Kinyarwanda - Chapter 68 - Al-Qalam

Nuuni139 Ndahiriye ku ikaramu no ku byo (abamalayika n’abantu) bandika

Ku bw’ingabire za Nyagasani wawe (z’ubutumwa wahawe), ntabwo wowe (Muhamadi) uri umusazi

Kandi mu by’ukuri, uzahabwa ibihembo bidashira (ku bw’ingorane uhura nazo)

Rwose mu by’ukuri, ufite ubupfura buhambaye

Bityo, vuba aha uzabona n’abo (abahakanyi) babone

Umusazi muri mwe (uwo ari we)

Mu by’ukuri, Nyagasani wawe ni we uzi neza uwayobye inzira ye, kandi ni na we uzi neza abayobotse

Bityo, ntukumvire abahinyura

Bifuje ko waborohera (ukabakorera ibyo bashaka) na bo bakakorohera (ntibakurwanye)

Kandi ntukumvire buri (muntu) urahira kenshi unasuzuguritse

Umuneguzi wa cyane, unabunza amagambo

Ubuza ibyiza, urengera, umunyacyaha

Uw’umutima winangiye, akaba atanazwi inkomoko ye (kwa se)

N’ubwo yaba afite umutungo mwinshi n’urubyaro (rwinshi)

Iyo asomewe amagambo yacu, aravuga ati "Ni inkuru z’abo hambere

Tuzamushyiraho ikimenyetso ku mutonzi (w’izuru rye)

Mu by’ukuri, (abantu b’i Maka), twarabagerageje nk’uko twagerageje abantu bari bafite umurima ubwo barahiraga ko rwose bawusarura mu rukerera

Ariko ntibavuze In-sha-Allah (Imana nibishaka)

Bityo, ikiza (inkongi y’umuriro) giturutse kwa Nyagasani wawe kirawugota, mu gihe bo bari baryamye

(Umurima wabo) uhinduka nk’uruhira

Nuko bucyeye barahamagarana

Bagira bati "Nimuzindukire mu murima wanyu niba mugikomeje umugambi wo kuwusarura

Nuko bagenda bongorerana

Ko uyu munsi nta mukene n’umwe uri buwinjiremo (umurima)

Nuko bazinduka bagana (mu murima wabo) biyumvamo ubushobozi

Maze bawubonye baravuga bati "Mu by’ukuri, twayobye (inzira)

Ahubwo twimwe (umusaruro wawo, kubera umugambi wacu mubi wo kwima abakene)

Ushyira mu gaciro muri bo aravuga ati "Sinari nababwiye ko iyo muza gusingiza (Allah mukanamushimira, mukanavuga muti: In-sha-Allah, mutari guhura n’ibi byago)

Baravuga bati "Ubutagatifu ni ubwa Nyagasani wacu, mu by’ukuri twari inkozi z’ibibi

Nuko bamwe batangira guhindukirira abandi (bitana bamwana) bagayana

Baravuga bati "Mbega ishyano tubonye! Mu by’ukuri, twari abarengera (imbibi za Allah)

Hari ubwo Nyagasani wacu yadushumbusha (umurima) mwiza kuwuruta. Rwose twerekeje ibyifuzo byacu kwa Nyagasani wacu

Uko ni ko ibihano (bya Allah ku isi bimera)! Ariko ibihano byo ku munsi w’imperuka birahambaye cyane, iyaba bari babizi

Mu by’ukuri, abatinya Allah bazagororerwa Ijuru ryuje ingabire kwa Nyagasani wabo

Ese abicisha bugufi imbere ya Allah (Abayisilamu) twabafata kimwe n’inkozi z’ibibi

Cyangwa mwaba mufite igitabo mubisomamo (ko abicisha bugufi ari kimwe n’inkozi z’ibibi)

Ese mu by’ukuri, mwaba mufitemo (muri icyo gitabo) ibyo mutoranya

Cyangwa mwaba mufitanye natwe amasezerano ntakuka yo kuzabona ibyo muzifuza kuzageza ku munsi w’imperuka

Babaze (yewe Muhamadi) uti "Ni nde muri bo wabyishingira (akabibera umuhamya)

Cyangwa se (abahakanyi) baba bafite ibigirwamana (bizabafasha ku munsi w’imperuka)? Ngaho nibazane ibyo bigirwamana byabo niba ari abanyakuri

(Ibuka) umunsi (ibintu bizaba bikomeye kandi biteye ubwoba), ubwo igice cyo hepfo cy’ukuguru (kwa Allah) kizagaragarizwa (ibiremwa), nuko (abahakanyi) bagahamagarirwa kubamira (Allah) ariko ntibabishobore

Bazaba bubitse amaso (kubera ikimwaro), batwikiriwe n’agasuzuguro. Nyamara bajyaga bahamagarirwa kubamira Allah ari bazima (ntibabikore kubera ubwibone)

Bityo, (yewe Muhamadi) ndekera uwo ari we wese uhinyura iyi nkuru (Qur’an). Rwose (abo bayihinyura) tuzabajyana buhoro buhoro (tubaganisha mu bihano) mu buryo batazi

Nzanabaha igihe (bibwire ko batazahanwa); mu by’ukuri, imigambi yanjye irakomeye

Cyangwa bibwira ko (wowe Muhamadi) ubasaba igihembo, none bakaba baremererwa n’ubwishyu

Cyangwa bibwira ko bazi ibitagaragara, bakaba bandika (ibyo bishakiye, badakeneye ibyo ubabwira)

Bityo (yewe Muhamadi), ihanganire itegeko rya Nyagasani wawe, kandi ntube nk’umwe wamizwe n’ifi (Umuhanuzi Yunusu) ubwo yadutakambiraga n’agahinda kenshi

Iyo bitaza kuba ingabire iturutse kwa Nyagasani we yamugezeho, (ifi) yari kumuruka ku musenyi wo ku nkombe kandi akabigayirwa

Nuko Nyagasani we aramutoranya, maze amushyira mu ntungane

Kandi iyo abahakanye bumvaga urwibutso (Qur’an), bakurebeshaga indoro ikomeye, bifuza ko wagwa igihunga kugira ngo bavuge bati "Rwose ni umusazi

Kandi (Qur’an) nta kindi iri cyo usibye kuba ari urwibutso ku biremwa byose