Hausa - Chapter 81 - At-Takwir

Idan rana aka shafe haskenta

Kuma idan taurari suka gurɓace (wani ya shiga a cikin wani)

Kuma idan duwatsu aka tafiyar da su

Kuma idan raƙuma masu cikunna* aka sake su wawai, ba ga kowa ba

Kuma idan dabbobin daji aka tattara su

Kuma idan tekuna aka mayar da su wuta

Kuma idan rayuka aka haɗa* su da jikunkunansu

Kuma idan wadda aka turbuɗe* ta da rai aka tambaye ta

Saboda wane laifi ne aka kashe ta

Idan takardun ayyuka aka watsa su (ga masu su)

Kuma idan sama aka feɗe ta

Kuma idan Jahim aka hura ta

Kuma idan Aljanna aka kusantar da ita

Rai ya san abin da ya halartar (a ranar nan)

To, ba sai Na yi rantsuwa da taurari matafa* ba

Masu gudu suna ɓuya

Da dare idan ya bayar da baya

Da safiya idan ta yi lumfashi

Lalle ne shi (Alƙur'ani) haƙƙan, maganar wani manzon (Allah) ne mai girma ga Allah

Mai ƙarfi, mai daraja a wurin Mai Al'arshi

Wanda ake yi wa ɗa'a (wato shugaban mala'iku) ne a can, amintacce

Kuma abokinku ba mahaukaci ba ne

Kuma lalle ne, ya gan shi* a cikin sararin sama mabayyani

Kuma shi, ga gaibi* ba mai rowa ba ne

Kuma shi (Alƙur'ani) ba maganar shaiɗani, wanda aka la'ana, ba ce

Shin, a ina za ku tafi

Lalle ne shi (Alƙur'ani), ba kome ba ne face gargaɗi ga talikai

Ga wanda ya so, daga cikinku, ya shiryu

Kuma ba za ku so ba sai idan Allah Ubangijin halitta Ya yarda