Fulah - Chapter 26 - Ash-Shuara

Taa, Siin, Miim

Ɗen ko Aayeeje Deftere ɓanngunde nden

Belajo'o an a tampiniray hoore maaɗa kin fii ɓe laataaki gomɗinɓe

Si Men Muuyii Men jippinay e maɓɓe immorde ka kammu Aaya daaɗe maɓɓe ɗen ñalla ko ɗe yankinaniiɗe mo

Arataa e maɓɓe waaju immorde ka Hinnorante On fuɗɗaangu si wanaa ɓe laatike ɗuuriiɓe ngu

Gomɗii ɓe fennii aroyay e maɓɓe kabaruuji ko ɓe laatinoo koɓe jalkitano

Enee, ɓe yi'aali faade e leydi ndin, no foti hewde ko Men fuɗini e mayri immorde e kala noone tedduɗo

Pellet, wonii e ɗum [ko jaŋtaa ɗoo] Aaya, ɓurɓe heewuɓe e maɓɓe laataaki gomɗinɓe

Pellet, Joomi maaɗa ko Kanko woni Tedduɗo Yurmeteeɗo On

Jaŋto tuma nde Joomi maaɗa noddunoo Muusaa, ɗum woni aru e yimɓe tooñooɓe ɓen

Yimɓe Fir'awna, kaa on hulataa

O maaki: "Joom am , min miɗo huli wata ɓe fennam

Ɓernde am nden ɓittoo hara ɗemngal am ngal wellitaaki, awa Nulu Haaruuna

No woodani ɓe e dow am bakkaatu miɗo huli fii wata ɓe waram

O Daali: "Wanaa non, yahee onon ɗiɗo, Menɗen wonndi e mooɗon ko Men heɗiiɓe

Aree ka Fir'awna wi'on: "Menen dey ko men Nulaaɓe Jooma winndere nden

Ɗum woni accitu ɓiɗɓe Isra'iila ɓen wonndude e amen

O wi'i: "Enee, men ne'aano ma ka amen ɗoo hari ko a boobo, ñiiɓuɗaa ka amen ɗoo duuɓi e ngurndam maaɗam

Golluɗaa gollal maaɗa ngal gollunoɗaa ngal, an ko e yedduɓe ɓen jeyaɗaa

O maaki: "Mi waɗii ɗum, ontuma hara min ko mi jeyaaɗo e majjuɓe ɓen

Mi dogi on, tuma nde mi hulunoo on, Joomi am okkin mi Ganndal O waɗin mi jeyaaɗo e Nulaaɓe ɓen

Ɗum ko neema mo wajitirtaa mi ɗum, fii a maccinɗinii ɓiɗɓe Israa'iila ɓen

Fir'awna wi'i: " Ko hommbo jeyi winndere nden

O maaki: "Ko Jooma kammuuli ɗin e leydi ndin e ko woni kon hakkunde majji, si on laatike yananaaɓe

O wi'ani ɓen wonuɓe banŋe makko: "Enee; on heɗataako

O maaki: "Joomi mooɗon e Jooma baabiraaɓe ardiiɓe ɓen

[Fir'awna] wi'i: "Pellet, Nulaaɗo mooɗon on Nulaaɗo faade e mooɗon ko o feetuɗo

O maaki: "Ko Jooma funnaange e hirnaange e ko woni kon hakkunde majji, si on laatike hakkilooɓe

[Fir'awna] wi'i: "Mi woondii si jogitike reweteeɗo tanaa am, mi waɗete jeyaaɗo dummbaaɓe ɓen

O maaki: "Enee, hay si mi addanii ma huunde ɓanngunde

[Fir'awna] wi'i: "Awa addu ɗum, si tawii ko e goongu ɓen jeyaaɗaa

O werliiii tuggordu makko ndun, jaka ko ndu biidaande(ngoolwa) ɓannguba

O yaltini junngo makko ngon, jaka yoo ko ngo rawnungo wonannde ndaarooɓe ɓen

[Fir'awna] wi'ani mbatu ngun fee makko: "Pellet, ooɗoo ko mbileejo heewuɗo ganndal

Himo faandii yaltinirgol on ka leydi mooɗon mbilewu makko ngun. Ko hunɗun yamirɗon

Ɓe wi'i : "Nennu mo e musiɗɗo makko on, nulaa e ca'e ɗen mooɓooɓe (mbile)

