Luyia

[1] Mulira lia Nyasaye Owetsimbabaasi Owobukoosia

[2] Oluyali lwosi ni lwa Nyasaye, Omulesi webiloonje bioosi

[3] Owetsimbabaasi Owobukoosia

[4] Omwami we yinyanga yomurungo

[5] Newesa wakhulamaanga, naninewesa wakhwenyangakhwo obukhoonyi

[6] Okhulunjisie khunjila ingololofu

[7] Injila yabalia abawahelesia tsimbabaasi, ilali yabalia abasinyishilwa nohomba yabalia abakora tawe

[1] Alif lam Mim

[2] Esho nishio eshitabu shibulamwo obukanakani nishiobulunjifu khubalia abaria Nyasaye

[3] Balia abasuubilanga mubilalolekha, abaswaliyanga (iswala) khatsotso, ne barusinjia eshihanwa khumukabo kwa khubakabile

[4] Balia basuubilanga khu kalia keshibwa khwiwe, nende kalia keshibwa imbeli wuwo, ne basuubilanga muno inyanga yeyindukho

[5] Abo bali khubulunjifu okhurula khu Nyasaye wabu, ne abo nibobalibura

[6] Toto balia abakhaya ni halalasa awo, obekanyilisie nohomba oleshe okhubekanyilisia shibalisuubila tawe

[7] Nyasaye yara eshifunikho khumioyo chiabu nende khutsimbulililo tsiabu nende khutsindolelo tsiabu, mana bali nende eshinyasio eshilulu

[8] Ne mubandu baliho baboolanga mbu khwasuubila mu Nyasaye nende inyanga yeyindukho ne nibalali abasuubili tawe

[9] Bakatinjia Nyasaye nende Abasuubili, halali abeene nibo bekatinjia, ne shibamanyile tawe

[10] Emioyo chiabu chilimwo obulwale, mana Nyasaye nabameta obulwale, ne bali nende eshinyasio eshilulu khukalia kabakaatinjia

[11] Ne nibaboolelwa mbu mulakhola obubii khushialo tawe, nabo baboola mbu “toto efwe nefwe abakholi bamalayi.”

[12] Koo, toto abo nibo abamabii, halali shibesundukhanga tawe

[13] Ne nibaboolelwa mbu suubile shinga Abandu basuubila, nibaboola mbu “khusuubile, shinga abasilu basuubila?” Koo toto abo nibo abasilu halali shibamanyile tawe

[14] Ne nibabukana nende abasuubili baboola mbu: “khwasuubila” ne nibenjila mubashetani babu, baboola mbu; “Toto efwe khuli ninenyu, toto efwe khukholanga butswa omubayo”

[15] Nyasaye ababayila ne abalekha mubukori bwabu nibayiyayiya

[16] Abo nibo bakula obukori khubulunjifu, mana inganga yabu nisikha, mana nibalaba abalunjifu tawe

[17] okhuchelaasibwa khwabu khuli shinga, ulia wafia omulilo, olwakwarusia obulafu, balola ebili mumbeka tsiabu, Nyasaye nabukula obulafu obo, nabalekha mushilima, nibalalola shiosi shiosi tawe

[18] Bekala amarwi ,abasilu, abawofu- khulwa- ako shibalikalukha tawe

[19] Nohomba shinga ifula okhurula mwikulu, ili nende eshilima nende okhwatulukha, nende okhumiesukha, baretsanga tsinzala tsiabu mumarwi khulwa okhwatulukha khwelikulu, nibariire okhufwa, ne Nyasaye amanyile muno abakhayi

[20] Okhumiesukha khwelikulu khukhaaba hambi okhuwofusia tsimoni tsiabu, buli shinga abamiesulila bachenda , nenishiilima nibeema. Ne Nyasaye yenyanga yakhabukule amarwi kabu nende tsimoni, toto Nyasaye nomunyali wa buli eshindu

[21] Enywe Abandu mulaame Nyasaye wenyu owabaloonga nende balia abaali inyuma wenyu, mubamurio khomunyoole okhuria

[22] Owabakholela liloba okhuba obulili nalo likulu okhuba shinga eshitsafu, mana niyeshia amaatsi okhurula mwikulu mana nabamesilia ebiamo khumukabo kwenyu, kho mulakholela Nyasaye ebifwanani nimumanyile tawe

[23] Ne nimuli mubukanakani khukalia aka khweshilia omusumba wefu, mana murerekhwo isura ndala shinga eyo, mana mulanje abaloli benyu, abalali Nyasaye tawe, toto nimuli abahabweene

[24] Ne nimulakhola murio tawe, neshimulikhola tawe, kho murie omulilo kwetsikhwi tsiakwo ni Abandu nende amachina, kwarecheshelwa Abakhayi

[25] Ne suubisia balia basuubila mana nibakhola amalayi mbu, balinyoola emikunda chia amatsi kakhulukusinjiamwo, ne olwa balikabwamwo ebiamo baliboola mbu; “kuno niko omukabo kwefu kwakhwahebwa imbeli. Ne balirererwa ebiamo bifwanana. Nebalinyolamwo Abakhasi abatswenufu, nebalimenyamo tsinyanga tsiosi

[26] Toto Nyasaye shalolanga tsisoni okhuchelaasia, kata nili isuna nende shili hekulu wayio, nebalia basuubila bamanya mbu toto ni obwatieli okhurula khu Nyasaye wabu, ne balia bakhaya baboolanga mbu; “nishina shia Nyasaye yenya okhukhuchelasia khuno? Akosia abaanji ne alunjisia abaanji, Ne shakosinjia tawe halali balia abafunakanga amalako

[27] Balia bafunakanga amalakano ka Nyasaye nibamalile okhulakwa, ne bakhalakanga aka Nyasaye yolomesia mbu kongaasibwe, nebakholanga amabii khushialo, abonibo abalisikha. (abalitiba)

[28] Mukaananga murie Nyasaye ne mwali abafuu mana nabalamusia, mana khandi alibafwisia, khandi alibalamusia, mana ewuwe niyo amulikalusibwa

[29] Ye niye owabaloonjela ebili khushialo biosi, mana naleng’ana hekulu, nalonga amakulu Saba naleeng’asia, naye niye omumanyi wabuli eshindu

[30] Olwa Nyasaye wuwo yaboolela Abamalaika mbu; “toto esie nditsa okhura khushialo omwemelesi wanje” Abamalaika nibaboola mbu; “Koo olaramwo ulia ukholamwo amabii natasiamwo amatsayi ne efwe khukhwitsominjia ni khukhwiteka” Nyasaye naboola mbu; “Esie emanyile kamulamanyile tawe.”

[31] Niyechesia Adam amera kebindu biosi, mana namwemia halala nende Abamalaika, naboola mbu; “Mumboolele amera kebindu bino, toto nimuli abahabwene.”

[32] Malaika nibaboola mbu “(Subhanaka) obutswenufu bwoosi nobubwo- Khubula amachesi halali kalia kokhumanyiyie. Toto newe wobumanyi owamachesi.”

[33] Nyasaye nababoola; “Ewe Adam! Baboolele amera kabio” Olwa yababoolela amera kabio, Nyasaye yaboola mbu; “esie shindababoolela mbu ndamanya akefisile akali mwikulu nende khushialo ne emanyile kamuretsanga habulafu nende kamufisanga?”

[34] Ne olwakhwaboolela Abamalaika mbu; “Inamile Adam!” mana nibamwinamila boosi okhuyiniakhwo Ibilisi, naloba nafura mana naba mubakhayi

[35] Nikhuboola mbu “Ewe Adam menya nomukhaye wuwo mumukunda, ne muliemwo obwokholo bwosi bwosi obwamwenya, ne mulasita ahambi khumusala kuno tawe mulaba mubalia bakholele obubii”

[36] Mana Shetani nabareresia nabarusia khukabalikhwo, mana nikhuboola mbu “Yikhe hasi, ne mulaba abasuku abeene khubeene. Ne khushialo nisho shilaba eshimenyo shienyu nende omwikhoyo kwebise. (bititi butswa) ”

[37] Adam nanyoola amakhuwa okhurula khu- Nyasaye wuwe Omulesi, mana Nyasaye wuwe namuleshela, Toto ye ni omunji wobulesheli Owetsimbabaasi

[38] Nikhuboola “yishemwo mwesi, ne toto obulunjifu okhurula khwisie bulabetsela, mana abaloonda obulunjifu bwanje obo shibaliba nokhuria nohomba shibalibeelela tawe.”

[39] Ne balia abakhaya nibafunaka ibimanyisio biefu, abo nibo abaliba Abandu bomumulilo, balimenyamwo tsinyanga tsiosi

[40] Enywe Abana ba Israili! Yitsulile tsimbabaasi tsianje tsiandabahelesia, mukhole shinga khwalakana, nasi ndilikhola shinga khwalakana, ne murie esie butswa

[41] Ne musuubile amakhuwa kandeshia akonga omukhono kamulinako, ne mulaba abambeli okhukakhaya tawe, ne mulakusia ebimanyisio bianje khubukusi obutiti tawe, ne murie esie butswa

[42] Ne mulasaasia obwatoto nende obubeyi tawe, ne mulafisa obwatoto nanyu nimumanyile tawe

[43] Ne mukhole eshinani khu khukhuswaliya (iswala), ne murusie eshihanwa (izakaa), ne mwiname halala nende benamanga

[44] Koo, mwakhalomesinjia Abandu okhukhola amalayi, nanyu abeene mwiyibilila, ne musomanga eshitabu! Shimuparangakhwo tawe

[45] Ne khaabe obukhoonyi khulwokhwifwila nende khulwokhulaama, ne toto likhuwa elo nilitinyu halali khubalia abehotselefu

[46] Abasuubila toto mbu balibukanana nende Nyasaye wabu omulesi, ne mbu toto balikalukha ewuwe

[47] Enywe Abana ba Israil! Yitsulile tsimbabaasi tsianje etsiandabahelesia mana nebakholela okhushilakho Abandu bandi boosi

[48] Ne murie inyanga yo Omundu alalikhoonya owundi liosi-liosi tawe nohomba shalisabila yesiyesi eshileshelo nohomba shiosi shiosi shiokhununula sishilibukulwa tawe, ne shibalihabinwa tawe

[49] Ne olwa khwabahabina okhurala khubandu ba Firauni, ababasandinjia eshinyasio eshibii abasinzanga abaana benyu abasiani, nenibalekha abakhana, ne mukano ni amatemo amakhongo okhurula khu Nyasaye wenyu omulesi

[50] Ne olwa khwaarula inyanza okhubeela enywe, ne nikhubahabina, nenikhusishia Abandu ba Firauni, nanyu nimulolanga

[51] Mwitsulile olwa khwalaka Musa tsinyanga amakhumi kane (akhole amalaamo malondokhania kho khumuwe Itaurati), Mana nimukhola eshimosi (okhuba Nyasaye wenyu) inyuma wuwe, mana nimuba abakholela obubii emioyo chienyu

[52] Mana nikhubaleshela okhurulana nende ako, kho munyoole ukhupa orio

[53] Ne yitsulile olwa khwahelesia Musa eshitabu nende Ifurqani (yokhwawukhasia akatoto nende akalali katoto), kho munyole okhulunjikha

[54] Ne yitsulila olwa Musa yaboola mbu; “Enywe Abandu banje- toto enywe mwikholele obubii khulwa okhukhola eshimosi (okhuba Nyasaye wenyu) Kho musabe eshileshelo khumwami wenyu, ne mwikalile emioyo chienyu (khulwokhwira ababii balimo), obo nobulayi khwinywe khu mulonji wenyu, mana nabaleshela, toto niye Omulesheli Owetsimbabaasi

[55] Ne(yitsulila) olwamwaboolela Musambu: “shikhulakhusuubila mukokhuboolelanga tawe okhula khulole Nyasaye netsimoni tsiefu” mana lifwa nilibayula nanyu nimulolanga.”

[56] Mana nikhubalamusia okhurula mulifwa lienyu khomunyoole okhupa orio

[57] Mana nikhubahelesia eshinikha shiamaleesi, mana nikhubeshilia Mana nende Salwa, (ibilibwa bwomwikulu) lie mubilayi biakhubakabile ne shikhwabakholela obubii tawe halali abeene nibo bakholela obubii emioyo chiabu

[58] Ne (Itsulile) olwa khwaboola mbu injile mulitokho lino, mana muliemwo shiamwenya, ne mwinjile mumuliango walio nimwihotselesiye neboole mbu khuleshele tsimbi tsiefu, khulabaleshela tsimbi tsienyu, ne khulametela abakholi bamalayi

[59] Mana abakhola amabii nibakalukhania likhuwa liababoolelwa, mana nikhubeshilia eshinyasio eshikhongo okhurula mwikulu khulwa obukalakala bwobwononi bwabu

[60] Ne ‘‘itsulile” olwa Musa yasaba Nyasaye amatsi khulwa Abandu bebe, mana nikhumuboolela mbu “khupa indabushi yiyio khwichina” Mana tsindoto ekhumi na tsibili nitsirundukha, mana buli ikholo nimanya habundu wayo wokhunywa, Mulie mana munywe khumukabo kwa Nyasaye ne mulakhola obwononi khushialo tawe

[61] Ne (Yitsulile) olwa mwaboolela Musa mbu; “shikhulesumilisia okhulia eshilibwa shilalasa tawe, kho khusabile Nyasaye wuwo akhurusilie bilia bimelanga mwiloba shinga eliani lialio nende amaondo kalio nende imele yalio nende tsing’oli tsialio nende amapwoni kalio, Nyasaye naboola mbu; “mukalukhasinjia ebindu ebiasi nende ebindu ebilayi bino? Mana tsie mulitokho, eyo mulanyoolayo biamusabile” mana nibakhupwakho eshimanyisio shiobuteshele, nende obumanani, mana nibakhoyeshela liruma lia Nyasaye, kano nilwokhubeela mbu bakhayanga amakhuwa ka Nyasaye, ne beranga Abarumwa eshikhaya butswa, ako nilwakhuba okhukhaya khwabu nende okhubura khwabu eshichelo

[62] Toto balia abasuubila nende balia Abayahudi nende Abakiristo nende Abasabai, yesi yesi wasuubila mu Nyasaye nende inyanga yeyindukho, mana nakhola ebikhole ebilayi, balinyoola omurungo kwabu khu- Nyasaye ne shibaliba nende obuyendi nohomba ukhubeelela tawe

[63] Ne (Yitsulile) olwa khwabukula indakano ninanyu, mana nikhuba chingulila eshikulu, (nikhubaboolela mbu) tile nende amani amakhuwa kakhumuhele kano, ne itsulile amakhuwa kalimwo kho munyoole okhuria Nyasaye

[64] Mana nimukalukhana okhurula hawo, bukhayanga okhuba obulayi bwa Nyasaye nende tsimbabaasi tsisie mwakhabeele mubasikha

[65] Netoto mwamanya amakhuwa kabandu bakhaya okhuloonda amalako- mwinywe (kokhuria) Inyanga ye isabato (yajumamosi), mana nikhubaboolela mbu: “mube amashene amateshele”

[66] Mana nikhukhola eshinyasio esho okhuba amekanyilisio khubalia bali khubise biabu nende abetsa inyuma wabu mana nikhukhola okhuba amachelo khubalia bamuritsanga Nyasaye

[67] Ne (Itsulile) Olwa Musa yaboolela abandu bebe mbu; “Nyasaye abalomesinjia mbu musinze ing’ombe: “ Baboola mbu “Koo okhukholelanga omubayo?” Naboola mbu; “Ndiliinda khu- Nyasaye okhuba mubasilu”

[68] Nibaboola, “khusabile khu- Nyasaye wuwo akhwinoosilie ni ing’ombe ili irie? Naboola; “toto ye aboolanga mbu Ing’ombe ilali ingofu nohomba indoro tawe, halali niya hakari awo, kho kholeshingala mulomesibungwa

[69] Nibaboola mbu; “Khusabile Nyasaye wuwo akhwinoosilie niyobukondo shina? Naboola mbu; “Ye aboolanga mbu ing’ombe eyo niya namabuyu ne obukondo bwayo busangasia abachilola.”

[70] Nibaboola khusabile Nyasaye wuwo, akhwinosilie ni ili irie? Shichila toto tsingo’mbe tsikhufwananile, ne toto Nyasaye nachama khwitsa okhuba abalunjifu

[71] Naboola mbu, ye aboolanga mbu : “shini ingombe yemilimo (yokhulima) tawe, nohomba shini yokhutsushilisilia amatsi emimela tawe, obukondo bwayo nobutswenufu muno, bubulamwo amapalapala,” Nibaboola mbu: “laano toto wakharera amakhuwa kwa habweene.” Mana nibayisinza ne nibabelenje ehale okhukhola endio

[72] Ne (yetsulile) olwa mwera omundu mana nimukabukhanamwo khulwa ako, (abandi baboola mbu nilebe, naabandi babola mbu ni lebe) Ne Nyasaye niye Omurusia wa ako akamwali nimukafisile

[73] Nikhuboola mbu: “mukhupile nende ibuleka wosiwosi weying`ombe eyo, “ Endio nilwa Nyasaye alamusinjia abafu, ne abamanyia ebimanyisio bibie khomunyoole okhumanya

[74] Mana emioyo chienyu nichiba emiumu okhurula hao, nichiba shinga amachina nohomba okhushilakhwo amachina, shichila amachina kandi kaliho karulangamwo emialo, ne akandimwo kaliho katikhanga nikarula amaatsi, ne akandi kaliho kakwitsanga khulwokhuria Nyasaye (Ne enywe abayahudi shimutilikhangakho khu liosi liosi) Ne Nyasaye shang’ang’alilanga akamukholanga tawe

[75] Enywe mparanga mbu balabasuubila, ne abandi mubo bawulilanga amakhuwa ka Nyasaye, mana nibakakalukhania nibakhakamanya obulayi, ebilali mukhukorwa tawe

[76] Ne nibabukana nende abasuubili nibaboola mbu: “ khwasuubila (toto Mohammad yarumbulwa mubitabu biefu) ne nibenjilanamwo abeene khubeene baboola mbu; ‘‘Mubaboolelanga aka Nyasaye yabafungulila (khobakhuyasie) khobakhushile ebifune khu Mulonji wabu, shimuparangakhwo tawe

[77] Shibamanyile mbu toto Nyasaye yamanya akabafisanga nende akabaretsanga habulafu

[78] Ne mubo balimwo nende timbiti, abandu balamanya okhusoma, halali eshiwonya shobusilu, nebabula liosiliosi halali okhuparirisia butswa

[79] Kho eshinyasio eshikhongo shilinyoola balia bahandikanga eshitabu nemikhono chiabu, nibaboola mbu: “shino shirula khu Nyasaye” khobanyoole obukhala obututu bwokhushialo. Eshinyasio eshikhongo khubo - khulwakabahandinga khumikhono chiabu (nibakatia mbu ni ka Nyasaye) eshinyasio eshikhongo khubo - balilolakhosa akabakholanga

[80] Ne baboola mbu: “Omulilo shikulikhutilakhwo halali tsinyanga tsinditi butswa” boola mbu, ‘koo Nyasaye yalakana ninanyu ario, Kho shalikalukhana tawe? Nohomba mukatilinjia Nyasaye amakhuwa kamukorerwe

[81] Eeeh ni endio, balia abakasia amabii – mana tsimbii nitsibabotokhana, abo nibo abandu bomumulilo, balimenyamwo tsinyanga tsiosi

[82] Ne balia abasuubila, mana nibakhola amalayi, abo nibo Abandu abo mwikulu, balimenyamwo tsinyanga tsiosi

[83] Ne (yitsulile amacheni kano) olwakhwalakana indakano nende Abaana ba Israili- mbu mulalaama shiosi shiosi halali Nyasaye, ne mukholele Abebusi amalayi, nende abekho nende abaana abafwilwa nende abamanani, ne muboole nende abaandu obulayi, ne mulumililie okhulaama (iswala,) nende okhurusia eshihanwa (izakaa), mana nimukalukhana halali batiti mwinywe, nanyu ni mukabulilamwo oluchendo

[84] Ne yitsulile olwa khwalakana indakano mbu shimulatatsia amatsayi kenyu tawe, neshimulaloonda abandu benyu mutsingo tsienyu tawe, mana nimufuchilila nenimukhaya okhukhola murio nanyu nimuliho

[85] Mana Enywe bano mwirananga abeene, ne muloondanga abenyu baandi mutsinzu tsiabu, mubarulilanga khumabii nende obusuku, Ne nibamwitsila abatililwe nimubanunula, nikali mbu mwakanibwa okhubanunula, ko! Musuubilanga mubitabu biindi ne mukhaya ebiindi? Mana nimurungo shina khu ukhola ako mwinywe halali eshifimbwa murwe mubulamu bwomushialo ne inyanga yeyindukho balinyoola eshinyasio eshilulu. Ne Nyasaye shang`ang`alilanga kamukholanga tawe

[86] Abo nibo bayanza obulamu bwokhushialo okhushila bwomwikulu Mana shibalitutuyilibwa eshinyasio tawe, nekhandi shibalihabinwa tawe

[87] Netoto khwahelesia Musa eshitabu mana nikhumulondiakhwo Abarumwa, inyuma wuwe, Nenikhuhelesia Isa omwana wa Mariamu abifune biahabulafu, mana nikhumuramwo amani ka roho omulafu (Jibril) Mana enywe olwa Abarumwa babetselanga nende akemioyo chienyu chilachamile tawe, mufura, ne omukanda mulala nimukufukula ne ukundi nimukwira

[88] Ne baboola mbu ; “emioyo chiefu chiafuunikhwa” Halali Nyasaye yabatsuba khubukhayi bwabu, ne ni matitisa akabasuubilanga

[89] Ne olwa eshibatu shiabetsela okhurula khu Nyasaye eshifuchilisania nende kabali ninako, ne inyuma ao bali nibakonyanga obufimbuli khubakhayi. Ne mana olwa kaboolela nibakamanya mana nibakakhaya, eshithubo shia Nyasaye shili khubakhayi

[90] Neshibii muno, shiabakusilia emioyo chiabu nenibakhaya aka Nyasaye yeshia khulwa okhulola ishinda mbu Nyasaye yeshilinjia tsimbabaasi tsitsie khu ulia owayenya mubasumba bebe, mana nibakhoyeshela liruma khuliruma, ne abakhayi baliba nende eshinyasio shiokhubatutuyia

[91] Ne nibaboolelwa mbu suubile khu ka Nyasaye yabeshilia, ni baboola mbu: “efwe khusuubilanga khukakhweshilibwa” ne bakhayanga okhusuubila akali inyuma wuwe, ne ako nikali akatoto, akatinyisia akabali ninako. Boola mbu ne khulwashina mwiranga Abarumwa ba Nyasaye inyuma eyo toto nimuli Abasuubili

[92] Netoto Musa yabetsela nende obwang’angu (obwatoto) mana nimukhola eshimwosi (okhuba Nyasaye wenyu) okhurula awo nanyu nimuli aboononi

[93] Ne olwa mwabukula indakano , nenikhubaninilia hekulu olukulu, Bukule akakhwabahelesia nende amaani mana muwulile, nibaboola mbu “khuwulile mana khulobele” mana nibanywesibwa mumioyo chiabu (okhulama) eshimwosi, khulwa okhukhaya khwabu, boola “nobubii buliburie buno bwobusuubili bwenyu bubalomesinjia toto nimuli abasuubili”

[94] Boola(ewe Muhammad) “Nikali mbu litala liomwikulu ewa Nyasaye nililisa elienyu mwenyene lilali liabandu bandi tawe, mana mwikombe lifwa toto nimuli aba habweene”

[95] Ne shibalilikombakhwo tawe, khulwa okhubeela akabaranjilisia nende emikhono chiabu ne Nyasaye nomumanyi muno awa abamabii

[96] Ne toto olabanyoola abo ni bayanza muno obulamu okhushilakho balia abatsokaasi, yekombanga mulala wabu mbu bakhamenyele emiika iyelefu, ne kata kario shibilamurusia mubandu beshinyasio tawe, ne Nyasaye nomuloli muno khukabakholanga

[97] Boola “yesi yesi uli omusuku wa Jibril, toto ye niye weshia khumwoyo kukwo Ikurani khubuchami bwa Nyasaye, itinyisinjia kalia kaliho imbeli wayio, ne ni obulunjifu nende omwikhoyo khubasuubili

[98] Ulia uba omusuku wa Nyasaye nende Abamalaika bebe nende Jibril, nende Mikaili, toto awo Nyasaye nomushili wabakhayi

[99] Netoto khwakhwishilia ebifune bili habulafu ne shibabikhaya tawe halali balia abandu bafunakanga amalako

[100] Oh, ne buli nibabukula indakano abandi mubo bayisukunanga, ne abaanji mubo shibasuubilanga tawe

[101] Ne olwa yabetsela Omurumwa okhurula khu- Nyasaye, utinyisia akabali ninako, abandi mu balia bahebwa eshitabu shia Nyasaye basukuna amakhuwa ka Nyasaye inyuma wemikongo chiabu opara mbu shibamanyile tawe

[102] Mana nibaloonda amakhuwa ka shetani yasomelanga abandu tsinyanga tsia Suleiman, Ne Suleiman shiyakhaya tawe halali amashetani nikokakhaya, kechesinjia abandu obulosi, ne shibeshilibwa abamalaika babili litokho lia Babil – Harut nende Marut, Ne shibechesinjia yesiyesi tawe okhula bamuboolele mbu “efwe khulii amatemo, kho alaba omukhayi tawe,” ne bekanga okhurula khubo babili akakabukhasinjia omusatsa nende omukhasi wuwe. Ne nabo shibali nibanyala okhunyasia yesiyesi halali khubuchami bwa Nyasaye , nebekanga akabawumusia neshikabakhoonya tawe, Ne toto bamanya mbu ukakula, abula ewa Nyasaye omukabo, Ni amabii karie kabakusilia emioyo chiabu, abaane bamanyangakhwo

[103] Ne babetsanga mbu basuubila mana baria, bakhanyoolele amalayi ewa Nyasaye, abaane bamanyangakhwo

[104] Enywe Abasuubila, mulaboola mbu “raaina” okhwaye tawe, halali muboole mbu “ undhurna” ukhuwenge, mana muwulile, ne abakhayi balinyoola eshinyasio eshilulu

[105] Abakhayi mubandu bahebwa eshitabu nende abatsokasinjia Nyasaye, shibenyangakhwo mbu munyoole obulayi bwosibwosi okhurula khu Nyasaye wenyu tawe, Ne Nyasaye yawulanga khutsimbabaasi tsisie owayenya , ne Nyasaye niwamalayi amanji

[106] Olunyaali lwosilwosi lwakhurusiao nohomba lwakhwibilisia khureranga olundi olulayi okhushilakhwo olo nohomba shinga olwo, okorerwe mbu Nyasaye ni omunyali wa buli eshindu

[107] Shomanyile mbu toto Nyasaye ali nende obwami bwomwikulu nende bwokhushialo, ne mubula omulindi nohomba omukhoonyi wenyu owulali Nyasaye tawe

[108] Nohomba mwenyanga okhureeba Omurumwa wenyu shingala Musa yareebwa inyuma hao, ne ukalukhania obukhayi nende obusuubili oyo toto yamala okhukora injila yahabwene

[109] Ne abaanji abandu beshitabu bekomba muno okhubakalusia inyuma nimumalile okhusuubila mube abakhayi khulweyishinda okhurula mumioyo chiabu, obwatoto nibumalile okhuboolela, kho leshelane mulalingakhwo tawe okhuula shinga Nyasaye aletsa nende okhubusia khukhwe, Toto Nyasaye nomunyali wabuli eshindu

[110] Ne mulumilile okhulaama (Iswalaa) ne murusie eshihanwa (Izakaa), ne shosishosi shiamuranjilisia enywe abeene mumalayi mulishinyoola ewa Nyasaye, toto Nyasaye alolanga muno akamukholanga

[111] Ne baboola mbu “abulaho ulinjila mwikulu owulali omuyahudi nohomba omukristo”, Ako ni amaparo kaabu butswa. Boola mbu “rere ebifune bienyu toto nimuli abahabwene”

[112] Ne habwene, ulia walekhulila Nyasaye obweni bubwe mana nakhola amalayi, alinende omurungo kukwe ewa Nyasaye wuwe ne balibula oburii nohomba shibalibeelela tawe

[113] Abayahudi baboola mbu Abakristo babula shiosi shiosi shiahabwene shokhwemakhwo, ne Abaktristo boosi nibaboola mbu Abayahudi babula shiosishiosi shiahabwene, shiokhwemakhwo nabo basomanga eshitabu, ne endio nilwababoola abakorwa amakhuwa kafwanana nende akaabu, kho Nyasaye alibakabukhasia inyanga yeyindukho khukabawukhanilanga

[114] Niwina omubii ushila ulia wikalila omusikiti kwa Nyasaye mbu lilarumbulwamwo elira lilie mana narakhwo eshinaniokhukunyasia, aboshibakhoyekhana ukhwinjilamwo halali khulwa okhumuria. Abo balanyoola khushialo omusando, ne mwikulu balinyoola eshinyasio eshikhongo

[115] Ne Ebukwe nende Mumbo niwa Nyasaye kho habundu wosiwosi amukalukhana- obuchami bwa Nyasaye buliho, Toto Nyasaye ni Omunji muno Omumanyi

[116] Ne baboola mbu “Nyasaye yekasilia Omwana” Nyasaye ali ehale nende ako- halali ebili mwikulu nende mushialo bioosi bimuritsanga

[117] Niye Omuloonji Welikulu nende eshialo, ne niyenya likhuwa aboola butswa libee nilibaa

[118] Naabakorwababoolambu“shichilashina nalaboola ninafu nohomba eshimanyisio shikhwitsile?” endio nilwababoola balia abali imbeli wabu, amakhuwa shinga-ako, imioyo chiabu chili nashilala, toto efwe khwara habulafu ebimanyisio khubandu bokhusuubila amakhuwa

[119] Toto efwe khwakhuruma mbu wechesie obwatoto khulwa okhurera amalayi nende okhwikanyilisia nemana sholarebwa abandu bomulilo tawe

[120] Neshibaliba obulayi ninanyu Abayahudi nende Abakiristo, okhula muloonde imela yabu, Boola mbu “toto obulunjifu bwa Nyasaye nibo obulunjifu, ne noloonda okhwenya khwabu, obumanyi nibumalile okhuulila, sholinyoola omukhoonyi nohomba omulindi ewa Nyasaye tawe

[121] Balia bakhwelesia eshitabu (Taurat- Injil – Zaburi) bashisoomanga shingala shienyekhana, abo bashisuubilanga mwo, ne bashikhaya, abo nibo abalisikha

[122] Enywe Abaana ba Israili!! Itsulile tsimbabaasi tsianje etsia ndabahelesia, ne mana esie nebakhola obulayi okhushila Abandu boosi

[123] Ne murie inyanga yo Omundu alalikhoonya owashie tawe, ne sishilichamilwa eshimununula tawe, ne okhusabilwa shikhulikhoonya tawe, nemana shibaliresibwa tawe

[124] (Itsulile) olwa Nyasaye wuwo yakholela Ibraheem amarebo, mana(Ibrahim) nakabura, yaboola mbu; “Esie ekhukholele obe omwimilisi wa Abandu” Ibraheem Naboola “Ne mulwibulo lwanje?” Naboola mbu ; “Eeh , halali indakano yanje shiloolela abamabii tawe”

[125] Ne (yitsulile) olwakhwakhola inzu ibe habundu wa Abandu okhutsia, ne nikhuyikhola habundu womulembe, Ne habundu wa Ibraheem yemanga nikhukholao mbu abe wakhulamilao, ne khwachelela Ibraheem nende Ismaeil, nikhubaboolela mbu; “tswenule inzu yanje khulwa balia bachibotokhananga (batufanga) nende bekhalanga, nende benamanga nende basujudanga

[126] Ne olwa Ibraheem yaboola mbu “Ee Nyasaye wanje, okhole litokho lino libe nomuleembe ne ohelesie abamenyamwo ebiamo, bialia basuubilanga Nyasaye nende Inyanga yeyindukho”, Nyasaye naboola; “Nende kata balia abakhayi bosi, nditsa okhubaha obwokholo butiti, mana ndilibasindikhakhwo eshinyasio shiomulilo, nawo ni habundu abii muno wakhukalukha

[127] Ne olwa Ibraheem yachingula lisisi lieyinzu nende Ismaeil, nibasaba “Ee Nyasaye wefu khuchamile emilimo chiefu chino, toto ewe ni omuwulili umuchesi muno”

[128] “Ewe Nyasaye wefu! Okhukhole khube abehotselefu khwiwe, nende olwibulo lwefu lube lwabandu abehotselefu khwiwe, ne okhumanyie injila yemilimo chiefu, ne okhuleshele, Toto newe omulesheli owobukoosia

[129] “Ewe Nyasaye wefu! Obawulile Omurumwa Owurulana ninaboo, abasomele tsinyali tsitsio, nende okhubeechesia eshitabu nende amachesi, ne obatswenule, toto ewe newe Owaamani Owamachesi

[130] Ne niwina witsa okhwira ehale nende emilukha chia Ibraheem halali ulia ura omwoyo kwaye mubusilu? Ne toto efwe khwamwawula mushialo netoto ye mwikulu aliba mubaandu abalayi

[131] Ne “yitsulile olwa Nyasaye wuwe yamuboolela mbu “wihotselesie” naboola mbu “ndihotselesiye khu Nyasaye webilonje bioosi.”

[132] Ne Ibraheem nachelela Abaana bebe nende Yakub, “Enywe Abaana banje toto Nyasaye yabalobolela idini ino, kho mulafwa nimulali abehotselefu khuye (abasalamu) tawe”

[133] Nohomba enywe (Abayahudi nende Abakiristo) mwaliho olwa lifwa liolela Yaqoob? Olwa yaboolela Abaana bebe, “ni wina wamulalaama nindakhabulaho” nibaboola “khwitsa okhulaama Nyasaye wuwo nende Nyasaye wa bapapa bao balaamanga, Ibraheem nende Isameil nende Is’haq Nyasaye mulala butswa – ne efwe khwihotselesiye khuye”

[134] Abo ni Abandu bamala okhubura, balinyoola omurungo khukabakholanga, nanyuu mwesi mulinyoola omurungo khukamukholanga, nanyu shimulirebwa akabakholanga tawe

[135] (Abayahudi okhuboolela Abalasamu) Ne nibaboola mbu: “ mube Abayahudi nohomba Abakristo mulalunjikha, Boola mbu : (ewe Mohammad) “toto omulukha kwa Ibraheem okwayalekha tsidini tsiobukori naloonda idini yatoto, neshiyali mubatsokaasi tawe

[136] Boole, “khusuubiile Nyasaye nende kalia akeshibwa khwifwe nende khu Ibraheem, nende Isameil, nende Is’haq nende Yaqoob, nende Abaana ba Yaqoob, nende keshibwa khu Musa nende Yesu nende akeshibwa khu Abarumwa okhurula khu Nyasaye wabu, shikhwitsa okhukabukhasia yesi yesi hakari wabu tawe nafu khuli abehotselesi khuye

[137] Ne nibasuubila shinga mwasuubila murio balaba toto balunjishe. Ne nibakalukhana awo balaba bali mubutokaani bwabu butswa, kho Nyasaye yetsa okhulinda okhurulana nende obusuku bwabu, ye niye omuwulili omumanyi

[138] Obwisilamu nishio eshirone shia Nyasaye yabaronela, ne ni wina omuroni omulayimuno okhusila Nyasaye?” Ne efwe khumulamangasa ye yenyene

[139] Boola mbu; “muyingananga ninafu khu makhuwa ka Nyasaye, naye ni Nyasaye wefu khandi ni Nyasaye wenyu, Nafu khuli nebikhole biefu na enywe muli nebikhole bienyu, nafu ye butswa niwakhukholelanga

[140] Nohomba muboolanga mbu Ibraheem nende ismaeil nende Is’haaq nende Yaqoob, nende olwibulo lwa Yaqoob bali Abayahudi noho Abakiristo? Boola “nenywe mumanyile muno nohomba Nyasaye? Ne niwina omubii oyo okhushilakhwo ulia ufisanga obuloli bwalinabwo khu – Nyasaye! Ne shikali mbu Nyasaye shalolanga kabakholanga tawe

[141] Abo ni Abandu bamala okhubura, balinyoola omurungo khukabakholanga, nanyu mwesi mulinyoola omurungo khukamwakholanga, nanyu shimulireebwa akabakholanga tawe

[142] Abasilu mubandu baliboola mbu; “Nishina shiabarusia khukibla (habundu okhuhenga nolaama) shiabu shiabalikhwo?”Boola mbu: “ Ebukwe nende Mumbo nitsia Nyasaye; Alunjisinjia owayenya khunjila ilunjifu.”

[143] Ne endio nolwakhwabakhola enywe Abandu bahakari, khomube abaloli khubandu, ne Omurumwa abe omuloli wenyu, Neshikhwakhola Kibla shienyu shiamwalikhwo halali khokhumanye niwina uloonda Omurumwa, neniwina ukalushila ebisisilo bibie inyuma. Ne kali amatinyu halali khubalia ba Nyasaye yalunjisia, Ne Nyasaye shiyali ukosia obusubili bwenyu tawe, toto Nyasaye khubandu niwetsimbambaasi wabukosia muno

[144] Toto khulutsi okhukalukhana khwobweni bubwo mwikulu, khokhwitsa okhuhelesia Kibla eshia omwoyo kukwo kuchamile, kho lenjia obweni bubwo ebuleka womusikiti kwo luyali,(Makkah) Newosiwosi amuli mulenjie obweni bwenyu mumbeka mwayo, Ne toto balia bahebwa eshitabu bamanyile mbu ni obwatoto okhurula khu Nyasaye wabu,Ne shibili mbu Nyasaye shalolonga kabakholanga tawe

[145] Ne nohelesia balia abahebwa eshitabu ebifune bioosi shibalaloonda Kibla shishio tawe, nawe sholi uloonda Kibla shiabu tawe, Ne abeene khubeene shibakhaloonda Kibla shiowundi tawe, Ne niwitsukhana waloonda eshia emioyo chiabu chienya obumanyi nibumalile okhuulila ,toto hawo olaba mubandu abamabii

[146] Balia abakhwahelesia eshitabu bashimanya shinga bamanya Abana babu, netoto umukanda mubo kufisanga obwatoto nabo nibamanyile

[147] Obwatoto okhurula khu-Nyasaye wuwo Omulesi olaba mubalia abakholanga eshibeyibeyi tawe

[148] Ne buli omukanda kwali nende akwahenganga (Kibla shiakwo). kho mwitinyie okhukhola amalayi ,wosiwosi amuli Nyasaye alabareera mwesi halala, toto Nyasaye nomunyali wa buli eshindu

[149] Ne wosisi wotsia lenjia obweni bubwo khu musikiti kwo luyali kwa Makka, ne obo nibo obwatoto burulanga khu Nyasaye wuwo omulesi, ne shibili mbu Nyasaye shalolanga akamukholanga tawe

[150] Ne wosiwosi otsia linjia obweni bubwo khumusikiti kwoluyali. Ne wosiwosi wamuli mulinjie obweni bwenyu eyo akuli (omusikiti oko) kho Abandu bakhaye okhuba nende eshifune khwinywe, halali balia ababii mubo, kho mulabaria tawe, halali murie esie, kho enyoole okhubabeela tsimbabaasi tsianje, khomunyoole okhulunjikha

[151] Shingala efwe khwabarumila Omurumwa okhurula mwinywe, abasoomelanga tsinyaali tsiefu nabatswenula ne abechesia eshitabu nende amachesi kamwalali nimumanyile tawe

[152] Khomunzitsulile nditsa okhubetsulila, ne mukhupile orio mulakhaya tawe

[153] Enywe Abasuubili, mwikhoonye khukhwisumilisia nende okhulaama, Nyasaye ali halala nende abesumilisinjia

[154] Ne mulaboola khubalia berwa nibali khunjila ya Nyasaye mbu nabafu tawe, halali ni abalamu, ne enywe shimumanyile tawe

[155] Ne toto khwista okhubara khumatemo (khu Malala khumakhuwa kano) oburi, nende inzala nende obulemefu bwo omwandu nende Abandu nende ebiamo, ne osuubisie Abasuubili amalayi

[156] Balia banyoolungwa namasila nibaboola mbu “toto efwe khuli aba-Nyasaye ne efwe toto uwuwe ni akhulikalukha”

[157] Abo baliba nende tsikhabi okhurula khu Nyasaye wabu nende tsimbabaasi. Ne abo nibo abalunjifu

[158] Toto (ebikulu bia) Swafa nende Marwa, ni ebilolelo bia Nyasaye khu ulia utsiakhunzu ya Nyasaye (Okhuhija), nohomba okhukhola hija inditi (umra), shinobubii khuye okhubibotokhana tawe, Ne ulia wikholela omwene amalayi, toto hao Nyasaye nomuunji wokhupa orio ne ni Omumanyi muno

[159] Toto balia bafisanga akakhweshia - nako ni ebifune bili habwene, nende obulunjiifu- nikhumalile okhwinoosilia Abandu mushitabu, abo Nyasaye abatsuba ne buli Abatsubi babatsuba

[160] Halali balia abasaba eshileshelo, mana nibakasia mana nibeenosia, abo nditsa okhubaleshela, ne esie endi Omulesheli muno, Owobukoosia

[161] Toto balia abakhaya mana nibafwa nibali abakhayi abo bali nende eshitsubo shia Nyasaye nende shia Abamalaika nende eshia Abandu boosi

[162] Balimenyamwo tsinyanga tsioosi, shibalitutuyilibwa eshinyasio ne shibalihengwakhwo tawe

[163] Ne Nyasaye wenyu ni mulala, abulao Nyasaye owulali ye tawe, ne ni Owetsimbabaasi Owobukoosia muno

[164] Toto khukhuloonga likulu nende eshialo nende okhubotokhana kweshilo nende eshitere, nende amaaro kachendanga khunyanza, khukhukhoonya Abandu, nende amaatsi ka Nyasaye yeshinjia okhurula hekulu, mana nalamusia liloba okhurula mukhufwa khwalio, mana nasalasiamwo buli imbia yetsisolo, nende okhukalukhana khwomuyeka nende amaleesi kalomesibungwa okhubura hakari weshialo nende likulu khulimwo nende eshilolelo khubandu baparanga

[165] Ne mubandu balimwo balia bakholanga ebifwanani bilali Nyasaye, babichama muno shinga bakhachama Nyasaye, ne balia abasuubila bayanza Nyasaye muno, Ne balia abakholi bamabii bamanyanga –olwa balilola eshinyasio, mbu amaani koosi ni ka Nyasaye ne Nyasaye ni weshinyasio eshilulu

[166] Abalondungwa olwabaliikongola balia ababaloondanga, ne eno nibamalile okhulola eshinyasio, hawo obulala bwabu bulikhalikha

[167] Ne abaloonda baliboola mbu: “khubetsanga nikhunyala okhukalukha khwabakhaya shingala bakhukhayile” Endio nilwa Nyasaye abechesia ebikhole biabu okhuba ametsulisio khubo, Ne shibalirula mumulilo tawe

[168] Enywe Abandu mulie bilimushialo abiamwachamilwa ebilayi, ne mulaloonda amaseenelo kashetani tawe, toto ye ni omusuku wenyu owahabulafu

[169] Toto ye abalomesinjia okhukhola amabii nende eshifwabi nende okhuchishila Nyasaye akamulamanyile tawe

[170] Ne nibabilwa mbu “Loonde aka Nyasaye yeshia” baboola mbu; “Efwe khuloonda aka khwanyoola bapapa befu nibalikhwo” Koo kata nikali mbu bapapa babu shibali nibamanya eshindu tawe, nende nibalaali abalunjifu

[171] Ne balia abakhaya bali shinga ulia wayulilanga ulawulila tawe, halali omwoyo butswa nende obuyoka. Ni abatimbe, abasilu, abawofu mana kario shibamanyanga tawe

[172] Eywe abasuubila lie khubindu ebilayi biakhubakabiile ne mupile orio Nyasaye toto nimuba mbu niye butswa owamulaamanga

[173] Toto ye yabakania okhulia ebifwile nende amatsayi nende inyama yeyimbitsi, nende eshiarumbulilwakho ebise bwokhushisinza lilali elira lia Nyasaye, Habula ulia wulilwa nende okhubula shingala akhola, obulali okhwikomba nohombo okhubura eshichelo, awo ye abula tsimbii. Toto Nyasaye ni omulesheli owetsimbabaasi

[174] Toto balia bafisanga ka Nyasaye yeshia okhurula mushitabu, nebakakusinjia ako obukusi obutiti, Abo shibalitsanga mutsinda tsiabu okulali omulilo tawe, ne Nyasaye shalilomaloma ninabo inyanga yeyindukho neshalibatswenula tawe, ne baliba neshinyasio eshilulu

[175] Abo nibo balobola obukori okhushila obulunjifu nende eshinyasio okhushila obulesheli, Koo bali nende manishina akokhwisumilisia mumulilo

[176] Endio niliokhuba mbu Nyasaye yeshia eshitabu khubwatoto, ne toto balia bakabukhanamwo mushitabu bali khubushilani buli ehale muno nende obwatoto

[177] obulayi shibuli mbu ni okhuhenjia obweni bwenyu ebuleka webukwe nende Mumbo tawe , halali obulayi ni ulia wasuubila khu- Nyasaye nende inyanga yeyindukho nende Abamalaika nende eshitabu nende Abarumwa, mana narusia omwandu khukhuyanza khukhwe, nahelesia Abeekho nende Abafwilwa nende Abamanani nende Abananjira (bakhalishilwe) nende Abasabi, nende benya okhununulwa-mana nibalumilila okhulaama, nende okhurusia ishihanwa. (izakaa), nende balia bakholanga shinga balakana khundakano yabu, nende befwilanga mubunyakhani nende ubumisanio bweliyie. Abo nibo abahabwene, ne abonibo abaria Nyasaye

[178] Enywe abasuubila, mwalachilwa okhurunga imongo (kisasi) khubalia bererwe, omulekhuule khumulekhuule, omusumba khumusumba, ne omukhasi khu mukhasi, ne uleshelwa nende owashie shiosishiosi kho alondwekho omuhe khubulayi, naye arunge obulayi, okho ni okhwanguyilibwa okhurula khu Nyasaye wenyu omulesi. Ne ularuuma eshichelo nikhwakhamala kano, alaba nende eshinyasio eshilulu

[179] Mulaba nende obulamu obulayi khukhurungana imongo (kisasi) enywe abobwongo khomunyoole okhuria

[180] Mwalachilwa- mulala wenyu lifwa nilimulila nalekha omwandu, alekhe obulache khubebusi nende khubekho munjila indayi ichamisia, Kano kalachilwa khubaria Nyasaye

[181] Ne ulia ulakalukhasia obulache namalile okhuwulila, tsimbi tsilaba khubalia bakalukhasinjia, toto Nyasaye ni umuwulili omumanyi muno

[182] Ne ulia uririla omulachi okhukora, nohomba okhunyoola tsimbi, mana narera omulembe hakari wabu, shalaba nende tsimbi tawe, toto Nyasaye niwobulesheli muno owobukoosia

[183] Enywe abasuubila, mwalachilwa okhufunga (saumu) shingala balia abali imbeli wenyu balachilwa, kho munyoole okhuria Nyasaye

[184] Tsinyanga tsibalikha butswa, ne owuli omulwale mwinywe nohomba owuli khuluchendo abalilile tsinyanga tsindi. Nebalia abanyala, barusie omurungo (Fidia) balisie Abamanani ebilibwa, ne ukhola obulayi khulwokhwirusilia obo ni obulayi khuye, Ne nimufunga ni obulayi khwinywe, nimuba mbu mumanya

[185] Omwesi kwa Ramadhani okwa Ikurani yeshilibwamwo okhuba obulunjifu khu bandu, nende ebifune bili habulafu okhurula khubulunjifu nende obwawukhasio (hakari wo bwatoto nende obubeyi.) Kho ulia mwinywe womwesi oko kumunyoola afunge, Ne uli omulwale nohomba uli khuluchendo abalilile tsinyanga tsindi, Nyasaye abenyelanga obwangu, ne shabenyelanga obusiro tawe, Ne mumale tsinyanga tsibalwa etso ne mwitsomie Nyasaye khu kayabalunjilisia, muba murio khomwanyoola okhupa orio

[186] Ne Abasumba banje nibakhureba esie, (boboolele) esie endi ahambi, ewulilanga amasayo komusabi niyasaba, kho bafuchilile mana basuubile esie, khobanyoole okhulunjikha

[187] Mufuchililwa eshilo shokhufunga, okhwinjililana nende abakhasi benyu, bo ni eshifwalo shienyu nanyu muli eshifwalo shiabu, Nyasaye amanyile mbu mubelenje nimulolanga obusiro mumioyo chienyu, mana abachamile amasayo kenyu mana namuleshela, bulaano mubabaasie ne mukonye shia Nyasaye yabahandichila, Ne mulie ne munywe okhula shingala mulola obulafu bwomumabwibwi okhurula khubumali bweshilo, mana mumalisie okhufunga okhula eshilo, ne mulababaasia nimuli mumusikiti tawe (itikafu), olo ni olwakho lwa Nyasaye mulasita ahambii nalwo tawe, Endio nilwa Nyasaye aretsanga habulafu ebimanyisio bibie khubandu kho banyoole okhumuria

[188] Ne mulalia emiandu chienyu abeene khubeene mubulianga tawe, nende okhuchiyila khubaami khomunyoole okhulia ebuleka we emiandu chiabandu mutsimbi, nanyu nimumanyile

[189] Bakhurebanga okhulondakhana nende emiesi, boola mbu: “Ebo ni ebichelo biebise khulwokhubeela Abandu nende Haji”, Ne shinobulayi okhwinjila munzu okhuburira namukongo tawe. Halali obulayi ni ulia uria Nyasaye, ne injile mutsinzu okhuburira mumuliango chiatsio. Ne murie Nyasaye khomunyoole okhubura

[190] Ne mulwane khunjila ya Nyasaye balia babalwaninjia, ne mulabura eshichelo tawe, toto Nyasaye shiyachama Abandu babuririranga eshichelo tawe

[191] Ne mubeere wosiwosi amubanyoola, nemubalonde shinga boosi babaloondanga, ne inzoka ni imbi muno okhushila okhwira. Ne mulalwana ninabo mumisikiti kwoluyali okhula bobachake okhubalwaniliamwo. Ne nibachaka okhubopelamwo mwesi mubakhupe. Ne endio nilwakuli omurungo kwabakhayi

[192] Ne nibalekha (nobulayi) toto Nyasaye nomunji wabulesheli owobukoosia

[193] Nemukhupane nabo okhuula inzoka (shirki) ibuleho, ne idini ibe ya Nyasaye butswa, nenibalekha, obusuku bulabaho tawe halali khubalia bakhukhola obubii

[194] Omwesi kwoluyali khumwesi kwoluyali, ne ebindu bioluyali biarebwakho likhobo(kisasi), kho owubaseera nende emielo mwesi mubakhuye shinga babakhuyile, Ne murie Nyasaye, ne mumanye mbu Nyasaye ali halala nende abamuria

[195] Ne murusie (emiandu) khunjila ya Nyasaye, ne muleyinjisia nemikhono chienyu mubusishi tawe, ne khole amalayi, toto Nyasaye yachama abakholanga amalayi

[196] Ne mukhole Hajj nende Umra (oluchendo lwokhutsia Makkah) shichila Nyasaye, ne nimwikalilwa murusie eshihanwa shamunyala shimwanguyila ne mulabeka emirwe chienyu tawe okhula eshihanwa shiule habandu ashikhoyele okhuba. Kho ulia uli omulwale mwinywe nohomba uwumiye khumurwe kukwe, naye arunje khulwokhufunga nohomba okhurusia ishihanwa nohomba eshisinzwa, ne nimulaba obulayi, kho yesiyesi wisangasia khulwokhukhola umra- kho ahije – awo asinze ishisinzwa shimwanguyila okhunyoola. Ne ubula okhunyoola afunge tsinyanga tsitaru, nali muhijja nende tsinyanga saba nimwakhakalukha, etso ni tsinyanga ekhumi tsinaamba. Ako ni khulwa ulia owabandu baye shibali ahambi nende omusikiti kwoluyali tawe. Ne murie Nyasaye ne mumanye mbu Nyasaye ni omululu wokhuhana eshinyasio

[197] Hijja ni imiesi emimanyishe, kho ulia ulachilwa okhukhola hijja mumiesi echo alaboola amakhuwa amabii nohomba alakhola ebikhole ebibii tawe, nohomba alayingana mu haji tawe. Ne liosi lwosi lilayi liamukhola Nyasaye alimanyile, ne mwikasilie emikabo emilayi ne emikabo emilayi ni okhuria Nyasaye, ne muurie esie enywe Abandu bobwongo

[198] Shinobubii khwinywe tawe okhukoonya tsimbabaasi tsia Nyasaye wenyu omulesi, ne olwa mwitsa okhuba nimuyombokha okhurula Arafat murumbule Nyasaye mutsimbeka tsioluyali, Mumurumbule shingala yabalunjisia, shingala mwali inyuma awo mubandu bakora

[199] Mana muyombookhe okhurula awo shingala Abandu bayombokhanga boosi, nemusabe Nyasaye eshileshelo, toto Nyasaye nomulesheli owobukoosia

[200] Ne nimumala okhukhola emilukha chienyu, Awo murumbule Nyasaye shingala mwarumbulanga basenywe nohomba murumbule okhushilakho hao, ne mubandu baliwo baboolanga mbu: “Nyasaye khwelesie amalayi khushialo” ne mwikulu (Akhera) babulayo omukabo kwosikwosi

[201] Ne mubo baliwo baboolanga mbu “Nyasaye khuhelesie khushialo amalayi ne mwikulu okhuhelesie amalayi ne okhuliinde okhurulana nende eshinyaasio shiomulilo

[202] Abo bali nende omukabo khukabakholanga, ne Nyasaye ni Omwangu wokhubala

[203] Ne murumbule Nyasaye mutsinyanga etsotsibalikha, newiyanguyilisiamutsinyanga tsibili, (nakalukha) hao abula tsimbi tawe. Ne ulia witsa okhushinda yesi abula tsimbi khu ulia uria Nyasaye. Ne murie Nyasaye ne mumanye mbu mulikhung’asibwa ewuwe

[204] Ne mubandu baliho bamakhuwa kabu kakhusangasinjia khushialo. Nabo bakholanga Nyasaye okhuba omuloli khukali mumioyo chiabu, nabo nibali nobusoolo obukhongo muno

[205] Ne nibarula, basalaana khushialo okhukhola obutobela (amabii) okhusishia emimela nende emioyo. Ne Nyasaye shiyachama abamabii tawe

[206] Ne nibaboolelwa mbu; “Murie Nyasaye” obukhongo bwabu bubabukula okhukhola amabii. Kho Jahanaam niyo ilibayela, nao ni habundu habii muno

[207] Ne mubandu baliwo bakusinjia emioyo chiabu khulwokhwenya obuchami bwa Nyasaye, ne Nyasaye ni omwihotselefu muno (omuloonga) khubasumba bebe

[208] Enywe abasuubila injiile mubusalamu nebilenje bioosi, ne mulaloonda amaseenelo kashetani tawe, toto ye ni omusuku wenyu owahabulafu

[209] Ne nimurerekha ebifune bia habwene nibimalile okhuboolela, kho manye mbu toto Nyasaye niwa Amaani Owamachesi muno

[210] Khuli nende elindi liabalindanga halali Nyasaye okhubetsela nende ebinikha biamaleesi, nende Abamalalika, mana likhuwa libusibwe, ne ewa Nyasaye namakhuwa koosi kalikalusibwa

[211] Reba olwibulo lwa Israili, ni ebimanyisio biefu binga bilolekha biakhwabarumila? Ne ukalukhaninjia tsimbabaasi tsia Nyasaye nitsimalile okhumwitsila, toto Nyasaye ni omululu weshinyasio

[212] Abakhayi baronelwa obulamu bwokhushialo ne batseshelelanga Abasuubili, ne abaritsanga Nyasaye baliba hekulu wabu inyanga yeyindukho, ne Nyasaye akabanga wayenya bulali nende shichelo

[213] Abandu boosi bali be idini ndala, (yayetsa ninayo Adam) (Mana nibakabukhana) mana Nyasaye narera Abarumwa abareranga amacheni amalayi nende okhwikanyilisia, mana- nabeshilia halala ninabo ebitabu khubwatoto bikabule Abandu akabawukhanamwo, Ne shibawukhana khwako halali abahebwa ebitabu ebo- abwatoto nibwakhamala okhubetsela shichila ishinda hakari wabu, mana Nyasaye nalunjisia balia basuubila khukalia akabawukhanamwo khubunyali bubwe, Ne Nyasaye alunjisinjia wayenya khunjila ingolololofu

[214] Nohomba mparanga mbu mulinjila mwikulu nikashili okhuboolela ngakolela balia abaali inyuma wenyu? Banyoolwa nende obutinyu nende amaraba mana nibaresibwa muno, Omurumwa nende abaasubila ninaye nibaboola mbu “obuhabini bwa Nyasaye nibuule lina? Koo Mumanye mbu obuhabini bwa Nyasaye buli hambi

[215] Bakhurebanga mbu nishiina eshiabarusia? Boola mbu ; “shiosi shiosi shiamurusia mubulayi muhelesie abebusi nende abeekho nende abaana abafwilwa nende abamanani nende balia bali khuluchendo (abananjila), Ne amalayi kosikosi kamukhola Nyasaye akamanyile muno

[216] Mwalomesibwa okhulwana liyie, (khulwa idini) nalo nilikhuwa lisiro khwinywe, ne munyala okhukhayanga eshindu nashio nishili eshilayi khwinywe, ne munyala okhuchamanga eshindu nashio nishili eshibii khwinywe, ne Nyasaye niumanyile muno nanyu shimumanyile tawe

[217] Bakhurebanga okhulwana mumwesi kwoluyali, boola mbu; “okhulwana mumiesi kwoluyali ni tsimbii tsikhongo, ne okhwikalila abandu khudini ya Nyasaye nende okhukhaya Nyasaye, nende okhwikalila Abandu khu musikiti kwoluyali oko, nende okhurusiamwo Abandu balimwo ni obwonooni obukhongo imbeli wa Nyasaye. Ne okhwikalila Abandu khu dini yabu nobubii muno okhushila okhwira, Ne shibalalekha okhulwaana ninanyu okhuula babarusie khudini yenyu, nikali mbu banyala, Ne balilekha idini yabu mwinywe, mana bafwa nibali Abakhayi, abo nibo bebikhole biabu biabiyibwa khushialo nende mwikulu. Ne abo nibo Abandu bomumulilo, balimenyamo tsinyanga tsiosi

[218] Toto balia basuubila nende balia bawuya mana nibalwaana khunjila ya Nyasaye, abo balindanga tsimbabaasi tsia Nyasaye, ne Nyasaye Nomulesheli owobukoosia muno

[219] Bakhurebanga amalwa nende (okhubaya) isimbi, Boola mbu; “khulimwo nende obubii obukhongo nende obulayi khubandu, ne obubii bwabio nobukhoongo muno okhushila obulayi bwabio. Ne bakhurebanga mbu nishina shiabarusia? Boola mbu; “eshiburirire” endio nilwa Nyasaye amufunulila tsinyaali tsitsie kho munyoole okhupara

[220] Khushialo nende mwikulu, ne bakhureebanga okhulondokhana nende Abana abafwilwa, boola mbu “okhubakholela amalayi nobulayi, ne nimubasaasia halala ninanyu nga abakhali abana benyu, Ne Nyasaye yamanya muno owobutobela nende omukholi wamalayi, ne Nyasaye yenyanga yakhabenjisiye mukalabasangasia (enywe tawe) , toto Nyasaye niwa Amani Owamachesi muno

[221] Ne mulateshia Abakhasi batsokasinjia Nyasaye okhuula basuubile, ne omusumba omukhasi omusuubili ni omulayi okhushila ulia utsokasinjia Nyasaye kata nabaloleshela okhuba – omulayi. Ne mulabakha abakhana benyu khu basatsa abatsokaasinjia Nyasaye okhula basuubile, Ne- omusumba – omusuubili ni omulayi okhushila owutsokasinjia Nyasaye kata nabaloleshela omulayi. Abo balanganga abandu khunjila yomulilo, ne Nyasaye alanganga khunjila yomwikulu nende obulesheli khukhuchama khukhwe. Naye aretsanga habulafu tsinyaali tsitsie khubandu khobanyoole okhwitsulila

[222] Nebakhurebanga okhulondokhana nende okhuswamila. Baboolele mbu “obo ni obusinyo, kho mube ehale ninabo nibali mukhuswamila, ne mulabaninabo tawe okhula shinga baba abalafu, nibakhalafuya mubenjilile shingala Nyasaye yabalomesia. Toto Nyasaye yachama abasabanga eshileshelo ne yachama abetswenulanga

[223] Abakhasi benyu ni emikunda chienyu, kho mwinjilile emikunda chienyu shingala mwenya, Ne ranjilisilie emioyo chenyu amalayi, ne murie Nyasaye ne manye mbu toto enywe mulibukana ninaye, ne suubisia abasuubili

[224] Ne mulakhola elira lia Nyasaye khubitsubo bienyu okhuba eshiburiro shiokhukhaya okhukhola amalayi nende okhuria Nyasaye, nende okhulimasia Abandu, ne Nyasaye niwokhuwulila Omumanyi muno

[225] Nyasaye shababukulilanga khubitsubo bwenyu bieshikhaya ebo tawe. Halali ababukulilanga khu kemioyo chienyu chikhola. Ne Nyasaye ni Omulesheli Omwihotselefu muno

[226] Ne betsubanga mbu balaba ehale nabakhasi babu, balinde emiesi chine, ne nibakalukha - toto Nyasaye nomulesheli muno owobukoosia

[227] Ne nibalunjikha okhubalekha, toto Nyasaye ni Omuwulili Omumanyi muno

[228] Ne Abakhasi baleshelwe baliinde okhula amaswamila kataru. Neshibachamilwa okhufisa shia- Nyasaye yaloonga mutsimbeleshelo tsiabu tawe - Nibali mbu basuubila mu Nyasaye nende inyanga yeyindukho, Ne Abasatsa babu bali nende obuchami bwokhubakalusia nibenya okhukasia omuleembe, Nabo abakhasi bali nende ebilachilo shinga balachilwa mumalako. Ne Abasatsa balikho hekulu wabu okhubashila, Ne Nyasaye niwa Amaani Owamachesi muno

[229] Okhulekha (talaka) nikhabili , Mana hao ni okhwikhala khubulayi nohomba okhulekhana khubulayi, Neshimufuchililwa okhubukula shiosi shiosi eshia mwahelesia Abakhasi benyu, halali boosi babili nibaria mbu shibalanyala okhuliinda olwakho lwa Nyasaye tawe, kho nimuria mbu shibalaliinda olwakho lwa Nyasaye tawe hawo obutulani bubulao nikali mbu omukhasi alenunula. Etso nitsio tsinzakho tsia Nyasaye kho mulatsiruma tawe. Nebalia baruma tsinzakho tsia Nyasaye abo nibo abamabii

[230] Ne namulekha okhulekha khwa khataru, shafuchililwa okhumukalusia tawe okhula ateshele omusatsa wundi, ne omusatsa oyo namulekha awo obubii bubulao nibenya okhukalukhanila, nibalola mbu balaliinda tsinzakho tsia Nyasaye, ne tsino nitsinzakho tsia Nyasaye etsia yenoosilinjia Abandu benya okhumanya

[231] Ne nimulekha Abakhasi mana nibamala tsinyanga tsiabu tsiabalachilwa, mubakalusie khubulayi nohomba mubaleshe khubulayi. Ne mulabakalusia okhubawumisia khubusuku tawe. Ne ulakhola ario alaba yekholeele obubii omwene- ne mulabukulila tsinyaali tsia Nyasaye okhuba omubayo tawe. Ne yitsulile tsimbabaasi tsia Nyasaye khwinywe, nende shiayabeshilia okhurula mushitabu, nende amachesi kandi aka abenoosilinjia mushio. Ne murie Nyasaye ne mumanye mbu toto Nyasaye ni omumanyi wabuli eshindu

[232] Ne olwamulalekha Abakhasi ne nibamala induukho yabu mulabekalila okhutekha khubatsa babu nikali mbu banyolane khubulayi , kano yekanyilisibwa khuko ulia owasuubila Nyasaye nende inyanga yeyindukho, kano ni amalayi khwinywe ne amalafu muno Ne Nyasaye amanyile halali enywe shimumanyile tawe

[233] Ne Abakhasi bebuule banunie Abana babu emika chibili emilaamba; khu ulia wenya okhumalisia okhununia. Ne samwana omwana arusie eshilibwa shia Nyinamwana nende omwana, nende tsingubo mubulayi, Ne omundu shanichilisibungwa tawe halali khu shiobunyali bubwe. Ne mama alarebwa khubusandi shichila omwana wuwe tawe, nohomba papa alasandibwa shichila omwana wuwe tawe, Ne “Omuchelami” yesi ali ario. Ne boosi babili nibenya okhuleshesia okhununia nibafuchilisaniye awo obubii bubulao. Nimwenya okhuhelesia abana benyu omukhasi wokhubanunia hao shibulaba obubii kwinywe tawe nimurusia eshia mwalaka shingala mwanala, ne murie Nyasaye, ne mumanye mbu Nyasaye alolonga koosi kamukholanga

[234] Ne balia mwinywe bafwitsanga nibalekha Abakhasi, Abakhasi abo bamenye emiesi chine, nende tsinyanga ekhumi. Ne nibamala tsinyanga tsiabu etso, obubii bubulao khubo nibekholela amakhuwa kabu khubulayi. Ne Nyasaye akamanyile koosi kamukholanga

[235] Obubii bubulao okhuyila eshiselelo khukhumanyisia sa khubakhasi balimu khulinda (Eda), nohomba mwafisasa nimusuubile mumioyo chienyu, Nyasaye amanyile mbu enywe mwitsa okhubetsulila, Halali mulabakalushila mubwifisi tawe halali muboole amakhuwa amalayi ne mulabateshia tawe okhuula bamale indukho yabu (eda). Ne mumanye mbu Nyasaye amanyile kali mumioyo chienyu, kho mube meso ninaye. Ne mumanye mbu Nyasaye ni Omeleshili Omwihotselefu muno

[236] Ne obubii bubulao khwinywe tawe nimulekha Abakhasi bamushili okhuba ninabo nohomba bamushili okhubahelesia omurungo kwabu. Halali mubahelesie shiokhubahotselesia, uli nende obunyali shingala anyalilwa ne wobunyakhani shingala anyalilwa, eshihotselesio okhulondokhana shinga emilukha chiboola, ni obwatoto khubakholi bamalayi

[237] Ne nimubalekha nimushili okhuba ninabo, ne nimumalile okhubakasilia omurungo kwabu (mahari) kumanyishe, mana hao mubahelesie eshitonye shilala (inusu) shiomurungo kwamurechelesaniyie, halali Abakhasi beene nibaleshela, nohomba omusatsa ulia uli nende obunyali bwobuteshiani – bwa nikkah – abe nabaleshele, ne ukhuleshelana nikho khuretsanga omundu ahambi nende okhuria Nyasaye, ne mulebilila okhukholelana obulayi hakari wenyu tawe, toto Nyasaye alolanga kamukholanga

[238] Mulinde iswala – ne okhushila muno iswala yahakari, ne mwemele Nyasaye nimuluunjishe mubwihotselefu olwamuba nimulaama

[239] Ne nimuli mubuyendi mulaame nimuchendanga nohomba nimuninile, Ne olwa mulaba nende omulembe mwitsulile Nyasaye shingala yabechesia akamwalali nimwamanya tawe

[240] Ne balia bafwitsanga mwinywe nibalekha Abakhasi, balamile abatonyele abakhasi abo okhunyola obukhonyi omwika omulamba nibalarusibwa mutsinzu tsiabu tawe, Ne Abakhasi beene nibarula, awo mubula obubii tawe khu kabekholele abeene okhulondokhana nende amalako. Ne Nyasaye niwa Amani Owamachesi muno

[241] Ne Abakhasi baleshelwe (nende, Talaka) bahebwe shokhubahotselesia okhulondokhana nende amalako, Ne ako ni amalachilo khubalia abaria Nyasaye

[242] Ne endio nilwa Nyasaye abafimbulilanga tsinyaali tsitsie khomunyoole okhumanya

[243] Shiwalola biala barula mutsingo tsiabu nibali mutsiyelefu, nibaririle lifwa? Nyasaye nababoolela mbu: “fwe!” mana nabalamusia, toto Nyasaye niwetsimbabaasi khubandu, halali Abandu abanji shiboopanga orio tawe

[244] Ne mulwane khunjila ya Nyasaye, ne mumanye mbu toto Nyasaye ni omuwulili omumanyi muno

[245] Ni wina witsa okhwiwosia Nyasaye likofi lilayi kho amumetele ekhumeta okhunji, Ne Nyasaye ufumbanga khandi abambulanga, Ne ewuwe niwo amulikalusibwa

[246] Shiwabalola Abandu abakhongo mubana ba Israili, Musa niyakharulao, olwababoolela Omurumwa wabu mbu; “khurererekhwo Omwami kho khulwaane khunjila ya Nyasaye” Noboola “koo kalaba mbu nimulomesibwa okhupana mulakhaya?” Nibaboola mbu “bilaba birie khulalwana khunjila ya Nyasaye tawe, ne khulondelwe mutsingo tsiefu nende Abaana befu?” Halali olwa balachilwa okhulwana bakalukhana, halali batiti mubo, Ne Nyasaye yamanya abamabii

[247] Omurumwa wabu nababoolela mbu; “Nyasaye abaawulile Taluti (Sauli) okhuba Omwami” Nibaboola mbu; “alaba arie Omwami wefu ne efwe nifwe khukhoyeshele okhunyoola obwami okhushila ye, ne shiyahebwa omwandu tawe,” Naboola mbu: “Nyasaye amalile okhubawulila ye, ne amumetele amachesi nende omubili. Ne Nyasaye ahelesinjia owayenya obwami. Ne Nyasaye ni omuyinda owamachesi muno

[248] Ne Omurumwa wabu nababoolela mbu; “Ne toto eshimanyisio shiobwami bubwe ni okhubarerela lisanduku lilimwo eshiosia emioyo chienyu, eshirulanga khu Nyasaye wenyu omulesi, ne khulimwo nende akababu Musa balekha nende Harun, Abamalaika balichinganga. Toto mukano ebimanyisio bilimwo khwinywe nimuli mbu mwasuubila

[249] Kho olwa Talut yarula nende omukanda kweliyie yaboola mbu “Nyasaye alabahelesia amatemo komwalo, ulanywa mumwalo oko shalaba ninasi tawe, ne ulanywamo tawe alaba ninasi halali ulia witsa okhutaya neshikalabo shomukhono kukwe, Halali boosi banywamwo okhuyiniakhwo batiti mubo. Olwa yambukha omwalo ye nende balia basuubila halala ninaye baboola mbu; “lelo shikhulanyala Jaluti nende omukanda kukwe tawe” ne balia bali nende obwatoto bwokhubukanana nende Nyasaye wabu nibaboola mbu “Emikanda chinga emititi chishilanga emikanda emikhongo khubunyali bwa – Nyasaye. “Ne Nyasaye ali halala nende abefwilanga

[250] Ne olwabarula okhuchaka okhulwana nende Jaluti nende omukanda kukwe baboola mbu; “Nyasaye wefu omulesi, ukhuhelesie okhwifwila, ne otinyisie ebilenje biefu, ne okhukhoonye khushile Abandu Abakhayi

[251] Khubunyali bwa Nyasaye nibabashila, mana Dawudi niyeera Jaluti, mana Nyasaye nahelesia Dawudi obwami nende amachesi, mana namwechesia akayenya. Ne Nyasaye abetsanga mbu shiyekalilanga Abandu khubaandi tawe hawo eshialo shiakhabiyile, halali Nyasaye niwetsibambaasi khubili khushialo bioosi

[252] Tsino ni tsinyali tsa Nyasaye, khukhusomelanga khubwatoto ne toto ewe oli mubarumwa

[253] Abarumwa abo khwaninia abaandi okhushila abaandi mubo. Mubo baliwo balomaloma nende Nyasaye, ne abandi nabaninia hekulu, ne nikhuwa Isah omwana wa Mariamu ebifune bili habulafu, Ne nikhumuramwo amaani ka roho omulafu, Ne Nyasaye yenyanga shibakhayingane balia abaali inyuma wabu ebifune bili habulafu nibiakhabetsela, halali bakabukhanamwo. Mubo balimwo abasuubila, ne abandi mubo abakhaya, Ne Nyasaye achamanga shibakhayingane tawe. Halali Nyasaye akholanga shingayenya

[254] Enywe abasuubila, rusie khubilia ebiakhubakabile, inyanga yeyinganga okhubulao nishili okhuula, nohomba obwitsa nohomba ukhusabilwa. Ne abakhayi nibo abamabii

[255] Nyasaye – Abulao Nyasaye owulali ye tawe Omulamu, owemelanga amakhuwa koosi buli lwoosi, sharengetsanga nohomba shakonanga tawe, nebibie biosi yenyene bili mwikulu nende khushialo, niwina oyo unyala ukhusabila imbeli wuwe halali khukhuchama khukhwe? Amanyile kali imbeli wabu nende inyuma wabu, Nabo shibamanyile shiosishiosi mubumanyi bubwe tawe halali khulia wayenya omwene. Obunyali bubwe bwasalaana mwikulu nende khushialo, ne shashilungwa okhubilinda tawe, Naye niye uli hekulu omukhongo muno

[256] Okhunichilisania khubulao mudini, obulunjifu bumalile okhwaukhana nende obukori, kho ulia ukhaya shetani mana asuubile Nyasaye, oyo toto alaba atilile eshitililo shiamani, eshilafunikha tawe, ne Nyasaye niwokhuwulila Omumanyi muno

[257] Nyasaye nomulindi wabalia abasuubila, abarusinjia mushiilima nende okhubenjisia mubulafu, halali balia abakhaya abalindi babu ni amashetani. Kabarusinjia mubulafu nikabenjisia mushiilima. Abo nibo Abandu bomumulilo, balimenyamwo tsinyanga tsiosi

[258] Shiwalola ulia wayingasia Ibraheem khu Nyasaye wuwe Omulesi, shichila Nyasaye yamwelesia oburuchi(obwami). Olwa Ibraheem yaboola mbu; “ Nyasaye wanje ni ulia uhelesinjia obulamu mana khandi abubukula (afwisia)” Naye naboola mbu; “Esie siesi ehananga obulamu khandi efwisinjia”Ibraheem naboola mbu; Nyasaye arusinjia eliuba okhurula ebukwe nawe lirusiliekhwo mumbo” Mana nakhaywa. Ne Nyasaye shalunjisinjia Abandu abamabii tawe

[259] Nohomba shinga ulia wabura khulukongo olwamala okhuba amakubili, mana naboola mbu; “Nyasaye alilamusia arie olukongo luno ngala lwamala okhufwa luri?” Mana Nyasaye namufwisa ye omwene khumika imia ndala. Mana namulamusia, Ne namureeba mbu “Koo wikhale ebise biyela birie nofwile? Mana nakalusia mbu; “Awundi endi shinga wikhale inyanga ndala nohomba ebise bieyinyanga.” Nyasaye namuboolela “wikhale mo emika imia ndala, hengakhwo eshilibwa shisho nende ebinywebwa bibio bishili okhubiya. Ne henga Isishili yiyio. Ne kho khukhole obe eshimanyisio khubandu henga ebikumba biayo bino, shingala khubichingulanga mana shinga khubifwalanga inyama, Mana olwa kamurumbushila yaboola mbu; “emanyile mbu Nyasaye ni omunyali wabuli eshindu”

[260] Ne olwa Ibraheem yabola mbu; “Nyasaye nzechesia shingala olilamusia abafuu” Nyasaye namureba mbu; “oshili okhusuubila?” Noboola mbu; “Ndasuubila halali ndenya omwoyo kwanje kutinye” Namuboolela mbu; “bukula amayoni kane ne okanasie ewuwo, mana okatonyetonye ne ore buli khushikulu eshitonye sheliyoni - mana akalanje koosi kalakhwitsila tsimbilo. Ne omanye mbu toto Nyasaye ni Owamani khandi Owamachesi muno

[261] Balia bekhonyelanga emiandu chiabu khunjila ya Nyasaye bali shinga inyuma ndala yirusinjia ebisuche saba, buli eshisuche shili nende tsinyuma imia, Ne Nyasaye emetelangakhwo wayenya, ne Nyasaye ni Omuyinda Omumanyi muno

