Yau - Chapter 76 - Al-Insan

Ana nganijipita kwamundu mbinga jelewu ja ndawi nkanawe kuwa chindu chanti ni kusalidwa

Chisimu Uwwe tun'gumbile mundu kuumila mwindondwa lyakuwanganyichilana (lya mesi ga walume ni wakongwe), kuti tun'dinje (ni malamusi Getu), ni tuntesile kuwa jwakupikana, jwakulola

Chisimu Uwwe tunsaalichiisye jwalakwejo litala (lyambone ni lyakusakala, sano ili ni nsyene) kuwa jwakutogolela (pakusagula lyambonelyo) kapena kuwa jwakanila (pakusagula lyakusakala)

Chisimu Uwwe twalinganyichisye achimakafili malundelunde ga unyolo, ni makongwa kwisa soni Moto Wakulapuka

Chisimu atenda ngoto chakamweje chipanda (chankologo) chakuwanganyichisya chakwe (nkologowo) chigakaweje (mesi ga) Kaafuura

(Kaafuurajo ni) tutumule jwachakamwejemo achikapolo wa Allah, chakam'bumyeje (palipose pachakasacheje) kaumye kangasausya

(Wanganyao ni awala) waakukwanilisya nasili (syao), soni ni akulijogopa Lisiku lya ichiwa yakusakala yakwe yakwenela

Ni akutolaga yakulya - achiisakaga - kwapa masikini, jwawina ni mateeka

(Chamuntima akutiji): “Chisimu tukun'diisya pakusachilila chinonyelo cha Allah, ngatukusaka kukwenu malipilo galigose namuno kutogolela.”

Basi Allah tachagosa kuyakusakala ya lyele lisikulyo ni kwapa kumelemenda (kungope kwao) ni kusengwa

Soni tachalipila ligongo lya kupilila kwao Litimbe lya ku Mbepo kwisa soni nguwo sya silika

Ali ajegeme kwalakweko nyyindanda yetandiche chenene, ngaaja kuchiona chitukuta cha lyuwa namuno mbepo ja chikweenya

Soni miulili jakwe chijikaawandichile wanganyao, ni mikonga (ja isogosi) chijikagoyeche kwakwalala (yanti konyola chitamile)

Soni chiikaweje ili nkwasyungula ikolelo ya silifa kwisa soni migawo jegalasi

Jegalasi (jagumbidwa) kuumila mu silifa, chakajipimileje (pakujigumbasya) kapimile kambone (kakulandana ni njota jao, ngapelembechesya soni ngajonjechesya)

Ni chakamwesyedweje kwalakweko chipanda (chankologo) chakuwanganyichisya chakwe (nkologowo) chichikawe (mesi ga) chikasu

(Jwalakwejo ni) tutumule jwajuli kwalakweko jwakuwilanjikwa Salsabila

Soni chaakaasyunguleje wanganyao (pakwaatumichila) achachanda wakutamilichika (pa uchanda, wangachekulupa). N'di mwaweni wanganyao mpaka mwaganichisye kuti ngalekale syakumelemenda nnope syemwasyidwe

Soni patinchilola kwalakwe (ku Mbepoko) tinchiuona ntendele wakusengwasya ni uchimwene wekulungwa

Pachanya pao chipakawe pana nguwo sya silika jwakuwewela syachisamba kwisa soni nguwo sya silika jwakandapalila. Soni chakawechedwe makosa ga silifa, nombe soni M’mbuje gwao (Allah) chijukaamwesye wanganyao yakumwa yakulenjela kusyene

(Chakasalilidwe kuti): “Chisimu galakwega gawele malipilo genu, soni masengo genu gawele gakupocheledwa.”

Chisimu Uwwe tujitulwisye kukwenu (mmwe Muhammadi ﷺ) Qur’an kujitulusya kwapanandi panandi (kuti n'jisunje chenene)

Basi pililani ni lilamusi lya Ambuje wenu (Allah) ni ngasimumpikanila mwa wanganyao jwasambi kapena jwakanila (jwalijose)

Soni likumbuchilani lina lya Ambuje wenu kundawi ni kwigulo (pakuswali swala sya Fajr, Dhuhr ni Asr)

Soni chilo munsujudilani (pakuswali swala sya Maghrib ni Isha), ni munswejesyeje chilo ndema jelewu

Chisimu wanganyawa akunonyelwa umi wachitema (wa duniya), ni akulileka munyuma mwao Lisiku lya usito

Uwwe ni watwaagumbile wanganyao soni twaliyiye kagumbidwe kao, soni tuli tusachile mpaka tuiche nao wane wanti mpela wanganyao kwinjila m’malo mwao (nambo ali wakun'jogopa Allah)

Chisimu galakwe (ma Ayaga) gawele chikumbusyo, basi jwaakusaka aliikolochesye chilepe litala lyakuujila kwa M'bujegwe (Allah)

Ni nganim'ba nsachile wanganyammwe ikaweje akasache kaje Allah, chisimu Allah awele Jwakumanyilila nnope, Jwalunda lwakusokoka

Taakan'jinjisye jwansachile ku ukoto Wakwe (ku Mbepo), nambo wakulitenda lupuso walinganyichisye ilagasyo yakupoteka nnope