Yau - Chapter 7 - Al-Araf

Alif-Lam-Mim-Swad

(Achi ni) chitabu (cha Qur’an) chachitulusyidwe kukwenu, basi muntima mwenu mukawa mwana kutawika pa (kuchilungusya) chalakwechi (pakogopa kunkanila), kuti mwatetele nacho (achimakafili), ni kuwa chikumbusyo kwa wakulupilila

Kuyani yaitulusyidwe kukwenu jenumanja kuumila kwa M'mbuje gwenu (Allah), ni ngasimwakuya akugosa (wanepe) wangawaga Jwalakwejo, yannonope ni yankukumbuchila

Ana soni jilingwa mwa misi jatwajijonasile, ni yajiyichilile ipotesi Yetu lwaachilo kapena wanganyao ali n'gusama (muusi)

Ni nganikuwa kulilasika kwao pa ndema jayaichilile ipotesi Yetu ikaweje watiji: “Chisimu uwwe twaliji wakulitenda lupuso.”

Basi chisimu chene tuchawusya awala wawatumisyilidwe (achimitenga), nombenao achimitenga tuchawusya

Basi chisimu chene tuchasimbila (ngani syao syosope) mwaumanyilisi, soni Uwwe nganituwa wakusowa (pa yawatendaga)

Soni chipiimo (chakupimila masengo ga wandu) lyele lisikulyo chichiwa chakuonaonape (changali chinyengo), sano wayikasitope ipiimo yao (yamasengo gambone), basi wanganyao ni wachakawe wakupunda

Nambo wayikapepuche ipiimo yao (yamasengo gambone), basi wanganyao ni awala walipelelwekasisye achimisyene ligongo lya lupuso lwawaliji nkugatenda ma Aya Getu

Soni pamasile patuntamilichikasisye wanganyammwe pachilambo, ni tum'bichilepo yakulamila, nambo kutogolela kwenu kwannonope

Soni chisimu twan'gumbile wanganyammwe (babawenu Adam), kaneka ni kunkolosya (pakumpa kaoneche kachimundu), kaneko ni twatite kwa Achimalaika: “Mwasujudilani Adam.” Basi wosope ni wasujudu kusigala Ibulisu, nganawa mwa akusujudu

(Allah) jwatite: “Chichi chinsiwilile kuti nkasujudu ndema janallamwile?” Jwalakwe jwatite: “Une ni jwambone nnope kumpunda jwalakweju, mwangumbile une kuumila m’moto, ni mun'gumbile jwalakweju kuumila mwilongo.”

(Allah) jwatite: “Basi tulukani mwele (mu Mbepomo), mwanti ngayikuwajilwa kukwenu kuti n'dikwesye mwalakwemo, basi kopokani chisimu mmwejo n'di muwakuchembuluka.”

Jwalakwe jwatite: “Mumbani lipesa (lyakuti ngawa) mpaka lisiku lyakwimusyidwa (wandu m’malembe).”

(Allah) jwatite: “Chisimu mmwejo n'di muwakupedwa lipesa.”

Jwalakwe jwatite: “Basi ligongo lyanti mundesile kuwa jwakupombotala, chinatamilile kwene wanganyao petala Lyenu lyagoloka (kuti nasokonesye).”

“Kaneka chinaayichilileje kwene cham'bujo mwao ni chamunyuma mwao, kwisa soni chakun'dyo kwao ni chakunchiji kwao, soni ngamwasimana wajinji mwajamanjao ali wakutogolela.”

(Allah) jwatite: “Kopokani mwalakwemo n'di wakunyosyedwa ni kuwinjidwa, chisimu wataiche mwakunkuya mmwe mwawanganyao, nikuti tingajigumbasye kwene Jahannama ni jenumanja wosope.”

Kaneko (Allah jwatite kwa Adam): “E mmwe Adam! Tamani mmwejo ni wankwenu mu Litimbe lya ku Mbepo, basi n’dyeje palipose pansachile, nambo ngasinchiwandichila achi chitelachi ntakuwa muwakulitenda lupuso.”

Basi shetani jwaasongonele (yakusakala Adam ni Hawa), kuti iwonechele kukwao yayasisiche kwa wanganyao mu umakonope wao, (shetani) ni jwatite: “M'mbuje gwenu nganankanya achi chitelachi ikaweje kuti ntakwika mwansyuchile malaika gawili, kapena kuwa muwandamo (wangawa).”

Ni jwalumbile pameso pao (juchitiji): “Chisimu une ndili (jumpepe) mwa akum'bunda misyungu.”

Basi ni jwaatulwisye (pa uchimbichimbi wao) mwakwanyenjelela. Basi pandema jawapasyisye (isogosi ya) chitelacho, waonechele kukwao umakonope wao, ni watandite kulinyambatika masamba ga mu Litimbemo, ni jwaawilasile M'mbuje gwao (juchitiji): “Ana nganinankanya wanawawilimmwe achi chitelachi, ni kunsalila kuti chisimu shetani kukwenu ni mmagongo jwakuonechela?”

Wanawawilio watite: “E Ambuje wetu! Tulitendele lupuso twachimisyewe, nambo naga ngankutukululuchila ni kututendela chanasa chisimu chituwe mu wakwasika.”

(Allah) jwatite: “Tulukani, chilikati chenu chili chana utinda, soni nkwete jenumanja kuduniya ndamo jenu ni kusengwa kwa ndema jannono.”

(Allah) jwatite: “Tinkaweje umi mwele (m’duniyamo), soni mwalakwemo tinkaweje, soni kuumila mwele (mwitakamo) tinchikoposyedwa.”

E jenumanja wanache wa Adam! Chisimu tuntuluchisye iwaalo yaikusisa umakonope wenu nikuwa soni ipeto (yakulipetela nayo), nambo iwaalo ya woga (wakun'jogopa Allah mpela chikulupi ni masengo gambone), yele ni yaili yambone nnope. Yalakweyo ili mu imanyisyo ya Allah kuti wanganyao awe wakumbuchila

E jenumanja wanache wa Adam! Akansokonesya shetani yawatite pakwakopokasya achinangolo wenu wanawawili mu Litimbe lya ku Mbepo, achaawuulaga yakuwala yao kuti waalosye umakonope wao, chisimu jwalakwejo akasam'bonaga wanganyammwe - jwele ni lukosyo lwakwe (lwachijini) – mukawe kanti jenumanja ngankwaonaga. Chisimu Uwwe tugatesile mashetani kuwa isyowe ya awala wangakukulupilila

Soni naga atesile chakunyalaya akasatiji: “Twasimene achatati wetu achitenga chalakwechi, nombenajo Allah atulamwile chelechi.” Jilani: “Chisimu Allah jwangalamula yakunyalaya. Ana mkum'bechetela Allah yangankuimanyilila?”

Jilani: “Ambuje wangu alamwile chilungamiko, ni (akuti soni) lungamisyani ngope syenu (Kukwakwe) pamalo palipose pakusujudila (ndema jakuswali), ni munnumbanjileje Jwalakwe mwakunswejechesya dini Jakwe, mpela yawatite Jwalakwe pakuntanda (kun'gumba, iyyoyopeyo soni) chinchiujila (Kukwakwe).”

