Hausa - Chapter 51 - Adh-Dhariyat

Ina rantsuwa da iskoki masu shekar abubuwa, sheƙewa

Sa'an nan da giragizai masu ɗaukar nauyi (na ruwa)

Sa'an nan da jirage masu gudana (a kan ruwa) da sauƙi

Sa'an nan da Mala'iku masu rabon al'amari (bisa umurnin Allah)

Lalle abin da ake yi muku alkawari (da zuwansa), haƙiƙa gaskiya ne

Kuma lalle sakamako (ga ayyukanku), haƙiƙa, mai aukuwa ne

Ina rantsuwa da sama ma'abuciyar hanyoyi (na tafiyar taurari da sautin rediyo)

Lalle ku, haƙiƙa, kuna cikin magana mai saɓa wa juna (game da Alƙur'ani)

Ana karkatar da wanda aka juyar (daga gaskiya)

An la'ani masu ƙiri-faɗi

Waɗanda suke shagala a cikin zurfin jahilci

Suna tambaya: "Yaushe ne ranar sakamako za ta auku

Ranar da suke a kan wuta ana fitinar su

(A ce musu): "Ku ɗanɗani fitinarku, wannan shi ne abin da kuka kasance kuna neman zuwansa da gaggawa

Lalle masu taƙawa, suna a cikin lambunan itace da maremari

Suna masu dibar abin da Ubangijinsu Ya ba su. Lalle su, sun kasance masu kyautatawa a gabanin haka (a duniya)

Sun kasance a lokaci kaɗan na dare suke yin barci

Kuma a lokutan asuba suna ta yin istigfari

Kuma a cikin dukiyarsu akwai hakki ga (matalauci) mai roƙo da wanda aka hana wa roƙo

Kuma a cikin ƙasa akwai ayoyi ga masu yaƙini

Kuma a cikin rayukanku (akwai ayoyi). To, ba za ku duba ba

Kuma a cikin sama arzikinku (yake fitowa) da abin da ake yi muku alkawari

To, kuma Ina rantsuwa da Ubangijin sama da ƙasa, lalle shi (abin da ake yi muku alkawari), haƙiƙa gaskiya ne, kamar abin da kuka zamo kuna karantawa na magana

Shin, labarin Baƙin Ibrahim, waɗanda aka girmama, ya zo maka

A lokacin da suka shiga gare shi, sai suka yi sallama; ya ce "Aminci ya tabbata a gare ku, mutane baƙi

Sai ya juya zuwa ga iyalinsa, sa'an nan ya zo da maraƙi tutturna

Sai ya kusantar da shi zuwa gare su, ya ce: "Ba za ku ci ba

Sai ya ji tsoro daga gare su. Suka ce: "Kada kaji tsoro." Kuma suka yi masa bushara da (haihuwar) wani yaro mai ilmi

Sai matarsa ta fuskanta cikin ƙyallowa, har ta mari fuskarta kuma ta ce: "Tsohuwa bakarariya (za ta haihu)

Suka ce: "Kamar haka Ubangijinki Ya faɗa. Lalle Shi, Shi ne Mai hikima, Mai ilmi

(Ibraim) ya ce: "To mene ne babban al'almarinku, ya ku Manzanni

Suka ce: "Lalle mu, an aike mu zuwa ga waɗansu mutane, masu laifi

Domin mu saka musu waɗansu duwatsu na wani yumɓu (bom)

Waɗanda aka yi wa alama daga wajen Ubangijinka, domin masu ɓarna

Sa'an, nan Muka fitar da wanda ya kasance a cikinta daga muminai

Sai dai ba mu samu ba, a cikinta, face gida guda na Musulmi

Kuma Muka bar wata aya, a cikinta, ga waɗanda ke jin tsoron azaba, mai raɗaɗi

Kuma ga Musa, a lokacin da Muka aiko shi zuwa ga Fir'auna da wani dalili bayyananne

Sai ya juya baya tare da ƙarfinsa, kuma ya ce: "Mai sihiri ne ko kuwa mahaukaci

Saboda haka, Muka kama shi tare da rundunarsa, sa'an nan Muka jefa su a cikin teku, alhali kuwa yana wanda ake zargi

Kuma ga Adawa, a lokacin da Muka aika iska ƙeƙasasshiya a kansu

Ba ta barin kome da ta je a kansa, face ta mayar da shi kamar rududdugaggun ƙasusuwa

Kuma ga Samudawa, a lokacin da aka ce musu: "Ku ji ɗan daɗi har wani ɗan lokaci

Sai suka yi girman kai ga umurnin Ubangijinsu, saboda haka tsawa ta kama su, alhali kuwa suna kallo

Ba su ko samu damar tsayawa ba, kuma ba su kasance masu neman agaji ba

Da mutanen Nuhu a gabanin haka, lalle sun kasance waɗansu irin mutane ne fasiƙai

Kuma sama, mun gina ta da wani irin ƙarfi, alhali kuwa lalle Mu ne Masu yalwatawa

Kuma ƙasa Mun shimfiɗa ta, To, madalla da masu shimfiɗawa, Mu

Kuma daga kome Mun halitta nau'i biyu, watakila za ku yi tunani

Saboda haka ku gudu zuwa ga Allah, lalle ni mai gargaɗi kawai ne a gare ku, mai bayyanannen gargaɗi

Kuma kada ku sanya, tare da Allah wani abin bautawa na dabam, lalle ni, mai gargaɗi kawai ne a gare ku, mai bayyanannen gargaɗi

Kamar haka dai wani Manzo bai je wa waɗanda ke gabaninsu ba face sun ce: "Mai sihiri ne ko mahaukaci

shin, suna yi wa juna wasiyya da shi ne? A'a, su dai mutane ne masu girman kai

Sai ka juya daga barinsu, kuma kai ba abin zargi ba ne

Kuma ka tunatar, domin tunatarwa tana amfanin muminai

Kuma Ban halitta aljannu da mutane ba sai domin su bauta Mini

Ba Ni nufln (samun) wani arziki daga gare su, Ba Ni nufin su (yi Mini hidimar) ciyar da Ni

Lalle Allah, Shi ne Mai azurtawa, Mai ikon yi, Mai cikakken ƙarfi

To, lalle waɗanda suka yi zalunci suna da masaki (na ɗiban zunubi) kamar masakin abokansu, saboda haka kada su yi Mini gaggawa

Saboda haka, bone ya tabbata ga waɗanda suka kafirta, daga ranar su wadda aka yi musu alkawari