Yau - Chapter 70 - Al-Maarij

Jwawusisye nkuwusya (mwachipongwe) yailagasyo yakupatikana (kuti: Tiyipatikane chakachi)

Kwa achimakafili pangali jwampaka ayisiwilile

Yakuumila kwa Allah Nsyene Makwelelo

Akasakwelaga Kukwakwe Achimalaika ni Jibulilu jwakwe. (Tiyichipatikana ilagasyoyo) mu lisiku (lya Kiyama) lyalili chipiimo chaulewu wakwe yaka yakwana masausande makumi nsano

Basi pililani kupilila kwambone

Chisimu wanganyao akuiwona (ilagasyoyo) kuti ili kwanaula (yangawa nkupatikana)

Nambo Uwwe tukuiwona kuti ili dusi (kupatikana)

Lisiku lya lichiwa liwunde chisawu ntofu wenyelenyenduche

Nombe matumbi gachiwa chisawu litonji (pa kaululuche kakwe)

Soni nsyowe ngasaja kuwusya ya nsyowe jwakwe

Namuno kuti tachipedwa lipesa lyakuonegana (mwanti mundu nikwaona babagwe, wanagwe ni waulongo, nambo ngasakombola kwawechetekasya namuno kwawenda chikamuchisyo), jwakulewa tachilajila ali aliombwele ku ilagasyo ya lyele lisikulyo pakutola wanagwe

Kwisa soni wankwakwe ni nchimwenegwe

Ni walukosyo lwakwe wawaliji nkunsunga

Ni yosope yayili pachilambo (kupeleka kwa Allah), kut in'jokole

Nambo kwapi! (Nganikuwa kun'jokwele kuliwombola kwakweko), chisimu walakweo ni Moto Wakolela (mwamachili)

Wakusupula mwanakamo lipende lyamuntwe

Uchiwa uli nkum'bilanga mundu jwa wachitundumalile chikulupi ni kunyosya

Ni wasonganganyisye (chipanje) ni kusalasya (mwakusalasya ata Zaka ngatola)

Chisimu mundu agumbidwe kuwa jwakupapamba kusyene (jwangapilila)

Pati impatile yakusakala akasawa jasajasa

Nambo pati impatile yambone akasawa jwaugaga

Ikaweje wakuswali

Awala wanya waakuwa pa swala syao ali nkwendelechela (kusiswaliswali)

Ni awala wamuli nchipanje chao mwana liunjili lyachimanyichile

Lyakumpa nkuwenda ni nkwimidwa jwakwe (ligongo lyakulisiwilila kuwenda)

Ni awala waakwitichisya ya Lisiku Lyamalipilo

Ni awala wanya waakuwa nkuijogopa ilagasyo ya M’mbuje gwao

Chisimu ilagasyo ya M’mbuje gwao nganiyiwa yati kulupuka nayo (mundu jwakusakala)

Ni awala wanya waakuwa ali nkuugosa utukani wao (pangatenda yansese)

Ikaweje kwa achiwammakwao kapena (mateeka) gagapatile magasa gao gakun'dyo; basi chisimu wanganyao (pa yalakweyo) nganawa agambidwe

Nambo watasache yangawaga yele, basi wanganyao niwali wakusumba mpika

Ni awala wanya waakuwa ali nkusunga chenene amana syao kwisa soni ilanga yao

Ni awala wanya waakuwa ali nkwimilichika pakupeleka umboni wao

Ni awala wanya waakuwa ali nkwendelechela kusigosa swala syao (pakusiswaliswali)

Ana chipali chichi kwa awala waakufuulu chaakukangamalila kukwenu (mmwe Muhammadi ﷺ ali atunjile meso)

(Ni kutama) nganyanganya chakun'dyo ni kunchiji (kwenu nambo ningakuuya yankwasalila)

Ana jwalijose mwa jamanjao akukolaga tama janti takajinjisyidwe ku Litimbe Lyachindimba (ku Mbepo)

Ngwamba! Chisimu Uwwe twagumbile wanganyao kuumila mu yaakuimanyilila (gagali mesi)

Basi ngunnumbila M'mbuje jwa kungopoko ni kungapililo kosope (kwa lyuwa, mwesi ni ndondwa), kuti chisimu Uwwe tuwele Wakombola

Kuti twagalausye (nikwikanao wane) wambone kwapunda wanganyao, sonitu Uwwe nganituwa wanti nikupundidwa (ni chilichose)

Basi mwalekani agambeje kuweweta yangali mate ni kupita nching'anda, mpaka chasimangane nalyo Lisiku lyao alila lyaakuwa ali nkupedwa chilanga (cha kwisa kwakwe)

Lisiku lyatachikopokangana m’malembe mwachitema chisawu wanganyao akuutuchila ku (isanamu yao) yaisimichidwe

Meso gao gali gatetewele, kwaluka kuli kwaunichile, lyalakwelyo ni Lisiku alila lyawaliji nkupedwa chilanga (cha kwisa kwakwe)