Yau - Chapter 52 - At-Tur

Ngulilumbila litumbi (lyawam’bechetakasyisye Allah Musa lyalili ku Sinayi)

Ni chitabu chachilembeedwe (Qur’an)

Mu ikalakala yepende yewunukulidwe

Ni Al-Bait-ul-Ma‘mur (Nyumba jajili kumawunde mwakulondana ni Likaaba, jaakujijaulilaga Achimalaika mwakuwilinganya)

Ni nsakasa wenyakulidwe (liwunde)

Ni mbwani syegumbasye (mesi)

Chisimu ilagasyo ya Ambuje wenu (Allah) iwele yakupatikana kwene

Pangali jwakuisiwilila

Lisiku lyalichitenganyika liwunde ni ntenganyiko wamachili

Ni gachijenda matumbi ni kajende kaluwilo

Basi ipotesi lyele lisikulyo taachiipata wakanila

Awala waakuwa nkung’anda mu yangali mate

Lisiku lyatachitutilidwa ku moto wa Jahannama katutilidwe kamachili

(Ni tachisalilidwa yanti): “Awu ni Moto awula wamwaliji nkuwukaanila.”

“Ana weleu usawi, kapena jenumanja ngankulola?”

“Ujinjilani (ni kupasya kupoteka kwakwe), pililani kapena nkapilila yalumope kukwenu, chisimu nkulipidwa yamwaliji nkupanganya.”

Chisimu wawoga (wakun’jogopa Allah) tachiwa m’Matimbe ga ku Mbepo, ni chindimba

Achiyisengwelaga yawapele M’mbuje gwao (Allah), aku M’mbuje gwao ali wagosile ku ilagasyo ya Moto Waukali

(Tachasalila kuti): “Lyagani soni mwagani mwakusengwa ligongo lya ayila (yambone) yamwaliji nkutenda.”

Ali ajegeme mu itengu yauchimbichimbi yejalidwe chenene, ni tuchalombekasya ni achimmasyeto wameso gakulanguka soni gekulungwa mwakusalalila

Sano awala waakulupilile ni kwaakuuya wanache wao pa chikulupi, chitukasimanganye wanganyao ni wanache wao, soni ngatuja kwapunguchisya (malipilo ga) masengo gao chilichose. Mundu jwalijose tachiwa uwombosi wakuliombolela ku (yakusakala) yawapanganyisye (pakutawidwa ku Moto)

Ni tukaajonjechesyeje (wakulupililao ndawi ni katema) isogosi kwisa soni nyama, mu yataakaisacheje

Takapochelanganeje kwalakweko ipanda (yankologo) wangatendekasya kuwecheta yangali mate namuno yasambi

Ni taakaasyuunguleje wanganyao achiboyi wao (wakwatumichila), gamba kuwa wanganyao (kamelemende kakwe) nti chisawu ngalekale syesunjidwe

Ni tachigalauchilana wane kwa wane achiwusyanaga (yatite kawupate ntendele wa ku Mbepo)

Tachiti: “Chisimu uwwe twaliji kala ku mawasa getu tuli nkogopa (ipotesi ya Allah).”

“Chisimu uwwe twaliji kala (ku duniya) tuli nkum’bomba (Jwele Jikape), chisimu Jwalakwe ni Jwambone nnope, Jwachanasa channope.”

Basi kumbusyani (mmwe Muhammadi ﷺ), soni mmwe nganim’ba abimbi kapena wamasoka pa chindimba cha Ambuje wenu (champele, wauli utume)

Kapena wanganyao akutiji: “(Jwalakweju ni) nkwiimba ilaanga, tugamba kun’jembechela kuti chimpate chiwa (yachatite pakwapata akwiimba wane waakala)?”

Jilani: “Jembechelaani, chisimu une none ndinamwe mwa akwembecheya.”

Kapena lunda lwao ni lwalukwalamulila yalakweyi, kapena agambile kuwa wandu wakusumba mpika

Kapena akutiji: “Jwalakwe (Muhammadi ﷺ) ni jwaajituunjile (Qur’aniji)?” (Ngwamba), nambo kuti wanganyao ngaakukulupilila

Basi ayiche najo abali janti mpela jalakweji (Qur’an), nawaga jamanjao akuwecheta yakuona

Kapena wagumbidwe mwangali chilichose (chakwagumba), kapena wanganyao ni wawaligumbile (achimisyene)

Kapena wanganyao ni wawagumbile mawunde ni mataka? (Ngwamba), nambo kuti ngakusimichisya (ya ilagasyo ya Allah)

Kapena akwete wanganyao imatiilo ya Ambuje wenu (Allah), kapena wanganyao ni waakwete machili gakutendela yaakusaka

Kapena akwete makwelelo (gakwelela kwinani) ni akupikanilaga pa galakwego (yakuwecheta Achimalaika kwinaniko)? Basi ayiche naotu akupikanila waowo umboni wakuonechela

Kapena Jwalakwe (Allah) ni jukwete wanache wachikongwe, sano jenumanja ni nkwete wanache wachilume

Kapena mmwe (Muhammadi ﷺ) nkwajuga wanganyao malipilo, sano jamanjao ni akusitopelwa nasyo ngongole

Kapena akwete wanganyao (ilimu) yakusisika, basi wanganyao ni akulemba (yalakweyo)

Kapena akusaka kutenda maliindi? Basi awala waakufuulu ni wali wakwaujila malindi gao

Kapena akwete wanganyao nnungu jwine jwangawaga Allah? Aswejele Allah ku yaakum'bwanganya nayo

Namuno angachione chipande cha liwunde chinankugwa (kukwao kwakuli kwika kwa ipotesi), angatite: “(Aga ni) mawunde gawula gagakamatene (ngawa kwika kwa ipotesi).”

Basi mwalekaani, mpaka tasimangane nalyo lisiku lyao alila lyatachikomoka kwa kuwa mu lyalakwelyo

Lisiku lyaangaakamuchisya malindi gao chilichose, soni wanganyao ngasakulupusyidwa

Soni chisimu akwete kupata awala waatesile lupuso (ligongo lya ukafili wao) ilagasyo (ine pa duniya pano) nkaniyiwe yalakweyo (ya ku Akhera), nambo wajinji mwa wanganyao ngakumanyilila

Basi chijembecheyaani mwakupilila (mmwe Muhammadi ﷺ) chilamusi cha Ambuje wenu (Allah), basi chisimu mmwe nkuloleledwa ni meso Getu, ni lluswejesyeje lumbili lwa Ambuje wenu (Allah) ndema jankwiimuka (kuumila llugono kapena pamalo palipose)

Nombe soni chilo lluswejesyeje (lumbili lwa Ambuje wenu), ni pakutiwila ndondwa (kumasikusiku)