Likuga line alijongwele, nambo likuga line kuwajilwe kukwao kusokonechela, chisimu wanganyao agatesile mashetani kuwa akwagosa wao kunneka Allah, ni akuganichisya yanti wanganyao ali wakongoka

E jenumanja wanache wa Adam! Jigalani yakulisalalichisya yenu (pakuwala yakuwala yachasa) pamalo palipose pakuswalila, ni lyagani soni mwagani nambo ngasintenda ulyakasi, chisimu Jwalakwe (Allah) jwaanganonyela waulyakasi

Jilani: “Ana nduni jwaayitesile kuwa haraam ipeto ya Allah (mpela yakuwala yakusalala) yawakopochesye achikapolo Wakwe, kwisa soni lisiki lyambone?” Jilani: “Yalakweyo pa umi wa duniya (uno) achinsyene wakwe ni wakulupilila (namuno kuti makafili akupasyaga nao, nambo) lisiku lya Kiyama ichiwa yaoyaope (wakulupililao).” Iyyoyopeyo ni yatukuti pagopolanya ma Aya kwa wandu waakumanyilila

Jilani: “Chisimu Ambuje wangu ayitesile kuwa haraam yakunyalaya (yaili ilemwa yayikulungwa mpela chikululu), yaiwonechele muyalakweyo ni yaisisiche yakwe, ni yasambi (yantundu uliose), kwisa soni uwwanga (wakutenda) mwangali ligongo, ni kuti mum'bwanganyeje Allah ni ichindu yanganaituluchisya umboni (wakundisya kuigalagatila), soni nikuti mum'becheteleje Allah yangankuimanyilila.”

Soni nkutula uliose wana ndema jakwe (jakuwila), basi pati jiyiche ndema jaojo, nganawa ajichelewasisye kwakandawi namuno kujijanguya

E jenumanja wanache wa Adam! Ndema jilijose jakum'bichilila achimitenga wakuumila mwa jenumanja, ni kunsimbilaga ma Aya Gangu (mwajitikani), sano waligosile (kuilemwa) ni kwilanya (itendo yao), basi ngaaja kuwa ni woga soni ngaaja kuwa wakudandaula

Nambo awala waakaaniile ma Aya Getu ni kulikwesya nago, wanganyao niwandu wa ku Moto, wanyao kwalakweko takawe wandamo

Ana nduni jwali jwalupuso nnope kumpunda mundu jwansepele Allah unami, kapena kanila ma Aya Gakwe? Wanganyao chilyapate liunjili lyao (lya yambone ya umi wa duniya lya walembeledwe) m’chitabu (cha lisosa lya Allah namuno kuti ali makafili), kwikanila ndema jakwaichilila achimitenga Wetu (wali Achimalaika) kwisa kwatyosya umi, tachiti (pakwawusya): “Ili kwapi ayila yamwaliji nkuilumbanjila kunneka Allah?” Wanganyao tachiti: “Itusokonechele.” Ni chachilitendela umboni achimisyene wanti wanganyao waliji makafili

(Allah) tachiti: “Jinjilani ku Moto m’mikutula jajapite kala jenumanja nkanimpagwe ja majini ni wandu. Ndema jilijose jaukajinjileje nkutula tiukaulweseje (nkutula) ujakwe (wakala), kwikanila ndema jatakasongangane mwalakwemo wanaose, wakumalichisya wao (kwinjila) chachiti pakwamba ya wakutandilila wao: “Ambuje wetu! Wanganyawa watusokonesye, basi mwapani ilagasyo yakonjechesya ya Moto.” Jwalakwe tachiti: “Jwalijose akwete (ilagasyo) ya konjochesya nambo kuti ngankumanyilila.”

Sano wakutandilila wao tachiti kwa wakumalichisya wao: “Nganiupagwatu kukwenu ukoto uliose wakutupunda uwwe, basi pasyani ilagasyo ligongo lya (sambi) syamwaliji nkupanganya.”

Chisimu awala waakaaniile ma Aya Getu ni kulikwesya nago, ngasaugulilidwa milango ja kwinani, soni ngasajinjila ku Mbepo mpaka jikajinjile ngamiya pebowo lyasingano (yaili yangakomboleka), soni iyyoyopeyo ni yatukutiji pakwalipila akulewa

Akwete wanganyao kuumila mu Jahannama ugono (wamoto), ni pachanya pao chakwaunichila (chamoto), soni iyyoyopeyo ni yatukutiji pakwalipila walupuso

Sano awala waakulupilile nikutendaga yambone - ngatukunkanganichisyaga mundu (kutenda) ikaweje yampaka ayikombole - wanganyao niwandu wa ku Mbepo, wanyao mwalakwemo takawe wandamo

Ni tuchityosya yayaliji m’mitima mwao ya utinda (wawatindanaga pa duniya), sulo sinankujilima cha pasi pao, ni tachiti: “Lumbili losope lwene alapikwe Allah Ajula jwawatujongolele kuyalakweyi, soni nganganituwa wanti nikongoka ingawe yanti Allah nganatujongola. Chisimu achimitenga wa M’mbuje gwetu pamasile pawayiche ni yakuona.” Ni chachiwilanjidwa (pakwasalila yanti): “Jalakweji ni Mbepo jan'jinjisyidwe majumba ligongo lya yamwaliji nkutenda.”

Soni wandu wa ku Mbepo tachawilanga wandu wa ku Moto (achitiji): “Chisimu uwwe tuisimene yawatupaga chilanga Ambuje wetu kuti yakuona, ana nombe wanganyammwe iyyisimene yawampaga chilanga Ambuje wenu kuti yakuona?” Wanganyao tachiti (pakwanga): “Elo.” Basi ni tachijenesya nkwenesya chilikati chao yanti: “Malweso ga Allah gali pa walupuso.”

“Awala wawaliji nkusiwilila (wandu kuti akajenda) petala lya Allah ni kusachililaga ali alipombotesye (litalalyo), soni wanganyao waliji ali nkukanila ya Akhera.”

Soni chilikati chao (cha wandu wa ku Mbepo ni wa ku Moto), chipakawe pana uwigo (chachili chikwesya), soni pachanya pa chikwesya, paachiwa pana wandu (wakulandana itendo yao yambone ni yakusakala) wachachiwa ali nkwamanyilila wosope (wandu wa ku Mbepo ni wa ku Moto) ni imanyilo yao. Ni tachawilanga wandu wa ku Mbepo (achitiji): “Ntendele uwe kukwenu.” Chachiwa nkanajijinjile (Mbepojo) nambo ali akwete tama (janti tajijinjile)

Sano ndema jachigakagalausyidweje meso gao (kulola) upande wa wandu wa ku Moto takajileje: “Ambuje wetu! Ngasintuwika uwwe pamo ni wandu walupuso.”

Soni wandu wa pa chikwesya chachawilanga wandu (wa ku Moto) wachachamanyilila ni imanyilo yao achitiji: “Nganiunkamuchisya winji wenu ula namuno ayila yamwaliji nkulikwechesya nayo.”

“Ana wanyawa ngawa ni awala wamwalumbililaga yanti Allah nganawa watendele chanasa? (Nnole! Iwechetedwetu kukwao yanti): ‘Jinjilani ku Mbepo, ngam'ba ni woga soni ngam'ba wakudandaula.”

Nombe wandu wa ku Moto tachawilanga wandu wa ku Mbepo (achitiji): “Tupungulilani mesi kapena lisiki lyampele Allah.” Wanganyao tachiti: “Chisimu Allah ayitesile inayiwiliyo kuwa yakanyisyidwa kwa achimakafili.”