[262] Balia barusinjia emiandu chiabu khunjila ya Nyasaye mana nibalalondiakhwo khu shiabahanile esho okhuborola nohomba okhusinyisia, bali nende omurungo kwabu khu Nyasaye wabu omulesi, ne shibaliba noburi tawe nohomba shibalibeelela tawe

[263] Amakhuwa amalayi nende, obulesheli ni ebilayi okhushila ishihanwa (isadaka) shilondibungwakhwo ebisinyisio, ne Nyasaye niye winyala Omwihotselefu. (khubilonje bibie)

[264] Enywe abasuubila mulanyasia ebihanwa bienyu khulwa okhuboorola nende ebisinyisio tawe, shinga ulia urusinjia omwandu kukwe okhulolosia abandu ne shasuubilanga Nyasaye nende Inyanga yeyindukho tawe, okhufwana khwe khulishinga olwanda lulikhwo olufu, mana nilukhupwa nende ifula yolucheka, nilulekha olukhaya, mana shibaliba nobunyali bwosi bwosi khukabachuma tawe, Ne Nyasaye shalunjisinjia Abandu abakhayi tawe

[265] Ne balia barusinjia omwandu kwabu khulwokhukoonya obuchami bwa Nyasaye nende okhuhelesia emioyo chiabu amaani bali shinga omukunda kuli hekulu, mana ifula yolucheka nikwamwo, mana nikurusia ebiamo biakwo nibimeteshe. Nekata nikulolelwa nende olucheka tawe ifula inditisa ikunyililila. Ne Nyasaye alolanga kamukholanga

[266] Koo aliwo mwinywe wenya okhuba nende omukunda kwetsitende, nende emizabibu, okuburangamwo emialo, ne anyolangamwo ebiamo bietsimbia tsiosi. Mana obukofu bumulile naye nali nende Abana abatiti, mana omukunda oko kukhupwe nende imbumbuyeka yomulilo mana nikuyia, Endio nilwa Nyasaye abechesilinjia ebimanyisio khomunyoole okhupara

[267] Enywe abasuubila, rusie khubilayi biamunyoolele nende ebiakhubarusiliye mumikunda. Ne mulaba nende liparo liokhurusia ebibii tawe, ni mubetsanga abeene shimwakhabibukula tawe halali nimufunikhwe tsimoni, Ne mumanye mbu Nyasaye niwinyala Owulaywa

[268] Shetani abaretsangamwo oburi bwobumanani, ne abalomesinjia okhukhola eshifwabi, naye Nyasaye abalaka eshileshelo nende tsimbabaasi tsirula ewuwe, Ne Nyasaye ni wobuyinda obunji Omumanyi muno

[269] Ahelesinjia amachesi owayenya ne uhelesibwa amachesi toto aba ahelesibwe obulayi obunji. Ne shibetsulilanga tawe halali Abandu bobwongo

[270] Ne shiosi shiosi shiamuyinia noho shiamulaka okhuyinia toto Nyasaye ashimanyile ne balia abakholi bamabii balibula ulibahabina

[271] Ne nimulolosia ebihanwa nobulayi, ne nimuchisa mwahelesia abatakha mubwifisi obo ni obulayi khwinywe, Ne bitsa okhubarusiliaho tsimbi tsienyu tsindi. Ne Nyasaye amanyile muno koosi kamukholanga

[272] Okhulunjikha khwabu shikhuli khwiwe tawe, halali Nyasaye alunjisinjia wayenya, Ne shiosi shiosi shiamuyinia khubulayi ni eshienyu abeene. Ne mulayinia halali khulwokhwenya obuchami bwa Nyasaye, Ne shiosi shiosi shiamurusia khubulayi mulirungwa mubwitsufu, ne shimulikhobwa tawe

[273] Bahelesie abatakha balia bekalilwa khunjila ya Nyasaye abalanyala okhusamula khushialo okhukhaaba omukabo tawe. Ne ulamanyile aparanga mbu ni abayinda shichila okhwiyikalila khwabu nende okhusaba. olabamanya khubimanyisio biabu. Shibayuyushilanga akhusaba Abandu tawe, Ne amalayi kosikosi kamurusia toto Nyasaye akamanyile

[274] Balia barusinjia omwandu kwabu eshilo nende eshitere, mubwifisi nende mubulafu Bali nende omurungo kwabu ewa Nyasaye wabu neshibaliba nende obunyendi, nohomba eshibeela tawe

[275] Balia balitsanga riba (obukhala bulakwanile) shibasinjila halali shinga asinjilanga utililwe nende imisebe. Ako nilwokhuba mbu baboola mbu; “ iganga ili shinga Riba’ Halali Nyasaye achamila inganga ne akaana riba. Kho ulia ulilwe nende amachelo okhurula khu Nyasaye wuwe omulesi, mana niyeyikalila, oyo akeke kali mukabura, ne amakhuwa kaye kali khu- Nyasaye. Ne balia bachamanga riba abo nibo Abandu bomulilo, balimenyamo tsinyanga tsiosi

[276] Nyasaye arusinjia muribaa tsimbabaasi, ne ametenga tsimbabaasi khubihanwa, ne Nyasaye shiyachama buli omukhayi omwetsimbi tawe

[277] Toto balia abasuubila mana nibakhola amalayi mana nibalumilila okhulaama mana nibarusia eshihanwa (izakaa), bali nende omurungo kwabu khu Nyasaye ne balibula obuyendi neshibalibelela tawe

[278] Enywe abasubila rie Nyasaye wenyu ne muleshe ribaa tsitonyole, toto nimuli abasuubili

[279] Ne nimulakhola murio tawe mwikasiye khuliyie okhulwana nende Nyasaye nende Omurumwa wuwe. Ne nimusaba eshileshelo ne omurwe kwo omwandu oko ni okwenyu, Mulakholela Abandu obubii nanyu mulakholelwa obubii tawe

[280] Ne nikali mbu ubanzungwa ali nende obutinyu awo omubanzi alinde okhula anyoole obwangu. Ne nimukhola likofi okhuba ishihanwa awo ni obulayi kwinywe nimuba mbu mumanya

[281] Ne murie inyanga yamulikalusibwa khu Nyasaye, mana buli shiamundu alirungwa akayakhola, nabo shibalikholela yesiyesi obubii tawe

[282] Enywe abasuubili nimubanzana likofi okhuula ebise biarebwao, muhandiche. Ne uhandika ahandiche hakari wenyu khubulunjifu, ne uhandika alakhaya okhwuhandika tawe, ahandiche shingala Nyasaye yamwechesia. Ne welikofi ubanzwa ahandiche; ne arie Nyasaye omulesi wuwe, ne alaleemia shiosi shiosi tawe, Ne ubanzwa nali omundu watangaala nohomba omuteshele nohomba shanyala ukhwuhandika omwene, hawo omulindi wuwe ahandiche mubulunjifu. Ne mumanyie abaloli babili beshisatsa mwinywe. Ne Abasatsa nibalanyoolekhana tawe, abe omusatsa mulala nende abakhasi babili, khubalia bamuchamila okhuba abaloli, kho mulala wabu nakorana owundi amwitsulisie. Ne abaloli balakhaya nibalangwa tawe, Ni mulakhaya okhwuhandika likofi nilili lititi nohomba likhongo ukhula ebise bialio tawe. Obo nibo abwatoto muno imbeli wa Nyasaye, ni habwene muno khubuloli, ne ni obulayi muno mulaba nende ubukanakani tawe. Habula nili inganga yo mukhono khu mukhono hakari wenyu, mana awo shinobubi kwinywe nimulahandika tawe, halali nimukusania mureo abaloli. Ne omuhandichi nohomba omuloli alarebwa mubutinyu tawe. Ne nimukhola murio toto endio nobubii khwiywe. Nemurie Nyasaye naye yetsa ukhubamanyia, na Nyasaye ni Omumanyi wabuli eshindu

[283] Ne nimuli khuluchendo nimulanyoola omuhandichi tawe, biyela okhuhana eshisingwa. Ne mulala wenyu nabishila owashie kho ulia usubilwe akalusie eshia owashie yamuhelesia. Ne arie Nyasaye omulesi wuwe, Ne mulafisa obuloli tawe, ne ulia ulafisa omwoyo kwaye kulaba kukholele amabii. Ne Nyasaye ni Omumanyi Owamachesi muno khukamukholanga

[284] Ebili mwikulu nende mushialo nibia Nyasaye biosi. Ne nimura habulafu akali mumioyo chienyu nohomba nimufisa, Nyasaye alibabalila, mana aleshele wayenya ne ahelesie eshinyasio owayenya. Ne Nyasaye ni Omunyali wa buli eshindu

[285] Omurumwa yasuubila akeshibwa khuye okhurula khu Nyasaye wuwe omulesi, nende Abasuubili boosi basuubila Nyasaye nende Abamalaika bebe nende Ebitabu bibie nende Abarumwa bebe, shikhukabukhasinjia hakari wayesiyesi mubarumwa bebe tawe. Ne baboolanga mbu; “khuwulile ne khufichilile, Khukhusaba obulesheli Nyasaye wefu, na uwuwe niwo amakalushilo kali

[286] Nyasaye shanichilisinjia omundu yesiyesi halali khushichelo shianyalilwa. Obukhala bwa kayakhola nobubwe, ne okhusikha khwa kayakhola ni okhukhwe, “Nyasaye wefu omulesi olakhubukilila nikhwibilila nohomba nikhwisikirasia tawe, Nyasaye wefu omulesi, olakhutukha emisiko shinga echawatukha balia abali imbeli wefu tawe. Nyasaye wefu omulesi olakhutukha akakhulanyala tawe, ne okhubeele ne okhuleshele ne okhubeele tsimbabaasi, Newe omulindi wefu, kho khuhelesie obushili khushile omukanda kwabakhayi

[1] Alif lam Mim

[2] Nyasaye, abulao Nyasaye wundi owulaliye tawe, ni Omulamu Omwemelesi wa koosi tsinyanga tsiosi

[3] Yakhwishilia eshitabu khubwatoto, eshifuchilisaninjia nende akali imbeli washio, Ne yeeshia Itaurati nende Injili

[4] Inyuma awo, bibe obulunjifu khubandu, Mana niyeeshia Ifurqani(eshikabukhasio) Toto balia abayingasia ibimanyisio bia Nyasaye baliba nende eshinyasio eshilulu. Ne Nyasaye niwa amani muno weyimoongo (owokhurunga likhobo)

[5] Toto Nyasaye shosi shiosi sishifisanga khuye okhumanya tawe shibe mushialo nohomba mwikulu

[6] Ye niyeubakasinjiamutsindatsiabanyinenywe shinga yenya, abulao Nyasaye ulaliye tawe, ni Owamani Owamachesi muno

[7] Ye niye owabeshilia eshitabu shino, shilimwo nende tsinyaali(tsiokhubusia)muhakamat, tsili nende okhumanyisia khuli abulafu, Esho nishio eshisina shieshitabu shino. Ne etsindi tsiliho tsiokhuchelaasia. Kho nebalia bomumioyo chiabu chilimwo obukori boloondanga tsiokhuchelasia khulwokhukhaaba inzoka, nende okhukhaaba eshifune shiatso, Ne abulao umanyile eshifune shiatsio halali Nyasaye. Ne balia bali nende amayichikho amasiro mukhumanya, baboolanga mbu; ‘‘khusuubile tsiosi tsirula khu Nyasaye wefu omulesi’’ Ne shibetsulilanga kano tawe halali balia abamachesi

[8] Nabo baboolanga mbu; ‘‘Nyasaye wefu Omulesi, olakosia emioyo chiefu nomalile okhuchilunjisia tawe, ne okhuwe tsimbambaasi tsirula ewuwo. Toto newe umuhani.’’

[9] ‘‘Nyasaye wefu Omulesi, Ewe newe ulikhung’asia Abandu khuyinyanga yibula obukanakani mwo. Toto Nyasaye shafunakanga indakano tawe.”

[10] Toto balia bakhaya shibulao shiosishiosi shilibakhoonya ewa Nyasaye emiandu chiabu nohomba Abana babu , ne nibo tsikhwi tsiomumulilo

[11] Shinga kalia kanyoola Abandu ba Firaun nende balia bali imbeli wabu, bayingana ibimanyisio biefu, mana Nyasaye nabatiila khumabii kabu, ne Nyasaye ni weshinyasio eshilulu

[12] Boolela Abakhayi mbu; “hambi ano mulashilwa ne mulakhung’asibwa murebwe mumulilo (Jahanam) ne eyo ni eshimenyo eshibii muno.”

[13] Toto shali eshimanyisio khwinywe olwa emikanda chibili chiabukanana okhulwaana. Omukanda mulala nikulwanilanga khunjila ya Nyasaye, ne okundi okwabakhayi, nikubalola abanji muno okhushila bo okhuula khabili, khulwa okhubalola netsimoni. Ne Nyasaye yonganga omukhono owayenya khu buhabini bubwe, Toto mukano khuli nende emeeko khubandu betsimoni

[14] Abandu baronelwa okhuchama obwikombi bwa Abakhasi , nende Abana abasiani, nende amabunjikho ke idhahabu nende ifedha, nende tsifarasi nende emiruko, nende tsindalo. Oko ni omwikhoyo kwo bulamu bwokhushialo. Ne ewa Nyasaye niko amakalushilo amalayi

[15] Boola; “ebabolelekhwo amalayi okhushila ako? Khubaria Nyasaye bali nende emikunda ewa Nyasaye wabu echiburanga hakari wachio emialo. Balimenyamwo tsinyanga tsiosi, nende abakhaye abatswenulwa, ne bali nende obuchami bwa Nyasaye, Ne Nyasaye alolanga Abasumba bebe

[16] Balia baboolanga mbu, Nyasaye wefu omulesi efwe khusuubile, kho khuleshele ebionono biefu ne okhuliinde okhurulana nende eshinyasio shiomulilo

[17] Abefwilanga ababoolanga abwatoto abehothelefu nende barusinjia eshihanwa,nende basabanga eshileshelo mumabwibwi

[18] Nyasaye arusia obuloli mbu abulao Nyasaye wundi ulali ye tawe, nende Abamalaika nende Abamachesi, niye wemeele obwatoto, abulao nyasaye wundi halaliye Owamani Owamachesi muno

[19] Toto idini imbeli wa Nyasaye ni yobwisilamu, Ne balia bahebwa eshitabu shibakabukhanamwo tawe halali obumanyi nibwakhamala okhubetsela, nende shichila ishinda yali hakari wabu, Ne ukhaya ebimanyisio bia Nyasaye netoto Nyasaye ni Omwangu wokhubala

[20] Ne nibakhureba boola mbu; “esie ogwisiye obweni bwanje ukhuhenga Nyasaye nende balia abanonda.’’ Ne boolela balia bahebwa eshitabu nende timbiti mbu- “Musilimile?” nenibasilimile awomanabamalileokhulunjikha. Ne nibakhaya, ewe olisa wokhusia uburume, Ne Nyasaye alolanga muno Abasumba bebe

[21] Toto balia bakhayanga ebimanyisio bia Nyasaye, mana nibera Abarumwa khulali khunjila yobwatoto, ne nibera Abandu bachelelanga Abandu okhukhola amalayi , Toto basuubisie eshinyasio eshilulu

[22] Abo nibo bebikhole biabu biabiya 3. khushialo nende mwikulu, nabo shibalinyoola wokhubahabina tawe

[23] Sholola balia bahebwa elubeka lweshitabu, balangungwa okhwitsila eshitabu shia Nyasaye shinyoole okhubabusilia hakari wabu, ne omukanda mubo kwilukhanga nikushikhayile

[24] Endio nilwakhubeela mbu baboola mbu “omulilo shikulakhutilakhwo tawe halali tsinyanga tsinditi butswa.” Mana nikabakatia mudini yabu amakhuwa akabeene bachikhanga

[25] Ne kaliba karie olwakhulibakhung’asia inyanga ibula obukanakani okhula khwayio, mana buli Omundu alirungwa shingala yakholanga, ne shibalikholelwa obubii tawe

[26] Boola; “Ewe Nyasaye Omwene obwami bwoosi, ohelesinjia obwami wawenya, ne onulanga obwami owawenya, ne onininjia owawenya ne wishinjia owawenya, tsimbabaasi tsiosi tsili mumukhono kukwo, toto ewe oli omunyali wabuli eshindu.”

[27] Ewe winjisinjia eshilo mushitere, newinjilisinjia eshitere mushilo, ne orusinjia omulamu okhurulana khumufu, ne omurusinjia omufuu okhurulana khu uli omulamu. Ne okabilanga wawenya okhubura eshichelo

[28] Abasuubili balakhola abakhayi okhuba abahelwa babu nibalekha abasuubili tawe. Ne ukhola ario shaliba nende shiosishiosi imbeli wa Nyasaye tawe. halali nibili khulwa okhwilinda okhurulana nende obusuku bwabu. Ne Nyasaye abekanyilisilia ninaye, Ne ewa Nyasaye sa niwa amakalushilo

[29] Boola; nimufisa kali mumioyo chienyu, nohomba nimukara habulafu Nyasaye akamanyile, ne amanyile koosi kali mwikulu nende mushialo. Ne Nyasaye nomunyali wabuli eshindu

[30] Inyanga yabuli Omundu alinyoola koosi amalayi kayakhola nikarererwe imbeli wuwe, nende koosi amabii kayakhola. Omundu aliikomba okhuba ehale nende amabii kayakhola, Ne Nyasaye abekanyisilinjia ninaye. Ne Nyasaye ni Omuholo khubasumba bebe

[31] Boola; “Nimuli mbu mwayanza Nyasaye nakhamunonde esie, Nyasaye alabachama na yetsa okhubaleshela tsimbii tsienyu, Ne Nyasaye ni Omulesheli muno Owobukoosia.”

[32] Boola mbu; “Muloonde Nyasaye nende Omurumwa”- Ne nibakalukhana – manya mbu toto Nyasaye shiyachama abakhayi tawe

[33] Toto Nyasaye yalobola Adam nende Nuh nende ulwibulo lwa Ibraheem nende olwibulo lwa Imran okhushila Abandu boosi

[34] Ni abebulane abeene khubeene, ne Nyasaye ni Omuwulili Omumanyi muno

[35] Olwa omukhaye wa Imran yaboola mbu; “Nyasaye wanje omulesi endakane ninawe mumwoyo kwanje shilimunda mwanje, Shibe eshishio, kho njamile. Toto ewe newe Omuwulili Omumanyi muno.”

[36] Mana shingalayebula, yaboola mbu; “Nyasaye wanje omulesi esie ndibule weshikhaana- ne Nyasaye amanyile muno shiayebula- Ne weshisiaani shali shinga oweshikhaana tawe. Ne esie emukulishe mbu Mariamu. Esie emushinga khwiwe, nende ulwibulo lulwe ,obaliinde okhurulana nende Shetani owatsubwa

[37] Mana Nyasaye wuwe Omulesi namuchamila obulayi ne namukhusia okhukhusia okhulayi, ne Zakaria naba omuliindi wuwe. Buli olwa Zakaria yenjilanga mushikoro shiaye yamunyoolanga nebiakhulia. Kho namureeba mbu; “Ewe Mariam bino orusiye hena?” Mariamu Naboola mbu; “Bino birula khu Nyasaye, toto Nyasaye akabilanga owayenya okhubura eshichelo.”

[38] Awo Zakari yasaba Nyasaye wuwe Omulesi, naboola mbu: “Nyasaye wanje Omulesi umbe okhurula khwiwe olwibulo olulayi. Newe uwulilanga amasayo.”

[39] Olwa yali niyemele nalamanga Mushikoro shishie Malaika namulanga; “Toto Nyasaye akhusubisia mbu olebula Omwana omukulishe mbu Yahya, witsa okhutinyilisia likhuwa lirula khu Nyasaye, Ne ni Omwaami Omushisila, Omurumwa okhurula mubandu abalayi.”

[40] Naboola; “Nyasaye wanje omulesi, ndakhanyoola endie Omwana nemalile okhukofula endi, ne Omukhaye wanje uno ni omukuumba?” Naboola mbu; “nilwakali kario Nyasaye akholanga shiayenya.”

[41] Naboola; “Nyasaye wanje Omulesi, Mbelesia eshimanyisio” naboola “ishimanyisio shishio ne mbu sholalomaloma nende Abandu khutsinyanga tsitaru tawe halali okhuchelasa khwonyene. Ne omurumbule Nyasaye wuwo umelesi mubuunji ne omwitsomie ingoloobe nende mumabwibwi.”

[42] Ne olwa Malaika yaboola; “Ewe Mariam! Toto Nyasaye akhwawule mana nakhutswenula ne nakhuwa oluyali okhushila abakhasi boosi bokhushialo.”

[43] Ewe Mariam, Wihotselesie khu Nyasaye wuwo Omulesi, ne omusujudile Nyasaye wuwo newiname (okhukhola rukuu) halala nende bamwinamilanga

[44] Kano ni amacheni akefisa akakhukhufimbulilanga, ne ewe shiwali ninabo tawe olwa basukunanga tsikalamu tsiabu mbu ni wina mubo witsa okhulela Mariamu. Ne shiwali nabo olwabo baingananga tawe

[45] Olwa Malaika yaboola mbu ; “ ewe Mariamu toto Nyasaye okhusubisia mbu olanyoola Omwana khulikhuwa lirula ewuwe, Elira lilie ni Omubakhwa Isah Omwana wa Mariamu (yesu). Owe shiribwa khushialo nende mwikulu, ne alimubalobole ba Nyasaye

[46] Naye alilomaloma nashili khululala indaana (omutoro) nende nali omukhoongo ne aliba mubandu abalayi

[47] Mariam naboola mbu; “Nyasaye wanje omulesi ndakhanyoola endie omwana ne omundu ashili okhundilakhwo?” Nyasaye naboola; “nilwakali endio Nyasaye alonganga shiayenya, nabusia likhuwa abolanga butswa mbu ba! niliba.”

[48] Ne yetsa (Nyasaye) okhumwechesia okhuhandika nende amachesi nende Itaurati nende Injili

[49] Ne ni Omurumwa khubaana ba Israili, ababoolela mbu;” Esie obetseele nende ishimanyisio okhurula khu Nyasaye wenyu omulesi, mbu abalonjela okhurula khuliloba eshifwanani shieliyoni, mana efuremwo emiuya ne liba liyoni khu bunyali bwa Nyasaye. Ne nditsa okhuhonia Abawofu nende Abamachele, ne ndalalamusia abafu khubunyali bwa Nyasaye. Ne ndalababoolela shiamulia nende shiamubikha mutsinzu tsienyu. Toto mukano khulimwo nende eshimanyisio khwinywe nimuli mbu mwasuubila

[50] Ne endinyisia kali inyuma wanje mu Taurati ne abasubule ebindu bindi biamwali nimwekalilwa, ne ebestele nende ebimanyisio okhurula khu Nyasaye wenyu Omulesi, kho murie Nyasaye wenyu ne muloonde shiebaboolela

[51] Toto Nyasaye ni Omulesi wanje ne ni Omulesi wenyu kho mumulaame ino ni injila ingololofu

[52] Isah ngala yalola hakari wabu obukhayi nibuliho yaboola mbu; “Ni wina omukhoonyi wanje khu Nyasaye?” Abechi bebe nibaboola; “Efwe khuli abakhoonyibo khu Nyasaye, Khusuubile Nyasaye ne ba Omuloli mbu efwe khuli Abasalamu.”

[53] Nyasaye wefu Omulesi, khusuubile akaweshia, ne khuloondele – injila- yo Omurumwa kho khuhandiche halala nende abaloli

[54] Abakhayi nibatuta nibapanga amakhuwa Naye Nyasaye napanga, naye Nyasaye niye Omupanji umalayo

[55] Olwa Nyasaye yaboola mbu ; “Ewe Isah esie nditsa okhubukula ne nditsa okhukulusia ewanje ne nditsa okhukhuliinda okhurulana nende Abakhayi balia ne nditsa okhura balia bakhuloonda hekulu wabalia bakhukhaya okhula inyanga yeyindukho. Ne amakalushilo kenyu kaliba khwisie, ndilibabusilia kalia kamwakabukhananga

[56] Ne balia bakhaya ndilibahelesia eshinyasio eshilulu mushialo nende mwikulu ne shibalinyoola ubahabina tawe

[57] Ne balia basuubila mana nibakhola amalayi Nyasaye alibarunga omurungo kwabu omulaamba Ne Nyasaye shiyachama abamabii tawe

[58] Kakhukhusomelanga kano ni ebimanyisio nende obwitsulisio obwa machesi

[59] Toto okhuchelasibwa khwa Isah ewa Nyasaye khulishinga okhuchelasibwa khwa Adam, yamulonga okhurula khwiloba mana namuboolela mbu; Ba mana! , naye naaba

[60] Buno ni obwatoto okhurula khu Nyasaye wuwo omulesi, kho olaba mubalia bakholanga tsinganakani tawe

[61] Ne balakhureba –mukhuyingana- obumanyi buno nibumalile okhuulila baboolele mbu; “ itse khulaange Abana befu nende Abana benyu, Abakhasi befu nende Abakhasi benyu, nende efwe abeene nende enywe abeene, mana khusabe mubwihotselefu nikhwenya eshilaamo shia Nyasaye shishile ababeyi.”

[62] Toto kano niko amakhuwa katoto. Ne abulao Nyasaye wundi owulali Nyasaye tawe, Ne toto Nyasaye niye Owamani Owamachesi muno

[63] Ne nibakhaya, manya mbu toto Nyasaye yamanya muno abonooni

[64] Boola; “Enywe Abandu beshitabu itsee khulikhuwa elia habwene hakari wefu ninenyu, khulalaama yesiyesi owulali Nyasaye tawe, ne khulamutsokaasiakhwo nende shiosishosi tawe, nekhulakholana efwe khwifwe okhuba eminyasaye emilesi chilali Nyasaye tawe.” Nenibakhaya boole mbu; “Mube abaloli mbu efwe khuli Abasalamu.”

[65] Enywe Abandu beshitabu, shichila shina nimuyingananga khu Ibraheem, ne Itaurati nende Injili shibieshibwa halali niyakhamala okhutsia. shimuparangakhwo tawe

[66] Lola enywe bano muyingananga khumakhuwa ka mumanyile, Ne shichila shina lano muyingananga khumakhuwa kamukorerwe? Ne Nyasaye amanyile nanyu shimumanyile tawe

[67] Ibraheem shiayali omuyahudi nohomba omukiristo tawe, halali yali omulunjifu omwihotselefu ne shiyali mubatsookasi tawe

[68] Abandu bali ahambi nende Ibraheem muno ni balia abamuloonda nende Omurumwa uno nende Abasuubili. Ne Nyasaye niye Omuliindi wabasuubili

[69] Kuliwo omukanda mubandu beshitabu bekoombanga okhubakosia, ne shibakosia tawe halali bekosia abeene, nabo shibamanyile tawe

[70] Enywe Abandu beshitabu, shichila shina mukhayanga ebimanyisio bia Nyasaye na enywe toto nimulolanga

[71] Enywe Abandu beshitabu shichila shina nimufwalanga obwatoto obubeyi nemufisanga obwatoto nimumanyile

[72] Ne omukanda mubandu bahebwa eshitabu, baboola mbu; “suubile khukalia keshilibwa Abasuubili okhuchaka khweshitere, ne mukakhaye okhuwa kweshitere, babebario khobanyoole okhukalukha

[73] Ne mulasuubila yesiyesi tawe halali ulia waloonda idini yenyu. Boola; “toto obulunjifu ni obulunjifu bwa Nyasaye, Omundu ahelesibwe shinga enywe mwahelesibwa, nohomba babarebe imbeli wa Nyasaye wenyu Omulesi, Boola; “Toto tsimbabaasi tsili mumikhono chia Nyasaye. Yelesinjia owayenya, Ne Nyasaye ni Omuyinda Owamachesi muno

[74] Yawulanga owayenya okhumwa tsimbabaasi tsitsie,ne Nyasayeniye Owetsimbabaasi tsikhongo

[75] Ne mubandu beshitabu aliwo ulia nomuchelekha okhukhubishila omwandu abikha ne alakhukalusilia. Ne mubo aliwo ulia nomwelesia isende ndala shakhukalusilia tawe, halali nomwemeele okhumubanza. Kano nilwokhuba mbu baboola mbu; “khubula ukhufunania mubakorwa okhusooma bano” bachishilanga Nyasaye obubeyi nibamanyile

[76] Shikali kario tawe, ulia Omwisikwa ukholanga kalachile , mana naria Nyasaye, toto Nyasaye yayanza abamuria

[77] Toto balia bakusiinjia indache ya Nyasaye nende ebitsubo biabu obukusi obutiti, Abo shibalibakho nende obulayi bwosibwosi mwikulu tawe, ne Nyasaye shaliboola nabo tawe, ne shalibalingakhwo inyanga yeyindukho tawe, neshalibatswenula tawe, ne balinyoola eshinyasio eshilulu

[78] Nibaliwo bakalukhaninjia tsinimi tsiabu mukhusoma eshitabu, khomupare mbu ako karula mushitabu, ne shikarula mushitabu tawe, Ne baboolanga mbu; kano karula khu Nyasaye, neshikarula khu Nyasaye tawe, nebabeyelanga Nyasaye nabo nibamanyile

[79] Shikanyala okhuba mbu Omundu wahebwa nende Nyasaye eshitabu nende amachesi nende oburumwa mana aboolele Abandu mbu; “munaame esie abundu wokhulaama Nyasaye; Halali ababoolela mbu, mube bokhulaama Nyasaye wenyu Omulesi webindu biosi shichila enywe mwechesinjia eshitabu neshichila mushisomanga

[80] Ne shalabalomesia okhukhola Abamalaika nende Abarumwa okhuba Nyasaye tawe. Koo yakhabalomesia obukhayi nanyu nimumalile okhuba Abasuubili

[81] Ne ( yitsulisia ) olwa Nyasaye yalakana nende Abarumwa mbu ; “nemala okhubahelesia akarula mushitabu nende amachesi, mana abetsele Omwurumwa ufuchilisania nende kamulinako, kalaba khwinywe mumusuubile mana mumukhoonye. Naboola “koo mufuchilile mana muchamile amalachilisio kanje khu makhuwa kano? Nibaboola mbu; “khuchamile” Naboola; “mana mube abaloli, nasi endi ninanyu halala mubaloli.”

[82] Ne balakalukhana okhurula mukano, abo nibo Abandu abashiamu

[83] Koo benyanga idini ilali ya Nyasaye, ne buli shili mwikulu nende khushialo biehotselesia khulwo khumuria ye bichame bikhaye, ni ewuwe butswa ni abalikalusibwa

[84] Boola; “khusuubile Nyasaye nende akeshilibwa khu Ibraheem nende ka Musa yahelesibwa nende Isah nende Abarumwa okhurula khu Nyasaye wabu shikhukabukhasinjiakhwo hakari wabu tawe, nafu khwilekhulile khuye.”

[85] Ne ukhaaba idini ilali yobwisilamu shalichamilwa tawe, neye mwikulu aliba mubandu basikha

[86] Nyasaye anyala okhulunjisia arie Abandu bakhaya nibamalile okhusuubila khwabu, ne mana nibaba abaloli mbu Omurumwa uno niwobwatoto, mana ebifune bia habulafu nibiboolela, Ne Nyasaye shalunjisinjia Abandu abamabii tawe

[87] Abo omurungo kwabu ni mbu bali nende eshilaamo shia Nyasaye nende shia Bamalaika nende eshia Abandu boosi

[88] Balimenyamwo tsinyanga tsiosi shibalitutuyilibwa eshinyasio tawe neshibalihebwa obwiyangu tawe

[89] Halali balia basaba eshileshelo khwako, mana nibaba abalayi Toto Nyasaye Niwobulesheli Owetsimbabaasi

[90] Toto balia bakhaya nibamalile okhusuubila, mana nibameta okhukhaya, shibalileshelwa tawe ne abo nibo Abandu abakora

[91] Toto balia bakhaya mana nibafwa nibali abakhayi shibalichamilwa tawe kata nibarusia idhahabu eshialo eshilaamba okhubanunula. Abo balinyoola eshinyasio eshilulu ne shibaliba nende ubahabina tawe

[92] Ne shimulanyoola obulayi tawe murusie khubilia biamwachama, ne shiosi shiosi shiamurusia toto Nyasaye ashimanyile

[93] Buli eshilibwa shiali shiafuchililwa okhulibwa khu bana ba Israil halali shia Israil yeyikalila omwene Itaurati nishili okhwishibwa, boola mbu ; “Rere Itaurati muyisome toto nimuli mbu muboolanga obulaamba

[94] Ne balia bachishila Nyasaye obubeyi imbeli wa kano, abo nibo ababii

[95] Boola; Nyasaye aboolanga obwatoto, kho loonde emilukha chia Ibraheem omulunjifu, ne shiyali mubatsokasinjia Nyasaye tawe

[96] Toto inzu yokhuranga ya Abandu barererwao okhulamilamwo ni ilia ili Bakka, eyahebwa tsikhabi nende obulunjifu khubandu boosi

[97] Mukari omo khulimwo nende ebimanyisio bilolekha, amemelo ka Ibraheem, ne winjilamwo abanende omulembe, Ne neshilachilo shia Nyasaye khubandu okhuhija khu- inzu eyo, khu ulia unyala oluchendo lwokhutsia eyo. Ne ulia ukhaya ne Nyasaye toto shiyenya shiosi shiosi khubandu tawe (nomuyinda)

[98] Boola; enywe Abandu beshitabu shichilanga shina nimukhaya ebimanyisio bia Nyasaye, ne Nyasaye nomuloli wa kamukholanga

[99] Boola;. Enywe Abandu beshitabu, mbushina mwikalilanga ulia usuubila injila ya Nyasaye nimuyikonyela obushiamu nanyu nimulola. Ne Nyasaye shang’ang’alanga khukamukholanga tawe

[100] Enywe Abasuubila nimuloonda omukanda okhurula mubandu balia bahebwa eshitabu, betsa okhubakalusia nimumalile okhusuubila mubukhayi

[101] Ne mulakhaya murie ne musomelungwa tsinyaali tsia Nyasaye. Ne Omurumwa ali hakari wenyu? Ne ulia utilana nende Nyasaye oyo mana alunjisibwa khu injila ingololofu

[102] Enywe Abasuubila, murie Nyasaye okhumuria khwatoto, Ne mulafwa nimulali Abasalamu tawe

[103] Ne mutiilane khumukoye kwa Nyasaye halala, ne mulakabukhana tawe, ne yitsulile tsimbabaasi tsia Nyasaye khwinywe, olwa mwali abeene khubeene abasuku, mana niyoongasia emioyo chienyu, ne khutsimbabaasi tsie nimuba abanaanda (beyinda ndala), ni mwali khulukuku lwelitukho lwomumulilo mana nabaresiakhwo. Na endio nilwa Nyasaye abenoosilinjia ebimanyisio bibie kho munyoole okhulunjikha

[104] Ne kube mwinywe omukanda kulanjililanga Abandu okhukhola amalayi, okulomesinjia Abandu okhukhola amalayi nikubakania amabii. Ne abo nibo abalibura

[105] Ne mulabashinga balia abakabukhana mana nibaburana obwatoto nibumalile okhuboolela, abo bali nende eshinyasio eshilulu

[106] Inyanga yobweni bulilaba tswe!, nende iyanga yobweni bulimaliya ti!, Nebalia bobweni bwabu bulimaliya ti, (baliboolelwa mbu) ; “enywe mwakhaya nimumalile okhusuubila? Kho mana mupile eshinyasio shinga mwakhayanga.”

[107] Ne balia bobweni bulila nibulabile tswe, baliba mutsimbabaasi tsia Nyasaye, balimwenyamo tsinyanga tsiosi

[108] Etso nitsinyaali tsia Nyasaye khukhusomelanga khubwatoto, ne Nyasaye shiyenyanga okhukholela Abandu obubii tawe

[109] Ne buli shiosi shili mwikulu nende mushialo nishia Nyasaye, ne ewa Nyasaye ne amakhuwa koosi kalikalukha

[110] Enywe muli omukanda omulayi kwarusibwa khulwa Abandu, shichila mulomesinjia amalayi ne mukaniinjia amabii. Ne musuubilanga Nyasaye, ne Abandu beshitabu basuubilanga bwakhabeele obulayi khubo. Mubo balimwo abasuubili halali obunji bwabu nabakori

[111] Abasuku shibalabaumisia tawe halali okhubasinyisia butswa. Ne nibalwaana ninenyu balabechesia emikongo chiabu mana khandi shibalahabinwa tawe

[112] Bakhupwa nobuteshele, wosiwosi abanyolekhana, halali nibatila omukoye kwa Nyasaye nende omukoye kwabandu. Mana nibakhoyeshela liruma lia Nyasaye mana nibakhupwa nobutakha. Ako nilwokhuba mbu bakhayanga ebimanyisio bia Nyasaye, ne beranga Abarumwa khunjila ilali yatoto. Ako nilwokhuba mbu bakwa mwiswa nende shingala barumanga tsinzakho

[113] Boosi shibali nashilala tawe, khulimwo nende Abandu beshitabu baandi beema obulayi basomanga tsinyaali tsia Nyasaye eshilo nende eshitere nabo khandi bamwinamilanga (nibasujuda)

[114] Basuubilanga Nyasaye nende Inyanga yeyindukho, nebalomesinjia okhukhola amalayi, nebakaaninjia amabii, ne belushilanga okhukhola amakhuwa amalayi. Ne abo nibo abali mubakholi abamalayi

[115] Nekabakhola mumalayi shibaliimwa omurungo kwako tawe, Ne Nyasaye amanyile muno abamuria

[116] Toto balia abakhaya (abakhayi) , omwandu kwabu nohomba Abana babu shibalibakhoonya shiosishiosi imbeli wa Nyasaye tawe, ne abo nibo Abandu bomumulilo balimenyamwo tsinyanga tsiosi

[117] Ebia murusinjia khubulamu bwokhushialo buno bili shinga omuyeka kulinende omunyiri khweibarafu, mana nikunyoola omukunda kwa Abandu bakholela obubii emioyo chiabu mana nikunyasia. Ne Nyasaye shabakholelanga obubii tawe halali abeene nibo bekholelanga obubii

[118] Enywe Abasuubili mulakhola okhuba ebesikwa benyu Abandu balali ninanyu tawe. Shibalalekha okhubakholela obubii tawe. Bayanza okhulola akamunyasia. Imalile okhumanyikha isila yabu khuminwa chiabu, ne kabafisanga mubilifu biabu ni amakhongo muno. Khumalile okhulolosilia ebimanyisio nimuba toto nimuretsanga mubwongo

[119] Mana enywe bano mwabachama, nabo shibabachama tawe, Nanyu musuubilanga ebitabu biosi. Ne nibabukanana ninanyu nibaboola mbu; “khusuubile “ , ne nibaba bonyene babalumilanga tsinzala khu isila. Boola “fwe nende isila yenyu, toto Nyasaye yamanya kali mubilifu.”

[120] Ni munyoola obulayi bwosibwosi bibasinyisia, nenimunyoolaobubiibibasangasia. Neni mwisumilisia mana mumurie (Nyasaye), omubayo kwabu shikulabakhola shiosishiosi tawe, Toto Nyasaye abotokhananga koosi kabakholanga

[121] Ne olwa warula mumabwibwi nolekha Abandu bobo, shichila okhupanga Abasuubili muliyie, ne Nyasaye awuulilanga ne amanyile muno

[122] Emikanda chibili mwinywe nichinjilamwo oburi, mbu betsa okhushilwa, ne Nyasaye niye omulindi wabu, Ne Abasuubili besikesa Nyasaye yenyene

[123] Ne Nyasaye yabahabina mubadiri nanyu nimuli abateshele. Kho murie Nyasaye kho munyoole okhupa orio

[124] Olwa waboolela Abasuubili mbu; ‘’koo shibibayela tawe nikali mbu Nyasaye wenyu alabakhoonya nende Abamalaika elfu tsitaru abeshibwa (okhurula mwikulu)?’’

[125] Koo, nimwista okhuba abesumilisi mana murie Nyasaye nekata Abasuku nibabarusia mapwoka, awo Nyasaye wenyu omulesi alabakhoonya nende Abamalaika elfu tsirano batsunukhanga nibalwana namaani

[126] Ne Nyasaye shiyakhola kano halali bube obusangali khwinywe, ne emioyo chenyu chinyoole okhwihotselesia, ne obukhoonyi shiburulanga awundi tawe halali khu Nyasaye, Owoluyali Owamani Owamachesi

[127] Endio nilwokhuba atete ebuleka khubakhayi nohomba abaresie banyoole okhukalukha inyuma, nabo nibatorere

[128] Na ewe obula liosiliosi mukano, nalabaleshela nohomba abahelesie eshinyasio shichilabo ni abamabii

[129] Nebiosi bili mwikulu nende mushialo ni bia Nyasaye, aleshelanga wayenya ne ahelesinjia wayenya eshinyasio, ne Nyasaye ni Omulesheli muno Owetsimbabaasi

[130] Enywe Abasuubila, mulalia riba tawe nimumetelakhwo hekulu hekulu, ne murie Nyasaye khomunyoole okhubura

[131] Ne murie omulilo kwarecheshelwa abakhayi

[132] Ne wulile Nyasaye nende Omurumwa wuwe kho munyoole tsimbabaasi

[133] Ne yilushile obulesheli bwa Nyasaye wenyu omulesi, nende mwikulu (Jannah) yobubambalifu bwayo ni likulu nende eshialo, Yarecheshelwa abaria Nyasaye

[134] Balia barusinjia nibenyala nende nibali mubutinyu, nende beyikalilanga liruma nende baleshelanga Abandu, Ne Nyasaye yachama abakholi abamalayi

[135] Balia nibakhola amabii nohomba nibakosela emioyo chiabu betsulila Nyasaye mana nibasaba eshileshelo khutsimbi tsiabu, ne ni wina uleshelanga tsimbi ulali Nyasaye, ne shibatsililanga okhukhola akabakhola nabo nibamanyile tawe

[136] Abo omurungo kwabu ni obulesheli okhurula khu Nyasaye wabu omulesi, nende emikunda chiburangamwo emialo, balimenyamwo tsinyanga tsiosi, ne ni omulayi muno omurungo kwa bakholi bamalayi

[137] Imbeli wenyu chiakhabura emilukha eminji, kho chende khushialo mulole indukho yabachayi

[138] Kano nika habulafu khubandu nende obulunjifu nende amachelo khubalia baria Nyasaye

[139] Ne mulafwa omwoyo tawe, nohomba mlabeelela tawe, toto enywe nenywe bahekulu nikali mbu toto muba Abasuubili

[140] Obubii nibubanyoola manya mbu Abandu bandi abo banyoola obubii shinga obo. Ne etso nitsinyanga tsia khukalukhaninjia mubandu, kho Nyasaye arusiemo Abasuubili ne yawule mwinywe abalobole be. Na Nyasaye shiyachama abamabii tawe

[141] Ne khandi Nyasaye yoosie balia abasuubila ne asukune ehale Abakhayi

[142] Koo, muparanga mbu mulenjilasa mwikulu Nyasaye nashili akhumanya balia abakhalabani mwinywe nende okhumanya abokhwifwila

[143] Ne enywe mwekombanga lifwa nimushili okhubukanana nalio. Kholaano mumalile okhulilola nanyu nimuhenga

[144] Ne Mohammad shiyali halali Omurumwa butswa. Toto Abarumwa babura imbeli wuwe, koo nafwa nohomba niyerwa, mulabotokhana mukalukhe inyuma? Ni ubotokhana yakalukha inyuma oyo shakholakhwo shiosishiosi Nyasaye tawe, Ne Nyasaye alarunga bamukhupilanga orio

[145] Ne omundu shiyakhafwasa tawe halali khubuchami bwa Nyasaye, shingala yahandichilwa, ne owenya omurungo kwokhushialo khwitsa okhumuwa, ne owenya omurungo kwo mwikulu khwitsa okhumuwa, ne alarunga balia bakhupanga orio

[146] Ne ni Abarumwa benga balwaana ne halala ninabo Abasuubili abaanji bakholanga shichila Nyasaye shibakhola oburi khukabanyoola khunjila ya Nyasaye tawe, nohomba 3. shibateshelekhana nohomba shibatofula, ne Nyasaye yachama abefwilanga

[147] Ne amakhuwa kabu kalisa okhuboola mbu; ‘’Nyasaye wefu omulesi, khuleshele ebionono biefu, nende okhubura eshichelo khwefu, mumakhuwa kefu, ne tinyisia ebilenje biefu ne okhuhabine khushile omukanda kwabakhayi

[148] Mana Nyasaye nabahelesia omurungo omulayi kwokhushialo nende omurungo omulayi komwikulu, Ne Nyasaye yachama abakholanga amalayi

[149] Enywe balia abasuubila, nimuloonda balia abakhaya betsa okhubakalusia inyuma, ne mwitsa okhuba mubasikha

[150] Halali Nyasaye niye omulindi wenyu naye niye omukhoonyi omulayi muno

[151] Khwitsa okhura obuyendi mumioyo chiabakhayi, shingala batsokasia Nyasaye nende abalarumilwakho eshifune, ne ashimenyo shiabu ni mumulilo, Ne ni eshimenyi eshibii muno khubakholi bamabii

[152] Ne Nyasaye yabakholela toto akayabalaka shingala mwabeeranga khubuchamibwe, okhula shingala mwatoratora mana nimusoolana, khulikhuwa, mana nimukhaya olwa yabechesia eshiamwachama, baliwo mwinywe balia benyanga eshialo, ne baliwo mwinywe benyanga mwikulu. Mana nabakabukhasia ninanyu okhubatema naye toto yamala okhubaleshela enywe, ne Nyasaye niwetsimbabaasi khubasuubili

[153] Olwa mwelukhanga tsimbilo nimulawulila yesiyesi tawe, ne Omurumwa nabalanganga nali inyuma wenyu, mana Nyasaye nabawa ubusiro khubusiro, khomulabeelela khukababurire tawe nohomba khukabanyoolele, ne Nyasaye amanyile koosi kamukholanga

[154] Mana nabarerera ubwihotselefu okhurula mubutinyu, tsindolo tsiatila umukanda mulala mwinywe, Ne omukanda kundi mwinywe emioyo chiabu chiabakanakania okhula baparira Nyasaye amaparo kalali katoto, amaparo keshisilu, nibaboola; “Koo mana khulikho nende shiosishiosi mulikhuwa lino?” Boola; amakhuwa koosi nika Nyasaye, Bafisanga mumioyo chiabu kabalakhuboolelanga tawe. Baboolanga mbu; khubetsanga mbu khuli nende shiosishiosi mulikhuwa lino sikhwakhererwe ano tawe. Boola; “kata mubetsanga mutsinzu tsienyu, abahandichilwa okhufwa bakharulile, batsia habundu wabu abahandichilwa okhufwa bafwilao.” Kano ni okhubeela Nyasaye ateme kali mubilifu bienyu, ne yosie kali mumioyo chienyu. Ne Nyasaye amanyile muno kali mubilifu

[155] Toto balia bakalukha inyuma inyanga yemikanda chibili chiabukanana shetani niye owabareresia khumakosa kabakhola, ne Nyasaye yamala okhubaleshela. Toto Nyasaye niwobulesheli Omwihotselefu muno

[156] Enywe abasuubila, mulabashinga balia bakhaya, mana nibaboola khubashiabwe ngala basamula khushialo nohomba shingala batsia mwiye: “Babetsanga hano ninaafu shibakhafwile tawe neshibakhererwe tawe. Kho Nyasaye akhole oko okhuba eshibeela mumioyo chiabu. Ne Nyasaye niye welesinjia obulamu ne niye ufwisinjia. Ne Nyasaye alolanga kamukholanga

[157] Ne nimwirwa khunjila ya Nyasaye nohomba ni mufwa toto obulesheli nende tsimbabaasi tsirulanga khuNyasaye tsishila kalia kamukhung’asinjia

[158] Ne nimufwa nohomba ni mwirwa ni ewa Nyasaye ni amulikhunga’sibwa

[159] Ne nikhulwa tsimbabaasi tsirulanga khu Nyasaye nitso tsichila noba omwihotselefu khubo, Ne obetsanga omululu, womwoyo omumu bakhakhwilushe. Khomana baleshele ne obasabile eshileshelo, ne sanjilana nabo mumakhuwa, Ne nomala wabusia, wisiche Nyasaye, toto Nyasaye yachama Abandu bamwisikanga

[160] Ne Nyasaye nabahabina abulao wakhabashila, ne nabasukuna niwina wuundi ulaliye wakhabahabina. Ne Nyasaye butswa niwabasuubili besiche

[161] Ne shikanyalikhana khumurumwa yesiyesi okhukhoba tawe. Ne ulia ukhoba alitsa nende shiayakhoba inyanga yeyindukho, ne omundu alirungwa kayakhola, nabo shibalikholelwa obubii tawe

[162] Koo! Ulia waloonda kachamisia Nyasaye ali shinga ulia wakhoyekhana liruma lia Nyasaye? Ne eshimenyo shiaye nimumulilo Nao ni habundu abii muno okhwinjila

[163] Abo bali nende tsingasi tsikabukhane, ne Nyasaye alolanga muno akabakholanga

[164] Toto Nyasaye yakholela Abasuubili obulayi obukhongo , olwa yawula mubo Omurumwa, okhurula khubo abeene, owubasomelanga tsinyaali tsitsie, ne owubatwsenulanga, ne abechesinjia eshitabu nende amachesi kata nikali mbu inyuma awo bali mubukori bwahabulafu

[165] Enywe olwakabanyoola amasila, -amasila aka enywe mwabahelesia okhuula khabili shinga ako,- muboola mbu karulile hena kano? Boola; “ako karulile khwinywe abeene”. Toto Nyasaye ni Omunyali wa buli eshindu

[166] Amasila kabanyoola olwa emikanda chibili chiabukanana(khuliyie) kali khubuchami bwa Nyasaye, kho abamanye Abasuubili

[167] Nekho anyoole okhumanya abeshikhabili, nibaboolelwa mbu; “Itse mulwaane khunjila ya Nyasaye nohomba muliinde.” Nibaboola mbu; “khumanyanga mbu ni okhulwana toto shikhwakhabalondelekhwo tawe.” Abo inyanga eyo bali ahambi nende obukhayi okhushila obusuubili, baboolanga neminwa chiabu kalali mumioyo chiabu, ne Nyasaye amanyile muno akabafisanga

[168] Abo nibo baboolela Abana babu, ne abeene nibekhala; “Bakhuwulilanga shibakhererwe tawe,” Boola mbu; “yikalilekhwo lifwa okhubeetsela enywe toto nimuli mbu muboolanga abwene.”

[169] Mulapara mbu balia bererwe khunjila ya Nyasaye mbu ni abafu tawe. Halali bo ni abalamu banyoolanga amukabo kwabu ewa Nyasaye

[170] Basangalilanga aka Nyasaye yabahelesia khu tsimbabaasi tsitsie, bekhoyelungwa nende balia bashiri okhuba ninabo halala abali inyuma wabu, mbu shibalaba nobuyendi neshibalabeelela tawe

[171] Bekhoyelanga obwokholo okhurula khu Nyasaye nende tsimbabaasi tsitsie , Ne toto Nyasaye shakosinjia omurungo kwa basuubili tawe

[172] Balia bafuchilila Nyasaye nende Omurumwa wuwe- olwa bali nibanyolelwe nende tsinguma, ne balia bakhola amalayi mubo mana nibaria baliba nende omurungo omukhongo

[173] Balia baboolelwa nende Abandu mbu; “Abandu babakhung’anile, Mubarie!” Ako nikabameta obusuubili, nibaboola Mbu; “ Nyasaye Akhuyela naye niye omulayi muno wokhwisikwa.”

[174] Kho mana nibakalukha nende obwokholo nende tsimbabaasi tsia Nyasaye, libi liosi liosi shiliabanyolakhwo tawe, ne nibaloonda ka Nyasaye achama. Ne Nyasaye niwetsimbabaasi tsikhongo

[175] Toto oyo ni shetani arisinjia abetsa baye, kho mulamuria tawe, murie esie nikali mbu muli Abasuubili

[176] Nebalia belushilanga mubukhayi balakhuyendia tawe, Toto abo shibawumisia Nyasaye khusioshiosi tawe. Nyasaye yenya mbu alababishilakhwo shiosishiosi mwikulu tawe, ne baliba nende eshinyasio eshilulu

[177] Toto balia bakula obukhayi nibakusia obusuubili shibalawumisia shiosishiosi Nyasaye tawe, Ne bali nende ishinyasio eshilulu

[178] Abakhayi balapara mbu okhubalekhakhwa khubalekhanga khuno ni obulayi khubo tawe, Toto khubametanga ebise khobamete tsimbii, ne baliba nende eshinyasio shietsisoni

[179] Nyasaye shiyakhalekha Abasuubili muka enywe mulikho tawe okhuula yawukhasie ababii nende abalayi. Ne Nyasaye shakhoyele okhubechesia kefisa halali Nyasaye yawulanga mubarumwa bebe wayenya. Ne suubile Nyasaye nende Abarumwa bebe, nimusuubila mana mwaria Nyasaye mulaba nende omurungo omukhongo

[180] Ne mulapara mbu balia bemananga shia Nyasaye yabawa khu tsimbabaasi tsitsie mbu bali obulayi, halali ni obubii khubo. Baliboywa halala nende biabemananga inyanga yeyindukho. Ne obuchelani bwe bili mwikulu nende khushialo ni bwa Nyasaye. Ne Nyasaye amanyile muno akamukholanga

[181] Toto Nyasaye awulile likhuwa liabalia boboola mbu “Nyasaye toto ni umumanani nafu khuli abayinda,” khwandichile kababoola nende okhwira khwabu Abarumwa munjila ilali yatoto. Ne khulibaboolela inyanga yeyindukho mbu; “Mupile eshinyasio shiokhuyia.”

[182] Kano nishichila akemikhono chenyu chiaranjilisia ne mbu toto Nyasaye Shali wokhukholela obubii abandu tawe

[183] Balia baboola mbu; “Nyasaye akhulachile mbu khulasuubila Omurumwa yesiyesi tawe okhuula okhurusilie eshihanwa(isolo) isambwe nende omulilo.” Baboolele mbu; “Abarumwa babetsela nende ebifune biabulafu nende shinga kamurebanga kano, kho shichila shina nimubera toto nimuba nimuboolanga obulaamba.”

[184] Ne nibakhukhaya bamala okhukhaya Abarumwa bandi imbeli wuwo, abetsa nende ebifune bilolekha nende ebitabu bia machesi, nende eshitabu shiobulafu

[185] Buli omundu alipila lifwa, mana toto mulihebwa omurungo kwenyu inyanga yeyindukho, ulia ulisitibwa ehale nomulilo, alinjisibwa mwikulu, oyo aliba aburire. Ne obulamu bwokhushialo shineshindu tawe halali okhwisangasia khwokhwikatia

[186] Ne toto mwitsa okhunyoola emiresio mumiandu chienyu nende mwinywe abeene. Ne khandi toto mulawulila kabasinyisia amanji okhurulana nende Abandu bahebwa eshitabu, imbeli wenyu, nende balia Abatsokaasi. Ne ni mwifwila mana mwaria Nyasaye, toto ako ni amakhuwa amalayi muno kokhukhola

[187] Ne olwa Nyasaye yalakana nende balia bahebwa eshitabu mbu; “Ni okhula mwinosilie abandu, ne shimulafisa tawe.” Basukuna indakano eyo inyuma wemikongo chiabu nenibakula obukusi obufwolwa, kho neshibi muno eshiabakula esho

[188] Olabaparira balia abasangalanga akabakholele, ne nibachama okhulaywa khukabalakholele, olabaparira mbu balihonokokha nende eshinyasio tawe. Baliba nende eshinyasio eshilulu

[189] Ne obwami bwomwikulu nende mushialo nibwa Nyasaye, ne Nyasaye nomunyali wabuli eshindu

[190] Toto mukhulongwa khwelikulu nende eshialo nende okhukalukhana khweshilo nende eshitere khulimo nende ebimanyisio khubandu bamachesi

[191] Abetsulilanga Nyasaye nibeemele nende nibekhaale nende nibakonele . Ne baparanga khukhulongwa khwelikulu nende eshialo nibaboola mbu; “Nyasaye wefu Omulesi, siwalonga bino eshikhaya tawe. Obutswenufu nobubwo, kho khulinde okhurulana nende eshinyasio shiomulilo.”

[192] Nyasaye wefu Omulesi, toto ulia wora mumulilo alaba omubakale. Ne balia bakhola obubii shibaliba nomukhoonyi tawe

[193] Nyasaye wefu omulesi, toto efwe khuwulile omulanji nalanga khubusuubili mbu; “Musuubile Nyasaye wenyu omulesi” mana nikhusuubila. Kho khuleshele tsimbi tsiefu ne okhuleshele ebionono biefu, ne okhufwisie halala nende Abandu abalayi

[194] Nyasaye wefu Omulesi okhuhelesie akawakhulaka khubarumwa boobo, ne olakhubakala inyanga yeyindukho tawe, Toto ewe shofunakanga indakano tawe

[195] Nyasaye webu Omulesi, nafuchilila amasayo kabu, nakalusia mbu: “Toto esie shengosinjia emilimo chio omukholi yesiyesi mwinywe tawe, abe omusatsa nohomba omukhasi, enywe khwinywe, Kho balia bawuya nende balia baloondwa mumatala kabu, mana nibasandibwa khunjila yanje, mana nibalwana , mana niberwa, toto esie nditsa okhubaleshela ebionono biabu, ne toto nditsa okhubenjisia mumikunda chiemialo chiburangamwo. Oko niko omurungo okhurula khu Nyasaye. Ne ewa Nyasaye chiliyo emirungo emilayi muno

[196] Okhuyiyayiya khwabakhayi khushialo khulakhukatiakhwo tawe

[197] Okho ni okhwisangasia khutiti mana eshimenyo shiabu shiliba mumulilo, ne ni abundu abii muno wokhuhulushila

[198] Halali balia baria Nyasaye wabu omulesi balinyoola emikunda chiburangamwo emialo hakari wachio, balimenyamwo tsinyanga tsiosi. Obucheni okhurula khu Nyasaye. Ne ebili ewa Nyasaye ni ebilayi ebia Abandu abalayi

[199] Toto mubandu bahebwa eshitabu balimwo basuubilanga Nyasaye nende kalia keshibwa khwinywe nende kalia kabeshilibwa, behotselesilinjia Nyasaye. Shibakusinjia tsinyaali tsia Nyasaye khubukusi obufwoola tawe. Bali nende omurungo kwabu khu Nyasaye wabu Omulesi.Toto Nyasaye ni Omwangu wakhubala

[200] Enywe balia basuubila, mwisumilisie ne mushilane khukhwisumilisia, ne mube meso, ne murie Nyasaye kho munyoole okhubura

[1] Enywe Abandu murie Nyasaye wenyu Omulesi wenyu owabaloonga okhurula khumundu mulala ne naloonga okhurula khu Omundu oyo Omukhasi wuwe, mana natsukha okhurulana nende balili abo Abasatsa nende Abakhasi abaanji. Ne murie Nyasaye awamusabananga khuye, ne (mulinge) abekho. Toto Nyasaye ni Omulindi wenyu

[2] Ne muhelesie Abana abafwilwa omwandu kwabu, ne mulakalukhasia eshibii khushilayi tawe. Ne mulalia omwandu kwabu halala nende okwenyu tawe, toto koosi ako ni obwononi obukhongo

[3] Nenimurirembushimulakholaobuleng’aafu khubana abafilwa tawe.(mana khandi murie okhukhaya okhukholela obuleng’aafu khubakhasi) mana muteshie abamuchamisiye mubakhasi, babilii nohomba bataru, nohomba bane, ne ni muria mbu shimunyala okhukhola obuleng’aafu mana muteshie mulala butswa, nohomba balia bemikhono chienyu emisatsa chibatilile, eyo niyo injila yahambi muno khwinywe ichile mube hale nende okhukhaya okhukhola obufuru

[4] Ne muhelesie Abakhasi omurungo kwabu kuli mbu ni eshihanwa. Ne nibabahelesia eshindu mumurungo kwabu oko, mubuchami bwabu, awo mulie mubusangafu, mumwikhoyo

[5] Ne mulahelesia obunyali bwokhwikhonyela omwandu kwa Nyasaye amukholele okhuba injila yenyu yokhwikhonya, balia babula obunyali bwobwongo bwokhulinda omwandu. Kho mubalisie mana mubafwale obulayi butswa, ne muboole ninabo amakhuwa amalayi

[6] Nemuteeme Abana abafwilwa ukhula shinga boola ulubaka lwokhuteshia. Nenimubanyoola mbu nabachesi, mubahelesie omwandu kwabu. Ne mulakulia mayuyukhana nohomba mayungubala tawe shichila betsa okhuba Abandu abakhongo. Ne ulia uli omuyinda yeyikalile- okhulia omwandu oko- ne omumanani alie khushichelo shielilako lilaka. Ne nimubahelesia omwandu kwabu mureo abaloli, Ne Nyasaye ayela okhuba omubali

[7] Abasatsa bali nende omukabo khushiabebusi balekhanga nende abekho abahambi. Ne-abakhasi bosi bali nende omukabo khushiabebusi balekhanga nende abekho abahambi. Shibe shititi nohomba eshiinji omukabo kwalachilwa

[8] Ne ebise biokhukaba, abekho nibabao nende abafwilwa nende abamanani mubahelesie khumwandu kwokhuchelama oko, ne mubaboolele amakhuwa amalayi

[9] Ne barie (abemelisi okhukholela abana abafwila obubii, ne betsulile mbu) boosi banyala betsukhana nibalekha inyuma wabu olwibulo oluteshele baluyendela. Kho mana bo barie Nyasaye ne boboole amakhuwa kali habwene

[10] Toto balia balitsanga omwandu kwa Abana abafwilwa khububii. Toto abo balitsanga mutsinda tsiabu omulilo, ne baliinjila mumulilo kwakhanga

[11] Nyasaye abachelelanga okhulondokhana nende Abana benyu. Omukabo okwa Omwana Omusiani kulishinga omukabo kwa Abana beshikhana babili. Ne abakhasi nibali abanji bababili betsa okhunyoola tsitsulutsi tsibili estia ufwile aleshele. Ne nali Omwana omukhana mulala awo omukabo kwaye ni inusu. Ne abebusibaye babili, buli mulala khubo anyoole isudusi ya shia aleshele, nikali mbu alinende Abana. Nali mbu abula Abana ne abebusi baye babili nibo abamuchelama, awo mamawuwe alanyoola itsulutsi ndala. Ne nali nende Abana babu awo nyinamwana alanyoola isudusi. Kano nibamalile okhurusiamwo eshiayalaka nohomba likofi. Bapapa benyu nende Abana benyu enywe mukorerwe ni wina mubo owuli ahambi ninenyu muno khubukhoonyi. Esho ni eshilachilo okhurula khu Nyasaye. Toto Nyasaye ni Omumanyi Owamachesi muno

[12] Ne omukabo kwenyu ni inusu khushabakhasi benyu baleshele nikali mbu babula Omwana. Ne nibali nende Omwana awo omukabo kwenyu ni irobo khushia baleshele, nibakhamala okhurusiamwo shiayalaka nohomba likofi. Ne Abakhasi benyu balanyoola irobo khushiamuleshele nimulali nende Omwana tawe. Ne nimuli nende Omwana betsa okhunyoola itsumuni khushiamuleshele, nibakhamala okhurusiamo shiayalaka nohomba likofi. Ne nikali mbu Omusatsanohomba Omukhasi uchelamungwa abula Omwana nohomba abebusi, ne ali nende Omwana wabu weshisatsa noho weshikhasi, awo buli shiamulala alanyoola isudusi. Ne nibali abanjii okhushila awo betsa okhukabana ithuluthi, nibakharusiamwo akayalaka nohomba likofi, obularera okhumisia tawe, kano ni amachelo karula khu Nyasaye. Ne Nyasaye ni Omumanyi Omwihotselefu muno

[13] Etso nitsinzakho tsia Nyasaye, ne ulia uwulila Nyasaye, nende Omurumwa wuwe, alamura mwikulu, mumikunda chiburangamwo emialo hakari wachio, balimenyamwo tsinyanga tsiosi. Ne okho nikho okhubura okhukhongo

[14] Ne ulia ulawulila Nyasaye nende Omurumwa wuwe mana naruuma tsinzakho tsia Nyasaye, alimwinjisia mumulilo amenyemwo tsinyanga tsiosi ne alinyoola eshinyasio shiokhututuyibwa

[15] Ne bakholanga eshifwolo mubakhasi benyu, munyoole abaloli bane mwinywe, nibabalola, mubekalile munzu okhula shinga lifwa libabukula nohomba Nyasaye abererere injila yindi

[16] Ne babili mwinywe nibakhola (eshifwolo) ako mubasandie (mubahe eshinyasio) ne nibekanila mana baba abalayi mubaleshele. Toto Nyasaye ni Oweshileshelo muno, Owetsimbabaasi po

[17] Toto eshileshelo shifuchililwa nende Nyasaye ni shiabalia bakholanga amabii mubusilu, mana nibekanila nibasaba eshileshelo mulwangu. Abo nibo ba Nyasaye achamilanga eshileshelo shiabu. Ne Nyasaye ni Omumanyi muno Owamachesi po

[18] Ne babula eshileshelo balia bakholanga amabii, okhula mulala wabu niyolelwa nende lifwa, mana aboole: “Toto esie lano ndikanile.” Nohomba balia bafwitsanga nibali abakhayi. Abo khwabakasilia eshinyasio eshilulu

[19] Enywe abasuubila, shimuchamilwa okhuchelama(okhukalusia) abakhasi nende amaani tawe . Ne mulabasandia mbu khomubukule khubiamwabahelesia tawe, halali nibakhola obubii bwa habulafu. Ne mwikhale ninabo obulayi, ne nikali mbu bamusinya munyala okhukhaya eshindu na Nyasaye aramwo tsikhabi tsinyinji

[20] Ne nimwenya okhukalukhasia Omukhasi abundu womukhasi wundi, ne mulala khubo mwamuhelesiyia omwandu omunji, mulabukulakhwo khumwandu oko shiosi shiosi tawe. Ne nimubukula muba mukholele obubii ne ni eshionono shili habulafu

[21] Ne mwakhabukula murie nimumalile okhwinjilana enywe khwenywe, ne abakhasi abo babukula khwinywe indakano isiro

[22] Ne mulateshia Abakhasi babasenywe bateshia tawe, halali khu kalia kabura. Toto esho ni eshifwolo nende oshisinyo nende injila imbii

[23] Mukanibwa okhuteshia banyinenywe, Abana benyu (beshikhana), abakhana benyu, basenje benyu, abakhana babu mama wenyu, Omwana womusiani wenyu, nende Omwana womukhana wenyu, nende bamama benyu babanunia nende abakhana benyu khukhununa, nende Abana babakhasi benyu bali hasi wobulindi bwenyu abebulwa nende abakhasi benyu bamwamala okhubenjilila. Ne nimushili okhubenjilila awo eshikhukaila shibulao. Nemukanibwa khandi abakhasi babaana benyu abarula khutsingongofuma tsienyu. Nende okhuteshia Abana bomunzu ndala halali mulala wabu nafwile. Toto Nyasaye niwobulesheli muno Owetsimbabaasi po

[24] Nende Abakhasi babasatsa, halali balia abali mumikhono chiabu chieshilunji (abarumwa). Ako niko amalako ka Nyasaye khwinywe, ne musubulilwa balali abo, mukhaabe okhubateshia nende omwandu kwenyu okhubula okhukhola obwilaasi. Ngala mubaninabo khukhubateshia mubahelesie omurungo kwabu shingala kwahandikwa. Obubii bubulao khwinywe khushia murechelesania nimumalile okhumala kalachilwa. Toto Nyasaye ni Omumanyi Owamachesi muno

[25] Ne ulanyala mwinywe okhunyoola omwandu kwokhuteshia Omukhasi omulekhule omusuubili, ne ateshie okhurula khubarumwa abasuubili, abali mumukhono kukwe omusatsa, ne Nyasaye niye umanyile obusuubili bwabu, Ne enywe murulana abene khubene. Kho mubateshie khumunwa kwa abandu babu, ne mubahelesie omurungo khubulayi abakhasi abalayi balali abatamba nohomba abatseche tawe. Nenibatekha mana bakhola eshifwolo ishinyasio shiabu shilaba inusu yabakhasi abangwana (balali Abarumwa), Kano nikhu ulia uritsanga okhukhola eshifwolo shiobuyeyi. Ne nimwifwila nobulayi kwinywe, ne Nyasaye niwokhuleshela wetsimbabaasi

[26] Nyasaye yenya okhubenoosilia nende okhubalunjisia khu injila ya balia bali imbeli wenyu, mana amuleshele, Ne Nyasaye ni Omumanyi Owamachesi muno

[27] Ne Nyasaye yenya okhubabeela tsimbabaasi, nebaloondanga ebwikombi bwemioyo chiabu, benyanga mbu mwikote okhwikota okhukhongo

[28] Nyasaye yenya okhubaanguyilisia obusiro, shichila Omundu yaloongwa omuteshele

[29] Enywe Abasuubili mulalitsana emiandu chienyu khububii tawe, halali nili inganga mukhufuchilisania abeene khu beene, ne muleyira tawe . Toto Nyasaye niwokhubabeela tsimbabaasi

[30] Ne ukhola ario khubusuku nende obubii, oyo khulimwinjisia mumulilo, ne elo ni eliangu muno khu Nyasaye

[31] Ne nimulekhana nende amakhongo kamukanibungwa khwitsa okhubaleshela abionono bienyu ebititi, nekhulabenjisia habundu alayi

[32] Ne mulekoomba shia Nyasaye yahelesia abandi mwinywe okhushila abandi tawe. Abasatsa bali nende omukabo khubiaabachuma, ne abakhasi bosi bali nende omukabo khubiabachuma ne musabe Nyasaye tsimbabaasi tsitsie. Toto Nyasaye ni Omumanyi wa buli eshindu

[33] Ne buli shiamulala khwamurereho abamuchelama khushia abebusi babili baleshele nende abekho. Ne balia bamuli nabo indakano mubahe omukabo kwabu. Toto Nyasaye ni omuloli wabuli eshindu

[34] Abasatsa nibo abemeleli babakhasi, khulwe tsimbabaasi tsia Nyasaye abeene khubeene, nende khumiandu chiabu chabarusia. Kho abakhasi abalayi nibalia abawulilanga nende belindanga kata mubwifisi shichila Nyasaye yalomesia mbu beliinde. Ne balia bamuritsanga okhukhaya okhubawulila mubachelele, mubawuye khubulili ne mubakhupe, Ne niba- wulila mulabakhabila injila yokhubasinyisia eshikhaya tawe. Toto Nyasaye niye owuli hekulu ne niye omukhongo

[35] Ne nimuria mbu omulembe kubula hakari wabu (omusatsa nende omukhasi) awo murume omwauli okhurula namusatsa nende omwawuli wundi okhurula ebuleka wanamukhasi. Nibenya omulembe Nyasaye alabachamila. Toto Nyasaye ni Omumanyi ulinende amacheni koosi

[36] Ne mulaame Nyasaye ne mulamusasiakhwo nende shiosi shiosi tawe. Ne mukholele abebusi benyu amalayi nende abekho nende abana abafwilwa nende abamanani nende omumenyanwa owahambi nende owahale, nende owomumbafu nende omuburi njila, nende abali mumikhono chienyu emisatsa. Toto Nyasaye shiyachama Abandu abafuru abokhwilola tawe

[37] Balia bakholanga obwimani, nebalomesia Abandu okhukhola obwimani, nebafisanga amalayi ka Nyasaye yabahelesia, nekhwarecheshela abakhayi eshinyasio shiokhututuyibwa

[38] Ne balia barusinjia omwandu kwabu khulwokhulolesia Abandu, neshibasuubilanga 4. Nyasaye nohomba Inyanga yeyindukho tawe. Ne ulia washetani aba omwitsa wuwe, aba ali nende omwitsa omubii muno

[39] Ne shina shakhabakholele basuubilanga Nyasaye nende inyanga yeyindukho. Mana barusie shia Nyasaye abakabile, Na Nyasaye abamanyile obulayi muno

[40] Toto Nyasaye shakholelanga abubii omundu yesiyesi tawe kata khubusiro bweyindonyande ndala, ne nilili likhuwa lilayi Nyasaye alimetanga, ne okhurula khuye kuliwo omurungo omukhongo

[41] Kho kalibakarie olwa khulirerera buli omukanda omuloli, mana khulirera ewe okhuba omuloli wabano

[42] Inyanga eyo balia bakhaya mana nibalawulila Omurumwa balikomba liloba liyelasibwe hekulu wabu. Ne shibalifisa Nyasaye liosiliosi tawe

[43] Enywe abasuubila, mulasita ahambi nende iswala nimumeelele tawe, okhula mumanye shamuboola, nende nimuli nende Janaba tawe, halali nimuli khuluchendo- okhula mwisinje, Ne nimuli abalwale nohomba khuluchendo, nohomba shiamulala wenyu narula elwanyi (muchoo) nohomba nimubele nende abakhasi benyu mana mukhaywe okhunyoola amatsi, awo mwikhonyele liloba lilayi, mubashe obweni bwenyu nende emikhono chienyu, Toto Nyasaye Nomulesheli Owuleshelanga

[44] Sholola balia abahebwa ebuleka mushitabu, bakulanga obukori, nabo bosi benya mbu enywe mukore injila

[45] Ne Nyasaye yamanya obulayi muno abasuku benyu, Ne Nyasaye ayela muno okhuba omulindi, ne ayela muno Nyasaye okhubahabina

[46] Mubayahudi balimwo bakalukhaninjia amakhuwa okhukarusia abundu wako, ne baboolanga mbu; khuwulile mana khukhayile, ne wulila obula rechelesia. Ne baboolanga mbu: “Raai’na” khulwo khukalukhania tsinimi tsiabu khobanyeke idini. Ne baboolanga mbu; khuwulile mana nikhufuchilila, ne uwulile mana ukhuhengekhwo, bwakhabele obulayi khubo nende abwene muno. Halali Nyasaye yabatsuba khubukhayi bwabu, kho shibasuubilanga tawe halali batitisa mubo

[47] Enywe balia abahebwa eshitabu, suubile mukalia akakhweshia kafuchilisania nende akamuli ninako, nikhushili okhukabukhania obweni okhubura namukongo, nohomba khubatsube shinga khwatsuba Abandu be Isabato (Jumamosi). Ne likhuwa lia Nyasaye okhula likholeshe

[48] Toto Nyasaye shaleshelanga umutsokaasia tawe ne aleshelanga akali hasi wa ako khuwayenya. Ne ulia otsokasia Nyasaye toto awo akholele eshionono eshikhongo

[49] Shololangakho balia bekholanga mbu nabatswenufu, halali Nyasaye atswenulanga owayenya, Ne shibali kholelwa obubi bwosibwosi kata hatutu tawe

[50] Henga shinga bachishilanga Nyasaye obubeyi, ne kano Kayela okhuba eshionono shili habulafu

[51] Shololanga balia bahebwa ebuka weshitabu, basuubilanga mubifwanani nende shetani! Ne abakhayi baboolanga mbu! Abo ni abalunjifu muno okhushila balia abasuubila

[52] Abo nibo ba Nyasaye yatsuba , Ne wa Nyasaye atsuba sholimunyoola nali nende owokhumuhabina tawe

[53] Nohomba bali nende ebuleka mubwami? Awo shibakhawele Abandu shiosi shiosi kata nishili singa okhakhoba kheitende tawe

[54] Nohomba bakholelanga Abandu eshinda khutsimbabaasi tsia Nyasaye yabahelesia? Ne mana khwahelesia olwibulo lwa Ibraheem eshitabu nende amachesi ne nikhubahelesia oburuchi obukhongo

[55] Mana baliwo mubo balia abasuubila, nebaliwo balia abakhaya. Ne Jahanam ibayela okhuba omulilo kwokhubasamba

[56] Toto balia bakhaya ebimanyisio biefu khulibenjisia mumulilo. Olwe likhoba liabu liyia, khulibakalusilia likhoba lindi kho bapile eshinyasio esho. Toto Nyasaye niwa amani khandi Owamachesi muno

[57] Ne balia basuubila mana nibakhola amalayi khulibenjisia mwikulu mumikunda chiburangamwo emialo balimenyamwo tsinyanga tsiosi. eyo baliba nende abakhasi abatswenufu, ne khulibenjisia mubinikha ebilayi muno

[58] Toto Nyasaye abalomesia okhukalusia obucheleshe khubeene bwo. Ne nimubusia omusango hakari wabandu mubusie mubuleeng’afu. Toto ka Nyasaye abalakanga kano ni amalayi muno. Toto Nyasaye niye Omuwulili Omuloli muno

[59] Enywe balia abasuubila muwulile Nyasaye, nemuwulile Omurumwa nende balia bali nobweni mwinywe. Ne nimusolana khulikhuwa mulikalusie khu Nyasaye nende khu Murumwa toto nimuli mbu musuubilanga khu Nyasaye nende Inyanga yeyindukho. obo nibo obulayi, ne niko kali nende okhumala okhulayi

[60] Shololanga balia beshemulanga mbu basuubila kalia keshibwa khwiwe inyuma wuwo? Benyanga okhuyasilibwa khunjila yobukori, ne balomesibwa okhukakhaya; Ne shetani yenyanga okhubakoselia ehale

[61] Ne nibaboolelwa mbu; “itse khu kalia ka Nyasaye yeshia, ne itse Khumurumwa, “ olalola abeshikhabili bakhuswekhakhwo mubuyingani

[62] Kho mana kalaba karie olwa amasila kalabanyoola khulwa kalia kemikhono chiabu chiranjilisiyie? Awo mana balakhwitsila nibetsuba khu Nyasaye nibaboola mbu; “shikhwenya halali obulayi nende okhuwulilisania.”

