Back to Languages

    Maranao - Chapter 15

    Translation by Guro Alim Saromantang

    Verse 1

    Alif, Lam, Ra. (so Allah i Matao ko paka-aantapan Iyan on.) Giyaya na manga ayat ko kitab, go Qor´an a miyakapayag (ko ontol)

    Verse 2

    Madakl a kapndingandingana o siran a da pamaratiyaya, sa oba siran bo miyabaloy a manga Moslim

    Verse 3

    Botawaning ka siran, ka an siran pphakakan, go an iran pkhasawiti (so doniya): Go so kattmbanga kiran o inam: Ka katokawan iran bo

    Verse 4

    Na da a bininasa Mi a phagingd a ba da a kitab iyan a mappnto

    Verse 5

    Di kapngagaanan o pagtaw so adial iyan, go di iran khisndod

    Verse 6

    Na pitharo iran: "Hay tiyoronan ko ndao, mataang ka a titho a pmbthangn

    Verse 7

    Ino kaming ka di khawiti sa malaikat o ska na pd ko khipmamataan

    Verse 8

    (Pitharo o Allah:) A di Ami phakatoronn so malaikat inonta o rakhs o bnar: Na samawto na di siran dn makanggowamay

    Verse 9

    Mataan! a Skami na Skami i tomiyoron ko (Qor´an a) ndao; go mataan! a Skami i titho a somisiyap on

    Verse 10

    Na sabnsabnar a siyogoan Ami so miyaonaan ka sii ko pithanggisa ka tindg ko miyangaoona

    Verse 11

    Na da a miyakatalingoma kiran a sogo a ba iran da pamagrgi skaniyan

    Verse 12

    Lagid aya man i kipzanipn Ami ron ko manga poso o manga baradosa

    Verse 13

    A di siran on pharatiyaya; oba di sabnar a somiyagad so miyasowa o miyangaoona

    Verse 14

    Na apiya pn lomka Kami kiran sa pinto ko langit, na mabaloy siran a makapanik siran on

    Verse 15

    Na tharoon iran dn a: "Mataan! a birg so manga kaylay tano: Kna, ka sktano na pagtaw a miyangababalik a mata niyan

    Verse 16

    Na sabnsabnar a tiyagoan Ami so langit sa manga darpa o manga bitoon, go inipharas Ami ron oto a rk o pphamakaylay ron

    Verse 17

    Na siniyap Ami oto phoon ko langowan a shaytan a pradiyamn

    Verse 18

    Ogaid na so miyamankhaw sa kan´g, na siyaloba skaniyan a kadg, a mapayag

    Verse 19

    So lopa na kiyayat Ami oto; go piyamakatindgan Ami oto sa manga palaw; go piyamakathoan Ami oto sa mbarambarang a didiyangkaan

    Verse 20

    Go singgayan Ami skano ron sa manga kawiyagan ago so kna a ba skano i pphamagpr on

    Verse 21

    Na da a nganin a ba Ami di mipapaar so khitatagoan on; go da a phakatoronn Ami ron a ba di madidiyangka a mappnto

    Verse 22

    Go pphakasambrn Ami so manga undo a pphamakatago sa ig ko gabon, na piyakatoron Ami a phoon ko kawang so ig, na piyakainom Ami skano ron, na kna a ba skano i makakhakapaar on

    Verse 23

    Go mataan! a titho a Skami i pphangoyag, go pphangimatay: Go Skami i manga waris (a phamaapaar)

    Verse 24

    Na sabnsabnar a katawan Ami so miyangaoona rkano, go sabnsabnar a katawan Ami so phangaoori rkano

    Verse 25

    Mataan! ka so Kadnan ka na plimodn Iyan siran, Skaniyan na Mawngangn a Matao

    Verse 26

    Na sabnsabnar a inadn Ami so manosiya a phoon ko lopa a gango, a phoon ko lipaw a miyarmbis

    Verse 27

    Go so jinn na inadn Ami mona a phoon ko apoy a mararas

    Verse 28

    Na gowani na pitharo o Kadnan ka ko manga malaikat a: "Mataan! a Sakn na magadn Ako sa manosiya, a phoon ko lopa a gango, a phoon ko lipaw a miyarmbis

    Verse 29

    Na anda i kaymasada Ko ron go masokan Ko skaniyan sa niyawa, na sondong kano ron sa pangangalimbabaan kano

