Kinyarwanda - Chapter 77 - Al-Mursalat

Ndahiriye ku (miyaga) yoherezwa ikurikiranye

No ku (miyaga) y’inkubi

No ku (mirongo ya Qur’an) itandukanya ukuri n’ikinyoma

No ku (bamalayika) bazanira amahishurirwa (intumwa za Allah)

Kugira ngo bivaneho urwitwazo cyangwa kugira ngo biburire

Mu by’ukuri, ibyo musezeranywa bizasohora

Igihe inyenyeri zizakurwaho (urumuri rwazo rukazima)

N’igihe ikirere kizasandazwa

N’igihe imisozi izariturwa

N’igihe intumwa zizakoranyirizwa hamwe ku gihe cyagenwe (kugira ngo zitange ubuhamya ku bo zatumweho)

Ni uwuhe munsi (ibyo byose) byarindirijwe

Ni ku munsi w’urubanza (ubwo Allah azakiranura ibiremwa)

Ni iki cyakumenyesha umunsi w’urubanza

Ibihano bikaze bizaba kuri babandi bahinyura (umunsi w’izuka)

Ese ntitworetse abo hambere

Nuko tukabakurikiza abo hanyuma

Uko ni ko tugenza inkozi z’ibibi

Ibihano bikaze bizaba kuri babandi bahinyura (umunsi w’izuka)

Ese ntitwabaremye mu mazi asuzuguritse

Nuko tukayashyira mu cyicaro gitekanye (nyababyeyi)

Kugeza igihe kizwi

Nuko tukagena (igihe umwana avukira) kandi ni twe duhebuje mu kugena

Ibihano bikaze bizaba kuri babandi bahinyura (umunsi w’izuka)

Ese isi ntitwayigize ihuriro

Ry’abazima (bayituyeho) n’abapfuye (bayishyinguwemo)

Hanyuma tukanayishyiramo imisozi miremire, ndetse tukabaha n’amazi y’urubogobogo

Ibihano bikaze bizaba kuri babandi bahinyura (umunsi w’izuka)

(Abahakanyi bazabwirwa bati) "Ngaho nimujye (mu muriro wa Jahanamu) mwajyaga muhinyura

Ngaho nimujye mu gicucu (cy’umwotsi wa Jahanamu) kigabanyijemo amashami atatu

Nta bwugamo gitanga ndetse nta n’ubwo kirinda ikibatsi cy’umuriro

Mu by’ukuri, (uwo muriro) utera ibishashi bingana n’inyubako nini

(Ibyo bishashi) bimeze nk’ingamiya z’amagaju

Ibihano bikaze bizaba kuri babandi bahinyura (umunsi w’izuka)

Uwo uzaba ari umunsi (batazashobora kugira) icyo bavuga

Kandi nta n’uburenganzira bazahabwa bwo kugira urwitwazo batanga

Ibihano bikaze bizaba kuri babandi bahinyura (umunsi w’izuka)

Uwo uzaba ari umunsi w’urubanza, ubwo (mwe) n’abo hambere tuzaba twabakoranyirije hamwe

Niba hari amayeri mufite (yo guhunga ibihano byanjye), ngaho nimuyankorere

Ibihano bikaze bizaba kuri babandi bahinyura (umunsi w’izuka)

Mu by’ukuri, abatinya Allah (ku munsi w’imperuka) bazaba bari hagati y’ibicucu (by’ibiti byo mu ijuru) ndetse n’amasoko (atemba)

(Bazaba bafitemo) n’imbuto (z’amoko anyuranye) bazajya bifuza

(Bazabwirwa bati) "Nimurye, munywe kandi mugubwe neza kubera ibyo mwakoze

Mu by’ukuri, uko ni ko tugororera abakoze neza

Ibihano bikaze bizaba kuri babandi bahinyura (umunsi w’izuka)

(Yemwe bahakanyi) "Nimurye munishimishe by’igihe gito (mu buzima bwo ku isi), kuko rwose muri inkozi z’ibibi

Ibihano bikaze bizaba kuri babandi bahinyura (umunsi w’izuka)

N’iyo babwiwe bati "Nimwuname (musenge)!" Ntabwo bunama (ngo basenge)

Ibihano bikaze bizaba kuri babandi bahinyura (umunsi w’izuka)

Nonese nyuma y’iyi (Qur’an) ni ayahe magambo yandi bazemera