Kinyarwanda - Chapter 52 - At-Tur

Ndahiriye ku (Musozi wa) Twuri

No ku gitabo cyanditse (Quran)

(Cyanditswe) ku mpapuro zikozwe mu ruhu (rusukuye) ruramburwa (kugira ngo gisomwe)

No ku nzu (yo mu ijuru) ihora isurwa (n’abamalayika)

No ku gisenge gihanitse (ikirere)

No ku nyanja zuzuye (amazi)

Mu by’ukuri, ibihano bya Nyagasani wawe bizabaho nta kabuza

Umunsi ikirere kizatigita umutingito (ukomeye)

N’imisozi ikagenda (nk’uko ibicu bigenda)

Kuri uwo munsi ibihano bikomeye bizaba ku bahinyuye (ukuri)

Babandi bahugira mu kwishimisha mu biganiro byuzuye ibinyoma, bidafite akamaro

Umunsi bazasunikirwa mu muriro wa Jahanamu ku ngufu

(Bazabwirwa bati) "Uyu ni wo muriro mwajyaga muhinyura

Ese ibi (bihano mubona) ni uburozi cyangwa ntimubona (ko mugiye kwinjizwa mu muriro)

Ngaho nimuwinjiremo, kandi mwabyihanganira cyangwa mutabyi- hanganira, byose ni kimwe. Mu by’ukuri, (ibyo muri kubona) ni ibihembo by’ibyo mwakoraga

Mu by’ukuri, abatinya Allah bazaba bari mu busitani n’inema (bihoraho)

Binezeza mu byo Nyagasani wabo yabahaye, ndetse no kuba Nyagasani wabo yabarinze ibihano by’umuriro

(Bazabwirwa bati) "Nimurye munanywe kandi mugubwe neza kubera ibyo mwakoze

Bazaba begamye ku bitanda bitondetse ku murongo.Tuzanabashyingira Huur ul- a’in (abagore bo mu Ijuru b’igikundiro, b’amaso manini)

Naho babandi bemeye maze ababakomokaho bakabakurikira mu kwemera, tuzabahuza n’ababakomotseho (mu ijuru), kandi ntacyo tuzigera tugabanya mu bikorwa byabo. Buri muntu azabazwa ibyo yakoze

Tuzabaha imbuto n’inyama (by’amoko yose) bazajya bifuza

Bazajya bahererekanyamo ibirahure (by’ikinyobwa cya divayi), kitazabatera (gusinda ngo bavuge) amagambo adafite akamaro cyangwa ngo kibatere gukora ibyaha

Bazaba bazengurukwamo n’abahungu b’abahereza babo, bameze nk’inigi zishashagirana (Lu’ulu’u) zikiri mu bubiko bwazo

Bamwe muri bo bazajya bahindukira (barebe) bagenzi babo, babazanya

Bavuga bati "Mbere (ku isi) twabaga turi mu miryango yacu dufite ubwoba n’impungenge (z’ibihano bya Allah)

None Allah yatugororeye, aturinda ibihano by’umuriro utwika

Mu by’ukuri, mbere twajyaga tumusenga (wenyine). Rwose ni we Mugiraneza, Nyirimbabazi

Bityo, (yewe Muhamadi) komeza wibutse! Mu by’ukuri, ku bw’ingabire za Nyagasani wawe (zo kuba warahawe ubutumwa), ntabwo uri umupfumu cyangwa umusazi (nk’uko babivuga)

Cyangwa (abahakanyi) baravuga bati "(Muhamadi) ni umusizi, reka tumutege iminsi (azapfe nk’uko abandi basizi bapfuye)

Babwire uti "Ngaho nimutegereze, mu by’ukuri, ndi kumwe namwe mu bategereje

Cyangwa imitekerereze yabo ni yo ibategeka (kuvuga) ibyo? Cyangwa ahubwo ni abantu barengera (imbibi za Allah)

Cyangwa bavuga ko (Qur’an) yayihimbiye? (Oya), ahubwo ntibemera

Ngaho nibazane inkuru zimeze nk’iziyivugwamo (Quran), niba koko ari abanyakuri

Ese bibwira ko baremwe ntawe ubaremye, cyangwa ni bo biremye

Cyangwa bibwira ko baremye ibirere n’isi? Ahubwo ntibizera

Cyangwa bibwira ko bafite ibigega bya Nyagasani wawe? Cyangwa ni bo bagenga (b’isi, bakora ibyo bashatse)

Cyangwa bibwira ko bafite urwego buririraho bajya (mu ijuru) ngo bumvirize ibivugirwayo? Ngaho umwumviriza wabo nazane ibimenyetso simusiga

Cyangwa bibwira ko (Allah) afite abakobwa gusa, mwe mukagira abahungu

Cyangwa bibwira ko (wowe Muhamadi) ubasaba igihembo, none bakaba baremererwa n’ubwishyu

Cyangwa bibwira ko bazi ibyihishe, bakaba bandika (ibyo bishakiye, badakeneye ibyo ubabwira)

Cyangwa baba bakugambanira (yewe Muhamadi)? Nyamara abahakanye ni bo bazahanirwa ubugambanyi bwabo

Cyangwa bafite indi mana itari Allah? Ubutagatifu ni ubwa Allah kandi ntaho ahuriye n’ibyo bamubangikanya (nabyo)

N’iyo baza kubona igice cy’ikirere kigwa hasi, bari kuvuga bati "Ni igicu gicucitse

Bareke kugeza ubwo bazahura n’umunsi wabo, bazagwa igihumure (kubera ibihano)

Umunsi imigambi mibisha yabo itazagira icyo ibamarira, ndetse nta n’ubwo bazatabarwa

Kandi mu by’ukuri, abakora ibibi bazahanishwa ibindi bihano (ku isi) mbere y’ibyo (ku munsi w’imperuka); ariko abenshi muri bo ntibabizi

Bityo (yewe Muhamadi), ihanganire itegeko rya Nyagasani wawe, kuko mu by’ukuri tuguhozaho ijisho. Ndetse unasingize ikuzo rya Nyagasani wawe igihe ubyutse (ugiye gusenga)

No mu ijoro ujye umusingiza, ndetse n’igihe urumuri rw’inyenyeri ruba rugenda rukendera