Ɓe addane kala mbileejo annduɗo

Mbileeɓe ɓen mooɓaa fii fodoore ñalaande anndaande

Yimɓe ɓen wi'anaa: "Taw si onon ko on mooɓike(ndenndi)

Belajo'o menen men jokkay mbileeɓe ɓen, si ɓe laatike ko kamɓe woni fooluɓe ɓen

Tuma nde mbileeɓe ɓen arunoo; ɓe wi'ani Fir'awna: "Enee, hara no woodani men njoɓdi si tawii ko men woni fooluɓe ɓen

O wi'i : "Eyyo, haray ontuma on jeyaama e ɓaɗtinaaɓe ɓen

Muusaa maakani ɓe: "mbeddee, ko werloton kon

Ɓe liɓi ɓokkoy maɓɓe koy e cawoy maɓɓe kon, ɓe wi'i: "Sabu teddungal Fir'awna, ko menen woni foolooɓe ɓen

Muusaa werlii tuggordu makko ndun, tawi kayru hindu moɗa ko ɓe fefindii kon

Mbileeɓe ɓen suuyi ɓe sujji

Ɓe wi'i : "Men gomɗinii Jeyɗo Winndere nden

Jeyɗo Muusaa e Haaruuna

[Fir'awna] wi'i: "Enee, on gomɗinay mo, ko adii mi duŋanaade on? Pellet, ko kanko woni mawɗo mooɗon anndinɗo on on mbilewu ngun, kono aray anndon, mami taƴu juuɗe mooɗon e koyɗe mooɗon [taƴa] luutindira. Mami fetu on, on fow mooɗon

Ɓe wi'i: "Tanaa alaa, menen ko faade ka Joomi amen men ruttotoo

Menen meɗen tamƴinii nde Joomi amen yawtani men goopi amen ɗin,tawde men laatike adiiɓe gomɗinnde ɓen

Men Wahayini faade e Muusaa: "Ɗum woni roƴidu e jeyaaɓe Am ɓen. Pellet, onon ko on jokkiteteeɓe

Fir'awna nuli ka ca'e mooɓooɓe

[O wi'i:] Pellet, ɓee ko ɓe mojobun pamarun

Pellet, kamɓe hiɓe tikkinnde men

Enen non en fow ko en rentiiɓe

Men yaltini ɓe immorde e gese e canɗi

E ngaluuji e ñiiɓirde teddunde

Ko wano nii, Men ronini ɗum ɓiɗɓe Israa'iila ɓen

Ɓe jokkiɓe ka puɗal

Tuma nde jamaaji ɗin ɗin yi'ndirnoo, yimɓe Muusaa ɓen wi'i: "Enen en hewtoyte

O maaki: "Ɗum waɗataa, pellet, Joomi am no wonndi e am O fewnay lam

Men Wahayini e Muusaa, ɗum woni piyir tuggordu maaɗa ndun maayo ngon, ngo seekii seekol kala seekol na foti e tulde mawnde

Men ɓanni ton heddiiɓe ɓen

Men danndi Muusaa e wonnduɓe e makko ɓen fow maɓɓe

Refti Men yooli heddii ɓe ɓen

Pellet, wonii e ɗum [ko jaŋtaa ɗoo] Aaya, ɓurɓe heewude e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Janngan ɓe kumpital fii Ibraahiima