Awala wawajitesile dini jao kuwa chanache ni masanje, ni wanyenjile umi wa duniya. Basi lelo chitwaliwalile yawatite pakukuliwalila kusimana nalyo lisiku lyao lyeleli, ni yawatiji pakanila ma Aya Getu

Soni chisimu pamasile patuiche nacho kukwao chitabu (cha Qur’an) chatuchigopolenye mwa umanyilisi, kuwa chongolo kwisa soni chanasa kwa wandu waakukulupilila

Ana pana chaakwembecheya pangawaga kalulila kwakwe (kwa yayikusalidwa m’chitabumo kuti ichitendekwa)? Lisiku lyakwika kalulila kwakwe (lisiku lya Kiyama) tachiwecheta awala wawachiliwalile kala (chitabucho kuti): “Chisimu achimitenga wa M’mbuje gwetu (Allah) wayiche ni yakuona (lelo tukwitichisya). Ana ni tukwete uwwe akutujokola wanti ni atujokole, kapena mpaka ikomboleche kutuwusya kuti tukatende (yambone) yangawaga ayila (yakusakala) yatwaliji nkutenda?” Pamasile pawalipelelwekasyisye achimisyene, ni yaasokonechele wanganyao (isanamu) yawaliji nkuisepelela (kuti chiyichajokola kwa Allah)

Chisimu M'mbuje gwenu ni Allah Ajula juwagumbile mawunde ni mataka m'mowa nsano nalimo, kaneka ni jwatenjele pa Arishi (Chindanda Chaulungu). Akuchitendaga chilo kuwa chakuwuunichila muusi ni chikasaukuyaga mwa chitemachitema (iyyopeyo soni muusi kuchiunichila chilo ni ukasachikuyaga mwa chitemachitema), soni (agumbile) lyuwa ni mwesi kwisa soni ndondwa, (yosope) ijepepasyidwe kwa (kuya) chilamusi Chakwe. Manyililani yanti gumba ni Kwakwe kwisa soni ulamusi, anyakwiche Allah (pa uchimbichimbi ni upile) M'mbuje jwa iwumbe (yosope)

Mum’bombani M'mbuje gwenu mwakulinandiya ni mwakusisa, chisimu Jwalakwe jwangaanonyela wakusumba mpika

Ni ngasim'bwatanganyaga pachilambo panyuma pa kupajilanya, ni mum’bombeje mwaoga ni mwakola tama, chisimu chanasa cha Allah chili dusi kwa wakolosya

Soni Jwalakwe ni Ajula jwaakujitumisyaga mbungo kuwa chisengwasyo paujo pa ukoto Wakwe (wula nkanijigwe), mpaka pati jili jitwichile (mbungojo) maunde Gausito, tukasajitumisyaga ku chilambo chachiwe. Basi ni tukasatulusyaga mesi (gawula) kwalakweko, basi ni galakwego tukasakoposyaga isogosi yantundu uliose, iyyoyopeyo ni yatuchiti pakwakoposya wawe (m’malembe). (Yosopeyi) kuti jenumanja M'be wakumbuchila

Sano chilambo chambone (chachajila) mmela wakwe ukasakopoka (mwagapugapu) mulisosa lya Ambujegwe, nambo (chilambo) chachisakele (changali chajila, mmela wakwe) wangakopoka ikaweje mwakulajilila. Iyyoyopeyo ni yatukuti pagopolanya ma Aya kwa wandu waakutogolela

Chisimu chene twantumisye Nuhu kuwandu wakwe nijwatite: “E wandu wangu! Mun'galagatilani Allah, nganinkola nnungu jwine jwangawaga Jwalakwe, chisimu une ngun'jogopela ilagasyo ya lisiku lyekulungwa nnope.”

Achinkulungwa mwa wandu wakwe watite: “Chisimu uwwe tukum'bona kuti n'di mukusokonechela kwakuonechela.”

Jwalakwe jwatite: “E wandu wangu! Kwaune kwangali kusokonechela, nambo kuti uneji Ntenga jwakuumila kwa M'mbuje jwa iwumbe yosope.”

“Ngulungusya kukwenu utenga wa Ambuje wangu, soni ngum'bunda misyungu, ni ngumanyilila kuumila kwa Allah yangankuimanyilila.”

“Ana nkusimonga kum'bichilila kwenu chikumbusyo kuumila kwa M'mbuje gwenu kupitila mwa mundu jwakutyochela mwa jenumanja, kuti antetele, ni kuti n'jogope, soni nikuti wanganyammwe ntendeledwe chanasa?”

Nambo wankaaniile, basi ni twankulupwisye jwalakwe ni awala wawaliji najo imo m’chombo, ni twamisyisye awala wawaakaaniile ma Aya Getu. Chisimu wanganyao waliji wandu wangalola

Sano kwa achina Adi (twantumisye) nnongo n’jao (jwali) Hudu. Jwalakwe jwatite: “E wandu wangu! Mun'galagatilani Allah, nganinkola nnungu jwine jwangawaga Jwalakwe, ana ngankogopa?”

Anchinkulungwa awala wawakanile mwa wandu wakwe watite: “Chisimu uwwe tukum'bona kuti n'di nkupulika, soni uwwe tukun'ganichisya kuti mmwejo jumpepe mwa waunami.”

Jwalakwe jwatite: “E wandu wangu! Kwaune kwangali kupulika, nambo kuti uneji Ntenga jwakuumila kwa M'mbuje jwa iwumbe yosope

Ngulungusya kukwenu utenga wa Ambuje wangu, soni une kukwenu ni nkuwunda misyungu jwakulupichika

Ana nkusimonga kum'bichilila kwenu chikumbusyo kuumila kwa M'mbuje gwenu kupitila mwa mundu jwakutyochela mwa jenumanja kuti antetele? Soni kumbuchilani ndema jawam'bisile jenumanja kuwa wawinjila panyuma pa wandu wa Nuhu, ni an'jonjechesye kusapanguka mu kagumbidwe (pakumpa ilu yamachili, yekulungwakulungwa soni yeleuleu), basi kumbuchilani indimba ya Allah kuti m'be wakupunda.”

Wanganyao watite: “Ana ntuyichilile kuti tun'galagatileje Allah Jikape ni tuleche yawaliji nkugalagatila achatati wetu? Basi ikani nayo kukwetu yankutupa chilangayo naga n'di mwa akuwecheta yakuona.”

Jwalakwe jwatite: “Pamasile pa in'gwilile ilagasyo kwisa soni gasabu kuumila kwa M'mbuje gwenu. Ana nkukangana none pa mena gamwagambile kugakolanga wanganyammwe ni achatatiwenu (pa isanamu yankuigalagatila), kutendaga Allah nganatulusya pa galakwego umboni uliose (wakulosya kuti gelego mena ga milungu jakuwajilwa kujigalagatila)? Basi jembecheyani, chisimu une ndili mwa akwembecheya namwe.”

Basi ni twankulupwisye jwalakwe ni awala wawaliji najo imo ni chanasa chakuumila Kukwetu, ni twakatile njiga sya awala wawaakaaniile ma Aya Getu (pakuwa wosope wene), soni nganawa wakulupilila

Sano kwa achina Samuda (twantumisye) nnongo n’jao (jwali) Swaleh. Jwalakwe jwatite: “E wandu wangu! Mun'galagatilani Allah, nganinkola nnungu jwine jwangawaga Jwalakwe, pamasile pachim'bichilile chilosyo chakuonechela palangulangu kuumila kwa M'mbuje gwenu. Aji ngamiya ja Allah jiwele chilosyo kukwenu, basi jilekani jilyeje petaka lya Allah, ni ngasin'jikwaya ni yakusakala iliyose, itakwika mwainkwembekenye ilagasyo yakupoteka nnope.”

“Soni kumbuchilani ndema jawam'bisile jenumanja kuwa wawinjila panyuma pa achina Adi, ni antaamiiche ndamo jambone pachilambo, nkulitawila majumba gamakulungwakulungwa muiwata yakwe, soni ni nkusepa m’matumbi majumba, basi kumbuchilani indimba ya Allah, ni nkalapwaga pachilambo pakuwatanganya.”

Anchinkulungwa awala wawalikwesyisye mwa wandu wakwe watite pakwasalila awala wawawalanjidwaga kuti wangalikombolela mu wandu wawakulupilile mwajamanjao: “Ana ni nkumanyilila kusyene yanti Swaleh juli jwakutumisyidwa kuumila kwa M'mbujegwe?” Wanganyao watite: “Chisimu uwwe ichindu yaatumisyidwe nayo jwalakweju tuli wakuikulupilila.”

