Luyia - Chapter 63

Abeshikhabili nibakhwitsila nibaboola mbu: “Toto efwe khusuubila mbu ewe oli Omurumwa wa Nyasaye” Ne Nyasaye amanyile mbu toto abeshikhabili nababeyi.”

Bakhola ebitsubo biabu okhuba ingabo, mana nibekalila injila ya Nyasaye, ni amabii muno akabakholonga

Ako nillwokhuba mbu basuubila mana khandi nibakhaya, mana Nyasaye nakhupa eshimanyisio khu mioyo chiabu, mana bo shibamanyile tawe

Ne nobalola, emibili chiabu chikhuchamisia, ne nibaboola orechelesia amakhuwa kabu, opara mbu ni emisala chiyeshibwe, baparanga mbu buli oluyoka lwosi lwosi lupwa lulikhubo. Abo nibo Abasuku ba meso ninabo, Nyasaye yabatsuba, bakoranga barie abwatoto

Ne nibaboolelwa mbu itse Omurumwa abasabile eshileshelo, bayuyia emirwe chiabu, ne obalola nibashukhana nibafurire

Ninashilala khubo, nobasabila eshileshelo nohomba nolekha, Nyasaye shiyakhabaleshela tawe, toto Nyasaye shalunjisinjia abonooni tawe

Nibo baboolonga mbu mulakhoonya balia abali halala nomurumwa tawe, ukhula bamwilushe, ne Nyasaye ni Mwene emikabo chio mwikulu nende mushialo, halali abeshikhabili shibamanyile tawe

Baboolanga mbu nikhukalukha Madina abamaani balaloonda abateshele, Ne amani ni ka Nyasaye nende Omurumwa wuwe nende Abasuubili, halali Abeshikhabili shibamanyile tawe

Enywe Abasuubili, omwandu nende Abana benyu bilachila mwebilila okhumurumbula Nyasaye tawe, ne yesi yesi ukhola ario, aba ali mubatiba

Ne murusie eshihanwa mumiandu chia khwabahelesia, lifwa nilishili okhulila mulala wenyu, mana aboole mbu : “Abaanyiee Nyasaye wanje umetakhwo tsinyanga atiti ndakharusiye eshihanwa, mana ndaba mubandu abalayi

Ne Nyasaye shanyala okhumeta Omundu ebise lifwa lilie niliakhoola tawe, ne Nyasaye nomumanyi muno khukamukholanga