Hausa - Chapter 79 - An-Naziat

Ina rantsuwa da mala'iku masu fisgar rayuka (na kafirai) da ƙarfi

Da masu ɗibar rayuka (na muminai) da sauƙi a cikin nishaɗi

Da masu sauka daga sama da umurnin Allah kamar suna iyo

Sa'an nan, su zama masu gaugawa (da umarnin Allah) kamar suna tsere

Sa, an nan, su kasance masu shirya gudanar da umarni

Ranar da mai girgiza abubuwa (busar farko) za ta kaɗa

Mai biyar ta (busa ta biyu) na biye

Wasu zukata, a ranar nan, masu jin tsoro ne

Alhali idanunsu na ƙasƙantattu

Suna cewa "Ashe lalle za a iya mayar da mu a kan sawunmu

Ashe, idan muka zama ƙasusuwa rududdugaggu

Suka ce: "Waccan kam komawa ce, taɓaɓɓiya

To, ita kam, tsawa guda kawai ce

Sai kawai ga su a bayan ƙasa

Shin, labarin Musa ya zo maka

A lokacin da Ubangijinsa Ya kiraye shi, a cikin kwari mai tsarki, wato Duwa

Ka tafi zuwa ga Fir'auna, lalle ne shi, ya ƙetare haddi

Sai ka ce masa, Ko za ka so ka tsarkaka

Kuma in shiryar da kai zuwa ga Ubangijinka domin ka ji tsoron Sa

Sai ya nuna masa ayar* nan mafi girma

Sai ya ƙaryata, kuma ya saɓa (umurni)

Sa'an nan ya juya baya, yana tafiya da sauri

Sai ya yi gayya, sa'an nan ya yi kira

Sai ya ce: "Ni ne Ubangijinku mafi ɗaudaka

Saboda haka Allah Ya kama shi, domin azabar maganar ƙarshe da ta farko

Lalle ne, a cikin wannan haƙiƙa akwai abin kula ga wanda yake tsoron Allah

Shin, ku ne mafi wuyar halitta ko sama? Allah Ya gina ta

Ya ɗaukaka rufinta, sa'an nan Ya daidaita ta

Kuma Ya duhuntar da darenta, kuma Ya fitar da hantsinta

Kuma, ƙasa a bayan haka Ya mulmula ta

Ya fitar da ruwanta daga gare ta da makiyayarta

Da duwatsu, Ya kafe ta

Domin jiyarwa daɗi a gare ku, kuma ga dabbobinku

To, idan uwar masifu, mafi girma, ta zo

Ranar da mutum zai yi tunanin abin da ya aikata

Kuma, a bayyana Jahim ga mai gani

To, amma wanda ya yi girman kai

Kuma, ya zaɓi rayuwa ta kusa, (wato duniya)

To, lalle ne Jahim, ita ce makoma

Kuma, amma wanda ya ji tsoron tsayi a gaba ga Ubangijinsa, kuma ya kange kansa daga son rai

To, lalle ne Aljanna ita ce makoma

Suna tambayar ka game da sa'a, wai yaushe ne matabbatarta

Me ya haɗa ka da ambatonta

Zuwa ga Ubangijinka ƙarshen al'amarinta yake

Kai mai gargaɗi kawai ne ga mai tsoron ta

Kamar su a ranar da za su gan ta, ba su zauna ba face a lokacin marece ko hantsinsa