[63] Abo nibo ba Nyasaye yamanya kali mumioyo chiabu, lekhana ninabo, mana Obahelesie amachelo, ne obaboolele amakhuwa katila emioyo chiabu

[64] Ni shikhwaruma Omurumwa yesiyesi tawe halali awulilwe, khubuchami bwa Nyasaye. Ne balia bakholela obubii emioyo chiabu mana bakhwitsilanga, basaba Nyasaye eshileshelo, ne Omurumwa yabasabila eshileshelo, awo toto bakhanyoolele Nyasaye niwokhufichilila eshileshelo na niwetsimbabaasi muno

[65] Ne tawe, nditsuba khu Nyasaye wuwo Omulesi, mbu shibalasuubila tawe okhula bakhukhole ewe okhuba awubabusilia khukalia kabakabukhanangamwo, mana bakhaye okhulola obusiro mumioyo chiabu khu kalia kobusiyie, Mana behotselesie muno

[66] Ne khubalomesinjia mbu; “mwiyire nohomba wuye mutsingo tsienyu, shibakhakholele bario halali batiti butswa mubo. Ne bakholanga akabachelelungwa bwakhabeele obulayi khubo nende eshimanyisio shiamani

[67] Ne awo khwakhabahelesiyie omurungo omukhongo okhurula khwifwe

[68] Ne khwakhabalunjisiye khunjila ingololofu

[69] Ni ulia uwulila Nyasaye nende Omurumwa wuwe, abo bali halala nende balia ba Nyasaye yeshilia tsimbabaasi mubarumwa nende abobwatoto nende Abaloli nende Abandu abalayi, Ne nobulayi buli burie okhuba halala nende Abandu abo

[70] Etso nitsimbabaasi tsia Nyasaye. Ne Nyasaye ni Omumanyi uyela

[71] Enywe abasuubila, mube meso! Ne murule mumukanda nohomba murule mwesi halala

[72] Ne aliwo mwinywe owulatong’a inyuma, ne nimunyoolwa namasila aboola mbu; “Nyasaye yakholele obulayi shembele ninabo tawe.”

[73] Ne nimunyoola tsimbabaasi tsia Nyasaye aboola mbu - bili shinga abuyanzi nibulali hakari wenyu ni naye tawe- “ abayie manayanga emba halala ninabo ndabura okhubura okhukhongo.”

[74] Kho mana khuye khunjila ya Nyasaye balia bakusinjia obulamu bwokhushialo, nende mwikulu ( Akhera.) Ne ukhuyana khunjila ya Nyasaye mana yerwe nohomba ashile, khwitsa okhumurunga omurungo omukhongo

[75] Muli murie amulakhupananga khunjila ya Nyasaye nende yabalia baranjilwe Abasatsa Nabakhasi nende Abana ababoolanga mbu : “Nyasaye wefu omulesi, khurusie mulukongo luno alwa Abandu balwo ni ababii, ne okhurerele Omuliindi okhurula khwiwe ne okhuhelesie Omuhabini urulanga khwiwe.”

[76] Balia abasuubila balwananga khunjila ya Nyasaye, ne balia abakhaya balwanilanga khunjila yobukori, kho lwane nende abetsa ba shetani. Toto abukaati bwa shetani nobuteshele

[77] Sholola balia baboolelwa mbu; “Yikalile mutile emikhono chienyu, ne mutile iswala ne murusie eshihanwa, Ne olwa balomesibwa okhupana, awo omukanda kundi mubo nikuria Abandu shinga okhuria Nyasaye, nohomba ukhuria okhukhongo muno. Mana nibaboola; “Nyasaye wefu shichila shina nokhunichilisia okhupana? Manyanga wakhakhusitiliyekhwo imbeli khubise bititi butswa endi. Boola : “omwikhoyo kwo khushialo nimututu butswa, ne mwikulu ni indayi muno khu ulia uria Nyasaye. Ne shimulikholelwa obubii kata obutiti shinga uluusi lwolufwa lweitende tawe

[78] Wosiwosi amuba lifwa lilibanyoola, kata nimuli mutsinzu tsiolukoba. Ne lilayi nilibanyoola baboola mbu, lino lirula khu Nyasaye. Ne libii nilibanyoola ni boboola mbu; “Lino lirula khwiwe.” Boola koosi karulananga nende Nyasaye. Ne bali nende shina Abandu bano kata shibakhaaba okhumanya amakhuwa tawe

[79] Lilayi likhuulile lirulana nende Nyasaye, Ne libii likhunyoola lirulana nende ewe omwene. Nafu khwakhuruma khubandu obe Omurumwa, Ne Nyasaye ni Omuloli uyela

[80] Ulia uwulila Omurumwa aba awuliile Nyasaye, ne ulia ukalukhana, efwe shikhwakhuruma mbu obe Omulindi wabu tawe

[81] Ne baboolanga mbu: “khuloonde” halali nibarula khwifwe omukanda mulala mubo kututanga eshilo kalia akakabukhane nende kababoolanga. Ne Nyasaye yandiikanga koosi ako akabatutanga eshilo. Baleshe ehale ne wisiche Nyasaye. Ne Nyasaye niye Omwisikwa uwuyela

[82] Koo shibaretsangakhwo mubwongo Ikurani ino tawe? Ne ibetsenga mbu shirula khu ulali Nyasaye tawe, bakhanyolelemwo obwawukhani obunji

[83] Ne likhuwa niliboolela liomulembe nohomba liokhurisia balitangasia. Ne baliyilanga khu Murumwa nende khubalia bali nende obunyali mubo, balia abalikhabanga bakhamanyile. Ne tsikhayanga okhuba tsimbabaasi tsia Nyasaye khwinywe nende obukoosia bubwe, mwakhalondele shetani halali batiti mwinywe butswa

[84] Kho lwana khunjila ya Nyasaye, ne shonichilisia tawe halali ewe omwene butswa. Ne ochelele Abasuubili. Nyasaye yetsa okhwikalila emielo chiabakhayi. Ne Nyasaye niye Omululu muno wokhukhuyana omululu muno weshinyasio

[85] Ulia ukhoonya obukhonyi obulayi ali nende omukabo kukwe muako, ne ulia okhoonya obukhonyi obubii naye ali nende omukabo kukwe muako. Ne Nyasaye ni Wobunyali nende Omumanyi wabuli eshindu

[86] Ne nimushesibwa amashesio kosikosi, mukalusie khu amakalusio amalayi komulembe kashilakhwo ako, nohomba mukalusiesa ako ako. Toto Nyasaye ni omubali wabuli eshindu

[87] Nyasaye, abulaho Nyasaye wundi ulali Ye tawe, toto alibakhun’gaasia inyanga yeyindukho elo libula obukanakani , Ne ni wina uboolanga obwatoto okhushila Nyasaye

[88] Mubeele murie okhuba emikanda chibili khumakhuwa akabeshikhabili, ne Nyasaye yabakabukhania shichila akabakhola? Koo, mwenya okhulola Omulunjifu owa Nyasaye yamubusilia mbu yamala okhukora? Ne wa Nyasaye yamala okhubusia mbu yamala okhukora oyo shonyala okhumulunjisia tawe

[89] Bekombanga mbu enywe mwakhakhayile shingalabo bakhaya, kho mube nashilala. Kho mulabakhola abetsa benyu mubo okhula bawuye shichila idini ya Nyasaye. Ne nibakhaya awo mubatile ne mubere wosiwosi wamubanyoola. Ne mulabakhola abetsa nohomba abakhonyi benyu tawe

[90] Halali balia abatilana nende Abandu bamuli nabo hakari wenyu indache, nohomba babetselanganeebilifubiabubilinendeobusiro okhupana ninenyu, nohomba okhupana nende Abandu babu. Ne Nyasaye yenyanga yakhabasaasiyekhwo bakhupana ninanyu, kho nibabawukhakho, bakhaye okhulwana ni nanyu, mana bamurebe omulembe, kho awo Nyasaye shabehelesia injila yokhupana ninabo tawe

[91] mulanyoola abandi benyanga mbu banyoole omulembe khwinywe nende kwa Abandu babu, Buli nibakalusibwa khu matemo bafwinyilwakho. Nenibalalekhana ninanyu tawe mana barera omulembe mana bekalile emikhono chiabu, mubatile mana mubere wosiwosi amubanyoola. Ne khu abo khwabahelesia ebifune bili habulafu

[92] Ne shibili khu Musuubili okhwira Omusubili wundi halali khukhwitsukhana. Ne ulia wira umusuubili khukhwitsukhana akhoyele anunule- Omurumwa Omusuubili, ne arusie eshihanwa bahelesie Abandu baye nohomba Abandu be bayinie eshihanwa (khukhuleshela). Ne nali mbu ni omundu wabasuku benyu, naye ni omusuubili, awo okhununula omurumwa omusubili. Ne ni ali owa Abandu bamuli ninabo indakano, awo omurungo kuhelesibwe Abandu baye. Ne Omurumwa omusubili ununulwe. Ne ulanyoola tawe, afunge emiesi chibili malondokhana, shichila ni okhusaba obuleshi khu Nyasaye ne Nyasaye ni Omumanyi Owamachesi muno

[93] Ne ulia wira Omusuubili katong’ane, omurungo kukwe ni omulilo alimenyamwo tsinyanga tsiosi, Ne Nyasaye yamusinyishila ne yamutsuba, ne yamurecheshela eshinyasio eshikhongo

[94] Enywe abasuubila, nimuchenda khunjila ya Nyasaye, munonelesie mube nobwatoto, Ne mulaboolela ulia ubashesinjia mbu; “ Ewe sholi omusuubili tawe, khulwokhwenya ukhunyoola obulayi bwobulamu bwokhushialo shino,” ne ewa Nyasaye khuli nende omwandu omunji (kwa ghanima). Endio nilwamwali enywe khale, mana Nyasaye nabaleshela. Kho munonelesie obulayi. Toto Nyasaye ali nende obumanyi khukamukholanga

[95] Shibali nashilala abasuubili balia bekhalanga butswa nibabula eshifune, nende balia balwananga khunjila ya Nyasaye omwandu kwabu nende emioyo chaibu. Nyasaye aninia hekulu balia bakhupananga nomwandu kwabu nende emioyo chiabu okhushila balia bekhalanga butswa. Kata kario Nyasaye nabalaka eshimenyo eshilayi , halali Nyasaye yawukhasia balia bakhupananga nende balia bekhalanga butswa no murungo omukhongo

[96] Ni obukhongo burulanga khuye, nende obulesheli nende tsimbabaasi. Ne Nyasaye ni omunji wobulesheli Owetsimbabaasi

[97] Toto Abamalaika baliboolela balia ababafwisinjia abakholela obubii emioyo chiabu, mbu: “Mwali murie?” nabo baliboola mbu:, “khwali kwasilwa khushialo.” Baliboolelwa; “eshialo shia Nyasaye sishiali nobwiyangu bwokhuwuya tawe?” Kho abo eshimenyo shiabu ni mumulilo (Jahanam, ) nako ni amakalushilo amabii muno

[98] halali balia abali abateshele mu Basatsa nende Abakhasi nende Abana ababula obunyali bwokhunyoola injila yokhuwuya

[99] Abo Nyasaye awundi alibaleshela, Ne Nyasaye ni omunji Wokhubeela Owobulesheli

[100] Ne ulia uwuya khulwa Nyasaye, alanyoola tsimbeka sinyinji muno tsiokhwilushila, tsiyangufu. Ne ularula munzu mumwe nawuya khulwa Nyasaye nende Omurumwa wuwe, mana lifwa limunyoole, oyo amalile okhutinyisia omurungo kukwe khu Nyasaye, Ne Nyasaye niye omulesheli owetsimbabaasi muno

[101] Ni nimuli khuluchendo khushialo, shinobubi khwinywe nimwimbikitia amalaamo (iswala) tawe, nimuriire mbu Abakhayi betsa okhubasandia. Toto Abakhayi ni Abasuku bahabulafu

[102] Nenoli ninabo (muliye) nobalaamia, omukanda mulala mubo kweme halala ninawe, nebatile abibanulwa biabu. Ne nibamala ukhusujuda khwabu bakalushe inyuma wenyu (balinde) ne omukanda kundi khwitse kubeele nikushili okhulaama, kulaane halala ninawe, nabo babe meso ne batile ebibanulwa biabu, (mukari mweisala) shichila abakhayi benya mbu mung’ang’ale nende ebibanulwa bienyu nende ebindu bienyu kho babenjilile mapwoka- lulala butswa. Ne shinobubii tawe khwinywe nimuba nimulola obusiro okhurulana nende ifula nohomba amalwale okhurusiayo ebibanulwa bienyu. Ne Mube meso, toto Nyasaye yarecheshela Abakhayi eshinyasio shietsisoni

[103] Ne nimumala ukhulaama mwitsulilenje Nyasaye meema nende nimwikhaale nende nimukonele. Ne nimunyoola omulembe mulumilile okhulaama, Toto okhulaama (iswala) khu basuubili ni eshilachilo shiarebwao khubise bienyekhaane

[104] Ne mulatofula okhulondelela Abandu (abasuku benyu) tawe. Nimuba nimunyolele okhusaalila kata boosi basaalilanga shingala musaalilanga. Nanyu mulindanga ewa Nyasaye akabalalindanga tawe. Ne Nyasaye niye Omumanyi Owamachesi muno

[105] Toto efwe khwakhwishilia eshitabu shino khubwatoto kho onyoole okhubusilia Abandu shingala Nyasaye yakhwechesia, Ne olaba wokhukomelela abakhobi tawe

[106] Ne saba Nyasaye eshileshelo. Toto Nyasaye ni wobulesheli owetsimbabaasi muno

[107] Ne olakomelela balia abakholelanga emioyo chabu obubii tawe. Toto Nyasaye shiyachama Omundu omukhobi Owetsimbi tawe

[108] Balolanga tsisoni shichila Abandu ne shibalolanga tsisoni shichila Nyasaye tawe, Naye Nyasaye yali halala ninabo (nabo nibakorerwe) olwa basanjilananga khumakhuwa kayalachama. Ne Nyasaye amanyile obulayi muno akamukholanga

[109] Mbao enywe bano mubakomelelanga khubulamu bwokhushialo khuno. Kho neni wina ulibakomelela khu Nyasaye inyanga yeyindukho, nohomba wina uliba Omuhabini wabu

[110] Ne ulia ukhola obubii nohomba yakholela Omwoyo kukwe obubii, mana asabe Nyasaye eshileshelo, alanyoola Nyasaye nali omulesheli Owetsimbabaasi muno

[111] Ne ulia okhola amabii, abayekholelanga omwene. Ne Nyasaye niye Omumanyi Owamachesi muno

[112] Ulia ukhola libii lititi nohomba likhongo mana achishile Omundu wundi, toto oyo aba achinjile ebionono nende tsimbii tsikhongo tsilolekha

[113] Nitsikhayanga okhuba tsimbabaasi tsia Nyasaye nende obukoosia bubwe omukanda mulala khubo kwasuubila okhukosia ewe, ne shibakosinjia tawe halali emioyo chiabu, nohomba shibanyala okhukhola liosi liosi tawe. Ne Nyasaye yakhwishilia eshitabu na machesi ne nakhwechesia akawali nolamanyile tawe. Ne tsimbabaasi tsia Nyasaye khwiwe ni tsinyinji muno

[114] Obulayi bubula mumaanji kabamonyanga halali basanjilananga okhurusia eshihanwa nohomba okhukhola amalayi nohomba ukhuraa halala abandu, mana ulakhola kano khukhwenya obuchami bwa Nyasaye khwitsa okhumuhelesia omurungo omukhongo

[115] Ne ulia ukhaya ako Murumwa namalile okhunyoola obulunjifu mana naloonda injila ilali yobusuubili, khwitsa okhumushukhasia ashukhanile omwene mana khumwinjisie mumulilo, Ne ni habundu abi muno wokhurebwa

[116] Toto Nyasaye shaleshelanga eshionono shiokhumutsokasia (okhumusanga) ninaye nende shiosishiosi tawe, halali aleshelanga kali hasi wa elo, khu ulia owayenya, ne utsokasia Nyasaye toto oyo aba akorere obukori obwahale muno

[117] Shibalaamanga shiosi tawe nibekhola okhulaama Nyasaye, halali eminyasaye chieshikhasi, ne shibalaamanga halali shetani omukhayi

[118] Nyasaye yamutsuba, mana naye (shetani) noboola mbu, “Toto esie nditsa okhubukula omukanda mubandu bo babe ebuleka wanje.”

[119] Ne toto nditsa okhubakosia nende okhubasubisia nende okhubalomesia shingala ndenya, mana betsa okhuteta amarwi ketsisolo, Ne nditsa okhubalomesia bakalukhanie obulonji bwa Nyasaye, Ne ukhola shetani okhuba omulindi wuwe owulali Nyasaye, awo aba asishile (atibile) okhusikha khwa habulafu

[120] (Shetani) abalakanga mana nabasubisia ne shasubisinja liosi liosi tawe halali obubeyi

[121] Abo limenyo liabu nimumulilo kwa jahanamu ne shibalinyoola ubaleshela tawe

[122] Ne balia abasuubila mana nibakhola ebikhole ebilayi khwitsa okhubenjisia mumikunda chiburanga hakari wachio emialo, ne balikhalamwo tsinyanga tsiosi. eyo niyo indache ya Nyasaye yobwatoto, Ne ni wina wobwatoto muno okhushila Nyasaye

[123] Okhwinjila mwikulu shikhuli khulwo khwikomba butswa khwenyu nohomba okhwikomba khwabalia bahebwa eshitabu tawe, ukhola amabii alirungwa khuko, ne shalinyoola omulindi nohomba omukhoonyi owulali Nyasaye tawe

[124] Ne ulia ukhola amalayi Omusatsa nohomba omukhasi naye nali Omusuubili, abo balinjila mwikulu ne shibalikholelwa kho obubii kata butiti tawe

[125] Ne ni wina omulayi mudini okhushila ulia wihotselesinjia obweni bubwe shichila Nyasaye naye nali owamalayi ne aloondanga emilukha chia Ibraheem, okhuba omusalamu owatoto, Ne Nyasaye yakhola Ibraheem okhuba Omulina wuwe

[126] Ne biosi ni bia Nyasaye bili mwikulu nende mushialo ne Nyasaye niye owabotokhana ebindu biosi pe

[127] Ne bakhurebanga okhulondokhana nende amakhuwa kabakhasi, boola mbu; “Nyasaye yetsa okhubaboolela bulaano buri, nende kamusomelungwa mushitabu aka Abana abafwilwa nende Abakhasi balia bamwalayelisinjia ebia balachilwa, ne mwikomba okhubateshia, nende balia 4. abateshele mubana. Ne mbu mukholele Abana abafwila obwatoto. Ne kamukhola mumalayi Nyasaye akamanyile muno

[128] Ne Omukhasi naria okhusukunwa nohomba Omusatsa wuwe okhukhaya okhumubukulamwo oluchendo, owo shinobubii okhukasia omulembe hakari wabu tawe, ne omulembe nomulayi, ne emioyo chialonjelwamwo obwimani nende obwikombi. Nenimukhola amalayi mana mwaria Nyasaye awo toto Nyasaye amanyile muno koosi kamukholanga

[129] Ne shimunyala okhukhola obuleng’aafu khubakhasi kata mukhole murie tawe, kho mulayeshela ebulaka ndala tawe, mwalekha owundi oyo owamulachama tawe shinga ulia wachikhwe niyeleela, ne nimukasia omulembe mana mwaria Nyasaye, toto Nyasaye ni omunji wobulesheli Owetsimbabaasi

[130] Ne nibakabukhana Nyasaye yetsa okhubahelesia buli shiamulala obunyali, Ne Nyasaye ni Omuyinda Owamachesi muno

[131] Ne ni bia Nyasaye biosi ebili mwikulu nende mushialo. Ne toto khwachelela balia abahebwa eshitabu imbeli wenyu, nende enywe mbu murie Nyasaye ne nimukhaya, manye mbu toto nibia Nyasaye biosi bili mwikulu nende mushialo, ne Nyasaye ni Omuyinda Owitsomibungwa muno

[132] Ni nibia Nyasaye ebili mwikulu nende khushialo, Ne Nyasaye ayela okhuba Omulindi wabuli omundu

[133] Ne niyenya nabarusiao enywe mwesi ne arera Abandu bandi abayiakha, Ne Nyasaye ni Omunyali wa ako

[134] Ulia wenya omurungo kwo khushialo, ewa Nyasaye kuliwo omurungo kwo khushialo nende mwikulu. Ne Nyasaye ni wokhuwulila nende wokhulola muno

[135] Enywe abasuubila, mube abokhwemelela obwatoto, abarusia obuloli shichila Nyasaye, kata nikali mbu nikhwinywe abeene, nohomba khubebusi benyu nohomba abekho benyu. Nenali omuyinda nohomba omumanani Nyasaye niye okhoyeshela muno hakari wabu , kho mulaloonda obwikombi mwalekha okhukhola obuleng’aafu tawe. Ne nimukorombania obuloli nohomba mwakhaya okhurusia obuloli Nyasaye yetsa okhubasandia, Ne Nyasaye amanyile kalia koosi kamukholanga

[136] Enywe abasuubila, suubile khu Nyasaye nende Omurumwa wuwe nende eshitabu shieshela Omurumwa wuwe, nende eshitabu shiayeshelia inyuma awo, Ne ulia ukhaya Nyasaye nende Abamalaika bebe nende ebitabu bibie, nende Abarumwa bebe, nende inyanga yeyindukho, toto yamala okhukora okhukora khwa ehale

[137] Toto balia basuubila mana nibakhaya mana nibasuubila mana nibakhaya mana nibameta obukhayi, Nyasaye Shiyali wokhubaleshela tawe, nohomba wokhubalunjisia injila

[138] Suubisia abeshikhabili mbu toto bali nende eshinyasio eshilulu

[139] Balia abakholanga Abakhayi okhuba abetsa babu nibalekha Abasuubili, ko benyanga mbu banyoole oluyali khubo, koo oluyali lwosi nilwa Nyasaye

[140] Naye yamala okhubeshilia mushitabu shino mbu; nimuwulila tsinyali tsia Nyasaye nitsilobwa mana nitsikholelwa omubayo, mulekhala ninabo tawe okhula bachake imbakha yiindi. Nimwikhala ninabo mulaba shinga bo. Toto Nyasaye alikhung’aasia Abeshikhabili nende Abakhayi boosi mumulilo

[141] Balia abalindanga mbu munyoole amasila, mana nimunyoola obushili burulanga wa Nyasaye baboola mbu; “shikhwabeele ninanyu.” Ne Abakhayi nibashilile 4. bababoolela mbu, “shikhwali halala ninanyu nikhubakhonyanga okhubekalila okhurulana nende Abasuubili.” Nyasaye alibusia hakari wenyu inyanga yeyindukho, ne Nyasaye shiyakhabahelesia Abakhayi injila yokhushila Abasuubili tawe

[142] Toto Abashikhabili bakaatinjia Nyasaye nebekatinjia abeene, ne nibeema okhwenya okhulaama, bema nibatofule, belolosinjia mubandu, Ne shibetsulilanga Nyasaye tawe halali hatiti

[143] Babeyabeyanga eyi khubasuubili nende eyi khubakhayi shibali eyi nohomba eyi tawe, Ne owa Nyasaye akosia shiyakhanyoola obulunjifu tawe

[144] Enywe balia abasuubila mulakhola abakhayi okhuba abalina benyu okhushila abasuubili tawe. Mwenyanga okhukholela Nyasaye abe nende eshifune shiabulafu khwinywe (mbu muli Abandu ababii)

[145] Toto abeshikhabili baliba mumulilo kwa hasi muno. Ne sholibanyoola nibali nende ubahabina tawe

[146] Halali balia abasaba eshileshelo mana nibekasia nibatila Nyasaye mana nibatswenula idini yabu shichila Nyasaye, Abo baliba halala nende Abasuubili, Ne Nyasaye alihelesia Abasuubili omurungo omukhongo

[147] Nyasaye shalabahelesia eshinyasio tawe nimumupila orio nende nimusuubila. Ne Nyasaye niye ufuchililanga orio ne niye uyimanyile muno

[148] Nyasaye shiyachama (omundu) okhurusia amakhuwa kokhuboola obubii (khubandu) halali khu ulia ukholelwe obubii. Ne Nyasaye niye omuwulili omumanyi muno

[149] Nimulolosia amalayi nohomba nimukafisa nohomba nimuleshela obubii(bwamukholelwe) Toto Nyasaye nomulesheli Omunyali muno

[150] Toto balia bakhayanga Nyasaye nende Abarumwa bebe, ne benyanga okhwawukhasia hakari wa Nyasaye nende Abarumwa bebe, ne baboolanga mbu khusuubile mukandi nekhukhaye akandi. Ne benyanga okhuloonda injila yahakari awo (shiniyeshisilamu nohomba shiniyeshikhayi tawe)

[151] Abo nibo Abakhayi batoto. Ne khwarecheshela abakhayi eshinyasio shietsisoni

[152] Ne balia basuubila Nyasaye nende Abarumwa bebe, mana nibakhaya okhureera obwawukhani khu mulala yesiyesi mubo, Abo khulibahelesia omurungo kwabu, ne Nyasaye ni omulesheli owetsimbabaasi muno

[153] Abandu bahebwa eshitabu (abayahudi) benyanga mbu eshitabu shibeeshele okhurula mwikulu. Ne toto benya khu Musa amakhongo kashila kano. Olwababoola mbu; “Khulolosie Nyasaye mang’alang’ala” mana likulu nilibopa khulwobukhayi bwabu. Mana nibakhola eshimosi (okhuba Nyasaye wabu) ebifune biefu biatoto nibimalile okhuboolela, mana nikhubaleshela ako nikhuhelesia Musa ebifune bili habulafu

[154] Ne nikhubachingulila olukulu hekulu wabu, khulwo okhukhola indakano ninabo (eyokhuloonda Itaurati) mana nikhubaboolela mbu, Injile mumuliango muno (okwa shamu) ni mwiname, khandi nikhubaboolela mbu, “Mularuma olwakho tawe (okhukhaya okhuwa oluyali) inyanga ya Jumamosi

[155] Ne (khwabahelesia eshinyasio) khulwo okhufunaka khwabu indakano nende okhukhaya khwabu abimanyisio bia Nyasaye nende okhwira khwabu Abarumwa khunjila ilali yatoto, nende okhuboola khwabu mbu; “ Emioyo chiefu chekalwa, ne shichekalwa tawe, halali Nyasaye yachiupakhwo eshimanyisio khulwa obukhayi bwabu, kho shibasuubilanga halali hatiti butswa

[156] Ne khulwa obukhayi bwabu nende 4. okhuchishila khwabu Mariam, ni obubeyi obukhongo

[157] Ne khulwa okhuboola khwabu mbu; “Efwe khwera omubakhwa Isah, Omwana wa Mariam Omurumwa wa Nyasaye” Ne shibamwira tawe nohomba shibamubamba tawe halali bakalukhanilibwa – Omundu wundi (bapara mbu niye Isah). Ne toto balia bakabukhana mumakhuwa kano bali mubukanakani. Ne babula obwatoto khulikhuwa elo. halali baloondanga butswa okhuparirisia. Ne toto shibamubamba tawe

[158] Halali Nyasaye yamuninia ewuwe, Ne Nyasaye ni wa amaani Owamachesi muno

[159] Ne abulao yesi yesi mubandu bahebwa eshitabu (Abayahudi nende Abakristo) halali basuubilanga Omurumwa Isah, lifwa nilishili okhumuulila mulala wabu. (Ne bilibula obukhala okhusuubila ebise ebo) Naye Isah aliba inyanga yeyindukho urusia obuloli khubo

[160] Khulwa obubii (bwabayahudi) bwabu khwabakania ebindu ebilayi abiabali nibachamilwa, nende khulwa okhwikalila khwabu Abandu khunjila ya Nyasaye

[161] Nende khulwa okhulia khwabu riba, nibali bakanibwa okhulia, nende okhulia khwabu emiandu chiabandu munjila imbii, Ne khwarecheshela abakhayi eshinyasio eshilulu

[162] Halali balia abeyibila obulayi mumebaalo mubo, nende Abasuubili, basuubilaanga akeweshilibwa nende akeshibwa imbeli wuwo, nende balia bakholanga eshinani khuswala, nende abayininja eshihanwa nende basuubilanga Nyasaye nende inyanga yeyindukho, abo khulibahelesia omurungo omukhongo

[163] Toto efwe khwakhurerera obufimbuli shingala khweshilia Nuhu nende Abarumwa bandi abamulondakhwo. nekhwafimbulila Ibrahim nende ismail nende Ishaq nende Yaqub nende olwibulwo lulwe. Nende Isah nende Ayub nende Yunus nende Haruni nende Suleiman nende Dawood nikhumuwelesia Izaburi

[164] Nende Abarumwa abakhwakhukanila amakhuwa kabu khale, nende Abarumwa bakhulakhukanila amakhuwa kabu. Ne Nyasaye nalomaloma nende Musa malomaloma

[165] Abarumwa abasuubisinjia (amakhuwa amalayi) nende bekanyilisinjia, kho Abandu bakhaye okhuba nende eshifune Abarumwa nibakharulao. Ne Nyasaye ni Owamani Owamachesi muno

[166] Halili Nyasaye nomuloli khukayakhwishiliakhwo, yakeeshia khubumanyi bubwe, ne Abamalaika boosi nabaloli, Ne Nyasaye ayela okhuba omuloli

[167] Toto balia abakhayanga, mana nibekalila Abandu khunjila ya Nyasaye, toto bamala okhukora obukori obwahale

[168] Toto balia abakhaya mana nibakhola obubii, Nyasaye shiyali ubaleshela nohomba ubalunjisia khunjila tawe

[169] Halali injila yomumulilo, omo balimenyamwo tsinyanga tsiosi. Ne ako ni amangu khu Nyasaye

[170] Enywe Abandu, toto Omurumwa yamala okhubetsela, khubwatoto okhurula khu Nyasaye Omulesiwenyu, khomusuubilebulaba obulayi khwinywe, Nenimukhaya netoto nibia Nyasaye ebili mwikulu nende mushialo, Ne Nyasaye nomumanyi owamachesi muno

[171] Enywe Abandu beshitabu, mulaburirisia eshichelo mudini yenyu tawe, ne mulaboola khu Nyasaye halali kobwatoto. Omubakhwa Isah Omwana wa Mariam ni Omurumwa wa Nyasaye ne (ni eshilonje shialongwa) Khulikhuwa lilie aliayayilila Mariam. Ne ni omwoyo okhurula khuye. Kho musuubile Nyasaye nende Abarumwa bebe. Ne 4. mulaboola bataru tawe, muleshe okhusuubila murio bulaba obulayi khwinywe. Toto Nyasaye ni Nyasaye mulala yenyene butswa. oluyali ni olulwe, mbu ali nende Omwana! Ni ebibie biosi bili mwikulu nende khushialo, Nyasaye ni Omulindi uyela

[172] Isah (Omubakhwa) shalilola obuteshele mumwoyo okhuba Omusumba wa Nyasaye tawe, nohomba Abamalaika abasitibwa ahambi , ne shibalilola obuteshele mumwoyo okhuba Abasumba ba Nyasaye mana bafuure, alibakhung’aasia boosi ewuwe

[173] Ne balia Abasuubila mana nibakhola ebikhole ebilayi, Yetsa okhubahelesia omurungo kwabu ne alibametela tsimbabaasi tsitsie. Ne balia balola obuteshele mana nibakhola obufuru, alibahelesia eshinyasio shiwumisinjia, ne shibalinyoola omwitsa nohomba omukhonyi yesi yesi tawe imbeli wa Nyasaye

[174] Enywe Abandu, ebifune toto biboolele okhurula khu Nyasaye wenyu, ne khwabeshilia obulafu bulolekha

[175] Ne balia abasuubila Mu Nyasaye mana nibatila obulayi, kho abo alibenjisia mutsimbabaasi tsitsie, ne alibalunjisia injila ingololofu

[176] Ne bakhureebanga , Boola: “ Nyasaye abebaalilaanga shingala mukhola ni kali mbu Omundu afwile nabula Omwana, ne ali nende omukhana wabu, kho omukhana oyo alanyoola inusu yomwandu kwa aleshele. Ne Omundu oyo alachelama omwandu kwa mukhana wabu, omukhana wabu nabula omwana, Ne nibali abakhana babili betsa okhunyoola tsitsulutsi tsibili khu mwandu kwa aleshele. Ne nibali Abana babu abeshisatsa nende abeshikhasi, awo omusatsa alanyoola emikabo chabakhasi babili. Nyasaye abenosilinjia mulanyoola okhukora tawe ne Nyasaye ni Omumanyi wa buli eshindu

[1] Enywe Abasuubila mukhole shinga mwalakana, musubulwa okhulia tsiosolo tsiebilenje bine halali tsilia etsia musomelungwa (tsiamwakanibwa). Ne shimuchamilwa okhuyima nimuli muhaji tawe. Toto Nyasaye abusinjia shinga yenya

[2] Enywe Abasuubila mulafunaka oluyali lwe ebimanyisio bie idini ya Nyasaye tawe nohomba omwesi kwoluyali tawe, nohomba oluyali lwetsisolo tsiyilungwa Makka okhusinzwa, nohomba ebietsisolo etso tsirebungwakho biokhwechesia mbu tsistia Makka, nohomba oluyali lwabalia basuubilanga okhutsia khunzu yoluyali, okhukoonya tsimbabaasi tsia Nyasaye nende obuchami bubwe. Ne nimwakharula mu Hijja yenyu mana muyime(nimwenya). Ne okhusila Abandu shichila babekalila okhuula khumusikiti kwo luyali, khulabakhola okhuba abafuru tawe, ne khoonyane mubulayi nende okhuria Nyasaye, ne mulakhoonyana mutsimbi nende mubusuku tawe. Ne murie Nyasaye Toto Nyasaye ni omululu weshinyasio

[3] Mwakanibwa okhulia Isolo ifwile nende amatsayi, nende inyama yeyimbitsi, nende shisinzilwe shilali okhubeela Nyasaye tawe, nende shifwile khulwokhwimika, nende shifwile khulwa okhupwa, nende shifwile khulwa okhukwa, nende shifwile khulwa okhufumurwa olwika , nende shieisolo yindi ilile shiafwa, halali nimunyoola okhushisinza nishishili okhufwa, ne khandi mukanibwa okhulia eshisinzilwe abakholelanga emilukhachilalichia Nyasaye. Neniamakayo khwinywe okhwenya okhumanya akefisile khunjila yobufumu. Etso tsioosi nitsimbii. Olwalelo abakhayi bafwa omwoyo mudini yenyu, kho mulabarie tawe, halali murie esie. Olwalelo emalile okhubakasilia idini yenyu nende okhubetsusilia tsimbabaasi tsianje, ne abachamile obusalamu okhuba idini yenyu. Ne ulia unichilisibwa (nende inzala,) obulali okhuhenga mumabii tawe, (nalia ebiakanibwa bino) abula obubii tawe Toto Nyasaye ni omunji wokhuleshela omunji wetsimbabaasi

[4] Bakhurebanga mbu nishina shia bafuchililwa. Boola mbu bachamilwa buli bilia ebilayi, nende ebiamwechesia tsisolo okhuyima nende amayoni akayimilwe. Mubechesinjia aka Nyasaye yabechesia, kho lie ashiatsibatilile ne mushisomele elira lia Nyasaye. Ne murie Nyasaye toto Nyasaye ni Omwangu wokhubala

[5] Olwalelo mufuchililwa ebilayi biosi. Ne ebiakhulia bia balia bahebwa eshitabu bifuchililwa khwinywe, ne ebilibwa bienyu bifuchililwa khubo. Ne mufuchililwa okhuteshia Abakhasi abalayi mubasuubili nende Abakhasi abalayi mubalia abahebwa eshitabu, nimwakhabahelesia omurungo kwabu, mwa boya ninabo nikka, obulakhola ninabo obwilasi nohomba okhubabikha tawe. Ne uloba okhusuubila toto oyo ebikhole bibie biakora naye mwikulu aliba mubandu abasikha

[6] Enywe abasuubila, ni mwema khulwokhulaama, mwosie obweni bwenyu nende emikhono chienyu okhula mukhong’oosi, ne mubakhe emirwe chienyu ne mwosie ebilenje bienyu okhula khubiponge. Ne nimuli nende Janaba mwisinje. Ne nimuli abalwale nohomba nimuli khuluchendo nohomba mulala wenyu narula mucho, nohomba nimwinjilaane nabakhasi mana nimukhaya okhunyoola amaatsi, kho musubilile okhwikhoonyela liloba lilafu, mubakhe obweni bwenyu nende emikhono chienyu. Nyasaye shiyachama okhubara mubunyakhani tawe, halali yenya okhubatswenula nende okhubamalisilia tsimbabaasi tsitsie khwinywe kho munyoole okhupa orio

[7] Ne yitsulile tsimbabaasi tsia Nyasaye khwinywe, nende indakano yiye yayalakana ninanyu. Olwa mwaboola mbu; “ khuwulile mana khuloondele, Ne murie Nyasaye, Toto Nyasaye yamanya muno akali mumioyo.”

[8] Enywe abasuubila, betsenje abemeleli bobwatoto khulwa Nyasaye, murusinjie omuloli buling’anile. Ne akhusilana nende abandu khulabakhola mwakhaya okhubakholela obuleng’aafu tawe. Khole obuleng’aafu endio nibisitinjia omundu okhuria Nyasaye. Ne murie Nyasaye, Toto Nyasaye alinende abumanyi khu koosi kamukholanga

[9] Nyasaye yalaka balia abasuubila mana nibakhola amalayi mbu balinyoola obulesheli nende omurungo omukhongo

[10] Ne balia bakhaya mana nibayingana khubimanyisio biefu, abo nibo Abandu bomumulilo

[11] Enywe abasuubila yitsulile tsimbabaasi tsia Nyasaye khwinywe, olwa Abandu basuubila okhuboosiakhwo emikhono chiabu, mana niyekalila emikhono chiabu okhuboolakhwo, Ne murie Nyasaye, ne abasuubili besiche Nyasaye butswa

[12] Ne toto Nyasaye yakhola indache nende Abana ba Israil(abayahudi).Ne nikhubarera mubo abemilisi ekhumi nababili, Mana Nyasaye naboola; “Toto esie endi halala ninanyu, nimulaama mana murusie eshihanwa, mana nimusuubila Abarumwa banje nende okhubakhoonya, mana mwiwosie Nyasaye likofi lilayi, toto ndalabaleshela amabii kenyu ne nditsa akhubenjisia mumikunda chiburangamwo emialo hakari wachio,kho ulia ulakhaya mwinywe nikhumalile okhukhola indakano ino toto alaba akorere injila eya habwene.”

[13] Mana khulwa – okhufunaka indache yabu, khwabatsuba mana nikhukhola emioyo chiabu okhuba emiumu (echilawulila amalayi) bakalukhaninjia amakhuwa habundu wako. Ne balekhanga ebuleka wabetsulisibwa. Ne olatsililila okhunyoola amakhuwa kobukalakala bwabu, halali batiti mubo. Mana baleshele ne olekhane ninabo. Toto Nyasaye yachama balia bakholanga amalayi

[14] Nende balia baboola mbu; “efwe khuli -abanaswara-(abakiristo) “ khwakhola indakano ninabo, halali nibalekha ebuleka ikhongo khu kalia akabetsulisibwa, mana nikhura hakari wabu obusuku nende okhuyinana okhula inyanga yeyindukho. Ne Nyasaye alibaboolela akabakholanga

[15] Enywe Abandu beshitabu, Omurumwa wefu yamala okhubetsela owubebaalilanga amanji akamwali nimwakafisa mushitabu, ne abaleshela amanji. Toto bumalile okhubeetsela obulafu okhurula khu Nyasaye nende eshitabu shinoosinjia mubwang’ang’u

[16] Nyasaye Alunjisinjiakhwo balia baloondanga obuchami bubwe khu tsinjila tsiomulembe, ne barusinjia mushiilima okhubayila mubulafu khubunyali bubwe, ne abalunjisia khunjila ingololofu

[17] Toto bamala okhukhaya balia baboola mbu: “Toto Nyasaye ni omubashe Isah Omwana wa Mariam,” Boola mbu; “niwina uliba nende shiosi shiosi imbeli wa Nyasaye niyenya okhusishia Omubashe Omwana wa Mariam nende nyinamwana nende biosi bili khushialo?” Ne obwami bwomwikulu nende khushialo nende ebili hakari wabio , nibwa Nyasaye, aloonganga shiayenya, ne Nyasaye ni omunyali wa bulu eshindu

[18] Ne abayahudi nende abakiristo baboola mbu; “efwe khuli Abana ba Nyasaye nende abahelwa bebe” Boola mbu “Ne shichila shina nabahelesinjia eshinyasio khulwetsimbii tsienyu?. Halali enywe mulisa Abandu mubayaloonga, Aleshela owayenya ne ahelesia eshinyasio wayenya. Ne ni bwa Nyasaye obwami bwomwikulu nende khushialo nende bili hakari wabio. Ne amakalushilo ni ewuwe butswa

[19] Enywe Abandu beshitabu, toto Omurumwa wefu yamala okhubeetsela, abeenosilie ebise biabarumwa bandi bawumao, muletsa okhuboola mbu; “Omwikanyilisi nohomba omubooli wamacheni amalayi shiyakhwitsila tawe” Toto yabetsela omulachilisi wamalayi omwikanjilisi, ne Nyasaye ni Omunyali wabuli eshindu

[20] Ne olwa Musa yaboolela Abandu bebe mbu; “ Enywe Abandu banje yitsulile tsimbabaasi tsia Nyasaye khwinywe, olwa yakhola Abarumwa mwinywe, nenabakhola abaami, mana nabahelesia akayalahesesiakhwo yesiyesi khushialo tawe

[21] Enywe Abandu banje, injile khushialo sholuyali eshia Nyasaye yabalachila, ne mulakalukha inyuma tawe, mwaba abokhusikha

[22] Baboola mbu; “Ewe Musa, eyo Abandu baliyo abamakhakha, Ne efwe shikhulenjilayo tawe okhuula baruleyo, nibarulayo toto efwe khulenjilayo

[23] Abandu babili mubalia abaria tsimbabaasi tsia Nyasaye khubo baboola mbu; “Mubenjilile mumuliango kuno, nimumala okhubenjilila awo toto enywe mulabashila, Ne mwisike Nyasaye toto nimuli Abasuubili.”

[24] Baboola; “Ewe Musa, efwe shikhulenjilamwo tawe nibashilimwo, kho tsia nende Nyasaye wuwo(mulwane) Mukhupane, efwe khuli hano khwikhaale.”

[25] Musa naboola mbu; “Nyasaye wanje esie embula obunyali halali esie omwene nende omusiani wefu, kho kabukhasia hakari wefu nende Abandu ababii

[26] Kho Nyasaye naboola mbu; “Mana bekalilwe omukunda oko khulwe emika amakhumi kane. Balayiyayiya eno nende eyi khushialo, Kho alabeelela shichila Abandu abamabii tawe.”

[27] Ne basoomele amakhuwa aka Abaana ba Adam khubwatoto. Olwa bahinia eshihanwa nishifuchililwa shia mulala wabu, ne shiowundi nishilafuchililwa tawe. Yaboola mbu; “Nditsa okhwira” Namukalusia mbu “Nyasaye afuchililanga abamuritsanga”

[28] “Niwitsa okhundakhwo omukhonokwo mbu unzira, esie shindalakhurakhwo omukhono kwanje okhukhwira tawe, esie eritsanga Nyasaye, Omulesi webindu biosi

[29] Esie ndenya ochinge tsimbi tsianje nende tsimbi tsitsio, ne khulwa ako obe mubandu bomumulilo. Ne oko niko omurungo kwa Abandu abamabii

[30] Mana omwoyo kukwe nikumuyila okhwira omusiani wabu, mana namwira, mana naba mubandu bokhusikha

[31] Awo Nyasaye narera likhokho, nilichaka okhukwota mwiloba kholimwechesie shinga ayabila omulambo kwomusiani wabu. Naboola mbu “abayie! Akhayilwe okhuba shinga likhokho lino, ndafunikha(ndayabila) omulambo kwomwana wafu” mana naba mubandu bokhwiyitsulisia

[32] Eshichila ako, nikhuhandichila Abana ba Israil mbu, “ulia ulera Omundu- eshikhaya Omundu oyo nalerere Omundu tawe-, nohomba okhukhola obutobela khushialo, alaba shinga wirire Abandu boosi, ne ulia wonokosia Omundu alishinga uwonokosiye Abandu boosi. Ne toto Abarumwa befu babeetsela nende ebifune bili habulafu. Mana abanji mubo imbeli wakano nibaba abeyisasia

[33] Kho omurungo kwa balia bakhupananga nende Nyasaye nende Omurumwa wuwe, nende okhukhola obubii khushialo, ni okhwirwa nohomba okhubambwa nohomba okhutetwa emikhono chiabu nende ebilenje buchikha, nohomba balondwe mushialo esho. Esho ni eshinyasio shiabu khushialo ne mwikulu balinyoola eshinyasio eshikhongo

[34] Halali balia betsa okhusaba eshileshelo nimushili okhubatila. Ne manye mbu Nyasaye ni Omunji wobulesheli nende Omunji wetsimbabaasi

[35] Enywe abasuubila, Murie Nyasaye ne mukonye injila yokhumuulilakhwo, ne mulwane shichila idini yiyie khomunyoole okhubura

[36] Toto balia bakhaya, babetsanga nende bili mushialo biosi nende ebindi shingabirio kho barusie, kho bakhaya okhunyoola eshinyasio inyanga yeyindukho shibakhachamilwe tawe, ne balinyoola eshinyasio shiwumisinjia

[37] Balienya okhurula mumulilo, halali shibalirulamwo tawe, ne baliba neshinyasio shie tsinyanga tsiosi

[38] Ne Omwifi Omusatsa nende Omwifi Omukhasi mtete imikhono chiabu, omurungo kwa kalia kabakhola, esho nisho eshinyasio shirula khu Nyasaye, ne Nyasaye ni Owamani Owamachesi muno

[39] Kho ulia usaba eshileshelo namalile okhwonoona khukhwe mana nakaasa, Toto Nyasaye alamuleshela, toto Nyasaye ni omulesheli owetsimbambaasi muno

[40] Koo, shomanyile mbu toto Nyasaye ali nende obwaami bwomwikulu nende khushialo ahelesinjia eshinyasio owayenya, ne aleshelanga owayenya. Ne Nyasaye ni Omunyali wabuli eshindu

[41] Ewe Omurumwa, balakhuyiendia balia belushilanga obukhayi, mubalia baboolanga nende eminwa chiabu mbu; “khusuubile” ne emioyo chiabu nichishili okhusuubila. Nende mubayahudi betsanga okhuwulilisia akoboola, khobaboole obubeyi, abetsanga okhukhuwulilisia khulwa okhuusilia Abandu bandi balanyala okhuulila. Bakalukhaninjia amakhuwa okhurula habundu wako. Baboolanga mbu; “nimulahebwa kano mukatiile, ne nimuhebwa mwichunge. Ne owa Nyasaye yenyela amatemo shiwakhanyala okhumuwa shiosishiso imbeli wa Nyasaye tawe. Abo nibo ba Nyasaye alenya okhwosia emioyo chiabu tawe. Bali nende eshinyasio khushialo, ne mwikulu baliba nende eshinyasio eshikhongo

[42] Abawulilisinjia obubeyi, abalitsianga ebiakanibwa, mana nibakhwitsila, babusilie hakari wabu nohomba olekhane ninabo, Ne nolekhana ninabo, bo shibalakhukhola shiosishiosi tawe. Ne Nobabusilia, babusilie khubuleng’aafu. Toto Nyasaye yachama Abandu abaleng’aafu

[43] Ne bakhukholanga barie ewe okhuba ubabusilia, nabo bali nende Itaurati, Ilimwo amalako ka Nyasaye. Mana bakalukhananga imbeli wako. Ne abo shibali bokhusuubila tawe

[44] Toto khweshia Itaurati ilimwo obulunjifu nende obulafu, Eya Abarumwa babusilinjakhwo balia abasuubila, Abayahudi, nende Abasirasoti nende Abasomi ne eshichila benyekha okhuliinda eshitabu shia Nyasaye. Mana nibaba abaloli khu shio. Kho mularia Abandu tawe, halali murie esie. Ne mulakalukhania tsinyaali tsianje khu bukusi obutiti tawe. Ne balia balabusinjia okhwikhoonyela aka Nyasaye yeshia tawe, abo nibo Abakhayi

[45] Ne omo khwabahandichila mbu, Omundu khu mundu, imoni khu imoni, eliulu khuliulu, eshirwi khushirwi, elino khulino, ne ulia uwumisia owashie akholelwe imoongo. (kisasi) Ne ulia uleshela shilaba eshihanwa khuye. Kho balia balabusinjia nende aka Nyasaye yeshia tawe abo nibo ababii

[46] Mana nikhubalondiakhwo Isah Omwana wa Mariam okhutinyisia kalia kali inyuma wuwe, muTaurati, ne nikhumuhelesia Injili ilimwo obulunjifu nende obulafu ifuchilisaninjia nende akaliwo muTaurati, obulunjifu nende amachelo khubalia abaria Nyasaye

[47] Ne Abandu beinjili babusie okhulondokhana nende ka Nyasaye yeshiamwo (muinjili). Ne balia balabusiinjia khuka Nyasaye yeshia, abo nibo Ababii

[48] Ne khwakhwishilia eshitabu khubwatoto, shifuchilisania nende ebitabu biolinabio bieyinyuma, kho babusilie nende ka- Nyasaye yeshia ne olaloonda okhwenya khwabu tawe, nolekha abwatoto bwakhwitsila. Ne buli mwinywe khwabakholela amalako nende injila, Ne Nyasaye yenyanga yakhabakholele okhuba omukanda mulala, halali kho abateme khu kalia akabahelesiye, kho ranjilisie amalayi, Ewa Nyasaye ni amulikalukha mwesi, ne alibaboolela akamwakabukhanilangamwo

[49] Ne obabusilie khuka- Nyasaye yeshia, ne olaloonda obwikombi bwabu tawe, Ne obe meso nabo, balakhukalukhania khu kalia ka Nyasaye yakhwishilia tawe, ne nibakhaya manya mbu Nyasaye yenya okhuboosilia eshinyasio khulwe tsimbii tsiabu tsindi, Ne toto Abandu abanji ni ababii

[50] Koo benyanga akhubusilibwa khweshiilima? Ne niwina ubusinjia obulayi okhushila Nyasaye, khu Abandu bali nende obusuubili bwatoto

[51] Enywe Abasuubili mulakhola Abayahudi nende Abakristo okhuba abetsa ( ba mbusia ngonie) tawe, abene khubene ni abetsa, ne ubakhola abetsa, oyo aba alininabo halala, Toto Nyasaye shalunjisinjia Abandu ababii tawe

[52] Ne olalola balia bali nende obulwale mumioyo chiabu babelushilanga nibaboola mbu efwe khuritsanga okhunyoolwa nomubotokhano. Ne Nyasaye yetsa okhurera obufunguli nohomba likhuwa okhurula ewuwe, ne batong’e nende akabafisa mumioyo chiabu nibeyitsulisia

[53] Ne Abasuubili baliboola mbu; “Koo bano shinibo betsuba khulira lia Nyasaye, ebitsubo biabu ebiamani, mbu bo balininanyu halala?” Ebikhole biabu biabiyibwa mana nibaba mubandu abasikha

[54] Enywe abasuubila, owulalekha mwinywe idini yiyie, ahambi ano Nyasaye alarera Abandu balia abayachama nabo bamuchama, abehotselefu khubasuubili, abamani khubakhayi, balwananga khunjila ya Nyasaye shibaritsanga obutulani bwomutuli yesiyesi tawe, Etso nitsimbabaasi tsia Nyasaye, ahelesinjia owayenya, ne Nyasaye ni Omubangufu Omumanyi muno

[55] Toto omulina wenyu (wambusia ngonie) ni Nyasaye; nende Omurumwa wuwe, nende Abasuubila balumililanga okhuswalia, ne barusinjia eshihanwa nabo beenamanga (nibarukuwa)

[56] Ne ulakhola obulina (obwitsa) Nyasaye nende Omurumwa wuwe nende balia Abasuubila, Toto omukanda kwa Nyasaye niko kulashila

[57] Enywe abasuubila, mulakhola abetsa balia abakholela eshicharo nende omubayo idini yenyu tawe, Mubalia bahebwa eshitabu imbeli wenyu nende Abakhayi, Ne Murie Nyasaye nimuli mbu mwasuubila

[58] Ne nimulanga khu swala, bakhola eshicharonendeomubayo, Endionilwokhuba mbu ni Abandu balekhonyelanga obwongo tawe

[59] Boola; “Enywe Abandu beshitabu, koo mukhulolanga nende tsimbi mbu khulwokhuba khwasubila Nyasaye nende kalia akakhweshilibwa nende kalia akeshibwa khale, ne abanji mwinywe muli ababii

[60] Boola; Koo! Ebaboolelekhwo ulia uli nende omurungo omubii muno imbeli wa Nyasaye? Nibalia aba Nyasaye yalama mana nabasinyishila ne nakhola abandi mubo okhuba amashene nende tsimbiitsi, mana nibalaama shetani, Abo nibo baliba nende habundu abii nenibo abakora muno khu injila yatoto

[61] Ne nibabetsela(abeshikhabili) baboola mbu khwasuubila, ne nibali mbu babetsele nende obukhayi bwabu, ne barulile ninabo. Ne Nyasaye amanyile koosi akabafisanga

[62] Ne Olalola abanji mubo belushilanga(okhukhola) tsimbii nende obusuku nende okhulia khwabu ebiakanwa, Toto ni amabii muno akabakholanga ako

[63] Shichila shina Abasomesia babu nende abasomi babu shibabakaninjiakhwo amakhuwa kabu ketsimbii nende okhulia khwabu ebiakanwa? Toto ni amabii muno akabakholanga ako

[64] Ne Abayahudi baboola mbu “omukhono kwa Nyasaye kwefumba” Emikhono chiabu nicho chiefumba. Ne batsubwa shichila akababoola ako. Halali emikhono chia Nyasaye nemifumbule, arusiinjia shingala yenya. Ne toto kalia akeshibwa khwiwe okhurula khu Nyasaye wuwo kalametela abanji mubo obusuku nende obukhayi. Ne khwabarereraho obusuku nende isila hakari wabu okhula inyanga yeyindukho. Buli nibahafia omulilo kweliyie Nyasaye akusuminjia. Ne bakholanga eshinani okhurera obutobela nende isasia khushialo, Ne Nyasaye shiyachama Abandu abasasinjia tawe

[65] Abandu beshitabu basuubilanga mana baria Nyasaye, khwakhabaleshele tsimbii tsiabu, Ne khwakhabenjisiye mumikunda chilimwo obwokholo

[66] Ne toto bemiinjia Itaurati nende Injili nende akeshibwa khubo okhurula khu Nyasaye wabu, bakhalile okhurula hekulu wabu nende hasi wamakulu kabu. Ne baliwo mubo batilanga injila indayi. Halali abanji mubo akabakholanga ni amabii muno

[67] Ewe Omurumwa, yusia akaweshilibwa okhurula khu Nyasaye wuwo, Ne nolakhola tawe olaba oshili okhusia oburume bubwe. Ne Nyasaye alakhulinda nende (Obusuku- bwa) Abandu. Toto Nyasaye shalunjisinjia Abandu abakhayi tawe

[68] Boola; Enywe Abandu beshitabu, shimuli khushiosi shiosi tawe okhuula mwemie, Itaurati nende Injili, nende kano akeshibwa khwinywe okhurula khu Nyasaye wenyu. Ne toto kalia akeshibwa khwiwe okhurula khu Nyasaye wuwo, kalametela abanji mubo abulobi nende obukhayi. Kho olabeelele okhurulana nende Abandu abakhayi tawe

[69] Toto balia basuubila nende Abayahudi nende masabii (abalaami betsinginingini) nende Abakiristo, abasuubila Nyasaye nende Inyanga yeyindukho mana nibakhola ebikhole ebilayi, shibaliba nende oburi nohomba shibalibeelela tawe

[70] Toto khwabukula indache nende Abana ba Israili, mana nikhubarumila Abarumwa, Buli shinga Omurumwa yabetselaanga nende akemioyo chiabu chilenya tawe, omukanda mubo kwabakhola okhuba ababeyi ne omukanda kundi kwabeeranga

[71] Nebaparanga mbu amatemo shikalirulila tawe, mana nibawofula nibeekala amarwi mana Nyasaye nabaleshela. Mana Khandi nibawofula nibekala amarwi abanji mubo, ne Nyasaye alolanga kabakholanga

[72] Toto bamala okhukora mubukhayi balia ababoola mbu Isah- omubakhwa Omwana wa Mariam ni Nyasaye. Omubakhwa yaboola mbu; ‘‘Enywe Abana ba Israili mulaame Nyasaye Omulesi wanje nende Omulesi wenyu, Toto ulia otsokaasia Nyasaye, yamala okhwimwa mwikulu ne eshimenyo shiaye ni mumulilo, ne ababii shibalinyoola ubakhoonya tawe.’’

[73] Toto bamala okhukhaya balia baboola mbu; ‘‘Nyasaye ni mulala mubataru,’’ Ne abulao Nyasaye halali Nyasaye mulala. Ne nibalalekha akababoolanga ako tawe, toto balinyoola eshinyasio eshikhongo

[74] Ne shibakhakalushile Nyasaye bamusaba obulesheli ne Nyasaye ni Omunji wobulesheli Omunji wetsimbabaasi

[75] Ne Shiyali Omubakhwa Omwana wa Mariam halali Omurumwa butswa , bamala okhubura imbeli wuwe Abarumwa, ne mama wuwe ni owatoto, balitsanga ebilibwa , lola shingala khubeebalilanga tsinyaali, mana henga shingala bakalukhaninjia. (okhuloba obwatoto)

[76] Boola; “Mulamanga abalali Nyasaye abubula okhubakhola shiosi shiosi noho okhubakhoonya tawe, Ne Nyasaye ni Omuwulili Omumanyi muno

[77] Boola; “enywe Abandu beshitabu, mulaburirisia eshichelo mudini yenyu nibulali obwatoto tawe, ne mulaloonda obwikombi bwabandu tawe, balia bamala okhukora okhurula khale, mana nibakosia abanji ne nibakora okhurula khunjila eya toto.”

[78] Batsubwa balia abakhaya mubana ba Israil khululimi lwa Dawood nende lwa Isah Omwana wa Mariam, endio nilwokhuba mbu baloba ne mbubaburirisinjia eshichelo

[79] Shibakananinjia amakhuwa amabii kabakholanga tawe. Ni obubii bufwana burie khukabakholanga kano

[80] Alabalola abanji mubo (abayahudi) bakholanga obwitsa nende abakhayi (beshiarabu). Ne amabii muno akabaranjilisilia emioyo chiabu. Toto Nyasaye yabasinyishila, ne baliba mushinyasio tsinyanga tsiosi

[81] Ne basuubilanga Nyasaye nende Omurumwa nende akeshibwa khuye, shi bakhabakholele abo okhuba abetsa tawe, Habula abanji mubo ni ababii

[82] olanyoola Abasuku abakhongo muno khubalia abasuubila ni Abayahudi nende balia abatsokaasi. Ne toto olanyoola balia bali ahambi nende abasuubila ni balia baboolanga mbu “efwe khuli abakiristo” endio nilwokhuba mbu mubo balimwo Abasomi nende abaria Nyasaye ne mbu bo shibelolanga tawe

[83] Ne nibawulila akeshibwa khumurumwa, olalola tsimoni tsiabu nitsipupuchila amasika, shichila obwatoto obwabawulile. Baboolanga mbu; “Nyasaye wefu, khusuubile kho khuhandike halala nende abaloli. (bobwatoto buno)

[84] Ne khuli khurie akhulasuubila Nyasaye, nende akakhwitsila mubwatoto, ne khusuubilanga mbu Nyasaye wefu alakhwinjisia mwikulu halala nende Abandu abalayi

[85] Kho Nyasaye alibarunga khukalia akababoola emikunda echemialo chiburanga hakari wachio , omo balikhalamwo tsinyanga tsiosi. Ne oko niko omurungo okwa balia bakholanga amalayi

[86] Nebalia abakhaya mana nibayingana khutsinyaali tsiefu, abo nibo Abandu bomumulilo

[87] Enywe abasuubila, mulabikalila ebilayi ebia Nyasaye yabafuchilila tawe, ne mularuuma olwakho tawe, toto Nyasaye shiyachama Abandu barumanga olwakho tawe

[88] Ne lie khubilia bia Nyasaye wenyu abakabiile ebiafuchililwa, ebilayi, ne murie Nyasaye awa enywe musuubilanga

[89] Nyasaye shababukulilanga khubitsubo bienyu biobusilu tawe, halali alabatila khubitsubo ebia mwetsuba abia mwechomela obulayi, Kho omurungo kwe shitsubo esho, ni okhulisia Abamanani ekhumi, khubiakhulia bia mulisinjia Abandu benyu nohomba okhubafwala, nohomba okhulekha Omurumwa; Ne ulia ulanyoola ako tawe, afunge tsinyanga tsitaru. Kuno niko omurungo kwebitsubo bienyu ni mwitsuba. Ne mulinde ebitsubo bienyu. Endio nilwa Nyasaye abenoosilinjia tsinyaali tsitsie kho munyoole okhupa orio

[90] Enywe abasuubila toto obumesi nende isimbi, nende okhulaama ulali Nyasaye 5. nende okhulinga khwobulakusi, ni eshifwolo, nemilimo cha shetani, kho mube ehale ninacho, kho munyoole okhubura

[91] Toto shetani yenya okhubarerera obusuku nende obusilani hakari wenyu shichila obumesi nende isimbi ne yenya okhubekalila okhwitsulila Nyasaye nende okhulaama. kho koo enywe mwitsa okhukalekha

[92] Ne muwulile Nyasaye ne muwulile Omurumwa ne mube meso, ne nimukhaya manye mbu Omurumwa akeke ni okhuusia bustwa oburumwa buli habulafu

[93] Shinobubii khubalia abasuubila mana nibakhola amalayi, khubilia ebiabalia, nibaria Nyasaye nibasuubila mana nibakhola amalayi, mana nibaria Nyasaye, mana khandi nibasuubila, mana nibaria Nyasaye mana nibakhola amalayi, Ne Nyasaye yayanza abakholi abamalayi

[94] Enywe abasuubila Nyasaye alabatema nende tsisolo tsindi tsiokhuyimwa, etsie emikhono chienyu nende amafumo kenyu kolangakhwo, kho Nyasaye yechesie mbu niwina owamuria kata nalamulolanga. Kho ulia ularuma eshichelo khu kamuboolelwa kano, alanyoola eshinyasio shiwumisinjia

[95] Enywe abasuubila muleera ebiyimwa nimuli muharam (muhija nohomba umra) tawe. Ne ulia ulera katong’ane omurungo kwe kulaba okhusinza shinga eshayera esho, mutsisolo tsirukungwa shingala balabusia abaleng’aafu babili mwinywe, isolo eyo iyilwa khu kaaba, (asinze eyo mana ikabilwe abatakha). Nohomba arusie omurungo kwo khulisia abamanani, Nohomba afunge, kho apile obubii bwelikhuwa elo. Nyasaye yamala okhuleshela akabura, Halali ulakalushila Nyasaye alamuwa eshinyasio, Ne Nyasaye niye owa amani owuhananga eshinyasio

[96] Ne mwafuchililwa ebiyimo bwo munyanza ebiakhulia biayo nibo omwikhoyo kwenyu, nende abali khuluchendo. Ne mukanibwa ebiyimo biokhulukongo ngala mulaba muhaji noho mu-umra. Ne murie Nyasaye, ulia owa mulikhung’asibwa ewuwe

[97] Nyasaye yakhola Al-kaaba inzu yoluyali okhuba eshiemelelo khubulamu bwa Abandu, nende emiesi echioluyali, nende okhuyila emiruko Makka (khulwokhusinzwa) nende okhuiboya ebiuma, koosi ako ni khulwa okhukasia obulamu bwa Abandu. Endio khomumanye mbu toto Nyasaye yamanya kali mwikulu nende mushialo, ne toto Nyasaye khubuli eshindu ni Omumanyi muno

[98] Manye mbu toto Nyasaye ni Omululu weshinyasio, Ne toto Nyasaye ni Omunji wobulesheli owestimbabaasi

[99] Ne shikali khumurumwa tawe halali okhusia butswa, Ne Nyasaye amanyile kamuretsangahabulafunendeakamufisanga

[100] Boola; shibali nashilala ebibii nende abalayi tawe, kata obunji bwebibii nibuchamisia kho murie Nyasaye enywe abamachesi, khomunyoole okhubura

[101] Enywe abasuubila mulareeba amakhuwa akamwitsa okhuboolelwa kalabasinyisia. Ne nimulakareba Ikurani nishili niyikhanga mwitsa okhwinosibwa. Nyasaye alesheele ako. Nyasaye ni Omunji wobulesheli Omwihotselefu muno

[102] Abandu baliho enywe nimushili bareeba mana nibaba abokhukakhaya

[103] Nyasaye shiyarakho amakanio kosi kosi khu Bahira(ingamia itetungwa eshirwi niyibule abana barano wokhumwisho abe weshisatsa.) nohomba saiba(ingamia iyebungwa abanyasaye omundu nahonokoshe mumatinyu) nohomba wasila( ingamia ihebungwa abanyasaye omundu niyibule omwana wa ambeli weshikhasi nende ulondakho weshikhasi) 5. nohomba hami ( ni ingamia isatsia ilaninumgwakho tawe nikali mbu yilusiye omwana wo omwana wayio), halali abakhayi bachishilanga Nyasaye obubeyi, ne abanji mubo shibekhonyelanga obwongo tawe

[104] Ne nibaboolelwa mbu itse khu mabusio kwa Nyasaye nende Omurumwa wuwe ni baboola mbu; “kakhuyela kalia aka khwanyoola nako bapapa befu;” koo kata nikali mbu basaabwe nibalali bamanya shiosi shiosi tawe ne nibalali balunjikha tawe. (balabalonda butswa)

[105] Enywe abasuubila, mwiliinde abene, Abakori balabawumisia tawe nimumalile okhulunjikha. Ewa Nyasaye ni amulikalukha mwesi, ne alibaboolela akamwakholanga

[106] Enywe abasuubila, mureo abaloli babili abaleng’afu mwinywe ebise biokhulaka lifwa niliulila mulala wenyu. Nende abandi balali mwinywe tawe; Olwa muba nimuli khuluchendo, mana amasila kelifwa nikaboolela. Mulabemia babili abo iswala niyakhawa, mana betsube mulira lia Nyasaye nimuba nimuli nende inganakani- (khu bulaame obo) “shikhubukulekhwo shiosi shiosi tawe, kata nali Omundu wefu, ne shikhulafisa obuloli bwa Nyasaye tawe, toto nikhukhola khurio khulaba mubandu abamabii

[107] Ne nimumanya mbu babili abo baboolele obubeyi, babili bandi mubalia abaliwo omufu nalaamanga, baleema mana bestube khulira lia Nyasaye mana boboole mbu; “obuloli bwefu nibwahabwene okhushila obuloli bwabu, ne efwe shikhukholele obubii tawe, nikali kario khulaba mubandu ababii

[108] Kalabakhola bokhurusia obuloli obwatoto nohomba kalabakhola barie ebitsubo okhurerwa, nibakhamala okhwitsuba khwabu, ne murie Nyasaye nemuwulile, Ne Nyasaye shalunjisinjia abakhayi abalobi tawe

[109] Etsulile inyangaya Nyasayealikhung’asia Abarumwa, mana ababoolele mbu; “Nishina shiabamukalusia?” Abarumwa baliboola mbu; “khubula obumanyi – Toto ewe newe wamanya amakhuwa kefisile”

[110] Ne olwa Nyasaye aliboola mbu “Ewe Isah omwana wa Mariam, istulila tsimbabaasi tsianje khwiwe, nende khu mamawuwo, olwa ndakhukhonya nende roho omulafu, nosunga nende Abandu noshili omwana omutoro, nende mubukofu, ne yitsulila olwa ndakhwechesia okhuhandika mana nekhwa amachesi nende Itaurati nende Injili, Ne itsulila olwa walonga khuliloba amayoni mana nikaba amayoni khumunwa kwanje, Ne olwa wahonia abawofu nende abanachele khumunwa kwanje, ne olwa walamusia abafu khumunwa kwanje, Ne olwa ndakhwikalila Abana ba Israili(okhukhukhola amabii) Olwa wabeetsela nende ebifune biahabwene, Balia abakhayi mubo nibaboola mbu; “Buno ni obulosi obwahabulafu”

[111] Ne olwa ndafumbulila abechi bo mbu; “Musuubile esie nende Omurumwa wanje uno, Isah” Mana nibaboola mbu; “Khusuubile ne obe omuloli mbu efwe khuli abehotselefu.”

[112] Ne abechibo baboola mbu; “Ewe Isah omwana wa Mariam, Nyasaye wuwo anyala okhwishilia eshiakhulia okhurula mwikulu? Isah naboola mbu; “Murie Nyasaye nimuli Abasubili batoto.”

[113] Baboola mbu; Khwenya okhuliakhwo khushio, kho emioyo chiefu chihotselesie nekhumanye mbu okhuboolele okatoto mana khube mubalia abaloli

[114] Isah Omwana wa Mariam naboola; “Ewe Nyasaye omulesi wefu, khwishilie eshiakhulia okhurula mwikulu, kho kube omwikhoyo, khubokhuranga nende khubeinyuma, nende eshimanyisio okhurula khiwe, ne okhuwelesie omukabo ne ewe newe omukabi omulayi muno

[115] Nyasaye naboola; “ Esie nditsa okhubeshilia , ne owulakhaya niyakhalola kano, nditsa okhumuhelesia eshinyasio shieshili okhuhelesiakhwo yesiyesi khushialo

[116] Ne olwa Nyasaye yaboola mbu; “Ewe Isah Omwana wa Mariam newe waboolela Abandu mbu bakhukhole ewe nende mamawuwo Nyasaye babili owulali Nyasaye? Isahnaboola;“Oluyalinolulwo, watswenukha okhutsokaasibwa nende shiosi shiosi. Shikakhoyeela esie okhuboola lilali liatoto tawe, Nendi mbu ndaboola wakhamanyile, wamanya kali mushilifu shianje, nasi shemanyile kali mushilifu shishio tawe, Toto newe umanyanga amakhuwa kefisile

[117] “Shindababoolela liosiliosi tawe halali kalia kawaruma” Mulaame Nyasaye, Omulesi wanje nende Omulesi wenyu” Ne ndali omuloli wabu olwandali mubo, ne olwa wamalisilia ebise bianje, ewe noba omulindi wabu, nawe oli Omuloli wabuli eshindu

[118] “Nekali mbu witsa okhubawa eshinyasio ni Abandu bao, ne nobaleshela, toto ewe newe Owamani Owamachesi muno

[119] Nyasaye aliboola mbu; “Ino niyo inyanga eya baboolanga obwatoto balikhoonywa nende abwatoto bwabu; Baliba nende emikunda chiburangamwo emialo, balimenyamwo tsinyanga tsiosi, Nyasaye ababeelele tsimbabaasi, nabo bamuchamile, okho nikho okhubura okhukhongo

[120] Ni obwa Nyasaye obwami bwo mwikulu nende khushialo, nende bilimwo, naye ni Omunyali wa buli eshindu

[1] Oluyali lwoosi nilwa Nyasaye owalonga likulu nende eshialo, mana nakasia eshilima nende obulafu. Mana abakhaya Nyasaye wabu baleng’aasinjia (owulali Nyasaye tawe)

[2] Ye niye owabalonga okhurula khwiloba, mana naraho ebise,(bie okhufwa khwa buli eshilonje). Ebise ebo biayaraho ye ni umanyile. Mana khandi enywe halala nende kano kosi mukholanga obukanakani

[3] Ye niye Nyasaye owuli mwikulu nende mushialo, yamanya akomukari kenyu nende akelwanyi wenyu, ne amanyile akamukhabanga

[4] Ne eshifune shiosi shiosi shishibetselanga okhurula khu Nyasaye Omulesi wabu halali okhula bo bashikhaye

[5] Bamala okhuloba obwatoto olwa bwabetsela, balinyoola amakhuwa kalia akabakholelanga omubayo

[6] Shibalolangakhwo emikanda chinga echakhwasishia imbeli wabu, achakhwali khwachikasia khushialo okhushila shingala khwabakasia enywe, khwabeshilia ifula yokhutsililila, mana nikhukhola emialo okhubura hasi wabu, mana nikhubasishia khutsimbi tsiabu, ne nikhurera mushilenje shiabu Abandu bandi

[7] Ne khukhwishilinjia amahandiko khulukaratasi, mana bakatila mumikhono chiabu, toto balia abakhaya bakhaboolele mbu; “kano shini shiosi shiosi tawe halali ni obulosi buli habulafu.”

[8] Ne baboolanga mbu; “shichila shina naleshilibwa Malaika?” Ne khwishinjia malaika-(mana bakhaya) toto ukhusikha khwabu khwakhabusibwe, ne shibakhahelesibwe ebise tawe

[9] Ne khumukholanga (ye Omurumwa) okhuba Malaika, khwakhamukholele okhuba shinga Omundu, ne khwakhabakanakaniliye shingala kano kabakanakaninjia

[10] Netoto Abarumwa bali imbeli wuwo bakholelwa eshienyameno, mana nikabotokhana balia abakhola omubayo mubo kalia akabakholelanga eshienyameno

[11] Boola mbu ; “chende khushialo mana mulole indukho yabandu abayingani- yali irie?”

[12] Boola; “Nebiawina ebili mwikulu nende khushialo? Boola; “Ni bia Nyasaye” Yelachilisia Omwene okhubakholela tsimbabaasi, alibakhung’asia toto bwene inyanga yeyindukho, inyanga ibula obukanakani tawe, ne balia abasishia emioyo chiabu shibasuubilanga tawe

[13] Ne ebibie biosi ebiyenzelanga eshilo nende eshitere, naye niye umuwulili, omumanyi muno

[14] Boola; “Ekhole owulali Nyasaye okhuba Nyasaye, Omulonji welikulu nende eshialo, naye alisinjia shalisibungwa tawe, Boola mbu; “ Toto esie enomesibwe okhuba wokhuranga khubalia abasuubila, ne nembilwa mbu; “Olaba kata hatiti mubalia abatsokasinjia Nyasaye tawe.”

[15] Boola; “Esie eritsanga eshinyasio shieyinyanga ikhongo, nikali mbu eloba Nyasaye wanje.”

