Hausa - Chapter 26 - Ash-Shuara

S. M

Waɗancan ayoyin Littafi ne bayyananne

Tsammaninka kai mai zaka halakar da ranka ne, don ba su zamanto muminai ba

Idan Mun so za Mu saukar, a kansu, da wata aya daga sama, sai wuyoyinsu su yini saboda ita suna masu ƙasƙantar da kai

Kuma wata tunatarwa ba ta je musu ba, daga Mai rahama, sabuwa, face sun kasance daga barinta suna masu bijirewa

To, lalle ne, sun ƙaryata, to, labaran abin da suka kasance suna yi na izgili da shi za ya je musu

Shin, ba su duba ba zuwa ga ƙasa, da yawa Muka tsirar a cikinta, daga dukan nau'i mai kyau

Lalle ne, a cikin wancan akwai aya, kuma mafi yawansu ba su kasance muminai ba

Kuma lalle ne, Ubangijinka, haƙiƙa, Shi ne Mabuwayi, Mai rahama

Kuma a lokacin da Ubangijinka Ya kirayi Musa, "Ka je wa mutanen nan azzalumai

Mutanen Fir'auna ba za su yi taƙawa ba

Ya ce: "Ya Ubangijina, ni ina tsoron su ƙaryata ni

Kuma ƙirjina ya yi ƙunci* kuma harshena ba zai saku ba saboda haka ka aika zuwa ga Haruna

Kuma suna da wani laifi a kaina, saboda haka ina tsoron kada su kashe ni

Ya ce: "Kayya! Ku tafi, ku biyu, da AyoyinMu. Lalle ne, Muna tare da ku Muna Masu saurare

Sai ku je wa Fir'auna, sa'an nan ku ce, Lalle ne, mu, Manzannin Ubangijin halitta ne

Ka saki Bani Isra'ila tare da mu

Ya ce: "Shin, ba mu yi renonka ba a cikinmu kana jariri, kuma ka zauna a cikinmu shekarudaga lokacin rayuwarka

Kuma ka aikata aikinka wanda ka aikata alhali kai kana daga butulai

Ya ce: "Na aikata shi a lokacin ina daga masu jahilcin fushi

Saboda haka na gudu daga gare ku a lokacin da na ji tsoronku, sai Ubangijina Ya ba ni hukunci, kuma Ya sanya ni daga Manzanni

Kuma waccan ni'ima ce, kana gorint a kaina, domin ka bautar da Bani Isra'ila

Fir'auna ya ce: "Kuma mene ne Ubangijin halittu

Ya ce: "Ubangijin sammai da ƙasa da abin da yake a tsakaninsu, idan kun kasance masu ƙarfin imani

Ya ce wa waɗanda suke a gefensa, "Ba za ku saurara ba

Ya ce: "Ubangijinku, kuma Ubangijin ubanninku na farko

Ya ce: "Lalle ne Manzonku, wanda aka aiko zuwa gare ku, haƙi ƙa, mahaukaci ne

Ya ce: "Ubangijin mafitar rana da maɓuyarta da abin dayake a tsakaninsu, idan kun kasance kuna hankalta

Ya ce: "Lalle ne idan ka riƙi wani abin bautawa wanina haƙiƙa, ina sanya ka daga ɗaurarru

Ya ce: "Ashe, kuma ko da na zo maka da wani, abu mai bayyanawa

Ya ce: "To, ka zo da shi idan ka kasance daga, masu gaskiya

Sai ya jefa sandarsa, sai ga ta kumurci bayyananne

Kuma ya fizge hannunsa, sai ga shi fari ga masu kallo

(Fir'auna) ya ce ga mashawarta a gefensa, "Lalle ne, wannan haƙiƙa, masihirci ne, mai ilmi

Yana son ya fitar da ku daga ƙasarku game da sihirinSa. To mene ne kuke shawartawa

Suka ce: "Ka jinkirtar da shi, shi da ɗan'uwansa, kuma ka aika masu gayya a cikin birane

Za su zo maka da dukkan mai yawan sihiri masani

Sai aka tara masihirta domin ajalin yini sananne

Kuma aka ce wa mutane "Ko ku masu taruwa ne

Tsammaninmu mu bi masihirta, idan sun kasance su ne marinjaya

To, a lokacin da masihirta suka je suka ce wa Fir'auna,"Shin, lalle ne, haƙiƙa muna da ijara idan mun kasance mu ne marinjaya

