Hausa - Chapter 84 - Al-Inshiqaq

Idan sama ta kece

Ta saurari Ubangijinta, kuma aka wajabta mata yin sauraron

Kuma idan ƙasa aka miƙe ta

Kuma ta jefar da abin da yake a cikinta, ta wofinta daga kome

Kuma ta saurari Ubangijinta, aka wajabta mata yin sauraren

Ya kai mutum! Lalle ne kai mai aikin wahal da kai ne zuwa ga Ubangijinka, wahala mai tsanani, To, kai mai haɗuwa da Shi ne

To, amma wanda aka bai wa littafinsa da damansa

To, za a yi masa hisabi, hisabi mai sauƙi

Kuma ya juya zuwa ga iyalinsa (a cikin Aljanna), yana mai raha

Kuma amma wanda aka bai wa littafinsa, daga wajen bayansa

To, za shi dinga kiran halaka

Kuma ya shiga sa'ir

Lale ne shi, ya kasance (a duniya) cikin iyalinsa yana mai raha

Lalle ne ya yi zaton ba zai komo ba

Na'am! Lalle ne, Ubangijinsa Ya kasance Mai gani gare shi

To, ba sai Na rantse da shafaƙi ba

Da dare, da abin da ya ƙunsa

Da wata idan (haskensa) ya cika

Lalle ne kuna hawan wani hali daga wani hali

To, me ya same su, ba su yin imani

Kuma idan an karanta Alkur'ani a kansu, ba su yin tawali'u

Ba haka ba! waɗanda suka kafirta, sai ƙaryatawa suke yi

Alhali Allah Shi ne Mafi sani ga abin a suke tarawa

Saboda haka, ka yi musu bushara da azaba mai raɗaɗi

Face waɗanda suka yi imani, suka aikata ayyukan ƙwarai, suna da wani sakamako wanda ba ya yankewa