Awala wawalikwesyisye watite: “Chisimu uwwe ayi yanyyikulupilileyi tuli wakuikana.”

Basi niwajisinjile ngamiya,ni kutenda chalu pakuleka (kuya) lilamusi lya M’mbuje gwao, ni kuwecheta kuti: “E mmwe Swaleh! Ikaani nayo kukwetu yankutupa chilangayo naga n’di mwa achimitenga.”

Basi nichakwembekenye chisikinya, mwanti wasimanikwe m’majumba mwao (ali awile) chitindiwalile

Basi jwalakwe nijwaatyochele aku juchitiji: “E wandu wangu! Chisimu pamasile panalungwisye utenga wa Ambuje wangu kukwenu, soni ni nam'bundile misyungu (jambone), nambo kuti jenumanja ngankwanonyelaga akuwunda misyungu.”

Nombenajo Lutwi (twampele utume. Kumbuchilani) katema kajwatite kwawandu wakwe: “Ana nkutenda yakunyalaya yanganannongoleleje kuitenda yalakweyo jwalijose mu iwumbe yosope (yakala)?”

“Chisimu wanganyammwe nkwatenda achalume matanyula kuleka (kwalomba) achakongwe, nambo wanganyammwe niwandu wakupundanganya malile (pa kupanganya sambi syekulungwa nnope).”

Ni nganiuwa wanje wa wandu wakwe (kuti waliji wambone), ikaweje kuwecheta yanti: “Mwawingani m’musi mwenu, chisimu wanganyao ni wandu waakuliiswejesya (chatamile yapi m’musi wausakwa!)”

Basi ni twankulupwisye jwalakwe pamo ni liwasa lyakwe, ikaweje wankwakwepe; waliji mwa akusigalila munyuma (ni wajonasiche)

Sano (kuwandu wa) ku Madiyana (twantumisye) nnongo n’jao (jwali) Shuaibu. Jwalakwe jwatite: “E wandu wangu! Mun'galagatilani Allah, nganinkola nnungu jwine jwangawaga Jwalakwe, pamasile pachim'bichilile chilosyo chakuonechela palangulangu kuumila kwa M'mbuje gwenu. Basi gumbasyani chipiimo chambale kwisa soni sikelo, soni ngasimwapunguchisyaga wandu ichindu yao, ni ngasim'bwatanganyaga pachilambo panyuma pa kupakolosya. Yalakweyi ni yaili yambone kukwenu nam'baga jenumanja wakulupilila (kusyene).”

“Soni ngasintamaga petala palipose nikwajogoyaga (wandu), soni ni kwasiwililaga kwitala lya Allah wandu wankulupilile Jwalakwe, ni kusachililaga n'di nlipombotesye (litalalyo), soni kumbuchilani ndema jamwaliji wansakato kaneka niwantupiye. Soni nnole mujawelele mbesi ja akuwatanganya.”

“Soni naliwaga likuga line mwa jenumanja liukulupilile (utenga) wandumisyidwe nao, sano likuga line ni nganilikulupilila, basi pililani mpaka Allah ajilanye chilikati chetu, soni Jwalakwe ni Jwambone nnope mwa akwilanya (magambo).”

Achinkulungwa awala wawalikwesyisye mwa wandu wakwe watite: “Chisimu uwwe chitum’binje mmwe Shuaibu m’musi mwetu pamo ni awala waakulupilile imo nimmwe, ayo iyayi nikuti chim’bujile kwene ku dini jetu.” Jwalakwe jwatite: “Namuno kuti tuli nkujiwenga?”

“Chisimu chituwe tunsepele Allah unami naga tuli tuwujile ku dini jenu panyuma panti Allah ali atujokweleko, soni ngawa nkuwa kukwetu yakuwujila kwalakweko ikaweje naga Allah Ambuje wetu ali asachile, Ambuje wetu atenjele paumanyilisi wakuchimanya chilichose, kwa Allah pe ni kwatujeegamiile, Ambuje wetu! Jilanyani chilikati chetuwe ni wandu wetu mwakuonaonape, soni Mmwejo ni Wambone nnope mwa akwilanya.”

Achinkulungwa awala wawakanile mwa wandu wakwe ni watite: “Nambo naga munkuye Shuaibu chisimu wanganyammwe pa jele ndemajo chim'be wakwasika.”

Basi ni chakwembekenye chisikinya, mwanti wachelelwe (ali wawe) m’majumba mwao chitindiwalile

Awala wawankaaniile Shuaibu waliji nti chisawu nganatamejepo (pamalopo), awala wawankaaniile Shuaibu ni wawaliji wakwasika

Basi jwalakwe nijwatyochele aku juchitiji: “E wandu wangu! Chisimu pamasile panalungwisye mautenga ga Ambuje wangu kukwenu, soni ni nam'bundile misyungu (jambone), sano chinadandaulile chinauli wandu makafili?”

Soni nganitutumisyeje m’musi (uliose) ntume jwalijose (ni kunkana) ikaweje twakwembekanyaga achimisyeneo ni ulanda kwisa soni makungu kuti atetewale

Kaneka twagalausyaga pamalo pa yakusakala ni kuwikapo yambone (twatyochesyaga ulanda ni makungugo nkanakulupililepe), mpaka watupaga (ni kutupa soni ipanje yao), ni waikanaga mwakuwecheta yanti: “(Ata kalakala ni iyyiyipeyi) makungu ni ntendele yapataga achatati wetu (makunguga ngawa ligongo lya ukafili.)” Basi ni twakwembekanyaga mwachisupuchisya akakumanyilila

Soni ingawe yanti achimisyene misio wakulupilile ni kuwa ni woga (wakun'jogopa Allah), chisimu tungaugulile upile kuumila kwinani ni pasi, nambo kuti wakaaniile, basi ni twakwembekenye ligongo lya yawaliji nkupanganya

Ana achimisyene misio akuliona kuti ali pantunjelele kwanti ngawa nkwaichilila ipotesi Yetu lwachilo ali nnugono

Kapena achimisyene misio akuliona kuti ali pantunjelele kwanti ngawa nkwaichilila ipotesi Yetu lwansana ali nkung'anda

Ana akuliona kuti ali pa ntunjelele ku mitego ja Allah? Basi ngawa nkuliona kuti ali pa ntunjelele ku mitego ja Allah ikaweje wandu wali wakwasika

Ana nganiyiwa yakumanyika kwa awala waachitawele chilambo panyuma pa achimisyene (wawatamagamo kala) yanti; Uwwe tungasache tungapatisye ipotesi ligongo lya sambi syao, ni kwadinda m’mitima mwao kwanti nganawa apikene (chilichose)

Jalakwejo nimisi jatukunsimbila sine mwa ngani syakwe, soni chisimu chene achimitenga wao waichilile ni ilosyo yakuonechela palangulangu, basi ni nganawa wanti ni kuikulupilila yawaikanile kala, iyyoyopeyo niyakasatiji Allah pakudinda m’mitima ja achimakafili

Soni nganituchisimana kwa wajinji mwa wanganyao chilanga chilichose (chawaliji nkuchikwanisya), nambo twaasimene wajinji mwa wanganyao ali wakunyosya

Kaneka panyuma pao (achimitenga wasalidweo), twantumisye Musa ni isimosimo Yetu kwa Firiauna ni nduna syakwe, basi ni waitesile lupuso pakuikana, basi nnole mujawelele mbesi ja akuwatanganya

Sano Musa jwatite: “E mmwe Firiauna! Chisimu une ni Ntenga jwakuumila kwa M'mbuje jwa iwumbe yosope.”

