Afrikaans - Chapter 15

Alief, Laam, Raa.1 Dít is die verse van die Boek, en van ’n Qur’ãn wat verduidelik

Dikwels sal die ongelowiges wens dat hulle Moesliems was

Laat hulle eet en hulself vermaak, en laat valse hoop hulle bedrieg, want hulle sal weldra beter weet

En nooit het Ons ’n stad verwoes nie, of die besluit daartoe is eers bekend gemaak

Geen volk kan hulle lot bespoedig nie, ook kan hulle dit nie vertraag nie

En hulle sê: O, jy aan wie die vermaning geopenbaar is! Jy is voorwaar besete

Waarom bring u ons nie die engele nie, as u opreg is

Ons stuur geen engele nie behalwe met die waarheid, en dan sou geen uitstel aan hulle verleen word nie

Voorwaar, Ons het die Vermaning geopenbaar, en Ons is gewis die Bewaker daarvan

En vóór u het Ons reeds boodskappers na die volkstamme van die ou tyd gestuur

En daar het nooit ’n boodskapper na hulle gekom nie, of hulle het hom bespot

So laat Ons dit die harte van die misdadigers binnedring

hulle glo nie daarin nie, hoewel hulle weet wat met die ou volkere gebeur het

En al sou Ons ook ’n deur na die hemel vir hulle oopmaak, en hulle styg aanhoudend daarin op

sou hulle sê: Ons oë was slegs beneweld, of liewers: Ons was betower

En voorwaar, Ons het groot sterre in die hemel geplaas, en Ons het dit is aanloklik gemaak vir wie dit aanskou

En Ons beskerm dit teen elke vervloekte duiwel

Maar indien iemand steelsgewys luister, sal ’n helder vlam hom navolg

En Ons het die aarde uitgesprei en magtige berge daarop geplaas, en Ons laat geskikte plante daarop groei

En Ons het daar lewensmiddele geplaas vir julle en vir diegene wie julle nie onderhou nie

En daar is niks waarvan die seëninge nie by Ons berus nie, en Ons stuur dit slegs in bekende mate af

En Ons stuur bevrugtende winde, en daarna stuur Ons water neer uit die wolke, en gee dit vir julle om te drink, en dit is nie julle wat dit opgaar nie

En voorwaar, dit is Ons wat die lewe gee en die dood veroorsaak, en Ons is die Erfgename

En sekerlik weet Ons wie van julle vooruitgaan en nie agterbly nie

Voorwaar, sy Heer sal hulle almal bymekaar bring. Waarlik, Hy is Allerwys, Alleswetend

En gewis het Ons die mens uit klei geskape, uit veranderde modder in ’n patroon gevorm

En die djien het Ons voorheen uit rooklose, vlammende vuur geskape

En toe u Heer die engele toegespreek het: Ek gaan die mens uit klei skep, uit veranderde modder in ’n patroon vorm

Wanneer ek hom daaruit gevorm en My gees in hom geblaas het, prostreer dan voor hom

Die engele het almal saam geprostreer

maar net Iblies nie; Hy het geweier om saam met die onderdaniges te wees

Hy het gesê: O Iblies! Waarom is jy nie saam met die onderdaniges nie

Hy het geantwoord: Ek gaan my nie aan die mens wat U uit klei geskape het, en uit veranderde modder in ’n patroon gevorm het, prostreer nie

Hy het gesê: Gaan dan weg hiervandaan; u is vervloek

En voorwaar, My vloek sal op u rus tot op die Oordeelsdag

Hy het gesê: My Heer! Skenk my dan uitstel tot op die Dag wanneer hulle opgewek sal word

Hy het gesê: Aan u word uitstel verleen

tot die Dag van die aangewese tyd

Hy het gesê: My Heer! Aangesien U my as dwalende veroordeel het, sal ek die bose aantreklik aan hulle voorstel, en ek sal veroorsaak dat hulle afdwaal

behalwe U dienaars tussen hulle, die gesuiwerdes

Hy het gesê: Dit is die regte weg wat na My lei

Wat my dienaars betref, u het geen gesag oor hulle nie, behalwe die dwalendes wat u volg

En die Hel is voorwaar die beloofde plek vir hulle almal

Dit het sewe deure. Vir elke deur is ’n vasgestelde klas (sondaar)