[16] Ne ulia ulirebwa indulo khushinyasio esho aliba ahelesibwe tsimbabaasi, ne okho nikho okhubura okhukhongo

[17] Ne Nyasaye nakhutila khububii abulao yesi yesi unyala okhuhonokosia tawe owulali ye, ne nakhutila khubulayi – (abulaho ukhuyiniakhwo owulali ye.) Naye ni Omunyali wabuli eshindu

[18] Naye niye Omushili (yaruka) Abandu bebe, naye niye Owamachesi owuli nende amakhuwa koosi

[19] Boola; okhubareba – “Nishindu shina, eshiobuloli bwashio ni obukali muno? Mana oboole; “Nyasaye – niye Omuloli wa hakari wefu ninanyu. Ne Ikurani ino yafumbulilwa esie kho ebekanyilisilie khuyo nende buli yesi owa yololela. Koo toto enywe muchamanga mbu baliho abanyasaye bandi halala nende Nyasaye?” Boola “Esie shenjama endio tawe” Boola; -khandi “Ye ni Nyasaye mulala butswa. Ne esie endi ehale muno nende ako akamutsokasinjia.”

[20] Balia abakhwahelesia eshitabu bamanya kano shingala bamanya Abana babu. Ne balia abereetsanga mukhusikha, nibalia abalasuubilanga tawe

[21] Ne niwina omubii muno oyo okhushila ulia uchishilanga Nyasaye obubeyi, nohomba ulia uchayanga ebifune bibie? Toto Abandu ababii shibalibura tawe

[22] Ne inyanga yakhulibabuusia boosi mana khubaboolele balia abatsokasia mbu “Bali hena abamwatsokasinjia benyu abamwelayilanga?”

[23] Ne shibalibula eliokhuboola tawe, mbu; “Toto Nyasaye wefu omulesi efwe shikhwali abatsokaasi tawe.”

[24] Henga shingala baboolanga obubeyi khubo abeene, nikabakora kalia akabachikhanga

[25] Ne bali mubo balia abakhuwulilisinjia, ne khwara ishikalilo mumioyo chiabu balamanya tawe, ne bali nende iwula mumarwi kabu. Ne nibalola buli ebimanyisio biefu shibabisubilanga tawe. Ne nibakhwitsila khulwa okhuyingasia, abakhayi baboolanga mbu; “Kano shini eshindu tawe, atsikhali butswa tsingano tsia khale.”

[26] Bakaaninjia Abandu okhuloonda kano, neboosi beretsanga ehale ninako, nabo shibasasinjia tawe halali emioyo chiabu abeene, nabo shibamanyile tawe

[27] Ne abalolanga (inyanga yeyindukho) olwabaliemibwa khumulilo, olwabaliboola mbu ; “abayie khukalusibungwa khushialo, shikhwakhayingasiye ebimanyisio bia Nyasaye wefu tawe, ne khwakhabele mubalia abasuubila.”

[28] Kamalile okhubaloleshela kalia akabafisanga khale, Ne bakalusibungwa bakhakalushile butswa okhukhola kalia akabakaanibwa, netoto bwene abo ni ababeyi butswa

[29] Nebaboola mbu; “Bubulao obulamu bundi halali obulamu bwefu bwokhushialo khuno, ne efwe shikhulilamusibwa tawe.”

[30] Ne olibalola inyanga yeyindukho, olwa baliemibwa imbeli wa Nyasaye wabu, mana baboolelwe mbu; “koo shini katoto kano? Nabobaliboolambu:“shichilashi, khwitsuba khulira lia Nyasaye wefu,(ni obwatoto).” Nyasaye Aliboola mbu; “kholaano pile eshinyasio shichila okhuyingana khwenyu khwamwayingananga.”

[31] Toto bamala okhusikha balia abakhaya mbu okhubukanana nende Nyasaye khubulao, okhuula shinga liabetsela lifwa mapwoka, mana nibaboola mbu; “oh manyanga khukalia aka khwalabukulilamwo oluchendo”. Ne balichinga emisiko chiabu khumikongo chiabu. Koo, ni amabii muno akabachinganga

[32] Ne obulamu bwokhushialo khuno shinishiosi shiosi tawe halali omubayo nende amakhuwa kabula mwo oluchendo. Ne inzu yo mwikulu ni indayi muno khubalia abaria Nyasaye, kho shimuparangakhwo tawe

[33] Toto khumanyile mbu akababoolanga kakhwetsanga eshibeela, abo shibayingasinjia ewe tawe, halali ababii abo bayingasinjia ebifune bia Nyasaye[. omwene alibarunga]

[34] Ne toto Abarumwa be imbeli wuwo bayingasibwa mana ni befwila khukabayingasibwa, ne basinyisibwa okhula shinga obuhabini bwefu bwaboolela ne obulao ukalula amakhuwa ka Nyasaye, ne toto wamala okhunyoola amacheni akabarumwa

[35] Ne nikali amakhongo khwiwe, okhwira ehale khwabu khuno kho noli nonyala okhukoonya injila ya hasi mwiloba nohomba ingasi wanina mwikulu okhubarerera amangalimwa, ne Nyasaye achamanga yakhabakhung’asiye khubulunjifu. Kho Olaba mubandu balamanyile tawe

[36] Abafuchililanga nibalia abawulilanga, Ne nandawulila (abalawulilanga) Nyasaye alibalamusia, mana ewuwe nabalikalukha

[37] Ne baboolanga mbu; “shichila shina shiyeshilibwa akamakana okhurula khu Nyasaye wuwe? Boola mbu; “toto Nyasaye alinende obunyali bwokhunzishilia akamakana” Halali abanji mubo shibamanyile tawe.”

[38] Ibulao isolo khushialo nohomba liyoni lipurukhanga nende tsimba tsibili, halali ni omukanda shingala enywe. Ne shikhwalekha shiosi shiosi okhubala mushitabu tawe. Ne ewa Nyasaye wabu niwo abalikhung’asibwa

[39] Ne balia abayingana khubimanyisio biefu ni Abatimbe, Abasilu bali mushiilima. Wa Nyasaye aleshele yakora abulao unyala okhumulunjisia, ne owayenya amuretsanga khunjila ingololofu

[40] Boola; “mumboolele eshinyasio shia Nyasaye nishiboolela nohomba ishinyasio shieyindukho nishiboolela- koo mulalanga owulali Nyasaye, toto nimuli abandu-aba habwene.”

[41] Halali niye butswa wamulisaba, naye alibarusiliayo- shiamwenyanga; shiamusabanga nachama, ne mulibilila abamwamutsokasinjia ninaye

[42] Ne toto khwaruma khu mikanda chiakhuranjilila mana nikhuchira khulumu nende khubutinyu khochinyoole okhuba imihotselefu

[43] Khulwashina nibalehotselesia, olwa eshinyasio shiefu shiaboolela halali emioyo chiabu chioma, mana shetani nabaronela akabakholanga

[44] Olwa bakoyiakoyia akabetsulisibungwa, khwabekulila emiliango chiabuli eshindu, okhula shingala basangalila akabahelesibwa, khwababukula masundusia, mana nibawesiakho omwoyo

[45] Mana emisi chiabandu bakhola amabii nichitetwa,(Nibarula khushialo)Ne oluyali lwosi ni lwa Nyasaye omulesi wa buli eshindu

[46] Boola; “Mumbolele, Nyasaye nabarusiakhwo tsimbulililo tsienyu, nende tsindolelo tsienyu. Mana nakhupa eshimanyisio khumioyo chienyu, ni wina wundi owulali Nyasaye unyala okhubakalusilia? Henga shingala khwinosinjia tsinyaali, mana nabo bakoyiakoyia

[47] Mumboolele “Nishibeetsela eshinyasio shia Nyasaye masundusia, nohomba malola, nibabu wina betsa okhusishibwa nibalali Abandu bakhola obubii.”

[48] Ne shikhurumanga Abarumwa tawe halali abokhulaka amalayi nende okhwikanyilisia. kho balia abasuubila mana nibaba abalayi shibaliba nende oburi nohomba shibalibeelela tawe

[49] Ne balia abayingana khutsinyaali tsiefu eshinyasio shilibatilakhwo khukalia akabononanga

[50] Boola; “Esie shebaboolelanga mbu endi nende ebiachi bia Nyasaye (ebelesie shiosishiosi shia mwenya) Nohomba mbu ndamanya akefisile, nohomba shebaboolela mbu esie endi Malaika tawe, Esie shenondanga halali kalia kefimbulilwe. Boola mbu; “koo omuwofu nende owetsimoni ulolanga bakhaba nashilala? Shimuparangakhwo tawe

[51] Ne bekanyilisilie(nende Ikuran ino) balia abaritsanga mbu balikhung’asibwa khu Nyasaye wabu, nibabula omukhonyi yesiyesi, halali Ye, nohomba owubasabila,(bekanyilisie orio) bakhaba bario banyoola okhuria (Nyasaye)

[52] Ne alatafia balia balaamanga Nyasaye wabu itsuli ningoloobe, khulwokhwenya obuchami bwe. Okhubalilwa khwabu shikhuli khwiwe tawe, nohomba okhubalilwa khwabu shikhuli khubo tawe, nobatafia olaba mubandu abamabii

[53] Ne endio nilwabakhwatema abeene khu beene. Khobaboole mbu; “bano nibo ba Nyasaye yakholela obulayi, mwifwe,” Koo 6. Nyasaye shiyamanya abamukhupilanga orio

[54] Ne nibakhwitsila balia abasuubilanga tsinyaali tsiefu, baboolele mbu; “omulembe kube ninenyu, Nyasaye wenyu yelachila tsimbabaasi, mbu ulia ulakhola mwinywe amabii khubusilu(obulamanya) mana asabe eshileshelo, mana akhole amalayi, mbu Nyasaye alamuleshela, toto ye ni weshileshelo, Owetsimbabaasi muno

[55] Ne endio nilwakhwinoosinjia tsinyaali, kho injila yobubii imanyikhane

[56] Boola; “esie ndakanibwa okhulaama bilia bia mulaamanga ebilali Nyasaye” Boola; “shenondanga obwikombi bwenyu tawe, awo ndalaba engorere ne shinditsa okhuba mubakololofu tawe

[57] Boola mbu; “Esie endi nende eshifune shilolekha okhurula khu Nyasaye wanje, Nanyu mukhayile nimuyingasia, kho esie embula eshinyasio shiamuyuyukhanilanga tawe, okhubusia khulisa khu- Nyasaye, Aboolanga akatoto, niye Omubusia Omulayi umalayo

[58] Boola; “Esie embetsanga nende kamuyuyukhanilanga ako, likhuwa liakhatetelwe hakari wanje ninenyu, Ne Nyasaye yamanya muno Abandu ababii

[59] Ne Nyasaye alinende tsifunguo tsia akefisile, abulawo watsimanya halali ye, Ne yamanya akali khulukongo nende munyanza, ne lisafu liosi liosi shilikhwitsanga tawe halali namanyile, nohomba inyuma mushiilima shieliloba, nohomba sishikwitsanga eshiamatsimatsi nohomba eshiumu halali shili mushitabu eshiretsanga habulafu buli likhuwa

[60] Naye niye owubafwisinjia ebise bieshilo(mundoolo) ne amanyile akamukholanga eshitere, Mana khandi abalamusinjia mwo, kho ebise bienyu ebiarebwao biule, Ne ni ewuwe butswa ni amulikalukha, ne alibaboolela akamwakholanga

[61] Ye niye Omushili owuli hekulu wabuli abasumba bebe boosi. Abarereranga Abamalaika ababikhanga(buli shiamukholanga). Okhula mulala wenyu niyolelwa nende lifwa, Abarumwa befu bamufwisinjia, nabo shibaleeminjia tawe

[62] Mana bakalusibwe khu- Nyasaye Omwami wabu watoto, koo obwami noburuchi nobubwe, naye ni omwangu wokhubala muno

[63] Boola; “niwina ubahonokosinjia mushiilima shiokhulukongo nende shiomunyanza? Mumusabanga mukhwihotselesia nende muburi, mbu; “toto nokhuhonokosia mukano khulakhupa orio ingali.”

[64] Boola; “Nyasaye abahonokosinjia mwako nende mubuli obutinyu, mana enywe khandi mumutsokasinjia”

[65] Boola; “Ye niye Omunyali wokhubarerera eshinyasio okhurula hekulu wenyu, nohomba okhurula hasi webilenje bienyu, nohomba abasalasie mube emikanda chilawulilisania, kho mulolosanie obufuru, henga shingala khwinoosinjia tsinyaali tsiefu khomunyoole okhumanya

[66] Ne Abandu bobo bakhuyingasia nayo nili eyatoto. Boola; “Esie shendi omulindi wenyu tawe”

[67] Buli amacheni kaboolwa(mukurani) muno kali nende ebise biako, ne ahambi ano mwitsa okhulola

[68] Ne nolola balia ababoolanga khutsinyali tsiefu nibatsifukula, obe ehale ninabo okhula shingala balachaka okhuboola amakhuwa kandi, ne shetani nakhwibilisia, niwitsulila olekhala halala nende Abandu ababii abo tawe

[69] Ne balia abaria Nyasaye babula elindi liosi liosi (khubandu abo) tawe halali obwitsulisio mbu bakhaba bario banyoola okhuria. (Nyasaye)

[70] Ne lekha balia abakhola idini yabu okhuba emibayo nende eshindu shibulamwo oluchendo, ne obulamu bwokhushialo nibubakatia. Kho betsulisie mbu omwoyo kuletsa okhusishibwa khukakwakhola. Omwoyo shikuliba nende omulindi nohomba ukusabila obulesheli tawe, imbeli wa Nyasaye, ne kata nikurunga shiosishiosi shiyela shirie shikulichamilwa tawe. Abo nibo basishibwa shichila akabakhola. Abo balinyoola eshinywebwa shia amatsi kayile paa nende eshinyasio shiwumisinjia, shichila okhuyingana khwabu

[71] Boola; “koo khulaame balia abalali Nyasaye, ababula obukhala bwosibwosi abalanyala okhubakhola shiosishiosi tawe, Ne khukalusibwe inyuma Nyasaye namalile okhulunjisia, khube bulala nende balia abashetani yakosia babeyabeyanga khushialo, bali nende abetsa, babalanganga khubulunjifu nibaboola mbu; “Itse eno khwifwe”, boola; “Obulunjifu bwa Nyasaye nibo obulunjifu, Ne khwalomesibwa okhwihotselesia khu Nyasaye webilonje biosi.”

[72] Ne(khuboolelwa) “Lumilile iswala ne mumurie ye, naye niye owamulikhung’asibwa ewuwe

[73] Naye niye owaloonga likulu nende eshialo khubwatoto, ne inyanga yakhaboole mbu “ba” ni iba, likhuwa lilie niliatoto, ali nende obwami inyanga yokhupwa olwika, omumanyi wakefisile nende akali habulafu, naye niye wamachesi, Omumanyi wa koosi

[74] Ne Yitsulile olwa Ibraheem yaboolela Papa wuwe, Azar, “Okholanga ebifwanani okhuba abanyasaye? Toto ekhulola ewe nende Abandu bobo nimuli mubukori bulolekha

[75] Ne endio nilo olwa khwechesia Ibraheem obwami bwo mwikulu nende mushialo, kho abe mubalia abasuubila muno

[76] Ne olweshilo shiamulila Yalola ing’ing’ini, naboola mbu: ino niyo Nyasaye wanje, ne olwa ing’ing’ini eyo yabura, nikora yaboola mbu: “eisie shindachama abanyasaye bakorakoranga tawe”

[77] Ne olwa yalola omwesi nikurula yaboola mbu; “kuno niko Nyasaye wanje,” olwa kwakora yaboola mbu; “Nyasaye wanje nalabalunjisia tawe nditsa okhuba mubandu abakora.”

[78] Ne olwayalola eliuba nilirula yaboola mbu; “uno niye Nyasaye wanje; uno niye omukhongo po” Ne olwa liabura yaboola mbu; “Esie ebekongola nende ebiamutsokasinjia Nyasaye

[79] Esie enjomiye obweni bwanje khu ulia waloonga likulu nende eshialo. Nendi mbu endeshele idini yobukori, ne esie shendi mubatsokaasinjia Nyasaye tawe

[80] Abandu bebe nibamufunania, -nibamuboolela mbu; “olekha injila yabakofu, olamayaana!” Naboola mbu; “Mufunaninjia khu Nyasaye naye yalunjisiye, nesheritsanga bilia ebiamutsokaasinjia ninaye tawe, halali Nyasaye wanje nachama likhuwa(okhuba nalo liba) Nyasaye yamanya obulayi buli eshindu, Koo shimwitsulilanga tawe

[81] Ndakharia endie abamutsokaasinjia abo, ne enywe shimuritsanga mbu mutsokasinjia Nyasaye tawe nende kalia akaleeshilia eshifune khwinywe. Kho ni mukanda shina khuchibili chino(okwanje nende okwenyu) okukhoyeshele okhunyoola omulembe toto nikali mbu mumanyile

[82] Balia abasuubila ne nibalasasia obusuubili bwabu nende eshilima tawe abo bali nende omulembe, ne abo nibo abalunjifu

[83] Ne bino nibo khubifune biefu ebiakhwahelesia Ibraheem, khu bandu bebe, khuchingulanga hekulu owakhwenya, toto Nyasaye wuwo ni Owamachesi Omumanyi muno

[84] Ne nikhumwelesia (Ibraheem omwana ulangwa mbu)Ishaq nende Yaqoob, boosi nikhubalunjisia. Ne Nuh khwamulunjisia khale, ne khulwibulo lulwe nikhulunjisia Dawud nende Suleiman, nende Ayub nende Yusuf nende Musa nende Haroon. Na endio nilwakhurunganga Abandu abalayi

[85] Nende Zakaria nende Yahya nende Isah nende Ilyasi, boosi bali mubandu abalayi

[86] Nende Ismail nende Al-Yasaa(Elisha) nende Yunus nende Luti. Boosi nikhubara hekulu wa Abandu boosi

[87] Ne nikhulunjisia basabwe bandi, nende olwibulo lwabu lundi nende abasiani babu bandi. Ne nikhubabukula nikhubawula nenikhubalunjisia khunjila ingololofu

[88] Obo nibo obulunjifu bwa Nyasaye, alunjisilinjiakhwo owayenya, mubasumba bebe. Ne bamutsokasinjia kakhababiyile kalia akabakholanga

[89] Abo nibo abakhwahelesia eshitabu nende oburuchi, nende oburumwa, ne bano nibakakhaya kano khwamala okhurao Abandu abalakakhaya tawe

[90] Abo nibo aba Nyasaye yalunjisia. Kho londa obulunjifu bwabu. Boola; “shebasabanga omurungo khu kano tawe, kano ni ametsulisio butswa khubandu boosi.”

[91] Ne shibahelesia Nyasaye eshiribwa shingala kenyekhananga tawe, olwababoola mbu: “Nyasaye shiyeshia shiosi shiosi khumundu tawe.” Boola; “ni wina weshia eshitabu shia Musa yetsa nashio, obulafu nende obulunjifu khubandu, eshia mwakhola ebitonye ebitonye, mulolosinjia kamwenya- ne mufisanga amanji muno, ne mwechesibwe akamwalamanya tawe enywe nende bapapa benyu, boola : “niya Nyasaye” mana obaleshe mubukalakala bwabu nibabaya

[92] Ne eshitabu shino eshakhweshia, shili netsikhabi tsinyinji, shifuchilisaninjia nende kalia akaranjilila, Ne kho wikanyisilie nyina tsingongo nende Abandu bali mumbeka mwo, ne balia abasuubila mwikulu(obulamu bwo mwikulu) bashifuchililanga. Ne bahenganga obulayi amalamo kabu

[93] Ne ni wina omubii omukhongo okhushila ulia uchishilanga Nyasaye obubeyi, nohomba ulia ubolanga mbu; “Endererwe obufimbuli” ne toto nalafimbulilwe tawe, nende ulia uboolanga mbu; “Nditsa okhwishia shinga ka –Nyasaye yeshia” Ne nolilola ababii olwabaliba mumusando kwokhurula omwoyo, ne Abamalaika nibabarakhwo emikhono nibababoolela mbu; “rusie emioyo chienyu, olwalelo mularungwa eshinyasio sheshifimbwa murwe. Khulwa kalia akamwaboolanga khu-Nyasaye akali katoto, nende shingala mwakholelanga obufuru tsinyaali tsitsie”(wakhabalutsi shingala berundanga)

[94] Ne toto mumalile okhwiitsila shiamulala mulala, shingala khwabaloonga olwokhuranga, ne mwalekha inyuma wenyu akakhwabahelesia, ne shikhulolakhwo ababasabila benyu abamwaboolanga mbu ni abasanji ba Nyasaye khwinywe. Kakhalishe hakari wenyu ne akamwaboolanga kabakorere

[95] Toto Nyasaye niye umesinjia olufwa okhurula muinyuma kwaba omusaala, arusinjia omulamu okhurula mubafu, ne arusinjia abafu mubalamu. Oyo niye Nyasaye kho niyena omukalukhanibungwa

[96] Niye ushiesinjia obulafu bwomumabwibwi, ne ni-ukholanga eshilo okhuba shiokhuwulukha, nende eliuba nende omwesi okhuchenda khububasio. Esho nisho eshichelo shio Owamani Omumanyi muno

[97] Naye niye owamukasilia tsing’ining’ini kho tsimulunjisie mushilima shiokhungongo nende shiomunyanza. Toto khwamala okhwinoosia tsinyaali khu Abandu bobumanyi

[98] Naye niye owabaloonga okhurula khu mundu mulala, ne aliwo habundu okhurebwa khubise bititisa, toto khwinoosia tsinyaali tsino khubandu bamanyanga (akababoolelwa)

[99] Naye niye wishinjia amatsi okhurula mwikulu, ne khuko nikhumesia emimela chia buli eshindu mana nikhukhola nibimela amasafu kabukondo bwa masafu, nikhurusiamwo tsinyuma tsichelekhaane, Ne Mumitende birulangamwo mumakoko kayio ebisuche biiname, nende emikunda chetsizabibu, nende Zeituni, nende rumana kafwanana nende kalafwanana. Henge ebiamo biayio olwabiamaanga nende okhwenga khwabio. Toto khwako ebifune bilimwo khubandu basuubilanga

[100] Ne bakhola amajini okhuba abasanji ba Nyasaye, nikali mbu niye owabaloonga, ne bamuchishilanga mbu ali nende Abana abasatsa nende beshikhasi nibabula obumanyi. Nyasaye akabukha mu ako ne abula obuleemu bwosibwosi, ne ali hekulu okhushila kalia kabamuchikhanga khwo ako

[101] Owaloonga likulu nende eshialo, kanyalikhana karie ye okhuba nende omwana, naye abula omukhasi ne yaloonga buli eshindu, naye ni omumanyi wabuli eshindu

[102] Oyo niye Nyasaye omulesi wenyu, abulao ulamungwa khubwatoto halali ye, omulonji wa buli eshindu kho mumulame, naye ni omulindi wabuli eshindu

[103] Tsimoni shitsiakhamulola tawe, naye atsilolanga. Kho naye niye omwihotselefu owuli nende amakhuwa kosi

[104] Toto bimalile okhubeetsela ebifune ebikhongo muno okhurula khu- Nyasaye wenyu, kho ulia ufungula tsimoni yalola nikhululwe omwene, ne ulia ulalola tawe nikhululwe omwene, nasi shendi omulindi wenyu tawe(endisa omwikanyilisi)

[105] Na endio nilwakhukalushilanga mutsinyaali, ne khobaboole mbu wechesibwe” (kano shikarula khu Nyasaye tawe) (ne khukalushile khuri) khokamanyishe khubandu bamanya

[106] Londa okofimbulilungwa okhurula khu Nyasaye wuwo, abulao Nyasaye ulamwa khubwatoto owulali ye, ne wire ehale nende abatsokasinjia Nyasaye

[107] Ne Nyasaye yenyanga shibakhabeele abamutsokasinjia tawe, Ne efwe shikhwakhukhola mbu obe omulindi wabu tawe. Nawe sholi omuhabini wabu tawe

[108] Ne olanyeka balia abalaamanga ulali Nyasaye tawe, baletsa banyeka Nyasaye khubufuru bwabu, nibalamanyile. Endio nilwa khwaronela buli Abandu ebikhole biabu. Mana ewa Nyasaye wabu niwo abalikalukha, naye alibaboolela akabakholanga

[109] Ne betsuba khu- Nyasaye ebitsubo biamani mbu; “Nibalolosibwa amangalimwa balasuubila.” Boola; “amangalimwa kali khu Nyasaye, ne ni shina eshibamanyia mbu lwabakhalole shibalasuubila tawe?”

[110] Ne khwitsa okhukalukhania emioyo chaibu, nende tsimoni tsiabu shingala bakhaya okhusuubila olwokhuranga. Ne khulabalekha mutsimbii tsiabu nibabeyabeya

[111] Ne khubeshilinjia Abamalaika, mana abafwa babalomalomela mana khubakhung’asilie buli eshindu imbeli wabu, shibakhasuubile tawe okhula Nyasaye achame. Halali abanji mubo bakorerwe

[112] Ne endio khwakholela buli Omurumwa okhuba nende Abasuku, amashetani Abandu, nende Amajini, bafimbulilananga abene khubene amakhuwa amarone kobubeyi, ne Nyasaye wuwo yenyanga shibakhakholele bario tawe, kho baleshesa nende akabachikhanga

[113] Kho chiloonde ako emioyo chia balia balasuubilanga mwikulu nebakachame ne khobanyoole akabakhabanga

[114] Koo mukonyanga omwawuli wundi ulali Nyasaye naye niye awabeshilia eshitabu, eshinoosinjia habulafu. Ne balia abakhwelesia eshitabu bamanya mbu toto shieshilibwa okhurula khu mulesi wuwo khubwatoto, kho olaba mubalia bakanakananga tawe

[115] Toto liayela likhuwa lia Nyasaye wuwo liobwatoto nende obuleng’afu. Abulao unyala okhukalukhania amakhuwa kaye. Naye niye Omuwulili Omumanyi muno

[116] Ne nobawulila abaanji bali khushialo, betsa okhukosia khunjila ya Nyasaye, bo balondanga butswa amaparo kabu, ne shibakholanga liosi tawe halali okhuchikha butswa

[117] Toto bwene Nyasaye wuwo omulesi niye owamanya obulayi balia abakora khunjila yiyie, naye yamanya muno balia abalunjikha

[118] Kho lie tsilia tsirumbulilwekho elira lia Nyasaye toto nimuli mbu musuubilanga tsinyali tsia Nyasaye

[119] Neshichilashinanimulalia-khutsisolo- tsilia tsirumbulilwekho elira lia Nyasaye, ne abenoosilie obulayi abiayabakania, halali bilia abiamunichilisibwa, ne abaanji toto bakosinjia Abandu mubwikombi bwabu obulaba nende obumanyi tawe, toto Nyasaye wuwo ni umanyile muno abononi

[120] Ne muleshe okhukhola tsimbi atsiabulafu nende tsiomubwifisi, toto balia bakholanga tsimbi balirungwa ako akabakholanga

[121] Ne mulalia tsisolo tsilia tsilarumbulilwekhwo elira lia Nyasaye tawe shichila obo nobwononi. Ne toto amashetani kafimbulilanga abetsa babu okhuyingana ninanyu. Ne nimubawulila mwaloonda kababoolanga mulaba mubalia abatsokasinjia Nyasaye

[122] Koo ulia wali omufu, mana nikhumulamusia nikhumwechesia obulafu, khubulafu obo achendanga imbeli wa Abandu, alaba nashilala nende ulia uli mushilima, owulanyala okhurulamwo? Endio nilwabakhayi baronilungwa akabakholanga

[123] Ne endio nilwakhwakhola buli olukongo abakhongo balwo nibo abamayanu, nibakholamwo obutobela bwokhuchikhanila, ne shibakholanga imbotokhani tawe halali bekholelanga abene, ne shibamanyanga tawe

[124] Ne ibifune nibiboolela baboolanga mbu; “shikhunyala okhusuubila tawe okhula khuhebwe shinga kalia akahebwa Abarumwa ba Nyasaye.” Nyasaye niye umanyanga habundu wa ara oburume bubwe. Kalinyoola balia abakhola amabii obututuyo obukhongo oburulanga khu –Nyasaye nende eshinyasio eshikhongo khumunyila kwabu kwabakholanga

[125] Kho ulia owa Nyasaye yenya okhumulunjisia, yekulilanga eshilifu shishie obusalamu, ne ulia wa Nyasaye yenya okhumubusilia okhukora okholanga ishilifu shiaye okhuba eshitiyifu eshisiro shinga uninanga mwikulu. Endio nilwa Nyasaye aretsanga obufundu khubalia abalasuubilanga

[126] Ne ino ni injila ya Nyasaye wuwo ingololofu, Toto khwinoosia tsinyaali tsiefu khubandu betsulilanga

[127] Balinyoola tsinzu tsiomulembe okhurula khu Nyasaye wabu, naye niye omulindi wabu, khulwa kalia akabakholanga

[128] Ne inyanga ya alibakhung’asia boosi, “Enywe omukanda kwa majini, toto enywe mwabukula abalondi banje okhurula mubandu”, mana abetsa babu mubandu baliboola mbu: “ Nyasaye wefu, khwakhonyananga efwe ninabo mana khulile khubise biefu biawakhuhelesia” Nyasaye aliboola mbu; “ Mumulilo nimwo eshimenyo shienyu, mwitsa okhwikhalamwo tsinyanga tsiosi, halali Nyasaye nachama, toto Nyasaye wuwo niye Owamachesi Omumanyi muno

[129] Ne endio nilwakhukholanga obuyanzi mubandu abandi ababii, khu bandu bandi khulwo khubeela kalia (akabakoonyanga) akabakhabanga

[130] “Enywe omukanda kwa Majini, nende Abandu, kooshibabeetselakhwo Abarumwa okhurula mwinywe babenoosinjia tsinyaali tsianje ne nibabekanyisilia omukhung’ano okwe inyanga yalelo?” Baliboola mbu; “khwilolele abeene khumibili chiefu” Ne obulamu bwokhushialo bwabakatia. Nenibelolela abeene mbu bali abakhayi

[131] Endio nilwokhuba mbu Nyasaye wuwo umulesi shiyali wokhusishia tsingongo khububii tawe, abamenyi batsio nibakorerwe

[132] Ne boosi bali khungasi ndala khukalia kabakhola. Ne Nyasaye wuwo shang’ang’alanga khukabakholanga tawe

[133] Ne Nyasaye wuwo niye Omuyinda Owetsimbabaasi, niyenya nabawesiayo ne arerao abandi abachamile abalali enywe, shingala yabaloonga mulwibulo olwa Abandu bandi

[134] Toto akamulakungwa kaliula, ne shimulinyala okhukashila tawe

[135] Boola; “Enywe Abandu banje, khole akenyu mubunyali bwenyu, siesi ekholanga akanje, nimulitsa okhumanya mbu niwina uliba nende eshimenyo eshilayi mubumalilishi, Toto Ababii shibalibura tawe

[136] Ne bakholela Nyasaye abuleka khumimela echiayaloonga, nende mumiruko, nebaboolanga mbu; Ino niya Nyasaye khukhuboola khwabu butswa, Ne ino niyabalia bakhutsokasinjia nabo Nyasaye” Kho bilia ebisuubililwe abanyasaye babu shibiulanga khu Nyasaye tawe, ne ebisuubililwe Nyasaye biulanga khuba Nyasaye babu. Ni amabii muno akababusinjia

[137] Ne khandi abanji mubatsokasi abo baronelwa okhwira Abana babu khulwa okhubasishia nende okhubanyasilia idini yabu. Ne Nyasaye achamanga shibakhakholele bario tawe. Kho baleshe nende akabachikhanga ako

[138] Nabo baboolanga mbu; “Tsisolo tsino nende imimela chino ni omusilo. Shibalalia tawe halali balia abakhuchamile”- khukhuboola khwabu butswa. Nende tsisolo tsiakanibwa okhunina khumikongo chiatsio. Nende tsisolo tsindi etsilarumbulilungwakho elira lia Nyasaye tawe. Bachishilanga Nyasaye obubeyi. Alibarunga akabakholanga ako

[139] Ne baboolanga mbu; “Ebio munda mwetsisolo tsino nibia Abasatsa befu bonyene, ne Abakhasi befu bakaanibwa.” Ne ni ili ifwile balia boosi, Nyasaye alibarunga khukababoolanga ako. Toto ye ni Owamachesi, Omumanyi muno

[140] Toto bamala okhusikha balia abera Abana babu mubusilu nibabula obumanyi, mana nibakania ebia Nyasaye wabu abakabile, khukhuchishila Nyasaye, toto bo bakora ne shibali bokhulunjikha tawe

[141] Naye niye waloonga emikunda chili nende imisala chilandanga – emilandula- nende echilalandanga, nende mitende nende imimelela chiebiamo bikabukhane, nende imizaituni, nende emikoma chifwanana nende chilafwanana, Lie ebiamo babio olwabibulananga, ne inyanga yokhuchesa murusie eshihanwa shiabio. Ne mulekhonyela khuisasia tawe. Toto ye shiyachama Abandu beyisasia tawe

[142] Ne mutsisolo yabakholela tsilia tsiokhuchinga emisiko nende obulili. Lie khubilia bia Nyasaye abakabile, ne mulaloonda amaseenelo ka shetani tawe. Toto ye ni omusuku wenyu owa- habulafu

[143] Yabalonjela tsimbia munane etsie tsisolo- (tsisatsa nende tsikhasi) Tsibibi mumakondi nende tsibili mutsimbusi, boola; “Koo mwakanibwa koosi amasatsa kabili (kamakondi nende tsimbusi) nohomba amakhasi kabili (kamakondi nende tsimbusi) nohomba ebili munda mwa akeshikhasi koosi kabili? Mumboolele khubumanyi toto enywe nimuli mbu muboolanga habwene

[144] Ne tsibili mutsingamia, ne tsibili mung’ombe. Boola; “Koo yakania tsimbia tsiosi tsisatsa nende tsikhasi, nohomba ebili mutsinda mwetsikhasi tsiosi? Nohomba mwaliho olwa Nyasaye wamuboolela kano? Kho omubii shina omukhongo oyo okhushila ulia uchishila Nyasaye obubeyi, khulwo khukosia Abandu nabula obumanyi, Toto Nyasaye shalunjisinjia Abandu ababii tawe

[145] Boola: “Esie shendolangakhwo mukandafimbulilwa eshindu shiakanibwa okhulibwa halali shibe nishifwile eshiene(mutsisolo) nohomba amalasile nohomba inyama yeyimbitsi, shichila obo ni obumali, nohomba shisinzilwe nishilarumbulilwekho elira lia Nyasaye tawe. Halali ulia unichilisibwa, nalekombele noho okhubura eshichelo tawe. Awo toto Nyasaye wuwo Omulesi niwokhuleshela, Owetsimbabaasi

[146] Ne balia baloonda idini yeshiyahudi, khwabakania okhulia isolo yosi yosi yamatere. Ne khu Ng’ombe nende likondi nende khumbusi khwabakania amasinya kabio. halali kalia kokhumikongo nende munda. Nohomba kalia katilana nende ebikumba. Khwabarunga khurio eshichila obukhayi bwabu. Ne toto efwe nefwe ababoolanga abwatoto

[147] Ne nibakhuyingasia boola mbu; “Nyasaye Omulesi wenyu niwetsimbabaasi etsiaswana. Ne eshinyasio shishie sishikalilungwa khubandu ababii tawe

[148] Abatsokasi balaboola mbu; “Nyasaye yenyanga efwe shikwhakhabeele abatsokaasi tawe, nohomba bapapa befu, ne shikhwakhakanile okhulia shiosishiosi tawe. Endio butswa nilo olwabali imbeli wabu bayingana okhula shingala bapila eshinyasio. Boola; Enywe muli nende obumanyi mukhurerere? Inywe muloondanga butswa amaparo kenyu, ne shimuboolanga halali obubeyi butswa

[149] Boola; “Nyasaye niye uli nende eshifune shibura. Ne yenyanga yakhabalunjisiye mwesi.”

[150] Boola; “rere abaloli benyu abetsa okhurusia obuloli mbu toto Nyasaye Yakana kano.” Ne nibarusia obuloli olaba halala ninabo tawe, ne olaloonda obwikombi bwa balia bakhaya ebimanyisio biefu, ne shibasuubilanga mwikulu tawe, ne bachelasinjia Nyasaye Omulesi wabu nende abandi

[151] Boola; “Itse ebasomele abia Nyasaye wenyu omulesi yakania. Nabo ni mbu; “Mulamutsokasia nende shiosishiosi tawe. Ne Abebusi benyu mubakholele amalayi. Ne mulera Abana benyu shichila obutakha tawe, efwe khubetsanga omukabo enywe ninabo. Ne mlasita ahambi nende amakhuwa keshifwolo tawe, akalolekhana nende akefisile. Ne mulera Omundu wa Nyasaye yakana okhwira, halali khubwatoto.” Kano ni amachelo kaye khwinywe kakhaba kario mwara mubwongo

[152] Ne mulasita ahambi nende omwandu kwabana abafwilwa, halali khunjila yobulayi muno, okhula yole omundu omukhongo. Ne mwitsusie eshichelo nende tsiratili khubuleng’afu. Efwe shikhunichilisinjia Omundu halali khushia anyala. Ne nimuboola muboole khubuleng’afu kata nibali abekho benyu. Ne indache ya Nyasaye mukhole. Ako abachelela khomunyoole okhwitsulila

[153] Ne toto ino niyo injila yanje ingololofu kho muyiloonde mulaloonda tsinjila tsindi tawe, tsiabarusia khu injila yiye. Kano abachelelakhwo mwakaba murio mwanyoola okhumuria

[154] Mana khandi khwahelesia Musa okhumwitsusilia (tsimbabaasi tsiefu) akayakhola obulayi, ne mbu ni amebaalo kabuli eshindu nende obulunjifu nende tsimbabaasi, bakhaba bario banyoola okhusuubila okhubukana nende Nyasaye wabu omulesi

[155] Ne shino eshitabu eshakhweshia, eshili nende tsikhabi. Kho mushilonde ne murie Nyasaye mwakhaba murio mwanyoola tsimbambaasi

[156] Mletsa okhuboola mbu; “toto amahanga kabili imbeli wefu beshilibwa eshitabu, nafu shikhwali nende obumanyi khukabakholanga tawe

[157] Nohomba mwaboola mbu; “Efwe khwishilibungwa eshitabu khwakhabeele abalunjifu muno okhubashila abo. Kho obwinoosi okhurula khu Nyasaye wenyu omulesi bumalile okhuboolela, nende obulunjifu nende tsimbabaasi. Kho niwina omubi muno okhushila ulia uyingasia ebimanyisio bia- Nyasaye, mana niyera ehale ninabio? Khulibarunga balia beretsanga ehale nende ebimanyisio biefu eshinyasio eshilulu shichila okhwira ehale khwabu okho

[158] Balindanga elindi ilali Abamalaika boole, nohomba Nyasaye wuwo omulesi, nohomba biboolele ebimanyisio bia Nyasaye wuwo omulesi? Inyanga yebimanyisio bindi bia Nyasaye wuwo omulesi biliula , okhusuubila awo shikhulikhonya Omundu eshindu tawe, nalali niyasuubila imbeli awo, nohomba yakhola amalayi mubusuubili bubwe. Boola; “Mulinde, fwesi nafu khulindanga.”

[159] Toto balia abakabula idini yabu mana nibaba emikanda emikanda, obula ninabo olwikho lwosi lwosi. Toto amakhuwa kabu kali khu Nyasaye, mana alibaboolela kalia akabakholanga

[160] Ulia uliitsa nende lilayi alirungwa amalayi okhula ekhumi shingalio, ne ulia uliitsa nende libii alirungwa butswa libii shingalio. Nabo shibalikholelwa obubii tawe

[161] Boola; “Toto Nyasaye wanje omulesi yalunjisia khunjila ingololofu, idini ili habwene muno, ilimbu niyo injila ya Ibraheem owali omulunjifu, neshiyali mubalia abatsokaasinjia Nyasaye tawe

[162] Boola; “Toto Isala yanje nende imilukha chia amalamo kanje nende obulamu bwanje, nende okhufwa khwanje nikhulwa Nyasaye, Omulesi webiloonje bioosi

[163] Abula omusanji wuwe, ne ako niko kandalomesibwa, nasi endi wa imbeli khubasalamu

[164] Boola; “Koo engoonye Nyasaye Omulesi wundu owulali Nyasaye, nali niye Nyasaye Omulesi wabuli eshindu? Ne buli omundu yekholelanga omwene. Ne shalichinga Omundu omusiko kwo wundi tawe. Mana okhukalukha khwenyu khuliba ewa Nyasaye wenyu Omulesi, Naye alibaboolela kalia akamwakabukhanilanga

[165] Naye niye owabakhola abalindi bokhushialo, neyachingulaabandimwinywe hekulu tsingasi tsikhongo, kho abateme khu bilia ebiayabahelesia. Toto Nyasaye wuwo Omulesi ni Omwangu weshinyasio, naye toto Niwobulesheli, Owetsimbabaasi muno

[1] Alif lam Mim Saad

[2] Eshitabo shieshibwa khwiwe, kho olaba nende obusiro mushilifu mumwo khulwasho tawe, kho onyoole okhushikhoonyela nende okhwikanyilisia, ne shibe eshitsulisio khubasuubili

[3] Londe akamweshilibwa okhurula khu Nyasaye Omulesi wenyu, ne mulaloonda abetsa nohomba abalindi bandi abalali ye tawe. Nimatiti kamwitsulilanga

[4] Ni tsingongo tsinga tsiakhwasishia, eshinyasio shiefu shiaboolela eshilo nohomba olwabali nibakonele eshitere

[5] Kho shibulao eshiali eshiabu, olwe shinyasio shiaboolela, halali okhuboola mbu; “Toto efwe khwali abamabii.”

[6] Ne toto khulireeba balia abayililwa oburume, ne khandi khulireeba Abarumwa

[7] Ne khandi khulibakanila mubumanyi, ne khandi efwe shikhwali ehale tawe

[8] Ne inyanga eyo eshichelo shiliba khubwatoto, kho balia beshichelo shiabu shiliba eshisiro, abo nibo baliba nibaburire

[9] Ne balia baliba nende obusiro-obwa malayi- obwangu, abo nibo abasishia emioyo chiabu, khulwa okhukholela ebimanyisio biefu obubii

[10] Netoto khwabara khushialo, mana nikhubakholelamwo tsinjila tsiokhunyoola obulamu. Halali orio yenyu ni inditi

[11] Netoto khwabaloonga, mana nakhubahelesia obukoondo, mana nikhuboolela Abamalaikambu:“ Mwinamile Adam, Mana nibeenama okhuyiniakhwo ibilisi, shiyali mubalia abeenama tawe.”

[12] Nyasaye naboola; “Shina shikhukayile okhwinama shingala ekhulomesiye?” Naboola; “Esie endi omulayi okhumushila. Waloonga esie okhurula khumulilo naye wamuloonga okhurula khuliloba.”

[13] Naboola; “Mana yikha okhurula mwo! Shokhoyeshele okhufuramwo tawe, mana rula, oli mubalia abatutu

[14] Naboola; “undeshe- ndalafwa tawe, okhuula inyanga yolibalamusia.”

[15] Naboola; “olaba mubalia abahebwa ebise.”

[16] Naboola; “ shigala omalile okhura mubakori, ndalabekhalila khunjila yao ingolofu.”

[17] Mana ndalabarulila imbeli nende inyuma wabu nende mumukhono musatsa nende omukata kwabu, Ne sholinyoola abanji babu nibakhupa orio tawe

[18] Naboola; “Rula omo, ewe omalile okhutsaalala, omalile okhulaamwa. Ne ulia ulakhuloonda mubo ndilimwitsusia mumulilo nende enywe mwesi

[19] Nawe Adam! Ewe nende omukhaye wuwo mwikhale mumukunda kuno, ne muliemwo ngamwenya, ne mulasita ahambi nende omusaala kuno tawe, mwaba mubandu ababii

[20] Mana shetani nabaramo eshibeyibeyi, mbu kho abafimbule eshiekenyi shiabu eshiabafisilwa, mana naboola; “Nyasaye wenyu Omulesi yabakania omusala kuno mbu muletsa okhuba shinga Malaika tawe, nohomba mulaba balia ebetsa okhumenya tsinyanga tsiosi tawe

[21] Mana nabetsubila; “Toto esie endi mubalia ababachelelanga amalayi”

[22] Mana nabatila nobubeyi, olwa bapila omusala kulia, eshiekenyi shiabu shialolokha mana nibenjila okhwishinga khu masafu komwikulu. Nyasaye wabu Omulesi nabalaanga; “Koo, shindabakania omusaala oko, ne nebaboolela mbu shetani ni Omusuku wenyu owahabulafu

[23] Nibaboola; “ Nyasaye wefu Omulesi, khukholeele obubii emioyo chiefu, nenolakhuleshela mana wakhubeela tsimbabaasi tawe, toto khulaba mubalia abokhusikha.”

[24] Naboola; “Yakukhe! Mulaba abeene khubeene abasuku, Ne khwiloba nisho shilaba eshimenyo shienyu ne mwikhoyemwo okhula indukho yule

[25] Naboola; “Mwiloba omo mulamenyamwo, na omo mulafwilamwo, ne omo nimwamulirusibwamwo

[26] Enywe(Abana ba Adam) Abandu! Khwabeshilia tsingubo tsiokhufunikha eshiekenyi shienyu, nende tsingubo tsiobwirono – Ne tsingubo tsio khuria Nyasaye nitso tsindayi. Ako ni khubimanyisio bia Nyasaye bakhaba bario banyoola okhwitsulila

[27] Enywe Abandu! shetani aletsa okhubakholela inzoka shingala yarusia abebusi benyu mwikulu, nabafwalula tsingubo tsiabu okhubechesia ebiekenyi biabu. Toto ye nende oluyia lulwe babalolanga, nanyu shimubalolanga tawe, Toto khwakhola amashetani okhuba abetsa babalia balasuubilanga tawe

[28] Ne nibakhola amakhuwa keshifwolo baboolanga mbu; khwanyoola nako bapapa befu, ne Nyasaye yakhulomesia 7. endio. Boola: “Toto Nyasaye shalomesinjia amakhuwa keshifwolo tawe, mubolanga khu Nyasaye akamukorerwe.?”

[29] Boola; “Nyasaye yalomesia obuleng’aafu, ne mumulinjiekhwo obweni bwenyu buli nimwinama, ne mumusabe Ye nimumwitswenulile idini. Olwa yabaloonga mukhuranga nilo olwa alibakalusia

[30] Omukanda mulala yakulunjisia, ne omukanda kundi kulimubukori. Toto abo bakhola Amashetani okhuba abetsa abalindi babu mushilenje shia Nyasaye, nebakaalanga mbu balunjikha

[31] Enywe Abandu! Bukule oburone bwenyu buli abundu wamasayo, ne lie ne munywe ne mulakhola isasia tawe, Toto Ye shiyachama abakholanga isasia tawe.”

[32] Boola; “Ni wina wakania oburone bwa Nyasaye obwayahelesia Abandu bebe, nende bilia ebilayi mumikabo chichie.? Boola; ebo ni bia balia basuubila nibashili mubulamu bwokhushialo, ne inyanga yeyindukho bilibasa ebiabu bonyene. Endio nilwokhwinoosinjia ebimanyisio biefu khubandu abamanyanga

[33] Boola; Toto Nyasaye wanje Omulesi yakana amakhuwa keshifwabi akalolokha nende akefisile, nende tsimbi nende obukhayi obulali khunjila yatoto, nende okhutsokasia Nyasaye nende khushibula eshifune, nende okhuboola khu- Nyasaye akamulamanyile tawe

[34] Boola; “buli omukanda kuli nende ebise biakwo. Ne ebise biabu nibiula shibalishinda kata isa ndala tawe nohomba shibaliranjilila tawe”

[35] Enywe Abandu! Olwabalaboolela Aburumwa okhurula mwinywe babakanila ebimanyisio bianje, kho balia abalaria Nyasaye mana babe abalayi, shibalaba noburi nohomba shibalibeelela tawe

[36] Ne balia bayingasia ebimanyisio biefu mana nibabikholela obufuru, abo ni Abandu bo mumulilo, bali menyamwo tsinyanga tsiosi

[37] Ni wina omubii omukhongo oyo okhushila ulia uchishila Nyasaye obubeyi, nohomba ulia uyingasia ebimanyisio bibie? Abo habundu wabu abahandichilwa yakhaboolele, olwa Abarumwa befu balibeetsela okhubafwisia balibareeba mbu; “ Balihena balia abamwalamanga balali Nyasaye?” Baliboola mbu; “bakhukorerekhwo! Ne balirusilia abeene obuloli mbu bali abakhayi.”

[38] Nyasaye aliboola; “Injile mumulilo halala nende emikanda chindi chiabura imbeli wanyu echia Majini nende Abandu. Buli omukanda nikwinjilamwo nikutsuba okwashie. Olwa balikhung’anamwo boosi, abamalilishi balisungana nende abaranjilila babu mbu “Nyasaye wefu Omulesi! Bano nibo bakhukosia, kho bahelesie eshinyasio shimeteeshe shiomulilo” Aliboola mbu; “eshinyasio shimeteshe shilaba khwinywe mwesi, halali shimumanyile tawe.”

[39] Bokhuranga baliboolela abokhumalilikha mbu; “Kho mana enywe mwesi shimwalikhwo nende obulayi biosi biosi okhushila efwe tawe. Kho pile eshinyasio khulwokhubeela akamwakholanga”

[40] Toto balia bayingananga khubimanyisio biefu, ne nibabikholela obufuru, shibalikulilwa emiliango cho mwikulu tawe, Ne shibalinjila mwikulu tawe okhula ingamia ibure mulina lieyisindani, ne endio nilwakhurunganga abamabii

[41] Mumulilo nishoshiliba eshitanda shiabu na hekulu wabu tsingubo tsiokhwifunikha tsiomulilo. Na endio nilwakhurunganga Abandu ababii

[42] Ne balia abasuubila mana nibakhola amalayi, shikhunichilisinjia Omundu yesi yesi tawe halali khushichelo shiobunyali bubwe, Abo nibo Abandu bomwikulu, balikhalamwo tsinyanga tsiosi

[43] Ne khulirusia isila mubilifu biabu, ne imbeli wabu imialo chilibura. Ne baliboola mbu: “Oluyali lwosi nilwa Nyasaye owakhulunjisia khu kano. Neshikhwali nikhulunjikha abeene tawe Nyasaye akhayanga okhulunjisia. Toto Abarumwa ba Nyasaye wefu Omulesi barera obwatoto. Ne baliboolelwa mbu; “Eyo niyo Jannah eyamwahebwa khulwokhubeela kalia akamwakholanga.”

[44] Ne Abandu bomwikulu balilaanga Abandu bomumulilo; “Efwe khunyolele ka Nyasaye wefu yakhulaka mbu ni habwene. Koo enywe mwesi munyolele aka Nyasaye wenyu Omulesi yabalaka mbu ni habwene? “ Baliboola mbu “ Hee!” Mana umulanji alilanga. “Eshilamo sha Nyasaye shinyoole balia bakhola obubii.”

[45] Balia abekalilanga injila ya Nyasaye, nebeenyanga okhuyikotiombola, ne baingananga mbu mwikulu ibulao tawe

[46] Hakari wemikanda chibili chino shilirebwao eshikalilo (ipasia). Ne hekulu weshitulo Abandu balibao abalimanya Abandu boosi khuifwani yabu, nabo balilanga Abandu bomwikulu: “Omulembe kube ninanyu! Abo bashili okhwinjilamwo halali bali nende eshiwonya shokhwinjilamwo.”

[47] Ne olwestimoni tsiabu tsilikalukhanibwa okhuleenga Abandu bomumulilo. Baliboola mbu; “Nyasaye wefu omulesi, olakhura halala nende Abandu bakhola obubii tawe.”

[48] Ne Abandu bokhwitulo abo balilaanga Abandu babamanya khu ifwani yabu, baliboola mbu; “ Okhusanjilana kwenyu shikhwabakhonya eshindu tawe, kata nende biosi. eshiamwakholelanga obufuru esho.”

[49] Koo bano shinibo bamwetsubanga mbu Nyasaye shalibosilia tsimbabaasi tawe?. “Injile mwikulu obuyendi bubula khwinywe, ne shimulibeelela tawe.”

[50] Ne Abandu bomulilo balilanga Abandu bomwikulu, mbu; “Mukhutsushilekhwo amatsi nohomba shiosishiosi eshia Nyasaye abakabile”. Nabo balibaboolela mbu; “Toto Nyasaye akanile - ebindu biamusabanga ebo- khubakhayi.”

[51] Abakhola idini yabu okhuba omwikhoyo nende emibayo, mana obulamu bwokhushialo nibubakatia. Khomana lelo khulabebilila shingalabo bebilila omukhung’ano khweyinyanga yabu ino, nende khulwa okhukhaya khwabu ebimanyisio biefu

[52] Ne toto khwabarerera eshitabu, esha khwenoosia mubumanyi, obulunjifu nende tsimbabaasi khubandu basuubilanga

[53] Koo shiliho shiabalindanga halali indukho ya ako? Inyanga yeyindukho yako iliula, abeyibilisia baliboola mbu; “Toto Abarumwaba Nyasayewefubareraobwatoto. Koo khulikhwo nende abakhusabila, eshileshelo? Nohomba khukalusibwe khukhole kalia akakhulakholanga? Toto abo bamala okhusishia emioyo chiabu, ne akabachikhanga kabakorere

[54] Toto Nyasaye wenyu Omulesi ni ulia owalonga likulu nende eshialo khutsinyanga tsisasaba. Mana naleng’ana khu shisala shishie shioluyali. Afimbanga eshilo khushitere eshilondangakhwo lwangu. Nende eliuba nende omwesi, nende tsing’ining’ini tsikhoyelungwa khukhuchama khukhwe. Koo manye mbu okhulonga nende obunyali nobubwe, Nyasaye Niwoluyali Omulesi webiloonje

[55] Sabe Nyasaye wenyu Omulesi mubwihotselesi nende mubwifisi. Toto ye shiyachama balia ababuririranga eshichelo tawe

[56] Ne mulakhola amabii khushialo tawe nishimalile okhukaasa, ne mumusabe muburi nende mubusuubili, Toto tsimbabaasi tsia Nyasaye tsili ahambi nende bakholanga amalayi

[57] Ye niye uyilanga omuyaka okhuba eshimanyisio shie tsimbabaasi tsitsie okhula. Kata omuyeka oko shingala kuchinganga amaleesi amasiro khukayilanga khushialo shiafwa (eshiumu) mana khukekhoonyela khukhwishia amatsi, shinga endio nilwakhurusinjia buli imbia yebiamo. Mana khandi endio nilwakhulamusinjia abafu khomunyoole okhwitsulila

[58] Ne indalo indayi yeliloba lieyimbolela, lirusinjia emimela chikhulanga obulayi chili nende obulamu. Khubuchami bwa Nyasaye wuwo omulesi, neindalo imbii shirusinjia halali emimela mititi echibula obukhala, mana khandi khubusandi, ne endio nelwakhwinoosinjia tsinyaali khubandu bakhupanga orio

[59] Ne toto khwaruma Nuhu khubandu be! Mana nababoolela; “Enywe Abandu banje mulaame Nyasaye, Mubula Nyasaye wundi wulaliye tawe, Toto esie ababelelela khu shinyasio shieyinyanga ikhongo.”

[60] Abakhongo mubandu be nibaboola; “Toto efwe khukhulola ewe noli mubukori obwahabulafu”

[61] Naboola; “enywe Abandu banje ,Esie shendi khubukori tawe, halali esie endi Omurumwa okhurula khu Nyasaye Omulesi webiloonje biosi.”

[62] eboosilinjia oburume bwa Nyasaye wanje omulesi, ne abachelelanga, ne ndamanya khu Nyasaye Omulesi aka enywe mulamanyile tawe

[63] Koo muwukanga amachelelo okhurula khu Nyasaye Omulesi wenyu, okhuburira khumundu awuli mulala khwinywe, abekanyisilie kho munyoole okhuria Nyasaye, ne khomunyoole okhubelwa tsimbabaasi

[64] Mana nibamuyingasia. Nafu nikhumuhabina ye nende abali halala ninaye muliaro. Ne nikhusishia balia abakhaya ebimanyisio biefu. Toto abo bali Abandu abawofu

[65] Ne khu A’adi, khwayila Omusiani wabu Hud. Naboola; Enywe Abandu banje! Mulaame Nyasaye. “Enywe mubula Nyasaye wundi ulali Ye. Kho mana shimukhamuritsanga tawe?”

[66] Abakhoongo mubakhayi mubandu bebe nibaboola mbu: “efwe khukhulola oli mubusilu, ne toto efwe khulolanga mbu ewe oli mubabeyi.”

[67] Naboola; “Enywe Abandu banje shendi nende obusilu tawe, halali esie endi Omurumwa okhurula khu Nyasaye Omulesi webiloonje biosi.”

[68] Ebosilinjia oburume bwa- Nyasaye wanje Omulesi. Ne esie khwinywe endisa owubachelela, Omwisikwa

[69] Koo muwukanga mbu ametsulisio karula khu Nyasaye wenyu Omulesi okhuboolela okhurula khumulala mwinywe abekanyilisie? Ne yitsulile shingala yabakhola okhubukula Abundu wa Nuh, mana nabameta omubili omukhongo nende amani, kho yitsulile tsimbabaasi tsia Nyasaye kho munyoole okhubura

[70] Nibaboola mbu; Koo! Okhwitsile mbu khulaame Nyasaye mulala yenyene, ne khuleshe akabapapa befu balaamanga? Mana khurerere akokhulakanga kano toto noli mubaboolanga obulaamba

[71] Naboola mbu; “ Toto eshinyasio nende liruma okhurula khu- Nyasaye wenyu, Omulesi bimalile okhubakwila. Muyingananga nasi khumera butswa akamwalanga enywe nende bapapa benyu, aka Nyasaye aleshiliakhwo eshifune? Kho mana linde esie endi halala ninanyu mubalia abaliindanga

[72] Mana nikhumuhonia ye nende abali halala ninaye. Khutsimbabaasi tsiefu, mana ni khuteta emisi chabalia abakana ebimanyisio biefu, ni shibali abasuubili tawe

[73] Ne Thamudi khwaruma Omusiani wabu (ulangwa mbu) Swaleh. Naboola mbu; Enywe Abandu banje! Mulaame Nyasaye. Mubula Nyasaye wundi owulali Ye tawe, Toto shimalile okhuboolela eshimanyisio eshiabulafu okhurula khu Nyasaye wenyu Omulesi. Ino ni Ingamia ikhasi ya Nyasaye ili mbu ni eshimanyisio khwinywe. Kho muyileshe ilie khuliloba lia Nyasaye, nemulayumisia tawe, mwakhanyoola eshinyasio eshilulu

[74] Ne yitsulile olwayabarao okhutila abundu wa Abandu ba- A’ad mana nabakhola obulayi khushialo, mumbakhanga tsinzu tsiobuyinda tsikhongo, ne mubaatsanga tsinzu mutsingulu, kho itsulile tsimbabasi tsia Nyasaye ne mulakhola obubii nohomba obutobela khushialo tawe

[75] Omukanda kwafura mubandu baye kwaboolela balia abasuubili mubo abakholelungwa obubii mbu; “Koo musuubilanga mbu Saleh yarumwa nende Nyasaye wuwe Omulesi?” Nibaboola: “ Toto efwe khusuubila khukayarumwa nako”

[76] Abafura abo nibaboola mbu; “Efwe khukhayile akamusuubilemwo ako”

[77] Mana nibera ingamia eyo, mana nibaloba likhuwa lia Nyasaye wabu Omulesi, mana nibaboola; “Ewe Saleh, khurerere akokhulakanga toto ewe noli mubarumwa.’’

[78] Mana omurengo kweshialo nende oluyoka nikubabukula, ne olwabwashia nibanyolekha mutsinzu tsiabu mafumama nibali emilambo

[79] Mana Swaleh nabalekha naboola mbu; “ Enywe Abandu banje ndaboosilia oburume bwa Nyasaye wanje Omulesi, mana nebachelela, halali enywe shimwachama abamachelo tawe.’’

[80] Ne khwaruma Lut, olwayaboolela Abandu bebe mbu; “Koo enywe mukholanga eshifwolo shiomundu yesi yesi eshili okhubaranjiliakhwo okhukhola khushialo tawe”

[81] Toto enywe mwinjililanga Abasatsa mubwikombi nimulekha Abakhasi? Khane enywe muli Abandu beyisasia

[82] Ne likalusio liabandu bebe shiliali halali mbu; “Mubaloonde mulukongo lwenyu, shichila ni Abandu betswenulanga.”

[83] Mana nikhumuhabina nende Abandu bebe, okhuyiniakhwo omukhasi wuwe, yali mubalia abatong’a inyuma

[84] Mana nikhubapupuchisilia ifula, kho lola indukho yabamabii shinga yali

[85] Ne khubandu ba Madyana, khwaruma omusiani wabu(ulangwa) mbu Shuaib, Naboola mbu; “Enywe Abandu banje mulaame Nyasaye. Abulao Nyasaye wundi owulali Ye, Biamala okhuboolela ebifune biabulafu okhurula khu Nyasaye wenyu Omulesi, Kho muleng’aasie obulayi eshichelo nende iratili, ne mulakhalaka Abandu ebindu biabu tawe, ne mulakhola obutobela khushialo tawe nishimalile okhukaasa. Buno nibo obulayi khwinywe toto nimuli abasuubili

[86] Ne mulekhala khunjila nimurisia Abandu nende okhubekalila khunjila ya 7. Nyasaye, balia abasuubila, nende okhwenya okhukosia injila . Ne yitsulile olwa mwali batiti, naye nabakhola okhuba abaanji. Ne muhenje shingala indukho ya Abandu bamabii yali

[87] Ne omukanda kundi nikuliwo mwinywe akwasuubila akandarumwa kano, ne omukanda kundi shikwasuubila tawe, mana mulinde okhula shingala Nyasaye yetsa okhubusia hakari wefu. Naye niye Omubusia omulayi umalayo

[88] Abakhongo ba Abafuru mubandu baye nibaboola mbu; “ Ewe Shuaib, khwitsa okhuwuyia ewe halala nende balia bakhusuubila mulukongo lwefu, nohomba mukalushe mumilukha chiefu.” Naboola; “Koo kata nichiakhusinya?”- (emilukha echo).”

[89] Toto khulaba khuchishiile Nyasaye obubeyi nikhukalukha mumilukha chienyu, Nyasaye namalile okhuhonokosia nachio. Ne shikali khwifwe okhukalushila emilukha echo okhuyiniakhwo Nyasaye wefu Omulesi niyenya. Amachesi ka Nyasaye kaswana buli khushindu. Nyasaye niwakhwisikanga. Nyasaye wefu Omulesi, khwikulile, okhubusilie hakari wefu nende Abandu befu khubwatoto, nawe newe omulayi muno uwababusia

[90] Abakhoongo babakhayi mubandu baye nibaboola; “Nimuloonda amakhuwa ka Shuaib toto awo mulaba abanyoola okhusikha”

[91] Mana omurengo kweshialo kwoluyoka nikubabukula, mana nibubashielia mulukongo lwabu nibafumame nibali emilambo

[92] Balia abayingasia Shuaib nibaba shinga abalaliwo tawe. Balia abayingasia Shuaib nibo banyoola okhusikha

[93] Mana nabalekha naboola; “Enywe Abandu banje, ndabosilia oburume bwa Nyasaye wanje Omulesi, mana nebachelela, kho ndakhabelelela endie Abandu abakhayi.”

[94] Ne shikhwaruma Omurumwa yesi yesi mulukongo halali khwatila abamenyamwo khu busandi nende khu butinyu khobanyoole okhwihotselesia

[95] Mana khandi efwe khukalukhaninjia habundu wamabii okhuba andayi, mana nibatsililila, ne nibaboola; “Ubusandi nende omwikhoyo bianyoola bapapa befu” mana nikhubatila mapwoka nibashili okhumanya

[96] Ne toto Abandu bomutsingongo babetsanga mbu basuubila mana baria Nyasaye, toto khwakhabeekulile tsikhabi okhurula mwikulu nende mwiloba. Halali bayingana mana nikhubatila khulwo khubeela kalia akabakhaabanga

[97] Koo, Abandu betsingongo basuubilanga mbu eshinyasio shiefu sishilaboolela eshilo nabo nibali mukhukona tawe

[98] Nohomba Abandu betsingongo basuubilanga mbu eshinyasio shiefu sishilaboolela eshitere nabo nibali mukhubaya tawe

[99] Koo basuubila mbu banyala okhuliinda eshinyasio shia Nyasaye? Shibasuubilanga okhunyala eshinyasio shia Nyasaye tawe halali Abandu basikha

[100] Koo shibamanyile balia ababukulanga eshialo Abandu bandi nibakharula mbu nikhwenya khulabara mumasila khutsimbi tsiabu, ne khupe eshimanyisio khumioyo chiabu, mana khulwendio balobe okhuwulila

[101] Etso nitsingongo etsia khukhukanilanga amakhuwa katsio, Toto babeetsela Abarumwa babu, nende amebaalo kabulafu , kho shibali nibakhasuubila khukalia akabali nibakhaya khale, na endio ni lwa 7. Nyasaye akhupanga eshimanyisio khu mioyo chabakhayi

[102] Ne abanji babu khwabanyoola mbu shini abesikwa khundakano tawe, halali abwatoto abanji mubo ni ababii

[103] Mana nikhurulao nikhuruma Musa nende ebifune biefu, khu Firauni nende Abandu bebe, halali batsikholela obubii, kho henga shingala indukho ya abeyisasia yali

[104] Ne Musa naboola; “Ewe Firauni, toto esie endi Omurumwa okhurula khu Omulesi webindu biosi.”

[105] “Kanichilisia mbu ndalaboola khu- Nyasaye halali obwatoto, emalile okhubeetsela nende ebifune okhurula khu Nyasaye wenyu omulesi kho lekhula Abana ba Israili babe ninasi

[106] (Firaun) Nabola mbu; “Noli niwitsile nende eshilolelo nakhashirerekhwo toto noli mubandu ababoolanga obulaamba”

[107] Nasukuna indabushi yiyie, mana nikalukhana inzukha yatoto

[108] Ne narusia omukhono kukwe, nikukalukhana omulafu tswe khubakuhenganga

[109] Abakhongo mubandu ba Firaun nibaboola mbu; “Toto uno ni Omulosi Omumanyi muno.”

[110] Yenya okhubarusia mushialo shienyu, kho mulola murie

[111] Nibaboola; “Muleshe hatiti ye nende Omusiani wabu, ne ruma abakhung’asinjia Abandu mumatokho.”

[112] Bakhurerere buli Omulosi Omumunyi muno

[113] Abalosi nibetsa khu Firaun, nibaboola mbu; “khwitsa okhunyoola omurungo nikali mbu khushila

[114] Naboola mbu; “ Eeh! Efuchilila. Ne mwitsa okhuba abacheni banje”

[115] Nibaboola mbu ; “Ewe Musa koo, newe witsa okhusukuna nohomba efwe khuranjilile?”

[116] Musa naboola mbu ; “Enywe sukune” (ranjilile) Kho olwabasukuna belimia tsimoni tsiabandu mana nibabarisia nenibetsa nende obulosi obukhongo

[117] Ne nikhufimbulila Musa mbu “sukuna indambushi yiyio” Mana ni imila biosi ebiabali nibakholele

[118] Obwatoto nibulolekha, ne nibibiya biosi ebia bakholanga

[119] Kho nibashilwa eyo, mana nibatong’a abatiti

[120] Ne Abalosi nibakalukhana okwinamila(Nyasaye) nibasujuda

[121] Nibaboola mbu; “Khusuubile Nyasaye omulesi webindu biosi.”

[122] Nyasaye wa Musa nende Haruni

[123] Firaun naboola mbu; “Oh! Musuubile muye neshili okhubasubula?, Kuno niko omubayo kwa mumbayile mulitokho lino, mbu kho murusiemo abamenyamwo bene litokho, kho.. mwitsa okhulola.”

[124] “Khulabateta emikhono chienyu buchiikha mana nditsa okhubabamba mwesi”

[125] Nibaboola mbu; “Toto efwe ewa- Nyasaye wefu nakhulikalukha”

[126] “Ne ewe shiwalolakhwo libii liosiliosi khwifwe tawe halali mbu khusuubile ebimanyisio bia Nyasaye alwabikhuulile, Nyasaye wefu! Khusundulekho obwifwili(okhwisumilisia) ne okhufwisie nikhuli abasalamu

[127] Ne abakhongo mubandu ba Firaun nibaboola mbu; “koo, olalekha Musa nende Abandu baye banyasie eshialo , ne nibalekha ewe nende abanyasaye bobo” Naboola mbu; “khwitsa okhwira abana babu Abasiani ne khulalekha abakhana, ne toto efwe khuli aba-amani hekulu wabu.”

[128] Musa naboolela Abandu bebe; “Sabe obukhoonyi khu Nyasaye mana mwifwile. Eshialo ni shia Nyasaye, alishihelesia wayenya atong’ekhwo mubasumba baye, ne indukho indayi niyabalia abamuria

[129] Nibaboola mbu; “khusinyisibwe noshili okhwitsila, nende khandi niwakhamala okhwitsila” Musa naboola mbu; “Nyasaye wenyu alasishia omusuku wenyu, ne alabakhola enywe okhuba abaruchi be ebialo bino. Kho alole shinga enywe mulakhola”

[130] Ne toto khwahelesia Abandu ba Firaun eshinyasio khu mika, nende okhubalemelia ebiamo mbu khobanyoole okhwitsulila

[131] Obulayi nibwabolelanga baboolanga mbu; “Buno ni shichira efwe” ne obubii nibubetsela babura khu Musa nende abali ninaye. Toto obubii buboolelanga obo burula khu Nyasaye, (sichila amabii kabu) halali abaanji mubo shibamanyile tawe

[132] Nibaboola mbu; “Kata nimwitsa nende eshimanyisio shiosi shiosi mbu okhuloche nasho shikhulakhusuubila tawe

[133] Mana nikhubarumila imbumbuyeka nende tsisiche, nende tsikhungu nende amashele nende amalasile, okhuba ebimanyisio ebia habulafu, mana nibakhola obufuru ni baba Abandu abamabii

[134] Ne eshinyasio nishakhamala okhubanyoola baboola mbu; “Ewe Musa khusabile Nyasaye wuwo khu kalia akayakhulaka. Nokhurusiliao eshinyasio shino toto khulakhusuubila ne toto khulakhulekhulila Abana ba Israil otsie ninabo

[135] Ne ngala khubayiniliao eshinyasio, okhula ebise bindi, bafunakanga indache

[136] Mana nikhubarunjia nikhubasishia munyanza shichila liyinji liabu khubimanyisio biefu, nende okhubula nabio oluchendo

[137] Mana nikhuchelamia- nikhuhelesia- Abandu balolekhananga abateshele, ebukwe nende mumbo weshialo ewakhwarayo tsikhabi. Mana likhuwa lilayi lia- Nyasaye nilileng’ana khubaana ba Israil, khulwa okhwisumilisia khwabu, mana nikhusishia aka Firaun yakholanga nende Abandu bebe, nende bilia ebiabombakhanga

[138] Mana nikhubusia Abaana ba Israil munyanza mana nibabura khubandu balamanga ebifwanani, nibaboola mbu; “Ewe Musa, khukholele Abanyasaye fwesi shingala Abandu abo boosi bali nende Abanyasaye” Naboola mbu; “Toto enywe muli Abandu bakholanga obusilu.”

[139] “Bano akabali ninako kano ketsa okhusikha ne ni amakhaya akabakholanga.”

[140] Naboola; “koo ebakonyele Abanyasaye abundu wa Nyasaye, naye niye owabachingula hekulu okhushila Abandu boosi

[141] “Ne (yitsulile) olwa khwabahabina khu Firaun nende Abandu be, ababetsanga eshinyasio, eshibii muno olwa beranga Abana benyu abasiani, nibalekha abakhana abalamu, ne mu ako kali amatemo amakhongo okhurula khu Nyasaye wenyu

[142] Ne khwalaka Musa tsinyanga amakhumi kataru ne nikhumetakhwo ekhumi, nibiula ebise bia Nyasaye wuwe tsinyanga amakhumi kane. Mana Musa Naboolela Omusiani wabu, Haruni mbu: “Tila habundu wanje okhwimilila Abandu banje ne obe omulayi, ne olalonda tsinjila tsiabalia bakholanga obubii tawe.”

[143] Ne Musa olwa yoola khubise biefu, mana Nyasaye wuwe nalomaloma ninaye, yaboola mbu:“Nyasaye wanje nzechesiekhwo ekhulole” Yaboola; mbu: “shiwakhandola tawe halali henga khu lwanda-luli imbeli wuwo olo nilulatong’a habundu walwo oba witsa okhundola.” Kho Nyasaye wuwe olwa yelolosia khulwanda yakhola olwanda lwa tonyokha tonyokha, mana Musa nakwa hasi nasuma. Olwa yakalusia omwoyo naboola mbu;“oluyali nolulwo, esaba obulesheli khwiwe, nasi endi mubasuubili bokhuranga ”

[144] Nyasaye naboola mbu; “Ewe Musa toto esie ekhwawule mubandu khulwa oburume bwanje nende okhulomaloma khwo ninasi, kho bukula kekhwelesinjia ne obe mubalia bakhupanga orio.”

[145] Nenikhumuhandichila mutaurati eyo amachelo (Kabuli imbia) nende amebaalo kabuli eshindu, kho katile nende amani ne olomesie Abandu okhutila amalayi kano. Hambi ano nditsa okhubeechesia eshimenyo shabandu ababii

[146] “Ndalabekalila balia belolanga mubufuru khushialo munjila ilali ya toto, balia buli eshimanyisio shiabalola shibasuubila tawe, ne nibalola injila yobulunjifu shibayitila mbu niyo injila tawe, halali nibalola injila yobukori bayibukulanga mbu niyo injila. Endio nilwokhuba mbu bayingana ebimanyisio biefu nende okhubula ninabio oluchendo

[147] Nebalia abayingana khubimanyisio biefunendeokhukhung’aanakhwomwikulu, ebikhole biabu biabiya, kho balirungwa akandi akali kalia kabakholanga

[148] Olwa Musa yarula-(natsia okhwenda amalako) Abandu bebe bakhola khubirone biabu eshimosi, eshifwanani shiananga, Koo shibalolakhwo mbu eshinyasaye shiabu esho sishilomalomanga nabo tawe, nohomba sishibalunjisinjia khunjila tawe. Halali bashikholasa okhuba Nyasaye mana nibaba abamabii

[149] Ne olwa beyitsulisia, nibalola mbu toto bamalile okhukora, baboola mbu; “Nyasaye nalakhubeela tsimababaasi tawe, toto khulaba mubalia abatibile”

[150] Olwa Musa yachelela khubandu bebe nasinyishe khandi nabelele, Yaboola mbu: “obubii buli burie buno bwamukholele inyuma wanje nindakharula? Koo muranjilile likhuwa lia Nyasaye wenyu,” Mana nasukuna tsimbao tsilia, mana natila omurwe kwo musiani wabu okhukhwesa ebuleka wuwe, (Haruni)naboola mbu: “Ewe Omwana wa mama wanje! Toto Abandu bandechele, kata babeele ahambi okhunzira, kho olasangasia abasuku okhubela esie tawe, nohomba olara esie halala nende Abandu ababii tawe.”

[151] Naboola; “Nyasaye undeshele nende Omusiani wefu, ne okhwinjisie mutsimbabaasi tsitsio ewe toto oli wetsimbabaasi muno ukhushila abetsimbabaasi boosi.”

[152] Toto balia abakhola eshimosi okhuba Nyasaye balanyoola oburuma okhurula khu Mulesi wabu, nende ubuteshele mubulamu bwokhushialo, na endio nilo olwa khurunganga abachishi bachikhanga

[153] Ne balia abakhola amabii mana nibekanila nibakhamala mana nibasuubila, Toto Nyasaye wuwo Omulesi alabaleshela shichila niye Omunji wobulesheli nende Owetsimbabaasi tsinyinji

[154] Ne olwa liruma lia Musa liakalukha hasi, yabukula tsimbao tsilia. Ne khumahandiko katsio obulunjifu nende tsimbabaasi khubalia baritsanga Nyasaye wabu Omulesi

[155] Musa nalobola Abandu amakhumi saba(abalayi) mubandu baye, khundache yefu, mana omurengo omukhongo shingala kwaboolela Musa naboola; “Nyasaye wanje, wenyanga wakhabasishiye halala ninasi khale. Ukhusishia khulwo khubeela akabasilu bakhola mwifwe? kano shikali 7. halali amatemo koko, khuko olekha yakora owawenya, ne olunjisia owawenya , ewe newe omuliindi wefu, khokhuleshele ebionono biefu mana okhubeele tsimbabaasi, nawe newe omulesheli omulayi muno owabalesheli.’’