    Verse 30

    Na miyangalimbabaan on so manga malaikat, sa tanan siran, langon

    Verse 31

    Inonta so iblis: Ka somiyangka oba mabaloy a pd ko miyamangalimbabaan

    Verse 32

    Pitharo (o Allah): "Hay iblis! antonaa i miyakarn rka sa dang ka kapangpd ko miyamangalimbabaan

    Verse 33

    Pitharo iyan a: "Di rakn patot oba ako pangalimbabaan ko manosiya, a inadn Ka a phoon ko lopa a gango, a phoon ko lipaw a miyarmbis

    Verse 34

    Pitharo (o Allah): "Na awa ka phoon ko langit; ka mataan! a ska na inibowang

    Verse 35

    Go mataan! a zisii rka so morka sa dayon ko alongan a kambabadala

    Verse 36

    Pitharo iyan: "Kadnan ko, na pakanayawa kong Ka sa dayon ko alongan a kaoyaga kiran

    Verse 37

    Pitharo (o Allah): "Na mataan! a ska na pd ko phamakanayawn

    Verse 38

    Taman ko alongan a masa a mappnto

    Verse 39

    Pitharo iyan: "Kadnan ko, ibt ko kiyabaloyang Ka rakn a dadag, na mataan! a barayatn ko siran dn (ko kandarowaka) ko lopa, go mataan! a dadagn ko siran dn langon

    Verse 40

    Inonta so manga oripn ka, a pd kiran a miyangatotolabos (Rka)

    Verse 41

    Pitharo (o Allah) a: "Katii so lalan Rakn a makaoontol (a di Ko ipndaraynon)

    Verse 42

    Mataan! a so manga oripn Ko na da a mapkhapaar ka kiran, a rowar ko taw a inonotan ka niyan a pd ko miyangadadadag

    Verse 43

    Go mataan! a so naraka Jahannam na diyandi kiran dn langon

    Verse 44

    Pito a pinto iyan: Oman i isa pinto na adn a bagian iyan kiran a sabaad a missnggay

    Verse 45

    Mataan! a so miyamananggila na makaphagingd ko manga pamomolan go manga bowalan

    Verse 46

    (Tharoon kiran a:) "Sold kano ron sa kalilintad a somasarig kano

    Verse 47

    Na ilangn Ami so matatago ko manga rarb iran a siig a: Phapagariya siran, a zisii ko manga kantir a khipagaadapadapa

    Verse 48

    Daa phakatalingoma kiran roo a dokaw, go di siran on dn maphamakaawa

    Verse 49

    Pamanotholang ka ko manga oripn ko a: Mataan! a Sakn na Sakn so Manapi, a Makalimoon

    Verse 50

    Go mataan! a so iphaniksa Akn na giyoto so siksa a malipds

    Verse 51

    Go pamanotholang ka kiran so manga banto o Ibrahim

    Verse 52

    Gowani na somiyold siran on, na mitharo siran sa: "Salaam!" Pitharo o Ibrahim a: "Mataan! a Skami na ipkhalk ami skano

    Verse 53

    Pitharo iran a: "Di ka khalk! ka mataan! a skami na phanotholan ami ska sa (ipmbawata aka a) wata a matao

    Verse 54

    Pitharo iyan: "Ino niyo rakn phanothola (a kapmbawata akn) a riyaot ako a kaloks? Na antonaa i sabap a kaphanothola niyo rakn (saya)

    Verse 55

    Pitharo iran a: "Piyanothol ami rka so bnar: Na di ka phangpd ko piyangaadaan sa panginam

    Verse 56

    Pitharo iyan: "Na ba adn a taw a khadaan sa panginam ko limo o Kadnan iyan, a rowar ko mithataridadag

    Verse 57

    Pitharo iyan: "Na antonaa i zowaan iyo, hay manga sogo (o Allah)

    Verse 58

    Pitharo iran a: "Mataan! a skami na siyogo kami ko pagtaw a manga baradosa (a pagtaw o Lot)

    Verse 59

    Inonta so taalok ko Lot: Mataan! a skami na zabtn ami siran dn langon

    Verse 60

    Inonta so karoma niyan, ka kiyokom ami a mataan! a skaniyan na pd dn ko phangakakal (ko siksa)