Voorwaar, hulle wat bewus is van Allah, sal middein tuine en fonteine wees

Betree dit in vrede en veiligheid

En Ons sal alle bitterheid en wraak uit hulle harte uitroei, en as broers op verhewe trone sal hulle teenoor mekaar sit

Vermoeidheid sal hulle daarin nie aantas nie, ook sal hulle nie daaruit verdryf word nie

Stel My dienaars in kennis dat Ek die Vergewensgesinde, die Barmhartige, is

en dat My straf ’n pynlike straf is

En stel hulle in kennis van die gaste van Abraham

Toe hulle by hom binnegetree het, het hulle gesê: Vrede! Hy het geantwoord: Ons vrees julle

Hulle het geantwoord: Moenie vrees nie; ons bring u die goeie tyding van ’n seun wat baie kennis en wysheid sal besit

Hy het gesê: Bring julle my goeie nuus terwyl die ouderdom my reeds ingehaal het? Waarom gee julle my dan dié nuus

Hulle het gesê: Ons bring ’n blye tyding met waarheid; wees u dan nie een van die wanhopiges nie

Hy het gesê: Wie anders wanhoop aan die genade van Sy Heer, behalwe die dwalendes

Hy het gsê: Wat is julle taak dan, o boodskappers

Hulle het geantwoord: Ons is na ’n misdadige volk gestuur

Behalwe die volk van Lot. Ons sal hulle almal red, met die uitsondering

van sy vrou. Ons het verorden dat sy voorwaar met die agtergeblewenes sal wees

En toe die boodskappers by die volgelinge van Lot gekom het

en hy gesê het: Waarlik, julle is onbekendes

het hulle geantwoord: Nee, ons kom na u met dít waaroor hulle twyfel

en ons bring aan u die waarheid. U kan ons glo

Vertrek daarom met u volgelinge gedurende die nag, en bly altyd in hul agterhoede. En moenie dat iemand omkyk nie, en gaan waarheen julle beveel word

En Ons het dit aan hom bekend gemaak dat die wortels hiervan in die oggend afgesny sal word

En toe die inwoners van die stad jubelend nader gekom het

het hy gesê: Hulle is my gaste; moenie my in die skande steek nie

en vrees Allah, en moet my nie in die skande steek nie

Maar hulle het geantwoord: Het ons julle nie belet om iemand te herberg nie

Toe het hy gesê: Hier is my dogters, as julle dan iets wil doen

Waarlik, hulle het blindelings gedwaal

En teen sonop het die straf hulle oorval

Ons het die stad omgekeer en harde klippe daarop laat reën

Waarlik, hierin is tekens vir hulle wat uit die lot van ander ’n les wil leer

En dit is ’n weg wat nog begaanbaar is

Voorwaar, hierin is ’n teken vir die gelowiges

En die Bewoners van die Woud was net so sondig

Daarom het Ons ook húlle getref ~ En hierdie plekke lê albei aan die grootpad

En die Bewoners van die Rots3 het waarlik die boodskappers verloën

En Ons het Ons tekens aan hulle oorgedra, maar hulle het die rug daarop gedraai

En hulle het wonings van veiligheid in die berge uitgekap

en tog het die straf hulle in die môre oorval

En wat hulle verwerf het, het hul niks gebaat nie

En Ons het die hemele en die aarde en alles wat daartussen is, met die waarheid geskape. En die Uur sal gewis kom; wees daarom sagmoedig

Voorwaar, u Heer ~ Hy is die Skepper, die Alleswetende

En Ons het waarlik aan u die sewe herhaalde verse en die verhewe Qur’ãn gegee

Staar u oë nie moeg na wat Ons aan sommige groepe gegee het om van te geniet nie, en treur ook nie oor hulle nie, en wees sagmoedig teenoor die gelowiges

En sê: Voorwaar, ek is die waarskuwer

Ons het ook boodskappers gestuur na hulle wat die eed afgelê het

en na hulle wat die Qur’ãn wou opdeel

By u Heer! Ons sal hulle almal gewis ondervra

oor wat hulle gedoen het

Verkondig daarom openlik wat u beveel word, en draai weg van die heidene af

Ons bied u voldoende beskerming teen die spotters

wat ander gode met Allah vereenselwig ~ Maar weldra sal hulle dit te wete kom

En Ons weet ook dat u hart benoud word oor wat hulle sê

Verheerlik u Heer met die lof wat Hom toekom, en wees saam met hulle (wat voor hul Heer) prostreer

En dien u Heer tot op die tyd van u afsterwe