Back to Languages

    Luyia - Chapter 23

    Translation by Mohammad Ramadhan Sebwa, Ramadhan Hajj Ndeka, Ismail Were, Musa Murasi Salim Kukuya, Yusuf Shiundu Malala, Yahya Wafula Ojwang, Haroon Albert Msah

    Verse 1

    Toto Abasuubili bamala okhubura

    Verse 2

    Balia abehotselesinjia mukhulaama khwabu

    Verse 3

    Nende Balia aberetsanga ehale nende amakhuwa kabulamwo oluchendo

    Verse 4

    Nende Balia abarusinjia eshihanwa (izakaa)

    Verse 5

    Nende Balia abalindanga ebiekenyi biabu

    Verse 6

    Halali khubakhasi babu nohomba balia abemikhono chiabu emilunji chiatila, kho abo shibafunanibwa tawe

    Verse 7

    Ne ulia wenya kalali kano tawe abo nibo babura eshichelo

    Verse 8

    Nende balia bahenganga obwisikwa nende indakano yabu

    Verse 9

    Nende balia balumiililanga khumalaamo kabu (iswala)

    Verse 10

    Abo nibo balichelama. (balibukula)

    Verse 11

    Nibo abalichelama Firdaus mwikulu balimenyamwo tsinyanga tsiosi

    Verse 12

    Ne toto khwaloonga Omundu okhurulana nende liloba

    Verse 13

    Mana nikhumulonga okhurulana nende amatsi kolwibulo, akarebwa akakwanile okhuba

    Verse 14

    Mana nikhukalonga okhuba lilika, mana nikhulonga lilika okhuba shinga eshitonye shieyinyama, mana nikhulonga eshitonye shieyinyama okhubamwo ebikumba, mana nikhubifunikha ibikumba inyama, mana nikhumukhola okhuba eshilonje shindi. Niwoluyali muno Nyasaye Omulonji Omulayi muno umalayo

    Verse 15

    Mana toto enywe imbeli wakano mulifwa

    Verse 16

    Mana toto enywe mulilamusibwa inyanga yeyindukho

    Verse 17

    Ne toto khwalonga hekulu wenyu tsinjila saba, ne efwe shikhwali ebebilila eshilonje shiosi shiosi tawe

    Verse 18

    Ne khweshia amatsi kayelele okhurula mwikulu mana nikhukawotselesia khwiloba, ne toto efwe khuli nende obunyali bwokhukayiniaho

    Verse 19

    Khu amatsi ako nikhubamesilia emikunda chietsitende nende tsizabibu, munyoolangamwo ebiamo ebinji biamulitsanga

    Verse 20

    Nende omusala kurulanga khushikulu shia Sinai kurusinjia amafura okhuba kokhutongwamwo khubalia

    Verse 21

    Ne toto mutsisolo mulimwo nende ameeko, khubanywesinjia khubilia bili mutsinda tsiatsio, ne munyoolangamwo obukhoonyi obunji ne etsindimwo mutsiliitsanga

    Verse 22

    Ne hekulu watsio nende khubwaro muchingungwa

    Verse 23

    Netoto khwaruma Nuhu khubandu bebe, mana naboola mbu; “Enywe Abandu banje mulaame Nyasaye mubula Nyasaye wundi owulali Ye tawe, kho shimuritsangakhwo tawe

    Verse 24

    Mana omukanda kwabakhongo babakhayi nikuboola mbu; “ uno shini shiosishiosi tawe halali omundu shinga enywe, yenyanga okhwikhola omulayi khwinywe, ne Nyasaye yenyanga(okhubechesia) yakheshiye Abamalaika efwe shikhwawulilakhwo kano khubakofu befu bakhale tawe

    Verse 25

    Uno Shali shiosi shiosi tawe halali ni Omundu uli nende lilalu. Mumulindilile butswa hatiti

    Verse 26

    (Nuhu) naboola mbu; “Nyasaye wanje habine toto bano bamalile okhukhaya”

    Verse 27

    Mana nikhumufimbulila mbu; “Kasia eliaro, embeli wetsimoni tsiefu nende obufimbuli kho olwa likhuwa liefu liliula,(eshialo nishitsula amatsi) awo winjisie buli tsimbia tsibili tsibili. Nende Abandu bobo halali ulia owelikhuwa lilie liamala okhubura, mbu oyo yakhasishe, kho olaboola ninasi khubalia abakholela obubii emioyo chiabu tawe. Toto abo balasishibwa.’’

