Yau - Chapter 59 - Al-Hashr

Iwele ili nkunswejesya Allah yosope yaili kumawunde ni yaili petaka, soni Jwalakwe ni Jwamachili gakupunda, Jwalunda lwakusokoka

Jwalakwe ni Ajula jwana kwakoposyaga wandu wawakanile mwa anchinsyene chitabu (Ayuda walukosyo lwa Nadhir) kutyochela m’majumba mwao mu kusonganganyisidwa kwandanda (kwausami). Nganin'ganichisyaga kuti mpaka akopoche, nombe nao waganichisyaga yanti chisimu wanganyao gasiwilile makome gao kwa Allah, basi Allah ni jwaapele (ipotesi) kuumila upande wanganaganichisyaga, ni jwaponyisye woga m’mitima mwao, (mwanti) waliji nkugumula majumba gao ni makono gao kwisa soni makono ga wakulupilila. Basi chetelelani jenumanja wankwete meso (gakulolechesya mwaumanyilisi)

Soni ingawaaga kuti Allah jwaalembele (pandandape) yakusama, jukaapele ilagasyo pa duniya, nambo akwete kupata wanganyao ku Akhera ilagasyo ya Moto

Yalakweyo paligongo lyanti wanganyao watindene najo Allah ni Ntenga Jwakwe ﷺ, sano jwatatindane najo Allah, basi chisimu Allah ni Jwaukali pakupeleka ipotesi

Muitela ya tende ya mwaikatile (jenumanja Asilamu) kapena ya mwailesile ili chiimile m’mapata mwakwe, basi (yatendekwe) mu lisosa lya Allah ni kuti wajalusye wakunyosya

Soni ipanje yakupalagula yaapeleche Allah kwa Ntenga Jwakwe ﷺ kuumila kwa wanganyao, basi pa (kuipata) yalakweyo nganinnajila kuutusya hachi kapena ngamiya, nambo kuti Allah akwapaga machili Achimitenga Wakwe gakwakombolela waakwasaka, sano Allah pa chindu chilichose awele Jwakombola

Ipanje yakupalagula yaapeleche Allah kwa Ntenga Jwakwe ﷺ kuumila kwa achinsyene misi, basi iwele ya Allah ni Ntenga ﷺ ni waulongo (wa Ntenga ﷺ), kwisa soni wawina, masikini ni jwapaulendo; kuti ikawa yagamba kusyungula chilikati cha wakusichila mwa jenumanja. Sano champele Ntenga ﷺ basi chipochelani, nambo chankanyisye basi chilekani. Ni mun'jogopani Allah, chisimu Allah ni Jwaukali pakupeleka ipotesi

(Ipelechedweje) kuwakulaga waasamile, awala wakoposyedwe nsimangwao kwisa soni ipanje yao achisachililaga umbone wa kuumila kwa Allah kwisa soni chinonyelo, ni akuwa ali nkunkamuchisya Allah (paajikamuchisya Dini Jakwe), ni (akuwa soni nkunkamuchisya) Ntenga Jwakwe ﷺ, wanganyao niwali wakuonaonape

Sano awala wawatemi mu nsinda (wa Madina) ni kulupilila nkanaiche wanganyao akuwa ali nkwanonyela wandu waasaamiile kukwao, soni ngaakuchisimana m’mitima mwao chipaka chilichose mu ichindu yaapedwile (akusamao), soni akulongosyaga (isako ya achimijao pa chindu chilichose) kupunda isako yao, namuno angaliji ali nkuchisachilila (chinducho) kwanneso. Sano waakuwambasyidwa ku ubaili wa ntima wao basi wanganyao ni wali wakupunda

Sano awala waiche panyuma pao akasatiji: “Ambuje wetu! Tukululuchilani uwwe ni achimijetu awala wawatulongolele pa chikulupi, ni ngasim'biika m’mitima mwetu uchimwa wakwatendela awala waakulupilile, Ambuje wetu! Chisimu Mmwejo ni Mpole kusyene, Jwachanasa cha nnope.”