“Ikusosekwa kukwangu kuti ngasinam'bechetela Allah ikaweje yakuonaonape, chisimu nam'bichiiliile wanganyammwe ni chisimosimo chakuonechela chakuumila kwa M’mbuje gwenu, basi mwalekani mbigule nao wanache wa Israila.”

(Firiauna) jwatite: “Nam'baga m'biiche ni chimanyisyo basi ikaani nacho naga nkuwecheta yakuona.”

Basi (Musa) ni jwaponyisye simbo jakwe (pasi). Nalole! Jasyuchile lijoka lyakuonechela

Soni ni jwakopwesye ligasa lyakwe. Nalole! Lyasyuchile lyeswela (lyakumelemenda) kwa akulola

Achinkulungwa wa mwa wandu wa Firiauna (pakwitichisyana ni Firiaunajo) watite: “Chisimu jwalakweju ni nsawi jwakumanyilila nnope (usawi).”

“Jukusaka kuti junkopokasye m’chilambo mwenu, ana nitinnamule yantiuli?”

Wanganyao watite (pakumpanga lunda Firiauna): “Munnechelesyani panandi jwalakwe ni nkulugwejo (nkaawulaga chitema), nintumisye m’misinda akusonganganya.”

“Kuti ayiche najo kukwenu nsawi jwalijose jwali jwakumanyilila nnope (usawi).”

Ni wam'bichilile asawi Firiauna. Wanganyao watite: “Chisimu kukwetu chikuwe kwana malipilo (gambone) natuwaga uwwejo ni wakupunda.”

Jwalakwe jwatite: “Elo, konjechesya soni pelepo, chisimu wanganyammwe chim'be mwa akuwandichisyidwa (kukwangu).”

Wanganyao watite: “E mmwe Musa! Mwine chimponye kaje, kapena uwwe niwachituwe akuponya (mwakutandilila)?”

Jwalakwe jwatite: “Ponyani.” Basi ndema jawaponyisye wagalojile meso ga wandu ni kwataga woga, ni waiche ni usawi wekulungwa nnope

Ni twajuuwiile (malowe) kwa Musa ganti: “Ponyani simbo jenu.” Nalole! Jalakwe jamisile mwanakamo yaunami yawaliji nkulosya

Basi chasimichiche chakuona ni yaweseche yawaliji nkutenda

Basi niwapundidwe palakwepo niwasyuchile kuwa wakunyosyeka

Asawi ni waligwisyisye pasi kusujudu

Watite: “Tunkulupilile M'mbuje jwa iwumbe yosope.”

“M'mbuje jwa Musa ni Haruna.”

Firiauna jwatite: “Ana munkulupilile jwalakweju une nkaninampe lusa? Chisimu aga ni malindi gantesile wanganyammwe mu nsindamu kuti mwakoposyemo achinsyene (nintawale jemanja), basi pangakawapa chiyyimanye (yachinantende).”

“Chisimu chingate makono genu ni ngongolo syenu mwakutindanya (ligasa lyakun'dyo ni likau lyakunchiji, kapena ligasa lyakunchiji ni likau lyakun'dyo), kaneka ni chinankomele pansalaba wanaose.”

Wanganyao watite: “Chisimu uwwe kwa M'mbuje gwetu tukuujila.”

“Soni pangali ulemwa uliose wankuuona kukwetu ikaweje kuti tuikulupilile ilosyo ya M'mbuje gwetu ndema jaituyichilile. Ambuje wetu! Tupungulilani kupilila ni ntupe chiwa tuli Asilamu.”

Achinkulungwa wa mwa wandu wa Firiauna ni watite (pa kunchoonga Firiauna): “Ana nitin'gambe kunnechelesya Musa ni wandu wakwe kuti awatanganyeje pa chilambo, ni antundumalile mmwe ni milungu jenu?” Jwalakwe jwatite: “Chituwulaje wanache wao wachilume nikwaleka umi wanache wao wachikongwe, soni chisimu uwwe pa wanganyao tukwete machili gakwakombolela.”

Musa jwatite kwa wandu wakwe: “Wendani chikamuchisyo kwa Allah soni pililani, chisimu chilambochino cha Allah chaachipeleche kwa waakwasaka mwa achikapolo Wakwe kuwa wawinjila. Soni mbesi (jambone) jili kwa wandu wawoga (wakun'jogopa Allah).”

Wanganyao watite: “Tuwele tuli nkulagasyidwa mmwe nkanintuyichilile, ni (sano jakwe) panyuma pakutuyichilila!” Jwalakwe jwatite: “Mwinetu M'mbuje gwenu kuwa nkun'jonanga mmagongo jwenu, ni kumpisya kutama wanganyammwe pachilambo kuti alole mwachintendeleje (itendo yenu).”

Soni chisimu twakwembekenye kusyene wandu wa Firiauna ni yaka ya chilala, kwisa soni kupunguka kwa isogosi, kuti wanganyao awe wakumbuchila

Basi (waliji wanti) naga umbone waichililemo watiji: “Yetuwe ni yeleyayi.” Nambo naga kwapata yakusakala, niwantutilaga chitapani Musa ni wali najo imo (kuti ni waakwatapanya). Manyililani yanti chitapani chao chili kwa Allah (ligongo lya itendo yao yangalumbana), nambo kuti wajinji mwa wanganyao ngakumanyilila

Soni watite (pakunsalila Musa): “Chilosyo chilichose chachim'biche nacho kukwetu kuti ntulojele nacho (chin'gambe kulilagasya), uwwetu nganituwa tunkulupilile mmwe.”

Basi ni twatumichisye wanganyao chigumula, sombe, njipi, mola kwisa soni myasi (kuwa malundelunde ga) ilosyo yakuonechela, basi ni walikwesyisye ni waliji soni wandu wakulewa

Soni pandema jayaliji nkwagwila ilagasyo watiji: “E mmwe Musa! Tuwendelani kwa Ambuje wenu ligongo lya chilanga Chakwe chawatawene namwe (chanti chatutyochesye ilagasyo naga tukulupilile), chisimu naga nkututyochesya ilagasyo, chitunkulupilile kwene soni chitwaleche kwene kuwigula nomwe wanache wa Israila.”

Nambo ndema jatwaliji nkwatyochesya ilagasyoyo kwakwikanila ndema jawaliji nkuwajilwa kujiyika, papopo wanganyao waliji nkukasa chilanga mwanakamo

Basi ni twauchisye mbusyo wanganyao (syakupoteka nnope), mwanti twamisyisye m'mbwani ligongo lyanti wanganyao wakaaniile ilosyo Yetu, niwaliji soni ali nkuikwanjila

Ni twatesile wandu awala wawaliji nkuonedwa mpela wangalikombolela (ligongo lya ukapolo wali wanache wa Israila) kuwa wawinjila kungopoko kwa chilambo (cha Shami) ni kungapililo kwakwe akula kwatwatasileko upile, ni lyakalulile lilowe lya Ambuje wenu lyalili lyambone kwa wanache wa Israila ligongo lya kupilila kwao, soni ni twagajonasile masengo gawaliji nkupanganya Firiauna ni wandu wakwe (mpela ga unamalima) kwisa soni majumba gawaliji nkwimika njo

Ni twajombwesye wanache wa Israila mbwani, basi ni wasimene wandu ali nkubindichila ku isanamu yao (pa kuigalagatila). Wanganyao watite: “E mmwe Musa! Tutendelani nnungu jwetu yatite pakola wanganyao milungu jao.” Jwalakwe jwatite: “Chisimu wanganyammwe ni wandu ajinga.”

“Chisimu wanganyawa tachiwa wakonanjidwa pa yalitomecheyi, soni ni iwele yantega yawele ali nkupanganya.”

