnyanyichilaga jwalakwe lilowe yankuti pakunyanyichilana wane kwa wane, gatakwika mugajonasiche masengo genu kutendaga jenumanja nkakumanyilila

Chisimu awala waakutondoya malowe gao kwa Ntenga jwa Allah ﷺ, wanganyao ni awala waajilinjile Allah mitima jao pa woga (wakun’jogopa Jwalakwe), akwete kupata wanganyao chikululuko ni malipilo gamakulungwa nnope

Chisimu awala waakum’bilanga (mmwe Muhammadi ﷺ n’di) kusyeto kwa yumba, wajinji wao wangali lunda

Soni ingawe wanganyao wapilile kuti mpaka nkopoche kuja kukwao, ingaliji yambone kwa jamanjao. Sano Allah ni Jwakululuka kusyene, Jwachanasa channope

E junumanja wankulupilile! Naga juli jum’bichilile jwangakulupichika ni abali jilijose (ngasimunkulupilila), nambo n’jiwungunye (kaje), ntakwika mwamwalagasyisye wandu mwa ujinga, basi ni kusyuka kuwa wakuligamba pa yampanganyisye

Soni manyililani yanti mwa jenumanja mwana Ntenga jwa Allahﷺ(basi mumpikanilani yaakunsalila). Ingawe wankundilile mu ichindu yaijinji (yankuwecheta) chisimu nkaliji m’matabu. Nambo Allah achinonyelesye kukwenu chikulupi, ni kuchisalalisya m’mitima mwenu, ni awutesile kuwa wakuchimidwa kukwenu ukafili, unampitiku ni kunyosya. Wanganyao ni wali wagoloka

(Awu ni) umbone wakuumila kwa Allah ni ukoto, soni Allah ni Jwakumanyilila nnope, Jwalunda lwakusokoka

Sano naga makuga gawili ga wakulupilila gakumenyana, basi jilanyani chilikati chao. Sano naga limo mu gawiligo likulitendela uwwanga linelyo, basi liputani alila lyalikutenda uwwanga mpaka liujile ku chilamusi cha Allah. Sano naga lili liujiile, basi jilanyani chilikati chao mwachilungamiko, soni golosyani (magambo), chisimu Allah akwanonyela wagolosya (magambo)

Chisimu wakulupilila wosope ali paulongo; basi jilanyani chilikati cha achalongo achimijenu, ni mun’jogopeje Allah kuti ntendeledwe chanasa

E jenumanja wankulupilile! Wandu akaanyosya wandu achimijao, mwine kuwa nkuwa (akunyosyedwao) ni wali wambone (pameso pa Allah) kwapunda wanganyao, nombe nao achakongwe (akaanyosya) achakongwe achimijao, mwine kuwa nkuwa (akunyosyedwao) ni wali wambone (pameso pa Allah) kwapunda wanganyao. Ni ngasimpelegana ayibu mwachimisyene (pakumbana utundu), soni nkakolangana mena gachipongwe, kaje kusakala nnope (kolanjilidwa mundu) lina lyakuti nampitiku panyuma pakulupilila! Sano watatende ngatenda toba, basi wanganyao ni wakulitenda lupuso

E jenumanja wankulupilile! Liwambasyani liganichisya lyejinji, chisimu line mwa liganichisya lili sambi, soni ngasimwajendaga wandu m’masajo, soni wane mwa jenumanja akaasogodaga wane. Ana jumo jwenu mpaka anonyelwe kulya nyama ja n’jakwe jwam’bwe? Mpaka iyyiwenjetu yele; (basi kuwengani nombe kusogodana), ni mun’jogopeje Allah. Chisimu Allah ni Jwakupochela nnope toba, Jwachanasa channope

E jenumanja wandu! Chisimu Uwwe tun’gumbile kuumila mwa jwannume ni jwankongwe, ni tuntesile kuwa mitundu ni ngosyo (syakulekangana-lekangana) kuti mmanyiganeje. Chisimu wakuchimbichika nnope wenu pameso pa Allah ni wawoga nnope wenu (wakun’jogopa Allah). Chisimu Allah ni Jwakumanyilila nnope, Jwaasimanya abali syosope

Warabu wanchimisi watite: “Tukulupilile.” Jilani (mmwe Muhammadi ﷺ): “Nganinkulupilile. Nambo n’jileje: ‘Tulipeleeche (pakuwa Asilamu).’ Ligongo mpaka sano chikulupi nganichijinjile m’mitima mwenu (ni kutamilichika). Sano naga nkunkunda Allah ni Ntenga Jwakwe ﷺ, ngampunguchisya chilichose mu (malipilo ga) itendo yenu. Chisimu Allah ni Jwakululuka kusyene, Jwachanasa channope.”

Chisimu wakulupilila ni awala wankulupilile Allah ni Ntenga Jwakwe ﷺ, kaneka ni nganakaichila, ni kuputa ngondo ni chipanje chao ni achimisyene wakwe petala lya Allah, wanganyao ni wali wakuona (pa chikulupi chao)

Jilani: “Ana jenumanja nkummanyisya Allah dini jenu, kutendaga Allah jukumanyilila ya kumawunde ni petaka? Soni Allah chindu chilichose awele Jwaachimanya chenene.”

Akunkuumba ligongo lyanti ajiinjiile mu Usilamu (mpela kuti antendele ukoto mmwe Muhammadi ﷺ). Jilani: “Nkaanguumba nako kwinjila kwenu mu Usilamu. Nambo Allah ni jwantendele ukoto jenumanja ligongo lyanti an’jongolele ku chikulupi, nam’baga jenumanja wakuona (pa chikulupi chenu).”