Fulah - Chapter 52 - At-Tur

Mi woondirii [Fello] Tuuri ngon

E Deftere winndaande nden

e ɗeri fontaaɗi

E Suudu wuurniraandu ndun

E Kippoodi toowundi ndin

E maayo heewuno ngon

Pellet, lepte Joomi maa ɗen ko yanooje

Alaa duñoowo ɗe

Ñalnde kammu ngun dillirta dillere

pelle ɗen wona e yahugol

haray nden ñalnde, bone woodanii fennuɓe ɓen

ɓen wonuɓe e jumpugol, hiɓe fija

Ñalnde ɓe duñiroytee doole ka Yiite Jahannama duñannde

[Ɓe wi'anee] : "Ko ngee Yiite woni ko fennaynoɗon

E ko mbilewu nii? Kaa hara on alaa yi'ude

Sumee e magge! Muññiɗon maa on muññaaki, fow no fota e mon. Anndee ko yoɓeteɗon, ko kon ko gollaynoɗon

Pellet, gomɗuɓe ɓen hino e Aljannaaji e neemaaji

ko ɓe dakimitotooɓe kon ko Joomi maɓɓe okki ɓe, Joomi maɓɓe daɗndi ɓe lepte Jahiimi ɗen

[Ɓe wi'anee] : "Ñaamee yaron, ko newi moɗdeum, sabu kon ko gollaynoɗon

hara ko on soɓɓindiiɓe e hoore danɗe weertindiraaɗe", Men resina ɓe kadi yooɗa e yaaJa giteeɓe

Ɓen gomɗimɓe, geyngol maɓɓe ngol kadi jokki ɓe e gomɗinal, Men tawtindinay ɓe e geyngol maɓɓe ngol. Men ɗuytantaa ɓe huunde e golle maɓɓe ɗen; neɗɗo kala ko faggitii kon no tiginaa

Men ɓeydani ɓe muuyanteeɗi e tebbeeli kala ko tuuyetee

Hiɓe jaaɓondira ton, ñedduɗe ɗe jillaa meere wanaa ko bakkondinta

Sukaaɓe no eltanaaɓe hino wanngoo hakkunde maɓɓe, wa'uɓe wa kaŋŋe maraaɗe

ɓe wi'a: "Pellet, men laatino ado [hannde], hulunooɓe [lepte ɗen] hakkunde yimɓe amen

Allah moƴƴii e amen, O daɗni men lepte Norngal

Men laatino ado [hannde], torotonooɓe Mo. Pellet, ko Kanko woni Moƴƴo, Hinnotooɗo On

Anndintin tun, sabu neema Joomi maa on, a wonaa ndureejo wanaa a feetuɗo

Kaa ɓe wi'ay wonnde : "Ko yimoowo ! Men habbitani mo tun jikke maayde

Maaku : "Awa habbitee ! Min kadi miɗo habbitodi e mon

Kaa ko haqqille maɓɓe ɗen yamirɓe ɗum? Kaa hara ko ɓe yimɓe bewuɓe tun

Kaa ɓe wi'ay wonnde : "O sincu nde?" Si ko woni, wanaa ɓe gomɗinooɓe

Awa yo ɓe addii yewtere sugu mayre, si wonii ko ɓe goonguɓe

Kaa ɓe tagira ɓaawo taguɗo? Kaa ko kamɓe woni taguɓe ɓen

Kaa (ko) kamɓe tagi kammuuli ɗin e leydi ndin? Ko woni kon, ɓe yananaaka

Kaa ɓe jogiti ngaluuji Joomi maa ɗin? Kaa ko kamɓe woni huɓindiiɓe ɓen

Kaa ɓe jogiti ɓargal ngal ɓe jentorta? Awa yo heɗitiiɗo maɓɓe on addu hujja ɓannguɗo

Kaa hara ko ɓiɗɓe rewɓe woodanta Mo, onon kan worɓe ɓen

Kaa a lamndi ɓe njoɓdi, hara yoɓugol ndi no teddani ɓe

Kaa ɓe anndu fii wirniiɗi ɗin, hara hiɓe winnda

Kaa ɓe faala fewjoore? Doo ko yedduɓe ɓen, woni fooleteeɓe pewje ɓen

Kaa hiɓe mari reweteeɗo ko woori Allah? Senaade woodanii Allah, e kon ko ɓe sirkata

Si ɓe yi'ii taƴatine immornde ka kammu no yani, ɓe wi'a: "Ko duule fawondirɗe

Terto ɓe, haa ɓe hawroya e ñalaande maɓɓe nde ɓe leptoytee e mun

Ñalnde nde pewje maɓɓe duncanoytaa ɓe hay huunde, ɓe wonaa kadi walloyteeɓe

Ko pellet, hino woodani tooñuɓe ɓen, lepte goo ko wanaa ɗen ɗon. Kono ko ɓuri ɗuuɗude kon e maɓɓe, ɓe anndaa

Muñño ñaawoore Joomi maa nden. Tawde pellet, hiɗa e ndenka Amen. Seniniraa yettugol Joomi maa, tuma ɓaŋotoɗaa

Jemma on kadi, subbunhinanoɗaa Mo e ka mutugol koode