Yau - Chapter 54 - Al-Qamar

Ndawi (jakwichila Kiyama) jiwandichile, ni ugaanjiiche mwesi

Soni naga ali achiweni chisimosimo akasanyosyaga, ni akutiji: “(Awu ni) usawi wakwendelechela.”

Ni waakaaniile, ni kuya isako yao, sano chindu chilichose (chambone kapena chakusakala chawapanganyisye mundu) chiwele chakutamilichika (malipilo gakwe lisiku lya Kiyama)

Soni chisimu chene pamasile pasyaayiiche wanganyao ngani (mu aji Qur’an) syasikwete nkati mwakwe ikaanyo yaukali (yakwakanya kutenda yakusakala)

(Aji Qur’an jiwele jegumbale) lunda lwakusokoka nnope, nambo itetelo ya akutetela nganiyiwa ikamuchisye (kwa wandu waajitundumalile)

Basi mwalekani. (Mwakumbusyani) lisiku lyatachiwilanga nkuwilanga (Israfil) ku chindu chakunyalaya kusyene (chiwalanjilo cha pa Kiyama)

Gali gatetewele meso gao, achikopokanganaga m’malembe, nti chisawu wanganyao sombe syakubalalikangana

Achikangamalaga (aku ali anyakwile ngosi, mwanja) wa kwankuwilanga. Achimakafili tachiti: “Ali ni lisiku lyakusausya kusyene.”

Waakaaniile paujo pao (Makuraishi nkanigaiche) wandu wa Nuhu, basi wansisisye kapolo Jwetu (Nuhu), ni watite: “Jwalakweju jwamasoka.” Ni jwakalipilidwe (ni kogoyesyedwa)

Basi jwaawendile Ambujegwe (Allah juchitiji): “Chisimu une ngomboleedwe, basi njokolaani.”

Basi ni twawugwile milango ja kwinani ni mesi gakusuka kwanneso

Ni twaliganjile litaka ni achitutumule, ni gasimene mesi (gakuuma kwinani ni gakopoka pasi) pa chindu chachaliji chepanjepanje (chigumula chakwajonanjila wandu wa Nuhu)

Ni twan’jigele (Nuhujo) pa chombo chamatabwa chachakomedwe ni misomali (jaitela)

Chaliji nkwenda (mwakuloleledwa) ni meso Getu, kuwa malipilo kwa ajula juwaliji ali akaniliidwe (Nuhu)

Soni chisimu twachilesile (chombocho) kuwa chilosyo, ana pana waachikumbuchila (ni kuliwunda nacho)

Ana ilagasyo Yangu yaliji uli kwisa soni itetelo Yangu

Soni chisimu chene tujijepepesye Qur’an kuti jiwe chikumbusyo, ana pana waajikumbuchila (nikuliwunda najo)

Achina Adi (nombe) waakaaniile. Ana ilagasyo Yangu yaliji uli kwisa soni itetelo Yangu

Chisimu Uwwe twatumichisye mbungo jakusisima nnope mu lisiku lyachitapani chakwendelechela

Jaliji nkwachuwa wandu (kuja nao mwinani, kaneka nikwagwichisya pasi mwakwapitikusya) nti chisawu wanganyao mapata ga itela ya tende yechuwidwe

Ana ilagasyo Yangu yaliji uli kwisa soni itetelo Yangu

Soni chisimu chene tujijepepesye Qur’an kuti jiwe chikumbusyo, ana pana waajikumbuchila (nikuliwunda najo)

Achina Samuda waakaaniile akutetela

Ni watite: “Ana mundu jwakuumila mwetuwe jumpepe ni tunkuyeje? Chisimu uwwe pa jele ndemajo chituwe mu kupotela ni masoka.”

“Ana chikumbusyo chipelecheedwe kukwakwe (Swaleh jikape) sikati jetu? (Ngwamba), nambo jwalakwe ni jwaunami kusyene, (soni) jwakulikulungusya.”

Tachimanyilila malawi kuti ana nduni jwali jwaunami kusyene, (soni) jwakulikulungusya

(Twansalile Swaleh kuti): “Chisimu Uwwe tukutumisya ngamiya jekongwe kuwa mayeso kukwao, basi mwajembechelani ni mpilile.”