Tuma nde o wi'annoo ben makko e yimɓe makko ɓen; ko honɗum rewoton

Ɓe wi'i: "Meɗen rewude sanamuuji, men ñallay ufinanaade ɗi

O maaki: "Yalli hiɗi nanana on, nde noddoton

Kaa hiɗi nafa on maaɗum ɗi lorra on

Ɓe wi'i: "Ko woni, men tawii baabiraaɓe amen ɓen konii ɓe golliraynoo

O maaki: "Enee, on yi'ii kon ko wonuɗon e rewude

Onon e baabiraaɓe mooɗon adinooɓe ɓen

Pellet, kamɓe ko ɓe ayɓe am, si wanaa Jooma winndire nden

On Taguɗo lam, ko Kanko fewnata lam

On ko Kanko ñamminta lam O yarnan-mi

Si mi nawnii, ko Kanko sellinta lam

E On warayɗo lam refti O wurnitan mi

On Mo mi tamƴinii kadi nde O yaafatoomi goopi am ɗin Ñalnde [njoɓdi] Diina kan

Joomam, okkam Ganndal wattidaa mi e moƴƴuɓe ɓen. @Corrected

Waɗanaa lam ɗemngal goongungal ka sakkitiiɓe ɓen

Waɗaa mi jeyaaɗo e ronooɓe Aljanna Neemaaji ɗin

Yawtanaa baaba am, pellet, kanko o laatinoke jeyaaɗo e majjuɓe ɓen

Wata A hersinoyam Ñalnde ɓe Immital

Ñalnde nde jawdi e ɓiɗɓe nafataa

Si wanaa on arduɗo ka Alla e ɓernde hisunde

Aljanna on ɓatinanee hulooɓe Alla ɓen

Jahiim ngen feññinanee bewɓe ɓen

Ɓe wi'nee: "Honto woni ko laatinoɗon kon hiɗon rewa

Gaanin Alla? Taw si ɗi wallay on maaɗum ɗi wallay hoore majji

Ɓe hippee e nder magge kanɓe e bewɓe ɓen

E konnuuji ibliisa ɗin ɗi fow majji

Ɓe wi'i tawi kamɓe hiɓe wennjondira nder ton

Men woondirii Alla, men woniino e nder majjere ɓanngunde

Tuma nde men fonnunoo on e Jooma winndere nden

Majjinaali men si wonaa bonɓe ɓen

Alanaa men tefooɓe

Wanaa kadi giɗo ñallamɓereejo(tigi tigi)

Sinndo no woodannoo men rutteede, men laatoo jeyaaɓe e gomɗinɓe ɓen

Pellet, wonii e ɗum [ko jaŋtaa ɗoo] Aaya, ɓurɓe heewuɓe e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Yimɓe Nuuhu ɓen fenni Nulaaɓe ɓen

Tuma nde Nuuhu musiɗɗo maɓɓe on wi'annoo ɓe: "Enee, on hulataa [Alla]

Min dey, ko mi Nulaaɗo e mooɗon hoolaaɗo

Hulee Alla ɗoftoɗon mi

Mi toraaki on e dow ɗum njoɓdi, njoɓdi am ndin fawaaki si wanaa Jooma winndere nden

Hulee Alla ɗoftoɗon mi

Ɓe wi'i: "Enee, hara men gomɗinte, jaasuɓe ɓen no jokkumaa

O maaki: "Ko honɗum woni ganndal am e ko ɓe wonunoo e gollude

Hasboore maɓɓe nden fawaaki si wanaa e Joomi am, sinndo hiɗon so'aynoo

Min mi wonaali raɗotooɗo gomɗinɓe ɓen

Min mi wonaali si wanaa jertinoowo ɓannguɗo

Ɓe wi'i: "Men woondii si a accaali an Nuuhu, ma a laato sanne jeyaaɗo e rajmeteeɓe ɓen

O maaki: "Joom am, pellet, yimɓe am ɓen ɓe fenni lam

Ñaawu hakkunde am e maɓɓe ñaawoore, danndaa mi e ɓen wonnduɓe e am jeyaaɓe e gomɗinɓe ɓen

Men danndi mo e ɓen wonnduɓe e makko ka nder laana ƴoltiika(loowaaka)

Refti Men yooli ɓaawo [maɓɓe] heddiiɓe ɓen

Pellet, wonii e ɗum [ko jaŋtaa ɗoo] Aaya, ɓurɓe heewude e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Aadinkooɓe ɓen fenniino Nulaaɓe ɓen

Tuma nde Huudu musiɗɗo maɓɓe on wi'annoo ɓe: "Enee, on hulataa [Alla]

Min dey, ko mi Nulaaɗo e mooɗon hoolaaɗo

Hulee Alla ɗoftoɗon mi

Mi toraaki on e dow ɗum njoɓdi, njoɓdi am ndin fawaaki si wanaa Jooma winndere nden

Enee, on mahay maande e kala tulde hiɗon fija

Jogitoɗon kuɓeeje a wi'ayma onon ko on luttinteeɓe [ka aduna]