[156] “Ne okhuhandichile amalayi khushialo khuno, nende mutsuli mwikulu. Efwe khukhukalushila; Nyasaye naboola mbu: “Eshinyasio shianje ndalahelesia owandenya, ne tsimbabaasi tsianje tsiaswana buli eshindu; nditsa okhutsiandichila balia baritsanga akandakaana, nende barusinjia eshihanwa, nende basuubilanga tsinyali tsiefu

[157] “Balia abaloondanga injila yomurumwa, Omurumwa ulamanya okhusoma nende okhuhandika tawe, owabalolanga yahandikwa Muitaurati nende mu Injili uwubachelelanga okhukhola amalayi nende okhubakania okhukhola amabii, nende akhubatiukhula emisiko nende eminyororo chiabali nibaboywa. Kho balia abamusuubila mana nibamuwa oluyali mana nibamuhabina, mana nibaloonda obulafu obweshibwa halala ninaye abo nibo balibura

[158] Boola;(Ewe Mohammad) “ enywe Abandu Esie endi Omurumwa wa Nyasaye, khwinywe mwesi, owuli nende obwami bwo mwikulu nende khushialo obulao Nyasaye wundi ulali Ye tawe , ahananga obulamu khandi niye ufwisinjia, kho suubile khu Nyasaye nende Omurumwa wuwe, owakorwa okhusoma nohomba okhuhandika, Owusubilanga Nyasaye nende amakhuwa keke, kho muloonde injila yiye kho munyoole okhukololokha

[159] Ne mubandu ba Musa balimwo Abandu balunjisinjia abashiabwe khubwatoto. Ne khubwatoto baleeng’asinjia

[160] Nikhubakabula tsimbia ekhumi na tsibili, emikanda chaukhane. Ne nikhufimbulila Musa olwa Abandu baye bamusaba amatsi mbu; “khupa lichina nende indabushi yiyio” mana amatsi nikarundukha okhurula mwichina elo, nikekhola tsindoto ekhumi natsibili, ne buli Omundu namanya habundu waye wokhunywa. Nikhubakholela eshinikha shiamaleesi, ne nikhubeshilia Mana nende Salwa. (Nikhubaboolela); “Mulie ebilayi biakhubakabilekhwo bino” Shibakholela efwe obubii tawe halali abeene nibo bekholela obubii

[161] Ne(betsulisie) olwababoolelwa mbu; “ikhale mulukongo luno, (Beitul maqaddas)- muliemwo wosi wosi amwenya, nemuboole (ebise biokhwinjila) “khuleshele ebionono biefu” ne mwinjile mumuliango nimwihotselesiye, khwitsa okhubaleshela tsimbi tsienyu, nekhulametela obulayi balia bakholanga amalayi

[162] Halali- Balia bakholela obubii emioyo chiabu mubo bakalukhania amakhuwa akabalali nibaboolelwa, mana nikhubeshilia eshinyasio okhurula mwikulu, shingala bekholela obubii abeene

[163] Nebarebekhwo amakhuwa kolukongo lwali ahambi nende inyanza. Olwa bafunakanga lilako lia Jumamosi. Olwe tsinyeni tsiabu tsiabetselanga hekulu hekulu- tsinyanga tsia Jumamosi tsiabu, ne tsinyanga tsilali tsia jimamosi shitsiabetselanga tawe. Ne endio nilwakhwabahelesia amatemo khulwa okhukhaya khwabu

[164] Ne (betsulisie) Abandu bandi mubo shingala baboola mbu: “Bukhala shina bwokhukania Abandu bomanyile mbu Nyasaye alabasishia nohomba alabahelesia eshinyasio eshilulu” Nibaboola mbu; “Kho khube nende shichila imbeli wa Nyasaye wenyu, bakhaba bario baria.”

[165] Kho olwabaleka akabetsulisibungwa, 7. khwahabina balia abakaninjia Abandu okhukhola amabii, mana nikhusandia balia abakhola amabii eshinyasio eshibi khulwa obubii bwabu

[166] Ne olwa bafura nibaloba okhulekha akabakanibwa, khwababoolela mbu; “Mube amashene amakhunge – (Kalondungwa- kabula oluyali)

[167] Ne (betsulisie) olwa Nyasaye wuwo yara habulafu mbu yetsia okhubarerera Abandu betsa okhubasandia okhusandia okhubii okhula inyanga yeyindukho. Toto Nyasaye wuwo ni Omwangu weshinyasio. Ne toto ye ni Omunji wetsimbabaasi

[168] Mana nikhubakabukhania(abayahudi) khushialo emikanda chikabukhane. Ne balimwo abalayi ne abandi balalibario tawe, Mana nikhubatema khumalayi nende khumabii bakhaba bario banyoola okhukalukha

[169] Mana nilwitsa inyuma wabu(wabayahudi abo) Olwibulo olubii, alwaleshelwa eshitabu babukulanga ebiakanwa bio mushialo muno, nibaboola mbu; “khwitsa okhuleshelwa” nende ebindi bieimbia ino nibiboolela nibabukula. Koo shikaboolelakhwo amalakano mushitabu mbu balabolakhwo khu- Nyasaye halali akatoto? Nabo bamala okhusoma kalimwo. Ne inzu yomwikulu iliba indayi muno khubalia abaritsanga Nyasaye. Koo shibamanyangakhwo tawe

[170] Ne balia batilanga eshitabu, mana nibalumilila okhulaama,(khulibarunga amalayi). Toto efwe shikhukosinjia omurungo okwa bakholi bamalayi tawe

[171] Ne olwakhwasiula olukulu nibiba shinga lilesi hekulu wabu nibapara mbu lulabakwila. (Nikhubaboolela mbu); Tile nende amani akakhwabahelesia kano na yitsulile kalimwo mwakhaba murio mwanyoola okhuria

[172] Ne(yitsulila) Olwa Nyasaye wuwo olwa yabukula mubandu okhurula mubo mulwibulo lwabu, mana nabakhola abaloli khumioyo chiabu abeene. (naboola);” Koo isie shendi Nyasaye wenyu?” Nibaboola mbu “Eeh- khurusia obuloli mbu (Ewe oli Nyasaye wefu)” Nyasaye nababoolela mbu ; “Muletsa okhuboola inyanga yeyindukho mbu efwe khwali khung’ang’alile tawe

[173] Nohomba mwaboola mbu: “bapapa befu nibo batsokasia khale, nafu khuli olwibulo lweyinyuma wabu, Kho witsa okhusishia khukabakori bakholanga.”

[174] Na endio nilwa khwinoosinjia tsinyali tsiefu, bakhaba bario banyoola okhukalukha

[175] Ne basomele amakhuwa ka balia abakhwahelesia tsinyaali tsiefu mana nibatsifwalulamwo mana shetani nabaninabo, nibaba mubalia abakora

[176] Ne khwenyanga khwakhabachingulile khutsio, halali bo bahandila- khushialo(okhwenya obwikhoyo nende okhwibilila mwikulu) Mana nibaloonda obwikombi bwabu. Ifwani yabu ili shinga imbwa noyikhupila oluyoka- iheesana, nenoyilekha iheesana butswa. Eyo niyo ifwani yabandu bayingasia ebimanyisio biefu, kho bakanile tsingano bakhaba bario baparamwo

[177] Ni obubii buliburie buno ifwani ya balia abaingasinjia ebimanyisio biefu, ne ni emioyo chiabu abeene nichio echabakholelanga obubii

[178] Aba Nyasaye alunjisia abo nibo abalunjifu, Ne aba alalekha bakore, abo nibo abasikha

[179] Netoto efwe khwalonjela omulilo kwa Jahannam abaanji Mumajini nende Abandu. Bali nende emioyo halali shibachikhonyelanga okhumanya tawe, Bali nende tsimoni halali shibalolelanga tawe, bali nende amarwi halali shibakawulilanga tawe, abo bali shinga tsisolo, halali abo nababii muno, abo nibo abakoyana

[180] Ne Nyasaye ali nende amera amalayi kho mukekhonyele okhumusaba. Ne muleshe balia banyasinjia oluyali lwa amera keke. Hambi ano betsa okhurungwa kalia akabakholanga

[181] Ne mubalia abakhwaloonga abandi baliwo balunjisinjia khubwatoto ne khubwo baleng’asinjia

[182] Ne balia abayingana khubimanyisio biefu khulabakhwesa kaala kaala munjila yabalamanyile tawe

[183] Nasi nditsa okhubahelesia ebise. Toto amani kanje namasiro

[184] Koo, shibetsulilangakhwo tawe, Omundu wabu oyo abula lilalu? Shali halali Omwikanyilisi owabulafu

[185] Koo, shibahengangakhwo obwami bwomwikulu nende mushialo, nende ebindu bia Nyasaye yalonga? Mbu awundi indukho yabu ili ahambi, Mana kalali kano, ni makhuwa shina akandi akabalasuubila

[186] Aba Nyasaye alekhulanga bakora, abo babula ubalunjisia, ne abalekha mubukori bwabu nibayelayela

[187] Bakhurebanga ibise bieyindukho(eyo). Okhurulila khwayo khuliba lina? Boola; “Obumanyi bwayo buli khu Nyasaye wenje, abulao umanyile ebise biayo halali ye mwene. Ni isiro mwikulu nende khushialo, shilibetsela tawe halali mapwoka. Bakhurebanga opara mbu newe wayikoonya wayimanya. Boola; obumanyi bwayo buli khu Nyasaye, halali Abandu abanji shibamanyile tawe

[188] Boola; “Embula obunyali bwokhwikhonya nohomba bwokhwilinda khumabii halali shinga Nyasaye yenya. Ne embetsanga mbu ndamanya akefisile ndakhametele okhukhola amalayi mubunji, ne obubii bwosibwosi shibwakhanzulilekhwo tawe, esie shendi shiosi shiosi tawe halali Omwikanyilisi nende Omusuubisia wabandu basuubilanga

[189] Niye owabaloonga okhurula khumundu mulala, ne okhurula khumundu oyo nalonga abakhasi babu, kho banyoole obwihotselefu (okhurula khu bakhasi). Ne olwa yenjilananga naye atilanga inda-inyangu eyachendanga nayo. Ne olwayisitoyanga (inda) balamanga Nyasaye wabu (omukhasi nomusatsa); “Nakhuhelesia Omwana omulayi toto khulaba mubalia abakhupanga orio?”

[190] Olwa abahelesinjia(omwana)omulayi. Bakholelanga Nyasaye obutsokaasi khushilia eshia bahelesiyie, Nyasaye niwoluyali muno ne ali hekulu khukabamutsokasinjia yako

[191] Batsokaasinjia balia abalaloonga eshindu, nabo boosi nibaloongwa

[192] Ne shibanyala okhubakhoonya tawe, nohomba bo okhwikhoonya abene tawe

[193] Ne nimubalanga khubulunjifu, shibalabalondakhwo tawe, Ni halalasa awo, nimubalanga nohomba nimuwuleela

[194] Toto balia abamulaamanga abalali Nyasaye tawe ni Abandu butswa shinga enywe, Mubalanjekhwo, mana bafuchilile, nimuli mbu muli abatoto

[195] Koo, bali nende ibilenje biokhuchendela? Nohomba bali nende emikhono chiokhutilila? Nohomba bali nende tsimoni tsiabalolelanga? Nohomba bali nende amarwi kabawulilanga? Boola; lanje abamutsokaasinjia Nyasaye ninabo, mana mukhole obutobela bwenyu(bwokhusishia)- ne mulambesie ebisi biosi biosi tawe. (musishie toto nikali mbu munyala)

[196] Toto Omulindi wanje ni Nyasaye oweshia eshitabu, naye niye olindanga abakholanga amalayi

[197] Nebalia abamulamanga balali Nyasaye shibanyala okhubahabina nohomba okhwihabina abeene tawe

[198] Ne nobalaanga khubulunjifu shibawulila tawe, ne olabalola bakhuhenganga halali shibalolanga tawe

[199] Tilana nende obulesheli, ne alomesie amalayi, ne olekhane nende abasilu

[200] Ne eshibeyibeyi shia shetani nishikhunyasia, wilinde khu Nyasaye - (boola; Audhu billahi)- . Toto ye niye omuwulili omumanyi muno

[201] Balia abaritsanga Nyasaye olwa shetani obafulukunyanga, betsulilanga mana balola injila

[202] Ne Abasiani babu (shetani) , babakhweselanga mubukori mana bo shibachong’anga tawe

[203] Nenolabarereraeshimanyisioshiabenya nibaboola mbu; “shiwakhashikasiye butswa eweomwene?” Boolambu’“esieenoondanga kefimbulilwe okhurula khu Nyasaye wanje. Bino ni ebimanyisio birulanga khu Nyasaye wenyu ne ni obulunjifu nende tsimbabaasi khubandu basuubilanga.”

[204] Ne Ikurani nisomwa murechelesie ne muwulele mwakhaba murio mwanyoola tsimbambaasi

[205] Ne Murumbule Nyasaye wuwo mumwoyo kwao mubwihotselefu nende muburii, ne olakhupa oluyoka mumakhuwa tawe, itsuli nende ing’olobe, ne olaba mubalia abang’ang’aala tawe

[206] Balia abali ewa Nyasaye wuwo(nabo ni Malaika) shibali abafuru okhumukholela ibada yiyie tawe, ne bamwitsominjia ne bamwinamilanga

[1] Bakhurebanga omwandu kunyoolelwe mwiyie.(Kukabwe kurie) Boola; “omwandu kunyoolelwe mwiyie ni kwa Nyasaye, nende Omurumwa (londe shingala betsa okhubakaba). Kho murie Nyasaye ne mukasie omulembe hakari wenyu, ne muwulile Nyasaye nende Omurumwa wuwe ni muli Abasuubili (abahabwene)

[2] Toto Abasuubili ba habwene nibalia olwa Nyasaye arumbulwa, emioyo chiabu chitsulamwo oburi, ne nibasomelwa tsinyaali tsiefu tsibameta obusuubili, ne Nyasaye wabu butswa niye wabesikanga

[3] Balia abalumilanga okhulaama, ne khushia khubakabile barusinjia eshihanwa

[4] Abo nibo abasuubili batoto, bali nende obukhongo ewa Nyasaye wabu, nende eshileshelo nende omukabo omulayi

[5] Shinga olwa Nyasaye wuwo yakhurusia munzu yiyio khubwatoto, ne omukanda mulala mubasuubili nikulachamila tawe

[6] Bayingana ninawe obwatoto nibumalile okhurumbukha, opara mbu balumungwa okhutsia mulumbe nibalola

[7] Ne olwa Nyasaye yabalaka mbu omukanda mulala kulaba okwenyu, mumikanda chibili chilia. Nanyu mwali muyanzile munyoole omukanda kubula amawa(amani) kube okwenyu. Ne Nyasaye yenya okhura habulafu obwatoto khumakhuwa keke ne atete emisi chiabakhayi

[8] Kho anyoole okhwemia obulaamba, nende okhukwishia obubeyi, kata ababii nibasinyishe

[9] Olwamwasabaobukhoonyikhu- Nyasaye wenyu, mana nabakalusia mbu; “Toto esie nditsa okhubahelesia Abamalaika iyelefu ndala abetsa okhubetsela malondokhana

[10] Ne Nyasaye shiyakhola kano halali okhuba obusangali khwinywe nende okhutinyisia emioyo chienyu. Ne obuhabini bubulao halali okhurula khu Nyasaye. Ne toto Nyasaye niwaamani Owamachesi muno

[11] (Itsulila) olwa yabarerera tsindoolo eshimanyisio shio mulembe kurulanga ewuwe; mana nabeshilia amatsi okhurula mwikulu okhubatswenula nende okhubarusiakhwo obumali bwa shetani, nende okhuboya halala emioyo nende okhutinyia ebilenje bienyu hasi

[12] (Itsulila) olwa Nyasaye wuwo yabafimbulila Malaika(nababoolela); “Toto eise endi halala ninanyu, kho re amani mubalia abasuubila, nditsa okhura oburi mumioyo chia abakhayi, kho mubakhupe hekulu khwikosi ne mutete tsinzala

[13] Endio nilwokhuba mbu baloba Nyasaye nende Omurumwa. Ne ulia uloba Nyasaye nende Omurumwa wuwe, toto Nyasaye ni weshinyasio eshilulu

[14] Kho mupile netoto abakhayi bali nende eshinyasio shomulilo

[15] Enywe abasuubila nimubukanana bakoyakoyania. muliyie nende abakhayi, mulabakalukhanilia emikongo chienyu tawe

[16] Ne ulia ulakalukhania omukongo kukwe inyanga eyo, halali nakalukhananga khulwa okhulwana, nohomba okhutsia mumukanda elubeka wuwe okhukhonya, alaba akhoyeshela liruma lia Nyasaye, ne eshimenyo shiaye ni mumulilo. Nao ni habundu abii muno wokhukalukha

[17] Shimwabeera tawe halali Nyasaye niye owabeera. Ne shiwalasa olwa walasa tawe halali Nyasaye niye walasa, Nyasaye yakhola kano khulwa okhuhelesia abasuubili obulunjifu burulanga ewuwe, Toto Nyasaye niye Omuwulili Omumanyi muno

[18] Khukano netoto Nyasaye yetsa okhutendeyia amani kabakhayi

[19] Nimwenya okhumanya (okhulola obwatoto nende obubeyi) Obwatoto bwamalile okhuboolela. Ne nimulekha bulabaobulayikhwinywe, nenimukalushila fwesi khulakalushila ne Abandu benyu shinibabakhonyekhwo shiosi shiosi tawe Kata nibali abanji, Ne Nyasaye ali halala nende Abasuubili

[20] Enywe abasuubila! Murie Nyasaye nende Omurumwa wuwe, mulamwilukha tawe nimuwulilanga

[21] Ne mulaba shinga balia baboolanga mbu; “Khuwulile” nekhane bashili okhuwulila

[22] Toto tsisolo tsimbi muno imbeli wa Nyasaye- nitsilia tsikholanga mbu shitsiwulilanga tawe- nitsindimbe, tsisilu. Tsilia tsilekhonyela obwongo tawe

[23] Ne Nyasaye alolanga obulayi bwosi bwosi mubo yakha bawulilisiye nekata abawulilisia bakhakalukhane butswa

[24] Enywe abasuubila mufuchilile omulango kwa Nyasaye nende Omurumwa olwa abalanga mukalia aketsa okhubahelesia obulamu, amalayi, ne manye mbu Nyasaye yenjilanga hakari womundu nende omwoyo kukwe, ne ewuwe ni amulikhung’asibwa

[25] Ne murie eshinyasio eshilakhaya okhunyoola balia bakhola obubii bonyene mwinywe, ne mumanye mbu Nyasaye ni omululu weshinyasio

[26] Ne yitsulile, olwa mwali batiti, olwa mwalolekhananga abateshele khushialo, olwa mwaritsanga Abandu okhubayula, mana nabahelesia habundu alayi okhwikhala, mana nabahelesia amani khubuhabini bubwe, ne nabahelesia omukabo omulayi khomunyoole okhupa orio

[27] Enywe abasuubila, mulakholela Nyasaye nende Omurumwa obulianga tawe. Ne mulakhola obulianga khukhusuubilana khwenyu tawe- nimumanyile

[28] Ne manye mbu emiandu chienyu nende abana benyu ni amatemo. Ne toto Nyasaye ali nende omurungo omukhongo

[29] Enywe abasuubila ni muria Nyasaye, yetsa okhubahelesia amachesi kokhwawukhasia amalayi nende amabii, ne yetsa okhubaleshela ebionono bienyu, ne alabaleshela, Ne Nyasaye niwetsimbabaasi tsinyinji

[30] Olwa abakhayi bakhututila mbu bakhutile nohomba bakhwire, nohomba bakhuwuyie mana nibatuta, ne Nyasaye nakalukhania obututi bwabu, ne Nyasaye niye Omulayi muno mukhukalukhania

[31] Ne tsinyaali tsiefu nibasomelwa baboolanga mbu; “Khumalile okhuwulila ne nikhwenya fwesi khunyala okhuboola nga ako” Kano shini shiosi shiosi tawe, halali tsingano tsia bandu bakhale

[32] Ne olwababoola mbu; “ Ewe Nyasaye nikali mbu kano niko obwatoto okhurula khwiwe, mana khuupile nende ifula yamachina karulanga mwikulu, nohomba khurerere eshinyasio eshilulu.”

[33] Ne Nyasaye shiyali wokhubahelesia eshinyasio nawe Omurumwa nolimubo halala tawe. Ne Nyasaye shiyali wokhubahelesia eshinyasio ne abandi mubo nibasabanga eshileshelo

[34] Nabo bali nende lilayi shina lia Nyasaye alabahelesia eshinyasio, nikali mbu bekalilanga Abandu omusikiti okwoluyali oko, Ne shini abaliindi bakwo tawe, toto abalindi bakwo nibalia abaria Nyasaye, ne obunji mubo shibamanyile shiosi shiosi tawe

[35] Ne isaala yabu munzu yoluyali shiyali halali okhupa emilosi nende amakhofi. Kho pile eshinyasio shingala mwakhayanga

[36] Toto balia abakhaya barusinjia omwandu kwabu okhwikalila injila ya Nyasaye, betsa okhukurusia mana kalababeela ameyitsulisio mana balashilwa. Ne balia abakhaya balikhung’asibwa mumulilo

[37] Kho Nyasaye anyoole okhwawukhasia ababii nende abalayi, nende okhura abamabii hekulu ewa abamabii bandi nende okhubabumba boosi halala nende okhubasukuna mumulilo. Abo nibo banyoola okhusikha

[38] Boolela balia bakhaya mbu; “Nibalekha, balaleshelwa akabura, ne nibakalushila, kamala okhubaburira amachelasio ka bandu bakhale.”

[39] Ne khupane ninabo okhuula mumale amatemo nende okhusandibwa. Ne idini ibe yosi shichila Nyasaye. Ne nibalekha, awo toto Nyasaye alolanga muno akabakholanga

[40] Ne ni bakalukhana manye mbu Nyasaye niye Omwami wenyu ni Omulesi nende Omukhoonyi Omulayi

[41] Ne manye mbu shiosi shiosi shiamulanyoola muliyie ebuleka washio wa kharano ni khulwa Nyasaye nende Omurumwa wuwe, nende Abekho nende Abana Abafwilwa nende Abamanani nende Abalikhuluchendo, toto nikali mbu mwasuubila Nyasaye nende akakhweshila khumusumba wefu inyanga yobukabukhasio, inyanga yemikanda chibili chiabukanana, Ne Nyasaye niye mwene obunyali hekulu wa buli eshindu

[42] Olwa mwali mwitwoma eliasi nabo nibali mwitwoma elia hale, omukanda kwomwandu (kwa Abu Sufiyan) nikuli emwalo wenyu, ne mulakananga ebise mwakhakabukhane, halali ni mbu okhula Nyasaye abusie likhuwa liali nilikhoyekhane okhubura, kho ulia usikha asikhe ebifune bili habulafu, ne unyoola obulamu amenye nende ebifune bili habulafu. Ne toto Nyasaye ni Owokhuwulila Omumanyi muno

[43] Olwa Nyasaye yabechesia mumaloro kenyu mbu nibatiti, ne abechesinjia mbu bo ni abanji mwakhafwile emioyo, ne mwakhasolanilekhwo, halali Nyasaye nabalinda. Toto ye ni Omumanyi muno owakali mubilifu

[44] Ne alwayabechesia mutsimoni tsienyu olwa mwabukanana nimubalola mbu nibatiti, ne nabakhola okhuba batiti mutsimoni tsiabu, kho libure likhuwa liayalomesia okhubura, ne amakhuwa koosi kakalusibwa ewa Nyasaye

[45] Enywe abasuubila olwa mubukanana nende omukanda kweliyie, (okhupana) mutinye-obulayi, ne mwitsulile Nyasaye mubunji mwakhaba murio mwanyoola okhubura

[46] Ne murie Nyasaye nende Omurumwa wuwe, ne mulasoolana tawe amakhuwa kenyu kabiya ne amani kenyu kakora, ne mwifwile toto Nyasaye ali halala nende abefwilanga

[47] Ne mulabashinga balia barula mutsingo tsiabu nibakhumba nibelolosia khubandu, nibekalila injila ya Nyasaye, ne Nyasaye abotokhananga kosi kabakholanga

[48] Olwashetaniyabaronelaebikholebiabu, mana nababoolela mbu; “Abulao ubashila nyanga yino, nasi endi halala ninenyu”, Ne olwa ekikanda chibili chabalwani chiabukanana , shetani nakalukha inyuma naboola mbu; “Esie shendi halala ninanyu tawe, esie endolanga kamulalolanga, esie ndaria Nyasaye, ne Nyasaye ni weshinyasio eshilulu.”

[49] Olwa abeshikhabili nende balia be mioyo chiabu chilimo obulwale baboola mbu; “Abandu bano Abasalamu idini yabu ibakatiye” Ne ulia wisika Nyasaye toto Nyasaye niye Owamani Owamachesi muno

[50] Ne ololakhwo shinga Abamalaika bafwisinjia abakhayi, olwabababundulanga obweni bwabu nende emikongo chiabu, Nibababoolela mbu: “ mupile eshinyasio shiokhuyia.”

[51] “Endio nilwokhuba kalia akemikhono chienyu chiakhola, ne toto Nyasaye shakholelanga Omundu yesi yesi obubii tawe

[52] Shinga Abandu ba Firauni nende balia baliwo imbeli wabu, bakhaya ebimanyisio bia Nyasaye, kho Nyasaye nababukula khulwe tsimbii tsiabu; Toto Nyasaye niwa amani ne ali nende eshinyasio eshilulu

[53] Endio nilwokhuba mbu toto Nyasaye shakalukhaninjia tsimbabaasi tsia ahelesiye Abandu tawe, okhula Abandu beene abo bakalukhanie kali mumioyo chiabu. Toto Nyasaye ni Omuwulili Omumanyi muno

[54] Bali shinga Abandu ba Firaun nende baliabaliimbeliwabu, bakhayaebimanyisio bia Nyasaye, mana nikhubasishia khulwa okhubeela tsimbii tsiabu, Ne nikhusishia Abandu ba Firaun mumatsi, ne boosi bali Abandu ababii

[55] Tsisolo tsimbi muno imbeli wa Nyasaye (Abandu) ni balia abakhayanga, mana shibasubilanga tawe

[56] Balia nokhola nabo indakano, bakalukhana buli buli, ne shibaritsanga tawe

[57] Kho nobanyoola mwiyie ubatafie balia bali inyuma wabu khobanyoole okhumanya

[58] Ne noria obulianga bwabandu bamukholele ninabo indakano, basukunile mubuleng’afu indache yabu; Toto Nyasaye shiyachama Abandu bakholanga obulianga tawe

[59] Ne abakhayi balapara mbu nibo abaranjilila bali-imbeli, tawe abo shibakhashila Nyasaye tawe

[60] Kho mwirecheshe khulwa bo shingala munyala nende amani nende tsifarasi tsiaboywa atsirecheshele; murisilie khubio Abasuku ba Nyasaye nende Abasuku benyu, nende Abandi abalali abo, abamulamanyile tawe halali Nyasaye niye ubamanyile. Ne shiosi shiosi shiamurusia imbeli wa Nyasaye mulakalusilibwa, ne shimulikholelwa obubii tawe

[61] Ne Abasuku abo nibakhaaba omulembe wesitsila ebwene eyo, ne wisiche Nyasaye, toto ye niye owuwulilanga omumanyi muno

[62] Ne nibenya okhukatia toto Nyasaye okhuyela, niye owakhukhoonya nende obuhabini bubwe, nende balia abasubila

[63] Ne yara halala emioyo chiabu, kata norusia omwandu kuli khushialo shino kwosi, shiwakhara halala emioyo chiabu chiosi tawe, halali Nyasaye yara halala emioyo chiabu, Toto ye ni Owobunyali Owamachesi muno

[64] Ewe Omurumwa, Nyasaye okhuyela nende balia bakhuloonda mubasuubili

[65] Ewe Omurumwa, lomesia Abasuubili batsie okhupana, nibali mwinywe Abandu amakhumi kabili abefwili betsa okhushila Abandu tsimia tsibili, ne nibali abandu imia betsa okhushila iyelefu mubalia abakhaya, endio nilwokhuba mbu ni Abandu balaparanga tawe

[66] Lano Nyasaye yakhabatoratoresilia, ne amanyile mbu mwinywe balimwo abateshele, kho nimuli Abandu imia ndala abefwili mwitsa okhushila Abandu tsimia tsibili, Ne nimuli iyelefu mulashila Abandu tsiyelefu tsibili khu bunyali bwa Nyasaye, ne Nyasaye ali halala nende abefwilanga

[67] Shakhoyeshela Omurumwa okhuba nende abatilwa muliyie tawe, okhula akhupane, mana ashile khushialo, mwenyanga ebindu biokhushialo, ne Nyasaye amwenyela enywe bio mwikulu. Ne Nyasaye Niwa amani Owamachesi muno

[68] Ne likhayanga okhuba likhuwa liaranjilila okhurula khu-Nyasaye, Toto mwakhanyolele eshinyasio eshikhongo khukamwabukula ako

[69] Kho mulie khubiamwanyoola muliyie, nibiabwene okhulibwa, ne murie Nyasaye toto Nyasaye ni Omunji wobulesheli Omunji wetsimbabaasi

[70] Ewe Omurumwa boolela abamwatila bali mumikhono chienyu mbu; “Nyasaye nalola obulayi bwosibwosi mumioyo chienyu alabahelesia ebilayi muno okhushila bilia abiabukulwa khwinywe ne yetsa okhubaleshela. Nyasaye ni Omunji wobulesheli Owetsimbabaasi muno

[71] Ne nibenya okhukholela obulianga(okhukatia)bamala okhukholela Nyasaye inyuma eyo, mana Nyasaye nabashila. Ne Nyasaye ni Omumanyi Owamachesi muno

[72] Toto balia basubila mana nibawuya mana nibalwanila idini nende omwandu kwabu nende emioyo chiabu khunjila ya Nyasaye, nende balia bahelesia(muhajirina) eshimenyo mana nibahabina(idini), abo nibo abeetsa abeene khubeene. Ne balia basuubila mana nibalawuya enywe mubula omunwa kwokhubachelama shiosi shiosi okhuula bawuye, ne nibenya halali mubahabine mudini mubahabine, okhuyiniakhwo khubandu balia abamulinabo indakano. Ne Nyasaye alolanga kamukholanga

[73] Balia abakhaya ni abetsa abeene khubeene, ne nimulakhola murio tawe, kalaba amatemo khushialo nende obulianga obunji

[74] Ne balia abasuubila mana nibawuya, mana nibalwana khunjila ya Nyasaye, nende balia bahelesia Muhajrina eshimenyo, nibabahabina, abo nibo Abasuubili batoto, bali nende obulesheli nende omukabo omulayi

[75] Ne balia abasuubila (okhurula owo) mana nibawuya mana nibalwana halala ninenyu, abo bali ninenyu, Ne abananda bakhoyekhananga okhuritsana abeene khubeene, Toto Nyasaye ni Omumanyi wabuli eshindu

[1] (Lino) nilikhuwa liokhukhalaka indakano lirula khu Nyasaye nende Omurumwa wuwe, litsa khubalia abamwalakana ninabo mubatsokasi

[2] Kho chende khushialo emiesi chine, ne manye mbu shimwamanya okhushila Nyasaye tawe, ne Nyasaye niye wokhututuyia Abakhayi

[3] Ne ni limanyisio lirula khu Nyasaye nende Omurumwa wuwe khu Bandu bamanye inyanga ya Haji ikhongo mbu, toto Nyasaye ali ehale khubatsokasi nende Omurumwa wuwe yesi(ali ehale ninabo). Ne nimusaba eshileshelo awo nobulayi khwinywe, ne nimukhola omurwe omumu mumanye mbu enywe shimwakhashila Nyasaye tawe, ne subisia abakhayi mbu balinyoola eshinyasio eshilulu

[4] Okhuyiniakhwo balia abawalakana ninabo mubatsokasi mana nibakhaya okhufunaka shiosi shiosi mundakano nohomba shibakhonyakhwo yesiyesi okhulwania enywe tawe, abo mubetsusilie indakano yabu(mulayikhalaka tawe) okhula ebise biamwalakana, toto Nyasaye yachama balia abamuria

[5] Ne imiesi chioluyali nichakhawa, kho mwire Abatsokasi wosi wosi amubanyoola, ne mubatile ne mubabotokhane, ne mubekhalile buli khunjila, ne nibasaba eshileshelo Nyasaye, mana balumilile okhulaama nende okhurusia eshihanwa, mubalekhule, toto Nyasaye ni Omulesheli Owetsimbabaasi muno

[6] Ne mulala khubakhayi nakhusaba mbu omulinde, mulinde awulile amakhuwa ka Nyasaye mana omusie habundu wuwe womulembe, endio nilwokhuba mbu ni Abandu balamanyile tawe

[7] Kakhaba karie ukhubao indakano nende abatsokasi imbeli wa Nyasaye nende imbeli wo Murumwa wuwe, okhuyiniakhwo balia abayalakana ninabo imbeli womusikiti kwo luyali? Kho mana shingala babemela khubulayi mwesi mubemele khubulayi, toto Nyasaye yachama balia abamuritsanga

[8] Ni karie, nibabashila shibahenganga mwinye olwikho nohomba indakano tawe. Bakhusangasinjia butswa nende eminwa chiabu, ne emioyo chiabu chikhayile. Ne abanji mubo ni abakori

[9] Babukula obukusi butiti bwokhushialo habundu wokhukhaba ebimanyisio bia Nyasaye ne bekalilanga Abandu khunjila yiye, toto ni amabii muno akabakholanga

[10] Shibahenganga khubasubili olwikho nohomba indakano tawe, abonibo baburanga eshichelo

[11] Ne nibasaba(Nyasaye) eshileshelo mana nibalumilila okhulaama, bayinia eshihanwa (izakaa,) baba bali Abana benyu mudini, ne nilwa khwinoosinjia tsinyaali tsiefu khubandu abamanya

[12] Ne nibafunaka ebitsubo biabu nibamalile okhulaka mana banyeka idini, kho yire ebemilisi bo bukhayi. Toto ebitsubo biabu bibula obukhala,(mulwane nabo) bakhababario banyola okhulekha

[13] Koo shimulakhupana nende Abandu bafunaka indakano ne nibasuubila okhurusia Omurumwa, nabo nibo baranjilila oburasi olwokhuranga? Koo mubaritsanga?. Nyasaye niye wamukhoyeshele okhuria butswa toto nimuli Abasuubili

[14] Khupane ninabo, Nyasaye abakhupanga okhwikhonyela emikhono chienyu, yetsa okhubakhola abatiti ne yetsa okhubahabina okhurulana ninabo, ne ohonie emioyo chia Abandu abasuubila

[15] Ne yetsa okhurusia liruma liomumioyo chiabu, ne alaleshela owayenya, ne Nyasaye ni Omumanyi Owamachesi muno

[16] Koo, mparanga mbu mulalekhwa butswa, Nyasaye nashili okhwawukhasia balia abalwanila idini mwinywe, nende balia abalakhola abetsa babu bambusia ngonie okhuyiniakhwo Nyasaye nende Omurumwa nende Abasuubili, Ne Nyasaye amanyile muno kamukholanga

[17] Shikakhoyeshele abatsokaasi okhubalikha mbu bemelelanga emisikiti chia Nyasaye ne bemanyile abeene mbu nabakhayi , abo ebikhole biabu ebilayi bitsile akhaya, bali menya mumulilo tsinyanga tsiosi

[18] Toto balia bemelelanga emisikiti chia Nyasaye, nibalia basuubila Nyasaye nende inyanga yeyindukho, mana nibalumilila okhulaama ne nibahinia eshihanwa, ne nibalaria yesiyesi halali Nyasaye, mana awundi abo nibanyala okhuba mubalunjifu

[19] Koo muparanga mbu okhwunywesia amatsi Abandu betsele ukhuhija nende okhwemelela Omusikiti kwoluyali khuli shinga ulia owasuubila Nyasaye nende inyanga yeyindukho mana nalwanila idini? Shibayelanakhwo tawe imbeli wa Nyasaye. Ne Nyasaye shalunjisinjia Abandu ababii tawe

[20] Balia abasuubila mana nibawuya mana nibalwanila khu injila ya Nyasaye, nende omwandu kwabu nende emioyo chiabu, bali nende eshisala eshikhongo imbeli wa Nyasaye ne abo nibo balibura

[21] Nyasaye wabu abasuubisia tsimbambaasi okhurula khuye, nende obuchami nende emikunda balinyolamwo obwokholo obulaliwa tawe

[22] Balimenyamwo tsinyanga tsiosi. Toto Nyasaye ali nende omurungo omulayi

[23] Enywe Abasuubili mulakhola Basenywe nohomba Bamama benyu okhuba abahelwa benyu ba mbusia ngonie tawe nikali mbu bachamile obukhayi okhushila obusuubili, mwinywe ulabakhola okhuba abahelwa bebe, abo nibo ababii

[24] Boola; “Nikali mbu Bapapa benyu Abana benyu nende Abakhasi benyu nende Abekho benyu nende emiandu echiamwachuma nende tsinganga etsia muritsanga okhubiyilwa, nende tsinzu tsiamwachama, niebilayimunokhwinywe okhushila Nyasaye nende Omurumwa wuwe, nende okhulwanila idini yiyie, mana nakhalinde okhula Nyasaye arere likhuwa lilie, ne Nyasaye shalunjisinjia Abandu ababii tawe

[25] Toto Nyasaye yabahabina mubulwani obunji, ne inyanga ya Huneyn, olwa obunji bwenyu bwabafuria omurwe, nenibulabakhonyakhwo eshindu tawe, mana eshialo nishibatutuyila kata nishili eshikhongo, mana nimukalukhana nimwilukha

[26] Mana Nyasaye niyeshia ubuhotselefu khu murumwa wuwe, nende khubasuubili, ne niyeshia abakhupani abamulalola tawe, mana nibasandia balia abakhayi, ne endio niko omurungo kwabakhayi

[27] Mana Nyasaye aleshela kano nikakhawa owayenya, ne Nyasaye ni omulesheli owetsimbabaasi muno

[28] Enywe Abasuubili toto Abatsokasi ni Abafwolafu, kho balasita ahambi mumusikiti kwoluyali omwika kuno nikwakhawa tawe. Ne nimuririre obumanani ahambi ano Nyasaye wenyu yetsa okhubayindiasia khutsimbabaasi tsitsie nachama, Toto Nyasaye ni Omumanyi Owamachesi

[29] Lwana nende balia abalasuubilanga Nyasaye nohomba inyanga yeyindukho, ne shibakaninjia ebia Nyasaye yakana nende Omurumwa wuwe tawe, ne shibatilanga idini yatoto tawe, mubalia bahebwa eshitabu okhula bayinie omurungo nemikhono chiabu nibatutuye

[30] Abayahudi baboolanga mbu Uzeir ni Omwana wa Nyasaye, ne Abakiristo baboolanga mbu Masihi ni Omwana wa Nyasaye” Kano niko kababoolanga nende eminwa chiabu, babukulanga amakhuwa kabalia bakhaya abali imbeli wabu. Nyasaye abasishie, bano bakalukhanibungwa barie

[31] Bakhola Abasomi babu nende abasosoroti babuokhuba Abalesi, abunduwa Nyasaye, nende Masihi Omwanawa Mariam. Neshibalomesibwa tawe halali okhulaama Nyasaye mulala. Abulao ukhoyeshele okhulaamwa owulali Ye, ali hekulu muno nende akabamutsokaasinjia ninako

[32] Benyanga okhusumia ubulafu bwa Nyasaye nende eminwa chiabu, ne Nyasaye yakhaya mbu okhula obulafu bubwe buule, kata Abakhayi nibalenya tawe

[33] Niye waruma Omurumwa wuwe khubulunjifu nende idini yatoto, kho ikhole okhushila tsidini tsindi tsiosi kata abatsokaasi nibakhayile

[34] Enywe abasuubila, abanji mubasomesia(abayahudi nende abakiristo) nende abasosoroti, balitsanga omwandu kwa bandu khububii, ne bekalilanga Abandu khunjila ya Nyasaye. Kho balia ababunjelesinjia idhahabu nende ifedha mana bakhaye okhuyirusia khunjila ya Nyasaye, basuubisie amacheni keshinyasio shiwumisinjia

[35] Inyanga yomwandu oko kulibuusibwa olwa balirebwa mumulilo kwa Jahannam, mana bapaswe ninakwo khubweni bwabu nende tsimbafu tsiabu nende emikhono chiabu (mana baboolelwe)“Kano niko 9. kamwebishila nemikhono chienyu kho pile kalia akamwakhung’asinjia abeene.’’

[36] Toto emiesi imbeli wa Nyasaye ni ekhumi nachibili mushitabu shia Nyasaye. Inyanga yayalonga likulu nende eshialo, mumiesi echo khulimwo nende chine echioluyali muno, eyo niyo idini ili habwene, kho mulakholamwo obubii tawe, ne lwane nende abatsokaasi shinga abo boosi balwananga ninanyu, ne manye mbu Nyasaye ali halala nende balia abamuria

[37] Toto okhusitia(emiesi chioluyali chiletsa lwangu tawe), ni ukhumetekha mubukhayi khulwako abakhayi bakosibungwa, bafuchililanga omwika mulala ne okundi bakhaya, mbu khobakhole eshichelo shiechindi chilia echia Nyasaye, kho bakhole bia Nyasaye yakana, baronelwa obubii bwebikhole biabu, ne Nyasaye shalunjisinjia abakhayi tawe

[38] Enywe abasuubila mulimurie nimuboolelwa mbu; “tsiee(mukhuyane) shichila idini ya Nyasaye” Mwirakhwo obusiro khushialo? Koo muchamile muno obulamu bwokhushialo okhushila bwomwikulu? Ne omwikhoyo kwo bulamu bwo khushialo nomutiti okhushila kwomwikulu.”

[39] Ne nimulatsia tawe yetsa okhubahelesia eshinyasio shiwumisinjia, ne alarera Abandu bandi habundu wenyu, ne shimulamukhola shiosi shiosi tawe, ne Nyasaye ni Omunyali wa buli eshindu

[40] Ne ni mulamuhabina tawe, Nyasaye yamuhabina olwa Abakhayi bamurusia, olwayali owakhabili wuwe, olwabali boosi babili mwichina (mukhombe) olwayaboolela owashie “olabeelela tawe, toto Nyasaye ali halala ninafu” Nyasaye namwishilia obuhotselefu, mana namukhoonya nende Abalwani abamulalola tawe, mana nakhola likhuwa liabakhayi okhuba hasi, ne likhuwa lia Nyasaye nilo liba hekulu, ne Nyasaye niye Owamani Owamachesi muno

[41] Tsie(muliye) nimuli abangu nende nimuli abasiro. Nelwanile idini ya Nyasaye nende omwandu kwenyu nende emioyo chienyu, obo ni obulayi khwinywe nimuli abamanya

[42] Ibetsanga okhunyoola obukhala mubwangu nende oluchendo lwahambi, toto bakhakhulondele khwo. Halali oluchendo lwobusandi ni olurambi, nabo baletsuba khu Nyasaye mbu; “khu nyalanga toto khwakharulile halala ninanyu” Basishinjia emioyo chiabu, ne Nyasaye amanyile mbu toto abo ni ababeeyi

[43] Nyasaye amalile (okhuchamila) okhuleshela, shichila shina nobawa omunwa?(obwiyangu)?( wakhalindile) okhula balia baboolanga obwatieli bukhuloleshele, ne omanye balia ababeeyanga

[44] Balia basuubila Nyasaye nende inyanga yeyindukho shibalakhusaba obwiyangu bwokhukhaya okhulwanila idini ya Nyasaye khu mwandu kwabu nende khumioyo chiabu tawe, Ne Nyasaye yamanya balia abamuria

[45] Balia bakhusabanga obwiyangu nibalia babula obusuubili khu Nyasaye nende inyanga yeyindukho, ne emioyo chili nende eshibeyibeyi, kho bakanakananga okhubeela eshibeyibeyi shiabu

[46] Ne toto benyanga okhurula, bakherecheshele amarechekho kokhurula, Nyasaye shiyachama okhurula khwabu tawe, mana nabeekalila ne nibaboolelwa; “Bee halala nende abo abekhaale”

[47] Ne barulanga ninanyu shibakhabametele shiosi shiosi tawe habula obutobela, ne bakhatsile eyi nende eyi hakari wenyu okhurera inzoka ne mwinywe balimwo babawulilisinjia, ne Nyasaye yamanya muno Abandu ababii

[48] Okhurula khale benya okhubarerera obutswanzwani, mana nibakhukalukhanilia amakhuwa okhula shingala obulamba bwalolokha khulikhuwa lia Nyasaye nabo nibalachamile tawe

[49] Ne mubo balimwo baboolanga mbu; “mbe obwiyangu ne olasukuna mumatemo tawe” Toto abo bamala okhukwa mumatemo, ne toto Jahannam ilibotokhana Abakhayi

[50] Nonyoola obulayi bibasinyisia, ne nonyoola amasila baboola mbu; “Khwahenga obulayi amakhuwa kefu okhurula khale( okhukhaya okhunyoolwa namasila), ne bakalukhananga nibabwao nibasangalile.”

[51] Boola; “sishitsa okhunyoola shiosi shiosi habula shilia shia Nyasaye yakhuhandichila, Ye ni Nyasaye wefu” Kho Nyasaye butswa niye Owabasuubili besiche

[52] Boola; “Enywe shimulindanga khwife halali (efwe) okhunyoola shilala khubulayi bubili. Ne efwe khulindanga Nyasaye abasandie nende eshinyasio okhurula khuye nohomba okhurulana nende emikhono chiefu, kho linde butswa fwesi khuliindanga ninanyu

[53] Boola; “ Rusie emiandu chienyu nimuchamile nohomba nimulachamile, shikhula chifuchilila tawe. Toto enywe muli Abandu abonooni.’’

[54] Ne sishiabekalila okhuchamilwa eshihanwa shiabu halali nibo bakhaya Nyasaye nende Omurumwa wuwe. Ne shibetsanga okhulama tawe halali nibali abatofu, ne bahininjia eshihanwa nibalachamile tawe

[55] Ne Omwandu kwabu nende Abaana babu bila khuwuchisia tawe. Nyasaye yenya okhubahelesia eshinyasio khulwa ako mubulamu bwomushialo, ne emioyo chiabu chirule, nibali abakhayi

[56] Ne betsubanga khu Nyasaye mbu toto bo bali ninanyu. Neshibali halala ninanyu tawe, halali bo ni abandu- abaritsanga (mbu Nyasaye anyala okhubarumbula)

[57] Banyoolanga amelushilo, nohomba habundu wundi okhwinjila bakhelushileyo tsimbilo- tsiamakana

[58] Ne mubo balimwo bakhubolanga okhulondokhana nende okhukaba ebihanwa, Nibahebwa khubihanwa ebo bachamanga ne nibakhaya okhuhebwa nibasinyikha

[59] Ne bo toto bachamanga shia Nyasaye abahelesiyie nende Omurumwa wuwe, mana baboola mbu; “Nyasaye okhuyela, hambi hano Nyasaye yetsa okhukhuhelesia khu tsimbambaasi tsitsie, nende Omurumwa wuwe, Toto efwe ewa Nyasaye ni akhuchoomele.”

[60] Toto isadaka niya Abatakha nende Abamanani, nende balia bakholanga khu sadaka eyo, nende balia benya okhutinyisibwa mubusuubili, nende okhununula Abarumwa, nende Ababanzwa, nende bali khunjila ya Nyasaye, nende Ababiyilwe khuluchendo eshilachilo okhurula khu Nyasaye, Ne Nyasaye ni Omumanyi Owamachesi muno

[61] Ne mubo baliwo basinyisinjia Omurumwa, khulwokhuboola mbu; “Ye niweshirwi” Boola; “ eshirwi ni eshilayi khwinywe shichila mbu , Yasubila Nyasaye ne asubililanga abasuubili naye nitsimbambaasi khubalia abasuubila mwinywe. Ne balia basinyisinjia Omurumwa wa Nyasaye balanyoola eshinyasio eshilulu.’’

[62] Babetsubilanga Nyasaye mbu khobabachamisie enywe, newabakhoyeshele okhuchamisia muno ni Nyasaye nende Omurumwa wuwe, toto bo nibali Abasubili

[63] Bakorerwekhwo mbu ulia ushilana nende Nyasaye nende Omurumwa wuwe, alinyoola omulilo kwa Jahannam alimenyamwo tsinyanga tsiosi, ne nikhwo okhututuyibwa okhukhongo

[64] Abeshikhabili baritsanga mbu baleshilibwa isura yitsa okhubarumbulila kalia akali mumioyo chiabu, Boola; “ Enywe bayesa, toto Nyasaye alarusia ebulafu akamuritsanga ako.”

[65] Ne nobareeba nibaboola mbu; “toto efwe khwilomalominjia nikhutsekha butswa’’ Boola; “ Nyasaye nende tsinyali tsitsie nende Omurumwa wuwe nibo bamukholelanga omubayo?”

[66] Muleekatia (okhusaba eshileshelo) tawe mumalile okhurula mubusuubili bwenyu, ne nikhuleshela omukanda mwinywe, khwitsa okhusandia omukanda kundi shichila kwo kwali kwamabii

[67] Abeshikhabili abasatsa nabakhasi bosi ninashilala, balomesaninjia amabii ne bakananinjia amalayi, ne bafumbanga emikhono chiabu, bebilila Nyasaye ne Nyasaye nabebilila. Toto abeshikhabili nibo abamayanu

[68] Nyasaye yalaka Abeshikhabili abasatsa nende abakhasi nende Abakhayi omulilo kwa Jahannam, balimenyamwo tsinyanga tsiosi, oko kubayela ne Nyasaye abatsuba, ne bali nende eshinyasio shilawa

[69] Shinga balia abali imbeli wenyu abo bali nende amani muno okhushila enywe, ne bali nende omwandu omunji muno nende Abana abanji muno okhubashila enywe. Mana nibekhoya ebuleka wabu, nanyu mwesi muli mumwikhoyo ebuleka wenyu, shingala bosi bali mumwikhoyo ebuleka wabu- balia bali imbeli wenyu, mana nimwiyibila mumabii shingala bosi beyibilamwo. Abo nibo bebikhole biabu biatsia akhaya khushialo nende mwikulu, ne abo nibo banyoola okhusikha

[70] Koo, shikaboolelakhwo amakhuwa kabalia bali imbeli wabu, Abandu ba Nuh nende A’adi nende Thamud, nende Abandu ba Ibraheem nende Abandu na Madyan, nende Abandu beshialo shiabu shiakalukhanibwa hasi yaba hekulu? Abarumwa babu babeetsela nende ebifune bili habulafu, ne Nyasaye shiyabakholela obubii tawe halali abeene nibobekholela obubii

[71] Abasuubili abasatsa nende abasuubili abakhasi ni abetsa abeene khubeene, balomesaninjia okhukhola amalayi ne bakananinjia okhukhola amabii. Ne balumililanga okhulaama ne bahininjia eshihanwa, ne bawulilanga Nyasaye nende Omurumwa wuwe, abo Nyasaye alabahelesia tsimbabaasi. Toto Nyasaye niwa amani Owamachesi muno

[72] Nyasaye yalaka Abasuubili abasatsa nende Abasubili abakhasi, emikunda chiburangamwo emialo balimenyamwo tsinyanga tsiosi, nende eshimenyo eshilayi mumukunda kwa Eden. Ne obuchami bwa Nyasaye nibo obukhongo muno. Okho nikho okhubura okhukhongo

[73] Ewe Omurumwa! Shilana nende Abakhayi nende Abeshikhabili ne obe omutinyu khubo. Ne eshimenyo shiabu nishiomumulilo, ne ako ni amakalushilo amabii muno

[74] Betsubanga khulira lia Nyasaye mbu shibaboola tawe, nitoto nibaboola- likhuwa liobukhayi mana nibaba abakhayi nibamalilenje okhusuubila, mana nibasubilila okhukhola akabalanyala tawe, Ne shibalola libii liosi liosi tawe halali mbu Nyasaye abayindiasiyie nende Omurumwa wuwe, khutsimbambaasi tsie. Ne nibasaba eshileshelo bulaba obulayi khubo, ne nibakhaya Nyasaye alabahelesia eshinyasio eshilulu khushialo nende mwikulu. Ne khushialo balibula omulindi nohomba ubahabina

[75] Ne mubo balimwo balia abalaka Nyasaye mbu; “Na khuhelesia khutsimbabaasi tsitsie khulayinia eshihanwa, ne khulaba mubandu abalayi.”

[76] Olwa yabahelesia tsimbabaasi tsitsie, bamala bakhole obwimani nibakalukhana nibaloba muno

[77] Mana nabarunga obushikhabili bwabu mumioyo chiabu okhula inyanga yokhubukanana ninaye, khulwa okhutsia mashiama khu ka Nyasaye yabalaka nende khuka bakaatinjia

[78] Koo, bakorerwe mbu Nyasaye yamanya akobwifisi kabu, nende amamonyo kabu, ne mbu toto Nyasaye niye Omumanyi wakefisile

[79] Balia abamonyanga Abandu barusinjia eshihanwa mubasuubili, nende balia abalanyoola shokhuyinia halali eshindu eshititi, mana nibabatsekha, Nyasaye alibarunga omurungo kwokhutsekha khwabu, ne balinyoola eshinyasio eshilulu

[80] Obasabile eshileshelo nohomba obule okhubasabila eshileshelo (Kosi ni halalasa awo) ne kata nobasabila eshileshelo mara amakhumi saba, Nyasaye shalabaleshela tawe. Endio ni lwokhubeela mbu bakhaya Nyasaye nende Omurumwa wuwe, ne Nyasaye shalunjisinjia Abandu ababii tawe

[81] Abatong’a inyuma basangala, khukwikhala khwabu okho inyuma wo Omurumwa nende Nyasaye, ne okhupanila nende omwandu kwabu nende emioyo chiabu khunjila ya Nyasaye nibibasinya. Ne nibaboola mbu mulatsia muliyie nende mumubasu kuno tawe, boola; “Omulilo kwa Jahannam kuli nende obubafu obunji , bamanyangakhwo?’’

[82] Kho batseshe hatiti(khushialo khuno) ne balilila muno(mwikulu) oko nikwo omurungo khu kabakholonga

[83] Kho Nyasaye nakhukalusia mumukanda mulala mubo mana nibakhusaba obwiyangu bwokhurula (okhutsia mwiyie) Boola; “Enywe shimularula tawe halala ninasi ni shimulalwania ninasi omusuku tawe, enywe mwachama okhwikhala olwokhuranga , kho ikhale halala nende abatong’a inyuma

[84] Ne olasabila yesiyesi mubo ufwa tawe, ne olema khushilindwa shishie tawe, toto abo bakhaya Nyasaye nende Omurumwa wuwe, ne bafwa nibali Abonooni

[85] Ne emiandu chiabu nende Abana babu bilakhuchamisia tawe, Nyasaye yenya okhubasandia khwako khushialo, ne emioyo chiabu chirule nabo ni bali Abakhayi

[86] Ne olunyaali nilwishibwa niluboola mbu; “musuubile Nyasaye ne mulwane halala nende Omurumwa wuwe” abobunyali nende abayinda mubo bakhusaba obwiyangu ni baboola mbu; “Khuleshe khuli halala nende batong’a.”

[87] Bachamile okhuba halala nende abatong’a inyuma, mana emioyo chiabu nichirebwakhwo eshimanyisio, mana shibamanyanga tawe

[88] Halali Omurumwa nende balia Abasuubila halala ninaye balwanila Nyasaye nende emiandu chiabu nende emioyo chiabu. Abo nibo balinyoola obulayi, ne abo nibo balibura

[89] Nyasaye yabarecheshela emikunda chiburangamwo emialo imbeli wachio, bamenyemwo, okho nikhwo okhubura okhukhongo

[90] Ne abali nende ebichila(biokhukhaya okhutsia liyie) mubandu bomwiswa (babeduwi) bakhwitsila okhusaba obwiyangu bwokhutsia okhurula(okhutsia okhulwana). Ne balia baboolela Nyasaye nende Omurumwa obubeyi nibatong’a, kho balia abakhayila mubukori mubo balinyoola eshinyasio eshilulu

[91] Babula ubatula balia abateshele nohomba abalwale, nende balia balanyoola eshokhwikhoyela- okhutsia muliyie tawe, Nibalisa mbu bakholelanga Nyasaye nende Omurumwa wuwe omwoyo omulayi, Injila ibulao yakhutula abakholi bamalayi. Ne Nyasaye ni wobulesheli Owetsimbabaasi muno

[92] Nohomba balia abakhwitsila mbu abahelesie shio khuninakhwo, nobaboolela mbu; “Embula shio khubaniniakhwo? Mana nibakalukha, tsimoni tsiabu nitsibititia amasika. Khushibeela shiokhukhaya okhunyoola injila yobwikhonyi

[93] Injila iliwo yakhubafunania balia abakhusabanga obwiyangu, neni abayinda, bachamile okhuba halala nende balia batong’anga inyuma. Mana Nyasaye nara khumioyo chiabu eshimanyisio, mana bo shibamanyanga tawe

[94] Babarusilinjia ebichila nimwakhakalukha khubo. boola; “Mularera ebichila tawe shikhulabasuubila tawe, toto Nyasaye akhuboolele amakhuwa kenyu, ne alalola amakhuwa kenyu nende Omurumwa wuwe, mana mulikalusibwa khumumanyi wakefisile nende akabulafu, naye alibaboolela kalia akamwakholanga

[95] Balabetsubila Nyasaye shingala mulabakalukhakhwo, nimwenya okhubaleshela. Kho mana mulababukulamwo oluchendo tawe, toto abo ni beshifwolo, ne eshimenyo shiabu ni omulilo kwa jahannam, ne ni omurungo khuka bakholanga

[96] Babetsubilanga mbu khomubachamile. Ne nimubachamila, toto Nyasaye shachamilanga Abandu Abonooni tawe

[97] Ababeduwi babura eshichelo muno mubukhayi nende mubushikhabili, ne bayeshelanga muno okhubula okhumanya eshichelo shia kalia ka Nyasaye yeshilie khu Murumwa wuwe. Ne Nyasaye ni omunji muno owamachesi

[98] Ne Mubabeduwi abo balimwo baparanga mbu akabarusinjia ni obusiro bweshikhaya, ne balindanga okhubawulilila amasila. Amasila amabii kaliba khubo ne Nyasaye niye uwulilanga, omumanyi muno

[99] Ne mubabeduwi abo balimwo abasubilanga Nyasaye nende inyanga yeyindukho, ne basuubilanga akabarusinjia ni kokhubasitia khu Nyasaye, nende okhusaba khwomurumwa. Koo ako ni kabara hambi khu Nyasaye. Nyasaye alabenjisia mutsimbabaasi tsitsie. Toto Nyasaye niwobulesheli Owetsimbabaasi muno

[100] Balia abarusinjia baba abambeli mubahajirina(abawuyi) nende Answar (abahabini), nende balia babaloonda khubulayi, Nyasaye alabachamila nabo boosi balachama, ne yabarecheshela emikunda chiburangamwo emialo hasi wachio, balimenyamwo tsinyanga tsiosi. Okho nikho okhubura okhukhongo

[101] Ne mubabedui barulanga mumbeka mwenyu mutsingongo tsili ahambi ninanyu, khulimwo nende abeshikhabili, nende mubamenyanwa ba Madina, beyibila mubushikhabili, obakorerwe ne efwe khwabamanya. Khwitsa okhubasandia mara khabili, mana balikalusibwa okhutsia okhusandibwa eshinyasio eshikhongo

[102] Ne abandi bafuchililila tsimbi tsiabu, batsokasia ebikhole ebilayi nende ebikhole ebibii. Awundi Nyasaye aba ario yabaleshela, toto Nyasaye nomukoosia Owetsimbabaasi muno

[103] Bukula eshihanwa mumwandu kwabu, obalafie ne obatswenule nashio, ne abalaamile, toto okhubasabila khukhwo khubelesinjia obuhotselefu. Ne Nyasaye ni Omuwulili Omumanyi muno

[104] Koo, shibamanyilekhwo mbu Nyasaye afuchililanga eshileshelo shia Abandu bebe, ne abukulanga ebihanwa, ne mbu Nyasaye niwokhufuchilila obulesheli ne niwetsimbaasi

[105] Ne boola; “khole ebikhole, Nyasaye alalola ebikhole bienyu nende Omurumwa wuwe nende Abasuubili, mana mulikalusibwa khu mumanyi wakefisile nende akali habulafu, naye alibaboolela akamwakholanga

[106] Ne baliwo abandi balindilungwa okhulomesia khwa Nyasaye, awundi abahe eshinyasio nohomba abaleshele, ne Nyasaye ni Omumanyi Owamachesi muno

[107] Ne balia abombakha omusikiti kwo khunyasianendekwobukhayi, nendeokhusalasia hakari wabasuubili, nende okhukhola mbu ni habundu wokhulinda balia abakholela Nyasaye nende Omurumwa wuwe obusuku khale awo, Ne toto baletsuba mbu; “Efwe lichomo liefu liaalisa okhukhola amalayi” Ne Nyasaye arusia obuloli mbu abo ni ababeyi

[108] Olemakhomwo tawe. Omusikiti kwombakhwa khu lichomo liokhuria Nyasaye okhurula inyanga yokhuranga niko kwokhoyekhane muno okhwemamwo. Omo balimwo Abandu bachama okhwitswenula, Ne Nyasaye yachama abetswenulanga

[109] Koo! Ulia wachaka okhumbakha eshiumbashe shishie khulwe lichomo liokhuria Nyasaye nende okhwenya obuchami bubwe ni omulayi nohomba ulia owachaka okhumbakha eshiumbashe shishie khulichomo lie eshiumbashe shishie hekulu khundulo welitukho weliloba lialo lilakakhanga, mana nakwa nashio mumulilo kwa Jahannam, ne Nyasaye shalunjisinjia Abandu ababii tawe

[110] Eshiumbashe shiabu esho shiabombakha shilaba eshichila banyoole eshibeyibeyi mumioyo chiabu. Okhula emioyo chiabu chikhalikhemwo ebitonye ebitonye. Ne Nyasaye ni Omumanyi muno Owamachesi

[111] Toto Nyasaye yakula mubasubili emioyo chiabu,nende emiandu chiabu kho Ye abahelesie Jannah (mwikulu). Bakhupananga khunjila ya Nyasaye, ne beranga naboosi berungwa, Ino niyo indakano aya Nyasaye yalomesia mu Taurati nende mu Injili nende mu Kurani. Ne ni wina utilanga indakano yiyie obulayi muno okhushila Nyasaye? Kho mwikhoye khuinganga yenyu yamwakhola ninaye, Ne okho nikho okhubura okhukhongo

[112] Balia abasabanga eshileshelo, abakholanga emilukha chia Nyasaye, Abamuwelesinjia oluyali abafunganga (saumu) abenamanga(khululwe) abaretsanga obweni bwabu hasi(khululwe) ababoolanilanga okhukhola amalayi, nende abakaaninjia amabii, nende balia baliindanga tsinzakho tsia Nyasaye. Kho suubisia abasuubili- (amalayi kabalindanga)

[113] Shakhoyeshela Omurumwa nende balia abasuubila okhusabila eshileshelo Abatsokaasi kata nibali abekho babu, nikakhamala okhubamanyishila mbu bo ni Abandu bomumulilo

[114] Ne okhusaba khwa Ibraheem yasabila Samwana eshileshelo khwali shichila indakano yabakhola ninaye, Ne olwa khwamuwa obulafu mbu(samwana)Ye ni omusuku wa Nyasaye, yalekhana ninaye. Ne toto Ibraheem yali owokhukalukha khu Nyasaye muno Omwisumilisi

[115] Ne Nyasaye shakosinjia Abandu namalile okhubalunjisia tawe okhula obebaalile akabakhoyele okhuria, Nyasaye toto ni Omumanyi wabuli eshindu

[116] Toto Nyasaye ali nende obwani bwomwikulu nende mushialo ahelesinjia obulamu ne afwisinjia. Ne mubula omulindi nohomba omukhonyi owulali Nyasaye tawe

[117] Toto Nyasaye ababeleele tsimbabaasi Omurumwa nende muhajiruna(abawuyi) nende Answar (abahabini), balia abamulondakhwo ebise biobutinyu bilia. Ebise bie mioyo chia bandi babu chiali ahambi okhukalukhana, mana nababeela tsimbabaasi, toto ye khubo ni omuholo muno owetsimbabaasi

[118] Nende balia bataru ababolelwa mbu baliinde. okhula shinga liloba liali obutinyu khubo, halala nende obubambalifu bwalio, mana emioyo chiabu nichinyoola obusiro, ne nibamanya mbu abalaho okhwilushila okhuyiniakhwo khu Nyasaye, mana nababeela tsimbabaasi nabafuchililwa eshilelshelo shiabu, toto Nyasaye ni omulesheli Owestmbabaasi muno

[119] Enywe abasubila rie Nyasaye ne mube halala nende abatoto

[120] Shibakhoyekhana Abandu ba Madina nende ababeduwi, abamenya mumbeka mwabu okhutong’a inyuma wo Murumwa wa Nyasaye tawe, nohomba bo okhwichama muno okhushila Omurumwa. Endio nilwokhuba mbu shibanyoolungwa nende obulo tawe nohomba obunyakhani nohomba inzala khunjila ya Nyasaye tawe, ne shibasenanga khunjila ya Nyasaye isinyisia abakhayi tawe, nohomba shibakholelangakhwo omusuku obusishi bwosibwosi tawe, halali bahandichilungwa ebikhole ebilayi- shichila ako. Toto Nyasaye shakosinjia omurungo kwabakholi aba malayi tawe

[121] Ne shibarusinjia shirusibungwa shiosi shiosi tawe, shibe eshititi nohomba eshikhongo, ne shibaburanga litwoma liosi liosi(okhutsia muliyie) halali bahandichilungwa kho Nyasaye abarunje amalayi kalia kabakholanga

[122] Shibakhoyeshele Abasubili okhurula boosi tawe, halali mbushina nikularula omukanda kundi buswa(mutiti) buli mulukongo mubo (kutsie Madina khu Murumwa) mana bekanyilisie abashiabwe nibakhakalukha, kho banyoole okhuria

[123] Enywe abasubili khupane nende abakhayi balia bali ahambi ninanyu, ne banyoole obutinyu okhurulana ninanyu, ne manye mbu Nyasaye ali halala nende abamuritsanga

[124] Ne Isura olwa yishibungwa, bali mubo baboolanga mbu; “ni wina mwinywe umetelekhwo obusuubili?” Ne balia abasubila obusubili bwabu bumetekhanga, mana basangala

[125] Ne balia bemioyo chiabu chilimwo obulwale, ibametanga(Isura) ububii khu bubii bwabu obwabali nabo, ne bafwitsanga nibali abakhayi

[126] Koo shibalolangakhwo batemungwa buli omwika lulala nohomba khabili, mana shibasabanga eshilelshelo tawe, nekhandi shibetsulilanga tawe

[127] Ne olwa Isura yishibwa balengananga, abeene khubeene, “Koo alikhowo yesiyesi ukhulolanga” Mana bakalukhananga nibelukha. Nyasaye akalukhaninjia emioyo chiabu shichila bo ni Abandu balenya okhumanya tawe

[128] Toto yabetsela Omurumwa woluyia lulala ninanyu, akabasandinjia kamubelesinjia, abakhalabanilanga. Ne khubasuubili ni Omuhotselefu weshisa muno

[129] Ne nibakhaya boola mbu; “Nyasaye yambela” obulao Nyasaye owulali ye, niye butswa wandisikanga, niye Nyasaye weyindebe (weshisala) ikhongo

[1] Alif Lam Ra. Tsino ni tsinyaali tsieshitabu shiamachesi

[2] Koo! Ni kamakana khubandu mbu khwafimbulila Omundu okhurula mubo mbu; “wikanyilisilie Abandu ne osuubisie abasuubili amakhuwa amalayi mbu baliba nende obukhongo imbeli wa Nyasaye wabu” Abakhayi nibaboola mbu; “Kano shini shiosi shiosi tawe halali obulosi bwahabulafu”

[3] Toto Nyasaye wenyu ni wulia owaloonga likulu nende eshialo khu tsinyanga tsisaasaba, mana naleng’aana khushisala (Arsh), Ye niye ubusinjia amakhuwa koosi, abulaho ulisabila owundi yesi yesi Ye nalamuchamile tawe. Oyo niye Nyasaye, omulesi wenyu, kho mumulaame Ye, koo shimwitsulilanga tawe

[4] Ewuwe ni amulikalukha mwesi, indache ya Nyasaye eyatoto, toto ye niye wachachia ebiloonje naye khandi niye ulibikalusia, kho arunje balia basuubila mana nibakhola amalayi khubuleng’aafu. Ne balia bakhaya balinyoola ebinywebwa ebia amaatsi kayia pa nende eshinyasio eshilulu khulwa obukhayi bwabu

[5] Ye niye owakhola eliuba okhuba nomubasu, ne omwesi okhuba nobulafu, mana nakurereraho wokhuburira, kho mumanye tsinyanga tsiemika nende obubali (bundi). Toto Nyasaye shiyaloonga ebo tawe halali khubwatoto. Yenoosinjia tsinyaali tsitsie khubandu bamanya

[6] Toto khukhubotokhana eshilo neshitere nende bia Nyasaye yaloonga mwikulu nende mushialo khuli nende ebimanyisio khubandu baritsanga(Nyasaye)

[7] Toto balia balasuubilanga okhubukana ninafu, mana nibachama obulamu bwokhushialo ne nibabubunakhwo, nende balia abang’ang’alanga khu bimanyisio biefu

[8] Abo eshimenyo shiabu shiliba mumulilo khu kalia akabakholanga

[9] Toto balia basuubila mana nibakhola ebikhole ebilayi, Nyasaye wabu alabalunjisia shichila obusuubili bwabu, mwikulu- (Mumikunda) emialo chibura hakari wachio, mumikunda chobwokholo

[10] Amalaamo kabu mwo kaliba “ Oluyali nilwa Nyasaye wefu” Ne amashesanio kabu kaliba “Mulembe” ne amalaamo kabu kokhumalilikha kaliba mbu” Oluyali lwosi ni lwa Nyasaye, Omulesi webilonje biosi.”

[11] Ne Nyasaye ahelesinjia Abandu obubii lwangulwangu, shingala bayuyukhanilanga okhurererwa amalayi, toto bakhabusilibwe ebise biabu.(bafwa) Kho balia abalaritsanga okhubukanana ninafu khubalekhanga mubukori bwabu, banyakhane butswa

[12] Ne obubii nibutila Omundu akhulaamanga nakonele olubafu lulwe, nohomba niyeekhaale nohomba niyemele. Ne olwa khumuwoninjia ni khumurusiliaho libii lilia, akhuburangakhwo opara mbu shiyakhusabangakhwo mbu khumurusiliewo amabii kamunyoola akabura ako tawe. Endio nilwa balia babusinjia eshichero baronilungwa akabakholanga

[13] Ne toto khwamala okhusishia Abandu abanji imbeli wenyu, olwa bakhola amabii. Ne Abarumwa babu babetsela nende ebifune bili habulafu, halali shibali basuubila tawe, ne endio nilwakhurunganga Abandu ababii

[14] Mana nikhubakhola enywe okhubukula habundu wabu khushialo bonibakhamala okhusishibwa kho khulole shinga mukhola

[15] Ne nibasomelwa tsinyaali tsiefu tsili habulafu, balia abalaritsanga okhubukana ninafu baboolanga mbu; “Lera Ikuruani ilali ino, nohomba oyikalukhanie(hatiti)” Boola; “Shenyala okhuyikalukhania khukhwenya khwanje tawe, esie shenondanga halali kalia kefimbulilungwa. Toto esie eritsanga nengosela Nyasaye wanje, eshinyasio shieyinyanga ikhongo

[16] Boola mbu; “Nyasaye yenyanga shindakhabasomele Ikurani ino tawe, ne shiyakhabamanyiye tawe. Ne ndakhamenya ninanyu tsimbaka tsinyinji kano nikashili, kho shimumanyangakhwo tawe

[17] Kho niwina omubii oyo okhushila ulia uchishilanga Nyasaye obubeyi, nende ufukulanga tsinyaali tsiefu? Toto abakholi bamabii shibakhabura tawe

[18] Nabo balamaanga ebilali Nyasaye tawe, ebilanyala okhubakhola shiosi shiosi tawe, nohomba okhubakhoonya tawe, Nebaboolanga mbu; “bano nibo abakhusabila imbeli wa Nyasaye” Boola; “Koo mubolelanga Nyasaye akakorerwe mwikulu nende khushialo? Oluyali nolulwe abula obuleemu, ne niwoluyali muno khu ako akabamutsokasinjia ninako.”

[19] Ne Abandu shibali halali omukanda Mulala, mananibakabukhana, nelikhayanga okhuba likhuwa liaranjilila okhurula khu Nyasaye wuwo, bakha khalachilwe hakari wabu khukalia akabakabukhananga

[20] Ne baboolanga mbu; “ Shiyakheshilibwe eshimanyisio shirula khu Nyasaye wuwe?” Boola mbu; “obumanyi bwa makhuwa kalalolekha buli khu Nyasaye, kho mana linde siesi endi ninanyu halala mubalia balindanga?”

[21] Ne olwa khupilinjia Abandu tsimbabaasi tsiefu, mushilenje shiobutinyu bwabanyoola, bachaka okhututa nibachaya ebimanyisio biefu, boola; “Nyasaye ni Omwangu wakhukalukhania obututi bwenyu. Ne toto Abarumwa befu bahandikanga kosi akamututanga.”

[22] Ye niye owubachesinjia mutsingongo nende munyanza kata shingala mubetsanga mumaro, olwa mutsitsanga nende omuyeka kusangasia, awo omuyeka omusiro kubetsela, mana amarunda kabetsele okhurula buli tsimbeka, mana bachaka okhupara mbu babotokhanwe, basaba Nyasaye nibamutswenula muburii mbu; “Niwitsa okhuwonia mukano, toto efwe khulaba mubalia bakhupa orio”

[23] Olwa abahabina, nibachaka okhukhola obufuru khushialo mukhubula obulamba. “Enywe Abandu! Obufuru bwenyu bulabakalukha abeene. Ni omwikhoyo kwobulamu bwokhushialo, mana mulikalusibwa khwifwe, ne khulibaboolela akamwakholanga

[24] Toto obulamu bwokhushialo bulishinga amatsi kakhwishinjia okhurula hekulu- (mumalesi) mana emimela chokhwiloba chilibungwa nende Abandu nende tsisolo- nikesasaniamwo (amatsi ako) Mana liloba nilirusia obulayi bwalio, mana niliba lilayi muno, kho abenelio nibapara mbu balinyala, likhuwa liefu lilitsila eshilo nohomba eshitere, nikhulikhola opara mbu kwaberwa, opara mbu shikwabeleho mungolobe tawe, endio nilwakhwinoosinjia ebimanyisio biefu khubandu baparanga

[25] Nyasaye abalanganga munzu yomulembe, ne alunjisia owayenya khunjila ingololofu

[26] Balia bakhola amalayi balinyoola amalayi, khandi bali metelwakhwo, ne olufu shilulifunikha obweni bwabu tawe ne shibalinyoola isoni tawe, abo nibo Abandu bo mwikulu balimenyamwo tsinyanga tsiosi

[27] Ne balia bakhola amabii, omurungo kwamabii nilibi lienesa liabarirungwa, ne balinyoola tsisoni, Ne balibula ulia unyala okhubalinda khushinyasio shia Nyasaye. Obweni bwabu buliba shinga bufunikhwekhwo ebilo bieshilima eshikhongo. Abo nibo Abandu bomumulilo balikhalamwo tsinyanga tsiosi

[28] Ne inyanga yakhulibakhung’asia boosi, mana khuboolele balia abatsokasia Nyasaye mbu “Yeme wamuli hao, nende balia abamwakhola abasanji ba Nyasaye” Mana khubakabukhanie hakari wabu, ne abo abatsokasibwa baliboola mbu; “Enywe shimwalaamanga efwe tawe”

[29] Nyasaye niye uyela okhuba omuloli wefu ninanyu, toto efwe khwali khubulakho ahambi nende obulaami bwenyu tawe

[30] Eyo buli shiamundu alimanya akayakhola, ne balikalusibwa ewa Nyasaye Omwami wabu watoto. Ne kabalikora kalia akabachikhanga

[31] Boola; “Niwina ubakabanga okhurula mwikulu nende khushialo? Nohomba niwina uli nende obunyali khumawulililo kenyu, nende tsindolelo tsienyu? Ne niwina urusinjia omulamu mubafu, ne narusia omufu mubalamu? Ne ni wina ukasinjia amakhuwa koosi?” Balaboola mbu; “Ni Nyasaye’’ mana boola mbu; “Koo shimuritsanga tawe?.”

