Yau - Chapter 65 - At-Talaq

E mmwe Ntume ﷺ! Pati nchalekaga achakongwe (ulombela), basi mwalekani pa eda jao (jajili ndema jakwembecheya panyuma pakulechedwa ulombela, jajikutandila wakongwe ali aswejele ku wesi nikwalekaga nkanimwakwaye), soni walanjilani ya (masiku ga) eda. Ni mun'jogopeje Allah M'mbuje gwenu. Nkasimwakoposya m’majumba mwao, nombenao soni akasakopoka (achimisyenepe kwikanila ndema ja eda jili jimasile), ikaweje naga ali atesile chakusakala chakuonechela (mpela chigwagwa, apo chinkomboleche kwakoposya). Sano jele ni mipingu ja Allah, mwanti jwataguluche mipingu ja Allah nikuti pamasile paalitendele lupuso nsyene. Ngankumanyilila (chaawiichiile Allah jele mipinguji), mwine Allah kuwa nkuchipatikanisya chindu chine panyuma payele (yakulekanayo chakwilanya chilikati chenu, nikuujilana eda nkanijimale)

Basi pati jiwandichile ndema jao (jakumalila eda) mwaujilani mwaumbone, kapena lekanganani nao mwaumbone, soni soselani mboni siwili syakulungamika syakutyochela mwa jenumanja (Asilamu).Ni mpelecheje umboni chenene ligongo lya Allah. Yalakweyo akuundidwa nayo mundu jwaawele ali nkunkulupilila Allah ni Lisiku Lyambesi. Sano mundu jwatan'jogope Allah tam'bichile litala lyakopochela (mu ipato)

Soni tampe lisiki m’matala gangaakuganichisya, soni jwatajegamile kwa Allah, basi Jwalakwe tankwanile (kuwa nkunkamuchisya jwakwe), chisimu Allah ni Jwakwanilisya chisako Chakwe, Allah pamasile paawisile chipiimo cha chindu chilichose

Lyele ni lilamusi lya Allah lyaalitulwisye kukwenu, sano jwatan'jogope Allah tansiimaachisye yakusakala yakwe ni kunkuchisya malipilo gakwe

Mwatamikani (achimmasyeto wamwalesileo) mwankutama pemo, yankuti pakulipatila (namuno kuti mwalesile ulombela naga eda jao nkanijimale), soni nkasimwalagasya wanganyao kuti mwaawane (niaganisye yakutila achimisyene). Soni naawaga wana yiilu basi mwapani (yosope yakusosekwa pa umi) mpaka aweleche yiilu yaoyo. Sano naga ali an'jonjecheesye (wanache wenu), basi mwapani malipilo gao, soni tamani ntemela wakupikanganana (ya malipilogo) chilikati chenu mwaumbone. Nambo naga nkunonopesyana basi (mwanachejo) tiwajonjechesye (babao wakongwe) wane

Jwakupata atole mwakulandana ni kupata kwakwe, nambo jwaanaandiyisyiidwe lisiki lyakwe, basi atole (kachinandipamuno) mu yampele Allah, Allah jwangankanganika mundu (kutola) ikaweje yampeele, Allah taawiiche kwepepala panyuma pakunonopa

Ana soni walingwa-walingwa mwa achimisyene misi wawanyosyisye lilamusi lya Ambuje wao kwisa soni Achimitenga Wakwe! Basi ni twawalasile chiwalanjilo chaukali nnope, ni twapele ilagasyo yakunyalaya kusyene

Basi ni wapasisye makungu ga itendo yao, soni kupelelwa ni jaliji mbesi ja itendo yao

Allah waalinganyichisye wanganyao ilagasyo yaukali nnope, basi mun'jogopani Allah, E jenumanja wankwete lunda! Awala wankulupilile! Pamasile paatulwisye Allah kukwenu Chikumbusyo

Ntenga ﷺ jwaakunsoomela ma Aya ga Allah gakusalichisya, kuti wakoposye awala waakulupilile ni kutendaga yambone kutyochela m’chipi ni kwajinjisya mwilanguka. Sano jwatankulupilile Allah ni kutendaga yambone takan'jinjisye ku Matimbe ga ku Mbepo gasikujilima cha pasi pakwe sulo, chakawe wandamo mwalakwemo kwa yaka ni yaka, Allah pamasile pankolochesye jwalakwejo lisiki lyambone nnope

Allah ni Ajula jwaagumbile mawunde nsano nagawili, nombe nalyo litaka yalumope (mataka nsano nagawili). Malamusi gakuwa gali nkutuluka chilikati chakwe (cha mawunde ni mataka) kuti mmanyilile wanganyammwe yanti Allah pa chindu chilichose awele Jwakombola kusyene, ni yanti Allah amasile paachisyungwile chindu chilichose ni umanyilisi (waachimanya chenene)