Luyia - Chapter 26 - Ash-Shuara

Twaa Syn Mym

Tsino ni tsinyaali tsie shitabu shinoosinjia

Kakhaba kario weyira omwene shichila mbu shibaba Abasuubili tawe

Ne khwenyanga khwakhabeshilie okhurula hekulu amangalimwa, mana amakosi kabu kehotselesilia amangalimwa ako

Ne nibuboolela obwitsulisio obuyiakha okhurula khu munji wetsimbabaasi beretsanga ehale ninabo

Toto bo bamala okhuyingasia, kholaano ahambi hano balanyoola amacheni kakalia kabakholelanga emibayo

Koo, shibalolangakhwo liloba, ni emimela chinga chia khwamesiamwo, chia buli imbia indayi

Toto mu ako khulimwo nende ameeko, halali abanji mubo shinibokhusuubila tawe

Netoto Nyasaye wuwo, niye Owamani, Owetsimbabaasi muno

Ne olwa Nyasaye wuwo yalaanga Musa, namuboolela mbu; “Tsia khubandu balia abamabii”

Abandu ba Firauni; (ubaboolele mbu) “Koo shimuritsanga Nyasaye tawe?”

(Musa) Naboola’; mbu “Nyasaye wanje esie eritsanga baletsa okhuyingasia tawe.”

Ne eshilifu shianje shilola obuliro, ne olulimi lwanje shilurumbulanga obulayi tawe, kho yilila (Oburume buno) khu Haruni

Nabo bali nende likhobo khwisie, kho eritsanga mbu balanzira

Naboola; “Shikalikario tawe, kho mutsie nende amangalimwa kanje, toto efwe khuli halala ninanyu khuwulilanga.”

Kho mutsie khu Firauni mumuboolele mbu; “Toto efwe khuli Abarumwa ba Nyasaye webiloonje bioosi .”

Mbu olekhule halala ninafu Abana ba Isarail

Naboola mbu; “koo, shikhwakhulela ewefu noli omwana, ne niwikhala mwifwe emika cholubaka lulwo?”

Ne nokhola eshikhole shishio shilia shawakhola ne noba mubalia abalakhupanga orio tawe

(Musa) naboola mbu; “Ndakhola ako, olwandali nendi mubandu balia abakora”

“Mana nebelukha olwandali nebarire, ne Nyasaye wanje yambeele laano obwami ne yakholele okhuba Mubarumwa.”

Ne obo nibo obulayi bwawumborolanga obwawakholela, newara Abana ba Israil mubusandi

Firauni naboola mbu; “Ne ni wina oyo Nyasaye weshialo shiosi?”

(Musa) Naboola mbu; “ Nyasaye Omulesi owaloonga likulu nende eshialo nende ebili hakari wabio toto nimuli abokhukhaaba abwatoto.”

(Firauni) Naboolela balia abali nibamubotokhane mumbeka wuwe mbu: “koo! Shimuwulilanga tawe?”

(Musa) naboola mbu; “Nyasaye wenyu nende Nyasaye wa bapapa benyu abaranjilila.”

(Firauni) Naboola mbu; “Toto bwene Omurumwa wenyu owabaruma enywe ni omulalu”

(Musa) Naboola mbu; “Niye Nyasaye webukwe nende Mumbo nende ebili hakari wabio, toto enywe nimuli abamanyanga

(Firauni) naboola mbu; “Niwitsa okhusuubila Nyasaye wundi ulali esie tawe toto nditsa okhukhola obe mubaboye.”

Naboola; “Koo! Kata nekhurerera eshindu shili mubwang’angu?”

Naboola mbu; “Nakhashirerekhwo, toto noli mubandu baboolanga obwatoto.”

Mana nasukuna indambushi yiyie, mana nikalukhana inzokha ilolekha

Ne narusia omukhono kukwe, mana nikuba omulafu tswe khubakuhenga

(Firauni) naboola okhuboolela abakhongo balia abamubotokhana mbu, “Toto uno ni omulosi umanyile muno”

“Yenya okhubarusia mushialo shienyu nende obulosi bubwe, kho muboola murie?”

