Kinyarwanda - Chapter 75 - Al-Qiyamah

Ndahiriye ku munsi w’izuka

Nanarahiriye ku mutima (w’umwemeramana) ugaya nyirawo (kubera guteshuka ku nzira igororotse)

Ese umuntu (w’umuhakanyi) akeka ko tutazashobora gukoranya amagufa ye (tumuzura)

Nibyo! Dushoboye no kuringaniza imitwe y’intoki ze (imirongo iyiriho igasubira nk’uko yari imeze mbere)

Ahubwo umuntu (ahakana izuka) ashaka icyatuma akomeza kwibera mu bwangizi

Arabaza (akerensa) ati "Uwo munsi w’izuka uzaba ryari

(Uwo munsi uzaba) igihe amaso azakanaguzwa (kubera ubwoba)

N’ukwezi kukazima

Ndetse izuba n’ukwezi bizahurizwa hamwe (kimwe kinjire mu kindi)

Icyo gihe umuntu azavuga ati "Ni he ho guhungira

(Azabwirwa ati) "Oya! Ntaho guhungira hahari

Kuri uwo munsi, igarukiro rizaba ari kwa Nyagasani wawe (wenyine)

Kuri uwo munsi, umuntu azabwirwa ibyo yakoze mbere n’ibyo yaherutse (byaba ibyiza cyangwa ibibi)

Ahubwo umuntu azibera umuhamya w’ibyo yakoze (kuko ingingo z’umubiri we ari zo zizamushinja ibyo yakoze)

Kabone n’ubwo yatanga impamvu ze (agamije kwiregura)

(Yewe Muhamadi), ntukanyeganyeze ururimi rwawe ugira ubwira (bwo kuvuga ibyo uhishurirwa, ahubwo ujye utega amatwi wumve ibyo uba uhishurirwa na Malayika Jiburilu)

Mu by’ukuri, ni twe tuzayikusanyiriza (mu gituza cyawe) kandi ni natwe (tuzakwigisha) kuyisoma (Qur’an)

Nituyigusomera (binyuze kuri Malayika wacu), ujye ukurikira isomwa ryayo

Hanyuma ni twe (Allah) tuzayigusobanurira

(Ibyo mukeka ko mutazazurwa mukanabazwa ibyo mwakoze) si ko biri; ahubwo mukunda ubuzima bwo ku isi butaramba

Kuri uwo munsi, uburanga (bw’abemeramana) buzaba burabagirana

Bureba Nyagasani wabwo

Kuri uwo munsi kandi, uburanga (bw’abahakanyi) buzaba bwijimye

Bibaza ko bagiye guhura n’ishyano

Oya! Ahubwo iyo (roho) igeze mu ngoto (igihe cyo gupfa)

Hanyuma hakavugwa ngo "Ni nde wamutabara (akamurinda urupfu)

Nuko (ugiye gupfa) akamenya ko igihe cyo gutandukana (gupfa) cyageze

Maze (kubera ububabare bwo gukurwamo roho), ukuguru kwe kuzahuzwa n’ukundi

Kuri uwo munsi, (wowe muntu ukuwemo roho) uzerekezwa kwa Nyagasani wawe

Ariko (umuhakanyi) ntiyigeze yemera ndetse nta n’ubwo yigeze asenga

Ahubwo yahinyuye (Qur’an) maze ayitera umugongo

Hanyuma akagenda yibona yerekeza mu muryango we

Ufite akaga (yewe muntu w’umuhakanyi)! Kandi nanone ufite akaga

Nanone ufite akaga (yewe muntu w’umuhakanyi)! Kandi nanone ufite akaga

Ese umuntu yibwira ko azarekwa gusa (atabajijwe ibyo yakoze ngo abihemberwe cyangwa ngo abihanirwe)

Ese ntiyari intanga zisohorwa

Hanyuma akaba urusoro rw’amaraso, maze Allah akamurema, akanamutunganya (akaba umuntu wuzuye)

Maze akamuremamo ibitsina bibiri: ikigabo n’ikigore

Ese uwo (Allah ukora ibyo) si we ushoboye kuzura abapfuye