Jwalakwe jwatite: “Ana jwangawaga Allah nansosele jenumanja kuwa nnungu, kutendaga Jwalakwe anchimbichisye kupunda iwumbe yosope (yandawi jenu)?”

Soni (kumbuchilani) katema katwan'jokwele ku wandu wa Firiauna wawaliji nkumpa ilagasyo yakusakala nnope, waliji nkuwulaga wanache wenu wachilume ni kwalekaga umi wanache wenu wachikongwe, sano mu yalakweyo mwaliji mwana kulinjidwa kwekulungwa nnope kwakutyochela kwa M'mbuje gwenu

Ni twampele chilanga Musa cha ilo makumi gatatu (kuti atende ibada kaneko tumpe Taurat), ni twaikwanilisye ni (ilo ine) likumi, ni jakwanile ndema jachilanga cha Ambujegwe (chakuja kumpa Tauratijo) mu ilo makumi ncheche. Musa ni jwatite kwa nchimwenegwe Haruna: “Tamilani chitengu changu pa (kwalongolela) wandu wangu soni kolosyani, ni ngasinkuya litala lya akuwatanganya.”

Sano ndema ja jwaiche Musa pamalo gachilanga Chetu, Ambujegwe nikuwecheta najo, jwatite: “Ambuje wangu! Lilosyani kukwangu kuti nam'bone.” Jwalakwe jwatite: “Nganim'ba mumbweni, nambo lilolani litumbi, naga litamilichiche pamalo pakwe chinkomboleche kumbona.” Basi ndema ja walionesye Ambujegwe kwitumbi walitesile kuwa lyakusyajika, sano Musa ni jwagwile kwakomoka. Basi ndema ja jwasisimwiche jwatite: “Kuswejela ni Kwenu! Ndesile toba kukwenu, soni une ni jwandanda mwa akukulupilila.”

(Allah) jwatite: “E mmwe Musa! Chisimu Une nansagwile mmwejo mwa wandu (wosope), kunsagulila utenga Wangu ni kuwecheta Kwangu (nomwe), basi pochelani yanampeleyi ni m'be mu wakutogolela.”

Ni twannembele jwalakwejo m’maubawu kuumila mu chindu chilichose chiigaanyo, ni kusalichisya kwa chindu chilichose, (ni kuntenda kuti): “Basi gakamulisyani mwamachili, ni mwalamuleje wandu wenu kuti agakamulisyeje mwaumbone wakwe wannope. Pangakawapa chinannosye misi ja wakunyosya.”

Chinawambasye ku ma Aya Gangu awala waakulikwesya pa chilambo mwangali ligongo lyakuona, mwanti naga ali achiweni chilosyo chilichose ngakasachikulupililaga, soni naga ali aliweni litala lyachongoko ngakulitenda kuwa litala, nambo naga aliweni litala lyakusokonechela akulitendaga kuwa litala, yalakweyo ni ligongo lyanti wanganyao wakaaniile ilosyo Yetu, niwaliji soni ali nkuikwanjila

Sano awala waakaaniile ma Aya Getu ni kusimangana kwa ku Akhera, gajonasiche masengo gao. Ana chachilipidwa (inepe) yangawaga yawaliji nkupanganya

Ni waalitendele wandu wa Musa panyuma pakwe (jwele ali apite kwitumbi kuupochela Taurat) kuumila mu ipeto yao (ya golodi ni silifa) kang'ombe (kuwa kannungu kao), kakaakwete chiwiliwili chachakoposyaga lilowe (mpela chawumi), ana nganayionaga wanganyao yanti kalakweko nganikawechetekasyaga soni nganikaajoongolelaga kwitala (lililyose)? Walitendele kalakweko (kuwa kannungu kao) ni waliji wakulitenda lupuso

Sano ndema ja waaligambile ni kuyiona yanti wanganyao pamasile paasokonechele watite: “Naga ngaakututendela chanasa Ambuje wetu, ni kutukululuchila chisimu chene chituwe mu wakwasika.”

Sano ndema ja jwaujile Musa ku wandu wakwe juli jugasabiche ni kupwelembwesuka, jwatite: “Kaje kusakala yamwasigele nchitendaga panyuma pangu! Ana nkulumisye chilamusi cha M’mbuje gwenu (pakulitendela yenuyenupe nkaniyyimanye yatannamule)?” Ni jwaponyisye (pasi) maubawu, kaneka nijwakamwile ntwe wa nchimwenegwe ni kuuwutila kukwakwe. (Haruna) jwatite: “Mwanache jwa mama! Chisimu wandu wambweni ungali machili, mwanti wasigele panandi kuti ambulaje, basi nkaasengwachisya amagongo pa une (pakumba ipotesi), soni nkambika pamo ni wandu wakulitenda lupuso.”

(Musa) jwatite: “Ambuje! Mungululuchilani une ni achimwene wangu, ni ntujinjisye mu chanasa Chenu, soni Mmwe ni Wachanasa channope kwapunda wachanasa wosope.”

Chisimu awala walitendele kang'ombe (kuwa kannungu kao), chijapate gasabu jakuumila kwa M’mbuje gwao kwisa soni kunyosyeka pa umi wa duniya, soni iyyoyopeyo niyatukutiji pakwalipila wakusepelela (unami mu Dini)

Soni awala watesile yakusakala kaneka ni kutenda toba panyuma pakwe ni kulupilila, chisimu Ambuje wenu panyuma pakwe awele Wakululuka kusyene, Wachanasa channope

Sano ndema ja jatulele kwa Musa gasabu, jwagalokwete maubawu gala, soni m’malemba mwakwe mwaliji mwana chongolo kwisa soni chanasa kwa awala wali ni woga wakun'jogopa Mmbuje gwao

Ni jwasagwile Musa mu wandu wakwe achalume makumi nsano na gawili (wawaliji wambone) kuti ajaule kumalo gachilanga Chetu (chatwapangene najo Musajo kuti akaiche nao kwitumbi kuti akaawendele chikululuko achimijao wana galagatilaga kang'ombe wala), basi ndema jachakwembekenye chisikinya chamachili (Musa) jwatite: “Ambuje! Nkasache nkaajonasile wanganyawa nonejwakwe kalape (pameso pa achimijao wosope kuti amanyilile yanti ngawa ndekwaulaga une). Ana nkutujonanga pa yatesile wawawate mwetuwe? Nganijiwatu jalakweji ikaweje fitina Jenu jankwalechelela najo kusokonechela wankwasaka nikwajongola wankwasaka, Mmwe ni Nkutugosa jwetu, basi tukululuchilani uwwe ni kututendela chanasa, soni Mmwe ni Wambone nnope mwa akukululuka wosope.”

“Soni tulembelani yambone pa duniya pano ni ku Akhera kwakwe, chisimu uwwe tuwujiile Kukwenu.” (Allah) jwatite: “Ilagasyo Yangu chinansausye nayo jwangunsaka (mwa wandu wakusakala), sano chanasa Changu ni chin'jeeneele chindu chilichose (pa duniya), nambo (ku Akhera) chinjalembela chalakwe (chanasacho) kuti chikaapate awala wali ni woga (wakun'jogopa Allah) ni akutolaga Zaka, kwisa soni awala waakuwa ali nkugakulupilila ma Aya Getu.”

“Awala waakunkuya Ntenga, Ntume jwangapakombola kulemba ni kuwalanga, ajula jwaakunsimana juli julembedwe kukwao mu Taurat kwisa soni mu Injil, akwalamulaga kutenda yaukoto ni kwalekasyaga yangalumbana, ni akwakundisyaga yambone ni kwakanyaga yausakwa, ni akwatula misigo jao ni makongwa gagaliji pa wanganyao (malamusi gakusausya kugakuya), basi awala wankulupilile jwalakwe (Muhammadi ﷺ) ni kunchimbichisya ni kunkamuchisya ni kuya lilanguka (Qur’an) lyalyatulusyidwe imo ni jwalakwe, wanganyao niwali wakupunda.”