Nibaboola mbu; “Mwehelesie ebise ye nende omusiani wabu, ne omure mwitokho habandu abakhung’asinjia Abandu”

Balakhurerera buli omulosi omukhongo umanyile muno

Mana nibakhung’asia Abalosi khubise nende inyanga imanyikhane

Ne Abandu nibaboolelwa mbu “Mumalile okhukhung’ana?”

“Khwakhaba khurio khwaloonda kabalosi nikali mbu nibo balashila”

Kho mana Abalosi shingala boola, nibaboolela Firauni mbu; Koo, khulanyoola omurungo nikaba mbu nefwe khushila?”

Naboola mbu; “eeh, ne khandi mwitsa okhuba mubalia abenjisibwa.”

Musa nababoolela mbu; “sukune ebiamwenya okhusukuna”

Nibasukuna emikoye chiabu nende tsindabushi tsiabu, nenibaboola mbu; “khumaani ka Firauni efwesa toto nefwe khulashila”

Mana Musa nasukuna indabushi yiyie, mana niimilaa bioosi biabachikhanga

Awo abalosi nibakalukhana nibenama nibasujuda

Nibaboola mbu; “khusuubile Nyasaye webiloonje bioosi

Nyasaye wa Musa nende Haruni.”

(Firauni) naboola mbu; “Mumusuubile neshili okhubasubula, toto ye niye Omukhongo wenyu owabechesia obulosi. Kho mwitsa okhulola, Nditsa toto okhuteta emikhono chienyu nende ebilenje bienyu buchikha, ne nditsa okhubabamba mwesi”

Nibaboola mbu; “obubii bubulaho, toto efwe khwitsa okhukalukha khu Nyasaye wefu”

“Toto efwe khusuubile mbu Nyasaye wefu alakhuleshela tsimbi tsiefu, shichila efwe khubeele bokhuranjilila okhusuubila”

Ne nikhufimbulila Musa mbu: “ rula nende Abandu banje ebise bieshilo, toto enywe mwitsa okhulondwakho.”

Mana Firauni naruma abakhung’asinjia Abandu mwitokho

“Toto bano ni omukanda omutiti”

“Nabo toto bakhusinyisinjia”

“Nafu khuli abanji ne khubaritsanga”

Mana nikhubarusia mumikunda nende tsisebele

Nende amabishilo nende habundu andayi

Ne endio, mana nikhuchelamia Abana ba Israil

Mana olwa eliuba liarula nibabalondakhwo

Ne olwa emikanda chibili chialolana, Abandu ba Musa nibaboola mbu; “toto efwe khutilwa”

(Musa) Naboola mbu; “Shikali kario tawe, toto Nyasaye wanje ali halala ninasi, toto yetsa okhulunjisia.”

Mana nikhufimbulila Musa mbu khupa indabushi yiyio khu inyanza” Mana nikabukhana, ne buli elubeka niba shinga olukulu olukhongo

Mana nikhureraho Abandu bandi balia

Mana nikhuhonokosia Musa nende balia abali halala ninaye boosi

Mana nikhusishia abandi abo

Toto mu ako khulimwo nende ameeko, halali abanji mubo shibasuubilanga tawe

Netoto Nyasaye wuwo niye Owamani Owestimbabaasi

Ne basomele amakhuwa ka Ibrahim

Olwayaboolela papa wuwe nende Abandu bebe, mbu; “Shina shiamulaamanga?”

Nibaboola mbu; “Khulaamanga ebifwanani tsinyanga tsiosi khubilamanga”

Naboola mbu; “Koo, bibawulilanga olwamubilaanganga?”

“Nohomba bibakhonyangakhwo (nimubilaama)nohomba bibawumisinjia (nimukhaya okhubilama)

Nibaboola mbu; “(Shibikholanga ako tawe) halali khwanyoola bapapa befu nibakholanga bario.”

Naboola; “koo Mulolanga ebia mulaamanga ebo?”