Ya ce: "Na'am! Kuma lalle ne, ku ne a lokacin haƙiƙa muƙarrabai

Musa ya ce musu, "Ku jefa abin da kuke masu jefawa

Sai suka jefa igiyoyinsu, da sandunansu, kuma suka ce: "Da ƙarfin Fir'auna lalle ne mu, haƙiƙa, mu ne marinjaya

Sai Musa ya jefa sandarsa, sai ga ta tana harhaɗe abin da suke yi na ƙarya

Sai aka jefar da masihirta suna masu sujada

Suka ce: "Mun yi imani da Ubangijin halitta

Ubangijin Musa da Haruna

Ya ce: "Ashe, kun yi imani saboda shi, a gabanin in yi muku izni? Lalle ne shi, haƙiƙa babbanku ne wanda ya koya muku sihirin, to, za ku sani. Lalle ne haƙiƙa, zan kakkatse hannuwanku da kafafunku a tarnaƙi, kuma haƙiƙa, zan tsire ku gaba ɗaya

Suka ce: "Babu wata cuta! Lalle ne mu masu juyawa ne zuwa ga Ubangijinmu

Lalle ne mu muna kwaɗayin Ubangijinmu, Ya gafarta mana kurakuranmu domin mun kasance farkon masu imani

Kuma Muka aika zuwa ga Musa cewa ka yi tafiyar dare da bayiNa, lalle ne ku waɗanda ake biya* ne

Sai Fir'auna ya aika masu gayya a cikin birane

Lalle ne, waɗannan, haƙiƙa, ƙungiya ce kaɗan

Kuma lalle ne su, a gare Mu, Masu fusatarwa ne

Kuma lalle ne mu haƙiƙa gaba ɗaya masu sauna ne

Sai Muka fitar da su daga gonaki da maremari

Da taskoki da mazauni mai kyau

Kamar haka! Kuma Muka gadar da su ga Bani Israila

Sai suka bi su suna masu fita a lokacin hudowar rana

Sa'an nan a lokacin da jama'a biyu suka ga juna, sai abokan Musa suka ce: "Lalle ne mu haƙi ƙa, waɗanda ake riska ne

Ya ce: "Kayya! Lalle ne Ubangijina Yana tare da ni, zai shiryar da ni

Sai Muka yi wahayi zuwa ga Musa cewa "Ka doki teku da sandarka." Sai teku ta tsage,* kowane tsagi ya kasance kamar falalen dutse mai girma