[32] Kho oyo niye Nyasaye wenyu, Omulesi wenyu watoto. Ne nishina shindi shiliwo obwatoto nibumalile okhulolekha halali obukori? Kho niyena amukalukhanilibungwa

[33] Endio nolwelikhuwa lia Nyasaye wuwo Omulesi, lialoloshela balia abaloba, mbu shibalisuubila tawe

[34] Boola; “Alikho mu abo abamutsokasinjia Nyasaye ninabo, ulia owachachia okhuloonga ebilonje, mana alibikalusia? Boola; “Nyasaye niye wachachia ebilonje khandi niye ulibikalusia. Kho mukalukhanibungwa hena?”

[35] Boola mbu; “Koo khulikhomwo nende mubamutsokasinjia Nyasaye abo ulunjisinjia khubwatoto?” Boola mbu; “Nyasaye niye olunjisinjia khubwatoto” Kho ulia ulunjisinjia khubwatoto shiniye okhokheyakhane muno okhuloondwa nohomba ulia ulalunjisinjia halali okhula alunjisibwe? Kho muli nende shina, mubusinjia murie

[36] Ne obunji bwabu balondanga butswa amaparo kabu, ne okhuparirisia shikhukhonyakhwo imbeli wobwatoto shiosi shiosi tawe. Toto Nyasaye amanyile muno koosi akabakholanga

[37] Ne shikanyalikhana mbu Ikurani ino, yakasibwasa mbu shirula khu Nyasaye tawe, halali ifuchilisania nende akali imbeli wayio, ne ni amebaalo neshitabo shibula obukanakani, ne shirula khu Nyasaye Omulesi webiloonje bioosi

[38] Nohomba baboolanga mbu yachikasia butswa omwene, boola mbu;” Nakhayitsekhwo nende Isura ndala ili shinga ino, ne mulanje bamunyala balali Nyasaye tawe, toto nimuli abahabwene

[39] Halali bayingana akababula ninako obulaamba, ne obwatoto bwako bushili okhuboolela, ne endio nilwabayingana balia bali imbeli wabu, kho lola shinga indukho yabandu ababii yali

[40] Ne mubo baliwo basuubilanga muyo, ne mubo baliwo balasuubilanga muyo, ne Nyasaye wuwo Omulesi amanyile muno abokhunyasia

[41] Ne nibakhuyingasia boola mbu; ‘‘endi nende ebikhole bianje, nanyu muli nende ebikhole bienyu, Enywe muli ehale nende akekhola ne esie siesi endi ehale nende akamukholanga.”

[42] Ne mubo baliwo bakhuwulilisinjia, Ne koo wakhanyala okhukhola abekala amarwi bawulila nibalawulilanga tawe

[43] Ne mubo baliwo bakhukhondiolanga, Ne onyala okhulunjisia abawofu kata nibalanyala okhulola tawe

[44] Toto Nyasaye shakholelangakhwo Abandu obubii tawe, halali Abandu abeene nibo bekholelanga obubii

[45] Ne inyanga ya alibakhung’asia, iliba shinga shibekhale khushialo halali Isaa ndala yeshitere. Balimanyana hakari wabu. Toto basikha balia bayingana okhubukanana nende Nyasaye wabu, ne shibaali bokhulunjikha tawe

[46] Ne toto nikhukhwechesia malala khuka khubalakanga, nohomba nikhukhufwisia, khwifwe niko amakalushilo kenyu, mana Nyasaye aliba omuloli khukabakholanga

[47] Ne buli omukanda kuli nende Omurumwa, kho olwa Omurumwa wabu aliulia, balibusia hakari wabu mubuleng’aafu, ne bo shibalikholelwa obubii tawe

[48] Ne baboolanga mbu: “niliina akamulakanga kano toto nimuli abahabwene.”

[49] Boola; “Esie embula obunyali bwokhwikholela obubii nohomba abulayi, halali shia Nyasaye yenya. Buli omukanda kuli nende ebise biakwo, ebise biabu nibiula shibekhalanga isaa ndala tawe nohomba shibaranjililanga tawe

[50] Boola; ‘‘Mulola murie eshinyasio esho nishibetsela eshilo nohomba eshitere, kho mbushina abamabii bayungubasinjia mbu shitse lwangu?’’

[51] Olwa ilirulila khomwasuubila? Mulirebwa mbu ; “bulaano buri?( isayino?) Ne mwali nimuyiyungubalilanga

[52] Mana balia bakhola obubii baliboolelwa mbu; “Pile eshinyasio shilawa, koo mukharungungwakho eshindi eshilali ashamwakholanga?”

[53] Ne bakhurebanga mbu;” Koo ako ni katoto?” Boola mbu; “Eeeh nditsuba khu Nyasaye wanje Omulesi toto ako ni abwene. Ne enywe shimunyala okhushila tawe.”

[54] Ne buli Omundu owakhola obubii abetsanga mbu alinende biosi bili mushialo, yakharusiyie yenunula. Ne olwabalilola eshinyasio balitinyia okhufisa okhwiyitsulisia khwabu, ne olwa balilola eshinyasio balibusilibwa hakari wabu khubuleng’afu neshibalikholelwa obubii tawe

[55] Koo manye mbu, toto nibia Nyasaye ebili mwikulu nende mushialo, manye mbu ka Nyasaye alaka ni katoto, halali Abandu abanji shibamanyile tawe

[56] Ye alamusinjia ne afwisinjia, na ni ewuwe niwo amulikalusibwa

[57] Enywe Abandu toto kabetsela amebaalo okhurula khu Nyasaye wenyu, nende eshihonia shia akali mubilifu, nende obulunjifu nende tsimbabaasi khubasuubili

[58] Boola mbu; “Khu bulayi bwa Nyasaye nende tsimbabaasi tsitsie, mana basangale khulwako, Ne kano ni amalayi okhushila kabakhung’asinjia

[59] Boola mbu; “Koo mulola murie emikabo chia Nyasaye yabeshilia, mana nimukhola muchio echilachamilwa nende echindi echichamilwa, boola mbu; “Nyasaye niye awabahelesia omunwa, nohomba enywe muchishilanga Nyasaye?”

[60] Ne baparanga barie balia bachishilanga Nyasaye obubeyi khu inyanga yeyindukho? Toto Nyasaye ali nende obulayi obunji khubandu, halali abanji babu shibakhupanga orio tawe

[61] Ne shokhalabananga khumulimo kwiosi kwiosi, nohomba shosomanga mukurani muno nohomba shimukholanga eshikhole shiosi shiosi, halali efwe khubetsanga abaloli benyu olwa mukhalabananga. Sishifisanga khu Nyasaye wuwo eshindu shiosi shiosi, shili shinga obusiro bwolulolo, shili khushialo nohomba mwikulu tawe, nohomba eshititi okhushila esho nohomba eshikhongo, halali shili mushitabu shinoosinjia

[62] Ulile ne mumanye mbu, toto abahelwa ba Nyasaye shibaliba nende obuyendi nohomba okhubeelela tawe

[63] Balia basuubila ne bali nibaria Nyasaye

[64] Bobali nende obusangafu khubulamu bwo khushialo nende mwikulu. Obukalukhani bubulaho mumakhuwa ka Nyasaye, okho nikhwo okhubura okhukhongo

[65] Ne amakhuwa kabu kalakhubeelesia tawe, toto obunyali bwosi nibwa Nyasaye, naye niye Omuwulili Omumanyi muno

[66] Koo Manye mbu; toto ni bia Nyasaye ebili mwikulu nende mushialo. Ne balia balamanga owulali Nyasaye, shibalondanga halali amaparo kabu , ne shibaboolanga halali obubeyi butswa

[67] Ye niye owabakholela eshilo mwihotselesiliemwo, ne eshitere eshing’eng’elanga, Toto mwako khuli nende eshimanyisio khubandu bawulilanga

[68] Ne baboola mbu; “Nyasaye yekholela omwana” ali ehale nende ako, ye yenyala. Nebibie biosi bili mwikulu nende khushialo. Ne enywe mubula eshifune khu kano. Koo mwibolelangasa khu Nyasaye akamulamanyile tawe

[69] Boola mbu; Toto balia bachishilanga Nyasaye obubeyi shibalibura tawe

[70] Omwikhoyo omutiti khushialo, mana khwifwe niko amakalushilo kabu, mana khubapilie eshinyasio eshilulu khulwa kalia kabakhayanga

[71] Ne basoomele amakhuwa ka Nuhu, alwa yaboolela Abandu bebe mbu, “Enywe Abandu banje, nikali mbu okhwikhala khwanje ninanyu nende okhubetsulisia khwanje ebimanyisio bia Nyasaye khubasinyile.(manye mbu) esie ndisichile Nyasaye, kho enywe khung’asie amakhuwa kenyu nende abiamutsokasinjia bienyu mana likhuwa lienyu lia mubusia libe habulafu, mana mumbusilie okhumala ne mulambelesia obwiyangu tawe

[72] Ne nimukhaya, esie shebasabanga omurungo tawe, omurungo kwanje shikuli halali khu Nyasaye. Ne ndalomesibwa okhuba mubalia abeelekhulanga khuye

[73] Halali bamuyingasia, mana nikhumuhabina ye nende balia bali ninaye, muliaro (musafina), nenikhubakhola bo nibo abatong’a, ne nikhuyibisia balia abayingasia ebimanyisio biefu. Kho henga shingala yali indukho ya Abandu bekanyilisibwa

[74] Mana nikhuruma Abarumwa abanji inyuma wuwe, khubandu babu. Mana nibabetsela nende ebifune bili habulafu. Ne shibali nibakhasuubila akabayingasia mukhuchaka, ne endio ni lwakhuretsanga ebimanyisio khumioyo chia Abandu baburanga eshichelo

[75] Mana okhurula khu abo nikhuruma Musa nende Haruni khu Firauni nende Abandu bebe abakhongo, nende ebimanyisio biefu, mana nibafura, ni baba Abandu abetsimbii

[76] Ne olwa obwatoto bwabetsela okhurula khwifwe, baboola mbu:” toto buno ni obulosi bwa habulafu.”

[77] Musa naboola mbu; “koo muboolanga endi khubwatoto bubetsele? Mbu buno nobulosi? Ne abalosi shibaburanga tawe?”

[78] Nibaboola mbu; “Koo witsile mbu okhurusie khukalia akakhwanyoola nako bapapa befu, mbu kho obukhongo bube obwenyu enywe khushialo, shikhunyala okhubasuubila tawe.”

[79] Firauni naboola mbu; “Munderere buli Omulosi Omumanyi muno.”

[80] Ne olwabalosi betsa Musa nababoolela; “Sukune biamwenya okhusukuna”

[81] Ne olwa basukuna, Musa naboola mbu; “Akamurerere kano ni obulosi, toto Nyasaye yetsa okhubufunaka. Toto Nyasaye shatinyisinjia ebikhole biabandu bokhunyasia tawe.”

[82] “Ne Nyasaye yetsa okhwemia obulaamba khu makhuwa keke kata ababii nibalenyele.”

[83] Ne shibasuubila khu Musa halali Abandu batiti okhurula khubandu be, nibarire Firauni nende Abandu baye okhubasandia. Toto Firauni yali omufuru khushialo, ne toto ye yali mubalia babura eshichelo

[84] Musa naboola; “Enywe Abandu banje nimuli mbu musuubile Nyasaye, mumwisiche ye butswa, toto nimuli abelekhulanga khuye. (abasalamu)

[85] Nibaboola mbu; “khwisichile Nyasaye, Ewe Nyasaye wefu Omulesi Olakhukhola khwanyoola obunyakhani okhurula khubandu ababii abo tawe

[86] Ne khuhonokosie khulwetsimbabaasi tsitsio okhurulana nende Abandu Abakhayi.”

[87] Mana nikhufimbulila Musa nende Omusiani wabu obufimbuli buno mbu:, “Bakasilie tsinzu Abandu benyu Misri ne mukhole tsinzu tsienyu okhuba habundu wokhukholela amalaamo , ne mulumilile okhulaama ( iswala), ne suubisia abasuubili.”

[88] Musa naboola mbu; “Nyasaye wefu omulesi, toto ewe wahelesia Firauni nende abakhongo bebe ebirone nende omwandu khubulamu bwo khushialo buno, Khulwako bakoselinjiakhwo Abandu khunjila yiyio. Nyasaye wefu Omulesi, salania omwandu kwabu ne oboye emioyo chiabu, balasuubila tawe okhula balole eshinyasio eshilulu.”

[89] Nyasaye naboola mbu; “okhusaba khwenyu khuchamilwe kholaano yeme obulayi, ne mulalonda tsinjila tsia abalamanya tawe.”

[90] Nikhwambusia Abaana ba Israil Inyanza, ne Firauni nende omukanda kukwe kwabalwani nabalondakhwo khububii nende khubusuku. Ukhula shingala Firauni yanyoolwa nende lifwa liokhusishibwa mumatsi , naboola mbu; “ Esuubile mbu abulaho Nyasaye wundi halali wa Abana ba Isaril basuubila nasi endi halala mubandu balia abehotselesia.”

[91] Oooh! Bulano buri? Ne waliwakhaya mana noba mubandu bokhubiyia

[92] Kho nyangayino khwitsa okhuhabina omubili kukwo kho obe eshimanyisio khubetsa inyuma wuwo, Netoto Abandu abaanji bang’ang’ala khubimanyasio biefu

[93] Ne toto Abana ba Israili khwabamenyia obulayi, nenikhubahelesia emikabo emilayi. Ne shibakabukhana tawe okhula shinga obumanyi bwaboolela, toto Nyasaye wabu omulesi alibabusilia hakari wabu inyanga yeyindukho khukalia akabakabukhananga

[94] Ne noli nende inganakani nende khuka khwakhwishilia, mana reeba abasomanga eshitabu ewe noshiili. Toto obulamba bumalilie okhwitsila okhurula khu Nyasaye wuwo Omulesi. Kho alaba mubalia bali nende obukanakani tawe

[95] Ne olatema okhuba mubalia bayingananga khubimanyisio bia Nyasaye tawe, wakhetsa waba mubalia basikha

[96] Toto balia belikhuwa lia Nyasaye wuwo liamala okhubaburira shibasuubilanga tawe

[97] Kata nibanyoola buli eshimanyisio(shibasubilanga tawe) okhula balole eshinyasio eshilulu

[98] Shichila shina nilulabaho olukongo olwasuubila kho obusubili balwo bubakhonye? halali abandu ba Yunus, olwa basuubila khwabarusiliaho eshinyasio shiokhututuyia, mubulamu bwokhushialo mana nikhubahelesia omwikhoyo khubise(bia khwenya)

[99] Ne Nyasaye wuwo yenyanga Abandu boosi bakhasuubile khushialo, kho nawe wakhanichilisia Abandu mbu babe Abasuubili

[100] Ne Abulaho Omundu unyala okhusuubila halali khukhuchama khwa Nyasaye, Ne akholanga eshinyasio shibe khubalia abalarumishilanga amachesi kabu tawe

[101] Boola; “lole nishina shili mwikulu nende khushialo” Ne ebimanyisio nende amekanyilisio shibikhonyanga Abandu balasuubila tawe

[102] Koo bakhalindanga elindi halali akafwanananga aketsinyanga tsia bandu babura imbeli wabu? Boola mbu; “Mana liinde, siesi endi halala ninanyu mubalindanga.”

[103] Mana khulihabina Abarumwa befu nende balia basuubila ninabo, Ne endio ni lwakakwanila okhuhabina Abasuubili

[104] Boola mbu; “enywe Abandu! Ni muli nende obukanakani khudini yanje, esie shelamanga ebiamulaamanga habundu wa Nyasaye tawe, halali elaamanga Nyasaye ulia ulibafwisia ne yanomesiyie mbu embe mubasuubili.”

[105] Ne ohenjie obweni bubwo khu idini yokhutswenulila emilukha chichio khu Nyasaye, ne olaba mubatsokaasinjia Nyasaye tawe

[106] Ne olalaama ebilali Nyasaye, bilakhakhukhoonya nohomba okhumisia tawe, ne nokhola orio olaba mubandu ababii

[107] Ne Nyasaye nakhutilakhwo khububii, abulaho yesiyesi unyala okhurusiliaho libii elo owulali ye tawe, ne nakhwenyela amalayi abulaho unyala okhukalusia obulayi bwaye, ahelesinjia owayenya mubandu bebe, naye ni Omunji wobulesheli Omunji wetsimbabaasi

[108] Boola mbu; “Enywe Abandu toto obwatoto bumalile okhuboolela okhurula khu Nyasaye wenyu. Kho ulia ulunjikha alunjikhanga khululwe omwene, naye ulia ukora akoranga khululwe omwene. Nasi shendi omulindi khwinywe tawe

[109] Ne loonda akofimbulilungwa, ne wisumulisie okhula shingala Nyasaye alabusia, Naye niye Omubusia Omulayi muno umalayo

[1] Aif Lam Ra, shino ni eshitabu shietsinyaali tsiashio tsiakasibwa obulayi mana nitsinoosibwa obulayi okhurula khu Wamachesi muno Omumanyi wa koosi

[2] Mulalaama okhuyiniakhwo Nyasaye butswa, (Yenyene) Toto esie khwinywe endi omwikanyilisi nende Omusuubisia

[3] Ne sabe eshileleshelo Nyasaye wenyu, mana mumukalushile, yetsa okhubahelesia omwikhoyo omulayi okhula ebise ebimanyifu(khuye) Mana alihelesia buli owamalayi amalayi kaye. Nenimulaloonda tawe esie ebaririra eshinyasio shieyinyanga ikhongo

[4] Amakalushilo kenyu ni wa Nyasaye, naye ni Omunyali wabuli eshindu

[5] Koo, manye mbu; “toto abo bafisanga akali mubilifu biabu, mbu khobafise Nyasaye, manye mbu; olwa befunikhanga tsingubo tsiabu(Nyasaye) yamanya akabafisanga nende akabaretsanga habulafu. Toto ye amanyile muno akali mubilifu

[6] Ne yibulaho isolo yosiyosi khushialo halali omukabo kwayo kuli khu Nyasaye, yamanya eshimenyo shiayio shetsinyanga tsiosi, nende habandu wuwe okhuburira butswa, Koosi kali mushitabu ashiretsanga habulafu

[7] Niye owaloonga likulu nende eshialo khu tsinyanga tsisaasaba, ne eshisaala shishie shioluyali shiali khumatsi, kho abapime niwina mwinywe ukhola amalayi. Ne noboola mbu; “toto enywe mulilamusibwa nimwakhamala okhufwa” Abakhayi toto balaboola mbu; “buno shini shiosi shiosi tawe halali obulosi bwa habulafu

[8] Ne nikhubashindia okhunyoola eshinyasio okhuula ebise biabusibwa, baboola mbu; “Nishina shikayilanga eshinyasio esho” Manye mbu inyanga yashilibetsela sishilibarusibwakhwo tawe. Ne akabatseshelanga kalibabotokhana

[9] Ne Omundu nikhumupilia tsimbabaasi okhurula khwifwe mana nikhutsirusiawo khuye, amalanga afwa omwoyo lwangu muno, khandi abula okhupara obulayi

[10] Ne nikhumupilia obwokholo imbeli wobutinyu bwayanyoola aboola mbu; “obubii bundulilekhwo” Toto ye asangala niyelaya muno

[11] Halali balia besumilisia mana nibakhola ebikhole ebilayi, abo balinyoola obulesheli nende omurungo omukhongo

[12] Mana awundi olalekha akandi kalia akawafimbulilwa, ne eshilifu shishio shitsa okhulola obusiro khulwa ako shichila okhuboola khwabu mbu; “shichila shina nakhaya okhwishilibwa eshiachi nohomba Malaika okhwitsa halala ninaye? Ewe oli omwikanyilisi butswa, ne Nyasaye niye omulindi wabuli eshindu

[13] Nohomba babolanga mbu; “washikasia omwene” Boola mbu; “Mana rerekhwo tsinyaali ekhumi tsiobubeyi etsiakasibwa shinga ino, ne mulanje abamunyalilwa abalali Nyasaye tawe, toto nimuli mbu muboolanga habwene

[14] Ne nibalafuchilila tawe kho manye shieshibwa khubumanyi bwa Nyasaye, ne abulaho Nyasaye halali ye, kho mana mulaba abehotselefu

[15] Balia benya obulamu bwokhushialo nende oburone bwashio, khulabahelesia khushialo khuno, ebikhole biabu biosi, ne shibali tutuyilibwa tawe

[16] Abo nibo abalaliba nende eshindu mwikulu tawe halali omulilo, ne ebikhole biosi biabakhola biakhabiye, ne kaliba amakhaya kosi kabakholanga

[17] Koo Omundu uli nende tsinyaali okhurula khu Nyasaye wuwe, ne atsisoomanga tsinyaali etso - ni obuloli okhurula khu Nyasaye wuwe, ne imbeli wuwe eshitabu shia Musa eshiali eshimilisi nende eshietsimbabaasi, abo bamuusubilanga ye, ne balia bamukhaya mumukanda, abo omulilo nikwo amalakano kabu. Kho olaba nende inganakani khukano tawe, buno ni obwatoto okhurula khu Nyasaye wuwo, halali Abandu abanji shibasuubilanga tawe

[18] Ne ni wina omubii omukhongo oyo, okhushila ulwa uchishila Nyasaye obubeyi? Abo balirerwa imbeli wa Nyasaye wabu, ne abaloli baliboola mbu; “Bano nibo abachishila Nyasaye wabu obubeyi” wulile! Eshitsubo shia Nyasaye shili khubandu ababii

[19] Balia abekalilanga(Abandu) khu Injila ya Nyasaye, ne benyanga mbu yikotiombole, ne bakhayanga mbu obulamu bwomwikulu bubulaho

[20] Abo shibanyala okhuswekha khushialo tawe ne babula omulindi owulali Nyasaye, Balimetelwa eshinyasio, Shibali nibanyala okhuwulila nohomba shibali banyala okhulola tawe

[21] Abo nibo basishia emioyo chiabu, ne akabachikhanga kalibakora

[22] Toto abo nibo balinyoola okhusikha khwatoto mwikulu(Akhera)

[23] Ne toto balia abasuubila mana nibakhola 11. amalayi, mana nibehotselesia khu Nyasaye wabu, abo nibo Abandu bo mwikulu ( Jannah), balimenyamwo tsinyanga tsiosi

[24] Emikanda chibili echo chili shinga omuwofu nende owekala amarwi, nende owulolanga nende owulilanga, koo babili abo bakhayelana toto? Shimuparangakhwo tawe

[25] Ne toto khwaruma Nuhu khubandu bebe. (Nababoolela) “Toto esie endi Omwikanyilisi wenyu Owahabulafu.”

[26] Mulalaama halali Nyasaye butswa (yenyene), esie abaririra eshinyasio shie inyanga indulu

[27] Abakhongo babakhayi mubandu bebe nibaboola mbu; “Efwe shikhukhulolanga noli shiosi shiosi tawe, oli butswa Omundu shinga efwe, ne shikhukhulolanga halali abalondi bao nibo abateshele mwifwe, bakhulondelekhwo khuliparo liokhuchaka, ne shikhubalolanga nimukhushilila shiosishiosi tawe, halali khubaparira mbu muli ababeyi

[28] Yaboola;”Enywe Abandu banje, mulola murie nendi nende eshimanyisio okhurula khu Nyasaye wanje, neyambelesiye tsimbabaasi okhurula khuye, mana mwesi tsiboolele, koo khwakhabanichilisia okhutsichama nanyu ni mukhayile

[29] Ne enywe Abandu banje, esie shebenyaangakhwo omwandu tawe, omurungo kwanje kulibuswa khu Nyasaye, ne esie shindakhatafia balia abasuubila tawe, toto bo balibukanana nende Nyasaye wabu Omulesi, halali esie ebalolanga enywe nimuli Abandu balamanyile tawe

[30] Enywe Abandu banje! Wina witsa okhuhabina imbeli wa Nyasaye, nikali mbu ebatafia abo? Shimuparangakhwo tawe

[31] Ne shebaboolelanga mbu endi nende ebiachi bia Nyasaye tawe, nohomba mbu esie ndamanya amakhuwa kefisile, nohomba shemboola mbu “esie endi Malaika tawe” nohomba shemboola mbu: “balia abababusinjiamwo tsimoni mbu Nyasaye shalabahelesia obulayi tawe.” Nyasaye niye umanyile muno akali mumioyo chiabu(nemboola endio) Toto nditsa okhuba mubandu abamabii

[32] Baboola mbu: “ewe Nuhu, wakhalomaloma ninafuu muno, ne oburirisiye amakhuwa muno, mana nakharera akokhulakanga ako toto noli owuboolanga obwatoto.”

[33] Naboola mbu; “Nyasaye alabarerera niyenya, ne enywe shimunyala okhumushila tawe”

[34] Ne amachelo kanje khwinywe shikakhakhonya tawe, nindenya okhubachelela, Nyasaye niyenya okhubalekha mukore, Ye niye Omulesi wenyu, na ni ewuwe ni wamulikalusibwa

[35] Nohomba baboolanga mbu; “Yakasiasa omwene” boola mbu;” Nendi ndakakasia tsimbii tsilikhwisie, nasi endi ehale nende amabii kamukholanga.”

[36] Nuhu nafimbulilwa mbu: “ toto abulaho witsa okhusubila mubandu bawo halali balia bamala okhusuubila, kho alabeelela khukabakholanga tawe.”

[37] Ne okasie iriaro (safina) mutsimoni tsiefu, nende khubufimbuli bwefu, ne olanomianomia amakhuwa kabandu ababii tawe, toto abo betsa okhufwa okhurulana nende amatsi

[38] Ne nachaka okhukasia obwaro(isafina), ne buli Abandu be nibabura bamutseshelelanga, naye yaboolanga mbu; “nimukhutseshelela, fwesi khulabatseshelela shingala mukhutseshelelanga.”

[39] Ne mwitsa okhumanya wina ulanyoola eshinyasio shio khumututuyia, ne wina witsa okhwishilibwa eshinyasio shilawa

[40] Olwa likhuwa liefu liola, mana liloba nilichaka okhubitikha amaatsi, khwamuboolela mbu; “injisiamwo (muliaro) eshisatsa neshikhasi, nende Abandu bawo- halali balia belikhuwa liamala okhubura- nende abasuubila, ne shibasuubila halala ninaye halali batiti

[41] Ne (Nuhu) naboola mbu; “Ninemwo, khulira lia Nyasaye khube okhwilukha khwalio nende okhwema khwalio. Toto Nyasaye wanje Omulesi ni Omulesheli muno Owetsimbabaasi.”

[42] Eliaro elo nilichaka okhwilama ninabo mumarunda kalishinga tsingulu. Mana Nuhu nalaanga Omwana wuwe owali ehale; “Ewe mwananje nina ninafu muno, ne olaba nende Abakhayi tawe.”

[43] (Omwana waye) Naboola mbu; “Nditsa okhunina khulukulu lwitsa okhuninda okhurulana nende amatsi.” (Nuh)Naboola mbu; “Owumao owulinda yesi yesi nyangayino likhuwa lia Nyasaye, halali ulia awahelesiye tsimbabaasi”, Mana lirunda nilikhupa hakari wabu mana naba mubalia abasikha okhurulana nende amatsi

[44] Ne nikaboolwa mbu; “Ewe liloba! Mila amatsi koko, na ewe likulu kekalile, mana amatsi nikakholomokha hasi, ne likhuwa nilibusibwa, Ne eliaro niliema khulukulu lwa Judi. Ne nikaboolwa mbu; “Basishile ehale Abandu ababii”

[45] Ne Nuhu nasaba Nyasaye wuwe, naboola mbu; “Ewe Nyasaye wanje, Omwana wanje ni mulala khubandu bomunzu yanje, ne okhulaka khukhwo nikhwatoto, nawe newe owatoto umalayo okhushila abasubisinjia boosi

[46] Yaboola mbu; “Ewe Nuh, toto oyo Shali mubaana bo tawe, ebikhole bibie shinebilayi tawe, kho olareba akobula ninako obumanyi tawe, esie ekhuchelela olaba mubandu abasilu tawe”

[47] (Nuhu) Naboola mbu; “Ewe Nyasaye wanje, ndilinda khwiwe ndaletsa okhusaba ekembula ninako obumanyi tawe, ne nolandeshela tawe, nende okhumbeela tsimbabaasi, nditsa okhuba mubalia banyoola okhusikha

[48] Nikaboolwa mbu ; ‘Ewe Nuhu, yikha nende omulembe okhurula khwifwe ne tsikhabi tsibe khwiwe, nende khubandu bali halala ninawe. Ne emikanda chindi khulichisangasia mana khulibatila nende eshinyasio eshilulu

[49] Ako ni mumakhuwa akefisa khukhufimbulililangakhwo, shiwali wabamanya tawe ewe nohomba abandu bobo, imbeli wakano, kho wisumilisie okhumala okhulayi khuliba khwabalia baria Nyasaye

[50] Ne khu babu Adi khwabarumila Omusiani wabu, (ulangwa mbu) Hud. Nababoolela mbu; “Enywe Abandu banje, Mulaame Nyasaye mubula Nyasaye wundi owulali ye tawe, Enywe shimuli halali abachishi butswa

[51] Enywe Abandu banje shebasabanga omurungo khu kano tawe. Omurungo kwanje kuli khu ulia owalonga, Mana shimuparangakhw+o tawe

[52] Enywe Abandu banje! Sabe eshileshelo khu Nyasaye wenyu, mana mumukalushile, alabererera amaleesi akeshia ifula inyinji, ne alabameta amani hekulu wa amani kenyu. Nemulakalukhana okhuba ababii tawe

[53] Nibaboola mbu; “ Ewe Hud! Oshili okhurerera ebimanyisio bili habulafu. Ne efwe shikhwakhalekha abanyasaye befu khumakhuwa koko ako tawe, Ne efwe shikhulakhusuubila tawe.”

[54] “Efwe shikhuboolangasa tawe halali abanyasaye befu bandi bamalile okhukhura mubutinyu. Naboola mbu; “Esie emumanyia Nyasaye, ne enywe mube abaloli mbu esie endi ehale khukamutsokasinjia.”

[55] Owulaliyetawe( Nyasaye)“ Khomundutilesa mwesi, mana mulambekho obwiyangu bwosi bwosi tawe

[56] Esie ndisichile Nyasaye Omulesi wanje nende Omulesi wenyu, shibulaho eshilonje shiosi shiosi halali eshikholanga shingala yenya. Toto Nyasaye wanje ali khunjila ingololofu

[57] Nenimukalukha inyuma emalile okhuboosilia akandarumwa ninako khwinywe. Ne Nyasaye wanje alarera Abandu bandi abalali 11. enywe, ne enywe shimunyala okhumukhola liosi liosi tawe. Toto Nyasaye niwokhubikha buli eshindu

[58] Olwa likhuwa liefu liola, khwahonokosia Hudi nende balia abasuubila halala ninaye khutsimbabaasi tsirulanga khwifwe. Ne nikhubahabina okhurulana nende eshinyasio eshiumu

[59] Ne abo nibo Adi. Bayingasia ebimanyisio bia Nyasaye wabu Omulesi, ne nibaloba Abarumwa baye, mana nibaloonda amakhuwa kabuli Omufuru Omushiamu

[60] Mana nibalondebwakhwo nende eshitsubo khushialo shino nende inyanga yeyindukho. wulile ne mumanye mbu, Abandu ba Adi bakhaya Nyasaye wabu Omulesi. Ne manye mbu Adi basishibwa, Abandu ba Hudi

[61] Ne Khu Thamud nikhuruma Omusiani wabu(ulangwa mbu) Swaleh. Naboola; “Enywe Abandu banje, mulaame Nyasaye, mulalaama nyasaye owulali ye tawe, Ye niye owabaloonga khushialo mana nabamenyiamwo. Kho mumusabe eshileshelo ne mumukalushile, toto Nyasaye wanje ali ahambi ne afuchililanga

[62] Nibaboola mbu; “Ewe Saleh! Toto wali Omundu omwisikwa khwifwe noshili okhwitsa nende kano. Oh! Okhukaninjia okhulaama akabapapa befu balamanga? Ne toto khuli nende obukanakani mumioyo chiefu khukokhulanjilanga kano

[63] Naboola mbu; “Enywe Abandu banje! Mulola murie nendi nende ebimanyisio ebia habulafu okhurula khu Nyasaye wanje Omulesi, naye yambelesiye tsimbabaasi okhurula khuye, Kho niwina witsa okhukhoonya khu Nyasaye ninditsukhana ndamukhaya? Neshimulameta shiosi shiosi tawe halali okhusikha

[64] Enywe Abandu banje ingamia ino niya Nyasaye, neni eshimanyisio khwinywe. Kho muyileshe ilie khushialo shia Nyasaye ne mulayitila khububii tawe, mwakhanyoola eshinyasio shili ahambi. Abandu ba Luti

[65] Mana nibayisinza. Mana(Saleh) naboola mbu; “mwikhoye mutsinzu tsienyu tsinyanga tsitaru (mulanyoola eshinyasio), Ino ni indache ilali yobubeyi tawe

[66] Olwa likhuwa liefu liola, khwahabina Swaleh nende balia abasuubila ninaye. Khutsimbabaasi okhurula khwifwe, nende eshinyasio shieyinyanga eyo. Toto Nyasaye wuwo niwa Amani Owokhushila

[67] Ne balia abakhola obubii oluyoka lwabasishia, nibanyolekhana mutsinzu tsiabu nibalaambalile

[68] Nibaba shinga Abandu balalikho omo tawe, Toto manye mbu Thamaud bakhaya Nyasaye wabu, mana Thamud nibakorera ehale

[69] Ne Abarumwa befu betsela Ibrahim okhumusuubisia, Nibaboola mbu; “mulembe” Nakalusia mbu; “Mulembe” Ni shiyashinda tawe niyetsa nende eshimwosi ushikhomefu

[70] Olwa yalola emikhono chiabu nichilashiulakhwo tawe, nabakholela obukanakani mana nabaria, nibaboola mbu; “olaria tawe, toto efwe khurumilwe khubandu ba Luti”

[71] Ne Omukhaye wuwe(Sara) niyemele shilunji natsekha, mana nikhumuhelesia amakhuwa amalayi- ka Is-haq ne inyuma wa Is-haqa khuliho nende Yaqub

[72] Naboola mbu; “eh esie endi! Ndakhebula nengofule endi ne omusatsa wanje wuno nakofule ari, toto lino nilikhuwa liokhuwuchisia.”

[73] Nibaboola mbu; “owukanga likhuwa lia Nyasaye? Tsimbabaasi tsia Nyasaye nende ikhabi yiyie tsibe ninanyu enywe Abandu beyinzu ino. Toto ye niye ukhoyesheele okhulaywa nende okhwitsomibwa

[74] Mana shingala oburi bwawa khu Ibraheem, namalile okhunyoola amakhuwa amalayi, yachaka okhuyingasia, okhulondokhana nende

[75] Toto Ibrahim yali Omwihotselefu, omwitsomi wa Nyasaye ne omwangu wokhumukalushila

[76] (Nikhumuboolela)”Ewe Ibraheem! Lekhana nende kano. Toto likhuwa lia Nyasaye wuwo limalile okhubura. Ne toto abo shilaboolela eshinyasio eshilakalusibwa inyuma tawe

[77] Ne olwa Abarumwa befu betsela Luti, yababelelela muno, mana nalola obutinyu muno shichilabo, naboola mbu; “ino ni inyanga isiro”

[78] Abandu bebe nibamwitsila tsimbilo, ne imbeli wakano bali nibakholanga amabii. Naboola mbu; “Enywe Abandu banje, bano ni abakhana banje, bo ni abatswenufu khwinywe. Kho murie Nyasaye ne mulafimbia omurwe nabacheni banje tawe. Mwinywe shalikhomwo omundu omulunjifu tawe

[79] Nibaboola mbu: “Nga ewe toto wamanya mbu khubula oluchendo mubakhana bao, ne toto omanyile obulayi muno shiakhwenyanga.”

[80] Naboola mbu; “embetsangakhwo nobunyali khwinywe nohomba ambetsanga nende isiilo ya amani (yakhoonya khwinywe)

[81] Nibaboola mbu; “Ewe Luti, toto efwe khuli Abarumwa ba Nyasaye wuwo Omulesi, shibalakhulakhwo tawe, ne orule ewe nende Abandu bao, mumashebelende, ne Omundu yesisyesi alahenga inyuma tawe, halali Omukhasi wuwo, naye kalamunyoola amasila ketsa okhunyoola abandi abo. Toto ibise biabu ni Itsuli- koo istuli shilisa ahambii

[82] Olwa likhuwa liefu lietsa, khwakhola hekulu yaba hasi wabu, mana nikhubeshilia ifula yetsimbale tsieliloba eliumu

[83] Etsiarebwakhwo eshimanyisio ewa Nyasaye wuwo Omulesi, ne kano shikali ehale nende Abandu ababii tawe

[84] Ne khubandu ba Madyan,(khwaruma) omusiani wabu ( ulangwa mbu) Shuabu. Naboola mbu: “enywe Abandu banje mulaame Nyasaye, mubula Nyasaye wundi owulali ye tawe. Ne Mulaleemia eshichelo nohomba iratili tawe. Esie ebalolanga muli obulayi, ne toto esie abaririra eshinyasio shilibabotokhana inyanga eyo

[85] “Enywe Abandu banje! Yitsusie eshichelo nende iratili khubuleng’aafu ne mulalemilia Abandu ebindu biabu tawe, ne mulasalasia obubii nende isasia khushialo tawe

[86] Ne(omwandu) okwa Nyasaye abatonyilie nikwo omulayi khwinywe, toto nimuli abasuubilanga. Mana esie shendi omulindi wenyu tawe

[87] Nibaboola mbu; “Ewe Shuab! Amalaamo koko kokhulomesia efwe okhulekha akabapapa befu balaamanga, nohomba khulekhe okhukhola shingala khwenya khumwandu kwefu? Toto ewe oli omuholo omulunjifu

[88] Yaboola mbu; “Enywe Abandu banje mulola murie nendi nende eshimanyisio shirula khu Nyasaye wanje ne yangabile omukabo omulayi, okhurula khuye, ne esie shindenya okhukabukhana ninanyu akebakaninjia tawe, shindenya halali okhukasia shingala enyalilwa ne okhubura khwanje shikhwakhaba tawe halali khu bunyali bwa Nyasaye, niye wandisichile na ewuwe niwenjomele

[89] “Na enywe Abandu banje! Okhukabukhana ninasi khulabayila kabanyoola shinga kalia kanyoola Abandu ba Nuhu, nohomba Abandu ba Hud nohomba ba Swaleh, ne Abandu ba Luti shibali ehale ninanyu tawe.”

[90] “Ne musabe eshileshelo khu Nyasaye wenyu, mana mwikanile khuye, toto Nyasaye wanje ni wetsimbabaasi owobuyanzi muno

[91] Baboola mbu; “Ewe Shuab, efwe shikhuwulilanga muno akoboolanga tawe, efwe khukhulola noli omuteshele khwifwe, bakhayanga okhuba Abandu bo khwakhakhulasile amachina, ne sholi omundu woluyali khwifwe tawe

[92] Naboola mbu; “Enywe Abandu! Abandu banje niboluyali khwinywe okhushila Nyasaye? Ne mwamukhola okhuba inyuma wemikongo chienyu, Toto Nyasaye abotokhananga akamukholanga

[93] “Ne enywe Abandu banje! Khole ngamwenya amunyalilwa, siesi ekholanga, ahambi hano mulamanya witsa okhulilwa nende eshinyasio shiokhumututuyia, nende ulia uli omubeyi. Kholinde butswa siesi endi ninanyu enindanga

[94] Ne olwe likhuwa liefu liola, khwahonokosia Shueib nende balia basuubila halala ninaye, khulwe tsimbabaasi tsiefu. Ne balia bakhola obubii, oluyoka lwabukula emioyo chiabu. Nibaba mutsinzu tsiabu nibalaambalile

[95] Nibabashinga abalabakhomwo tawe. Koo ulile, “Basikha Abandu ba Madyan shingala Abandu ba Thamud basishibwa.”

[96] Netoto khwaruma Musa halala nende ebimanyisio biefu nende ebifune bili habulafu

[97] Khu Firauni nende abandu baye. Halali abo baloonda amakhuwa ka Firauni, ne amakhuwa ka Firauni shinamalunjifu tawe

[98] Aliimisia Abandu beye inyanga yeyindukho, ne alibosia mumulilo. Neni habii ali arie habundu hawo

[99] Ne balondibwakho eshitsubo khushialo khuno nende inyanga yeyindukho. Ne ni eshibi shili shirie eshinyasio shiabalihebwa ukhula khabili

[100] Ako ni mumakhuwa ketsingongo kakhukhukanilanga, akandi muko kaliwo ne akandi kayinibwaho

[101] Nafu shikhwabakholela obubii tawe, halali nibo abeene bekholela obubii. Ne abanyasaye babalaamanga abalali Nyasaye shibabakhonyakhwo shiosi shiosi tawe olwa likhuwa lia Nyasaye wuwo liola. Ne shibabameta halali abusishi

[102] Ne endio nilwakhubetsanga okhubukula khwa Nyasaye wuwo, olwa atilanga olukongo niluli olwamabii, Toto okhubukula khukhwe ni okhululu muno

[103] Totomuakokhulinendeeshilolelokhubalia baritsanga eshinyasio shio mwikulu (Akhera) . Eyo niyo inyanga yabandu balikhung’asibwa, ne niyo inyanga yabilibaho ebilonje biosi

[104] Ne shikhubashindinjia tawe halali okhula ebise biarebwaho

[105] Inyanga lwayiliula, abulaho ulilomaloma halali khukhuchama khukhwe Nyasaye. Ne mubo balibamwo ababii nende abalayi

[106] Ne balia baliba ababii baliba mumulilo, balikhupamwo obuyoka nende tsimbungu

[107] Balikhalamwo ebise biosi biokhumenyaho likulu nende eshialo, halali shinga Nyasaye yenya. Toto Nyasaye wuwo akholanga shiayenya

[108] Ne balia bobulayi baliba mwikulu, balikhalamwo tsinyanga tsiosi tselikulu nende eshialo okhubaho. halali shinga Nyasaye yenya , niye wemikabo chilawa

[109] Kho olaba nende inganakani khukabano balaamanga tawe, shibalaamanga halali shinga balaamanga basabwe babu bakhale. Ne khulibahelesia omukabo kwabu omulamba okulalemibwa tawe

[110] Ne toto khwahelesia Musa eshitabu, mana ni obwawukhani niburebwamwo. Ne libulanga okhuba mbu nilikhuwa liaranjilila okhurula khu Nyasaye wuwo, toto bakhabusiye hakari wabu. Toto bo bali mubukanakani, mubuyendi khushio

[111] Ne toto Nyasaye wuwo alibarunga abo boosi ebikhole biabu, Toto ye ni Omumanyi muno khukabakholanga

[112] Kho tsililila nende obulunjifu shingala walomesibwa, nende balia abekanila ninawe, ne mulabura eshichelo tawe, toto ye alolanga muno akamukholanga

[113] Ne muleshinga khubalia bakholanga obubii tawe, omulilo kwabatilakhwo, ne shimuliba nende omulindi imbeli wa Nyasaye tawe, Mana mwabula okhukhonywa

[114] Ne olaame amalaamo khundulo tsibili tseshitere(Adhuhur nende Al-asr). Nende ebise bieshilo bilihambi nende eshitere. Toto obulayi burusinjiaho amabii. Shino ni eshitsulisio khubestulilanga

[115] Ne wisumilisie, toto Nyasaye shakosinjia omurungo kwabakholanga amalayi tawe

[116] Mana khulwashina nibalabamwo mubandu beyimbeli enywe nimushili, Abandu bobwongo, abakania obutobela khushialo? halali batiti butswa mubo abakhwahabina. Ne balia bakhola obubii, baloonda obwokholo bwa balimwo. Mana nibaba aboononi

[117] Ne Nyasaye wuwo shiniwokhusishia tsingongo khububii tawe Abandu batsio nibali abakholi bamalayi

[118] Ne Nyasaye wuwo yenyanga yakhakholele Abandu okhuba omukanda mulala (okhupara bulala). Kholano balatsililila okhukabukhana

[119] Halali balia aba Nyasaye wuwo yalolela tsimbabaasi, ne khulwatsio yabaloonga, Ne likhuwa lia Nyasaye liamala okhuranjilila mbu; “Toto bwene ndilitsusia mumulilo (mujahanaam ) Amajiini nende Abandu boosi (ababii)

[120] Ne khukhukanilanga amakhuwa kabarumwa khulwako khutinyisie omwoyo kukwo, ne mukano obwatoto bukhwitsile, nende amachelo nende obwitsulisio khubalia basuubila

[121] Ne boolela balia abalasuubilanga mbu; “Khole butswa akamukholanga fwesi khukholanga.”

[122] Ne linde butswa fwesi khulindanga

[123] Ne nibia Nyasaye biosi biefisa mwikulu nende mushialo, ne amakhuwa koosi kalikalusibwa khuye. Khomulaame ne omwisiche Ye butswa. Ne Nyasaye wuwo shakandalanga khukamukholanga tawe

[1] Alif Lam Raa – Tsino ni tsinyaali tseshitabu shinoosinjia

[2] Toto efwe khweshia Ikurani mulwarabu khomunyoole okhumanya

[3] Efwe khukhukanila tsingano tsindayi khulwa okhukhufimbulila Ikurani ino. Ne toto wali nolamanyile tawe kano nikashili okhuulila

[4] Olwa Yusufu yaboolela papa wuwe mbu: “Ewe papa wanje, esie endutsi tsing’ining’ini ekhumi nandala, nende eliuba nende omwesi ebilutsi (mumaloro) biosi nibinyinamilanga

[5] (Samwana) naboola mbu; Ewe mwana wanje olaboolelakhwo Abasiani benyu amalooro koko ako tawe, bakhaba bario bakhututila, Shetani khumundu ni omusuku owa habulafu

[6] NeendioNyasayewuwoyetsaokhulobola mana akhwechesie okhukalula amalooro. Niyetsa okhwitsusilia tsimbabaasi tsisie khwiwe, nende khulwibulo lwa Yaqub, shingala yetsusilia bapapa bao, Ibrahim nende Is-haaq. Toto Nyasaye wuwo ni Omumanyi Owamachesi muno

[7] Ne khu Yusufu nende Abasiani babu khwaliho nende ebimanyisio khubareebi

[8] Olwababoola mbu; “Toto Yusuf nende Omusiani wabu bachwamwa muno nende Papa wefu, okhushila efwe, ne –efwe khuli omukanda kwa amani, toto papa wefu alimubukori bwahabulafu.”

[9] “Yiree Yusufu nohomba mumusukune eshialo shia ehalee, kho obweni bwapapa wenyu bukalukhane okhuhenga enywe, Ne nimumala kano mulakalukhana okhuba Abandu abalayi

[10] Omubooli naboola mubo mbu; “muleera Yusufu tawe, halali mumusukune khwichina mwitukho liamatsi, lirambi, yetsa okhutolwa nende Ababuranjila(balikhuluchendo)toto enywe nimuli abokhukhola

[11] Nibaboola mbu; “Ewe papa wefu, shichila shina olakhusuubila khu Yusufu, toto efwe khumwenyela amalayi”

[12] “Mulekhule atsie ninafu mutsuli, asangale nabaya nafu toto khulamulinda”

[13] Naboola mbu: “Toto bilasinyisia, enywe okhutsia ninaye ne eritsanga ishisutse okhumulia nanyu nimukandaalile.”

[14] Nibaboola mbu; “Ishisutse shiakhamulia shirie nafu khuli omukanda kwa amani, toto khuba khuli mubandu babula obukhala.”

[15] Olwa batsia ninaye, mana nibafuchilisania mbu bamusukune mwitukho lia amatsi (shisima), khwamufimbulila (Yusuf) mbu; “olateba tawe olitsa okhubaboolela amakhuwa kabu kano nabo nibalimanyile tawe”

[16] Nibetsa khusabwe eshilo nibalilanga

[17] Nibaboola; “Ewe papa wefu! Toto efwe khutsile okhushilana ne nikhulekha Yusuf khumisiko chiefu. Mana eshisutse nishimulia. Halali ewe sholakhusuubila tawe kata nikhuli khuboolanga obwatoto.”

[18] Nibetsa nende ingubo yiyie niilikhwo amatsayi kobubeyi, naboola mbu; “ ni emioyo chenyu chibarumile okhukhola kano. Halali okhwisumilisia nokhulayi na Nyasaye niyewokhusabwa obukhoonyi khukamuboolanga kano.”

[19] Omukanda kwali khuluchendo nikuula, nibaruma omutayi wabu wa amatsi, mana natombola indo yiyie mulitikho lia amatsi (eshisima), naboola mbu ; “obulayi buli burie buno, khuli nomwana omusiani hano! Nibamufisa okhumukhola omusiko- (Kweyinganga). Ne Nyasaye ni Omumanyi wakoosi kamukholanga

[20] Mana nibamukusia khubukusi obutiti, khumamondo amabala. Ne bali babula naye oluchendo

[21] Ne ulia owamukula Misri, naboolela Omukhasi wuwe mbu: “mukaasilie habundu woluyali uno. Anyala yakhukhoonya nohomba khwamukhola Omwana wefu. Ne endio nilwakhwara Yusuf khushialo kho khumwechesie okhukalukhania amakhuwa. Ne Nyasaye niye wokhushila khumakhuwa keke, halali Abandu abanji shibamanyile tawe

[22] Ne olwa Yusufu yoola omundu omukhongo, khwa muhelesia obwami nende amachesi, ne endio nilwakhurunganga abakholi bamalayi

[23] Ne omukhaye weyinzu ya Yusufu yalimwo yamwikomba naye nalenya tawe- mana niyekala emiliango. Naboola mbu; “itsa hano!’’ Yusuf naboola; “ndilinda khu Nyasaye, Omwami wanje uno yara esie habundu halayi, toto Abamabii shibaburanga tawe”

[24] Ne toto namukholela eshinani, naye yesi namukholela eshinani akhayanga okhulola eshimanyisio shia Nyasaye wuwe, Ni khumurusiakhwo obubii, nende eshifwabi, toto ye ali Mubasumba befu abatswenufu

[25] Bosi nibelushila namuliango, ne (omukhasi oyo) narandula ingubo (ya Yusuf) inyuma. Mana nibanyoola Omusatsa waye mumuliango. (omukhasi oyo) naboola mbu; “ Nimurungo shina kwa anyoola ulia wenya okhukhola obubii omukhaye wuwo halali okhuboywa (mujela,) nohomba okhuhelesibwa eshinyasio eshilulu

[26] (Yusuf) naboola; mbu; “Niye wenyele esie nindalenyele tawe”, Mana omuloli okhurula mubandu bomukhasi narusia obuloli; “Nikali mbu ingubo yiyie irandushe imbeli, kalaba habwene naye (Yusuf) alaba omubeyi

[27] Ne nikali mbu ingubo yiyie irandushe inyuma(Omukhasi oyo) alaba omubeyi naye (Yusuf) alaba mubatoto

[28] Kho (omusatsa) yalola ingubo yiyie nirandulwe inyuma, naboola mbu; “Toto kano ni mubifwanga bia bakhasi, toto ebifwanga biabu nebikhongo

[29] Yusuf lekhana nende kano, ne ewe (mukhasi ewe) saba eshileshelo khutsimbii tsitsio, toto ewe oli mubonoonele

[30] Abakhasi bolukongo olo nibaboola mbu; “ Omukhasi womukhongo yekomba omukholi waye naye nalamwikomba tawe. Toto obuyanzi bumutilile, toto efwe khulola mbu ali mubukori obwa habulafu.”

[31] Olwa yawulila amamoonyo kabu, yabarumania, nabakholela isambo, mana nahelesia buli omukhasi omubano, mana naboolela Yusufu mbu; “Bura imbeli wabu” olwabamulola bawuka nibamukhola omukhongo muno, mana nibeteta emikhono chiabu ni baboola mbu “ Tawe!! Uno shali omundu tawe, uno ni Malaika woluyali”

[32] “Omukhasi” Naboola mbu; “ako niko kamufunaniyekhwo, netoto esie ndamwikomba ye nalenyele tawe, mana niyeyikalila. Ne nalakhaya okhukhola liemulomesia tawe, toto yetsa okhuboywa ne yetsa okhuba mubandu abatiti

[33] (Yusuf) Naboola mbu; “Nyasaye wanje eshiboye ni eshilayi khwisie okhushila akabananjilanga ne nolandusiliaho ebifwanga biabu nditsa okhubachomakhwo ne ndalaba mubasilu

[34] Mana Nyasaye wuwe nafuchilila amasayo keke, mana namurusiliaho ebifwanga biabu. Toto ye niye Omuwulili Omamanyi muno

[35] Mana nikabaloloshela nibakhamala okhukhola ebifune, mbu balamuboya khubise bititi

[36] Mana nibenjila halala ninaye mumboye (mujela) Abasiani babili, mulala wabu naboola mbu; “ Esie ndilutsi(elorere) nendinyanga amalwa” Ne owundi naboola mbu; “Esie ndilutsi nenjinjile khumurwe kwanje omukate ne amayoni nikabotsa” khuboolele eshimanyisio shiamaloro ako, toto efwe khukhulola mbu oli mubandu abalayi.”

[37] Naboola; “Shishilabetselakhwo eshiakhulia shiosishiosi halali nemalile okhubaboolela eshimanyisio shiako, ako niko ka Nyasaye wanje Yanzechesia, esie ndalekha emilukha chiabandu balasuubilanga Nyasaye, nende abo bakhayanga inyanga yeyindukho

[38] Ne enondele emilukha chia Bapapa banje Ibraheem nende Is-haaq, nende Yaqub. Shikali khwifwe okhutsokasia Nyasaye nende shiosishiosi tawe, ako niko amalayi ka Nyasaye khwifwe, nende khubandu, halali Abandu abanji shibakhupanga orio tawe

[39] “Enye ababoye bashianje (babili)! Abanyasaye abanji bakabukhananga nibo abalayi nohomba Nyasaye mulala Owa amani

[40] Ebiamulaamanga bilali Nyasaye, ni amera butwsa kamwaraho enywe nende bapapa benyu, Nyasaye shiyeshiakhwo eshimanyisio shiosi khwako tawe. Ne okhubusia khwosi nikhwa Nyasaye butswa, yalomesia mbu mulalaama shiosi shiosi halaliye, eyo niyo idini yalunjikha. Halali Abandu abanji shibamanyile tawe

[41] “Enywe ababoye bashianje (babili) mulala wenyu alakalukha okhunywesia Omwani wuwe amalwa. Ne owundi yetsa okhwirwa abambwe, mana amayoni kalabotsa omurwe kukwe. Likhuwa limalile okhubura, elia mwarebanga okhumanya

[42] Ne naboolela owayamanya mbu yetsa okhuhonokokha, mbu; “unzitsulile imbeli womwami wuwo” Halali shetani namukoyasia okhwitsulisia Omwami wuwe. Mana niyekhala mumboye emika emibala

[43] Ne Omwami naboola mbu; “ Esie endustsi tsing’ombe saba, tsikhomefu nitsilibwa nende tsing’ombe saba tsing’awu. Ne endutsi tsingore saba tsimbisi nende etsindi tsinyumu. Enywe Abandu muhenjelekhwo amaloro kanje kano, nikali mbu enywe munyala okhukalula amaloro

[44] Nibaboola mbu; “Amaloro kenjilanemwo ako, ne efwe khwakorwa okhukalula amaloro

[45] Naboola ulia owahonokokha khubabili balia, niyetsulila, nibiakhabura ebise bititi, “Esie nditsa okhubaboolela okhukalula khwamaloro ako, kho murume.”

[46] “Yusufu ewe owatoto, khukalulile tsing’ombe saba tsikhomefu tsilibwa nende tsing’awu saba, nende tsingore saba tsimbisi nende etsindi tsinyumu- kho esie engalushe khubandu banyoole okhumanya”

[47] Naboola; “ Mulalima emika saba malondokhana kho biamuchesa mubileshe khubisokoro, biako halali bititi biamulia

[48] Mana chitsa okhwitsa emika saba, chiobutinyu chitsa okhulia ebiamwachibishila, halali shititi shamwitsa okhubikha

[49] Mana kano nikakhwawa, kuletsa omwika okwa Abandu betsa okhukhonywa(nende Nyasaye) ne mukwo balanyoolamwo(biabanyoolamwo)

[50] Omwami naboola mbu; “Mumurere khwisie” olwa omurumwa yamulila. Yusuf naboola mbu; “ Kalukha khumwami wuwo omureebe amakhuwa kabakhasi beteta emikhono chiabu, Toto Omwami wanje yamanya ebifwanga biabu

[51] “Muboola murie, olwamwekomba Yusufu naye nalenyele?” Nibaboola mbu; “ Apoo! Shikhwamanyakhwo obubii bwosi bwosi khuye tawe,” omukhaye womwami naboola mbu ; “Toto obwatoto bwakhamanyikha, nesie wamwikomba naye nalenyele tawe, netoto ye ali mubandu abo bwatoto.”

[52] (Yusuf naboola mbu) “Ako nilwokhubeela mbu, (Omwami) amanye mbu esie shindamukholela obubii inyuma wuwe tawe, ne mbu Nyasaye shalunjisinjia ebifwanga bia abakhobi tawe

[53] Nasi shengomelelanga omwoyo kwanje tawe, toto omwoyo nikwokhulomesia amabii, halali kulia kwa Nyasaye yahelesia tsimbabaasi. Toto Nyasaye wanje ni wobulesheli Owetsimbabaasi

[54] Omwami naboola mbu; “ Mumunderere ewanje emubukule abe Omundu wanje” Ne olwa yalomaloma naye, Omwami naboola mbu; “Toto ewe khwifwe omalile okhuba woluyali, nende omwisikwa.”

[55] Naboola; “Kholesie embe omulindi (Omuhenji) weshiachi shie shialo toto esie endi Omulindi Omumanyi Omulayi wamakana.”

[56] Ne endio nilwakhahelesia Yusuf obukhongo mushialo esho, yekhalamwo wosi wosi wayenya, tsimbabaasi tsiefu khwishilinjia wakhwenya ne shikhusukunanga omurungo kwabakholi bamalayi tawe

[57] Ne toto omurungo kwo mwikulu ni omulayi muno, khubalia abasuubila mana nibaria (Nyasaye)

[58] Abasiani babu Yusuf nibetsa, nibenjila ewa Yusuf, naye nabamanya nabo nibalamumanya tawe

[59] Ne olwa yabakasilia eshiakhulia shiabu, nababoolela mbu “Mungalushile nende Omusiani wenyu khu papa wenyu” Koo, shimulola mbu ebaleng’asilisiye eshichelo, nasi endi omuwani omulayi

[60] “Ne nimulamurera tawe, shindilibahelesia shiosi shiosi okhurula khwisie tawe, nemulasitakhwo ahambi hano tawe.”

[61] Nibaboola mbu; “Khwitsa okhutema okhwikweta samwana , ne toto khulakhola khurio.”

[62] Ne naboolela abakholi baye; “omwandu kwabu mure mumisiko chiabu, khobanyoole okhukulola nibakhakalushila Abandu babu, khobanyoole okhukalukha khandi

[63] Olwa bakalukha khu sabwe, baboola mbu : “ ewe Papa wefu, bakhwikalile eshibaba, kho okhuhelesie omusiani wefu khutsie naye kho khunyoole okhuhebwa eshibaba, ne toto efwe khulamulinda.”

[64] Naboola mbu:“ndakhabasuulila khu uno shingala ndabasuubila khumusiani wabu khale awo? Ne Nyasaye niye omulindi omulayi, naye ni Owetsimbabaasi umalayo .”

[65] Ne olwa baboolola emisiko chiabu , nibanyoolamwo emiandu chiabu chikalusibwe, ni baboola mbu: “ewe papa wefu shina shindi shiakhwenya? chino ni emiandu chiefu chikalusibwe khwifwe! khurere eshakhulia khulwa Abandu befu, ne khwitsa okhulinda omusiani wefu, ne khulanyoola eshibaba shie ingamia ndala, esho neshichelo eshititi. (khubuhani bwomwami)

[66] Naboola mbu:“shindalamulekhula atsie ninanyu tawe okhula shingala muletsuba khulira lia Nyasaye mbu mulachelela ninaye halali nimubotokhanwa mwesi. “ olwa bamuhelesia indakano eyo yaboola mbu “Nyasaye niye omulindi khukakhuboolanga kano.”

[67] Naboola mbu: “enywe Abaana banje! Mulenjila mwesi mumuliango mulala tawe, injilile mumiliango chikabukhaane. Ne esie shebakhonyakhwo shiosi shiosi imbeli wa Nyasaye tawe. Amakhuwa koosi kali khu Nyasaye. Naye niye wakhwisikanga, ne besikanga bamwisiche butswa Ye

[68] Ne olwabenjila shingala Sabwe yabebaalila, shishiabakhonyakhwo shiosi shiosi khu Nyasaye tawe halali akali mumwoyo kwa Yaqub kamala kekholeshe. Netoto ye yali wamachesi shichila khwamwechesia, halali Abandu abanji shibamanyile tawe

[69] Ne olwa benjila ewa yusuf, yakwa khumusiani wabu oyo naboola mbu: “ toto esie endi omusiani wenyu. Kho olabeelela shichila kabano bakholanga tawe.”

[70] Ne olwa yabahelesia eshilibwa shiabu, nara eshitayilo shia amatsi mumusiko kwomusiani wabu. Mana omulanjilisi nalanjilisia mbu: “enywe Abasamuli ! toto enywe muli abefi”

[71] Nibakalukhana nibamuhenga nibaboola mbu: “ nishina shiamukosiye?”

[72] Nibaboola mbu: “ khukosiye eshitayilo shiomwami, ne ulashirera alahebwa omusiko kweyingamia nasi nesie omwimilisi wakano”

[73] Nibaboola mbu: “ khwitsuba khulira lia Nyasaye, mumanyile mbu efwe shikhwitsile okhukhola amabii khushialo tawe, ne efwe shikhuli Abefi tawe.”

[74] Nibaboola mbu: “ omurungo kwaye kulaba shina enywe nimuli Ababeyi?”

[75] Nibaboola mbu “omurungo kwa ulia ulanyolekhana mumusiko kukwe, kho ye mwene oko nomurungo kwaye. Ne endio nilwakhurunganga Abandu bamabii.”

[76] Ne nachaka okhehenga mumisiko chiabu nashili okhuhenga mukwomusiani wabu. Mana nashirusia mumusiko kwomusiani wabu. Endio nilwakhwakholela Yusuf, shiyali unyala okhwikalila Omusiani wabu khumalako komwami wa Misr halali shinga Nyasaye yenya. Khuchingulanga hekulu bakhwenya, ne hekulu wa bulu omumanyi khuliwo nende omumanyi muno

[77] Nibaboola mbu: “ne niyebele toto Omusiani wabu yesi yeba khale awo.” Halali yusuf nakafisa mumwoyo kukwe, nenalababoolelakhwo tawe, naboola mbu: ‘‘enywe muli ababii muno ne Nyasaye amanyile kamuboolanga.”

[78] Nibaboola mbu: ‘ ewe omukhongo! Uno ali nende samwana omukofu muno, kho bukula mulala wefu mushilenje shishie. Toto efwe khukhulola mbu oli mubalia bakholanga amalayi.”

[79] Naboola mbu: “Nyasaye abusilie ehale. Okhutila Omundu wakhulanyolele naye omwandu kwefu! Khuletsa okhuba Abandu bamabii tawe.”

[80] Ne olwabafwa omwoyo ninaye basita ebuleka okhutsia okhusanjilana. Omukali wabu naboola mbu: “Enywe shimwitsulila mbu papa wenyu abukule indakano ninanyu khulira lia Nyasaye? Ne khale awo mwakhola obwononi khu Yusuf? Kho esie shindalarula mushialo muno tawe , okhula papa wanje yasubule, nohomba Nyasaye yambusilie, naye niye omulayi wokhubusia.”

[81] “kalushe khupapa wenyu ne mumuboolele mbu Omwana wuwo yebele, ne efwe shikhulutsi tawe halali khukakhumanyile, ne efwe shikhumanyile ekefisa tawe.”

[82] Ne reeba olukongo lwakhwalimwo, nende omukanda kwakhwali ninakwo. Ne toto efwe khuboolanga obwatoto

[83] Naboola mbu: “ halali emioyo chienyu chibanichilisiyie okhukhola murio, ne okhwifwila nokhulayi, Nyasaye yakhaba ario yabangalusilia boosi, toto Ye ni Omumanyi Owamachesi muno.”

[84] Nabarulakhwo naboola mbu: “ ooh abaane Yusuf!” Mana tsimoni tsitsie nitsilafuya khushibeela shiobutsuni muno.”

[85] Nibaboola mbu : “ khwitsuba khuNyasaye mbu sholalekha okwitsulila Yusuf tawe okhula shinga olaba omulwale nohomba olaba mubasikha.”

[86] Naboola mbu: “ Esie toto endilila Nyasaye obutsuni bwanje nende okhubeelela khwanje. Ne amanyile khu Nyasaye akenywe mulamanyile tawe

[87] “Enywe Abana banje! Tsie mukhaabe Yusuf nende Omusiani wabu. Ne mulafwa omwoyo khutsimbabaasi tsia Nyasaye tawe, shibafwitsanga omwoyo khutsimbabaasi tsia Nyasaye tawe halali Abandu abakhayi.”

[88] Olwa benjila ewa Yusuf (misr) baboola mbu: “ewe omukhongo ! khunyoolele obutinyu efwe nende Abandu befu, nekhurerere omwandu kulenyekhana tawe. Khuhelesie eshibaba shileng’anile. Ne okhuhelesiekho eshihanwa. Toto Nyasaye arunganga abarusinjia eshihanwa

[89] Naboola mbu: “ koo! Mwitsulila akamwakholela Yusufu nende Omusiani wabu olwa mwali abasilu

[90] Nibaboola mbu: “ koo, newe Yusuf? “ naboola mbu : “nesie yusuf ne uno ni Omusiani wefu, Nyasaye akhukholele obulayi, toto ulia uria Nyasaye mana niyesumilisia toto Nyasaye shakosinjia omurungo kwa bakholi bamalayi tawe.”

[91] Nibaboola mbu: “toto Nyasaye amalile okhukhulobola hekulu wefu, ne toto efwe khuli abamabii.”

[92] Naboola mbu : “ mubula ubatula olwalelo, Nyasaye alabaleshela naye niwetsimbabaasi muno okhushila abetsimbabaasi boosi.”

[93] “ Tsie nende ingubo yanje ino, muyire imbeli wa papa wanje , yetsa okhulimbukha achake okhulola. Ne mwitse nende Abandu benyu boosi.”

[94] Ne olwa omukanda kwarula sabwe yaboola mbu: “ embulilanga amalusu ka Yusuf, halali enywe musuubilanga mbu ndamala okhuyingoya (obwongo.)”

[95] Nibaboola mbu “ khwitsuba Khu Nyasaye mbu ewe oshili mubukori bubwo bwakhale bulia.”

[96] Kho shingala Omurumwa wamalayi yoola , nara ingubo imbeli wuwe, (wa yaqub)mana nalimbukha tsimoni nalola naboola mbu: “ shebaboolelekhwo mbu Ndamanya khu Nyasaye akamulamanyile tawe?”

[97] Nibaboola mbu : “ ewe papa wefu khusabile eshileshelo khutsimbi tsiefu, toto efwe khubeele abetsimbi.”

[98] Naboola mbu ; “ndalabasabila eshileshelo khu Nyasaye wanje, toto ye ni Omulesheli Owetsimbabaasi muno.”

[99] Ne olwa benjila ewa Yusufu , yabakwakho naboola mbu “ injile Misr Nyasaye nachama, mumulembe.”

[100] Yabuusia ebebusi bebe nabara khushisaala shishie shiobwaami, ne boosi nibamwinamila, naye naboola mbu “ ewe papa wanje kano niko amakalukhasio kamaloro kanje kalia, Nyasaye amalile okhukakhola katoto. Ne toto yakholela amalayi olwa yandusia mumboye, mana nabarera okhurula mushitsimi, shetani namalile okhutswatswania hakari wanje nende Abana befu, toto Nyasaye wanje niwokhukhola elia yenya, toto ye ni Omumanyi owamachesi muno

[101] “Ewe Nyasaye wanje, toto umbeele obwami, ne unzechesiyie okhukalukhania amalooro, ewe newe omulonji welikulu nende eshialo, newe omulindi wanje khushialo, nende mwikulu, ufwisie nendi omwihotselefu, ne usaasie halala nende abakholi bamalayi.”

[102] Ako ni malala khumakhuwa akefisa akakhukhufimbulilanga. Ne shiwali ninabo halala olwa bakasia amakhuwa kabu tawe, nende shingala bakholanga ebifwanga biabu

[103] Ne Abandu abaanji shinibasuubila tawe kata okhole eshinani orie

[104] Ne shobasabanga omurungo khukano tawe, ne kano ni amachelo sa khubandu boosi

[105] Ne ni ebimanyisio binga ebili mwikulu nende khushialo ebiburanga , nabo nibabula ninabio oluchendo

[106] Ne abanji mubo shibasuubilanga Nyasaye tawe halali eyi nibatsokaasia

[107] Koo! Bali mumulembe mbu amasila keshinyasio shia Nyasaye shikalabetsela tawe, nohomba inyanga yeyindukho shilabapwoka nabo nibakorerwe

[108] Boola mbu: “ ino niyo injila yanje enanganga khu Nyasaye nende obumanyi bwa toto. Esie nende abaloondi banje, ne Nyasaye ali hekulu wobuleemefu bwosibwosi, nasi shendi omutsokaasi tawe.”

[109] Ne shikhwarumwa imbeli wuwo halali abasaatsa abakhwafimbulila, mubandu betsingongo. Shibachendakhwo khushialo balola shingala indukho yabalia abali imbeli wabu? Ne inzu yo mwikulu niyo indayi khubalia abaria Nyasaye, shibamanyangakhwo tawe

[110] Okhula shingala Abarumwa bawesiakhwo omwoyo, nibapaara mbu baboolelwe amakhuwa kobubeyi, likhuwa liefu lioola mana nikhuhonokosia owakhwenya , ne eshinyasio shiefu shishilekhangakhwo ababii tawe

[111] Netoto mutsingano tsiabu amechesio kalimwo khubalia abali nende obwongo. Shikali amakhuwa kachikhwa tawe, halali ni amatinyisio khukalia akaliho khale, neni obulunjifu nende tsimbabaasi khubandu basubilanga

[1] Alif lam Mym Ra. Tsino nitsinyaali tsieshitabu shino. Ne kalia keshibwa khwiwe okhurula khu Nyasaye wuwo niko akatoto. Halali Abandu abaanji shibasuubilanga tawe

[2] Nyasaye niye owaninia likulu nabula okhwikhonyela tsisiilo tsiamulola, mana naleeng’ana khushisaala shishie (arsh) mana nakhola eliuba nende omwesi okhumuwulila, buli shilala shitsitsanga okhula ebise biashiahelesibwa, ye niye uchesinjia amakhuwa ne yenoosinjia tsinyaali tsino mwakhaba murio mwanyoola obwatoto bwokhubukana nende Nyasaye wenyu

[3] Naye niye owala eshialo mana naramwo tsingulu nende emialo. Ne buli mubiamo nakhola tsimbia tsibili ishisatsa nende eshikhasi. Afunikhanga eshilo khushitere, nende eshitere khushilo. Toto mu ako khulimwo nende ameeko khubaandu baparanga

[4] Ne mwiloba khulimwo nende ebitonye bitilanga, ne khubiamo nende emikunda chie mizabibu, nende emimela chindi, nende emitende chimelanga mulina lilala nende echindi chilamelanga mulina elala. chiosi chitsushililungwa amatsi kalia kalia. Ne khukhola ebiindi ebilayi okhushila ebindi khukhulia. Mukano khulimwo nende emeeko khubandu bekhonyelanga obwongo

[5] Ne noli mbu owukanga , shiwukwa muno nikababoolanga mbu; “Koo shingala khulaba nikhumalile okhuba liloba, mbutoto khulikalusibwa ebilonje ebiyiakha?” Abo nibo abakhaya Nyasaye wabu, nabo nibo belirebwakhwo omunyororo mumakosi kabu, ne abo nibo abandu bomumulilo, balikhalamwo tsiyanga tsiosi

[6] Ne bakhuyungubasinjia mbu oranjilile okhurera amabii inyuma wa malayi, nikali mbu biakhamala okhubura ebinyasio tsimbia tsiosi imbeli wabu. Ne toto Nyasaye wuwo niweshileshelo khubandu khububii bwabu, ne toto Nyasaye wuwo ni Omululu Weshinyasio

[7] Ne Abakhayi baboolanga mbu; “shina shichila nashili okhwishiakho eshimanyisio okhurula khu Nyasaye wuwe? Toto ewe oli omwikanyilisi butswa ne buli omukanda kuli nende omwimilisi

[8] Ne Nyasaye amanyile shia buli omukhasi achinganga, nende biabebulanga muunda- nende bimetanga. Ne buli eshindu khuye shili khushichelo

[9] Umumanyi wa kefisile, nende akali habulafu, omukhongo owuli hekulu

[10] Ne halala awo owufisanga likhuwa lilie mwinywe nende uliretsanga habulafu nende wifisanga eshilo nende uchendanga eshitere

[11] Ali nende omukanda imbeli wuwe nende inyuma wuwe, bamulindanga, khubuchami bwa Nyasaye. Toto Nyasaye shakalukhaninjia kali khubandu okhuula abeene bakalukhanie akali mumioyo chiabu. Ne Nyasaye olwa yenyela Abandu eshinyasio abulaho wokhwikalila ne babula owubalinda

[12] Ye Niye ubechesinjia okhumiesukha khwelikulu okhubaramwo oburi, nende obwikombi ne areranga amaleesi amasiro

[13] Ne likulu litsoominjia Nyasaye okhumukalusilia orio muno, ne malaika boosi khulwo okhumuria. Ne ayilanga amakhuwa kelikulu ne akhupanga nalio owayenya. Nabo bayingananga khu Nyasaye, naye ni Omululu Weshinyasio

[14] Ewuwe ni wakali amalaamo katoto, ne balia balaamanga owulali Ye, shibakalusibungwa shiosi shiosi tawe. halali bali shinga ulia ubambule amakhono kaye kabili mumatsi mbu kho koole mumunwa mumwe, halali shikoola tawe, Ne amasayo kabakhayi shikali halali mubukori butswa

[15] Ne binamilanga Nyasaye ebili mwikulu nende khushialo, nibichamile nohomba nibikhayile. Nende kata ebinikhabiabu itsuli nende ingolobe

[16] Boola; “niwina Nyasaye welikulu nende eshialo?’’ Boola mbu; “Ni Nyasaye” Boola; “Koo mukholanga abanyasaye bandi abalali Nyasaye? Ababula shiosi shiosi, khubo abeene eshilayi nohomba eshibii” Boola; “ Koo banyala okhuba nashilala omuwofu nende ulolanga? Nohomba biakhaba nashilala eshiilima nende obulafu? Nohomba bakholelanga Nyasaye abatsokaasi abaloonga shinga Nyasaye yaloonga, mana ebilonje bibafwananile. Boola “Nyasaye niye omuloonji wabuli eshindu, naye niye mulala butswa owubusinjia liayenya

[17] Yeshia amaatsi okhurula mumaleesi, ne emiombe nichikhulukusia amatsi khushichelo shiachio. Ne mana okhwitsula khwamaatsi nikhubukulalifilolibunjikhangahekuluwamaatsi. Ne mubilia ebiabasalulanga mumulilo okhwenya okhuronela ebindu- biosi birusinjia lifilo. Endio nilwa Nyasaye achelasia abwatoto nende obubeyi. Lifilo elo liburanga butswa shinga amakokha, ne bilia bikhoonya Abandu, bitong’anga khushialo, endio nilwa Nyasaye achelasinjia

[18] Balia bafuchilila Nyasaye wabu balinyoola obulayi, ne balia balamufuchilila tawe kata nibaba nende ebindu bili mushialo biosi, nende ebindi nibimetakhwo, bakharusiyie benunula, Abo bali nende okhubasibwa okhubii. Ne eshimenyo shiabu nimumulilo, ni habundu habii muno

[19] Koo! Ulia umanyile mbu keshibwa khwiwe okhurula khu Nyasaye wuwo Owobwatoto alishinga ulia omuwofu? Abachesi nibo baretsanga mumakani

[20] Balia abakholanga kabalakana nende Nyasaye wabu ne shibafunakanga indakano tawe

[21] Ne balia bongasinjia aka Nyasaye yalomesia okhungasibwa. Ne baritsanga Nyasaye wabu. Ne baritsanga okhubalwa okhubii

[22] Ne balia besumilisinjia okhwenya obuchami bwa Nyasaye wabu, mana nibalumilila okhulaama, mana nibayinia omukabo kwa khubakabile eshihanwa mubwifisi nohomba habulafu, ne balondinjia lilayi khuliibi, abo bali nende omurungo kwe inzu yo mwikulu

[23] Emikunda chilaliwa tawe balinjilamwo nende balia bakhola obulayi mubakofu babu nende Abakhaye babu nende olwibulo lwabu. Ne Abamalaika balinjililanga mwo buli mumiliango

[24] Omulembe kube ninanyu khukalia akamwefwila, kho ni obulayi buli burie bwe yinzu yomwikulu

[25] Ne balia bafunakanga indakano ya Nyasaye, nibamalile okhulakana, ne bakhalakanga ka Nyasaye yalomesia okhungasibwa, ne bakholanga obulianga khushialo, abo bali nende eshitsubo nebalinyoola inzu imbii

[26] Nyasaye afungulilanga omukabo owayenya, ne atutuyilinjia owayenya. Ne basangalilanga obulamu bwokhushialo, ne obulamu bwokhushialo nochelasia nende bwomwikulu shineshindu tawe halali omwikhoyo omutiti

[27] Ne abakhayi baboolanga mbu; “Shichila shina shikhweshilibwa amangalimwa okhurula khu Nyasaye wuwe?’’ Boola; “ Toto Nyasaye alekhulanga akore owayenya, ne alunjisinjia abamuchomakhwo ewuwe

[28] Balia basuubila mana emioyo chiabu nichihotselesia khukhwitsulila Nyasaye. Wulile ne mumanye mbu:! Khukhwitsulila Nyasaye emioyo chihotselesinjia

[29] Balia basuubila mana nibakhola ebikhole ebilayi, omwikhoyo kuliba okwabu, nende amakalushilo amalayi

[30] Ne endio nilwakhwakhuruma mubandu abamala okhuburirwa imbeli wabu Abandu bandi, kho abasomele kakhukhufimbulilanga, ne nabo bakhayanga (Nyasaye), Boola; “Ye niye Nyasaye wanje, obulaho ulaamwa khubwatoto halali Ye, emwisikanga Ye, ne amakalushilo kanje ni ewuwe

[31] Ne ibetsangao Ikurani yakhasiulilenje thingulu, nohomba yakharenjiye liloba, nohomba yakhalomalomenje nende abafu (yakhabeele ikurani ino), amakhuwa koosi nika Nyasaye. koo Abasuubili bashili okhumanya mbu Nyasaye yenyanga yakhalunjisiye Abandu bosi? Ne amasila shikalalekha okhunyoola balia bakhaya okhubela kalia kabakhola, nohomba ketsa okhwikha ahambi nende mumatala kabu, ukhula yule indakano ya Nyasaye. Toto Nyasaye shafunakanga indakano tawe

[32] Ne toto bakholela Abarumwa bali imbili wuwo amachayo, mana nebahelesia ebise balia bakhaya, mana nebatila. Kho eshinyasio shianje shiali shirie

[33] Koo ulia wemelanga buli Omundu khukalia kayakhola? Ne bakholelanga Nyasaye abasanji! Boola; “Barumbule, nohomba mumubolelanga akayakorwa khushialo, nohomba namakhuwa amakhaya, halali abakhayi baronerwa obifwanga biabu, mana nibekalilwa injila. Ne owa Nyasaye amulekhula yakora oyo abula umulunjisia

[34] Bali nende eshinyasio mubulamu bwokhushialo, ne eshinyasio shio mwikulu neshisiro muno. Ne shibaliba nomulindi ewa Nyasaye tawe

[35] Ifwani yomukunda kwa balia baria Nyasaye balakwa, hakari wakwo chiburanga mwo emialo, ne ebiamo biakwo shibiwetsanga tawe nende eshinikha shiakwo. Eyo niyo indukho yabalia abaria Nyasaye, ne indukho yabakhayi nimumulilo

[36] Ne abandi mubakhwahelesia eshitabu basangalilanga akaweshilibwa, ne mumikanda chiabu baliwo abandi bakhayanga akandi mukano, boola; “ Toto esie enomesibwa okhulaama Nyasaye ne ndalamutsokasiakhwo nende shiosi shiosi tawe, elanganga khuye ne uwewe niwo andilikalukha

[37] Ne endio nilwakhweshia (Ikurani) nili mbu ni amalako mulwarabu, ne noloonda obwikombi bwabu abumanyi buno nibumalile okhulila, sholiba nende omwitsa nohomba omulindi imbeli wa Nyasaye tawe

[38] Ne toto khwaruma Abarumwa imbeli wuwo, nikhubanyalila okhuba nende Abakhasi nende Abana. Ne shikanyalikhana khumurumwa okhurera amangalimwa tawe halali khubuchami bwa Nyasaye. Ne buli ebise bili nende ebiakahandichilwa

[39] Ne Nyasaye arusinjiaho akayenya ne alekhanga kayenya. Ne akabusibwa koosi karula khu Nyasaye

[40] Ne nikhwukhwechesia akandi kakhwabalaka noho nikhukhufwisa(Shilaboolela butwsa), Kho akoko ni okhusia butwsa, ne okhubala khuli khwifwe

[41] Koo! Shibalolangakhwo mbu khutilanga liloba liabu, nikhulitutuyia tutuyia khu tsinzakho tsialio? Ne Nyasaye abusinjia ne awumaho ukhaya okhubusia khukhwe. Naye ni Omwangu wokhubala

[42] Ne toto bakhola ebifwanga balia bali embeli wabu, halali Okhukalukhania ebifwanga ebo khuli khu Nyasaye. Amanyile shiabuli Omundu akholanga. Ne abakhayi balimanya mbu inzu yokhumalilikha yomwikulu niya wina

[43] Ne abakhayi baboolanga mbu shiwarumwa tawe, “Ewe boola; mbu; “Nyasaye ayela okhuba omuloli wanje. Hakari wanje ninanyu, nende ulia uli nende obumanyi bweshitabo.”