“Enywe nende Abakofu benyu abaranjilila

Toto abo ni Abasuku banje(abamulaamanga abo) halali Nyasaye webiloonje bioosi

“Ulia owanoonga naye niye ulunjisinjia”

“Ne niye ulia undisinjia nende unywesinjia”

“Ne nendwala niye umboninjia”

“Ne niye ulifwisia ne alilamusia”

Ne niye wesuubilanga mbu alindeshela ebionono bianje inyanga yamurungo

Nyasaye wanje! Mbelesia amachesi kokhubusia ne unde halala nende abakholi bamalayi

“Ne ukhole embe wokhuboolwa khubulayi nende Abandu balitsa inyuma.”

“Ne ukhole embe unyoola emikunda chobwokholo mwikulu”

“Ne oleshele Papa wanje toto ye yali mubandu bakora.”

“Ne olanzafia tsisoni tawe inyanga yabalilamusibwa”

“Inyanga eyo omwandu nohomba Abana shibilikhoonya shiosi shiosi tawe”

“Halali ulia wetsa khu Nyasaye nende omwoyo omulafu”

Ne likulu lilisitibwa khubalia baria Nyasaye

Ne Jahanam ililolosibwa khubandu ababii

Ne baliboolelwa mbu; “Bali hena balia abamwalaamanga?”

“Abalali Nyasaye, koo banyala okhubakhonya nohomba bekhonye abeene?”

Kho balisukunwa omo abo nende abakhayi bandi

Nende omukanda kwa ibilisi kwosi

Baliboola- nibasolanangamwo mbu

“Khwitsuba Khu Nyasaye toto efwe khwali mubukori bwa habulafu”

“Olwa khwabakholanga nashilala nende Nyasaye webiloonje bioosi

“Ne shibakhukosia tawe halali aboononi balia”

“Kholano khubula abakhusabila”

“Nohomba Omwitsa Owatoto”

Abayie khunyalanga okhukalukha khwakhabeele mubasuubili

Toto mukano khulimwo nende ameeko, ne abanji mubo shinibokhusuubila tawe

Ne toto Nyasaye wuwo niye Owamani Owetsimbabaasi muno

Abandu ba Nuhu, bayingasia Abarumwa

Olwa Omusiani wabu (ulangwa mbu) Nuh yababoolela mbu; “koo shimularia Nyasaye tawe”

Toto esie khwinywe endi Omurumwa Omwisikwa

Kho murie Nyasaye ne muwulile

Ne shebasaba khukano omurungo tawe, omurungo kwanje kuli butswa khu Nyasaye Omulesi webilonje biosi

Kho murie Nyasaye ne muwulile

Nibaboola mbu; “Khulakhusuubila ewe ne ni abateshele nibo bakhuloonda”

Nibaboola mbu; “Emanyile shina akabakholanga

Ne okhubalwa khwabu khuli butswa khu Nyasaye wanje, Abayie mumanyangakhwo.”

“Ne esie shinditsa okhwilukhania Abasuubili tawe”

“Esie shendi shiosi shiosi tawe halali omwikanyilisi owa-habulafu

Nibaboola mbu; “Nolalekhana ninaafu tawe ewe Nuh, toto olaba mubalia balaswa amachina.”

Nuhu naboola mbu; “Nyasaye wanje, toto Abandu banje bayingasiye”

Kho busia hakari wanje ninabo okhubusia okhulayi ne uhabine esie nende balia bali halala ninasi mubasuubili

Kho mana nikhumuhabina ye nende balia bali halala ninaye musafina yitsule

Mana nikhusishia balia abatong’a

Toto mukano khulimwo nende ameeko halali abaanji mubo shibali bakhusuubila tawe

Ne toto Nyasaye wuwo niye Owamani Owetsimbabaasi muno

Babu A’di boosi bayingasia Abarumwa

(Betsulisie) Olwa Omusiani wabu Hud yababoolela mbu; “koo shimulamuria tawe?’’