    Verse 28

    Ne olwa witsa okhunyoola obwihotselefu ewe nende abali halala ninawe mubwaro obo, boola mbu; “oluyali lwosi ni lwa Nyasaye owakhuhabina efwe okhurulana nende Abandu abonooni”

    Verse 29

    Ne boola mbu “Nyasaye wanje, unzishie habundu wetsimbabaasi toto ewe newe omulayi muno wokhwishia.”

    Verse 30

    Toto mukano khulinende ameeko amakhongo, ne toto efwe khwali bokhubakholela amatemo

    Verse 31

    Mana nikhurera inyuma wabu Abandu bandi

    Verse 32

    Mana nikhubarumila Abarumwa okhurula mubo, okhubaboolela mbu; “mulaame Nyasaye, mubula Nyasaye wundi owulali ye tawe, shimuritsangakhwo tawe?”

    Verse 33

    Mana omukanda kwabakhongo babakhayi okwakhaya nikuyingasia omukhung’ano kweyindukho, mana nikhubayindiasia khubulamu bwo khushialo, baboola mbu; “Uno shini shiosishiosi tawe halali ni Omundu shinga enywe, elitsanga ebiamulitsanga, ne anywetsanga ebia munywetsanga.”

    Verse 34

    Ne nimuloonda Omundu butswa shinga enywe, mulaba musishile

    Verse 35

    Abalakanga mbu nimumalile okhufwa nimubeele liloba nende ebikumba, mbu mulilamusibwa

    Verse 36

    Shikanyalikhana tawe , shikanyalikhana tawe, akamulakungwa ako

    Verse 37

    Toto buno ni obulamu bwo khushialo, khufwitsanga nekhumenyanga, ne efwe shikhulilamusibwa tawe

    Verse 38

    Toto uno ni Omundu wachishilasa Nyasaye obubeyi ne efwe shikhumusuubila tawe

    Verse 39

    Yaboola mbu; “Nyasaye wanje habine khukabayingasiyie

    Verse 40

    Naboola mbu; “Ahambi hano betsa okhwiyitsulisia.”

    Verse 41

    Mana oluyoka nilubabukula khubwatoto mana nikhubakhola shinga amakokha kabenganga khumatsi, nibakorera ehale Abandu ababii

    Verse 42

    Mana nikhurera inyuma wabu Abandu bandi

    Verse 43

    Ne kubulao omukanda kunyala okhuranjilisia indukho yakwo nohomba okhusitia imbeli

    Verse 44

    Mana nikhuruma Abarumwa befu, mulala inyuma wowundi. Buli omukanda shingala Omurumwa wabu yaboolela bamuyingasia. Nikhubalondiakho abandi mubo khubandi, mana nikhubakholela okhuba tsingano. Bakorera ehale Abandu balasuubilanga

    Verse 45

    Mana nikhuruma Musa nende Omusiani wabu Haruni halala nende ebimanyisio biefu, nende ebifune bili habulafu

    Verse 46

    Khwamuruma khu Firauni nende Abandu baye abakhongo, halali bo nibelola nibaba Abandu abafuuru

    Verse 47

    Nibaboola mbu; “Khusuubile Abandu babili bano balisa shinga efwe, ne Abandu babu ni Abasumba befu?”

    Verse 48

    Mana nibabayingasia mana nibaba mubalia abasikha

    Verse 49

    Ne toto khwahelesia Musa eshitabo mbu bakhaba bario banyoola okhulunjikha

    Verse 50

    Ne nikhukhola Omwana wa Mariamu nende nyina wuwe okhuba eshimanyisio, ne nikhubahelesia amelushilo, habundu achingukha hali nende obwihotselefu nende tsisebele tsia amatsi

    Verse 51

    Enywe Abarumwalieebilibwaebilayi ne mukhole amalayi, toto esie endi Omumanyi muno khukamukholanga

    Verse 52

    “Ne toto omukanda kwenyu kuno ni omukanda mulala, nasi esie endi Nyasaye wenyu omulesi , kho muurie”

    Verse 53

    Mana nibabusia hakari wabu likhuwa lino tsimbeka tsikabukhane. Buli omukanda nikusangalila akakuli ninakwo

    Verse 54

    Kho baleshesa mubukoyani bwabu okhula shinga ebise biula

    Verse 55

    Baparanga mbu bilia ebiakhubahelesinjia Omwandu nende Abana

    Verse 56

    Nibio bakhubaranjilisinjia khubulayi, halali abeene shibamanyile tawe

    Verse 57

    Toto balia behotselesinjia khulwa okhuria Nyasaye wabu Omulesi

    Verse 58

    Nende balia abasuubilanga ebimanyisio bia Nyasaye wabu Omulesi

    Verse 59

    Nende balia abalatsokaasinjia Nyasaye wabu tawe

    Verse 60

    Nende balia barusinjia abiabahebwa, emioyo chiabu nichiririre mbu balikalukha ewa Nyasaye wabu Omulesi

