Hausa - Chapter 53 - An-Najm

Ina rantsuwa da tauraron, a lokacin da ya faku

Ma'abucinku bai ɓata ba, kuma bai ƙetare haddi ba

Kuma ba ya yin magana daga son zuciyarsa

(Maganarsa) ba ta zamo ba, face wahayi ne da ake aikowa

(Mala'ika) mai tsananin ƙarfi *ya sanar da shi

Ma'abucin ƙarfi da kwarjini, sa'an nan ya daidaita

Alhali kuwa yana a sararin sama mafi daukaka

Sa'an nan ya kusanta, kuma ya matsa zurowa

Har ya kasance gwargwadon zira'i biyu, ko kuma abin da ya fi kusa

Sa'an nan ya yi wahayi zuwa ga bawan Allah (Muhammadu) da abin da ya faɗa (masa)

Zuciyar (Annabi) bata ƙaryata abin da ya gani ba

Shin, za ku yi masa musu a kan abin da yake gani

Kuma lalle ya gan shi, haƙiƙatan, a wani lokacin saukarsa

A wurin da magaryar tuƙewa take

A inda taken, nan Aljannar makoma take

Lokacin da abin da yake rufe magaryar tuƙewa ya rufe ta

Ganinsa* bai karkata ba, kuma bai ƙetare haddi ba

Lalle, tabbas, (Annabinku) ya ga waɗanda suka fi girma* daga ayoyin Ubangijinsa

Shin, kun ga Lata da uzza

Da (wani gunki wai shi) Manata, na ukunsu

Ashe, ku ne da ɗa namiji Shi (Allah) kuma da ɗiya mace

Wannan fa ya zama rabo naƙasasshe

Waɗannan ba kome ba ne face sunaye, waɗanda kuka ambace su da su, ku da uwayenku. Allah bai saukar da wani dalili game da su ba. (Kafirai) ba su biyar kome face zato da abin da rayukansu ke so, Alhali kuwa shiriyar* ta daga wajen Ubangijinsu, ta je musu (sai suka bar ta suka koma wa zaton)

Ko (an fai cewa) mutum zai sami abin da yake guri

To, Lahira da duniya na Allah kawai ne (wanda ya neme su daga wani, ya yi kuskure)

Akwai mala'iku da yawa a cikin sammai cetonsu ba ya wadatar da kome face bayan Allah Ya yi izni (da shi) ga wanda Yake so, kuma Yake yarda

Lalle waɗannan da ba su yin imani da Lahira, haƙiƙa suna kiran mala'iku da sunan mace

Kuma ba su da wani ilmi game da shi, ba su bin kome face zato alhali kuwa lalle zato ba ya amfanar da kome daga gaskiya

Saboda haka sai ka kau da kai daga wanda ya juya baya daga ambaton Mu kuma bai yi nufin kome ba face rayuwar kusa (duniya)

Wannan ita ce iyakar abin da suke iya kai gare shi na ilmi. lalle Ubangijinka Shi ne Mafi sanin wanda ya ɓace daga hanyar Sa, kuma Shi ne Mafi sani ga wanda ya nemi shiriya

Kuma abin da ke cikin sammai da abin da yake a cikin ƙasa na Allah kawai ne, domin Ya saka wa waɗanda suka munana da abin da suka aikata, kuma Ya saka wa waɗanda suki kyautata da sakamakon da ya fi kyau

Waɗanda ke nisantar manyan zunubai da abubuwan alfasha, face ƙananan laifuffuka, lalle Ubangijinka Mai yalwatattar gafara ne, Shi ne Ya fi sani ga abinda ke gare ku a lokacin da Ya ƙaga halittarku daga ƙasa, kuma a lokacin da kuke tayuna a cikin cikannan uwayenku. Saboda haka, kada ku tsarkake* kanku, Shi ne Mafi sani ga wanda ya yi taƙawa

Shin, ka ga wannan da ya juya baya

Ya yi kyauta kaɗan, kuma ya yi rowa

Shin, akwai ilmin gaibi a wurinsa, Saboda haka yana ganin gaibin

Ko kuwa ba a ba shi labari ba ga abin da yake a cikin Littafan Musa

Da Ibrahim wanda ya cika alkawari

Cewa wani rai mai kayan laifi ba ya ɗaukar kayan laifin wani

Kuma mutum ba shi da kome face abin da ya aikata

Kuma lalle, aikinsa za a gan shi

Sa'an nan a saka masa da sakamako wanda yake mafi cikar ma'auni

Kuma lalle, makomar zuwa Ubangijinka kawai take

Kuma lalle, Shi, Shi ne Ya sanya dariya, kuma Ya sanya kuka

Kuma lalle, Shi, Shi ne Ya kashe, kuma Ya rayar

Kuma lalle Shi ne Ya yi halitta nau'i-nau'i, namiji da mace

Daga wani ɗigon ruwa guda a lokacin da ake jefa shi a cikin mahaifa

Kuma a kansa ne ƙaga halitta ta biyu take

Kuma lalle, Shi, Shi ne Ya azurta, kuma Ya wadatar

Kuma lalle, Shi, Shi ne Ubangijin Shi'ira

Kuma lalle, Shi, Shi ne Ya halaka Adawa na farko

Da Samudawa, sa'an nan bai rage su ba

Da mutanen Nuhu a gabanin haka, lalle su sun kasance mafi zalunci kuma mafi girman kai

Da waɗanda aka birkice *ƙasarsu, Ya kayar da su

Sa'an nan abin da ya rufe su, ya rufe su

To, da wace daga ni'imomin Ubangijinka kake *yin shakka

wannan (Muhammadu) mai gargaɗi ne kamar irin masu gargaɗi na farko

Makusanciya* fa, ta yi kusa

Babu wani rai, banda Allah, mai iya bayani gare ta

Shin, kuma daga wannan *labari kuke mamaki

Kuma kuna yin dariya, kuma ba ku yin kuka

Alhali kuna masu wasa

To, ku yi tawali'u *ga Allah, kuma ku bauta (masa)