[1] Alif Lam Ra. Eshitabu sheshibwa khwiwe kho orusie Abandu mushilima obayile mubulafu, khubuchami bwa Nyasaye wabu, Oboosie khunjila ya ulia Owokhushila Owitsomibungwa

[2] Nyasaye, ulia owebili mwikulu nende khushialo bioosi nebibie yenyene, ne eshinyasio eshilulu shiliba khubakhayi

[3] Balia bachama obulamu bwokhushialo okhushila bwo mwikulu, ne bekalilanga injila ya Nyasaye ne bayenyelanga okhukotiombokha, abo bali mubukori obwahale

[4] Ne shikhwaruma Omurumwa yesi yesi okhuyiniakhwo khulusungo olwa Abandu baye, anyoole okhubenoosilia, kho Nyasaye alekhule owayenya okhukora akore, ne alunjisia owayenya, naye niye wa Amaani Owamachesi

[5] Netoto khwaruma Musa nende ebimanyisio biefu (nikhumuboolela mbu ) “orusie Abandubo okhurula mushilima okhutsia mubulafu, ne obetsulisie tsinyanga tsia Nyasaye” Toto mu ako khulimwo nende ebifune khubalia befwilanga nende okhupa orio

[6] Olwakhwaruma Musa khubandu bebe,(nababoolela mbu) istulile tsimbabaasi tsia Nyasaye tsili khwinywe. Olwa khwabahabina okhurula khubandu ba Firauni, ababahelesinjia eshinyasio eshilulu, abasinzanga Abana benyu abasiani nenibalekha abeshikhasi, toto mukano kalimwo amarechekho amakhongo okhurula khu Nyasaye wenyu

[7] (Itsulila) olwa Nyasaye wenyu yaboola mbu; “nimukhupa orio ndalabametela, ne ni muba abakhayi manye mbu eshinyasio shianje neshilulu muno

[8] Musa naboola mbu; “Enywe nimuba abakhayi nende biosi bili mushialo toto Nyasaye ni Omuyinda Owitsomibungwa muno

[9] Ko kashili okhuboolelakhwo amakhuwa kabalia baliho Imbeli wenyu? Abandu ba Nuhu nende Adi nende Thamud, nende balia betsa abo nibakharulaho, abulaho ubamanyile halali Nyasaye, Abarumwa babetsela nende ebifune bili habulafu. Nibara emikhono chiabu khuminwa mana nibaboola mbu; “Toto efwe khukhayile akamwarumwa nako. Ne efwe khuli nende inganakani ikhunyasinjia mukamukhulanjilangakhwo ako.”

[10] Abarumwa babu nibaboola mbu: ‘‘koo Mukanakanilanga Nyasaye Omulonji welikulu nende eshialo? Ye abalanganga mbu abaleshele ebionono bienyu, ne abahelesie obwiyangu okhula khubise biarebwaho” Nibaboola mbu; “ Enywe mulisa Abandu shinga efwe, mwenyanga butswa okhukhwikalila nende akabapapa befu balamanga, kho murere akokhuchenyia kali habulafu”

[11] Abarumwa babu nibababoolela mbu; “Efwe khulisa Abandu shinga enywe, halali Nyasaye akholelanga obulayi wayenya mubandu baye, Ne efwe shikhunyala okhubarerera akokhuchenyia kamwenyanga ako tawe, halali khubuchami bwa Nyasaye. Ne Nyasaye butswa niye awabasuubili besiche.’’

[12] “Ne khuli khurie akhulesika Nyasaye niyamala okhwechesia tsinjila tsiefu. Ne khwitsa okhwifwila khumasinyisio kenyu kamukhusinyisinjia. Kho ni Nyasaye butswa niwabesiche abamwisikanga

[13] Ne balia abakhayi baboolela Abarumwa babu mbu; “Khwitsa okhubarusia mushialo shiefu nohomba mukalukhe khu milukha chiefu” Mana Nyasaye wabu nabafimbulila mbu; “Khwitsa okhusishia Abandu ababii”

[14] Ne khwitsa okhubamenyia khushialo bonibakhatsia. Ako ni khubalia baria okhwemibwa imbeli wanje, mana nibaria amekanyilisio kanje

[15] Ne nibakonyakonya (buli injila yokhushila) ne buli omufuru omubii nashilwa

[16] Inyuma wuwe khuli nende omulilo (Jahannam,) ne alinywesibwa amatsi kamafila

[17] Ali kara mumunwa ne shalinyala okhukamila tawe. Lifwa lilimwitsila okhurula buli tsimbeka, naye shalifwa tawe, ne inyuma waye aliba nende eshinyasio shindi eshilulu

[18] Balia abakhaya Nyasaye wabu, ebikhole biabu bili shinga likoshe eliatumulwa nende omuyeka kweyinyanga yeyimbumbuyeka, shibalinyala shiosi shiosi khukabakhola tawe. Obo nibo obukori obukhongo

[19] Koo! Sholola mbu Nyasaye yalonga likulu nende eshialo khu bwatoto? Ne niyenya nabarusiaho ne arera Abandu bandi abayiakha

[20] Ne elo khu Nyasaye shinilitinyu tawe

[21] Ne boosi baliemibwa imbeli wa Nyasaye, awo Abandu bali abateshele baliboolela balia abelolanga abakhongo mbu “Efwe khwabalondangakhwo enywe, kholaano enywe munyala okhurusiliakhwo eshindu eshititi khushinyasio shia Nyasaye” Baliboola mbu; “Nyasaye abetsanga mbu yakhulekha khwalunjikha khwakhabalunjisiye, ninashilala butswa awo, khupapale nohomba khwisumilisie, khubula wakhwilushila.”

[22] Ne Shetani aliboola, olwa omuse kulibusibwa, mbu; “Nyasaye yabalaka indakano yatoto, nasi nebalaka mana nekhaya okhubakholela shingala khwalakana. Ne shindalikhwo nobunyali khwinye tawe, halali ndabalanganga butswa, nanyu nimufuchilila. Kho mulafunania tawe, mwifunanie abeene. Shindakhanyala okhubakhoonya nohomba enywe shimunyala okhukhoonya tawe. Toto esie ndakhaya okhunzokasia khwenyu okhurula khale” Toto abamabii baliba nende eshinyasio eshilulu

[23] Ne balia basuubila mana nibakhola amalayi balinjisibwa mumikunda chiburangamwo emialo hasi wachio, balikhalamwo tsinyanga tsiosi omo khubuchami bwa Nyasaye wabu. Amashesanio kabu omo kaliba mbu: “mulembe.”

[24] Koo! Shiwalolakhwo shingala Nyasaye yachelaasia, amakhuwa amalayi kali shinga omusala omulayi imisi chiakwo nemitinyu, ne amasaka kakwo kali hekulu

[25] Kurusinjia ebiamo biakwo buli ebise khubuchami bwa Nyasaye wakwo. Ne Nyasaye akhupilanga Abandu amachelasio khobanyoole okhwitsulila

[26] Ne okhufwana khwa amakhuwa amabii khuli shinga omusala omubii okwasiulwa okhurula mwiloba, kubula ememelo

[27] Nyasaye atinyilisinjia balia abasuubila, nende amakhuwa amatinyu mubulamu bwokhushialo nende bwomwikulu. Ne Nyasaye alekhanga bakora balia abakholanga obubii. Ne Nyasaye akholanga shinga yenya

[28] Koo shiwalolakhwo balia abakalukhania tsimbabaasi tsia Nyasaye, khulwa okhukhaya, mana nibosia Abandu babu munzu yokhutiba

[29] Mumulilo kwa Jahannam balinjilamwo, ne ni habundu habii muno okhwikhala

[30] Ne bakholela Nyasaye obutsokaasi mbu khobanyoole okhukosia Abandu khunjila Yiyie, boola; “mwisangasiekhwo hatiti, mana amakalushilo kenyu nimumulilo.”

[31] Boolela Abasumba banje basuubila mbu; “Balumilile okhulaama (iswala) ne barusie khubilia ebiakhubakabile, mubwifisi nende mubuwang’angu, inyanga ibula okhwinunula nohomba obwitsa nishili okhula.”

[32] Nyasaye niye owaloonga likulu nende eshialo mana niyeshia okhurula mwikulu amatsi, mana namesilia amatsi ako ebiamo okhuba omukabo kwenyu, mana nabakholela amaro kanyoole okhuchenda mu nyanza khubuchami bubwe, ne nabahelesia emialo

[33] Na niye wabanguyilisilia eliuba nende omwesi, obulamu babio bwosi. Ne nabanguyisilia eshilo nende eshitere

[34] Ne nabahelesia buli shiamumusabile. Ne nimubala tsimbabaasi tsia Nyasaye shimunyala okhutsimala tawe, toto Omundu ni owamabii omukhongo owubula okhupa orio tawe

[35] Ne Ibrahim olwayaboola mbu; “Nyasaye wanje okhole litokho lino libe nomulembe, ne unzikalile esie nende Abana banje okhulaama ebifwanani

[36] “Nyasaye wanje! Toto (Ebifwanani) bino bikosiye Abandu abanji, kho ulonda esie oyo niye owanje naye ukhaya, toto ewe oli omunji wobulesheli nende omunji wetsimbabaasi.”

[37] “Nyasaye wefu, toto esie emenyiyie Abandu banje mushialo shibulamwo omumela kwosi kwosi, munzu yiyo yoluyali. Nyasaye wefu, bakhole balumilile okhulaama(Sala), ne okhole emioyo chiabandu chibetsekhwo ne abahelesie emikabo chiebiamo kho banyoole okhupa orio

[38] Nyasaye wefu, toto ewe omanyile kakhufisanga nende akakhuretsanga habulafu, ne shibulaho shifisanga khu Nyasaye, shiosi shiosi- khushialo nohomba mwikulu

[39] Oluyali nilwa Nyasaye, owambelesia neng’ofule Ismaeil nende Is-haq, toto Nyasaye wanje ni Omuwulili muno wamasayo

[40] Nyasaye wanje ukhole embe omulumilili wokhulaama, nende olwibulo lwanje, Nyasaye wefu fuchililila amasayo

[41] “Nyasaye wanje, undeshele, nende Abebusi banje babili, nende Abasuubili inyanga yokhubalwa shingala iliula.”

[42] Ne olapara mbu Nyasaye akandalanga khuka abamabii bakholanga tawe. Toto ye abasitinjia imbeli okhula inyanga yetsimoni tsilikhookha

[43] Balitsia tsimbilo, imirwe nichili hekulu, ne tsimoni tsiabu nitsilamotia motia tawe, ne emioyo chiabu nichili emikhaya

[44] Ne wikanyilisie Abandu inyanga yeshinyasio shiliboolela, Abamabii baliboola mbu; “Nyasaye wefu, khusitiliekhwo ibise hatiti, khwitsa okhufuchilila omulango kukwo, nekhulalonda Abarumwa’’ “Koo shimwalikhwo ni mwetsuba khale mbu enywe shimulisikukhakhwo tawe?”

[45] “Mana ni mumenya habundu wabaliasa bakholela obubii emioyo chiabu, mana nibibaloloshela shingala khwabakhola, ne nikhubopela emachelasio koosi (nanyu nimwalabukulila oluchendo tawe)

[46] Netoto bakhola ebifwanga biabu, ne ebifwanga biabu bili ewa Nyasaye abimanyile , ne kata nikali mbu ebifwanga biabu nibisitia tsingulu

[47] Kho shimulapara mbu Nyasaye afunakanga indakano yiyie khubarumwa bebe tawe. Toto Nyasaye niye wokhushila naye niye woyimongo

[48] Inyanga weliloba lilikalukhanibwa okhuba liloba elindi, nende likulu, nabo baliemibwa imbeli wa Nyasaye Mulala Owa amani

[49] Ne olilola Abamabii inyanga eyo nibaboyelwe khuminyororo

[50] Thingubo tsiabu tsiliba tsieyilamu, ne omulilo kuliitsila obweni bwabu

[51] Kho Nyasaye arunje buli Omundu khu kalia akayakhola. Toto Nyasaye ni Omwangu wokhubala

[52] Kano kayela khubandu, bekanyilisibwe khuko, Ne banyoole okhumanya mbu Ye ni Nyasaye mulala butswa, kho balia abobwongo betsulile

[1] Alif Lam Ra. Tsino ni tsinyali tsieshitabu nende Ikurani yinoosinjia

[2] Awundi balitsa bekomba balia bakhaya mbu bamanyanga baba Abasalamu

[3] Baleshesa balie ebiakhulia mana basangale, mana bakatibwe nende liparo lwobubeyi (mbu balileshelwa), ahambi ano betsa okhumanya

[4] Ne shikhwasishiakhwo olukongo lwosi lwosi tawe halali lwali nende ebise bialwo bimanyikhane

[5] Ne babulaho Abandu bosi bosi banyala okhwuranjilila ebise bieyindukho biabu, nohomba shibanyala okhushindibwa tawe

[6] Nebaboola mbu; “ Ewe ulia oweshilibwakhwo amestulisio, toto ewe oli omulalu”

[7] “Shichila shina nolakhurerera Abamalaika nikali mbu ewe oli mubaboolanga obwatoto?’’

[8] Efwe shikhwishinjia Abamalaika halali khubwatoto (ebise biokhusishibwa khwabu nibiula), ne awo shibalihebwa obwiyangu tawe (balisishibwa butswa)

[9] Toto efwe khweshia ametsulisio kano, ne khandi toto efwe nefwe khwitsa okhukalinda

[10] Ne toto khwaruma Abarumwa mumikanda chia Abandu beyimbeli

[11] Ne Omurumwa yesiyesi shiyabetselanga halali bo bamukholelanga omubayo

[12] Ne endio nilwakhwinjisinjia mumioyo chia balia abamabii

[13] Shibasuubilanga kano tawe, ne bamala okhulola shingala kali khubandu bali imbeli wabu eyo

[14] Ne khubafungulilanga omuliango kwo mwikulu mana baba nibaninanga

[15] Kho bakhaboolele mbu; “tsimoni tsiefu tsimeesibwe ne efwe abeene khulochelwe.”

[16] Ne toto khwara mwikulu tsing’ining’ini, mana nikhutsirona khubalia bokhuhenga

[17] Ne khwatsilinda okhurulana nende buli Shetani ulondungwa

[18] Halali ulia uwulilisinjia mukhwiba, naye mana, amulondangakhwo nende eshichenga shiomulilo shilolokha

[19] Ne liloba khwaliala mana nikhuramwo tsingulu ne nikhumesiamwo buli eshindu khushichelo

[20] Ne nikhubakasiliamwo obulamu, nende ebindi bia enywe mulabikabilanga tawe

[21] Ne shibulaho shiosi shiosi halali shirula khwifwe, nesikhushiishinjia tawe halali khushichelo shimanyishe

[22] Ne khureranga omuyeka kwitsulemwo liime, ne khwishinjia amatsi okhurula mumaleesi ako. Mana khubanywesinjia amatsi ako. Ne shimuli enywe mukabikhanga tawe

[23] Ne ni efwe khulamusinjia ne ninefwe abafwisinjia, na ni efwe nefwe abalichelama. (abalikalusia)

[24] Ne khwamanya abaranjililanga mwinywe, nekhumanyile abatong’a inyuma

[25] Ne toto Nyasaye wuwo niye wakhabakhung’asie toto Ye niye Owamachesi Omumanyi muno

[26] Ne toto khwalonga Omundu okhurula khwiloba eliumu, elirusinjia- omwoyo- isauti(nilituywa) elirulana nende amatoyi karebwakhwo ifwani

[27] Ne Amajiini khwakalonga imbeli awo, okhurulana nende omuyeka kwo mulilo

[28] Ne Nyasaye wuwo olwayaboolela Malaika mbu; “Toto esie nditsa okhulonga Omundu okhurula khuliloba liwumukhanga, lirulana nende amatoyi akarebwamwo ifwani

[29] Kho olwa ndalamala okhumulonga mana nemufuramwo emiuya chianje, mumwinamile khulwa okhumuwa eshiribwa

[30] Abamalaika boosi halala nibamwinamila

[31] Halali Ibilisi, yakhaya okhuba halala nende balia benama

[32] (Nyasaye)Naboola mbu; “Ewe Ibilisi obele orie olabeele halala nende abenaame?”

[33] Naboola; “Shenyala okhwinamila Omundu wawaloonga khuliloba eliumu lirusinjia -omwoyo- isauti, elirula khu matoyi karebwakhwo ifwani tawe.”

[34] (Nyasaye) Naboola mbu; “ rula omo, oli omutsube’’

[35] Ne toto oli nende eshilamo shianje okhula inyanga yeyindukho.”

[36] Naboola mbu; “Nyasaye wanje Omulesi! Mbelesie obwiyangu okhula inyanga yabalilamusibwa”

[37] (Nyasaye) Naboola mbu; “toto ewe olimubalia bahebwa obwiyangu

[38] Okhula inyanga yebise bimanyishe biarebwaho .”

[39] Naboola;“Nyasayewanje!shingalawambusilia okhukora nditsa okhubaronela(abandu) khushialo ne nditsa okhubakosia boosi.”

[40] Halali Abasumba bobo abatswenufu”

[41] (Nyasaye) naboola mbu “ino ni injila yokhwitsa ewanje ingololofu”

[42] “Ne toto Abandu banje ewe sholaba nende obunyali khubo tawe, halali balia abakori bakhulondakhwo

[43] Ne toto Jahannam niho habundu wabu, wabakasilibwa bosi

[44] Ili nende emiliango saba, nebuli omuliango kuli nende ebuleka yakabulwa

[45] Toto balia baria Nyasaye baliba mumikunda nende tsisebele

[46] “Injilemwo mushironyo nomulembe”

[47] Ne khulirusia amakhonye akali mubilifu biabu, ne baliba (shinga) Abananda nibekhale khubisala biobwami nibahengana

[48] Shibulibatilakhwo obuchong’e bwosi bwosi omo tawe, ne shibalirusibwamwo tawe

[49] Boolela Abasumba banje mbu esie nesie Owobulesheli obunji Owetsimbabaasi muno

[50] Ne eshinyasio shianje nisho eshinyasio eshilulu muno

[51] Ne baboolele amakhuwa kabacheni ba Ibrahim

[52] Olwa benjila ewuwe nibaboola mbu; “mulembe” naboola mbu : “toto efwe khubakorerwe.”

[53] Nibaboola mbu; Olaria tawe efwe khukhusubisia Omusiani wa machesi amanji”

[54] Naboola; “Oh! Mumboolelanga kano, nemalile okhukofula, kho ni munjila shina yamumboolelangamwo kano?”

[55] Nibaboola mbu; “Toto efwe khukhuboolela khubwatoto kho sholaba mubalia abafwitsanga omwoyo tawe.”

[56] Naboola mbu; “Ne niwina ufwitsanga omwoyo okhurulana nende tsimbabaasi tsia Nyasaye wuwe halali balia abakora?”

[57] Naboola; “Mana shiamumbolela shindi nishina enywe Abarumwa

[58] Nibaboola mbu; “Efwe khurumilwe khubandu abamabii”

[59] Halali balia abaloonda Luti. Toto efwe khwitsa okhuhabina abo boosi

[60] Halali omukhasi wuwe khumalile okhulola mbu alaba mubandu balitong’a inyuma

[61] Mana Abarumwa olwa boola khubandu ba Luti

[62] (Luti) naboola; “Toto enywe muli Abandu balamanyishe tawe.”

[63] Nibaboola mbu; “mana efwe khukhureerere kalia kabakholelanga obukanakani” nomulembe

[64] “Ne khukhwitsile khubulaamba, netoto efwe khuboolanga obwatoto.”

[65] “Kho rula nende Abandu bawo, ebise bilala mubise bieshilo, nawe abalondekhwo, neyesiyesi mwinywe alakalukhanakhwo okhuhenga inyuma tawe, nemutsie wamulomesibungwa

[66] Nenikhumubusilia likhuwa elo, mbu emisi chiabu chitsa okhutetwa mumabwibwi

[67] Ne Abandu belitokho elo nibetsa nibasangalile

[68] (Lut) Naboola mbu; “Toto bano ni abacheni banje khomulafimbia omurwe tawe”

[69] “Ne murie Nyasaye, ne mulafimbia omurwe tawe”

[70] Nibaboola mbu: “efwe shikhwakhukaniakho (okhurera) Abandu (belwanyi)

[71] Naboola mbu: “ bano nabakhana banje itse ebahelesie(mubateshie) toto enywe nimuli abakholanga

[72] Nditsuba khulubaka lulwo, mbu : “abo bali mubumesi bwabu nibanyakhananga eshikhaya.”

[73] Mana eshinyasio shioluyoka nishibabukula mumabwibwi

[74] Mana nikhukhola hasi wabu okhuba hekulu, mana nikhubakwisilia ifula ya machina yeliloba lwomumulilo.”

[75] Toto mu ako khulimwo nende ameeko khubandu baretsanga amakhuwa khushichelo

[76] Ne toto tsingongo etso tsili khutsinjila tsiburungwakhwo

[77] Toto mu ako khulimwo nende ameeko khubasuubili

[78] Netoto Abandu bomushitsimi bali ababii

[79] Mana nikhubahelesia eshinyasio, ne ebialo bibili bino bili khunjila ili habulafu

[80] Netoto Abandu ba Hijri bayingasia Abarumwa

[81] Ne nikhubahelesia abimanyisio biefu nabo nibalabukulamwo oluchendo tawe

[82] Ne bakwotanga tsingulu nibakasia tsinzu

[83] Mana eshinyasio shioluyoka nishibabukula mumabwibwi

[84] Mana akabakholanga nikalabakhonyakhwo shiosi shiosi tawe

[85] Ne shikhwalonga likulu nende eshialo nende ebili hakari wabio halali khubwatoto, ne toto indukho iliula , kho leshela okhuleshela okhulayi

[86] Toto Nyasaye wuwo Omulesi niye omuloonji ne niye Omumanyi muno

[87] Ne khwakhwelesia tsinyaali saba tsisomungwa ebise nebise nende Ikurani yoluyali

[88] Ne olakhosia tsimoni tsitsio khukalia akakhwahelesia emikanda chindi hakari wabu, nohomba olababelelela tawe. Ne wishilie abasuubili olubaa lulwo. (lwetsimbabaasi)

[89] Ne boolambu:“ toto esie nesie Omwikanyilisi Omwinoosi.(owahabulafu)

[90] Shingala khweshilia balia (eshinyasio bosi) balia abekaba emikanda (okhwikalila abusalamu)

[91] Balia bakhola Ikurani okhuba omubunjikho kwobubeyi

[92] Kho nditsuba khu Nyasaye wuwo Omulesi mbu khulibareeba bosi

[93] Khukalia koosi akabakholanga

[94] Kho yusia akawalomesibwa ne obe ehale nende Abatsokaasi

[95] Toto efwe khukhuyela okhulinda nende abakhubayilanga

[96] Balia abatsokasinjia Nyasaye nende Abanyasaye bandi balitsa okhumanya

[97] Netoto khwamanya mbu eshilifu shishio shinyoolanga obusiro khukalia akababoolanga

[98] Kho tswenula Nyasaye wuwo Omulesi khulwa okhumwitsoomia , ne obe halala nende bamwinamilanga nibasujuda

[99] Ne olaame Nyasaye wuwo okhuula likhuulile eliatoto elo . (lifwa)

[1] Likhuwa lia Nyasaye liloola butswa, kho mulayungubasia tawe. Oluyali nolulwe ne ali hekulu muno mukabamutsokasinjia ninako

[2] Yeshinjia Malaika nende obufimbuli, khubuchami bubwe khu ulia owayenya mubasumba bebe, mbu: “yekanyilisie (Abandu) mbu abulaho ulaamwa owulali esie kho murie esie.”

[3] Yaloonga likulu nende eshialo khubwatoto, ali hekulu muno nende khubiabamutsokasinjia ninabio

[4] Yaloonga Omundu okhurulana nende indonyande yamatsi kolwibulo, mana naye naba omuyingasi owahabulafu

[5] Ne yaloonga tsisolo, mwetso munyoolangamwo obutundumu nende obukhoonyi ne etsindi mutsilitsanga

[6] Ne mulolanga obulayi olwa mutsikalusinjia ingolobe nende shingala mutsiyilanga mushiayo itsuli

[7] Ne tsibachinjilanga emisiko chienyu okhula mutsingongo tsiamulakholelemwo halali nimunyakhane muno. Toto Nyasaye wenyu ni Omuholo muno Owetsimbabaasi

[8] Nende tsifarasi nende tsinyumbu, nende tsisishili, mutsininenjekhwo nende oburone (bwenyu) ne alaloonga ebia mulamanyile tawe

[9] Ni khu Nyasaye okhubechesia injila (ili habwene) netsiliwo etsindi tsilali habwene tawe. Ne yenyanga toto yakhabalunjisiyie mwesi

[10] Ye niye ubeshilinjia amatsi okhurula mwikulu, khuko munyoolanga kokhunywa, nende emimela chiamulisinjia ebiayo

[11] Ne khuko abamesilinjia ebirache nende zaituni nende emitende nende emizabibu nende buli ebiamo, toto mwako khulimwo nende ameeko khubandu baparanga

[12] Ne yabakwalasilia eshilo nende eshitere, eliuba nende omwesi, nende tsin’gining’ini tsiosi tsiakwalasibwa khubunyali bubwe. Toto mu ako khulimwo nende ameeko khubandu bobwongo

[13] Nende bilia ebiayasalasia khushialo ebiobukoondo bukabukhane. Toto mu ako khulimwo nende ameeko khubandu bawulilanga amebaalo

[14] Niye wabakwalasilia inyanza mbu khomunyoole okhuliamwo inyama indorotoro inzelemu, nemurusinjiamwo ebirone bia mwifwalanga, ne olola shinga ebininungwamwo shingala bikhalakaninjiamwo, mbu khomunyoole tsimbabaasi tsitsie, nekhomunyoole okhumupila orio

[15] Ne nara khushialo tsingulu mbu (eshialo) shilabeyabeya ninanyu tawe, nende emialo nende tsinjila khomunyoole okhuloondakhwo

[16] Ne yaraho ebimanyisio bindi. Ne khutsing’ining’ini nitsiabalunjisilanjiakhwo injila

[17] Mbu ulia owaloonga yakhaba shiabulala nende ulia ulaalonga tawe? Koo shimwitsulilanga tawe

[18] Ne nimubala tsimbabaasi tsia Nyasaye (khwinywe) shimwakhatsimala tawe, toto Nyasaye niwobulesheli owetsimbabaasi muno

[19] Ne Nyasaye amanyile kamufisanga nende akamuretsanga habulafu

[20] Nebalia abalaamanga ebilali Nyasaye tawe, shibaloonganga shiosishiosi tawe halali bo balongwa

[21] Ni abafuu shinabalamu tawe, ne bakorerwe mbu balilamusibwa lina

[22] Nyasaye wenyu ni Nyasaye mulala, ne balia abalasuubilanga mwikulu tawe emioyo chiabu chikhayanga nabo belolanga

[23] Toto bwene Nyasaye yamanya akamufisanga nende akamuretsanga habulafu, toto ye shiyachama abelolanga tawe

[24] Ne nibarebwa mbu nishina shia Nyasaye wenyu yeshiye? Nibaboola mbu: “ni tsingano tsiakhalesa tsiobubeyi.”

[25] Kho bachinge emisiko chiabu emilamba inyanga yeyindukho, nende emisiko chiabalia ababakosinjia khukhubula obumanyi. Koo ni amabii kali karie kano kabachinganga

[26] Toto balia abali imbeli wabu bakhola ebifwanga biabu, mana Nyasaye naresia amatililo ketsinzu tsiabu mana ebitsafu nibibakwila, okhurula hekulu mana eshinyasionishibetselamunjilayabalamanyile tawe

[27] Mana inyanga yeyindukho alibafimbia omurwe, ne aliboola mbu: “balihena balia abamwanzokasinjia ninabo, abachilanga nimusoolana?” balia abahebwa obumanyi baliboola mbu: “toto isoni nende amasila nyanga yino biloolela Abakhayi.”

[28] Balia aba Malaika bafwisia nibekholele obwononi, mana baliloonda lilako(baliboola mbu:) “sikhwakholanga obwononi bwosibwosi tawe” (abamalaika balibakalusia mbu:) “ hee toto bwene Nyasaye yamanya muno akamwakholanga.”

[29] “kho injilie mumiliango chiomumulilo kwa jahanam, ne mumenyamwo tsinyanga tsiosi. Ne ni eshimenyo eshibi muno khubandu Abafuru.”

[30] Ne balia abaritsanga Nyasaye nibareebwa mbu: “ nishina shia Nyasaye yeshia?” nibaboola mbu: “amalayi” ne balia bakhola obulayi khushialo khuno balinyoola amalayi, ne inzu yomwikulu ni indayi po ,ne inzu ya balia baria Nyasaye ni indayi muno

[31] Mumikunda chilawa tawe nichiabalinjilamwo, chiburanga hakari wachio emialo, balinyoolamwo eshiabenya. Endio nilwa Nyasaye arunganga abamuriitsanga

[32] Balia aba Malaika babafwisinjia nibakholele obulayi, balibaboolela mbu: “ omulembe kube ninanyu. Injile mwikulu khulwokhubeela kalia akamwakholanga.”

[33] Ne libulao liabalindanga halali Abamalaika babetsele nohomba likhuwa lia Nyasaye wuwo liboolele? Ne endio nilwabakhola balia bali imbeli wabu. Ne Nyasaye shiyabakholela obubii tawe halali abeene nibo bekholela obubii

[34] Mana nabatila khububii bwabakholanga mana nikababotokhana kalia akabatseshelanga

[35] Ne Abatsokaasi baboola mbu: “ Nyasaye achamanga shikhwakhalamile shiosi shiosi habundu wuwe tawe, efwe halala nohomba Abapapa befu, ne shikhwakhakanilekhwo shiosi shiosi tawe halali ye (akane)” kho mana endi nilwabakhola balia abali imbeli wabu. Kho shikali khubarumwa halali okhusia butswa oburume mubulafu

[36] Ne toto khwaruma Omurumwa mubuli omukanda ababoolele mbu: “mulaame Nyasaye ne mube ehale nende shetani” mubo balimwo ba Nyasaye yalunjisia, ne mubo balimwo bobukori bwakhoyeshela. Kho muchende khushialo mana mulolekhwo indukho yabayingasi shingala yali.”

[37] Kata noli nende okhwenya muno mbu balunjikhe, (manya mbu) Nyasaye shalunjisinjia ulia owatila okhukora tawe. Ne shibalinyoola ubahabina tawe

[38] Nabo betsubanga khulira lia Nyasaye eshitsubo shia amani mbu: “Nyasaye shalilamusia abafwa tawe.” Khulwa shina ? ni indakano eyalachilwa khuye, halali Abandu abanji shibamanyile tawe

[39] Kho abenoosilie kalia akabakabukhanila, ne mbu kho Abakhayi bamanye mbu bo toto ni ababeeyi

[40] Likhuwa liefu khushindu shia khwenya khuboolanga butswa mbu: “ba’’ nishiba

[41] Ne balia bawuya shichila Nyasaye nibamalile okhukholelwa obubii, toto khwitsa okhubetsusilia khushialo obulayi, ne omurungo kwomwikulu ni omukhongo muno, bamanyangakhwo bayie

[42] Balia abefwila mana nibesikanga butswa Nyasaye wabu omulesi

[43] Nafu shikhwaruma imbeli wuwo halali Abasatsa abakhwafimbulilanga obufimbuli. Mana mureebe abali nobwitsulili nikali mbu shimumanyile tawe

[44] Khubimanyisio bili habulafu nende mubitabu. Ne khweshia amachelo kho winoosilie Abandu akeshibwa khubo , khobanyoole okhupaara

[45] Ne koo basuubilanga mbu bali nomulembe balia abakholanga ebifwanga mbu Nyasaye shiyetsa okhubayibisia muliloba tawe nohomba shalabarerera eshinyasio nabo nibalamanyile tawe

[46] Nohomba shalabatila khutsinjendo tsiabu eyi nande eyi, Mana shibalanyala okhupwotsokha tawe

[47] Nohomba mbu shalabahelesia eshinyasio shiokhurisia khulwa okhututuyilia shititi shititi? Toto Nyasaye wuwo ni omuholo oweshisa muno

[48] Koo! Shibalolangakhwo buli bia Nyasaye yaloonga eshinikha shiabio shibotokhonanga okhurula omukhono omulunji nende omukaata ne binamilanga Nyasaye, nabio nibihotselesiye

[49] Ne binamilanga Nyasaye biosi bichendanga mwikulu nende khushialo , mutsisolo nende Abamalaika boosi, ne shibelolanga tawe

[50] Baritsanga Nyasaye wabu owuli hekulu wabu, ne bakholanga eliabalomesibungwa

[51] Ne Nyasaye yaboola mbu: “ mulabakhwo nende nyasaye babili tawe, ye ni Nyasaye mulala butswa yenyene. Kho murie butswa esie!”

[52] Ni ebibie ebili mwikulu nende mushialo, ne idini neyiyie buli lwosi. Koo mularia owundi ulali Nyasaye tawe

[53] Ne obulayi bwosi bwosi bwamulininabo burula khu Nyasaye, mana amabii nikabanyoola niye butswa owamulilila

[54] Mana nabarusiliaho obubii obo, omukanda mulala mwinywe kumutsokaasia

[55] Khobakhaye tsimbabaasi tsiakhwabahelesia, kho mwikhoye, mulitsa okhumanya

[56] Ne ebuleka webindu biakhubakabile babishilangabaliakatabalamanyiletawe. Toto mulirebwa kalia koosi akamwachikhanga

[57] Ne barererangao Nyasaye Abana abakhana. Nyasaye ni Omutswenufu muno khu ako, nabo beyenyelanga ababachama

[58] Ne mulala wabu naboolelwa amakhuwa kokhwibula omwana omukhana obweni bwaye bumaliyanga ne yetsula nende eshibeela

[59] Yefisanga mubandu khulwokhubolelwa amakhuwa amabii. Koo yekhale ninaye halala nende tsisoni etso nohomba amuyabile mwiloba. Manya mbu ni okhubii khuli khurie okho okhwababusinjia

[60] Ne balia balasuubilanga mwikulu tawe , bali nende okhuchelasibwa okhubii, naye Nyasaye niye weyifuma yoluyali naye niwa Amaani Owamachesi muno

[61] Ne Nyasaye abukulilanga Abandu khububii bwabu, shiyakhaleshelekhwo isolo yosiyosi khushialo tawe. Halali ababikhanga okhula ebise biarebwaho. Ne ebise biabu nibiliula shibishiindibungwa isandala tawe nohomba shibiyungubasibungwa tawe

[62] Ne bahelesinjia Nyasaye ebindu biabasinya, ne tsinimi tsiabu tsiboolanga obubeyi mbu bo balanyoola amalayi, toto abo babishilwa omulilo, netoto balilekhwamwo

[63] Nditsuba khu Nyasaye mbu , efwe kharuma (Abarumwa) mumikanda chiaranjilila ewe noshili , halali shetani yaboronela ebikhole biabu. Kho olwalelo ye ni omwitsa wabu. Nabo balinyoola eshinyasio eshilulu

[64] Ni shikhwakhwishilia eshitabu halali obaboolele kalia akabakabukhanangamwo, nende obulunjifu nende tsimbabaasi khubandu basuubilanga

[65] Ne Nyasaye yeshinjia amatsi okhurula mwikulu, ni khuko nalamusia liloba, nilimalilenje okhufwa, toto mu ako khulimwo nende ameeko khubandu bawulilanga

[66] Netoto mutsisolo khulimwo nende ameeko amakhongo, okhubeela enywe. Khubanywesinjia khubilia bili mutsinda tsiabu hakari wamafwi nende amatsayi karulangao amabeele amalafu amalayi khubakanywetsanga

[67] Ne khubiamo bietsitende nende tsizabibu, mukasinjiamwo amalwa nende omukabo omulayi, toto mu ako khulimwo nende ameeko khubandu bekhonyelanga obwongo

[68] Ne Nyasaye wuwo nafimbulila inzushi mbu: “ wikasilie tsinzu mubikulu, nende khumisala nende mutsinzu tsilia etsiabombakhanga.’’

[69] Mana “olie buli khushiamo, ne obure khutsinjila tsa Nyasaye wuwo etsiakholwa tsinyangu. Shilarula mutsinda tsiabu eshinywebwa shiobukondo bukabukhane, mukari washio khulimwo nende obuwonia khubandu.” Toto mukano khulimwo nende ameeko khubandu baparanga

[70] Nyasaye niye wabaloonga mana khandi yakhabafwisie, ne mwinywe balimwo bayindilanga bahebwa obulamu oburambi boola khulubaka olubi, okorwa buli eshindu, ne nabelenje omumanyi muno. Toto Nyasaye niye Omumanyi Omunyali muno

[71] Ne Nyasaye yaninia abandi mwinywe okhushila abandi khumikabo. Ne balia baninibwa shibakalusinjia omukabo kwabu khubalia abemikhono chiabu emilunji chiatila, kho babe halala khumikabo echo. Koo, tsimbabaasi tsia Nyasaye nitso tsiabakhayanga

[72] Ne Nyasaye niye wabalonjela abakhasi okhurulana ninanyu, ne nabanyalila okhunyoola okhurula khubakhasi abo abana nende abetsukhulu, mana nabakabila ebindu ebilayi. Kho mana basuubilanga akalali katoto ne bakhayanga tsimbabaasi tsia Nyasaye

[73] Ne balekhanga Nyasaye nibalaama abalakhabahelesia omukabo kwosikwosi tawe, okhurula mwikulu nohomba khushialo ne babula obunyali bwa shiosi shiosi tawe

[74] Mulachelasia Nyasaye tawe. Toto Nyasaye yamanya nanyu shimumanyile tawe

[75] Nyasaye abachelasilia Abasatsa babili, mulala khubo ni omusumba omurumwa owuli hasi womwami wuwe, owulanyala shiosi shiosi tawe; nende ulia owakhwakaba omukabo kurula khwifwe, mana naye arusinjia khumukabo oko mubwifisi nende mubwang’ang’u, koo bakhaba nashilala? Ifuma yoosi ni ya Nyasaye halali abanji mubo shibamanyile tawe

[76] Ne Nyasaye abachelasilia Abandu babili, mulala wabu ni omutimbe shanyala shiosishiosi tawe, naye ni omusiko khumwami wuwe, wosi wosi omulinjisia sharera obulayi bwosibwosi tawe, Koo uno yakhaba nashilala nende ulia ulomesinjia obulunjifu, naye nali khunjila ingolofu

[77] Ne kalikhu Nyasaye butswa, akalalolekha komwikulu nende kokhushialo, ni likhuwa lieyindukho lili butswa shinga okhumotia motia tsimoni, nohomba ni ahambi muno. Toto Nyasaye ni Omunyali wabuli eshindu

[78] Nyasaye yabarusia mutsinda tsiabanyinenywe nimulamanyile shiosi shiosi tawe. Ne nabahelesia tsimbulililo nende tsindolelo nende emioyo kho munyoole okhupa orio

[79] Koo! shibalolangakhwo amayoni shinga kehotselesinjia hekulu weshialo? Abulawo ukatilanga halali Nyasaye. Toto mu ako khulimwo nende ameeko khubandu basuubilanga

[80] Ne Nyasaye yabanyalila tsinzu tsienyu okhuba eshimenyo. Ne nabanyalila (okhukasia) tsinzu khumaselo ketsisolo, akamunyoolanga mbu ni amangu khubise bioluchendo lwenyu, nende ebise biokhuwulukha khwenyu.. nende khubukoya bwatsio nende amabaa katsio nende liswi liatsio, ebiamukasilinjia ebindu biokhwikhonyela khubise ebirambi

[81] Ne Nyasaye khubindu biayabalonjela yabakholela eshinikha, nenabakasilia eshimenyo khutsingulu, nenabakholela tsingubo tsibekalilanga oluya, nende tsingubo tsiebichuma etsibashinganga mubulwani 16. bwenyu. Endio nilwa abetsusilinjia tsimbabaasi tsitsie kho munyoole okhulonda

[82] Ne nibaloba, akoko ni okhusiasa oburume habulafu

[83] Bamanya tsimbabaasi tsia Nyasaye mana batsikhayanga , ne obunji mubo ni abakhayi

[84] Ne inyanga yakhulibuusia buli mumukanda omuloli, ne abakhayi shibalichamilwa nohomba shibalisaba eshileshelo tawe

[85] Ne balia abakhola tsimbi olwabalilola eshinyasio , shibalitutuyilibwa eshinyasio esho tawe, nohomba shibalihelesibwa ebise bindi tawe

[86] Ne balia batsokasia Nyasaye olwabalilola balia batsokasibwa nende Nyasaye , baliboola mbu: “ Nyasaye wefu bano nibo abakhwasanjinjia ninawe, abakhwalamanga habundu wuwo” ne balibasukunila likhuwa nibaboolelwa mbu: “ toto enywe muli ababeeyi”

[87] Ne inyanga eyo baliwulila buli liosiliosi imbeli wa Nyasaye, ne akabachikhanga kalibakora

[88] Balia bakhaya mana nibekalila khunjila ya Nyasaye, khulibametela eshinyasio hekulu weshinyasio shingala abeene bakholanga amabii

[89] Ne inyanga yakhulirusia buli mumukanda omuloli mana ababoolele akarulana ninabo, ne wesi khukhurere obe omuloli khubo. Ne khwakhwishilia eshitabu shino eshiboolanga buli eshindu, nashio ni obulunjifu nende tsimbabaasi, nende obusangali khubalia abehotselesinjia (khu Nyasaye)

[90] Toto Nyasaye alomesinjia okhukhola obuleeng’afu, nende okhukhola obulayi, nende okhuhelesia abeekho, ne akania eshifwolo nende okhukhola tsimbi. Abebaalilanga mwakhaba murio mwanyoola okhumanya

[91] Ne mukhole shingala mulakananga nimwikhonyele elira lia Nyasaye, ne mulafunaka indakano yenyu tawe, nimumalile okhusuubisania, ne nimumalile okhukhola Nyasaye okhuba omuloli wenyu. Toto Nyasaye amanyile kamukholanga

[92] Ne mulaba shinga Omukhasi ulia owateta olusi lulwe ebitonye ebitonye, nilumalilenje okhuba oluumu. Mukholanga ebitsubo bienyu munjila yokhukatania hakari wenyu. Khulwa okhuba mbu omukanda kwa Abandu okhuba nende amani okhushila omukanda kwa Abandu bandi. Toto Nyasaye abatemanga munjila eyo. Ne toto alibaboolela inyanga yeyindukho akamwawukhanilanga

[93] Ne Nyasaye yenyanga yakhabakholele okhuba omukanda mulala butswa. halali alekhanga owayenya okhukora akore, ne alunjisinjia owayenya. Ne toto mulirebwa khukalia koosi kamwakholanga

[94] Ne mulakhola okhwitsuba khwenyu okhuba khwokhukatania hakari wenyu tawe. Eshilenje shiletsa shiarerekha nishibeele nishimalile okhwema, mana mupile amabii kenyu khulwa okhwikalila khunjila ya Nyasaye, mwanyoola eshinyasio eshikhongo

[95] Ne mulakusia amalako ka Nyasaye khubukusi obutiti tawe. Eshili ewa Nyasaye nishio obulayi khwinywe, nikali mbu mwakhamanya

[96] Ebiamuli ninabio biliwa, ne ebili wa Nyasaye nibo bilitong’a, ne toto efwe khulihelesia balia befwila omurungo kwabu khumalayi kabu kabakholanga

[97] Yesiyesi ukhola amalayi abe umusatsa nohomba omukhasi, naye nali omusuubili, khwitsa toto okhumumenyia obulamu obulayi, ne toto khulibarunga omurungo kwabu khumalayi kabu kabakholanga

[98] Ne niwenya okhusoma Ikurani wilinde khu Nyasaye okhurulana nende omusuku shetani owatsubwa

[99] Toto ye abula amani khubalia basuubila , mana besikanga Nyasaye wabu

[100] Amani kaye kali khubalia abamwaambanga obwitsa, nende balia abatsokasinjia Nyasaye

[101] Ne nikhukalukhania eshimanyisio habundu weshimanyisio, ne Nyasaye ni umanyile muno akayeshinjia. Baboola mbu: “ ewe olisa omuchisi” halali abanji mubo shibamanyile tawe.”

[102] Boola: “roho woluyali yekha okhurula khu Nyasaye wuwo khubwatoto, khulwokhutinyisia balia basuubila, nende okhuba obulunjifu nende amakhuwa amalayi khubalia abehotselesia

[103] Ne toto khwamanya mbu balaboola mbu: “Omundu niye umwechesinjia” ululimi lwa ulia owabamanyinjia nilweshirende, niluno ni olulimi lweshiarabu lwang’alang’ala

[104] Toto balia balasuubilanga tsinyaali tsia Nyasaye, Nyasaye shabalunjisinjia tawe ne balinyoola eshinyasio eshilulu

[105] Balia abachikhanga obubeyi ni balia abalasuubilanga ebimanyisio bia Nyasaye, ne abo nibo ababeyi

[106] Ulia ukhaya Nyasaye namalilenje okhusuubila, halali ulia unichilisibwe ne omwoyo kwaye nikuli khubusilamu, ne ufungulilanga eshilifu shishie obukhayi, obusinyifu bwa Nyasaye buli khubo ne balinyoola eshinyasio eshikhongo

[107] Endio nilwokhuba mbu bo bachama obulamu bwokhushialo okhushila obulamu bwomwikulu, ne toto Nyasaye shalunjisinjia Abandu abakhayi tawe

[108] Abo nibo aba Nyasaye yara eshimanyisio khumioyo chiabu nende tsimbulililo tsiabu nende tsindolelo tsiabu, ne abo nibo abakaandala

[109] Inganakani ibulaho tawe, abo nibo balibula obukhala mwikulu

[110] Mana toto Nyasaye wuwo khubalia abawuya nibakhasandibwa , mana nibalwana mana nibesumilisia, toto Nyasaye imbeli wa ako ni Omulesheli muno Owetsimbabaasi

[111] Inyanga yabuli omundu alitsa okhwikomelela omwene, ne buli omundu alirungwa amalayi kayakholanga

[112] Nyasaye abachelasilinjia olukongo lwali nende omulembe nende obwihotselefu, omukabo kukwe kwabetselanga mubunji, okhurula buli elubeka. Halali nikukhaya tsimbabaasi tsia Nyasaye, mana Nyasaye nakufwala eshifwalo shieyinzala nende oburi khulwokhubeela kalia akabakholanga

[113] Ne Omurumwa yabetsela okhurula mubo, mana nibamuyingasia, mana eshinyasio nishiboolela nibalibo abeene bekholela obubii

[114] Ne mulie khubilia bia Nyasaye abahelesiyie, ebiamwachamilwa ebilayi, ne mukhupe orio khutsimbabaasi tsia Nyasaye, toto nimuli mbu mumulamanga

[115] Yabakania okhulia shifwile, nende amalasile, nende inyama yeyimbitsi, nende shisinzilwe nishilarumbulilwekho elira lia Nyasaye tawe, khu ulia unichililisibwa bilali okhuloba nohomba okhubura eshichelo tawe, awo toto Nyasaye ni omunji wobulesheli Owetsimbabaasi

[116] Ne mulaboola khububeyi bwetsinimi tsienyu mbu : “ shino shiafuchililwa ne shino shiakanibwa.” muletsa mwachishila Nyasaye obubeyi. Toto bachishilanga Nyasaye obubeyi shibalibura tawe

[117] omwikhoyo mutiti butwsa, nebalinyoola eshinyasio eshikhongo muno

[118] Ne Abayahudi khwabakania akakhubakaniile khale awo, ne shikhwabakholela obubii tawe, halali bo abeene nibekholela obubii

[119] Mana toto Nyasaye wuwo khubalia bakholanga obubii khubulamanya mana nibekanila nibakhakhola ako, mana nibakhola amalayi, toto Nyasaye wuwo imbeli wa ako ni Omunji wokhuleshela Omunji westimbabaasi

[120] Toto Ibrahim yali Omwimilisi, Omwihotselefu khu Nyasaye, Omutswenufu neshiyali Omutsokaasi tawe

[121] Yali omukhupi wa orio khutsimbabaasi tsia Nyasaye. Mana namwawula khunjila ingolofu

[122] Mana nikhumuhelesia mushialo amalayi, naye mwikulu aliba mubandu abalayi

[123] Mana nikhukhufimbulila mbu : “oloonde emilukha chia Ibrahim owaria Nyasaye, ne shiyali mubatsokasi tawe.”

[124] Toto jumamosi yarebwaho khubalia bakabukhanamwo khuyo, ne toto Nyasaye alibabusilia inyanga yeyindukho khukalia akabakabukhanangamwo

[125] Langa khunjila ya Nyasaye wuwo mumachesi, nende amachelo amalayi, ne olomalome nabo munjila indayi, toto Nyasaye wuwo amanyile ulia uwakora injila yiyie ne amanyile muno balia abalunjikha

[126] Ne nimurunga imoongo murunge ebihelana nende ebia mukholelwe amabii. Ne nimwifwila toto awo nobulayi khubalia abefwilanga

[127] Ne wifwile, ne okhwifwila khwukhwo khulaba halali khulwa Nyasaye butswa, ne olabeelela shichila bo tawe, ne olaba mubunyakhani shichila kabatutanga tawe

[128] Toto Nyasaye ali halala nende balia bamuria, nende balia abakholanga amalayi

[1] Uluyali ni lwa ulia owayila Omusumba wuwe eshilo okhurula khumusikiti kwoluyali okhula khumusikiti kwa ehale okwa khwahelesia tsikhabi ebili mumbeka tsiakwo, kho khumwechesie bilala khubimanyisio biefu. Toto ye niwokhuwulila Owokhulola

[2] Ne khwahelesia Musa eshitabu, nenikhushikhola obulunjifu khubana ba Israel mbu; “mulakhola omulindi wundi ulali esie tawe.”

[3] Olwibulo lwabalia bakhwaninia halala nende Nuh, toto ye yali Omusumba wokhupa orio

[4] Ne nikhubusilia Abana ba israeil mushitabu mbu; ‘‘toto enywe mwitsa okhukhola obulianga khushialo olwakhabili, netoto mana mufure okhufura okhukhongo.”

[5] Mana olwa yiliula andakano ya ambeli ,khulabarerera Abasumba befu abalwani abatinyu, nabo balinjila mutsingongo tsienyu buli elubeka, Ne ino ni indakano ilikholekha

[6] Mana khulibakalusilia amani kenyu khubo, ne khulibametela omwandu nende Abana, ne khulibakhola mube omukanda omunji

[7] Kho nimukhola amalayi, mwikholela abeene, nenimukhola amabii, mwikholela abeene, ne olwayiliula indakano yokhumalilikha , kho obweni bwenyu bunyasibwe, ne benjile mumusikiti shingala benjilanga mukhuchaka. Ne banyasie okhunyasia okhukhongo muno ebise biababaruka

[8] Aundi Nyasaye wenyu alababeela tsimbabaasi, nimukalushila fwesi khulakalushila. Ne khwakhola omulilo kwa Jahannam okhuba imboye ya Abandu abakhayi

[9] Toto Ikurani ino ilunjisinjia khunjila ilunjifu muno. Ne isuubisinjia Abasuubili abakholanga amalayi mbu bali nende omurungo omukhongo

[10] Ne balia abalasuubilanga mwikulu tawe ,khwabarecheshela eshinyasio eshilulu muno

[11] Ne Omundu asabanga amabii shingala khandi asabanga amalayi, ne toto Omundu niwa amaababa

[12] Ne khwakhola eshilo nende eshitere okhuba ebimanyisio bibili, mana nikhura eshimanyisio shieshilo, ne nikhukhola eshimanyisio shieshitere okhuba nende obulafu kho munyoole tsimbabaasi tsirulanga khu Nyasaye wenyu, ne munyoole okhumanya eshichelo shiemika nende okhubasia. Ne buli eshindu khwashinoosia habulafu

[13] Ne buli Omundu khwamuboyela khwikosi khukhwe ebikhole bibie, ne inyanga yeyindukho khulimurusilia eshitabu shishie eshialinyoola nishibambulwe. (aliboolelwa)

[14] “Soma eshitabu shishio. Oyela omwene okhwibalila nyangayino.”

[15] Ulia ulunjikha yelunjishilanga omwene, ne ulia ukora yekosinjia omwene. ne Omundu shalichinjila owundi omusiko kukwe tawe. Ne efwe shikhuli bokhuhelesia eshinyasio tawe okhula khube nikhwaruma Abarumwa

[16] Ne nikhwenya okhusishia olukongo , khulomesinjia ababii balwo,(baleshe obubii) halali batsililila nende amabii kabu omo. Awo likhuwa liburanga khubo, ne khubasishinjia okhusishia okhubii

[17] Ne emikanda chinga chakhwasishia inyuma wa Nuhu, ne Nyasaye wuwo ayela khutsimbi tsia Abandu baye okhuba wokhutsimanya, owutsilola

[18] Ulia wenya omwikhoyo kwokhushialo kwalwangulwangu khwitsa okhumuwa lwangu lwangu omo, akakhwenya khu ulia wa khwenya, mana khwamukholela Jahanam alinjilamwo nali omuleche owutafibwa

[19] Naye ulia wenya mwikulu, mana nakhola eshinani khubikhole bibie, mana nali omwihotselefu, abo obukhalabani bwabu buliba bwokhwitsomibwa

[20] Abo boosi (ababii nabalayi) khubelesinjia bano nende bano – khumikabo chia Nyasaye wuwo, ne emikabo chia Nyasaye wuwo shichiyikalilanga tawe

[21] Henga shingala khwachingula abandi mubo khubandi. Ne mwikulu khuli nende ebisaala ebikhongo nende okhuchingulwa okhukhongo muno

[22] Olaba nende Nyasaye wundi halala nende Nyasaye tawe, wakhetsa wafunaanibwa wakhaya okhuhabinwa

[23] Ne Nyasaye yabusia mbu: ‘‘mulalaama shiosishiosi tawe halali Ye, ne abebusi babili obakholele amalayi, na yesiyesi khubo nakofula nohomba boosi halala , olababoolela mbu uff tawe, (olachong’a nabo tawe) ne olabayibila tawe, ne obaboolele amakhuwa keshiroonyo. (amalayi)

[24] Ne obenamilie olubaa lwobwihotselefu okhurulana khutsimbabaasi, ne boola mbu: “ Nyasaye wanje obabeele tsimbabaasi shingala bandela neshili omutiti.”

[25] Nyasaye wenyu amanyile akali mumioyo 17. chienyu, nimulaba abalayi, toto ye niwobulesheli khubalia bamukalukhakhwo

[26] Ni ohelesie Omwikho wuwo eshiakhoyeshela, nende Abamanani nende abali khuluchendo, ne olakhola isasia tawe

[27] Toto balia bakholanga isasia ni Abana babu shetani, ne shetani yaloba Nyasaye wuwe

[28] Ne noba ehale ninabo, khukhukhaaba tsimbabaasi tsia Nyasaye wuwo, tsiosuubililanga, mana boola ninabo amakhuwa amalayi

[29] Ne olakhola omukhono kukwo kwaba shinga kwaboywa mwikosi tawe, nohomba olakubambula orio orio butswa tawe, wakhafunanibwa mana wawelwa

[30] Toto Nyasaye wuwo afungulilanga omukabo kukwe owayenya, toto ye khubandu bebe abamanyile muno ne abalolanga

[31] Ne mulera Abana benyu khulwokhuria obumanani tawe, nefwe khukabanga abo emikabo halala nende enywe, toto okhubeera ni eshionono eshikhongo

[32] Ne mulasita ahambi nende obuyeyi (okhuyilana) tawe, toto ni eshifwolo ne ni injila imbii muno

[33] Ne mulera omundu wa Nyasaye yakana okhwira tawe okhuyiniakhwo khubwatoto, ne ulia wirwa khukhukholelwa obubii, awo khuhelesiyie owitsa habundu wuwe obunyali. kho alabura eshichelo mukhwira tawe. Toto ye akhonyungwa

[34] Ne mulasita ahambi nende omwandu kwomwana omufwilwa tawe okhuyiniakhwo munjila indayi, okhula akubuye, ne mukhole shingala mwalakana. Toto amalakano kalirebwa

[35] Ne mwitsusie eshichelo olwa muchela, ne muchele khushichelo shia habwene, obo ni obulayi khwinywe ne ni obulayi mukhumalilikha

[36] Ne olaloonda kobula ninako obumanyi tawe, toto amarwi nende tsimoni nende omwoyo ebo biosi bilirebwa

[37] Ne olachenda khushialo nende isunga tawe, toto ewe shonyala okhufutula liloba tawe nohomba shonyala okhula oburambi bwetsingulu tawe

[38] Ako koosi obubii bwako nibwokhusinyisia imbeli wa Nyasaye

[39] Ako niko Malala khuka Nyasaye wuwo yakhufimbulila akamachesi, ne olara halala nende Nyasaye nyasaye wundi tawe, wakhetsa wasukunwa mumulilo nofunaanibungwa notaafibungwa

[40] Koo! Nyasaye wenyu abawulile Abana abasiani , neye niyeyawulila Abana abakhana okhurula Mubamalaika? Toto enywe muboolanga amakhuwa amakhongo

[41] Ne toto khwamala okhwinoosia mukurani ino obulayi kho banyoole okhwitsulila , ne shibametanga halali okhubara ehale ninayo

[42] Boola: “Babetsanga halala nende Nyasaye abanyasaye shingala baboolanga, mana bakhakonyele injila yokhula khu shisala shia Nyasaye “(okhulwana)

[43] Nyasaye nomutswenufu muno , ne ali hekulu muno khukababoolanga ako

[44] Amakulu saba nende liloba nende biosi bilimwo bimwitsoominjia. Ne shibulaho shiosi shiosi halali shimwitsominjia khu tsifuma tsistse tsindayi, halali enywe shimumanyanga okhwitsomia okho tawe. Toto Ye ni Omwihotselefu, Owobulesheli

[45] Ne nosooma Ikurani, khuretsanga hakari wuwo nende hakari yabalia abalasuubilanga mwikulu eshikalilo shishinga

[46] Ne khwara ebifunikho mumwoyo chiabu baletsa bamanya, ne mumarwi kabu obusiro, Ne norumbula Nyasaye wuwo yenyene Mukurani, abo bakalukhaninjia emikongo chiabu khulwokhusinywa

[47] Efwe khumanyile muno eshifune eshia bakawulilisilinjia, ne olwabemoonyanga, olwa ababii abo baboolanga mbu: “Enywe shimuloondanga halali Omundu walokwa.”

[48] Lola shingala bakhuchelasilia, mana nibakora kho shibanyala okhunyoola injila tawe

[49] Ne baboola mbu:” Koo; olwakhuliba ebikumba nende ebitonye biasiebwasiebwa, mbu khulilamusibwa, okhuba ebilonji ebiyiakha?.”

[50] Boola: “Bee amachina nohomba olubia (eshichuma).”

[51] Nohomba eshilonje shindi mubilia ebiamulola ebiumu mumioyo chienyu.” Awo balaboola mbu: “Ni wina witsa okhukalusia,” Boola “Ni ulia owabalonga olwambeli.” Awo betsa okhuresilia emirwe chiabu, ne balaboola mbu: ‘‘kaliba lina ako?” Boola: “kanyala okhuba ahambi hano.”

[52] Inyanga ya alibalanga, nanyu mulifuchilila khukhumwitsomia, ne mulipara mbu shimwekhala halali ebise bititi buswa

[53] Boolela Abasumba banje, baboole akali amalayi, toto shetani atswatswaninjia hakari wabu, toto shetani ni omusuku womundu owahabulafu

[54] Nyasaye wenyu yabamanya muno, niyenya nababeela tsimbabaasi neniyenya nabahelesia eshinyasio, ne sikhwakhuruma ewe okhuba umulindi wabu tawe

[55] Ne Nyasaye wenyu yamanya muno abali mwikulu nende mushialo. Ne toto khwachingula Abarumwa bandi okhushila abandi, ne Daudi khwamuhesia Izaburi

[56] Boola “ Lanje boosi abamuboolanga mbu ni abanyasaye nimulekha Ye. Shibalanyala okhubarusiliaho abubii nohomba okhukalukhania tawe.”

[57] Abo nibo basabanga, bakhabanga okhwinjila hambi nende Nyasaye wabu, abali ahambi muno mubo basubilanga tsimbabaasi tsitsie ne baritsanga eshinyasio shishie, Toto eshinyasio shia Nyasaye wuwo nishokhuriibwa

[58] Ne lubulaho olukongo lwosi lwosi halali efwe khulilusishia inyanga yeyindukho nishili okhula nohomba khuliluhelesia eshinyasio eshilulu. Kano kosi kahandikwa mushitabo

[59] Ne shibulaho shikhwikalilanga okhurera amangalimwa, halali ni okhubeela mbu Abandu bakhale bayingana. Ne khwahelesia aba Thamudi ingamia ikhasi okhuba eshimanyisio eshia habalafu, mana nibamuyingasia, Ne shikhuyilanga ebimanyisio ebo halali khulwa okhwikanyilisia

[60] Ne olwakhwakhuboolela mbu: “Toto Nyasaye wuwo amalile okhubotokhana Abandu abo.” Ne shikhwakhola amaloro kalia akakhwakhwechesia halali okhutema Abandu. (Nende okhurumbulwa) mukurani omusala okwashienwa kulia, akwakhwakhwechesia. Ne khubekanyilisinjia halali shikabametanga shosi shosi tawe halali obukori obukhongo

[61] Ne olwakhwaboolela Malaika mbu: “ inamile Adam” Nibeenama okhuyiniakhwo Ibilis. Naboola mbu: “Koo; Ndinamile ulia owaloonga okhurula khwiloba?’’

[62] Naboola: “ololanga uno wohelesiye oluyali muno okhushila esie, ni umbelesia ebise okhuula inyanga yeyindukho, toto ndilisishia olwibulo lwaye lwosi halali batiti butswa.”

[63] (Nyasaye) Naboola:” Rula hano; yesi yesi ulikhulonda mubo, mana toto Jahanamu niko omurungo kwenyu, omurungo omuleeng’afu.”

[64] Ne Obakhwese bonyalilwa mubo khu sauti yiyio, ne obakhung’asie, Abaninanga tsifarasi nende batsitsanga khumakulu. Ne sanjilana ninabo khu mwandu nende Abana babu, ne 17. obalache, Halali shetani shabalakanga halali ubebeyi butswa

[65] Toto Abasumba banje obula obunyali khubo. Ne Nyasaye wuwo ayela okhuba omulindi

[66] Nyasaye wenyu ni ulia ubelusilinjia ebininwa bienyu munyanza, kho mukonye omukabo kukwe. Toto Ye ni umunji wetsimbabaasi khwinywe

[67] Ne obutinyu nibubanyoola munyanza, babakoranga balia boosi bamulanganga mbu Nyasaye, halali Nyasaye Yenyene butswa. Ne olwa aboosinjia nimuli shisiche mulembe khulukongo, mukalukhananga. Toto Omundu ni omunji wokhukhaya

[68] Koo musuubilanga mbu muli nomulembe, shiyetsa okhubayibisia ebuleka wosiwosi we shialo, nohomba mbu shalabarerera imbumbuyeka yolufu mana mubule okhunyoola omukhonyi

[69] Nohomba musuubile mbu mulinomulembe shalibakalusiamwo olundi khandi tawe- mana abarerere omuyeka omululu, mana abayibisie khulwa obukhayi bwenyu? Mana mubule ubakhoonya ubasabila khwifwe khushinyasio shino

[70] Netoto khwaninia Omundu hekulu, mana nikhumuchinga khushialo nende munyanza mana mikhumukaba khumikabo emilayi ne nikhumukholela obulayi muno okhushila ebindi bia khwaloonga

[71] Inyanga yakhulilaanga Abandu halala nende abemilisi babu, kho balia balihebwa eshitabo shiabu momukhono omusatsa abo balisoma eshitabo shiabu neshibalikholelwa obubii bwosi bwosi tawe- (kata shingala ulusi lweyitende)

[72] Ne uba khushialo khuno umuwofu, mwikulu khandi aliba omuwofu, ne owakora muno injila

[73] Nabototobalihambiokhukhutswatswania nende kalia akakhwakhufimbulila, kho onyoole okhuchishila kalali kano, ne awo toto bakhakhukholele omwitsa

[74] Nekhukhayanga okhukhutinyisia, wakhabeele ahambi okhubayekhakho hatiti

[75] Awo nafu toto khwakhupiliyie eshinyasio eshikhongo shiobulamu. Ne mana shiwa khanyoolelekhwo omukhonyi ukhuhabina khwifwe tawe

[76] Ne toto bali ahambi okhulonda kushialo(Madina) kho bakhurusiemwo. Ne shibakhekhale inyuma wuwo halali ebise bititi butswa

[77] Oko niko omulukha kwa balia abakhwaruma imbeli wuwo mubarumwa befu. Ne sholanyoola obwawukhani mumilukha chiefu tawe

[78] Ne yemia iswala eliuba olwalikalukhananga, okhula ishilima shieshilo, ne Ikurani yomumabwibwi. Toto Ikurani (Iswala) yomumabwibwi ili nende abaloli buli lwosi

[79] Ne eshilo bukha olaame ninayo, eyo ni eshimetelo khwiwe, yakhaba ario Nyasaye wuwo yakhulamusilia habundu woluyali

[80] Ne boola mbu: “ Nyasaye wanje; unyinjisie amenjililo amalayi, ne undusiemwo okhurusia okhulayi, ne umbe amaani karula khwiwe akakhonya.”

[81] Ne boola mbu: “obwatoto buulile; ne obubeyi burulile, toto obebeyi nibo obwokhurula.”

[82] Ne khweshia mu Kurani eshili mbu ni eshiwonia, nende tsimbabaasi khubasuubili, Ne shikabametelanga Abakhayi halali obusishi. (okhutiba)

[83] Ne olwakhuwelesinjia Omundu tsimbabaasi tsiefu, akalukhananga nende okhwira elubeka, ne elibii nilimutila afwitsanga omwoyo lwangu

[84] Boola: “Buli shiamulala akholanga muinjila yiyie, ne Nyasaye wenyu yamanya ulia owalunjikha muno khunjila.’’

[85] Ne bakhurebanga amakhuwa ka roho. Boola: ‘‘Roho ni likhuwa lirulana nende Nyasaye wanje. Nanyu shimwahebwa mubumanyi halali butiti.”

[86] Ne khwenyanga toto khwakhabukule koosi aka khwakhufimbulila, mana shiwakhanyolele ukhuyingasia khulino tawe

[87] halali khutsimbabaasi tsirula khu Nyasaye wuwo. Toto obulayi bubwe khwiwe ni obukhongo

[88] Boola: “Kata nibekhung’asia Abandu nende Amajini mbu kho barere eshifwana shinga Ikurani ino, shibakhanyala okhurera ifwana ngayo tawe kata nibakhonyana abeene khubeene.”

[89] Ne toto khwenoosilia Abandu mutsinjila tsinyinji Mukurani ino buli okhuchelasia. Halali Abandu abaanji bakhayanga khulwa okhuyingasia butswa

[90] Ne baboola(abakhayi) ‘‘shikhunyala okhusuubila okhula okhukhulukusilie isebele mwiloba.”

[91] Nohomba obe nende omukunda kwetsitende nende tsizabibu, mana chikhulukusiemo omialo makhulukusia

[92] Nohomba okhukwisiekhwo likulu ebitonye ebitonye shingala wishemulanga, nohomba okhurerere Nyasaye nende Malaika obweni khubweni

[93] Nohomba obe nende inzu yeyidhahabu, nohomba onine mwikulu. Ne shikhulasuubila okhunina khwao okhula okhwishilie eshitabu khusome. Boola mbu: “Nyasaye wanje woluyali, esie endisa Omundu, Omurumwa. Shendi Malaika nohomba Nyasaye tawe.”

[94] Ne shibulaho shiakayila Abandu okhusuubila olwa obulunjifu bwabetsela halali baboola mbu: “ Koo: Nyasaye yaruma Omundu okhuba Omurumwa wuwe?”

[95] Boola: “Khushialo Malaika bebatsangakho nibachenda nibakalukha, toto khwakheshiyie okhurula mwikulu Malaika okhuba Omurumwa.”

[96] Boola mbu: “Nyasaye ayela okhuba omuloli hakari wefu ninanyu, Toto ye yamanya obulayi Abasumba be ne abalolanga muno.”

[97] Ne owa Nyasaye alunjisia kho oyo niye omulunjifu, ne ulia owa alekha okhukora mana ewe sholabanyoolela omulindi ulali ye tawe (Nyasaye) Ne khulibakhung’asia inyanga yeyindukho ni bakhweswe khubweni bwabu, ne nibali abawofu nende abasilu nende abekala amarwi. eshimenyo shiabu ni Jahanam, nikukhola okhututuya okhwakha khwako, khukumetelanga omwakho

[98] Oko nikwo umurungo kwabu shichila toto abo bakhaya ebimanyisio biefu, mana nibaboola mbu: “olwakhuliba ebikumba nende ebitonye abiasiebwa khulilamusibwa okhuba ebilonje ebiya

[99] Shibalolakhwo mbu Nyasaye owaloonga likulu nende eshialo ali nende abunyali bwokhuloonga abali shingabo? Na yabareraho ebise bibula inganakani mwo. Halali ababii bakhaya okhutsililila mubukhayi butswa

[100] Boola mbu: “mubetsanga mbu nenywe muli nende eshiachi shetsimbabaasi tsia Nyasaye wanje toto mwakhatsikaliile khulwa okhuria okhutsikhonyela. Ne toto omundu nomwimani muno

[101] Netoto khwahelesia Musa ebifune tisa abili habulafu barebe Abana ba Israil alwayabetsela, ne Firauni nababoolela mbu: ‘‘Toto esie okhuparira ewe Musa mbu walokwa.”

[102] Naboola:” Toto ewe omanyile mbu abulaho weshia ebifune bino halali Nyasaye welikulu nende weshialo okhubaha eshimanyisio. Netoto esie okhuparira ewe Firauni, omalile okhusikha

[103] Mana Firauni niyenya okhubaloonda mushialo shiabu, mana nikhumuyibisia ye nende abali halala ninaye boosi

[104] Ne nikhubabolela inyuma wuwe abaana ba Israil mbu: “Ikhale khushialo, ne olwayilitsa indakano yeyindukho, khulibareera mwesi halala.”

