Back to Languages
Luyia - Chapter 24 - An-Nur
Translation by Mohammad Ramadhan Sebwa, Ramadhan Hajj Ndeka, Ismail Were, Musa Murasi Salim Kukuya, Yusuf Shiundu Malala, Yahya Wafula Ojwang, Haroon Albert Msah — Permalink
Verse 1 — Surah An-Nur 24:1
(Ino) ni Isura eyakhweshia. Nenikhulachilamwo (amakhuwa amanji). Nikhwishiamwo tsinyaali tsinoosinjia , mwakhaba murio mwanyoola okhwitsulila
Verse 2 — Surah An-Nur 24:2
Omuyeyi omukhasi nende Omuyeyi omusatsa, mubakhupe buli mulala wabu emisharuti imia. ne mulabalolela eshisa tawe, Khukhubusia lilako lia Nyasaye lino nimuba toto mwasuubila Nyasaye nende inyanga yeyindukho, ne balole eshinyasio shiabu esho omukanda mubasuubili
Verse 3 — Surah An-Nur 24:3
Omusatsa omuyeyi (omutseke) shatilananga halali nende Omukhasi omuyeyi(omutseke), nohomba omukhasi omutsokaasi, ne omukhasi omuyeyi shatilananga ninaye tawe halali omusatsa omuyeyi, nohomba omutsokakaasi, ne ako kakaanibwa khubasuubili
Verse 4 — Surah An-Nur 24:4
Ne balia bachishilanga abakhasi abatswenufu (mbu bayeyele) mana bakhaye okhureera abaloli bane, mubakhuye emisharuti amakhumi munane, ne obuloli bwabu bulafuchililwa tawe, ne abo nibo aboononi
Verse 5 — Surah An-Nur 24:5
Halali balia abasaba eshileshelo inyuma wa ako, mana nibakhola ebikhole ebilayi. Toto Nyasaye ni omunji wobulesheli omunji wetsimbabaasi
Verse 6 — Surah An-Nur 24:6
Nebalia abachishilanga abakhasi babu ne nibabula abaloli halali bo abeene, kho awo obuloli bwamulala wabu bulaba okhurusia obuloli mara khane, khukhwitsuba khu Nyasaye, mbu toto ye ali mubaboolanga obwatieli
Verse 7 — Surah An-Nur 24:7
Ne olwa kharano yetsube mbu eshilaamo shia Nyasaye shibe khuye nikali mbu ali mubabeyi
Verse 8 — Surah An-Nur 24:8
Ne (omukhasi) eshinyasio shilamurulakhwo khulwa okhurusia obuloli mara khane khulwa okhwitsuba khu Nyasaye mbu (omusatsa uno) ali mubalia baboolanga obubeyi
Verse 9 — Surah An-Nur 24:9
Ne olwa kharano (yetsube) aboole mbu liruma lia Nyasaye libe khuye (omusatsa wuwe) nali mubalia ababoolanga obwatieli
Verse 10 — Surah An-Nur 24:10
Ne bukhayanga okhuba obulayi bwa Nyasaye khwinywe nende tsimbabaasi tsitsie, ne toto Nyasaye ni omuchami Owobulesheli Owamachesi muno
Verse 11 — Surah An-Nur 24:11
Toto balia betsa nende obubeyi abo ni omukanda halala ninanyu, ne mulapara mbu ni obubii khwinywe tawe halali ni obulayi khwinywe. Buli mulala wabu alanyoola akayakhola khumabii ako. Ne ulia wetiukha ebuleka ikhongo mubo, alinyoola eshinyasio eshikhongo
Verse 12 — Surah An-Nur 24:12
Sichila shina olwamwawulila amakhuwa kano abasatsa nende abakhasi abasuubili nibalapara mumioyo chiabu amalayi tawe, mana baboole mbu; “Buno ni obuchiishi buli habulafu”
Verse 13 — Surah An-Nur 24:13
Shichila shina nibalareera abaloli bane? Ne olwabakhaywa okhureera abaloli bane, kho abo imbeli wa Nyasaye nibo ababeyi
Verse 14 — Surah An-Nur 24:14
Ne bukhayanga okhuba obulayi bwa Nyasaye khwinywe nende tsimbabaasi tsitsie khushialo nende mwikulu, toto eshinyasio eshikhongo shiakhabanyoolele shichila khukalia akamwiyinjisiemwo
Verse 15 — Surah An-Nur 24:15