Jilani (mmwe Muhammadi ﷺ): “E jenumanja wandu! Chisimu une ni Ntenga jwa Allah kukwenu wanaose, Ajula jwauli Wakwe uchimwene wa kumawunde ni petaka, pangali nnungu jwine (jwakuwajilwa kun'galagatila) ikaweje Jwelepejo, akupelekaga umi ni chiwa, basi munkulupililani Allah ni Ntenga Jwakwe, Ntume jwangapakombola kulemba ni kuwalanga, ajula jwaakunkulupilila Allah ni malowe Gakwe, ni munkuyani kuti n'jongoche.”

Soni mu wandu wa Musa mwana likuga lyalikwaajongolela (achimijao) ku yakuona (Usilamu), soni ni yakuonayo akutendaga chilungamiko

Ni twaagawenye wanganyao ngosyo likumi kwisa siwili kuwa makuga (gekulungwakulungwa), ni twampele malowe Musa ndema jawam'bendile wandu wakwe mesi, kuti: “Putasyani simbo jenujo peganga.” Basi nisyaumile mwalakwemo sulo likumi kwisa siwili, mwanti lukosyo lulilose lwamanyilile pakumwela pakwe. Soni twaaunichile ni m'bulili wa liunde, ni kwatuluchisya manna ni salwa, (nikwatenda kuti): “Lyagani mu yambone yatumpeleyi.” Ni nganatutenda lupuso Uwwe, nambo achimisyene ni wawaliji nkulitenda lupuso

Soni (mwakumbusyani) katema kayawechetedwe kukwao yanti: “Tamani m'musi awu (wa Baitul Muqaddas), ni n’dyeje mwalakwemu palipose pansachile, ni m'becheteje kuti: ‘Tukululuchilani ilewi yetu.’ Soni jinjililani pannango chiinamile. Chitunkululuchile ilewi yenu, chitwajonjechesye (yambone) wakolosya.”

Nambo wawalitesile lupuso mwa wanganyao wagalawisye (lilamusi lila mwanti wawechete) malowe gane gangawaga gawasalilidwe gala, sano ni twatumisye pa wanganyao ipotesi kutyochela kwinani ligongo lyakulitenda kwao lupuso

Soni mwawusyani wanganyao ya musi (wa Ayilah) wawaliji mungulugulu mbwani, ndema jawaliji (achinsyene musio) nkuguluka mpingu wa (lisiku) Lyakuweluka (wangaja kuwulaga somba nambo kutenda ibadape), pandema jasyaichililaga somba syao mwakwela lisiku lyakuweluka lyao, nambo lisiku lyangawa lyakuweluka lyao nganisyaichililaga, yele niyatwatite pakwalinga ligongo lya kunyosya kwao

Soni (mwakumbusyani) katema kalyawechete likuga line mwa wanganyao (pakwawusya wandu wawaliji nkwajamuka awala wana gulukaga mpingu wa lisiku lyakuweluka): “Nkulilagachisya chichi kwajamuka wandu wanti Allah asigele panandi kwajonanga kapena kwapa ilagasyo yakupoteka nnope?” Wanganyao watite: “Tupate pakuliwalanjila kwa M'mbuje gwenu (kuti twajamukaga nambo nganatupikanilaga), ni kuti mwine wanganyao chawe ni woga (wakun'jogopa Allah).”

Sano katema kawaapwaanyiile ayila yawaliji nkukumbusyidwa, twajokwele awala wawakanyaga yakusakala, ni twakwembekenye awala wawalitendaga lupuso ni ilagasyo yakusakala nnope ligongo lya kunyosya kwao

Basi ndema ja walikwesyisye pangaleka yawakanyisyidweyo, twasalile kuti: “Syukani majani gakunyosyeka.”

Soni (mwakumbusyani) ndema ja wagombelesye Ambuje wenu yanti; chisimu chene taweje ali nkwatumichisya (Ayudao) mpaka lisiku lya Kiyama wachaweje ali nkwapa ilagasyo yakusakala, chisimu Ambuje wenu ni Wachitema pakupeleka ipotesi, soni chisimu Walakweo ni Wakululuka kusyene Wachanasa channope

Ni twalekangenye (Ayudao) pa chilambo kuwa mikutula-mikutula, wane mwa wanganyao wambone, nambo wane nganawa wanti iyyo, soni ni twalinjile ni yambone kwisa soni yakusakala kuti awujile (kwa Allah)

Basi ni walundite panyuma pao akulunda (wakusakala) wawachitawele chitabu (cha Taurat nambo mwangali kuchikuuya), waliji nkulisagulila ichindu (yakusakala) ya auno (umi) wapasi, ni kuwechetaga (mwakuliwimba): “Ichikululuchidwa kukwetu (kuwa mpela akutenda toba).” Nambo soni yeti naga kwaichilila ichindu ine (yakusakala) yanti chisawu iyyoyo waigundumilaga pakuijigala (kutendaga ali watende toba). Ana nganichijigalidwa chilanga kukwao cha m'Chitabu chanti ngasam'bechetela Allah ikaweje yakuonaonape? Kutendaga wanganyao asoomile yaili mwalakwemo? Sanotu Nyumba Jambesi jichiwa jambone nnope kwa wandu wali ni woga (wakun'jogopa Allah), ana jenumanja wangali lunda

Sano awala waakukamulisya chitabu (pa kuikuya yaili mwalakwemo), ni kwimikaga Swala mwakolosya (tuchalipila yambone), chisimu Uwwe wangajonanga malipilo ga akwilanya

Soni (mwakumbusyani) katema katwalinyakwile litumbi pachanya pao ni kuwa mpela nsakasa, ni wasimichisye yanti chilyagwile, (twaasalile yanti): “Kamulisyani yatumpeleyi (Taurat) mwamachili, soni kumbuchilani (malamusi) gagali mwalakwemo kuti jenumanja m'be ni woga (wakun'jogopa Allah).”

Soni (kumbuchilani) katema kawakopwesye Ambuje wenu mu wanache wa Adam kuumila m’migongo jao wanache wao (wane kuumila m’migongo ja wane muchachiwelekanilana, soni wosope nikwakoposya mun'gongo wa Adam), ni kwatendekasya kuwa mboni syakulitendela achimisyene (yakunda Tauhidi, pakwatenda kuti): “Ana nganimba Nam'mbuje gwenu?” Wanganyao watite: “Elo! Tuteendeele umboni (kuti Mmwejo ni Ambuje wetu).” Ntaakwiisa kuwecheta lisiku lya Kiyama yanti: “Chisimu uwwe pangali chatwachimaanyi chakwayana ni yele (ya Tauhidiyi).”

Kapena ntaakwiisa kuwecheta kuti: “Chisimu achatati wetu ni wawawanganyisye (Allah ni isanamu) kala, sano uwwe twagambile kuwa wanache (watwaiche) panyuma pao (ni kwaakuuyaaga), ana ni chintujonanjeje ligongo lya yawatesile wakuya yaunami?”