Toto esie endi khwinywe Omurumwa Omwisikwa

Kho murie Nyasaye ne muwulile

Ne shebasaba khukano omurungo tawe, Omurungo kwanje kulisa khu Nyasaye Omulesi webiloonje biosi

“Koo, mumbakhanga buli khwitulo, eshitsulisio shiokhukhola kalia kabulamwo oluchendo

Ne mumbakhanga tsing’oba mpara mbu mulimenya tsinyanga tsiosi

Ne nimusera museranga nobufuru

Kho murie Nyasaye ne muwulile

Ne Murie ulia owabahelesia kalia akamumanyile

Yabahelesia emiruko nende Abana abasiani

Nende “emikunda nende tsisebele”

Toto ebaririranga eshinyasio shieyinyanga ikhongo

nibaboola mbu; “ni halala butswa awo, khwifwe nokhuchelela nohomba noobula okhuchelela.”

Kano shikalisa halali ebima biabandu bakhale

Ne efwe shikhulihebwa eshinyasio tawe

Mana nibamuyingasia, nenikhubasishia, toto mukano khulimwo nende ameeko, halali abanji mubo shibali Abasuubili tawe

Ne toto Nyasaye wuwo niye Owamani Owetsimbabaasi muno

Babu Thamudi bayingasia Abarumwa

Olwa Omusiani wabu ulangwa mbu Swaleh yababoolela mbu; “koo shimuritsanga tawe?”

“Toto esie endi khwinywe Omurumwa Omwisikwa”

Kho murie Nyasaye ne muwulile

“Ne shebeenyakhwo omurungo khukano tawe, omurungo kwanje kulisa khu Nyasaye Omulesi webilonje biosi.”

“Koo mulalekhwa nomulembe khukali hano khwinywe

“Mumikunda nende tsisebele”

Nende imimela nende mitende chie bibuli ebilayi

“Ne muyabanga mutsingulu tsinzu mukhwisangasia butswa.”

Murie Nyasaye ne muwulile

Ne mulaloonda amalako ka Abonooni tawe

Balia bakholanga obwonooni khushialo neshibakasinjia tawe

Nibaboola mbu: ‘‘toto ewe olimubalia abalokwa.”

Ewe sholi shiosi shiosi tawe halali Omundu butwa shinga efwe, kho rerakhwo eshimanyisio nikakhaba mbu oboolanga obwatoto

Naboola mbu : “ingamia ino ibe nende ebise biayo biokhunywa , nanyu mwesi mube nende ebise biokhutaya ebimanyishe.”

Ne mulayitilakhwo khububii tawe, eshinyasio shieyinyanga ikhongo shiaboolela

Halali bo nibayiira, mana nibaba bokhwiyitsulisia

Mana eshinyasio nishibeshela , toto mu ako khulimwo nende ameeko , halali abanji mubo shibasuubila tawe

Ne toto Nyasaye wuwo niye owa Amaani Owetsimbabaasi muno

Abandu ba Luti bayingasia Abarumwa

Olwa Omusani wabu (ulangwa mbu) Lut yababoolela mbu: ‘ koo! Shimuritsanga tawe?”

Toto esie endi khwinywe Omurumwa Omwisikwa

Kho murie Nyasaye ne mumuwulile

“ Koo mukholanga eshifwolo abasaatsa khubasatsa?.”

“ Ne mulekhanga shia Nyasaye wenyu yabaloonjela khubakhasi benyu? Toto enywe muli abandu babura eshichelo

Baboola mbu; “Ewe Lut, nolalekhana ninafu tawe, ulaba mubalia abatafibwa”

Naboola mbu; “esie toto endi mubasinyisibwa muno nende eshikhole shienyu esho”

“Nyasaye wanje habine esie nende Abandu banje, khu kabakholanga kano”

Mana nikhumuhabina ye nende Abandu bebe boosi

Halali Omushiele khubalia abekhalanga inyuma

Mana nikhusishia abandi abo

Mana nikhubakwisilia ifula, ne ni ifula imbii muno yabekanyilisibwa

Toto mukano khulimwo nende ameeko, halali abaanji mubo shibasuubilanga tawe

Ne toto Nyasaye wuwo niye Owamaani Owetsimbabaasi muno

Abandu bomutsuru omukhongo, bayingasia Abarumwa

Olwa Shuwaibu yababoolela mbu; “Koo! Shimuritsangakhwo tawe”

Toto Esie endi khwinywe Omurumwa Omwisikwa

Kho murie Nyasaye nemuwulile

Ne shebasabaanga khukano omurungo kwosikwosi tawe, omurungo kwanje kulisa khu Nyasaye Omulesi webiloonje biosi

“Mwitsusie eshichelo obulayi, ne mulaba mubalia baleeminjia tawe.”