Olwa mwabukula (obubeyi obo) nende tsinimi tsienyu mana nimuboola nende eminwa chienyu, akamulamanyile, ne mwapara mbu nilikhuwa lititi khane nilili imbeli wa Nyasaye likhongo
Verse 16 — Surah An-Nur 24:16
Ne olwa mwawulila mbushina nimulaboola mbu : “ shikhukhoyekhane okhuboola kano tawe, oluyali ni olulwo, buno ni obuchishi obukhongo”
Verse 17 — Surah An-Nur 24:17
Nyasaye abachelela mbu mulatemakhwo khandi okhukhola shinga kano tawe, toto nimuba mbu muli Abasuubili
Verse 18 — Surah An-Nur 24:18
Ne Nyasaye abenoosilinjia tsinyaali (tsitsie) ne Nyasaye niye Omumanyi Owamachesi muno
Verse 19 — Surah An-Nur 24:19
Toto balia abachamanga mbu obubii busaalane khubalia basuubila , balinyoola eshinyasio shiokhuumisia khushialo nende mwikulu . Ne Nyasaye niye umanyile muno ne enywe shimumanyile tawe
Verse 20 — Surah An-Nur 24:20
Ne bukhayanga okhuba obulayi bwa Nyasaye khwinywe nende tsimbabaasi tsitsie (obutobela bwakharulilewo obukhongo,) ne toto Nyasaye ni Omwihotselesi Owetsimbabaasi muno
Verse 21 — Surah An-Nur 24:21
Enywe Abasuubili mulaloonda amaseenelo ka Shetani tawe, ne ulia uloonda amaseenelo kashetani , toto ye alomesinjia eshifwabi nende amabii, ne bukhayanga okhuba obulayi bwa Nyasaye nende tsimbabaasi tsitsie khwinye , shiyakhatswenulekhwo mwinywe kata mulala tawe, Halali Nyasaye atswenulanga owayenya ne Nyasaye ni omuwulili omumanyi muno
Verse 22 — Surah An-Nur 24:22
Ne baletsuba balia abebikhole ebilayi nende balia bali nende obunyali mwinywe okhukhaya okhukhoonya Abekho babu 24. nende Abamanani nende balia bawuya bali khunjila ya Nyasaye, ne baleshele ne bebilile, shimwachamakhwo Nyasaye okhubaleshela tawe? Ne Nyasaye ni Wobulesheli muno Owetsimbabaasi
Verse 23 — Surah An-Nur 24:23
Toto balia bachishilanga Abakhasi Abatswenufu abakorerwe (amabii) Abaisilamu,bali nende eshitsubo khushialo nende mwikulu, ne bali nende eshinyasio eshikhongo
Verse 24 — Surah An-Nur 24:24
Inyanga yetsinimi tsiabu nende emikhono chiabu nende ibeleenje biabu bilibarusilia obuloli khukalia akabakholanga
Verse 25 — Surah An-Nur 24:25
Inyanga eyo Nyasaye alibarunga habwene omurungo kwabu kwatoto, ne balimanya mbu toto Nyasaye niye owa obwatoto buli habulafu
Verse 26 — Surah An-Nur 24:26
Abakhasi ababii nibabasatsa ababii, ne Abasatsa ababii nibabakhasi ababii. Ne Abakhasi abalayi nibabasatsa Abalayi, ne Abasatsa abalayi ni babakhasi abalayi, abo bali ehale nende kabasungungwakhwo, abo balinyoola eshileshelo nende omukabo omulayi
Verse 27 — Surah An-Nur 24:27
Enywe Abasuubili mulenjila mutsinzu tsilali etsienyu tawe okhuula musabe omunwa kwokhwinjilamwo, ne mubarusilie amashesio abalimwo. Obo ni obulayi khwinywe mwakhaba murio mwetsulila
Verse 28 — Surah An-Nur 24:28
Ne nimulanyoolamwo Omundu tawe, mulenjilemwo tawe okhula muchamilwe, ne nimuboolelwa mbu “ kalushe” mukalushe, obo ni obutwenufu khwinywe. Ne Nyasaye amanyile muno akamukholanga
Verse 29 — Surah An-Nur 24:29
Shinobubii khwinywe okhwinjila mutsinzu tsilamenyungwamwo tawe (shinga tsihoteli nende amaluka) etsilimwo obukhoonyi bwenyu , ne Nyasaye amanyile akamuretsanga habulafu nende akamufisanga
Verse 30 — Surah An-Nur 24:30
