Yau - Chapter 68 - Al-Qalam

Nun. Nguchilumbila chakulembela (chaakuleembelaga Achimalaika ni wane wosope) kwisa soni yaakulembaga

Mmwe (Muhammadi ﷺ) nganim'ba wamasoka pachindimba cha Ambuje wenu (champele, wauli utume)

Soni chisimu nkwete kupata mmwejo malipilo gangamala (ligongo lya kulagasika kwenu pakwenesya utenga)

Soni chisimu mmwe n'di pachanya pandamo jambone nnope

Basi, sampano tinyyione, nombe nao soni taione

Yanti ana wani mwa jenumanja wagaapatile masoka? (Mmwejo kapena wanganyao)

Chisimu Ambuje wenu ni waakummanyilila chenene mundu jwaapoteele kuleka litala Lyakwe, soni Walakweo ni waakwamanyilila chenene wali wakongoka

Basi ngasimwapikanila wakanila

Akasasachililaga n'di mwaakundilile (pa yakusakala), basi nombe nao ni ankundilile (pa yambone)

Soni ngasimumpikanila jwalijose jwakulumbila-lumbila soni jwakwaluka

Nkusogoda, jwakwendajenda kupita nchitenda unakunaku

Jwakusiwilila yambone, jwakusumba mpika, jwasambi syejinji

Jwakumula ntima soni panyuma pa yele jwakulipakasya utundu wa wane

(Akulikwesya) ligongo lyakuwa jwana chipanje ni wanache

Pati gachisoomedwaga kukwakwe ma Aya Getu jukasatiji: “Asi ni adisiadisi sya wandu wandanda.”

Chiitum'biika chimanyilo palupula

Chisimu Uwwe twalinjile (achimakafili wachikuraishio pakwapa chindimba ni kuchikana) yatwatite pakwalinga achinsyene n'gunda, ndema jawalumbile kuti takaugungule (isogosi yakwe) kumasikusiku (kuti wakulaga akaaona atakwika muwawendile)

Ni nganawecheta malowe ganti “Nasakaga Allah.”

Nilyaawusyungwile (n'gundao) likungu lyakuumila kwa Ambuje wenu kutendaga wanganyao ali nnugono

Basi niwachelelwe uli nti chisawu wegungule

Basi ni wawilangene kumasikusiku

“Lawililani kun'gunda wenu naga nkusaka gungula.”

Basi ni wawigwile aku achisongonelanaga

“Akasan'jinjilila ata panandi kwalakweko lelo masikini jwalijose.”

Ni walawilile mwachisindo achiganichisyaga kuti apakombwele (kwasiwilila masikinio)

Basi ndema jawauweni (n'gundao) watite: “Chisimu uwe tusokonechele.”

(Niwatite soni: “Ngwamba, niwwuwu) nambo kuti uwwe tujiimiidwe.”

Jwakulungamika chilikati chao jwatite: “Ana nganinansalila yanti: ‘Ana uli ngankunswejesya (Allah pakuwecheta malowe ganti: Naga Allah akusaka chitukagungule)?”

Basi ni walolegene aku achidandaulanaga (pakupulisyana yaagajima masikini)

Wanganyao watite: “Kutapana kwetuwe! Chisimu uwwe twaliji wakusumba mpika (paganisya yagajima masikini).”

“Mwine Ambuje wetu kuwa nkututindanyichisya ni (n'gunda) wambone nnope kupunda walakweu, chisimu uwwe kwa Ambuje wetu tukusachilila (chikululuko Chakwe).”

Mwele ni mwaikasawelaga ilagasyo (ya pa duniya), nambo ilagasyo ya ku Akhera ni yaikulungwa nnope ingawe wamanyililaga

Chisimu wakun'jogopa Allah akwete kupata kwa Ambuje wao Matimbe Gachindimba (Mbepo)

Ana twatende Asilamu nti chisawu akuleewa (pakwalipila mwakulandana)

Chipali chichi kukwenu! Ana nkwiilanya chinauli

Kapena nkwete chitabu chankusoomaga nkati mwakwe

Yanti chisimu nkwete kupata mu lyele (lisiku lya Kiyamalyo) yankuisaka

Kapena nkwete wanganyammwe ilanga Kukwetu yakuja kwika mpaka lisiku lya Kiyama, yakuti chisimu wanganyammwe chinchipata yankulijiilanyichisya

Mwawusyani kuti wani mwa wanganyao wali nnongola jwatachajimila pa yalakweyi

Kapena akwete wanganyao wakamusyangana nao? Basi ayiche naotu wakamusyangana naowo naga akuwecheta yakuona

(Kumbuchilani) lisiku lya luchiunukulidwa Lusonjo (lwa Allah) ni tachiwilanjidwa (achinakunaku) kuti atende sijida (kunsujudila Allah) nambo ngasakombola

Meso gao gachitetewala, ni kuchaunichila kunyosyeka. Nambo posepo waliji nkuwilanjidwa kuti asujudu (kuswali) ali wambonembonepe (ku duniya)

Basi munekani ni akukanila aji abaliji, chitwajigale mbolembole (wa ku ipotesi) kupitila m’matala gangaakugamanyilila

Soni ngamba kwalechelesya wanganyao, chisimu mpango Wangu uwele wakulimbangana

Kapena nkwajuga malipilo (pakulungusya utenga), mwanti wanganyao ni akusitopelwa nasyo ngongole

Kapena akwete (chitabu) chakusisika, mwanti wanganyao niakulemba

Basi pilililani ku ulamusi wa Ambuje wenu (wakwalechelesya achimakafili), mwanti ngasim'ba mpela nsyene somba (Yunusu pakwanguya kwakasilichila wandu wakwe), ndema jajwawilasile (Ambujegwe) juli jwakutawika ni madandausi

Ukawa kunsimana ukoto wakuumila kwa M’mbujegwe jukaponyedwe pantetete juli jwanchesela

Basi Ambujegwe wansagwile ni kuntenda kuwa jumpepe mwa wandu wambone

Soni chisimu awala wakufuulu akusigalaga panandi kuti antelesyasye ni meso gao (ligongo lya kunchima) ndema jaakuchipikana chikumbusyo (Qur’an), ni akutiji: “Chisimu jwalakwe (Muhammadi ﷺ) jwamasoka.”

Ni nganijiwa jalakwe (Qur’aniji) ikaweje chikumbusyo ku iumbe yosope