Kuma Muka kusantar da waɗansu mutane a can

Kuma Muka tsirar da Musa da waɗanda suke tare da shi gaba ɗaya

Sa'an nan kuma Muka nutsar da waɗansu mutanen

Lalle ne a cikin wannan akwai aya, kuma mafi yawansu ba su kasance masu imani ba

Kuma lalle ne Ubangijinka, kaƙiƙa, Shi ne Mabuwayi, Mai jin ƙai

Kuma ka karanta, a kansu, labarin Ibrahim

A sa'ilin da ya ce wa ubansa da mutanensa, "Mene ne kuke bauta wa

Suka ce: "Muna bauta wa gumaka, saboda haka muna yini masu lazimta a gare su

Ya ce: "Shin, suna jin ku, a lokacin da kuke kira

Ko kuwa suna amfanin ku, ko suna cutar ku

Suka ce: "A'a mun sami ubanninmu, kamar haka ne suke aikatawa

Ya ce: "Shin to, kun ga abin da kuka kasance kuna bauta wa

Ku da ubanninku mafi daɗewa

To lalle ne, su maƙiya ne a gare ni, face Ubangijin halittu

Wanda Ya halitta ni, sa'an nan Yana shiryar da ni

Kuma Wanda Yake Shi ne Yake ciyar da ni, kuma Yana shayar da ni

Kuma idan na yi jiyya, to, Shi ne Yake warkar da ni

Kuma wanda Yake matar da ni, sa'an nan Ya rayar da ni

Kuma wanda Yake ina kwaɗayin Ya gafarta mini kurakuraina, a ranar sakamako

Ya Ubangijina! Ka ba ni hukunci, kuma Ka riskar da ni ga salihai

Kuma Ka sanya mini harshen gaskiya* a cikin mutanen ƙarshe

Kuma Ka sanya ni daga magadan Aljannar ni'ima

Kuma Ka gafarta wa ubana, lalle ne shi, ya kasance daga ɓatattu

Kuma kada Ka kunyata ni a ranar da ake tayar da su

A ranar da dukiya ba ta amfani, kuma ɗiya ba su yi

Face wanda ya je wa Allah da zuciya mai tsarki

Kuma aka kusantar da Aljanna ga masu taƙawa

Kuma aka fitar da wuta babba domin halakakku

Kuma aka ce musu, "Ina abin da kuka kasance kuna bautawa

Baicin Allah? Shin suna tamakon ku ko kuwa suna tsare kansu

Sai aka kikkife su* a cikinta, su da halakakkun

Da rundunar Ibilisa gaba ɗaya

Suka ce: alhali suna a cikinta suna yin husuma

Rantsuwa da Allah! Lalle ne mun kasance, haƙiƙa, a cikin ɓata bayyananna

A lokacin da muke daidaita ku da Ubangijin halittu

Kuma babu abin da ya ɓatar da mu face masu laifi

Saboda haka ba mu da waɗansu maceta

Kuma ba mu da aboki, masoyi

Saboda haka da lalle muna da (damar) komawa, domin mu kasance daga muminai

Lalle ne, a cikin wancan akwai aya, kuma mafi yawansu, ba su kasance muminai ba

Kuma lalle ne, Ubangijinka, Shi ne Mabuwayi, Mai jin ƙai

Mutanen Nuhu sun ƙaryata Manzanni

A lokacin da Dan uwansu Nuhu ya ce musu, "Ba za ku ji tsoron Allah ba

Lalle ne, zuwa gare ku, ni Manzo ne amintacce

To, ku bi Allah da taƙawa, kuma ku yi mini ɗa'a

Kuma ba ni tambayar ku wata ijara a kansa. Ijarata ba ta zama ba face daga Ubangijin halittu

Saboda haka, ku bi Allah da taƙawa, kuma ku yi mini ɗa'a

Suka ce: "Ashe, za mu yi imani saboda kai alhali kuwa mafiya ƙasƙanci sun bi ka

Ya ce: "Kuma ba ni da sani ga abin da suka kasance sana aikatawa

Hisabinsu bai zama ba face ga Ubangijina, da kuna sansancewa

Ban zama mai kore muminai ba

Ni ba kowa ba ne sai mai gargaɗi mai bayyanawa

Suka ce: "Lalle ne, idan ba ka hanu ba, ya Nuhu, (daga maganarka,) haƙiƙa, kana kasancewa daga waɗanda ake jefewa

Ya ce: "Ya Ubangijina! Lalle ne mutanena sun ƙaryata ni

Sai ka yi hukunci, a tsakanina da tsakaninsu tabbataccen hukanci, kuma ka tsirar da ni, da waɗanda suke tare da ni daga muminai

Sai Muka tsirar da shi, shi da waɗanda suke tare da shi, a cikin jirgi wanda aka yi wa lodi

Sa'an nan Muka nutsar a bayan haka, da sauran

Lalle ne a cikin wannan akwai aya, kuma mafi yawansu, ba su kasance masu imani ba

Kuma Lalle ne, Ubangijinka, haƙiƙa, Shi ne Mabuwayi, Mai Rahama

Adawa sun ƙaryata Manzanni

A lokacin da ɗan'uwansu, Hudu ya ce musu, "Ba za ku yi taƙawa ba

Lalle ne ni, zuwa gare ku, haƙiƙa, Manzo ne, amintacce

Saboda haka ku bi Allah da taƙawa, kuma ku yi mini ɗa'a

Kuma ba ni tambayar wata ijara a kansa. Ijarata ba ta zama ba, face daga Ubangijin halittu

Shin, kuna yin ginin sitadiyo* a kowane tsauni ne, kuna yin wasa

Kuma kuna riƙon matsarar ruwa, tsammaninku, ku dawwama

Kuma idan kun yi damƙa, sai ku yi damƙar kuna masu tanƙwasawa

To ku bi Allah da taƙawa, kuma ku yi mini ɗa'a

Ku ji tsoron wanda Ya taimake ku da abin da kuka sani

Ya taimake ku da dabbobin ni'ima da ɗiya

Da gonaki da maremari

Lalle ne ni, ina ji muku tsoron azabar wani yini mai girma

Suka ce: "Daidai ne a kanmu: Ka yi wa'azi ko ba ka kasance daga masu wa'azi ba

Wannan abu bai zamo ba face halayen* mutanen farko

Kuma mu ba mu zama waɗanda ake yi wa azaba ba

Saboda haka suka ƙaryata shi, sai Muka halakar da su. Lalle ne a cikin wannan akwai aya, kuma mafi yawansu ba su kasance masu imani ba

