Yau - Chapter 51 - Adh-Dhariyat

Ngujilumbila (mbungo) jajikututumya luwundu (lwamesi ni kuwelekasya mawunde gawula)

Ni (ngugalumbila soni mawunde) gagakutwichila mesi gausito

Ni (yombo) yaikwenda (m’mbwani) mwakutulalila

Ni (Achimalaika) waakugawanya chilamusi (cha Allah, mpela wula ni malisiki gane)

Chisimu yankupedwa chilanga iwele yakuonaonape

Soni chisimu malipilo gawele gakupatikana

Ngulilumbila liwunde lyalikwete kagumbidwe kambone

Chisimu wanganyammwe n’di pa malowe gakutindana (gakwamba Qur’an ni Muhammadi ﷺ)

Akugalawusyidwa ni galakwego (kuleka kujikulupilila Qur’an ni Muhammadi ﷺ) jwagalawusyidwe (kuleka chikulupi cha Tauhidi)

Pamasile palaniwe waunami

Awala waatiwiile mu ujinga, achikwanjilaga (ya Akhera)

Akuwusyaga (mwachipongwe): “Ni chakachi (kwika kwakwe lyele) Lisiku Lyamalipilo?”

(Tachisalilidwa kuti): “Pasyani kulagasyidwa kwenu, ayi ni ayila yamwaliji nkuijanguya (kuti iyicheje, sano ni iyiche).”

Chisimu wawoga (wakun’jogopa Allah) tachiwa m’Matimbe ga ku Mbepo ni achitutumule

Achipochelaga yawapele Ambuje wao (Allah). Chisimu wanganyao nkaniyiwe yalakweyo (ku duniya) waliji wakolosya (masengo)

Waliji nkugona panandipe chilo

Soni kumasikusiku wanganyao waliji nkuwenda chikululuko (kwa Allah)

Ni m’chipanje mwao mwaliji mwana liwunjili lyakumpa nkuwenda ni nkwimidwa (ligongo lya kulisiwilila kuwenda)

Ni petaka pana ilosyo (yakulosya ukombosi wa Allah) kwa wakusimichisya (chikulupi chao)

Ni mu (kagumbidwe ka) jenumanja wakwe, ana ngankulola

Soni kwinani ni kwalili lisiki lyenu ni yankupedwa chilanga

Basi ngunnumbila M’mbuje jwa kwinani ni pasi, chisimu yalakweyi yakuona, mpela muyiwelele (yakuona) yanti jenumanja nkuwechetaga

Ana jinyyiche abali ja achalendo wa Ibrahima wakuchimbichikwa

Pa ndema jawajinjile kukwakwe ni watite: “Ntendele!” Jwalakwe jwatite: “Ntendele!” (Ni jwatite soni chamuntima: “Jenumanja ni) wandu wangamanyika (kukwangu).”

Ni wagalauchile ku wapewasa wakwe (mwangalolechela), ni wayiche nako kan’gombe kakunakana (kejoche)

Ni jwakawandichisye kukwao. (Pajwagaweni magasa gao kuti ngagakujigala kulya) jwatite: “Ana uli ngankulya?”

Basi ni wampatile woga wakwajogopa wanganyao. Wanyao watite: “Nkajogopa.” Ni wampele abali jakusengwasya janti chakole mwanache jwakumanyilila nnope

Ni wayiche wankwakwe (wali Sara) ni masegwe, aku ali nkuliputa kungope (ligongo lya usimongo), ni watite: “Jwanchekulupe, jwampalale (timbeleche chinauli)!”

Wanganyao watite: “Iyyoyopeyo (tim’beleche mwam’belelemo), Ambuje wenu (Allah) niyatite, chisimu Walakweo ni Walunda lwakusokoka, Wakumanyilila nnope.”

(Kaneka Ibrahima) jwatite: “Abali jao (jine) jaichile nijapi jaomanja akutumidwa?”

Wanganyao watite: “Chisimu uwwe tutumisyidwe ku wandu wakulewa.”

“Kuti tukaatumichisye sakalawe syelongo (lya ku Moto).”

