Back to Languages
Yau - Chapter 71 - Nuh
Translation by Muhammad Bin Abdul Hamid Silika — Permalink
Verse 1 — Surah Nuh 71:1
Chisimu Uwwe twantumisye Nuhu ku wandu wakwe (ni kuntenda kuti): “Mwatetelani wandu wenu nkaniyayichilile ilagasyo yakupoteka nnope.”
Verse 2 — Surah Nuh 71:2
Jwalakwe jwatite: “E wandu wangu! Chisimu une ninkuntetela jwenu jwakuonechela.”
Verse 3 — Surah Nuh 71:3
“Mun'galagatilani Allah ni kun'jogopa soni mumbikanilani une.”
Verse 4 — Surah Nuh 71:4
“Tankululuchile sambi syenu ni kunchelewasya kwikanila ndema jajikolanjidwe (kuwa mbesi ja umi wenu), chisimu ndema ja Allah (jakuwila mundu) pati jiyiche, jangawa nkujichelewasya ingawe mwamanyililaga.”
Verse 5 — Surah Nuh 71:5
Jwalakwe jwatite: “Ambuje wangu! Chisimu une mbele ndili nkwawilanjila wandu wangu chilo ni muusi.”
Verse 6 — Surah Nuh 71:6
“Nambo kuwilanjila kwanguko nganikwajonjechesya (chilichose) ikaweje kutilape.”
Verse 7 — Surah Nuh 71:7
“Soni chisimu une ndema jilijose jimbele ndili nkwawilanjila (Kukwenu) kuti mwakululuchile, awele ali nkuwika yala yao m’mawiwi mwao ni kuliunichilaga nguwo syao, soni awele ali nkuchalila (kutenda makani), ni alikwesisye kulikwesya kusyene.”
Verse 8 — Surah Nuh 71:8
“Kaneka une chisimu nawilanjiile wanganyao mwakunyanyika.”
Verse 9 — Surah Nuh 71:9
“Kaneko chisimu une nagombelesye kukwao, soni ni nasongonele mwaasili.”
Verse 10 — Surah Nuh 71:10
“Basi ni natite: ‘Mum'bendani chikululuko M'mbuje gwenu, chisimu Jwalakwejo juwele Jwakululuka kusyene.”
Verse 11 — Surah Nuh 71:11
“Juntuluchisye wula mwawinji.”
Verse 12 — Surah Nuh 71:12
“Ni jun'jonjechesye chipanje ni wanache, ni kum'bichila migunda, ni kum'bichila soni sulo.”
Verse 13 — Surah Nuh 71:13
“Chipali chichi kukwenu changampela Allah uchimbichimbi (pakun'galagatila Jwele Jikape)!”
Verse 14 — Surah Nuh 71:14
“Kutendaga pamasile pan'gumbile mu kawe kakulekangana-lekangana kane panyuma pa kane!”
Verse 15 — Surah Nuh 71:15
“Ana ngankuyiona yatite kagumbe Allah mawunde nsano nagawili mwakusajikanya?”
Verse 16 — Surah Nuh 71:16
“Ni auwisile mwesi mwalakwemo kuwa lilanguka, ni aliwisile lyuwa kuwa nyali?”
Verse 17 — Surah Nuh 71:17
“Soni Allah ammesisye (pakun'gumba) kuumila mwitaka mwammela.”
Verse 18 — Surah Nuh 71:18
“Kaneka tachim'buchisya m’momo (panyuma pakuwa), ni kwisa kunkoposya mwanakamo (pa Kiyama).”
Verse 19 — Surah Nuh 71:19
“Soni Allah am'biichiile litaka kuwa chakutandika.”
Verse 20 — Surah Nuh 71:20
“Kuti n'jendejejendeje palakwepo m’matala gakusapanguka.”
Verse 21 — Surah Nuh 71:21
Nuhu jwatite: “Ambuje wangu! Chisimu wanganyao anyosisye une, ni ankuyiye ajula jwangawa nkun'jonjechesya chipanje chakwe ni wanache wakwe (chilichose) ikaweje kupelelwape.”
Verse 22 — Surah Nuh 71:22
“Ni atesile malindi gamakulungwa nnope.”
Verse 23 — Surah Nuh 71:23
“Soni awele ali nkuti: ‘Ngasinneka (galagatila) milungu jenu ata panandi, ngasinnogwa kwaleka Awadda, Asuwa'a, Ayagh'utha, Aya’uka ni Anasra.”
Verse 24 — Surah Nuh 71:24
“Soni wanganyao pamasile pawasokonesye (wandu) wajinji, ni ngasimwajonjechesya wakulitenda lupuso (chine chakwe) ikaweje kupotelape.”
Verse 25 — Surah Nuh 71:25
Ligongo lya ilemwa yao wamisyidwe (m’mesi) ni kwinjisyidwa ku Moto, soni nganansimana jwalijose jwanti ni kwakulupusya jwangawaga Allah
Verse 26 — Surah Nuh 71:26
Soni Nuhu jwatite: “Ambuje wangu! Ngasimunneka pa chilambo pano ata jumo mwa makafiliwa.”
Verse 27 — Surah Nuh 71:27
“Chisimu Mmwe naga nkwaleka wanganyao tawe ali nkwasokonesya achikapolo Wenu, soni wanyao ngawa nkuweleka (mwanache jwambone) ikaweje jwakusakasya nnope, jwakanila kusyene.”
Verse 28 — Surah Nuh 71:28
“Ambuje wangu! Mungululuchilani une ni achinangolo wangu, ni jwalijose jwaajinjile m’nyumba mwangu ali jwakulupilila, kwisa soni wakulupilila wachilume ni wachikongwe (wosope), ni ngasimwajonjechesya wakulitenda lupuso (chine chakwe) ikaweje chonasikope.”