“Ni mwatagulile yanti mesi gagawiidwe sikati jao (ni ngamiya, lisiku amweje wandu, lisiku line jimweje ngamiya), kumwa kulikose akuwichilileje (jwakukum’bandika).”

Nambo wam’bilasile n’jao (Qudar bin Salif juwaliji jwakusakalilwa nnope) ni jwajigele (upanga) ni jwajiuleje (ngamiya jila)

Ana ilagasyo Yangu yaliji uli kwisa soni itetelo Yangu

Chisimu Uwwe twatumichisye wanganyao n’gumilo umpepe, basi niwaliji nti chisawu mbelenje sya nkutawa lichinga (ni gumuka nikupondedwapondedwa)

Soni chisimu chene tujijepepesye Qur’an kuti jiwe chikumbusyo, ana pana waajikumbuchila (nikuliwunda najo)

Wandu wa Lutwi waakaaniile akutetela

Chisimu Uwwe twatumichisye chimbunga cha sakalawe (syasyajonasile wosope wene), ikaweje waliwasa lya Lutwi, twajokwele kumasikusiku

Kuwa ukoto wakuuma Kukwetu, iyyoyopeyo niyatukutiji pakun’dipila jwaatogolele

Soni chisimu jwalakwe (Lutwi) jwaatetele wanganyao ilagasyo Yetu, nambo waikaichile itetelo

Soni chisimu wannyenjelele (Lutwi kuti wape) achalendo wakwe (atende nao matanyula), basi ni twatatalesye meso gao, (ni twasalile kuti): “Pasyani ilagasyo Yangu ni itetelo Yangu.”

Ni yaalaawiile wanganyao kundawi ilagasyo yakutamilichika

(Twasalile kuti): “Pasyani ilagasyo Yangu ni itetelo Yangu.”

Soni chisimu chene tujijepepesye Qur’an kuti jiwe chikumbusyo, ana pana waajikumbuchila (nikuliwunda najo)

Soni chisimu chene wandu wa Firiauna yaichilile itetelo

Waakaaniile ilosyo Yetu yosopeyene (nsano nancheche), basi nitwaakwembekeenye kakwembekanye ka Jwamachili gakupunda, Jwakombola (chilichose)

Ana makafili genu (jenumanja Makuraishi) ni gagali gambone kwapunda wanganyao (wawajonanjidwe kala, mwanti jenumanja ni ngan’jonanjidwa), kapena nkwete chilanga chantunjelele (chachilembedwe) mu itabu (chanti ngasin’jonanjidwa)

Kapena akutiji: “Uwwe tuli likuga lyejinji mwanti mpaka tukombole kulichenjela (pangali jwampaka atukombole)

Lichikomboledwa likuga (lyaolyo), ni tachilosya migongo (kutila. Yatendekwe yalakweyi pangondo ja Badr)

Nambo Kiyama ni chilanga chao (chakwapela ilagasyo), soni Kiyama ni jamakungu gamakulungwa soni jakuwawa nnope

Chisimu akulewa ali nkupotela ni m’masoka

(Mwakumbusyani) lisiku lyatachiwutidwaga ku Moto chamakuku, (achisalilidwaga kuti): “Pasyani kakwaye ka Moto.”

Chisimu Uwwe chindu chilichose tuchigumbile kwa mpango (wakwe wawapanjidwe kalape)

Ni nganiuwa ulamusi Wetu ikaweje mwanakamo mpela kupila kwa liso

Soni chisimu chene twajonasile wakulandana namwe (m’makafili gakalakala), ana pana jwampaka akumbuchile (ni kuliwunda)

Soni chilichose chawapanginyisye chili mu itabu (yakulembedwamo masengo gao)

Soni chilichose chamwana ni chekulungwa chileembeedwe

Chisimu wawoga (wakun’jogopa Allah) tachiwa m’Matimbe ni sulo (sya ku Mbepo)

Pakutama pambone kusyesyene, kwa Nchimwene (Allah) Jwakombola (chilichose)