Boolela abasuubili abasatsa mbu beenamie tsimoni tsiabu , ne baliinde ebiekenyi biabu, obo ni obutswenufu khubo, toto Nyasaye amanyile koosi akabakholanga
Verse 31 — Surah An-Nur 24:31
Ne boolela Abasuubili abakhasi benamie tsimoni tsiabu, ne baliinde ebiekenyi biabu, ne balalolesia emibili chiabu halali bilia ebilolekhanga (obweni nende ebikalamo nende ebisisilo biebilenje) ne babusie ebitambaya biabu okhula khubilifu biabu, ne balalolesia oburone bwabu halali khuBasatsa babu, nohomba Basamwana, nohomba Samwana Abasatsa babu, nohomba Abana babu, nohomba Abana babasatsa babu, nohomba Abasiani babu, nohomba Abanabo musiani wabu, nohomba Abana bomukhana wabu, nohomba abakhasi bashiabwe, nohomba balia bemikhono chiabu emisatsa chiatila, nohomba Abasatsa abakhulundu ababula obwikombi nohomba Abana bashili okhumanya amakhuwa keshiekenyi shiabakhasi . Nebalatuya ebilenje biabu hasi mbu khobimanyikhane ebiabafisile muburone bwabu. Ne musabe eshileshelo mwesi khu Nyasaye enywe Abasuubili mwakhaba murio mwanyoola okhubura
Verse 32 — Surah An-Nur 24:32
Mubashe abakhasi bafwilwa mwinywe, nende abalayi mubarumwa benyu, nende Abarumwa abeshikhasi benyu, ne nibali abatakha Nyasaye alabayindiasia khubulayi bubwe, ne Nyasaye ni omuyinda omumanyi muno
Verse 33 — Surah An-Nur 24:33
Ne beyikalile nende eshifwabi balia abalanyoola shiokhuteshila okhula shingala Nyasaye alabayindiasia khubulayi bubwe, nebalia benyanga okhuhandichilwa khubalia abemikhono chienyu chieshisatsa mubahandichile nimulola obulayi mubo, ne mubahelesie khumwandu kwa Nyasaye okwayabahelesia ne mulayiika Abarumwa benyu okhukhola amakhuwa kobuyeyi, nibenya okhutong’a abatwenufu khulwa okhukhaba obulamu bwokhushialo ne ulia witsa okhubayiika awo Nyasaye imbeli wokhunichilisibwa khwabu okho ni omuunji wobulesheli omuunji wetsimbabaasi
Verse 34 — Surah An-Nur 24:34
Ne toto khwabeshilia tsinyaali tsiobwang’ang’u nende amachelasio khumakhuwa kabalia babura imbeli wenyu, nende amachelo khubalia abaria Nyasaye
Verse 35 — Surah An-Nur 24:35
Nyasaye ni obulafu bwomwikulu nende khushialo, obulafu bubwe buli shinga eshichibi (shirebungwa mukari washio itaa.) shilikhwo itaa ili muchumuni, ichumuni ilishinga ing’ining’ini imesanga yashibungwa khumusaala kwetsikhabi kwa zaitun, okulali kwebukwe nohomba kwa mumbo, amafura kakwo kakhaaba okhung’enang’ena nekata omulilo nikushili okhukatiila. Obulafu hekulu wobulafu, Nyasaye alunjisinjia khubulafu bubwe owayenya ne Nyasaye okhupilanga amachelasio khubandu ne Nyasaye ni Omumanyi wabuli eshindu
Verse 36 — Surah An-Nur 24:36
Mutsinzu etsia Nyasaye yalomesia tsihebwe oluyali netsirumbulwemwo elira lilie bamwitsoomiemwo itsuli nende ingoloobe
Verse 37 — Surah An-Nur 24:37
Abasaatsa balia abeyinganga nohomba okhukusia shikhubatokasinjia okhwitsulila Nyasaye tawe nende okhulumilila okhulaama (iswala). Nende okhurusia eshihanwa (izakaa) baritsanga inyanga yemioyo chilikalukhana nende tsimoni
Verse 38 — Surah An-Nur 24:38
Kho Nyasaye wabu anyoole okhubarunga amalayi khukalia akabakhola nende okhubametela khubulayi bubwe ne Nyasaye akabilanga owayenya okhubura eshichelo