Kuma lalle ne, Ubangijinka, haƙiƙa, Shi ne Mabuwayi, Mai jin ƙai

Samudawa sun ƙaryata Manzanni

A lokacin da ɗan'uwansu Salihu ya ce: "Shin, ba za ku bi Allah da taƙawa ba

Lalle ne ni zuwa gare ku, Manzo ne, amintacce

Saboda haka ku bi Allah da taƙawa, kuma ku yi mini ɗa'a

Kuma ba ni tambayar ku wata ijara a kansa. Ijarata ba ta zama ba face da a Ubangijin halittu

Shin, ana barin ku* a cikin abin da yake a nan, kuna amintattu

A cikin gonaki da maremari

Da shuke-shuke da dabi nai, 'ya'yan itacensu hirtsi* masu narkewa a ciki

Kuma kuna sassaƙa gidaje daga duwatsu, kuna masu alfahari

Saboda haka ku bi Allah da taƙawa, kuma ku yi mini ɗa'a

Kada ku yi ɗa'a ga umurnin maɓarnata

Waɗanda suke yin ɓarna a cikin ƙasa, kuma ba su kyautatawa

Suka ce: "Kai daga masu sihiri kurum kake

Ba kowa kake ba, face mutum kamarmu. To, ka zo da wata aya idan ka kasance daga masu gaskiya

Ya ce: "Wannan rakuma ce tana da shan* yini, kuma kuna da shan yini sasanne

Kada ku shafe ta da cuta har azabar yini mai girma ta shafe ku

Sai suka soke ta sa'an nan suka wayi gari suna masu nadama

Saboda haka azaba ta kama su. Lalle ne a cikin wannan akwai aya, kuma mafi yawansu, ba su kasance masu imani ba

Lalle ne Ubangijinka, haƙi ƙa, Shi ne Mabuwayi, Mai jin ƙai

Mutanen Luɗu sun ƙaryata Manzanni

A lokacin da ɗan'uwansu,* Luɗu ya ce musu, "Ba za ku yi taƙawa ba

Lalle ne ni, zuwa gare ku, Manzo ne, amintacce

Saboda haka ku bi Allah da taƙawa, kuma ku yi mini ɗa'a

Kuma ba ni tambayar ku wata ijara, Ijarata ba ta zama ba face daga Ubangijin halittu

Shin kuna je wa maza daga cikin talikai

Kuma kuna barin abin da Ubangijinku Ya halitta muku daga matanku? A'a, ku mutane ne masu ƙetarewa

Suka ce: "Lalle ne haƙiƙa idan ba ka hanu ba, ya Luɗu! Tilas ne kana kasancewa daga waɗanda ake fitarwa (daga gari)

Ya ce: "Lalle ne ga aikinku, haƙiƙa, ina daga masu ƙinsa

Ya Ubangijina! Ka tsirar da ni da iyalina daga abin da suke aikatawa

Saboda haka Muka tsirar da shi, Shi da mutanensa gaba ɗaya

Face wata tsohuwa a cikin masu wanzuwa

Sa'an nan kuma Muka hallaka wasu

Kuma Muka yi ruwan sama a kansu ruwa, sai dai ruwan waɗanda ake yi wa gargaɗi ya munana

Lalle ne ga wannan, akwai aya, kuma mafi yawansu ba su kasance masu imani ba

Kuma lalle ne Ubangijinka, haƙiƙa, Shi ne Mabuwayi, Mai jin ƙai

Ma'abuta ƙunci sun ƙaryata Manzanni

A lokacin da Shu'aibu ya ce musu, "Ba za ku yi taƙawa ba

Lalle ne ni, zuwa gare ku, Manzo ne, amintacce

Saboda haka ku bi Allah da taƙawa kuma ku yi mini ɗa'a

Kuma ba ni tambayar ku wata ijara a kansa. Ijarata ba ta zama ba face daga Ubangijin halittu

Ku cika mudu, kuma kada ku kasance daga masu sanyawar hasara (ga mutane)