    Verse 61

    Abo nibo abanguyilanga amakhuwa amalayi, ne nibo bakaranjililanga

    Verse 62

    Nafu shikhutukhanga Omundu akaalanyala tawe, ne khuli nende eshitabo eshiboolanga katoto, nabo shibalikholelwa obubii tawe

    Verse 63

    Halali emioyo chiabu chili mubukoyano nende ako, ne bali nende ebikhole biabakholanga ebilali ebo (ebia Abandu abalayi bakholanga)

    Verse 64

    Okhula shinga khwitsa okhutila balia bali mubwokholo mubo, awo niwo wabalitsa okhulilikana

    Verse 65

    “Mulalilikana Nyangayino tawe, toto enywe shimulaona okhurulana ninafu tawe”

    Verse 66

    Toto mwasomelungwa tsinyaali tsianje, halali enywe mwakalushilanga inyuma nebisisilo bienyu

    Verse 67

    Nimwilola , nimuyilomalomakhwo eshilo (khu Ikurani) nimulechele

    Verse 68

    Koo! Shibaparangakhwo amakhuwa (akayetsa nako Omurumwa Muhammad) Nohomba kabetsela akaletsela bapapa babu beyimbeli

    Verse 69

    Nohomba shibamanya Omurumwa wabu tawe khomana nishichila nibamuyingasinjia

    Verse 70

    Nohomba baboolanga mbu; “(Omurumwa uno) ni omulalu? Halali yabetsela khubwatoto, ne abaanji mubo obwatoto bwabasinya

    Verse 71

    Ne obwatoto mulondanga obwikombi bwabu, likulu nende eshialo biakhabiyile nende ebilimwo biosi, Halali khwabarerera ametsulisio kabu, halali bo nende ametsulisio kabu beretsanga ehale

    Verse 72

    Nohomba abasabanga omurungo? Halali omurungo kwa Nyasaye wuwo nikwo omulayi, ne niye Omukabi omulayi muno umalayo

    Verse 73

    Ne toto ewe obalanganga khunjila ingolofu

    Verse 74

    Ne toto balia balasuubilanga mwikulu tawe beretsanga ehale nende injila eyo

    Verse 75

    Ne kata khubabeelanga tsimbabaasi mana khubarusilia obutinyu bwabali ninabo, bakhatsililile mubukori bwabu, nibakoyanile

    Verse 76

    Ne toto khwabahelesia eshinyasio (Eshilulu) halali shibakalushila Nyasaye wabu tawe, nohomba shibehotselesia tawe

    Verse 77

    Okhula shingala khwabekulila omuliango kweshinyasio eshilulu, awo niwo Abandu bawesiakho omwoyo

    Verse 78

    Ne ye niye owabalonjela amarwi nende tsimoni nende emioyo, ne matiti muno akamukhupanga orio

    Verse 79

    Naye niye owabaswania khushialo ne ni ewuwe amulikhung’asibwa

    Verse 80

    Ye niye uhelesinjia obulamu nende okhufwisia, ne amakalukhano keshilo nende eshitere ni akeke, koo shimumanyakhwo tawe

    Verse 81

    Halali baboolanga shingala Abandu bali imbeli baboolanga

    Verse 82

    Baboolanga mbu; “Koo olwakhuliba nikhufwile mana nikhuli liloba nende ebikumba, mbu khokhulilamusibwa?”

    Verse 83

    Toto khwalakwa kano nende bapapa befu bakhale, kano nitsingano tsiakhale butswa

    Verse 84

    Boola; “Liloba nende ebilimwo biosi nibiawina toto nikali mbu mumanyile”

    Verse 85

    Balaboola mbu; “Ni bia Nyasaye” boola: “koo shimwitsulilangakhwo tawe.”

    Verse 86

    Boola ni wina Omwami Omulesi wa makulu saba nende Omwami Omulesi weshisaala eshikhongo

    Verse 87

    Balaboola mbu; “Ni bia Nyasaye” Boola; “ kho koo shimuritsanga tawe?”

