Hausa - Chapter 74 - Al-Muddaththir

Ya wanda ya lulluɓa da mayafi

Ka tashi domin ka yi gargaɗi

Kuma Ubangijinka, sai ka girmama Shi

Kuma tutafinka, sai ka tsarkake su

Kuma gumaka, sai ka ƙaurace musu

Kada ka yi kyauta kana neman ƙari

Kuma saboda Ubangijinka? Sai ka yi haƙure

To, idan aka yi busa a cikin ƙaho

To, wannan, a ranar nan, yini ne mai wuya

A kan kafirai, ba mai sauƙi ba ne

Ka bar Ni da wanda Na halitta, yana shi kaɗai

Kuma Na sanya masa dukiya shimfiɗaɗɗiya

Da ɗiya halartattu

Kuma Na shimfiɗa? masa kome shimfiɗawa

Sa'an nan, yana kwaɗayin in yi masa ƙari

Faufau! Lalle ne, shi ya kasance, ga ayoyin Mu, mai tsaurin kai

Za Ni kallafa masa wahala mai hauhawa

Lalle ne, Shi, ya yi tunani, kuma ya ƙaddara (abin da zai faɗa game da Alƙur'ani)

Saboda haka, aka la'ane shi, kamar yadda ya ƙaddara

Sa'an nan, aka la'ane shi kamar yadda ya ƙaddara

Sa'an nan, ya yi tunani

Sa'an nan, ya gintse huska? kuma ya yi murtuk

Sa'an nan, ya juya baya, kuma ya bunƙasa

Sai ya ce: "Wannan abu dai ba kome ba ne face wani sihiri, wanda aka ruwaito

Wannan maganar mutum dai ce

Za Ni ƙona shi da Saƙar

Kuma me ya sanar da kai abin da ake cewa Saƙar

Ba ta ragewa, kuma ba ta bari

Mai nacewa ga jiki ce (da (ƙuna)

A kanta akwai (matsara) goma sha tara

Kuma ba Mu sanya ma'abuta wuta (wato matsaranta) ba, face mala'iku, kuma ba Mu sanya adadinsu (goma sha tara) ba, face domin fitina ga waɗanda suka kafirta domin waɗanda aka bai wa littafi su sami yaƙini kuma waɗanda suka yi imani su ƙara imani, kuma waɗanda aka bai wa littafi da muminai ba za su yi shakka ba, kuma domin wa ɗanda a cikin zukatansu akwai wata cuta da kafirai su ce: "Me Allah Yake nufi da wannan, ya kasance misali?" Haka dai Allah ke ɓatar da wanda Ya so, kuma Ya shiryar da wanda ya so. Kuma babu wanda ya san mayaƙan Ubangijinka face Shi, kuma ita (wutar) ba ta kasance ba face wata tunatarwa ce ga mutum

A'aha! Ina rantsuwa da wata

Da dare a lokacin da ya juyar da baya

Da safiya idan ta waye

Ita (wutar) ɗayan manyan masifu? ce

Mai gargaɗi ce ga mutum

Ga wanda ya so, daga cikinku, ya gabata ko ya jinkirta

Kowane rai ga abin da ya aikata jingina ce

Face mutanen dama

A cikin Aljanna suna tambayar juna

Game da masu laifi

(Su ce musu) "Me ya shigar da ku a cikin Saƙar

Suka ce: "Ba mu kasance muna a cikin masu salla ba

Kuma ba mu kasance muna ciyar da matalauta ba

Kuma mun kasance muna kutsawa tare da masu kutsawa

Mun kasance muna ƙaryata ranar sakamako

Har gaskiya (wato mutuwa) ta zo mana

Saboda haka ceton masu ceto ba zai amfane su ba

Haba! Me ya same su, suka zama masu bijirewa daga wa'azin gaskiya

Kamar dai su, jakuna firgitattu ne

Sun gudu daga zaki

A'aha! Kowane mutum daga cikinsu yana son a zo masa da takardu (da sunansa) ana watsawa

A'aha! Kai dai, ba su jin tsoron Lahira

A'aha! Lalle ne, shi (Alƙur'ani) tunatarwa ce

Domin wanda ya so, ya tuna

Kuma ba za su tuna ba face idan Allah Ya so, Shi ne Ya cancanta a bi Shi da taƙawa kuma Ya cancanta ga Ya yi gafara