Si on jaggitii, janggiton ko ndunndarankooɓe

Hulee Alla ɗoftoɗon mi

Hulee On ɓeydirɗo on ko annduɗon

O ɓeydiri on neemoraaɗi e ɓiɗɓe worɓe

E gese e canɗi

[O maaki] min dey, miɗo hulani on Lepte Ñalaande mawnde

Ɓe wi'i: "No fotana men ter, si a waajike maaɗum si a laataaki jeyaaɗo e waajotooɓe ɓen

Pellet, ɗum wonaali si wanaa jikku adinooɓe ɓen

Menen men wonaali leptoyteeɓe

Ɓe fenni mo, Men halki ɓe. Pellet, wonii e ɗum [ko jaŋtaa ɗoo] Aaya, ɓurɓe heewude e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Samuudinkooɓe ɓen fenniino Nulaaɓe ɓen

Tuma nde Saalihu musiɗɗo maɓɓe on wi'annoo ɓe: "Enee, on hulataa [Alla]

Min dey, ko mi Nulaaɗo e mooɗon hoolaaɗo

Hulee Alla ɗoftoɗon mi

Mi toraaki on e dow ɗum njoɓdi, njoɓdi am ndin fawaaki si wanaa Jooma winndere nden

Enee, hara on accete e koo ko woni ɗoo ko on hooliiɓe

E nder gese e canɗi

E remuruuji e tamarooje hara dukke majje ko ɓennduɗum

Hiɗon lesa pelle ɗen [waɗon] cuuɗi ko on haawitiiɓe

Hulee Alla ɗoftoɗon mi

Wata on ɗofto yamaruyee fantinooɓe ɓen

Ɓen bonnooɓe ka leydi hara ɓe moƴƴintaa

Ɓe wi'i: "Pellet, an ko a jeyaaɗo mbilaaɓe ɓen

An a wonaali si wanaa ɓanndunke yeru amen, awa addu Aaya, si tawii a laatike jeyaaɗo e goonguɓe ɓen

O maaki: "Mbaaɗoo ko naaqawa, no woodani mba yaramnde, no woodani on onon kadi yaramnde ñalaande anndaande

Wata on memir mba ko boni, sakko nannga on Lepte Ñalnde Mawnde

Ɓe mborii mba, ɓe wonti nimsuɓe

Lepte ɗen nanngi ɓe. Pellet, wonii e ɗum [ko jaŋtaa ɗoo] Aaya, ɓurɓe heewude e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Yimɓe Luutu ɓen fenni Nulaaɓe ɓen

Tuma nde Luutu musiɗɗo maɓɓe on wi'annoo ɓe: "Enee, on hulataa [Alla]

Min dey, ko mi Nulaaɗo e mooɗon hoolaaɗo

Hulee Alla ɗoftoɗon mi

Mi toraaki on e dow ɗum njoɓdi, njoɓdi am ndin fawaaki si wanaa Jooma winndere nden

Enee, on aray worɓe ɓen immorde e winndere nden

Ɗalon ko Joomi mooɗon tagani on kon immorde e sonnaaɓe mooɗon? Ko woni, onon ko on yimɓe jaggituɓe

Ɓe wi'i: "Men woondii si a accaali an Luutu, ma a laato sanne jeyaaɗo e yaltiteeɓe ɓen

O maaki: "Min dey, miɗo jeyaa e añuɓe ɓen golle mooɗon ɗen

Jooma, danndam min e ɓeynguure am nden kon ko ɓe gollata

Men danndi mo e ɓeynguure makko nden, ɓe fow maɓɓe

Si wonaa jiidiraare(nayeejo debbo) nden ka halkaaɓe ɓen

Refti Men oƴƴi heddii ɓe ɓen

Men toɓini e dow maɓɓe toɓo, bonii toɓo jertinaaɓe ɓen

Pellet, wonii e ɗum [ko jaŋtaa ɗoo] Aaya, ɓurɓe heewuɓe e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

Yimɓe fitaare(sutu) nden fenniino Nulaaɓe ɓen

Tuma nde Su'aybu wi'annoo ɓe: "Enee, on hulataa [Alla]

Min dey, ko mi Nulaaɗo e mooɗon hoolaaɗo

Hulee Alla ɗoftoɗon mi

Mi toraaki on e dow ɗum njoɓdi, njoɓdi am ndin fawaaki si wanaa Jooma winndere nden