Verse 39 — Surah An-Nur 24:39
Ne balia bakhaya ebikhole biabu bilishinga amaweruweru, mushialo shiolumila , owobuloo aparambu ni amatsi, nakatsiila shalola shiosishiosi tawe ne balinyoola Nyasaye awo abarunje omurungo kwabu kwa habwene, ne Nyasaye ni Omwangu wokhubala
Verse 40 — Surah An-Nur 24:40
Nohomba shinga eshiilima munyanza ya amaatsi amanji akafunikhungwa nende amarunda hekulu wamarunda, ne hekulu khuliwo nende amaleesi eshiilima hekulu weshiilima, narusia omukhono kukwe aba ahambi okhukhaya okhukulola, ne owa Nyasaye alahelesia obulafu shabeetsanga nobulafu tawe
Verse 41 — Surah An-Nur 24:41
Koo shololangakhwo mbu bitsoominjia Nyasaye ebili mwikulu nende khushialo nende amayoni olwakafimbulanga tsimbaya tsiako buli bioosi biamanya isaala yiyie, nende injila yokhumwitsoomeliamwo. Ne Nyasaye ni Omumanyi muno khukabakholanga
Verse 42 — Surah An-Nur 24:42
Ne ni obwa Nyasaye obwami bwomwikulu nende khushialo ne ewa Nyasaye ni amakalushilo kaboosi
Verse 43 — Surah An-Nur 24:43
Koo! Shololangakhwo mbu Nyasaye ayilaanga amaleesi mana akaretsanga halala, mana akakhole libunjikho? Mana olalola ifula nirula hakari wako , naye yeshinjia okhurula hekulu khutsingulu etsia maleesi ifula yamachina mana atililakho owayenya ne eyile ehale khu owayenya okhumiesukha khwelikulu khukhaaba okhuwofusia tsimoni
Verse 44 — Surah An-Nur 24:44
Nyasaye akalukhaninjia eshilo nende eshitere toto mu ako khulimwo nende eshimanyisio khubandu abamachesi
Verse 45 — Surah An-Nur 24:45
Ne Nyasaye yaloonga buli isolo okhurulana nende amatsi, etsindi tsiatsio tsichendelanga inda yatsio, ne etsindi tsichendelanga amakulu kabili, ne etsindi natsio tsichendelanga amakulu kane, Nyasaye aloonganga shiayenya toto Nyasaye ni Omunyali wabuli eshindu
Verse 46 — Surah An-Nur 24:46
Toto khweshia tsinyaali etsinoosinjia ne Nyasaye alunjisinjia owayenya khunjila ingololofu
Verse 47 — Surah An-Nur 24:47
Ne baboolanga mbu: “ khusuubile Nyasaye nende Omurumwa, ne khuwulile” 24. mana abandi mubo imbeli wakano bakakhayanga, ne abo shibali basuubila tawe
Verse 48 — Surah An-Nur 24:48
Ne nibalangwa khu Nyasaye nende Omurumwa wuwe kho ababusilie hakari wabu, abandi mubo bakhayanga ako
Verse 49 — Surah An-Nur 24:49
Ne nibali mbu nibo bali khubwatoto , bamwitsilanga lwangu nibehotselesiye
Verse 50 — Surah An-Nur 24:50
Koo bali nende obulwale mumioyo chiabu , nohomba bali nende tsinganakani nohomba baritsanga mbu Nyasaye nende Omurumwa wuwe balabakholela obubii! Halali abo nibo Ababii
Verse 51 — Surah An-Nur 24:51
Likhuwa eliabasuubili olwa balangwa khu Nyasaye nende Omurumwa wuwe kho ababusilie hakari wabu, halali baboole mbu: “khuwulile ne khuchamile.” Ne abo nibo abalibura
Verse 52 — Surah An-Nur 24:52
Ne balia bawulila Nyasaye nende Omurumwa wuwe mana nibelesia oluyali Nyasaye nende okhumuria , abo nibo bokhubura
Verse 53 — Surah An-Nur 24:53
Ne betsubanga khulira lia Nyasaye, okhwitsuba khwabu okhukhongo mbu nobalomesia (okhurula okhutsia liyie) toto bo balarula. Boola mbu : “ muletsuba tawe, okhuwulila khwenyu khwamanyikhana. Toto Nyasaye amanyile muno akamukholanga.”