    Verse 88

    Boola; “ni wina womumukhono kukwe bulimwo obwami bwa buli eshindu naye niye ulindanga, nesishilindungwa eshia alenyele tawe, toto nimumanyile (mumbolelekhwo)

    Verse 89

    Balaboola mbu: “obunyali obo nibwa Nyasaye,” khoboola mbu; “Kho mukatibungwa murie

    Verse 90

    Khubarerere obwatoto halali toto abo ni ababeyi

    Verse 91

    Nyasaye abula Omwana yesiyesi , nohomba abulao Nyasaye wundi halala ninaye tawe. Kabetsanga kario buli Nyasaye yakhabukule eshiayaloonga ne abandi mubo bakhashilile abandi, toto Nyasaye ali ehale nende okhufumia khwabamufuminjia okho

    Verse 92

    Omumanyi wakefisile nende akali habulafu, ne ali hekulu muno, khukabalia bamutsokasinjia halala ninaye

    Verse 93

    Boola; “Nyasaye wanje ni unzechesia eshinyasio eshiabalakungwa

    Verse 94

    Nyasaye wanje Omulesi olasaasia halala nende Abandu ababii abo tawe

    Verse 95

    Netoto efwe okhukhwechesia akakhwalaka khuli abamanyala

    Verse 96

    Ikalila amabii khukhukhola amalayi efwe khumanyile muno akababoolanga

    Verse 97

    Ne boola mbu; “Nyasaye wanje Omulesi ndilinda khwiwe okhurulana nende eshibeyibeyi shia Mashetani.”

    Verse 98

    Ne ndiliinda khwiwe Nyasaye wanje Omulesi kalasitakhwo tawe

    Verse 99

    Okhuula Olwa lifwa liulila mulala wabu aboola mbu; “Nyasaye wanje ngalusia khushialo.”

    Verse 100

    Ndakhaba endio ndakhola amalayi kandalekha(Abamalaika balimukalusia mbu) Shikari kario tawe, ni likhuwa butswa lialomalomanga ye mwene, ne imbeli wabu khuli nende obulamu bwemakombe okhula inyanga yokhulamusibwa

    Verse 101

    Olwa olwika lulikhupwa owo olwikho shilulibaho inyanga eyo tawe, ne shibalireebana tawe

    Verse 102

    Kho balia abamalayi kabu kaliba amasiro abo nibo balibura

    Verse 103

    Ne balia abamalayi kabu kaliba amangu, abo betibia abeene, ne baliikhala mumulilo tsinyanga tsiosi

    Verse 104

    Omulilo kulinyibulula obweni bwabu, nabo baliyenyelamwo ameno khukhunyakhana

    Verse 105

    Koo! Tsinyali tsianje shimwasomelungwa nanyu nimutsiyingasia

    Verse 106

    Baliboola mbu; “Nyasaye wefu Omulesi, obubii bwefu bwakhuyinga muno, mana nikhuba Abandu abakori

    Verse 107

    Nyasaye wefu Omulesi khurusie mumulilo kuno,(okhukalusie khushialo khukhole amalayi,) nenikhukalulishila khandi khulaba ababii

    Verse 108

    Aliboola mbu; “Nyiremwo tsi!! Nemulalomialomia tawe.”

    Verse 109

    Toto omukanda kwaliwo kwabasumba banje, kwaboolanga mbu; “Nyasaye wefu khusuubile, kho khuleshele ebionono biefu, ne okhubeele tsimbabaasi nawe newe owetsimbabaasi okhushila boosi.”

    Verse 110

    Mana nimubakholela omachayo, mana okhula shinga babakoyania okhunzitsulila, nemwabatsekhanga

    Verse 111

    Toto esie abarunjile inyanga yino khulwa okhwifwila khwabu, abo nibo abalibura

    Verse 112

    Aliboola mbu; “Mwekhala ebise biyela birie khushialo, khukhubala khwemika?”

    Verse 113

    Baliboola mbu; “khwekhalamwo inyanga ndala nohomba ebise muyinyanga, kho reba balia ababalanga

    Verse 114

    Aliboola mbu; “Enywe shimwekhalamwo halali ebise bititi butswa, mumanyakhwo!.”

    Verse 115

    Koo! Muparanga mbu khwabaloonga eshikhaya butswa, ne mbu enywe shimulikalusibwa khwifwe tawe

    Verse 116

    Niwoluyali Nyasaye Omwami watoto, abulaho ulaamungwa khubwatoto halali Ye, Nyasaye weshisaala shioluyali

    Verse 117

    Ne ulia ulaamanga halala nende Nyasaye, nyasaye wundi, ye abula eshifune okhukhola ario, ne toto isabu yiyie ili khu Nyasaye wuwe Omulesi. netoto abakhayi shibalibura tawe

    Verse 118

    Ne boola mbu; “Nyasaye wanje! Leshela ne obeele tsimbabaasi, newe toto Omulayi wababeeli betsimbabaasi