Ana nganimwaona awala akutenda unakunaku waakutiji pakwasalila achimijao awala wakanile mwa achinsyene chitabu (Ayuda): “Chisimu naga n'di nkoposyedwe jenumanja (m’Madina muno) tuchikopoka namwe kwene, soni ngasitun'jiitika jwalijose mpaka kalakala pa (yakunsausya) jenumanja, soni naga n'di mputidwe ngondo (ni Asilamu) tuchinkamuchisya kwene.” Nambo Allah akutendela umboni kuti chisimu wanganyao waunami

Mwanti naga ali akoposyedwe (Ayudao) nganawa akopweche nao imo (achinakunakuo), soni naga ali aputidwe ngondo nganawa wakamuchisye, soni mwanti ali atite wakamuchisye mpaka alosye kwene migongo (kutila), kaneka ni ngasakulupusyidwa

Chisimu wanganyammwe (Asilamu) niwan'di wakogopedwa nnope m’mitima mwao kupunda Allah, yalakweyo niligongo lyanti wanganyao niwandu wangali chachimanyi

Nganawa amputile ngondo (Ayudao atamose ali) wosope, ni ikaweje m’misi jegosedwe ni makome, kapena kusyeto kwa mapupa. Ngondo jao (ja utinda) chilikati chao jiwele jekulungwa nnope, mpaka mwaganichisye kuti ali imo kutendaga mitima jao jelekangane, yalakweyo niligongo lyanti wanganyao niwandu wangali lunda

(Kawe ka Ayuda walukosyo lwa Nadhir) kali chisawu awala (Ayuda walukosyo lwa Kainukai) wawalongolele wanganyao (kupata ilagasyo) pangakawapa, agapasisye makungu ga itendo yao, ni akwete soni kupata wanganyao ilagasyo yakupoteka nnope (ku Akhera)

Chilandanyo cha achinakunaku pakwanyenga Ayuda walukosyo lwa Nadhir ya kumpitikuchila Muhammadi (ﷺ chili chisawu shetani ndema jawansalile mundu kuti: “Munkanani (Allah).” Basi ndema ja wakanile, (shetani) jwatite: “Chisimu une ndalikangene namwe, unetu ngun'jogopa Allah M’mbuje jwa iwumbe yosope.”

Basi ni jaliji mbesi ja wanawawiliwa kuja kwinjila ku Moto ni kuwa wandamo mwalakwemo, sano galakwego ni malipilo ga wakulitenda lupuso

E jenumanja wankulupilile! Mun'jogopani Allah, soni mundu jwalijose ayilole yaalongwesye ya malawi (ku Akhera), ni mun'jogopani Allah, chisimu Allah ni Nkusimanya chenene abali syosope sya yankutenda

Ni ngasim'ba mpela awala wanya wan'diwalile Allah, nombe Najo ni waliweesye mitima jao. Wanganyao niwali wakunyosya

Ngawa nkulandana wandu wa ku Moto ni wandu wa ku Mbepo, wandu wa ku Mbepo ni wali wakupunda

Ingawe kuti twajitulwisye aji Qur’aniji pachanya petumbi, chisimu nkaliweni lili lyakutetewala ni ganjika ligongo lya kun'jogopa Allah, yalakweyo ni ilandanyo ya tukupeleka kwa wandu kuti achetelele

Jwalakwe ni Allah Ajula jwaali pangali nnungu jwine (jwakuwajilwa kun'galagatila) ikaweje Jwelepejo, Jwakumanyilila yakusisika ni yakuonechela, Jwalakwe ni Jwaukoto wejinji, Jwachanasa channope

Jwalakwe ni Allah Ajula jwali pangali nnungu jwine (jwakuwajilwa kun'galagatila) ikaweje Jwelepejo, Nchimwene, Jwakuswejela, Nsyene ntendele, Nkupeleka ntunjelele, Nkung'unulila ni goosa chilichose (mu itendo ya achikapolo Wakwe), Jwamachili gakupunda, Nkutetewasya iwumbe Yakwe, Jwakulikusya kusyene. Aswejele Allah ku yaakum'bwanganya nayo

Jwalakwe ni Allah, Nkugumba, Nkusipusya chilichose pandanda, Nkupaanga kaoneche ka chindu. Jukwete mena gambone nnope. Ikunswejesyaga Jwalakwe yosope yaili kumawunde ni petaka, soni Jwalakwe ni Jwamachili gakupunda, Jwalunda lwakusokoka