“Ne muchele khushichelo shili habwene”

“Nemulaleemilia Abandu ebindu biabu tawe, ne mulachenda khushialo nimukhola amabii tawe.”

“Ne murie owamuloonga enywe nende abiloonje biabura biosi”

Baboola mbu; “Toto ewe olimubalia abalokwa”

Newe sholi shiosishiosi tawe halali omundusa shinga efwe, netoto efwe khukhulola mbu oli mubabeyi”

Kho mana khukwisilie ebitonye bielikulu toto noli mubalia baboolanga obwatieli

Naboola mbu; “Nyasaye wanje amanyile muno akamukholanga.”

Mana nibamunyingasia, ne eshinyasio nishiboolela shieyinyanga yeshinikha. Toto esho shali eshinyasio shieyinyanga ikhongo

Toto mu ako khuli nende ameeko, halali abanji mubo shibali bokhusuubila tawe

Netoto Nyasaye wuwo niye Owamani Owetsimbabaasi muno

Netoto obo ni obwishio bwa Nyasaye Omulesi webiloonje biosi

Yeshia kano roho omwisikwa

Khu mwoyo kukwo, kho obe mubalia abekanyilisinjia

Mulusungo lwa olwarabu lwahabulafu

Ne kano kali mubitabu ebiaranjilila

Koo, shishiali eshimanyisio khubo mbu kano bakamanya abasomi ba Abana ba Israil

Ne khwishilinjia khuwulia ulali omwarabu tawe

Mana abasoomele, shibakhamusuubile tawe

Ne endi nilwakhwinjisinjia mu mioyo chia babii

Shibayisuubilanga tawe okhula shingala balola eshinyasio eshilulu

Mana shibetsele mapwoka, nabo nibalamanyile tawe

Ne balaboola mbu; “Koo; efwe khulahebwa ebise?”

Mana koo, bayungubalilanga eshinyasio shiefu

Olola orie nikhubamenyia obulayi emika eminji

Mana kabanyoole kalia akabalakungwa

Kalibakhonya shina kalia akabamenyelanga mubulayi

Ne sikhwasishia olukongo lwosi lwosi tawe nikhushili okhurumamwo Abekanyilisi

(Khu) obwitsulisio, neshikhwali abakhola obubii tawe

Ne ameshetani shikekha nayo tawe

Ne shibakhoyeshele tawe ne shibakhanyala tawe

Toto abo bekalilwa okhuwulila

Kho olalaama halala nende Nyasaye Abanyasaye bandi tawe wakhetsa waba mubalia banyoola eshinyasio

Ne wikanyilisie Abandu bobo bahambi

Ne ore hasi olubaha lulwo khu ulia okhuloonda mubasuubili

Ne nibalakhuwulila, boola mbu; “esie ndira ehale muno nende akamukholanga.”

Ne wisiche ulia owa Amaani muno Owetsimbabaasi

Ulia ukhulolanga olwawemanga

Nende okhukalukhana khukhwo olwa osujudanga

Toto ye niye Omuwulili po Omumanyi muno

Koo! Ebaboolelekhwo niwina wamashetani keshelangakhwo?”

Keshelanga khumuchishi Omukhongo Omunji wetsimbi

Kabayililanga kalia akakaulilanga, ne amaanji muko namabeeyi

Ne abakasinjia tsinyimbo nibo abakori abakalondangakhwo

Koo, shololanga mbu bo bayiyayiyanga buli mwitwoma

Ne mbu bo baboolanga akabalakholanga tawe

Halali balia basuubila, mana nibakhola amalayi mana nibetsulila Nyasaye muno, mana nibashila nibarunga olwa bali nibakholeelwe obubii, Ne bakholanga obubii bakhamanye ni omushukhano kuli kurie kwabalishukhana