Verse 54 — Surah An-Nur 24:54
Boola mbu: “wulile Nyasaye ne muwulile Omurumwa, ne nimukhaya , kho kali khuye ako kayetuukha, ne kali khwimywe akamwatuukhwa. Ne nimumuwulila mulalunjikha. Ne shibulaho eshindi khumurumwa halali okhusia okhwahabulafu
Verse 55 — Surah An-Nur 24:55
Nyasaye yalaka balia basubila mwinywe mana nibakhola ebikhole ebilayi , mbu alabakhola okhuba abalenji be khushialo, shingala yakhola balia abaliho imbeli wabu. Netoto alabatinyisilia idini yabu aya yabachamila, ne alabakalukhanilia omulembe okhurula khubuyendi bwabu. Bamulamenje nibalamutsokasiakhwo nende shiosi shiosi tawe. Ne balia balakhaya, imbeli wa ako, abo nibo bafunakanga amalako kefu
Verse 56 — Surah An-Nur 24:56
Ne mulumilile okhulaama (iswala) nende okhuyinia eshihanwa (izaka) ne muwulile Omurumwa mwakhaba murio mwahebwa tsimbabaasi
Verse 57 — Surah An-Nur 24:57
Mlapara mbu balia bakhaya balashila Nyasaye khushialo tawe. Eshimenyo shiabu ni mumulilo, toto ni amakalushilo amabii muno
Verse 58 — Surah An-Nur 24:58
Enywe abasuubila, balia abemikhono chienyu emilunji chiatila nende balia bashili okhukubuya mwinywe bakhupe hodi amakhabi kataru; inyuma weyiswala yomumabwibwi,(alfajr) nende ebise biamurusinjia tsingubo tsienyu eshitere, nende imbeli we iswala yeshiloo (ya isha). Bino ni ebise bitaru bwobwiyangu khwinywe. Shinobubii khwinywe nohomba khubo ebise bilali ebo okhwinjila mubikoro biabu nimulakhupa hodi tawe. Mubotokhananga mwo abeene khubeene. Endio nilwa Nyasaye abeenosilia tsinyaali tsitsie, ne Nyasaye ni Omumanyi muno Owamachesi
Verse 59 — Surah An-Nur 24:59
Ne Abana nibakhamala okhukubuya bakhupe hodi, shingala balia abali imbeli wabu bakhupanga. Ne endio nilwa Nyasaye abenoosilinjia tsinyaali tsitsie ne Nyasaye ni Omumanyi muno Owamachesi po
Verse 60 — Surah An-Nur 24:60
Ne Abakhasi abashiele balia babula omwoyo kwokhutekha awo shinobubii khubo tawe okhututuyia tsingubo tsiabu, halali balechesia oburone bwabu tawe, ne nibeyikalila bakhaya okhututuyia nibo obulayi khubo. Ne Nyasaye ni omuwulili muno omumanyi muno
Verse 61 — Surah An-Nur 24:61
Shini obubii khumuwofu nohomba shini obubii khumulema nohomba shini obubii khumulwale nohomba shini obubii khwinywe, nimulia mutsinzu tsienyu nohomba mutsinzu tsiabasenywe nohomba 24. mutsinzu tsiabasiani benyu, nohomba mutsinzu tsiabakhana benyu, nohomba mutsinzu tsiabasiani babu papa wenyu, nohomba mutsinzu tsiabasenje benyu, nohomba mutsinzu tsia bakhotsa benyu, nohomba mutsinzu tsiabakhana babu mama wenyu, nohomba balia abamwatila tsifunguo tsiabu, nohomba abetsa benyu. Shini obubii khwinywe okhulia halala nohomba shiamulala shiamulala tawe. Ne nimwinjila mutsinzu mushesie abalimwo, ni obusangali okhurula khu Nyasaye bwetsikhabi nende amalayi. Endio nilwa Nyasaye ebeenoosilinjia tsinyaali tsitsie mwakhaba murio mwanyoola okhumanya
Verse 62 — Surah An-Nur 24:62
Abasalamu batoto nibalia abasuubila Nyasaye nende Omurumwa wuwe, ne olwa baba ninaye khulikhuwa litiila boosi shibarulanga butswa tawe okhuula bamusabe obwiyangu. Toto balia bakhusabanga obwiyangu abo nibo basuubilanga khu Nyasaye nende Omurumwa wuwe. Ne olwabalakhusaba obwiyangu khulwa emilimo chindi chiabu, ochamile owawenya mubo, Ne obasabile obulesheli khu Nyasaye. Toto Nyasaye ni Omunji wobulesheli Omunji wetsimbabaasi
Verse 63 — Surah An-Nur 24:63
Mulakhola omulango kwomurumwa shinga omulango kwenyu abeene khu beene tawe. Toto Nyasaye amanyile balia barulanga mukhwiyiba mwinywe nibefisafisa. Kho (babe bukheke) berecheshele balia bakhayanga amalomesio kaye, amasila kaletsa okhubanyoola nohomba shiboolele eshinyasio shiwumisinjia
Verse 64 — Surah An-Nur 24:64
Koo wulile! Ni bia Nyasaye ebili mwikulu nende khushialo, toto ye amanyile kamuli nako, ne inyanga yabalikalusibwa ewuwe alibaboolela akabakholanga, ne Nyasaye ni Omumanyi wabuli eshindu