[105] Ni khubwatoto khwayishia, nikhubwatoto yekha. Ne shikhwakhureera halali obe omurusia wamakhuwa amalayi, nende omwikanyilisi

[106] Ne Ikurani khwayikabula tsimbeka tsikabukhane, kho onyoole okhusomela Abandu khukhuwulukha, ne khwayishia inditi nditi

[107] Boola: “ Muyisubile nohomba nimulayisubila, toto balia bahebwa obumanyi ino nishili, nibasomelwa bakwitsanga mafumama nibasujuda.”

[108] Ne babolanga mbu: ‘’Nyasaye wefu ni woluyali. Toto indakano ya Nyasaye wefu ilikholekha butswa.”

[109] Ne bakwitsanga mafumama, nibalila, ne ibameta obwihotselefu

[110] Boola:” musabe Nyasaye (Allah) nohomba musabe wetsimbabaasi (Arrahman); Elira liosi liosi liamumulanga ali nende amera amalayi” Ne olalaama iswala yiyio khubuyoka tawe, ne olaboola mumwoyo kwa hasi tawe, halali tila hakarikari wa ako

[111] Ne boola: “oluyali lwosi nilwa Nyasaye, ulia owulekholela omwana ne abula omusanji, khu bwami bubwe, ne abula omwitsa khulwobulemefu bwokhwenya. Ne omwitsomie okhwitsoomia okhukhongo muno

[1] Oluyali lwoosi nilwa Nyasaye oweshia eshitabukhumusumbawuwe, neshiyashikhola okhuba mashiama tawe

[2] Shiema obulayi, kho shikanyilisilie Abandu eshinyasio eshilulu shirulanga khuye, ne shihelesie amacheni amalayi balia basuubilanga abakholanga ebikhole ebilayi, mbu balinyoola omurungo omulayi

[3] Bekhalemwo tsinyanga tsiosi

[4] Ne shikanyilisie balia baboolanga mbu: “ Nyasaye alinende Omwana.”

[5] Abo babula obumanyi balio kata baasabwe, nilikhuwa likhongo muno lirulanga muminwa chiabu. Shibaboolanga halali obubeyi butswa

[6] Ne onyala okhwiyira ewe omwene, khulwa okhubabelelela ngala bali mbu shibasubilanga amakhuwa kano tawe

[7] Toto efwe khwakhola ebili khushialo bibe ebirone biashio, kho khubalole ni wina mubo webikhole ebilayi

[8] Ne toto nefwe khukholanga bioosi ebo bili hekulu walio okhuba liloba eliumu

[9] Nohomba oparanga mbu Abandu bo mulwanda, nende bakalia kahandikwa, mbu bali abamakana okhurulana nende ebimanyisio biefu

[10] Olwa Abasiani abo belushila mulwanda, mana nibaboola mbu: “Nyasaye wefu khuhelesie tsimbabaasi tsirulanga khwiwe nekhukasilie abulunjifu mulikhuwa liefu.”

[11] Mana nikhusuba amarwi kabu mulwanda omo khumika eminji

[12] Mana nikhubalamusia khokhumanye mbu nikuli hena khumikanda chibili chino okwa bala obulayi ebise biabamenyamwo

[13] Efwe khukhukanilanga amakhuwa kabu khubwatoto, toto abo ni ababukha abasuubila Nyasaye wabu, mana nikhubametela obulunjifu

[14] Mana nikhura amani mumioyo chiabu, olwabeema mana nibaboola mbu: “Nyasaye wefu ni Nyasaye welikulu nende eshialo,shikhulalaamakhwo Nyasaye wundi ulali Ye tawe. Toto awo khulaba khuboolele obubii obwaburirira eshichelo

[15] “Abandu befu bano, bakhola abanyasaye balali ye tawe. shichila shina nibalarerakhwo eshifune shili habulafu, kho ni omubii shina omukhongo okhushila ulia uchishilanga Nyasaye obubeyi

[16] “Ne olwamwali nimubawukhekhwo, nende bilia ebiabalaamanga habandu wa Nyasaye, mana mwilushila mulwanda, Nyasaye wenyu alabekulila tsimbabaasi tsitsie ne alabakholela amakhuwa kenyu okhuba amangu

[17] Ne alola eliuba olwalirulanga libura ehale mulwanda lwabu namukhono musatsa. Ne ulwa likwitsanga namukhono omukaata. Nabo nibali mukhombe mukari wo lwando. Ebo ni bilala khubimanyisio bia Nyasaye, ulwa owayalunjisia oyo niye omulunjifu, ne awaalekha okhukora, kho oyo shalamuhelesia omulindi umulunjisia tawe

[18] Ne opara mbu bali meso, nabo khane bakonele, nekhubakalukhaninjia namukhono mulunji, nende namukhono mukata. Ne imbwa yabu nilambisiyie ebilenje biayio mubwinjilililo, obalolanga wakhakalukhane lwangu okhubelukha, ne toto oburi bwakhakhwitsulemwo shichila bo

[19] Kho endio nilwakhwabalamusia kho bareebane abeene khubeene, naboola omubooli mubo mbu: “mwikhalemwo tsinyanga tsinga?” naboola mbu : “ khwikhalemwo inyanga ndala nohomba ebuleka weyinyanga.” Nibaboola mbu “ Nyasaye wenyu amanyile muno ebise bia mwekhalamwo. Kho mana murume mulala wenyu nende amamondo kenyu kano khushiro mana ahenje eshiakhulia shina eshilayimunoabarerere. Neakholeamakhuwa kano mumachesi ne alabarumbulakhwo khuyesiyesi tawe

[20] Shichila bo nibamanya hamuli balabalasa amachina, nohomba balabakalusia mumilukha chiabu, ne awo shimulibura kata hatiti tawe

[21] Na endio nilwakhwabarumbusia, khobanyoole okhumanya mbu indakano ya Nyasaye ni yatoto ne mbu inyanga yeyindukho ibula obukanakani tawe, olwa basolananga abeene khubeene shichila likhuwa liabu. Nyasaye yamanya obulayi. Balia bashila mulikhuwa liabu nibaboola mbu: “Toto efwe khulabombashila omusikiti.”

[22] (Abandi) baboolanga mbu: “Bali Abandu bataru wakhane wabu ni imbwa yabu” Ne (abandi) baboolanga mbu:” Bali Abandu barano ne wakhasasaba ni imbwa yabu,”(babolanga) khu khutemakho butswa okhuboola-akabakorerwe. Nebaboolanga mbu bali Abandu saba ne wamunane wabu ni imbwa yabu. Boola: ‘‘Nyasaye wanje ni umanyile mbu bali benga. Abulaho umanyile halali batiti butswa. Kho olayingana nabo tawe halali okhuyingana khwe hekulu butswa. Ne olareba amakhuwa kabu omundu yesi yesi tawe

[23] Ne olabolakhwo khuliosi liosi tawe mbu: ‘‘Nditsa okhukhola mutsuli.”

[24] Halali (ometekho) “ Inshallah(Nyasaye nachama) Ne yitsulila Nyasaye wuwo niwibiliile, ne boola mbu : “Nyasaye wanje alalunjisia injila ili ahambi muno nende obulunjifu okhushila buno.”

[25] Ne bamenya mulwanda mwabu omo emika tsimia tsitaru, nenibametakhwo tisa

[26] Boola “Nyasaye amanyile muno ibise biabekhalamwo” niye umanyile akefisile ako mwikulu nende khushialo. Okhulola khuli khurie nende okhuwulila khukhwe, nabo babula omulindi ulali ye, naye shatsokasinjiakhwo yesiyesi mubwami bubwe tawe

[27] Ne soma akawafimbulilwa okhurula mushitabu shia Nyasaye wuwo. Abulaho unyala okhukalukhasia amakhuwa keke. Nawe sholinyoola awilushila okhumwilukhaye akhaye okhwunyoola tawe

[28] Ne wisumilisie halala nende balia balaamanga Nyasaye wabu etsuli nende ingoloobe, nibakhaba obuchami bubwe. Ne olababusiamwo tsimoni tsitsio khulwokhwenya ebirone bio bulamu bwokhushialo tawe. Ne olaria balia abakhwalekha bakandala emioyo chiabu mana nibalonda obwikombi bwabu, mana amakhuwa kabu nikabura eshichelo

[29] Ne boola mbu: “ buno ni obulaamba okurula khu Nyasaye wenyu’’ kho ulia wenya asuubile ne owenya akhaye efwe khwarecheshela ababii omulilo, okwe tsikhwi tsiakwo tsilibabotokhana . Ne nibenya obukhonyi balikhonywa amatsi shinga shichuma shisalulusibwe shisaamba obweni, eshinywebwa eshibi shili shirie shino! Nende habandu ali abii arie hano

[30] Toto balia abasuubila mana nibakhola amalayi, efwe toto shikhukosinjia omurungo kwabalia bakholanga amalayi tawe

[31] Abo balinyoola emikunda chilaliwa tawe, echiburangamwo emialo- imbeli wachio, balironwamwo nende abifwalo biokhumakhono, ebie idhahabu, ne balifwala tsingubo tsia majani-etsia hariri inyangu nende hariri isiro. Balikhalamwo khu bitali ebiaronwa (khufono). Ni umurungo omulayi kuli kuriena kuno! Ne ni habandu alayi ali arie hano

[32] Ne bachelasilie, Abandu babili, mulala wabu khwamukholela emikunda chibili chetsizabibu, mana nikhubotokhania mitende, ne hakari nikhuraho emisala chindi chieyimele

[33] Emikunda chibili chino chioosi chietsulamwo ebiamo biachio ne shikhwalemiakhwo shiosi shiosi tawe. Ne mukarimwo nikhubusiamwo emialio

[34] Ne yali nende ebiano ebinji. Mana naboolela owashie nibakalusaninjia mbu: “Esie ekhushila khumwandu nende amani khulwa Abandu bendi ninabo.”

[35] Mana niyenjila mumukunda kukwe niyekholele obubii naboola mbu: “ shembara omukunda kuno nikulibiyakhwo tsinyanga tsiosi tawe.”

[36] “Ne shembara indukho nilibaho tawe, ne nindilikalusibwa khu Nyasaye wanje ndilinyoola amekhalo amalayi okhushila kano.”

[37] Owashie namuboolela nibakalusaninjia mbu “ Koo; Okhayanga ulia wakhuloonga khuliloba, mana khu indonyande ya amatsi kolwibulo, mana nakhukhola omundu omulaamba?”

[38] “Halali ye Nyasaye niye omulesi wanje ne shenzokasinjiakhwo shiosi shiosi nende Nyasaye wanje tawe.”

[39] Ne shingala winjile mumukunda kukwo oboolanga mbu: “biendi nabo bino Nyasaye niye unyenyeele, amani shikanyolekhanga halali khu Nyasaye,” ni undolanga mbu endi nende omwandu omutiti nende Abana abatiti okhushila ewe.”

[40] Awundi Nyasaye wanje alambelesia eshilayi okhushila omukunda kukwo, ne yaruma (mukunda oko) likulu okhurula mwikulu mana libe liloba likhaya- lirerekha

[41] “Nohomba amatsi kalio kakhame obule okhukanyoola.”

[42] Mana ebiamo bayie nibibotokhanwa, mana natong’a okhukalukhania amakhono keke, khulwa obukhalabani bwaye (omo) nabo (ebiamo) nibibula khumisala chiachio, mana naboola mbu: “Ehh! manyanga ekhaya okhutsokasia Nyasaye wanje nende shiosishiosi”

[43] Ne shiyali nende Abandu bokhumukhonya tawe niyakhamala okhukhaya Nyasaye, nohomba shiyali omwene unyanala okhwikhonya tawe

[44] Eyo obwami nibwa Nyasaye butswa owatoto, Naye niye omurunji omulayi, owokhurera amarulilo amalayi

[45] Ne bachelasilie obulamu bwokhushialo buli shinga amatsi kakhwishinjia okhurula mwikulu, mana nikesasia nende emimela chiomwiloba, mana emimela echo nichiba amasafu amomu, akakhalishe khalishe akomuyaka kukhuyunga eyi- nende eyi. Ne Nyasaye ali nende obunyali khubuli eshindu

[46] Omwandu nende Abana ni ebirone bio bulamu bwokhushialo. Ne ebikhole ebilayi bitong’anga nibo obulayi imbeli wa Nyasaye wuwo khumurungo nende okhusuubilila okhulayi

[47] Ne inyanga yakhulichesia tsingulu, ne olilola eshialo nishili eshiang’ang’u, ne khulibalamusia neshikhulilekha yesiyesi mubo tawe

[48] Ne baliemibwa imbeli wa Nyasaye wuwo olunyaali. Toto enywe mukhwitsile shingala khwabalonga olwambeli. Halali mwapara mbu shikhulibarereho ebise bino tawe

[49] Ne ebitabu bilirebwaho- ( imbeli wabu). olilola shinga ababii baliria shichila kalia kalimwo. Ne baliboola mbu: “Oh bayie, ebitabu bino bili birie, shibilekha lititi nohomba likhongo halali liandichilwe.” Ne balinyoola koosi kabakhola nikali hawo, ne Nyasaye wuwo shakholelanga yesiyesi obubii tawe

[50] Ne olwakhwaboolela Malaika mbu: “inamile Adam.” Mana nibenama halali Ibilis, ye yali mumukanda kwa majini, mana nafunaka lilako lia Nyasaye wuwe. Koo mumukhola ye nende olwibulo lulwe abetsa (benyu) habundu wa Nyasaye, nabo nibali abasuku benyu? Ni obubii buli burie bwababii bakalukhaninjia

[51] Shindabakhola okhuba abaloli olwa okhulongwa khwe likulu nende eshialo nohomba okhulongwa khwabu abeene, ne shindakhola abakosinjia okhuba abakhonyi tawe

[52] Ne inyanga yaliboola mbu: “Rerekhwo abamwasanjinjia ninaasi abamwachikhanga,” mana balibalanga mana shibalibafuchililila tawe, mana khulira hakari wabu eshikalilo

[53] Ne Ababii balilola omulilo, ne balimanya mbu okhula balenjilamwo, Ne mana shibalinyoola amelushilo tawe

[54] Ne toto khwaboolela Abandu Mukurani ino buli imbia yakhufwananishia. Halali Omundu yabura eshichelo okhushila buli eshindu mukhuyingana

[55] Ne shibulaho eshikayila Abandu okhusuubila olwa obulunjifu bwabetsela mana nibasaba eshileshelo khu Nyasaye wabu, halali kaboolele kalia akabakhale, nohomba eshinyasio shibetsela mapwoka

[56] Ne shikhurumanga Abarumwa halali babe abarusia amakhuwa amalayi nende 18. abekanyilisia. Ne balia bakhaya bayingananga khumakhuwa kalali katoto, mbu khobakhole obwatoto okhuba obubeyi. Ne bakholanga tsinyali tsianje nende kalia akabekanyilisibwa okhuba omubayo

[57] Ne ni wina omubii omukhongo okhushila ulia owitsulisibungwa tsinyaali tsia Nyasaye wuwe mana nalatsibukulila oluchendo mana niyebilila akemikhono chichie chiaranjilisia. (bilishinga) toto efwe khwara mumioyo chiabu ebifunikho kho bakhaye okhumanya, (bilishinga) efwe khwara mumarwi kabu obusiro. Ne nobalanga khubulunjifu shibakhachama okhulunjikha tawe

[58] NeNyasayewuwoniyeomunjiweshileshelo, Owetsimbabaasi, ababukulilanga khulwa kalia akamwakhola, toto yakhabanguyisiliye eshinyasio lwangu lwangu. Halali bali nende ebise ebia balalinyoola amelushilo kosikosi akokhwilukha tawe

[59] Ne tsingongo etsio khwatsisishia olwa tsiakhola obubii, nikhubarerarao ebise biokhusikha khwabu

[60] Ne olwa Musa yaboolela omusiani waye mbu: ‘‘Ndalatsililila okhutsia, okhula ndule etsinyanza tsibili tsibukananilanga nohomba enzilile emika nemika.’’

[61] Kho olwa boola etsinyanza tsibukananilanga nibebilila enyeni yabu, mana naye natsililila okhutsia imbeli munyanza

[62] Olwa boola imbeli yaboolela omusiani wuwe mbu: “ khwelesie eshiakhulia shiefu shieshitere, toto khunyoolele khuluchendo lwefu luno amachonye.”

[63] Naboola mbu: “ ulutsi, wakhuwulushile halia khushitulo? Owo niwo wandibilile- enyeni eyo. Ne abulaho owakhola ndebilila halali shetani mbu ndalayitsulila tawe, Mana natila injila munyanza okhutsia khwamakana

[64] Naboola mbu : “Alia niho wakhwenyanga” mana nibakalukha inyuma okhulonda injila yabu. (ilia ilia)

[65] Mana nibanyoola Omusumba khubasumba befu owakhwahelesia tsimbabaasi okhurula khwifwe, ne owakhwechesia amachesi okhurula khwifwe

[66] Musa namuboolela mbu: “Koo; Enyala ndakhulondakhwo unzechesiekhwo kobulunjifu kawechesibwa?”

[67] Naboola mbu: “Toto ewe shonyala okhwifwila okhuba halala ninasi tawe.”

[68] “Ne onyala orie okhwifwila kalia akokorerwe obulamba bwako?”

[69] Naboola mbu: “Nyasaye nachama, witsa ukhunyoola nendi omwisumilisi, ne shinditsa okhulobakhwo likhuwa lilio liosi liosi tawe.”

[70] Naboola mbu: “Mana niwunodakhwo, olandeeba liosi liosi tawe, okhula esie anjake okhuboolela.”

[71] Mana nibarula, olwa banina obwaro, nabufutula. Musa namureeba mbu: ‘‘Ofutula obwaro kho osishie abalimwo? Toto okholele likhuwa libii muno”

[72] Naboola mbu: “shekhuboolelekhwo mbu sholanyala okwifwila ninasi tawe?”

[73] Naboola mbu: “Olambukulila khukandibilile tawe, noho alasitoyelia amakhuwa kanje tawe.”

[74] Mana bosi nibarula halala, Nibanyoola Omusiani mulala mana namwira . Musa naboola: “Ahh wira Omundu eshikhaya ubula likosa, ulerere Omundu tawe? Toto okholele likhuwa libii muno!”

[75] Naboola mbu: “Koo; shekhuboolelekhwo mbu sholanyala ekhwifwila halala ninasi tawe?”

[76] Naboola mbu: “Nekhureeba liosi liosi khandi olakhola okhuba halala ninawe khandi tawe, shichila omalile okhunyoolakhwo eshifune.”

[77] Mana nibatsililila okhutsia olwa boolela Abandu bolukongo, nibareeba abeene olukongo olo eshiakhulia nibabeema okhubakholela obucheni, ne nibanyoolamwo- (mulukongo olo) inzu lisisi lienyanga okhukwa- mana nibaliemia. Musa naboola mbu: “noli uchama khwakhabukule omurungo (Khumilimo chino)”

[78] Naboolambu:“kunonikwo omwawukhano kwanje ninawe. Nditsa okhuboolela obwatoto bwakalia kolanyalile okhwisumilisia ninasi.”

[79] Kho eliaro liali liabamanani bakholanga munyanza, ne ndenyele okhulirakhwo isoni, shichila imbeli wabu Omwami yaliyo unuulanga buli eliaro lilayi

[80] “Ne umusiani ulia, abebusi bebe bali abasuubili, nikhuria mbu aletsa yabayila mubukori bwokhuloba nende okhukhaya,”

[81] “Kho mana nikhwenya Nyasaye wabu abakalukhanilie Omwana omulayi okhushila oyo, khubutswenufu, nende owuli ahambi muno khushisa

[82] Nalo lisisi, liali lia Abaana abafwilwa babili, mulitokho elo, ne hasi walio khwaliho nende libishibo liabu, ne samwana yali omundu omulayi, kho Nyasaye wuwo yenya mbu bakubuye mana berusilie abeene libishilo liabu, etso nitsimbabaasi tsirula khu Nyasaye wuwo. Ne shekholele kano khubunyali bwanje tawe . Obo nibo abwatoto bwa kalia akokhayilwe okhwifwila ninaasi

[83] Nebakhurebanga amakhuwa ka Dhul’karnain boola mbu;’ Nditsa okhubasomela malala khumakhuwa keke”

[84] Toto efwe khwamutinyia khushialo, ne nikhumuwa injila yokhunyoola buli eshindu

[85] Mana naloonda injila

[86] Okhuula shingala yoola ebukwe eliuba likwitsanga, yalilola nilikwa niliyeela khusebele, eya matoyi amanji. Awo nanyoola Abandu. Nikhuboola mbu: “Ewe Dhul’karnain; Bahelesie eshinyasio nohomba abakholele obulayi.”

[87] Naboola mbu: “ulia owakhola obubii khwitsa okhumuwa eshinyasio, mana alikalusibwa khu Nyasaye wuwe, naye alimuhelesia eshinyasio eshibii muno

[88] Ne ulia owasuubila mana nakhola ebikhole ebilayi, alanyoola omurungo omulayi, nafu khwitsa okhumuboolela amakhuwa kefu amangu

[89] Mana naloonda injila

[90] Okhula shingala yoola eliuba lirulilanga (mumbo) yalilola nilirulila khubandu abalakhwarereho eshishinjilo shiokhubekalila (ninalio)

[91] Ne shinga endio khwali nikhumanyile obulayi amakhuwa koosi kayali ninako

[92] Mana naloonda injila

[93] Okhula shingala yoola hakari wetsingulu tsibili, yanyoola inyuma wuwe Abandu balawulilanga amakhuwa tawe

[94] Nibaboola mbu: “ Ewe Dhil-Karnain; Toto Yaajuj nende Maajuj, banyasinjia eshialo, kho khukhwelesie omurungo ore eshikalilo hakari wefu ninabo?”

[95] Naboola mbu: “Kalia ka Nyasaye wanje yandinyisiliamwo ni amalayi muno, khomukhoonye nende amani ndalara hakari wenyu ninabo eshikalilo eshisiro.’’

[96] “Munderere ebitonye bieshichuma” okhula shingala yetsusia obwiyangu buli hakari wetsingulu tsibili; naboola mbu: ‘‘Bwaane; (omulilo)” okhula shingala yakhola eshichuma shilia omulilo, naboola mbu: ‘‘Munderere ishaba isalulushe enzushe khuno.”

[97] Mana shibanyala okhunina nohomba okhufutula tawe

[98] Naboola:”Tsino ni tsimbabaasi okhurula khu Nyasaye wanje. Ne olwa yiliula indakano ya Nyasaye wanje, alikufunakafunaka. Ne indakano ya Nyasaye wanje ni yahabwene

[99] Ne khulilekha abandi babu nibasutania sutania (mumulilo) Ne olwa olwika lulikhupwa. Awo khulibakhung’asia boosi halala

[100] Ne khulilolosia Jahanamu inyanga eyo imbeli wabakhayi malolosia (mang’alang’ala)

[101] Abetsimoni tsiabu tsiali tsiafunikhwa khumetsulilo kefu, neshibali nibanyala okhuwulila tawe

[102] Koo, Balia abakhaya baparanga mbu okhukhola Abasumba banje abalindi babu, habandu wanje (khulabakhonya shiosi shiosi)? Toto efwe khwarechekha Jahannam abakhayi ibe abaliishila

[103] Boola: “Koo ebechesiekhwo balia bebikhole biabu biabiiya?”

[104] Ni balia bobukhalabani bwabu bwakora eshikhaya khubulamu bwokhushialo, nabo baparanga mbu bakholanga ebikhole ebilayi

[105] Abo nibo bakhaya ebimanyisio bia Nyasaye wabu nende okhubukanana ninaye. Kho ebikhole biabu nibikwa akhaya, ne shikhulibemelia obusiro inyanga yeyindukho tawe

[106] Kho Jahanam niko omurungo kwabu shichila bakhaya mana nibakholela omubayo ebimanyisio bianje nende Abarumwa banje

[107] Netoto balia abasuubila mana nibakhola amalayi emeshelo kabu kaliba Firdaws

[108] Balimenyamwo tsinyanga tsiosi omo, shibalienya okhurulamwo tawe

[109] Boola mbu: “Inyanza yibetsanga mbu nibo obwino (bwokhuhandika) amakhuwa ka Nyasaye wanje, inyanza yakhomele amakhuwa ka Nyasaye wanje nikashili okhuwa, kata khureranga etsindi shinga etso

[110] Boola mbu: “Toto esie endisa Omundu shinga enywe efimbulilungwa mbu Nyasaye wenyu ni Nyasaye mulala , kho ulia wikomba okhubukanana nende Nyasaye wuwe akhole ebikhole ebilayi ne alatsokasiakhwo shiosi shiosi khu milukha cha Nyasaye wuwe tawe

[1] Kaf, Ha, Ya, Ayn Sad

[2] Obwitsulisio bwetsimbabaasi tsia Nyasaye wuwo khu musumba wuwe Zakaria

[3] Olwa yalanga Nyasaye wuwe omulango kwobwifisi

[4] Naboola mbu: “Nyasaye wanje, toto abikumba bianje bimalile okhuba ebiteshele, Ne umurwe kwanje kwakhanga tsimbutsi, ne shindali weyikhabi imbi tawe, Nyasaye wanje khulwa okhusaba

[5] Ne toto esie eyendelanga Abandu banje nindakharulaho, Ne Omukhasi wanje nomukumba. Kho mbelesia witsa okhutong’a mushilenje shianje okhurula khwiwe

[6] Witsa okhuchelama esie nende okhuchelama olwibulo lwa Yaqub, Ne Nyasaye wanje omukhole omwene abe uchamisia

[7] Ewe Zakaria efwe khukhwetsanga amakhuwa amalayi ko Omwana elira lilie ni Yahya khushili okhuwelesiakhwo yesiyesi imbeli wuwo elira shinga lino

[8] Naboola mbu: “Nyasaye wanje; Ndakhanyoola endie Omwana; omukhasi wanje nali omukumba, nasi ndamala okhukofula muno

[9] Naboola mbu: “Ne endio nilwakali” Nyasaye wuwo aboolele mbu: “kano ni amangu khwisie ne toto ndakhuloonga khale, ne shiwali eshindu tawe.”

[10] Naboola mbu: “Nyasaye wanje kholela eshimanyisio.” Naboola mbu; “ Eshimanyisio shishio ni mbu sholanyala okhuboola nende Abandu khutsinyanga tsitaru tawe, nawe nolisa omulamu habwene

[11] Mana nabarulila Abandu baye okhurula khu mihirab, nabasomeselia nomukhono mbu : “ Mwitsoomie Nyasaye itsuli nende ingoloobe.”

[12] Ewe Yahya, Tila eshitabu nende amaani, nafu khwamwelesia obururuchi nashili omutiti

[13] Ne nikhumwelesia eshisa okhurula khwifwe nende obutswenufu, ne yali owaria Nyasaye

[14] Ne (nikhumukhola) omulayi khubebusi babe ne shiyali omufuru omukhayi tawe

[15] Ne omulembe kube khuye inyanga yayebulilwa nende inyanga yayafwila nende inyanga ya alilamusibwa mubafu

[16] Ne yitsulisia mushitabu Mariam, alwa yawukha khubandu bebe natsia ebuleka webukwe

[17] Mana naraho eshikalilo okhwiyikalila ninabo. Mana nikhumurumila roho wefu, niyekhola khuye shinga Omundu

[18] (Mariam) Naboola mbu : “Toto esie ndilinda khu Nyasaye, Omunji Wetsimbabaasi- (yaninde) khwiwe. Toto noba noritsanga Nyasaye

[19] (Malaika) Naboola mbu: “Toto esie endi Omurumwa wa Nyasaye wuwo erumilwe mbu nditse ekhusuubisie Omwana Omutswenufu

[20] Naboola mbu: “Ndakhanyoola endie Omwana, ne Omundu yesi yesi nashili okhundilakhwo, ne esie shendikho omuyeyi tawe?”

[21] Naboola mbu : “Ne endio nilwa kali Nyasaye wuwo aboolele mbu: “Kano ni amangu khwisie kho khumukhole eshimanyisio khubandu nende tsimbabaasi tsirulanga khwifwe. Ne lino nilikhuwa liamala okhubusibwa.”

[22] Mana nachinga inda yiyie, mana narula nayo okhutsia ehale

[23] Mana obululu bwokhulumwa nibumuyila hasi khushisina shiomutende, naboola mbu: “Emanyanga ndafwa kano nikashili okhunyoola, ndakhabeele ndamala okhwibililwa khale.”

[24] Omulango nikumuulila okhurula hasi wuwe, mbu: “olabeelela tawe, toto Nyasaye wuwo okhukholeele isebe hasi wuwo.”

[25] “Ne oresie abuleka wuwo eshisina shiomutende kwitsa okhulakasilia tsitende tsindayi, tsinyengu.”

[26] “Kho olie mana onywe, mana osangasie tsimoni . Ne nolola omundu yesiyesi boola mbu: “Toto esie alakane nende Omunji wetsimbabaasi okhufunga, kho inyanga yino shindalaboola nende Omundu yesiyesi tawe.”

[27] Natsia ninaye khubandu bebe namuchinjile, nibaboola mbu: “Ewe; Mariam; okholele likhuwa liamakana”

[28] Omukhana wabu Haruni ewe; Papa wuwo shiyali omundu omubi tawe nohomba Mama wuwo shiyali omuyeyi (omutamba) tawe

[29] Nabasomesilia olwala khuye (omwana oyo) Nibaboola mbu: “khwakhalomaloma khurie nende Omwana ushili indaana omutoro?”

[30] Naboola mbu: “ Toto esie endi Omusumba wa Nyasaye yambelesiye eshitabu, neyakholele okhuba Omurumwa.”

[31] “Ne yakholele okhuba weyikhabi wosi wosi wendi, ne yalachillisie (Isala) okhulaama nende okhuyinia eshihanwa (Izaka) olwemba neshili omulamu

[32] Nende okhukholela Mama wanje amalayi. Ne shiyakholele okhuba omufuru ,omubii tawe

[33] Ne omulembe kube ninasi, inyanga yandebulwa, nende inyanga yandilifwa, nende inyanga yandililamamusibwa okhuba omulamu

[34] Oyo niye Isah Omwana wa Miriam. Likhuwa liatoto, eliabakanakananga mwo

[35] Ni shikakhoyeshele khu- Nyasaye okhuba nende Omwana tawe, oluyali nolulwe, niyenya eshindu aboolanga butswa mbu: “ba!” ni shiba

[36] Netoto Nyasaye ni Omulesi wanje nende Omulesi wenyu. Kho mumulaame, ino niyo injila ilunjifu

[37] Halali emikanda chiakabukhana abeene khu beene. Kho mana eshinyasio eshikhongo shilinyoola balia abakhaya, khulwa okhuula khwe inyanga ikhongo eyo

[38] Baliwulila nebalilola obulayi buli burie inyanga yabalikhwitsila. Halali abakhayi lelo bali mubukori obwa habulafu

[39] Ne obekanyilisie inyanga yokhwiyitsulisia ebise bielikhuwa lilibusibwa, nabo bali mukhukoyana nemana shibasubilanga tawe

[40] Netoto efwe khulichelama eshialo nende bioosi bili hekulu washio. Ne balikalusibwa khwifwe

[41] Ne rumbula mushitabu shino Ibrahim, Toto ye yali owatoto muno, Omurumwa

[42] Olwa yaboolela Samwana mbu: “Ewe Papa wanje, shina shichilanga nolaama ebilawulila nende ebilalola nende ebilakhukhoonya shiosi shiosi tawe

[43] “Ewe Papa wanje; Toto bwene enyoolele obumanyi bushili okhuulilakhwo ewe. Kho nonde nditsa okhulunjisia khu injila ya habwene

[44] “Ewe Papa wanje; olalaama shetani tawe, toto shetani yaloba(amakhuwa ka Nyasaye) Omunji wetsimbabaasi

[45] “Ewe papa wanje; Toto eritsanga eshinyasio shirulanga khuwetsimbabaasi okhunyoola. Ne olaba omukholi wa shetani

[46] Naboola mbu: “Koo, Abanyasaye banje bakhusinya ewe Ibrahim? Ne nolalekha (akoboolanga ako tawe) khulakhulasa amachina. Ne undulekhwo otsie ehale mbelio.”

[47] Naboola: “umelembe kube ninawe, nditsa okhusabila Nyasaye wanje eshileshelo, toto Ye yambulilanga muno.”

[48] Nasi nditsa okhubarulakhwo, nende akamulaamanga akalali aka Nyasaye ako. Ne nditsa okhulaama Nyasaye wanje, ne shinditsa okhuba ukhola obubii nesaba Nyasaye wanje tawe

[49] Olwa yalekhana nabo nende kalia okabalaamanga akalali ka Nyasaye, khwamuhelesia Is’haka nende Yaqub, nebuli shiamulalanikhumukholaokhuba Omurumwa

[50] Ne nikhubahelesia tsimbabaasi tsiefu, ne nikhubakhola okhuba nende olulimi lwa toto olwa hekulu

[51] Ne rumbula mushitabu shino Musa, toto ye yali Omutswenufu ne yali Omurumwa, Omwayi (omunabii)

[52] Olwa khwamulanga ebuleka womukhono musatsa weshikulu, mana nikhumusitilia ahambi okhuboola ninafu mubwifisi

[53] Ne khutsimbabaasi tsiefu nikhumuhelesia omusiani wabu mbu Haruni okhuba Omurumwa

[54] Ne rumbula mushitabu shino Ismail, Toto ye yali owatoto khubulakani, ne yali Omurumwa omwayi (munabii)

[55] Ne yalomesinjia Abandu bebe iswala (okhulaama) nende izakaa (eshihanwa) Ne yali yachamilwa ewa Nyasaye wuwe

[56] Ne rumbula mushitabo shino Idris, toto ye yali owa obwatoto muno, Omurumwa

[57] Mana nikhumuchingula hekulu muno

[58] Abo nibo aba- Nyasaye wabu yabehelesia omukabo, mubarumwa mulwibulo lwa Adam, nende balia abakhwabukula halala nende Nuhu, nende olwibulo lwa Ibrahim nende Israil, nende balia abakhwalunjisia, mana nikhubaawula. Nibasomelwa tsinyali tsa Nyasaye bakwitsanga nibasujuda nibalila

[59] Halali nibabalondakhwo inyuma wabu, abarulila ababii, nibarenguya okhulaama (Iswala) mana nibaloonda obwikombi obubii, kho balinyoolana nende eshinyasio eshululu

[60] Halali balia abekanila mana nibasuubila ne nibakhola amakhuwa amalayi, Abo balinjila mwikulu neshibalikholelwakhwo obubii bwosi bwosi tawe

[61] Mumikunda chilaliwa tawe echia Nyasaye yalaka Abasumba bebe mubwifisi, toto indache ya Nyasaye yakhoole

[62] Shibaliwulilamwo amakhuwa kabula obukhala tawe halali omulembe, nebalinyoolamwo omukabo kwabu etsuli nende ingolobe

[63] Oko nikwo omukunda kwomwikulu, okwa khulichelemia Abasumba befu balia abaali nibaria Nyasaye

[64] Ne shikhwikhanga tawe halali khubunyali bwa Nyasaye wuwo. Ne ni ebibie ebili imbeli wefu, nende inyuma wefu, nende ebili hakari hao. Ne Nyasaye wuwo shiniwokhwibilila tawe

[65] Nyasaye welikulu nende eshialo, nende ebili hakari wabio. kho Mulaame Ye butswa yenyene mukhulamwa khukhwe ne olumilile. Koo mwamanyakhwo uli nende ilira shelilie

[66] Ne Omundu aboolanga mbu: “koo olwandiliba nefwile, toto ndililamusibwa ndaba omulamu

[67] Koo; Omundu shaparangakhwo mbu khwamuloonga inyuma hawo naye nalali eshindu tawe

[68] Kho, nditsuba khu Nyasaye wuwo mbu: “toto khulibakhung’asia abo halala nende amashetani, mana khulibara mumbeka mwomulilo kwa Jahanam basikame”

[69] Mana toto, khulibarusia buli mumukanda balia mubo abaloba muno Nyasaye Owetsimbabaasi

[70] Ne toto efwe khwamanya muno abakhoyeshele okhusambwamwo

[71] Ne abulao yesi yesi mwinywe okhula aliulakhwo (khu Jahanam) Ne kali khu Nyasaye wuwo kamala okhubusibwa

[72] Mana khulihabina balia bamuria, nekhulilekhamwo ababii nibopele amasikamo

[73] Ne nibasomelwa tsinyali tsiefu tsili habulafu, abakhayi baboolelanga abasuubili mbu: “Nimukanda shina khuchibili chino kuli nende eshimenyo eshilayi nende Abandu boluyali

[74] Ne emikanda chinga chiakhwasishia imbeli wabu khumika chiabura chiali nende amarone amalayi muno nende habundu alayi muno

[75] Boola: “Balia bali mubukori, Nyasaye yetsa okhubametela ebise ukhula balole akabekanyilisibwa, eshinyasio nohomba indukho yilia. Awo nabalimanya niwina weshimenyo eshibii nende owa abalwaani abateshele

[76] Ne Nyasaye amatelanga obulunjifu balia abalunjikha. Ne abikhole ebilayi bitong’anga ni obulayi muno khumurungo ewa Nyasaye wuwo, ne ni amakalusio amalayi

[77] Koo; Walolakhwo ulia owakhaya ebimanyisio biefu mana noboola mbu: “Toto esie nditsa okhuhebwa omwandu nende Abana?”

[78] Koo ye anyolele amakhuwa kefisa, nohomba Nyasaye yamulaka

[79] Shikari kario tawe, khwitsa okhuhandika akaboolanga, ne khulamumeta ebise bieshinyasio bumeta

[80] Ne khulimuhelesia akaboolanga ako, ne alikhwitsila nali yenyene

[81] Ne bekholela abanyasaye baandi habundu wa Nyasaye, mbu khobanyoole amani (oluyali)

[82] Shikali kario tawe, balikana okhulamwa khwabu ne baliba abasuku babu

[83] Koo, shimulolangakhwo mbu efwe khwaruma amashetani khubakhayi, ababaretsangamwo amaani kokhukhola amabii

[84] Kho alabayuyukhanila tawe, efwe khubabalilanga tsinyanga tsiabu

[85] Inyanga yakhulikhung’asia abaria Nyasaye okhubayila khuwetsimbabaasi babe abachenibe

[86] Ne khulichomia ababii mumulilo kwa Jahannam, nibali nende omwalakho omunji

[87] Shibaliba nende obunyali bwokhusabila abandi eshileshelo tawe halali balia bakhola indakano khu Nyasaye (omunji westimbabaasi)

[88] Ne baboola mbu: “ Nyasaye (Omunji westimbabaasi) ali nende Omwana.”

[89] Toto mwarera likhuwa liokhusinya muno

[90] Likulu likhaba okhukhalikha nende liloba okhwarukha nende tsingulu okhukwa ebitonyetonye

[91] Khulwa okhuboola mbu Nyasaye (omunji wotsimbabaasi) ali nende Omwana

[92] Ne shikakhoyeshela Omunji Wetsimbabaasi okhuba nende Omwana tawe

[93] Abulaho yesiyesi khubali mwikulu nende mushialo halali alitsila Nyasaye (omunji wetsimbabaasi) nali Omusumba

[94] Yamala okhubamanya ne yababala abulayi

[95] Ne buli shiamulala alimwitsila Ye (Nyasaye) inyanga yeyindukho yenyene

[96] Netoto balia basuubila mana nibakhola amalayi Nyasaye (omunji wetsimbabaasi) alibakholela obunyanzi

[97] Netoto khwakhutoratoselia (Ikurani) khulusungo lulwo, kho osuubisie khuyo abaria Nyasaye, ne wikanyilisie khuyo Abandu bayingananga

[98] Ne emikanda chinga echia khwasishia imbeli wabu? ololangakhwo mulala khubo Nohomba abawulilanga kho nibemonya

[1] Ta’ha

[2] Shikhwakhwishilia Ikurani mbu khonyoole obutinyu tawe

[3] Halali ibe ametsulisio khu ulia uwihotselesia

[4] Ameshelo karulanga khu ulia owalonga liloba nende likulu lili hekulu

[5] Niye Nyasaye Owetsimbabaasi, Owaleng’aana khushisala shishie shioluyali

[6] Nebibie ebili mwikulu nende khushialo nende bili hakari wabio, nende ebili hasi weliloba

[7] Ne nolomaloma hekulu,(nohomba yahasi) toto ye yamanya akefisa nende akali mubwifisi muno

[8] Nyasaye abulaho ulaamungwa khubwatoto halali Ye ne ali nende ameera amalayi

[9] Ne koo, wawulilakhwo olukano lwa Musa

[10] Olwa yalola omulilo, mana naboolela Abandu bebe mbu: “Linde mbeli, esie toto endutsi omulilo, ndakhaba endio ndabarerera eshichenga shiomulilo oko, nohomba enyala okhunyoola khumulilo oko obulunjifu.”

[11] Olwa yakuulakhwo, yalaangwa: “ Ewe Musa;”

[12] Toto esie nesie Nyasaye wuwo omulesi, kho rusia ebilaro bibio, toto ewe oli mulitwoma lioluyali elia Tuwa

[13] Ne esie ekhuloboole, kho wulila, akofimbulilungwa

[14] Toto esie nesie Nyasaye abulaho ulaamungwa khubwatoto owulali esie, kho unaame ne olumilile khuswala khulwokhunzitsulila

[15] “Toto indukho itsia okhuula, ndenya okhuyifisa katong’ane, kho buli omundu arungwe khukalia akayakholanga.”

[16] Kho balakhwikalila okhusuubila, balia abalasuubilanga abaloondonga butswa obwikombi bwe emioyo chiabu abeene oletsa wasikha tawe

[17] Ni shina esho shili mumukhono kukwo omulunji ewe Musa

[18] Naboola Mbu: “Ino ni indabushi yanje yandisililangakhwo, ne eyikwisilinjia amasafu ke ebiayo bianje, ne khandi echikhonyelanga khumilimo chindi.”

[19] Nyasaye naboola mbu: “Isukune hasi ewe Musa”

[20] Mana nachisukuna, nikalukhana inzukha imoolanga tsimbilo

[21] Nyasaye naboola mbu; “Ibukule ne olaria tawe, bulano buri khulayikalusia shingala ibeele.”

[22] Ne ore omukhono kukwo mukwaya, kularula nikuli omulafu tswe, kubula obubii bwosi bwosi, shino ni eshimanyisio shindi

[23] Kho khukhwechesie ebimanyisio biefu ebikhongo

[24] Tsia khu Firaun, Toto ye yabura eshichelo

[25] Naboola mbu: “ Ewe Nyasaye wanje mbangulile eshilifu shianje

[26] Ne okhole amakhuwa kanje okhuba eshichelo. amaangu

[27] Ne okasie okhuboyokana khwolulimi lwanje

[28] Banyoole akhuwulila amakhuwa kanje

[29] Ne ukholele omukhoonyi okhurula mubandu banje

[30] “Omusiani wefu Haruni.”

[31] Undemo amani okhumwikhonyela ye

[32] Ne umure halala khumilimo chianje chino

[33] Kho khunyoole okhukwitsoomia muno

[34] Ne khukhurumbule mubunji

[35] Toto ewe okhulolanga

[36] (Nyasaye) Naboola mbu: Toto ofuchililwe amasayo koko ewe Musa

[37] Ne toto khwakhukholela obulayi khandi olundi

[38] Olwa khwafimbulila mama wuwo kalia akakhwamufimbulila

[39] Mbu mure mwisanduku, mana olire mumwalo, mana omwalo kulamusukuna khulukuku, anyoole okhubukulwa nende omusuku wanje khandi nende omusuku wuwe, ne ekhureremwo obuyanzi okhurula khwisie, ne mbu olelwe mutsimoni tsianje

[40] Olwa omukhana wenyu yatsia naboola mbu: “ koo abechesiekhwo Omundu unyala okhumulela? Mana nikhukhukalusia khu mama wuwo kho tsimoni tsisie tsisangale ne kho alabeelela tawe. Ne wera Omundu mana khwakhuhabina okhurula mushibeela, mana nikhukhutema amatemo amanji, ne niwikhala emika eminji halala nende Abandu ba Madyan mana khandi witsile shingala walachilwa ewe Musa

[41] Ne ekhuloboole khulwa esie omwene

[42] Tsia ewe nende omusiani wenyu halala nende ebifune bianje, ne mulachonya okhunzitsulila tawe

[43] Tsie khu Firauni, toto ye yaburirira

[44] Mumuboolele amakhuwa amalayi, yakhaaba ario yatila amachelo nohomba yaria

[45] Nibaboola mbu: “ewe Nyasaye wefu; efwe toto khuritsanga aletsa yakhuburirirakho eshichelo nohomba yakhufurirakhwo.”

[46] (Nyasaye) Naboola mbu; “Mularia tawe, toto endi halala ninanyu, ewulilanga ne endolanga.”

[47] “ Tsie mana mumuboolele mbu: “Toto efwe khuli Abarumwa ba Nyasaye wuwo. Kho khuleshele Abaana ba Israil barule halala ninafu ne alabasandia tawe. Toto khukhwitsile nende ebimanyisio birula khu Nyasaye wuwo. Ne omulembe kulaba khubalia baloondanga obulunjifu.”

[48] Toto efwe khurererwe obufimbuli, mbu eshinyasio shilanyoola balia abayingasinjia nende okhufutarira omukongo

[49] Naboola mbu: “Nyasaye wenyu ni wina, ewe Musa? ”

[50] Naboola mbu: “Nyasaye wefu ni ulia uwahelesia buli eshindu ifwani yashio mana nashilunjisia.”

[51] Naboola mbu: “Ne Babura balia baliba barie?”

[52] Naboola mbu: “Obumanyi bwako buli khu Nyasaye wanje mushitabu, Nyasaye wanje shakoranga nohomba shiyebililanga tawe.”

[53] “Ulia wabakholela liloba okhuba obulili, nabarereramwo injila, mana niyeshia amatsi okhurula hekulu, ni khu ako nikhumesiliakhwo emimela chikabukhaane.”

[54] Lie ne mulisie ebiayo bienyu, toto mukano khuli nende ebimanyisio khubandu bobwongo

[55] Okhurula khulino(liloba)khwabaloonga ne mulio khulibakalusiamwo, ne mulio khulibarusiamwo khandi . (mube abalamu)

[56] Ne toto khwamwechesia ebimanyisio biefu biosi, halali yayingana nakhaya

[57] Naboola mbu: “witsile okhurusia khushialo shiefu khubulosi bubwo, ewe Musa?”

[58] “Mana efwe khwitsa okhurerera ubulosi shinga obo. Kho khure hakari wefu ebise, biokhubukanana, ebia khulafunaka efwe nohomba ewe tawe. Abe habundu halayi

[59] (Musa) Naboola mbu: “Ebise bienyu ni inyanga yoburone. Ne Abandu bakhung’asibwe itsuli.”

[60] Mana Firauni nakalukha mana nakasia emiare chiche, mana niyetsa

[61] Musa nababoolela mbu: “Abaane enywee; mulachishila Nyasaye obubeyi tawe, yakhetsa yabamala nende eshinyasio , ne toto yamala okhubiyilwa ulia uchikhanga.’’

[62] Kho mana nibasolana khulwa makhuwa ako abeene khubeene, mana nibasanjilana mubwifisi

[63] Nibaboola mbu:“Toto Abandu bano ni abalosi, benya okhubarusia mushialo shienyu khu bulosi bwabu, ne benya okhurusiaho enjila yenyu yabulamu indayi po.”

[64] “Kho lano busie halala ebifwanga bienyu biosi mana mwitsie nimuli khulunyaali, netoto Nyanga yino ulashila niye witsa okhuba hekulu.’’

[65] Nibaboola mbu: “ewe Musa, ewe newe ularanjilila okhusukuna nohomba efwe khuranjilile?”

[66] Naboola mbu: “Enywe ranjilile.” Mana emikoye chiabu nende tsidabushi tsiabu nitsilolokhana khuye mubulosi bwabu mbutsichendanga

[67] Mana Musa niyenjilwamwo oburi mumwoyo kukwe

[68] Nikhuboola mbu: “Olaria tawe, toto ewe newe witsa okhushila,”

[69] “Kho sukuna shili mumukhono kukwo omusatsa, shitsa okhumila biabakasiyie ebo. Toto bakasiye butswa ebifwanga biobulosi, ne Omulosi shaburangakhwo wosiwosi watsila tawe.”

[70] Mana abalosi boosi nibakwa hasi okhwinama nibaboola mbu: “Khusuubile khu Nyasaye wa Haruni nende Musa.”

[71] (Firauni) Naboola mbu: “Ehh; mumusuubile neshili okhubafuchilila. Toto ye niye Omukhongo wenyu owabechesia obulosi. Kholano nditsa okhubateta emikhono chienyu nende amakulu kenyu buchikha ne nditsa okhubabaamba khumisala chietsitende, ne mulamanyakhwo mbu niwina mwifwe omululu weshinyasio shiokhutsililila

[72] Nibaboola mbu: “shikhulalobola ewe tawe okhushila ebimanyisio bili habulafu bikhwitsile. Khwitsuba khu ulia wakhuloonga (shikhulakhulobola tawe) kho kholakhwo shiosi shiosi shia wenya okhukhola. Ewe Onyala okhurusia shibura shilondokhana nende obulamu bwokhushialo khuno butswa.”

[73] “Toto efwe khusuubile Nyasaye wefu kho akhuleshele abionono biefu nende okokhunichilisiye kano mubulosi. Ne Nyasaye nomulayi khandi niwokhubaho tsinyanga tsiosi.’’

[74] Toto ulia ulitsa khu Nyasaye wuwe, nali mbu niwamabii, toto alinyoola omulilo kwa Jahanamu, shalifwamwo tawe nohomba shalimenyamamwo (obulamu obulayi tawe)

[75] Ne ulia ulimwitsila nali omuusubili owakhola ebikhole ebilayi, abo nibo balinyoola ebisaala biehekulu

[76] Emikunda chilaliwa tawe, chiburangamwo hasi wachio emialo, balimenyamwo tsinyanga tsiosi. Ne oko niko omurungo kwa buli ulia wetswenula

[77] Ne toto khwafimbulila Musa, mbu: “Orule nende Abasumba banje, ne obakholele Injila yokhulukongo inyumu munyanza, olaria okhunyoolwa nohomba alaria shiosi shiosi tawe.’’

[78] Firauni nabalondakhwo halala nende omukanda kukwe kwabalwani, mana nikabanyoola munyanza omo akabanyoola

[79] Mana Firaun nakosia Abandu baye, ne shiyabalunjisia tawe

[80] Enywe Abana ba Israil, toto efwe khwabahabina okhurulana nende abasuku benyu, mana nikhumulaka mbu mwitse ebuleka womukhono musatsa weshikulu shia Tur, mana nikhubeshilia manna nende salwa

[81] Lie mubilayi bilia ebiakhubakabile, ne mularuuma olwakho khu ako tawe, liruma lianje liakhetsa liabatila. Ne ulia weliruma lianje linyoola alaba amalile okhusikha

[82] Ne toto esie endi wokhuleshela muno khu ulia owusaba eshileshelo mana nasuubila mana nakhola amalayi mana natila obulunjifu

[83] Nenishina shiakhuyungubasia, nolekha Abandu bobo ewe Musa

[84] Naboola mbu: ‘‘Bali inyuma wanje banondangakhwo, ne ekholele lwangu okhwitsila Nyasaye wanje, kho onyoole okhumba obuchami (bwo)

[85] (Nyasaye) Naboola mbu: “khuhelesiye Abandu bao amatemo ewe niwakharula, ne Omusamaria abakosiyie.”

[86] Mana Musa nakalukha khu Bandu bebe nasinyishe nabeelele. Naboola mbu: “Enywe abandu banje Nyasaye wanje shiyabalakakhwo indakano indayi? Koo ebise ebo bimurambiyile ebiamalakano ako nohomba mwenyele mbu lirumwa okhurula khu Nyasaye wenyu libeshele, khulwendio mufunache indakano yanje

[87] Nibaboola mbu: “efwe shikhufunache indakano yiyio khukhwenya khwefu tawe, halali efwe khwatukhwa emisiko chiebirone biabandu, mana nikhuchisukuna (mumulilo) (nichisalulukha nichikasia eshifwanani shia Nyasaye.) Na endisa nilwa Omusamaria yarusia amachelo.’’

[88] Mana nabakasiliamwo eshimosi, shilikho eshikhuli shirusinjia oluyoka. Mana nibaboola mbu; “Uno niye Nyasaye wenyu nende Nyasaye wa Musa, halali (Musa) yebilila.”

[89] Koo, shibalolakhwo mbu (eshimosi esho) sishibakalusinjia likhuwa tawe, nohomba sishiakhabakhola shiosi shiosi tawe nohomba okhubakhoonya

[90] Ne Haruni yababoolela khale awo mbu; “Enywe Abandu banje, toto enywe mutemelwe sa nende kano. Ne toto Nyasaye wenyu ni ulia owetsimbabaasi. Kho munoonde ne muwulile amakhuwa kanje.”

[91] Nibaboola mbu; “Shikhulalekha okhushilaama tawe okhula shingala Musa alachelela.’’

[92] (Olwa Musa yachelela) Yaboola mbu: “Ewe Haruni nishina shikhukayile (ukhunoonda) shingala obalutsi nibakorere?”

[93] ‘‘Shiwunoondakho tawe? nohomba olobele likhuwa lianje?’’

[94] (Haruni) Naboola mbu; “Ewe Omwana wa mama wanje, olakhwesa tsindefu tawe nohomba omurwe kwanje tawe. Toto esie ndaria mbu oletsa waboola mbu esaakulile Abana ba Israil.’’

[95] (Musa) Naboola; “Ewe Omusamaria; obele orie ukhula okhukhola kano?”

[96] Naboola; “Endutsi kabalalolanga tawe shakwalala. mana nendila ebuleka inditi yo mulukha kwo Murumwa. Mana nesukuna. Ne endio nilwa omwoyo kwanje kumboolele.’’

[97] (Musa) naboola mbu; “mana rula tsia,! ne toto kalaba khwiwe mubulamu bwao bwokhushialo okhuboola mbu: “olandilakhwo tawe’” ne toto oli nende indakano eyilalifunakwa tawe. Ne khahengekhwo Nyasaye wuwo owotsilile okhumulaama, toto khwitsa okhumusamba mana khulamwibisia munyanza akoreremwo

[98] Toto Nyasaye wenyu ni Allah (Nyasaye), ulia uli mbu abulaho ulaamungwa khubwatoto halali Ye. Yaswania buli eshindu obumanyi

[99] Ne endio nilwakhukhukanilanga khumakhuwa kali imbeli wuwo, Ne toto khwakhuhelesia ametsulilo okhurula khwifwe

[100] Balia betsa okhuba ehale ninako, toto abo balichinga inyanga yeyindukho emisiko

[101] Balimenyamwo tsinyanga tsiosi, ne ni obubii buli burie khumundu inyanga yeyindukho okhuchinga emisiko echo

[102] Inyanga yolwika lulikhupwa, ne khulikhug’asia aboononi inyanga eyo tsimoni tsiabu nitsikalukhane (khuburi)

[103] Balimonyaniamwo abeene khubeene, nebaliboola mbu: “shimwekhala khushialo halali tsinyanga ekhumi butswa”

[104] Efwe khumanyile muno akabaliboola, Olwa abalayi mubo baliboola mbu: “Enywe shimwekhalamwo halali inyanga ndala yonyene.”

[105] Nebakhurebanga amakhuwa ketsingulu, boola mbu: “Nyasaye wanje alitsisia masia.”

[106] Ne alitsilekha shinga eshikuri

[107] Sholilolamwo eshikholomokho noho eshitulo tawe

[108] Inyanga eyo balilonda khumulanji owubula ubokori, ne emioyo chilihotselesia khu Nyasaye Omunji wetsimbabaasi, ne sholiwulila halali tsimbindo tsiebilenje

[109] Inyanga eyo khubulaho ukhusabilwa khwosi khwosi halali khu ulia wachamilwa nende Nyasaye, umunji wetsimbabaasi mana afuchilile likhuwa lilie

[110] Yamanya akali imbeli nende akali Inyuma wabu. Nabo shibanyala okhumumanya obulayi tawe

[111] Ne obweni bulitutuyila Omulamu Ulafwitsanga tawe, Netoto baliba nibabiyilibwe boosi balia bachinga obubii

[112] Ne ulia ukhola amalayi niyasuubila kho shaliria okhukholelwa obubii nohomba okhwimwa eshishie tawe

[113] Ne endio nilwakhweshia Ikurani mulwarabu, ne nikhwinoosiamwo emekanyilisio ketsimbia tsiosi khobanyoole okhuria, nende okhwilinda ne ibarerere ametsulisio

[114] Ne toto Nyasaye niwoluyali owehekulu, Omwami watoto, ne olayuyukhanila Ikurani (okhusoma) obufimbuli bwayio nibushili okhuwa. Ne boola mbu: “Nyasaye wanje umeete obumanyi.”

[115] Ne toto khwalaka Adam khale indache, mana niyebilila, ne shikhwalola khuye lichomo likhongo tawe

[116] Ne olwa khwaboolela Abamalaika mbu mwinamile Adam, boosi nibamwinamila halali ibilisi, yaloba

[117] Ne nikhuboola mbu: “Ewe Adam, toto uno ni omusuku wuwo nende womukhasi wuwo, kho alabayinia mumukunda tawe mwaba khubutinyu.”

[118] Toto ewe sholawulilamwo inzala tawe nohomba okhuba eshiekenyi tawe

[119] Ne toto ewe sholiwulilamwo obulo tawe nohomba oluya

[120] Mana shetani namubeyiabeyiamwo, namuboolela mbu: “ewe Adam okhumanyiekhwo omusala kwokhumenya tsinyanga tsiosi nende obwami bulawa tawe

[121] Mana nibalia khumusaala oko, mana eshiekenyi shiabu nishibaloleshela. Nibachaka okhwifimba amasafu komumukunda omo. Mana Adam nakosela Nyasaye wuwe nokora injila

[122] Mana Nyasaye wuwe namwawula namuhelesia eshileshelo ne namulunjisia

[123] Naboola mbu: “yishemwo mwesi, nimuli abasuku abeene khubeene, ne obulunjifu okhurula khwisie nibuboolela, ulia ulalonda obulunjifu bwanje shalikora nohomba shalisanda tawe.”

[124] Ne ulia ura emukongo obwitsulisio bwanje alaba nende eshimenyo shiobusandi ne inyanga yeyindukho alilamusibwa nali omuwofu

[125] Aliboola mbu: “Nyasaye wanje khulwashina niwunamusia nendi omuwofu ne ndali nendolanga

[126] Namuboolela mbu: “Endio nilwabiakhwitsila ebimanyisio biefu nawe nobibilila kho kata wesi inyanga yino wibililwe.”

[127] Ne endio nilwakhurunganga ulia waburirisia eshichelo nende ulasuubilanga ebimanyisio bia Nyasaye wuwe tawe, ne eshinyasio shiomwikulu ne eshilulu muno eshilawa tawe

[128] Shibalolangakhwo ni emikanda chinga chia khwasishia chiachendanga mutsingo tsiabu, toto mukano khulimwo nende ebimanyisio khubandu bamachesi

[129] Nelikhayanga okhuba likhuwa liaranjilila okhurula khu Nyasaye wuwo, nende ebise biarebwaho, toto eshinyasio shiakhoolele (shiokhusishia aboononi abo)

[130] Kho wisumilisie khukababoolanga, ne witsoomie oluyali lwa Nyasaye wuwo eliuba nilishili okhurula nende nilishili okhukwa, nende ebise bieshilo biosi omwitsomie nende hakari weshitere wakhaba orio khowanyoola akakhuchamisia

[131] Ne olakhondiola tsimoni tsitsio khubwokholo bwa khwakholela abaandi mubo tawe oburone bwobulamu bwokhushialo kho khunyoole okhubatemamwo, Ne omukabo kwa Nyasaye wuwo ni omulayi kulaliwa tawe

[132] Ne lomesia Abandu bobo okhulumilila okhulaama Iswala ne otinyilisie omwene hawo, shikhukhusabanga omukabo kwosi kwosi tawe, nefwe khukhukabilanga ne indukho indayi ni khu ulia uli noburi (khu Nyasaye)

[133] Ne baboola mbu: “shichila shina nalakhwitsila nende eshimanyisio okhurula khu Nyasaye wuwe?” Koo shibiabetselakhwo ebimanyisio ebia habulafu ebili mubitabu biakhale

[134] Ne khubasishinjia khushinyasio Omurumwa oyo nashili okhwitsa, bakhaboolele mbu: “Ewe Nyasaye wefu, shichila shina nolakhurerera Omurumwa, khwaloonda ebimanyisio bibio, nikhushili okhututuyibwa endi, nende okhunyoola tsisoni

[135] Boola mbu: “Buli mulala alindanga (omurungo kukwe) kho nakhalinde, muletsa okhumanya ahambi hano mbu ni babu wina abali khunjila ya habwene ne babu wina balunjikha.”

[1] Okhukhung’asibwa khwabandu khuli ahambi nabo bali mukhung’ang’ala nibalechele

[2] Ne shikabetselanga amachelo amacheni okhurula khu Nyasaye wabu halali bakawulilanga nibakakholela omubayo

[3] Emioyo chiabu chakosania, mana bamonyananga balia abamabii mbu: “uno niwina halali ni Omundusa shinga enywe, koo mwitsanga khubolosi nanyu nimulola?”

[4] Yaboola mbu: “Nyasaye wanje yamanya akaboolungwa mwikhulu nende khushialo naye ni omuwulili umumanyi muno.”

[5] Halali (abakhayi) baboola mbu: “ (aka aboolanga ako) ni amalooro katsokaana, halali akakasinjia omwene, ye ni omwimbi, kho akhurererekhwo eshimanyisio shingala Abarumwa aba ambeli.’’

[6] Ne abalaasubila abali imbeli wabu okhurula buli mulukongo khwabasishia. Koo kho bano balasuubila

[7] Ne shikhwaruma imbeli wuwo halali abasatsa bakhwafimbulilanga, kho rebee Abandu betsulilanga nikali mbu shimumanyile tawe

[8] Ne shikhwabakholela (Abarumwa abo) emibili chilalia ebilibwa tawe ne shibali nibamenya tsinyanga tsiosi tawe

[9] Mana nikhubakholela toto indache yabu, mananikhubahabinanendeabakhwachama, ne nikhusishia ababura eshichelo

[10] Toto khwabeshilia eshitabu eshilimwo ametsulisio kenyu. Koo shimuparangakhwo tawe

[11] Ne ni tsingongo tsinga etsiakhwanyasia etsiali nitsikholanga amabii, mana nikhuloonga inyuma wabu Abandu bandi

[12] Ne olwa balola eshinyasio shiefu, mana hawo nibachaka okhwilukha

[13] Mulelukha tawe, kalukhe khubwokholo bwenyu, nende mubimenyo bienyu khomunyoole okhureebwa

[14] Baboola mbu: “abaane toto efwe khwali abamabii.”

[15] Ne nibatsililila okhulila khwabu okho okhula shingala khwabakhola shinga babererwe basimile (bafwile)

[16] Ne nishikhwalonga likulu nende eshialo nende ebili hakari wabio khumubayo tawe

[17] Nekhwenyanga okhukhola omubayo, khwakhekholele efwe abeene, (sikhwakhabarere hakari tawe) toto khubetsanga abakholanga omubayo

[18] Halali khusukunanga abwatoto khububeyi mana nibufunaka (obubeyi obo) niburulaho, ne toto muli nende eshinyasio eshilulu shibalindanga khukamuboolanga kano

[19] Ne ni ebibie bioosi bili mwikulu nende khushialo, ne abali ewuwe shibafuranga okhumulaama nohomba shibachonyanga tawe

[20] Bamwitsominjia eshilo neshitere ne shibachonyanga tawe

[21] Nohomba banyoola Abanyasaye khushialo abalamusinjia

[22] Abanyasaye bandi babetsangamwo (mwikulu nende khushilalo) abalali Nyasaye tawe toto hawo (likulu nende eshialo) biakhabiyile. Ne oluyali lwoosi ni lwa Nyasaye, Omwami we shisaala (Arsh) ali ehale nende akabamuboolangakhwo ako

[23] Shareebungwa akakholanga tawe nabo balirebwa

[24] Nohomba bekholela Abanyasaye bandi abalali Nyasaye tawe? Boola mbu; “Rere ebifune bienyu, kano ni ametsulisio ka bano abali halala ninasi, nende ametsulisio khu balia abali inyuma wanje” Halali abaanji mubo shibamanyile obwatieli tawe, kho mana shibakabukulilangamwo oluchendo tawe

[25] Ne shikwarumakhwo Omurumwa yesiyesi imbeli wuwo halali khwamufimbulila mbu: “ abulaho ulaamwa halali esie, kho munaame”

[26] Ne (abakhayi) baboola mbu: “Nyasaye omunji wetsimbabaasi ali nende Omwana” obutwenufu nobubwe, halali ni Abasumba aboluyali

[27] Shibamuranjililangakhwo khulikhuwa tawe, nabo bakholanga amalomesio keke

[28] Amanyile akali imbeli wabu nende inyuma wabu, neshibasabilanga halali ulia wa Nyasaye achamile, nabo behotselesinjia khulwa okhumuria

[29] Ne ulia uboola mubo mbu: “esie endi Nyasaye owulali Ye,” Kho oyo khwitsa okhumurunga Jahannamu- ne endio nolwakhurunganga abamabii

[30] Ko shibalolangakhwo abakhayi mbu likulu nende eshialo biali biatilana, mana nikhubikabukhasia, ne nikhukhola okhurula khumatsi buli eshindu okhuba eshilamu, kho mana shibakhasuubilanga

[31] Ne nikhura khwiloba ebikulu kho (liloba) lilababeyiabeyia tawe, ne nikhuramwo tsinjila, khobanyoole okhulunjikha

[32] Ne nikhukhola likulu okhuba eshitsafu eshialindwa, halali bo babulilanga oluchendo ebimanyisio bibie

[33] Naye niye owaloonga eshilo nende eshitere nende eliuba nende omwesi, bioosi bibenganga khulunyaali lwabotokhana nibimwitsoomia

[34] Nafu shikhwakholelakhwo Omundu yesiyesi imbeli wuwo okhumenya tsinyanga tsiosi tawe, kho koo ewe nofwa kho nabo nibo balimenya tsinyanga tsiosi

[35] Buli Omundu alipila lifwa, nekhulabatema khumabii nende amalayi, ne khwifwe niwa mwesi mulikalusibwa

[36] Ne abakhayi nibakhulola shibakhukholelanga eshindu tawe halali omubayo, mbu: “Koo uno niye uboolanga khubanyasaye benyu (khububii)?” Ne bo nibo abakhayanga Nyasaye wetsimbabaasi

[37] Omundu yalongwa nende libaa lwokhuyungubala. Hambi hano nditsa okhubechesia ebimanyisio bianje khomulayungubasia tawe

[38] Ne baboolanga mbu: “akabakhulakanga kano kaliba lina? toto nimuli mbu muboolanga akatoto?”

[39] Abakhayi bamanyagakhwo ebise biabalikhaywa okhwikalila omulilo khu bweni bwabu kata nende khumikongo chiabu, neshibalikhoonywa tawe

[40] Ne kuliboolela mapwoka, baliliibwa ing’anga nebaling’ang’asibwa neshibalinyala okhukukalusia tawe, ne shibalihebwa obwiyangu tawe

[41] Netoto Abarumwa imbeli wuwo bakholelwa omubayo, kho balia abakholanga omubayo mubo kalibanyoola kalia akabakholelanga omubayo

[42] Boola mbu: “Niwina unyala okhubalinda eshilo nende eshitere okhurulana nende (eshinyasio esha) Owetsimbabaasi?” Halali bo okhwitsulila Nyasaye wabu kababulila oluchendo

[43] Koo, bali nende Abanyasaye babalindanga abalali efwe? Shibanyala okhwikhonya abene tawe (Abanyasaye abo) Ne shibalilindwa ninafu tawe. (nikhwenya okhubasandia)

[44] Halali khwelesia obwokholo bano nende bapapa babu, okhuula obulamu bwabu niburambiya, khu ako. Ne koo, shibalolangakhwo mbu efwe khutilanga liloba liabu nikhututuyia tsimbeka tsialio? Kho koo, bo nibo balishila

[45] Boola mbu: “Esie ebekanyilisinjia khubufimbuli. Ne Abatimbe shibawulilanga omulango nibekanyilisibwa tawe.”

[46] Ne batilungwa nende eshikhupo shilala butswa shie shinyasio shia Nyasaye wuwo, toto bakhaboolele mbu: “Eee baane efwe, toto khubeele Abandu ababii.”

[47] Nafu khuliraho ebichelo biobuleng’afu inyanga yeyindukho, ne Omundu yesiyesi shalikholelwa obubii kata hatiti tawe, kata likhuwa elo nilili nende obusiro obutiti shinga olufwa lwa khardal,(olufwa lwelitoto) nafu khuyela okhuba abamanyi bokhubala

[48] Netoto khwahelesia Musa nende Haruni eshiawukhasia nende obulafu nende amebaalo khubalia baria Nyasaye

[49] Balia baritsanga Nyasaye wabu khukefisile, ne bo khandi baritsanga inyanga yeyindukho

[50] Ne buno ni obwitsulisio bwetsimbabaasi obwakhwabeshilia. Kho enywe mubwikananga

[51] Netoto khwahelesia Ibrahim obulunjifu bubwe khale awo, nekhwali khwamumanya muno

[52] Olwa yaboolela Samwana nende Abandu bebe mbu: “Ni shina ebifwanani bino ebia mwikhalilanga ebise biosi (okhubilama)?”

[53] Nibaboola mbu: “ khwanyoola bapapa befu nibabilamanga.(kho mana fwesi khubilamanga).”

[54] Naboola mbu: “Toto enywe nende basenywe mwali mubukori obuli habulafu.”

[55] Nibaboola mbu: “Koo okhwitsile khubwatoto nohomba oli mubalia bakholanga emibayo?”

[56] Naboola mbu:”(shikali kario tawe) halali Nyasaye wenyu ni ulia omwene likulu nende eshialo neniye owabiloonga. Nasi endi mulala khubaloli bakano.”

[57] Ne nditsuba khu Nyasaye mbu nditsa okhukhola eshifwanga khu ebifwanani bienyu bino nimwakhamala okhufutarira okhutsia

[58] Mana nabitonyatonya ebitonye halali eshifwanani eshikhongo shiabu kho banyoole okhushikalushila

[59] Baboola mbu: “Niwina okholele kano khubanyasaye befu? Toto uno ali mubandu bamabii muno.”

[60] Nibaboola mbu: “Khuwulile Omusiani mulala nabarumbulanga. Alangwa mbu Ibrahim.”

[61] Nibaboola mbu: “Nakhamumurere imbeli mutsimoni tsia Abandu, banyoole okhwilolela.”

[62] Nibaboola mbu: “Koo; newe ukholele ori Abanyasaye befu ewe Ibrahim?”

[63] Naboola mbu: “Tawe, halali ukholele ni omukhongo wabu oyo, kho mubareebe toto nikali mbu banyala okhulomaloma.”

[64] Nibekalushila abeene, nibaboola mbu; ‘Toto enywe muli Abandu bamabii.”

[65] Mana nibenamia emirwe chiabu, (nibaboola mbu;) toto wamanya mbu bino shibilomalomanga tawe.”

[66] Naboola mbu: “Koo mulaamanga habundu wa Nyasaye ebilabakhoonya shiosi shiosi nohomba okhubakhola obubii tawe?”

[67] Ooh (eshifimbwa murwe) khwinywe nendu ebiamulaamanga habundu wa Nyasaye, koo shimuparangakhwo

[68] Nibaboola mbu: “Mumusambe mumulilo ne muhabine Abanyasaye benyu, toto nimuli abokhukhola likhuwa.”

[69] Khwaboola mbu: “ Ewe omulilo, ba omunyifu nomulembe khu Ibrahimu.”

[70] Ne bamwenyela amabii, mana nikhubakhola nibaba nibo bokhunyoola obusishi

[71] Ne nikhumuhabina ye nende Luti nikhubayila khuliloba aliakhwaramwo tsimbabaasi, shichila ebiloonje. (sham)

[72] Mana nikhumuhelesia Is-haka(okhuba omwana wuwe) nende Yaqub okhuba omwitsukhulu, ne boosi nikhubakhola okhuba abalayi

[73] Nenikhubakhola okhuba abemilisi abemililanga khulikhuwa liefu, ne nikhubafimbulila okhukhola amalayi, nende okhulumilila okhulaama nende okhurusia eshihanwa. Ne bali abehotselefu khwifwe

[74] Ne luti nikhumuhelesia oburuchi nende obumanyi, ne nikhumuhabina okhurulana khulukongo olwakholanga amabii , toto bo bali Abandu ababii, abafunachi bamalako

[75] Ne nikhumwinjisia mutsimbabasi tsiefu, toto ye yali mubakholi bamalayi

[76] Ne Nuhu alwoyalanga imbeli awo nafu nikhumufuchilila, nikhumuhabina ye nende Abandu bebe khubutinyu obukhongo

[77] Mana nikhumuhabina khubandu bayingasia ebimanyisio biefu. Toto abo bali Abandu ababii mana nikhubasishia boosi

[78] Nende Daudi nende Suleiman , olwa benya okhukhalaka eshina okhulondokhana nende omukunda , olwa balisiamwo tsimbusi tsiabandu eshilo, nafu mubukhalachi bwabu obo khwali abaloli

[79] Nikhumanyia Suleiman (okhushila omukofu wuwe Daudi.) Nebuli mulala wabu nikhumuhelesia obukhalachi bweshina, nende obumanyi. Ne nikhukhola Daudi nende tsingulu okhuba nende oburechelefu khwifwe, halala nende amayoni okhumwitsoomia (Nyasaye) ne endio nilwakhwakhola

[80] Ne nikhwechesia Daudi okhukasia tsingubo tsienyu tsieliyie, kho tsibalinde okhurulana nende obulwani bwenyu. koo enywe shimuli bakhupa orio tawe

[81] Ne Suleiman (nikhukhola) omuyeka kweyimbumbuyeka okhumuwulila kuwutsanga khukhulomesia khukhwe khushialo eshiakhwaramwo tsimbabaasi, nafu nefwe abamanyi babuli eshindu

[82] Ne nikhumukholela amashetani akeyibilanga munyanza okhumurerera ebisole(lulu), nebamukholelanga emilimo chindi chilali echo , ne efwe khwali abalindi babu

[83] Ne Ayubu olwayalanga Nyasaye wuwe mbu: “toto esie obunyakhani bwandiila, ne ewe newe eweshisa muno umalayo.”

[84] Mana nikhumuwulila nenikhumuhiniliaho obunyakhani bubwe, ne nikhumuhelesia Abandu bebe nende shingabo halala, tsimbabaasi okhurula kwifwe ne obwitsulisio khubilonje bioosi

[85] Ne Ismail nende Idris nende Dhilkifl boosi bali mubesumilisi

[86] Ne nikhubenjisia mutsimbabaasi tsiefu , toto abo bali mubandu abalayi

[87] Ne Dhanun (Yunus) olwayarula nasinyishe naparanga mbu shikhulamunyala tawe, mana nalaanga mushiilima mbu: “ Abulaho Nyasaye wundi tawe owulali ewe, toto esie embeele mubandu ababii.”

[88] Mana nikhumufuchilila ne nikhumuhabina khushibeela esho. Ne endio nilwakhuhabinanga Abasuubili. tawe

[89] Ne Zakaria olwayalaanga Nyasaye wuwe mbu: “ Nyasaye wanje olandekha sienyene tawe newe omulayi wokhuhelesia.”

[90] Mana nikhumufuchilila nenikhumuhelesia Yahya nenikhumukasilia omukhaye wuwe, toto abo bali abangu bokhukhola amalayi. Ne bakhusabanga khubwikombi nende oburi, ne bali abehotselefu khwifwe

[91] Ne Omukhasi welinda omubili kukwe, mana nikhuramwo omwoyo kwefu nikhumukhola ye nende Omwana wuwe okhuba eshilolelo khushialo

[92] Toto omukanda kwenyu kuno ni omukanda mulala, nasi nesie Nyasaye wenyu (mulala) kho munaame

[93] Nabo nibafunaka hakari wabu likhuwa liabu lino (nibakabukhana) boosi balikalukha khwifwe