Kuma ku yi awo da sikeli daidaitacce

Kuma kada ku nakasa wa mutane abubuwansu kuma kada ku yi fasadi a cikin ƙasa kuna masu ɓarna

Kuma ku ji tsoron Allah wanda Ya halitta ku, ku da jama'ar farko

Suka ce: "Kai dai daga waɗanda suke sihirtattu kawai ne

Kuma ba kowa kake ba, face mutum kamarmu kuma lalle ne muna zaton ka, haƙiƙa, daga maƙaryata

To ka jefo wani ɓaɓɓake daga sama a kanmu, idan ka kasance daga masu gaskiya

Ya ce: "Ubangijina ne Mafi sani ga abin da kuke aikatawa

Sai suka ƙaiyata shi, saboda haka, azabar ranar girgije* ta kama su. Lalle ne ita, ta kasance azabar yini mai girma

Lalle a cikin wancan haƙika akwai aya, amma mafi yawansu ba su kasance masu imani ba

Kuma lalle Ubangijinka, haƙiƙa, Shi ne Mabuwayi, Mai jin ƙai

Kuma lalle shi (Alƙur'ani), haƙiƙa, saukarwar Ubangijinhalittu ne

Ruhi* amintacce ne ya sauka da shi

A kan zuciyarka, domin ka kasance daga masu gargaɗi

Da harshe na Larabci mai bayani

Kuma lalle shin, haƙiƙa, yana a cikin litattafan (Manzannin) farko

Ashe, bai kasance aya ba a gare su, ya zama Malaman Bani Isra'ila sun san shi

Kuma da mun saukar da shi a kan sashen Ajamawa

Ya karanta shi a kansu, ba su kasance saboda shi masu imani ba

Kamar wancan ne! Muka shigar da shi a cikin zukatan masu laifi

Ba za su yi imani da shi ba sai sun ga azabar nan mai raɗadi

Sai ta taho musu kwatsam, alhali kuwa su, ba su sansance ba

Sai su ce: "Shin, mu waɗanda ake yi wa jinkiri ne

Ashe, to, da azabar Mu suke neman gaggawa

Ashe, to, ka gani, idan Muka jishe su daɗi a shekaru

Sa'an nan abin da suka kasance ana yi musu wa'adi (da shi) ya je musu

Abin da suka kasance ana jishe su daɗin ba zai tunkuɗe azaba ba daga gare* su

Kuma ba Mu halakar da wata alƙarya ba face tana da masu gargaɗi

Domin tunatarwa, kuma ba Mu kasance Masu zalunci ba

Kuma (Alƙur'ani) Shaiɗanu ba su ɗora sauka da shiba

Kuma ba ya kamata a gare su (su Shaiɗanu su sauka da shi), kuma ba su iyawa

Lalle ne su, daga saurare, haƙiƙa, waɗanda aka nisantar ne

Saboda haka, kada ka kira wani abin bautawa na dabam tare da Allah, sai ka kasance daga waɗanda ake yi wa azaba

Kuma ka yi gargaɗi ga danginka mafiya kusanci

Kuma ka sassauta fikafikanka* ga wanda ya bi ka daga muminai

Sa'an nan idan suka saɓa maka to ka ce: "Lalle ni, barrantacce ne daga abin da kuko aikatawa

Kuma ka dogara ga Mabuwayi, Mai jin ƙai

Wanda Yake ganin ka a lokacin da kake tashi tsaye

Da jujjuyawarka a cikin masu yin sujada

Lalle Shi, Shi* ne Mai ji, Masani

Shin, (kuna so) in gaya* muku a kan wanda Shaiɗannu kan sauka

Sukan sauka a kan dukkan maƙaryaci, mai zunubi

Suna jefa (abin da suka) ji, alhali kuwa mafi yawansu maƙaryata ne

Kuma mawaƙa* halakakku ne ke bin su

Shin, ba ku cewa, lalle ne su, cikin kowane rango suna yin ɗimuwa (su ƙetare haddi) ba

Kuma lalle ne, su, suna faɗin abin da ba su aikatawa

Face waɗanda suka yi imani suka aikata ayyukan ƙwarai, kuma suka ambaci Allah da yawa, kuma suka rama zalunci, daga bayan an zalunce su. Kuma waɗanda suka yi zalunci, za su sani a wace majuya suke juyawa