Back to Languages

    Achinese - Chapter 54

    Translation by Tgk. H. Mahjiddin Jusuf

    Verse 1

    Ka toe that watee teuka kiamat Buleun di langet taeu ka beukah

    Verse 2

    Teuma di jih dum ‘oh jieu ayat Jipaleng ligat sira jipeugah Nyan keubit sihe teuka lom laju

    Verse 3

    Jikkheun paleusu kon nibak Allah Peuturot napsu di jih dum meuhat Teuma ka teutap putosan Allah Bandum ka teutap putosan Tuhan

    Verse 4

    Ubak awaknyan ka lheuh geupeugah Haba peutakot soe nyang buet dacha

    Verse 5

    Hikeumat raya peunteng that leupah Teuma peuingat hana meuguna

    Verse 6

    Bah meunan teuma di jih lam salah Uroe nyan teuka ureueng jak meuhoi Bandum geumeuhoi jak keunoe bagah Haro-hara that jinoe ka teuka

    Verse 7

    Khuchu‘ dum mata teumakot leupah Teubiet lam uruek dum lagee daruet Ka meuruet atuet le han ban peugah

    Verse 8

    Bak ureueng jihoi jiplueng meuree-ree Kaphe dum teuntee leupah that susah Jikheun le kaphe uroe nyan meuhat Tanyoe meukarat hanaban peugah

    Verse 9

    Kawom Noh dilee nibak awak nyan Jikheun sulet nyan peue nyang Noh peugah Hamba Kamoe nyan jikheun ka gila Bek le that haba jiyue top babah

    Verse 10

    Teuma geulakee ubak Po gopnyan Neubri beu meunang lon nyoe ka kalah

    Verse 11

    Kamoe peuhah treuk dum pinto langet Te raya that-that laju meuruah

    Verse 12

    Bandum mata ie nyang na di bumoe Teupanca jinoe meulimpah-limpah le nyang di langet ngon nyang di bumoe Meusapat jinoe le han ban peugah Jeut treuk keu tophan teuma raya that Kheundak Hadharat han ek soe teugah

    Verse 13

    U dalam kapai meupeuek gopnyan Papeun ngon labang ka meurok sudah

    Verse 14

    Teuma meujaga ngon mata Kamoe Jijak kapai nyoe teuma le bagah Meunan keuh balah meubri keu gopnyan Nyang geuba iman deungon ikheulah Teuma jikaphe peue nyang gopnyan ba

    Verse 15

    Jeut treuk keu tanda nyan Kamoe keubah Teuma na soe cok nyan keu peuingat

    Verse 16

    Pakriban azeub keu jih Lon balah Nyan keuh dum ka troh nyang geupeuingat

    Verse 17

    Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah

    Verse 18

    Meunoe pih sulet jipeugah le ‘Ad Pakriban azeub keu jih Lon balah Nyan keuh dum ka troh nyang geupeuingat

    Verse 19

    Angen guncang that meukirem bagah Bak uroe ħahas keu jih ceulaka Buet angen raya guncang that leupah

    Verse 20

    Jibot jibapo dum manusia Meutimpa-timpa mate dum reubah Sang bak kureuma reubah dum teubot

    Verse 21

    Pakriban azeub keu jih Lon balah Nyoe keuh dum ka troh nyang geupeuingat

    Verse 22

    Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah

    Verse 23

    Meunan pih Tsamud jipeugah sulet Haba peuingat jikheun beurakah

    Verse 24

    Jikheun peue tanyoe tajak ikot jih Geutanyoe ngon jih kon saban leupah Jih sidroe insan lam kawan tanyoe Taikot jih nyoe sisat ngon salah Pungo that tanyoe nyang taikot jih

    Verse 25

    Ek mungken bak jih geujok risalah Lam kawan tanyoe kon le soe laen Sulet mbong jih nyan peue jijak peugah

    Verse 26

    Singoh jiteupue watee geubangket Si mbong ngon sulet raya beurakah

    Verse 27

    Meukirem unta ujian keu jih ; Taluem treuk buet jih pakriban ulah Tasaba taeu pakriban buet jih

