Kinyarwanda - Chapter 70 - Al-Maarij

Usaba yisabiye ko ibihano biza

(Nyamara ibyo bihano) ntibizagira gikumira ku bahakanyi

(Bizabageraho ku munsi w’imperuka) biturutse kwa Allah, Nyir’ubutagatifu bw’ikirenga

Abamalayika ndetse na Roho (Malayika Jibrilu) bazamuka iwe (Allah) mu gihe cy’umunsi umwe ungana n’imyaka ibihumbi mirongo itanu (ya hano ku isi, abandi batari bo bakoresha muri urwo rugendo)

Bityo, ihangane (yewe Muhamadi) wifashishije ukwihangana kwiza

Mu by’ukuri, bo babona (imperuka) iri kure

Nyamara twe tukabona iri hafi

Umunsi ikirere kizaba nk’umushongi w’umuringa

N’imisozi ikaba nk’ipamba

Kandi nta nshuti izigera ibaza iby’inshuti yayo

N’ubwo bazaba barebana (ndetse bakanamenyana, ariko ntacyo bazamarirana). Kubera ibihano by’uwo munsi, umunyabyaha azifuza gutangaho inshungu abana be

Umugore we, umuvandimwe we

N’umuryango we yahungiragaho (akiri ku isi igihe ahuye n’ibimuteye ubwoba)

Ndetse n’abari mu isi bose (azifuza kubatangaho inshungu) kugira ngo arokoke

Ariko ntacyo bizamumarira! Ahubwo bizaba umuriro ugurumana

Ukuraho uruhu rw’umubiri

Uzaba uhamagara uwo ari we wese wateraga umugongo akanirengagiza (ukuri gukubiye muri Qur’an)

Akanakusanya (umutungo) akawuhunika (ntawukoreshe mu nzira ya Allah)

Mu by’ukuri, umuntu yaremanywe ukutihangana

Naho icyiza cyamugeraho, akaba umunyabugugu cyane

Uretse abakora amasengesho

Babandi bahozaho amasengesho yabo

Na babandi bagena umugabane uzwi (Zakat) mu mitungo yabo

Wagenewe usaba n’uwiyumanganyije (nyamara akeneye ubufasha)

Na babandi bemera umunsi w’ibihembo

Na babandi batinya ibihano bya Nyagasani wabo

Kubera ko mu by’ukuri, nta n’umwe warokoka ibihano bya Nyagasani wabo

Na babandi barinda ubwambure bwabo (ubusambanyi)

Uretse ku bagore babo cyangwa se ku bo bafiteho ububasha (abaja). Mu by’ukuri, bo ntibabigayirwa

Ariko abazashaka (kwinezeza) ku batari abo (bavuzwe), rwose abo bazaba batandukiriye

Na babandi barinda ibyo baragijwe ndetse bakubahiriza n’amasezerano yabo

Na babandi batanga ubuhamya bw’ukuri

Na babandi bahozaho amasengesho yabo (ku bihe byagenwe)

Abo bazajya mu busitani (Ijuru) kandi bubashywe

Nonese ni iyihe mpamvu ituma abahakanyi bakugana (yewe Muhamadi) bihuta (bashaka kukumva, kandi batakwemera)

(Bicaye) mu matsinda iburyo n’ibumoso bwawe

Ese buri wese muri bo yibwira ko azinjira mu Ijuru ryuje ingabire

Ntabwo ari ko bimeze! Mu by’ukuri, twabaremye tubakomoye mu byo bazi143 (ariko banga kwemera)

Bityo, ndahiye ku izina rya Nyagasani w’Iburasirazuba bwose n’Iburengerazuba bwose, ko rwose dushoboye

Kubasimbuza abeza kubarusha, kandi ntibyatunanira

Bityo, bareke bavuge ibidafite umumaro, banikinire kugeza ubwo bazahura n’umunsi wabo basezeranyijwe

Umunsi bazasohoka mu mva zabo bihuta, nk’uko bihutaga bagana ibigirwamana byabo

Bazaba bubitse amaso (kubera ikimwaro), batwikiriwe n’agasuzuguro. Uwo ni wo munsi basezeranyijwe