Humnee ɓetu ngun, wata on laato jeyaaɓe e uytooɓe ɓen

Manndikiree(peesre) manndikirɗe feewuɗe ɗen

Wata on ustan yimɓe ɓen piiji maɓɓe ɗin, wata on lancito ka leydi hara ko on bonnooɓe

Hulee On Taguɗo on, o tagu adinoongu ngun

Ɓe wi'i: "Pellet, an ko a jeyaaɗo mbilɗaaɓe ɓen

An a wonaali si wanaa ɓanndunke yeru amen, tawde meɗen jikkumaa ko a jeyaaɗo e fenuɓe ɓen

Awa fukku e dow amen kunte kammu ngun, si tawii a laatike jeyaaɗo e goonguɓe ɓen

O maaki: "Ko Joomi am woni Annduɗo ko golloton kon

Ɓe fenni mo, nanngi ɓe Lepte ñalaande ɗowdiinde nden. Pellet, ɗen laatino Lepte ñalaande mawnde

Pellet, wonii e ɗum [ko jaŋtaa ɗoo] Aaya, ɓurɓe heewuɓe e maɓɓe laataaki gomɗinɓe

Pellet, Joomi maaɗa, ko Kanko woni Tedduɗo Yurmeteeɗo

E pellet, kayre ko nde jippinaande Jooma winndere nden

Jippinii nde Ruuhu hoolaaɗo on

Ka ɓernde maaɗa fii yo a laato jeyaaɗo e jertinooɓe ɓen

E ɗemngal Aarabu ɓanngungal

Pellet, kayre hinde ka ɗeri aranɓe ɓen

Enee, hara laatanaaki ɓe Maande, nde tawata anndiino nde ɓiɗɓe Israa'iila annduɓe ɓen

Sinndo Men jippinno nde e dow yoga e ajamiyankooɓe ɓen

o janngi nde e dow maɓɓe, ɓe laatotaako gomɗinɓe nde

Ko wano nii Men naadiri ɗum e ɓerɗe bonɓe ɓen

Ɓe gomɗintaa nde, haa ɓe yi'a Lepte muusuɗe ɗen

Ɗe ara e maɓɓe e juhayee, hara ɓe so'aa

Sakko ɓe wi'a: "Taw si ko men nennanteeɓe

Enee, ko Lepte Amen ɗen ɓe heñorta

A tinii si Men dakmitii ɓe duuɓi

Refti ari e maɓɓe kon ko ɓe laatinoo hiɓe fodee

Nafaali ɓe ko ɓe laatinoo kon hiɓe dakmitoo

Men halkaali saare woo, si wanaa hara no woodani nde jertinooɓe

[Ɗum] ko waaju, Men laataaki tooñooɓe

Wanaa seytanuuji ɗin jippini nde

[Ɗum] haananaaɗi, ɗi hattantaake kadi

Pellet, kannji ko ɗi follateeɗi gaayi heɗagol ngol

Wata a noddu reweteeɗo goo wonndude e Alla, sakko laatoɗaa jeyaaɗo e Lepteteeɓe ɓen

Jertin gorol maaɗa ɓurɓe ɓadaade ɓen

Lesɗinan balbe maaɗen, wonannde ɓen jokkuɓe ma immorde e gomɗinɓe ɓen

Si ɓe yeddii ma, haray maaku: "Min dey, ko mi danndiiɗo kon ko golloton

Hoolor On Tedduɗo Yurmeteeɗo

On Sutiiɗo ma fewndo darotoɗaa

E waylitogol maaɗa e hakkunde sujjooɓe ɓen

Pellet, ko Kanko woni Nanoowo Annduɗo On

Taw si mi humpitay on ko e hommbo Seytanuuji ɗin jippotoo

Hiɗi jippoo e dow kala fefindotooɗo bakkodinɗo

Hiɗi werloo nanɗe ɗen, ko ɓurɓe heewude e majji ko fenooji

Yimooɓe ɓen ko jokkata ɓe, ko bewɓe ɓen

Enee, a tinaali wonndema kamɓe hiɓe yinoo e kala aynde

E tawde kamɓe hiɓe wowla ko ɓe huuwataa

Si wanaa ɓen gomɗinɓe ɓe golli golle moƴƴe ɓe jaŋtii Alla ko ɗuuɗi ɓe yoɓtii ɓaawo ɓe tooñaama. Aray ka ɓen tooñuɓe annday ko honde e waylitorde ɓe waylitotoo