    Verse 28

    Lom takheun bak ie beu jikeubah Nyang ladom keu jih ladom keu unta Jijep dum rata meusiblah-siblah

    Verse 29

    Jihoi treuk rakan jiyue top unta

    Verse 30

    Pakri jirasa azeub Lon balah Nyoe keuh dum ka troh nyang geupeuingat

    Verse 31

    Geulanteue meuhat meukirem bagah Sigo grum jitak jih le geulanteue Abeh meusiseue mate dum reubah Lagee naleueng tho bandum ka teupat

    Verse 32

    Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah

    Verse 33

    Kawom Nabi Luth pih jikheun sulet Haba peuingat jikheun beurakah

    Verse 34

    Kamoe rhom treuk jih dum deungon batee Abeh treuk pade mate dum reubah Ahli Nabi Luth meukeubah mantong Bak akhe malam dum Kamoe peuglah

    Verse 35

    Nikmat bak Kamoe keu soe nyang chuko Sidumnan keuh le nyang Kamoe balah

    Verse 36

    Geupeuingat jih keu azeub Kamoe Tapi awak nyoe chok jih dum leupah Han jitem pateh ‘oh geupeuingat

    Verse 37

    Jamee geuh jeh pat di jih jipeugah Tabri keu Kamoe nyan jamee gata Meupleu treuk mata jih bandua blah Rasa treuk jinoe mata keuh buta Azeub Lon sit ka dilee geupeugah

    Verse 38

    ‘Oh beungoh singoh teuka le azeub Keu jih nyan teutap hana soe peuglah

    Verse 39

    Rasa treuk jinoe pakri azeub Lon Dilee atra nyan sit ka geupeugah Bandum nyan dilee ka geupeuingat

    Verse 40

    Qur'an pih that Kamoe peumudah Jeut nyan keu dike ingat keu Tuhan Teuma na soe nyan jitueng phaedah

    Verse 41

    Kawom Peuraʻun pih geupeuingat

    Verse 42

    Jikheun sulet that peue nyang geupeugah Ayat Kamoe dum jipeugah sulet Meu Kamoe azeub treuk jih dum bagah Mangat jiteupue Kamoe Perkasa Keubit kuasa hana ban peugah

    Verse 43

    Boh nyan dum kaphe nyang rakan gata Ek got jih teuma hana meusalah Ek leubeh got jih nibak ureueng nyoe Gata pih dum nyoe peue na soe peuglah Han keunong azeub gata ka teuntee Lam kitab dilee peue na geupeugah

    Verse 44

    Atawa jìkheun dum le awaknyan Kamoe nyoe meunang han sagai kalah

    Verse 45

    Bandum jih talo jiplueng jisurot

    Verse 46

    Tapi kiamat cit troh le bagah Ka Iheuh geujanji bak jih kiamat Nyang leubeh dahcat ngon phet sileupah

    Verse 47

    Awak meudacha nyang dalam sisat Di jih dum teumpat lam apui mirah

    Verse 48

    Uroe nyan geuhoi jih lam nuraka Geupeugom muka jih keunan bagah Karasa jinoe teupeh nuraka

    Verse 49

    Bandum peukara ka meuboh batah Nyang Kamoe peujeut Kamoe boh kada

    Verse 50

    Buet Kamoe teuma leupah that bagah Ek keumah dalam seukeujap mata

    Verse 51

    Dum awak gata takalon sudah Padumna le jih meupeubinasa Teuma soe ek na nyang tueng phaedah

    Verse 52

    Peue nyang jipubuet ka na lam kitab

    Verse 53

    Bandum geusurat teuma geukeubah Ubit ngon rayok salah ngon beuna

    Verse 54

    Soe nyang takwa nyan nyang meutuah Ureueng nyan bandum asoe churuga Ie krueng churuga harok teuh leupah

    Verse 55

    Bak teumpat nyang jroh beuna bak Tuhan Kuasa Tuhan beuna ban peugah