“Syewichidwe chimanyilo kwa Ambuje wenu (Allah) kwawichila akusumba mpika (pasambi).”

Basi ni twaakopwesye wawaliji mwalakwemo mwa akukulupilila

Nambo nganitujisimana mwalakwemo ikaweje nyumba jimpepe ja Asilamu (Lutwi ni wanache wakwe wawili wachikongwe)

Ni twalesile mwalakwemo chilosyo (cha ipotesi jajili mbwani jajiwe) kwa wandu waakuijogopa ilagasyo yakupoteka nnope

Nombe mu (abali ja) Musa (muwele mwana chilosyo cha ipotesi), pandema jatwantumisye kwa Firiauna ni umboni wakuonechela

Basi (Firiauna) jwanyosyisye ligongo lya machili gakwe, ni jwatite: “(Aju ni) nsawi kapena jwamasoka.”

Ni twankwembekenye jwalakwe ni asilikali wakwe ni twaaponyisye m’mbwani, jwalakwe juli jwagambidwa

Nombe mu (abali ja) achina Adi (muwele mwana chilosyo cha ipotesi), pandema jatwatumichisye mbungo (jachimbunga) jakonanga

Nganijichilekaga chindu chilichose chajichipujiile ikaweje kuchitenda mpela chepukuswe

Nombe mu (abali ja) achina Samuda (muwele mwana chilosyo cha ipotesi), pandema jawasalilidwe kuti: “Sengwagani kwakandawi kannono.”

Ni walikwesisye kuleka lilamusi lya M’mbuje gwao (Allah), ni wakwembekenye n’gumilo (wa ipotesi) aku ali nkulola

Ni nganakombola kwima (kuti atile), soni nganawa wanti nikulikulupusya (achimisyene)

Ni (twajonasile) wandu wa Nuhu kalakala (nkanawe wasalidweo), chisimu wanganyao waliji wandu wakunyosya

Sano liwunde twalitawile mwamachili, soni chisimu Uwwe tuwele Wakulisapangula (liwundelyo)

Ni litaka twalitandiche, basi ni Wambone nnope mwa akwasasya (twaliji Uwwe)

Ni mu chindu chilichose tugumbile iwili-iwili (mpela chachilume ni chachikongwe), kuti jenumanja nkumbuchile (ukoto wa Allah)

Basi (mwasalilani yanti): “Tililani kwa Allah, chisimu une (Muhammadi ﷺ) kukwenu ni nkutetela jwakuonechela jwakuuma Kukwakwe.”

“Soni ngasim’biika pamo ni Allah nnungu jwine, chisimu une (Muhammadi ﷺ) kukwenu ni nkutetela jwakuonechela jwakuuma Kukwakwe.”

Iyyoyopeyo (yaakuti pakuntenda mmwe Muhammadi ﷺ kuti nsawi kapena jwamasoka), nganijwaichilileje awala wapaujo pao ntenga jwalijose ikaweje wanganyao watiji: “(Aju ni) nsawi kapena jwamasoka.”

Ana ate kulechelana gele (malowega)? (Ngwamba), nambo wanganyao ni wandu wakusumba mpika (pa ukafili)

Basi mwatundumalilani wanganyao (mmwe Muhammadi ﷺ), soni mmwe ngam’ba wagambidwa (nkwatundumalilamo)

Soni kumbusyani, basi chisimu kumbusya tikwakamuchisye wakulupilila

Soni nganingamba gumba majini ni wandu ikaweje kuti angalagatileje Une (Jikape)

Ngangusaka kuumila kukwao lisiki, soni ngangusaka kuti andiisyeeje (kapena kuliisya iwumbe Yangu)

Chisimu Allah ni Nkupeleka lisiki nnope, Nsyene machili gakulimbangana

Sano chisimu akwete kupata awala walitendele lupuso chipande cha ilagasyo chanti mpela chipande chailagasyo cha achimijao (wakala), basi ngasanjanguya (kuti napeje ilagasyoyo ndawi jakwe nkanijikwane)

Basi ipotesi tiyichiwa kwa awala waakufuulu pa lisiku lyao alila lyaakupedwa chilanga (cha kwika kwakwe)