Kinyarwanda - Chapter 51 - Adh-Dhariyat

Ndahiriye ku miyaga ihuha igatatanya (ibicu)

No ku bicu biremereye bitwara amazi (imvura)

No ku mato agenda mu buryo bworoshye

No ku bamalayika bashinzwe gukwirakwiza (amafunguro, imvura n’indi migisha) ku bw’itegeko (rya Allah)

Mu by’ukuri, ibyo musezeranywa (izuka n’ibindi bizaba ku munsi w’imperuka) ni impamo

Kandi rwose, kuzagororerwa (cyangwa guhanwa ku bakoze ibibi) bizabaho nta kabuza

Ndahiriye ku kirere kirimo amayira ameze neza

Rwose mufite imvugo zitandukanye (ku byerekeye intumwa Muhamadi ndetse n’iyi Quran)

Uteshwa (gukurikira Quran n’intumwa Muhamadi) ni uwateshejwe (gukurikira ukuri)

Abanyabinyoma baravumwe

Babandi bari mu bujiji, barangaye

Barabaza igihe umunsi w’ibihembo uzabera

(Uzaba ari) umunsi bazaba bari mu muriro bahanwa

(Bazabwirwa bati) "Ngaho nimusogongere ibihano byanyu; ibi ni byo mwajyaga musaba ko byihutishwa

Mu by’ukuri, abatinya Allah bazaba bari mu busitani n’imigezi (mu Ijuru)

Bishimisha mu byo Nyagasani wabo yabahaye. Mu by’ukuri, mbere bari abakora ibyiza

Bajyaga baryama gake mu ijoro (basenga Nyagasani wabo)

No mu gicuku (wabasangaga) basaba imbabazi (Allah)

No mu mitungo yabo, bajyaga bagira icyo bageneramo abasabirizi n’abakene bihishira

No ku isi hari ibimenyetso ku bemera badashidikanya

Ndetse no muri mwe ubwanyu (ibyo bimenyetso birimo). Ese ntimubona

No mu kirere hari amafunguro yanyu ndetse n’ibyo musezeranywa

Bityo, ndahiriye ku izina rya Nyagasani w’ikirere n’isi ko (ibyo musezeranywa) ari ukuri nk’uko kuvuga kwanyu (ari ukuri)

Ese wamenye iby’inkuru y’abashyitsi ba Aburahamu b’abanyacyubahiro

Ubwo binjiraga iwe bakavuga bati "Salamu (Amahoro nabe kuri mwe!)" Nuko akavuga ati "Salamu, bantu batazwi

Nuko arinyabya asanga ab’iwe, azana inyama z’inyana yokeje

Maze arazibegereza, (abonye batarambura amaboko ngo barye) aravuga ati "Ese ntabwo murya

Nuko arabishisha (abonye batariye). Baravuga bati "Witinya!" Hanyuma bamuha inkuru nziza (yo kuzabyara umwana) w’umuhungu uzaba afite ubumenyi (ku bijyanye na Allah)

Nuko umugore we aza yiyamira, akubita agashyi mu buranga bwe (atangara), aravuga ati "Umukecuru w’urubereri

Baravuga bati "Uko ni ko Nyagasani wawe yavuze. Mu by’ukuri, ni Ushishoza, Umumenyi uhebuje

(Aburahamu) aravuga ati "None ni iki kibagenza yemwe (ba malayika) mwoherejwe mwe

Baravuga bati "Rwose twoherejwe ku bantu b’inkozi z’ibibi

Kugira ngo tubamanurireho amabuye y’ibumba (ryo mu muriro)

(Ayo mabuye) yashyizweho ibimenyetso na Nyagasani wawe, akaba ari igihano ku barengera (imbago za Allah)

Nuko abemeramana (bari mu mudugudu w’inkozi z’ibibi) tuwubakuramo (kugira ngo ibihano bitabageraho)

Ariko nta n’abo twasanzemo uretse urugo rumwe rw’umwemeramana (Intumwa Loti)

Nuko (nyuma yo kuwurimbura) tuwusigamo ikimenyetso ku batinya ibihano bibabaza

No mu nkuru ya Musa (harimo isomo), ubwo twamwoherezaga kwa Farawo tumuhaye ibimenyetso n’ububasha bigaragara

Ariko Farawo yishingikirije ububasha yari afite, atera umugongo (yanga kwemera ubutumwa yari azaniwe), aravuga ati "Uyu ni umurozi cyangwa umusazi

Nuko tumufatana n’ingabo ze maze tubajugunya mu nyanja kandi agayitse (kubera ibikorwa bye by’ubuhakanyi)

No mu nkuru y’aba Adi (harimo isomo), ubwo twabohererezaga umuyaga ugumbahaye (usenya ntacyo usize)

Ntacyo wasigaga mu byo wahuraga nacyo utakigize umuyonga

No mu nkuru y’aba Thamudu (harimo isomo) ubwo babwirwaga bati "Nimwishimishe by’igihe gito

Ariko bigometse ku itegeko rya Nyagasani wabo, maze bakubitwa n’ikibatsi cy’umuriro w’inkuba bareba

Ntibashoboraga guhaguruka (ngo bahunge) cyangwa ngo bitabare

N’abantu ba Nuhu (ni uko twabagenje) mbere. Mu by’ukuri, bari abantu b’ibyigomeke

Kandi ikirere twacyubakanye imbaraga, ndetse dufite ubushobozi bwo kucyagura

N’isi twarayishashe; mbega ukuntu twayishashe neza

Bityo, nimuhungire kwa Allah. Mu by’ukuri, njye (Muhamadi) ndi umuburizi wanyu ugaragara umuturutseho

Kandi ntimuzabangikanye Allah n’ikigirwamana icyo aricyo cyose. Mu by’ukuri, njye (Muhamadi) ndi umuburizi wanyu ugaragara umuturutseho

Ni nk’uko, nta ntumwa n’imwe yoherejwe ku babayeho mbere yabo ngo babure kuvuga bati "Ni umurozi cyangwa umusazi

Ese (imvugo nk’izi) barazihererekanyaga? (Oya, si uko bimeze), ahubwo bose bari abantu barengera (imbibi za Allah)

Bityo, (yewe Muhamadi) birengagize kandi ntuzabigayirwa (kuko wamaze gusohoza ubutumwa)

Unibutse kuko mu by’ukuri, urwibutso rugirira akamaro abemeramana

Kandi nta kindi naremeye amajini n’abantu bitari ukugira ngo bansenge

Simbakeneyeho amafunguro, ndetse nta n’ubwo mbakeneyeho ko bangaburira

Mu by’ukuri, Allah ni we Utanga amafunguro, Nyirimbaraga, Ukomeye bihebuje

Kandi rwose abakora ibibi bazagira umugabane (w’ibihano) umeze nk’umugabane bagenzi babo bababanjirije babonye; bityo, binsaba kwihutisha (kubahana)

Ibihano bikomeye bizaba kuri babandi bahakanye umunsi basezeranyijwe