Soni iyyoyopeyo ni yatukuti pagopolanya ma Aya, soni kuti wanganyao awujile (kwa Allah)

Mwaasoomelaani wanganyao abali ja ajula jwatwampele ma Aya Getu, basi jwele nikuliiwuulaamo, sano shetani niwankuyiye (nikuwa najo), basi ni jwaliji mu wakusokonechela

Soni tungasache tunganyyakwile (pa uchimbichimbi) ni gele (ma Ayago), nambo kuti jwalakwe jwapendechele ku duniya ni kuya isako yakwe, basi chilandanyo chakwe chili chisawu mbwa janti nkujikalipilamo jikasapumasika (pakutiila) mwakoposya lulimi, natamuno kujileka (ngajikalipila) jikasapumasikape mwakoposya lulimi, chele ni chilandanyo cha wandu awala waakaaniile ma Aya Getu, basi siimbaani ngani kuti wanganyao achetelele

Kaje kusakala chilandanyo cha wandu awala waakaaniile ma Aya Getu! Soni achimisyene niwawele ali nkulitenda lupuso

Mundu jwan'jongwele Allah, basi nijwali jwakongoka, nambo wawalechelele kusokonechela, basi wanganyao niwali wakwasika

Soni chisimu chene twajiguumbiile Jahannama majini gamajinji kwisa soni wandu (watakajinjileko), wanganyao akwete mitima nambo wangamanyilila najo, meso soni akwete nambo wangalolela nago, ni mawiwi gakwe akwete nambo wangapikanila nago, wanganyao ali chisawu inyama, gambakuti wanganyao ni wali wakusokonechela nnope (kumpunda inyama), wanganyao ni wali waakwaanjila (malamusi ga Allah)

Soni Allah jukwete mena gambone nnope, basi mum’bombani nago, ni mwaleche awala waakugapombotasya mena Gakwe, chachilipidwa pa yawaliji nkupanganya

Soni mu wandu watwagumbile, mwana likuga lyalikwaajongolela (achimijao) ku yakuona, soni ni yakuonayo akutendaga chilungamiko

Soni awala waakaaniile ma Aya Getu, chitwajigale mbolembole wa ku ipotesi kupitila m’matala gangaakugamanyilila

Soni ngamba kwalechelela wanganyao, chisimu mpango Wangu uwele wakulimbangana

Ana ngaakuchetelela? Mwa n'jaomotu mwangali masoka, nganawa jwalakwe (Muhammadi ﷺ) ikaweje nkutetela jwakuonechela

Ana ngaakuuona uchimwene wa kumawunde ni petaka, ni ichindu yosope yaagumbile Allah, soni yanti mwine komboleka kuwa ndawi jao jakuwila jiwandichile? Ana ni abalichi panyuma paaji (Quraniji) jatachijikulupilila

Mundu jwannechelele Allah kusokonechela, basi nganakola nkun'jongola, ni akwalekaga nkusokonechela mwaomo achiyumbagayumbaga

Akum'buusya (mmwe Muhammadi ﷺ) ya ndema (jakwichila Kiyama kuti): “Jichiwa chakachi?” Jilani: “Chisimu umanyilisi wakwe uli kwa Ambuje wangu pe. Pangali wampaka ajionesye papaswela ndawi jakwe ikaweje Jwalakwe. Jisitwepe kumawunde ni petaka. Ngasijim'bichilila ikaweje mwachisupuchisya.” Akum'buusya nti chisawu mmwejo m'bele wakuwuchilichisya ya jalakwejo (ni mpaka n'jimaanyi ndawi jakwe). Jilani: “Chisimu umanyilisi wakwe uli kwa Allah, nambo wandu wajinji ngaakumanyilila.”

Jilani (mmwe Muhammadi ﷺ): “Jwangali machili gakulikamuchisya nansyene kapena kulipa isausyo ikaweje yasachile Allah, soni ngaawe nguimanyilila yakusisika ngalichuluichisye yambone, soni nga nganiyimbata yakusakala. Nganimbatu une ikaweje nkwaatetela ni kwatagulila abali jakusengwasya wandu waakukulupilila.”

Jwalakwe ni Ajula jwawan'gumbile wanganyammwe kuumila mwa mundu jumpepe (Adam), nijwaawisile kuumila mwa jwalakwejo wankwakwe (Hawa), kuti jutulalileje (jwannume jwalijose) kwa wele (wankwakweo). Sano ndema jaakwaakumbatilaga, akasajigalaga (wammasyetowo) nsigo wakwepepala, ni akasajendagajendaga nao, nambo pati upesile (nsigowo nikusigala panandi kuweleka) wanawawili (walume ni wankwao) akasam’bombaga Allah M'mbuje gwao (kuti): “Naga nkutupa mwanache jwambone (jwalungalunga) chisimu chituwe mu wakutogolela.”

Basi ndema jaakwaapaaga mwanache jwambone (jwalungalunga) akasam'biichilaga Jwalakwe (Allah) wakamusyangana najo pa yajwapele, basi Allah jutalikangene kusyene ni yaakum'bwanganya nayo

Ana akuiwanganya (ni Allah) ichindu yangawa nkugumba chilichose kutendaga yalakweyo ni yayigumbidwa

Soni nganiyiwa ipakombwele kwaakamuchisya wanganyao namuno kulikamuchisya isyeneyo

Soni naga n'di iyyiwilaanjiile ku chongoko nganiiwa inkuyiye (ngati yangali umanyilisi), yalumope kwa jemanja nkuiwilanga kapena gamba kuwa jii

Chisimu ayila yankuilumbanjila kunneka Allah iwele achikapolo mpela wanganyapemmwe, basi ilumbanjilaani soni ni in'janje (pakumpa yankusakayo) nanga nkuwecheta yakuona (yakuti jelejo milungu jisyesyene)

Ana ikwete yalakweyo ngongolo syaikwendela? Kapena ikwete makono gaikamulila? Kapena ikwete meso gaikulolela? Kapena ikwete mawiwi gaikupikanila? Jilani: “Mwawilangani akwawanganya wenu (ni Allah), kaneko ni mundendele malindi mwanti ngasimumba lipesa.”

“Chisimu kaligoselo kangu ni Allah Ajula jwaatulwisye Chitabu (Qur’an), soni Jwalakwe akwagosaga akutenda yambone.”

“Sano ayila yankuilumbanjila kunneka Jwalakwe nganiyiwa ipakombwele kunkamuchisyawanganyammwe namuno kulikamuchisya isyeneyo.”

Soni naga n'di iyyiwilaanjiile ku chongoko nganiiwa ipikene, soni chiyyione ili tananaa kukwenu kutendaga ili ngaikulola

Kamulisyani chikululuko, soni lamulani yambone, ni mwatundumalile ajinga

Soni naga gali gam'bichilile masongono gakusakala kuumila ku shetani, basi lijuyani mwa Allah, chisimu Jwalakwe ni Jwakupikanichisya, Jwakumanyilila nnope

Chisimu awala wali ni woga (wakun'jogopa Allah) pati syakwaiye nganisyo syakusakala kuumila ku shetani, akasankumbuchilaga (Allah), basi ndawi jijojo ni akasasisinukukaga

Nambo achambusanga wao (makafili gagali mashetani gachijini) akwalimbikasyaga (achimakafilio) m’kusokonechela (ni kwajonjechesya ya sambi), soni wangapumulila

Soni naga nganimwaichilila (achimakafilio) ni chisimosimo akasatiji: “Uli ngalipanganyichisya chalakwe?” Jilani: “Chisimu une ngukuya yaikuuwulidwa kukwangu kuumila kwa Ambuje wangu, aji (Qur’aniji) jiwele muli syakuumila kwa M’mbuje gwenu (Allah), soni chongolo ni chanasa kwa wandu waakukulupilila.”

Soni pati jichisoomedwaaga Qur’an, basi jipikanilani ni kujila jii! Kuti ntendeledwe chanasa

Soni mwakolanjeje Ambuje wenu (Allah) mu ntima mwenu, mwakulinandiya, mwa woga ni mwangakwesya malowe, kundawi ni kwigulo, soni ngasim'ba mu waakwaanjila

Chisimu awala (Achimalaika) wali kwa Ambuje wenu wangalikwesya pakuleka kun'galagatila Jwalakwe, ni akunswejesyaga, soni akunsujudilaga Jwalakwe