Hausa - Chapter 85 - Al-Buruj

Ina rantsuwa da sama mai taurarin lissafin shekara

Da yinin da aka yi alkawarin zuwansa

Da yini mai shaidu, da yini da ake halarta* a cikinsa

An la'ani mutanen rami

Wato wuta wadda aka hura

A lokacin da suke a kan (gefen) ta a zazzaune

Alhali su, bisa ga abin da suke aikatawa ga muminai, suna halarce

Kuma ba su tuhumce su ba, face kawai domin sun yi imani da Allah Mabuwayi, wanda ake godewa

Wanda Yake shi ne da mulkin sammai da ƙasa, kuma Allah a kan kome halarce Yake

Lalle ne waɗanda suka fitini muminai maza da muminai mata, sa'an nan ba su tuba ba to, suna da azabar Jahannama, kuma suna da azabar gobara

Lalle ne waɗanda suka yi imani, kuma suka aikata ayyukan ƙwarai, suna da gidajen Aljanna, ƙoramu na gudana daga ƙarƙashin gidajen. Wancan abu fa shi ne rabo babba

Lalle ne damƙar Ubangijinka mai tsanani ce ƙwarai

Lalle ne Shi, Shi ne Mai ƙaga halitta, kuma Ya mayar da ita (bayan mutuwa)

Kuma Shi ne Mai gafara, Mai bayyana soyayya

Mai Al'arshi mai girma

Mai aikatawa ga abin da Yake nufi

Ko labarin rundanoni ya zo maka

Fir'auna da samudawa

A'aha! waɗanda suka kafirta suna cikin ƙaryatawa

Alhali, Allah daga bayansu, Mai kewaye su ne (da sanin Sa)

A'aha! Shi Alƙur'ani ne mai girma

A cikin Allo tsararre