    Verse 61

    Na kagiya a makawma ko Lot so manga sogo (a manga malaikat)

    Verse 62

    Na pitharo iyan a: "Mataan! a skano na pagtaw a di makikilala

    Verse 63

    Pitharo iran a: "Kna, ka inowit ami rka so (siksa a) siran na zasangka on so pamikiran iran

    Verse 64

    Go minitalingoma mi rka so bnar, go mataan! a skami na titho kami a mmamataan

    Verse 65

    Na panglmn ka so taalok rka, ko sabaad ko kagagawii, go tondogang ka siran sa talikhodan: Na oba adn a domingil rkano a isa bo, go taros kano sa sadn sa sogoan rkano

    Verse 66

    Na piyakitokawan Ami ron angkoto a khasowa, a mataan! a khathiphad so siran aya ko kapitai kiran

    Verse 67

    Na miyakaoma so taw ko bandar a ingd a pkhababaya siran

    Verse 68

    Pitharo (o Lot) a: "Mataan! a siran nai na khibobolos rakn: Na di ako niyo ndiyamana

    Verse 69

    Go kalkn iyo so Allah, go di ako niyo phakaytoa

    Verse 70

    Pitharo iran a: "Ba ami rka da saparn, so (kapakabolosa ko) khi pananangga

    Verse 71

    Pitharo iyan: "Katii so manga wata akn a manga babay, (na pamangaroma kano ron) oba adn a pnggolawlaan iyo

    Verse 72

    Ibt ko kawyagoyag ka (ya Mohammad), ka mataan! a siran na matatago siran dn ko kabbrg iran a pphromparompak siran

    Verse 73

    Na miyadansal siran o lalis ko kiyasbangi kiran o alongan

    Verse 74

    Na biyaloy Ami so liyawaw (o ingd iran) a didalm, go piyakawranan Ami siran sa ator a phoon ko lopa a kiyomba

    Verse 75

    Mataan! a adn a matatago roo man a titho a manga tanda a bagian o pphamangilay sa piratas

    Verse 76

    Go mataan aya! a titho a matatago ko lalan a da maawg

    Verse 77

    Mataan! a adn a matatago roo man a titho a tanda a bagian o miyamaratiyaya

    Verse 78

    Na mataan aya! a miyabaloy so manga taw sa Ayka (a pagtaw o Shoayb) a titho a manga darowaka

    Verse 79

    Na siniksa Ami siran. Na mataan! a giya dowaya (a ingd) na sabnar a matatago ko mala a lalan, a mapapayag

    Verse 80

    Na sabnsabnar a piyakambokhag o manga taw sa Hijr (a pagtaw o Salih) so manga sogo (o Allah)

    Verse 81

    Go inibgay Ami kiran so manga tanda Ami, na tiyalikhodan iran skaniyan

    Verse 82

    Go miyanonggirb siran ko manga palaw sa manga walay, a khisasarig siran

    Verse 83

    Na miyadansal siran o lalis ko kiyapitai kiran

    Verse 84

    Na da kiran makalinding so pinggalbk iran

    Verse 85

    Na da ko kiyaadna Mi ko manga langit, ago so lopa, go so nganin a pagltan a dowa nan, inonta na sii ko bnar. Na mataan! a so bangkit na phakatalingoma dn. Na dapayangka (kiran) sa kadapay a maliwanag

    Verse 86

    Mataan! a so Kadnan ka na Skaniyan so Pphangadn, a Matao

    Verse 87

    Na sabnsabnar a bigan Ami ska sa pito a manga ayat (a so Fatiha) a gii makhasokasoy, go so Qor´an a Sslaan

    Verse 88

    Ding ka phakaotnga so (kaylay o) dowa matang ka ko nganin a piyakisawitan Ami oto a pizoson, ko sabaad kiran, go ding ka siran pmbokoon: Go pakainayang ka so gowagowaing ka ko miyamaratiyaya

    Verse 89

    Go tharoang ka a: Mataan! a sakn so pphamakaiktiyar, a mapayag

    Verse 90

    Lagid o initoron Ami ko mimbabagibagi

    Verse 91

    Siran na biyaloy iran so Qor´an a di bo dn pira baad

    Verse 92

    Na ibt ko Kadnan ka, ka mataan! a iiza Ami kiran dn langon

    Verse 93

    So pinggolawla iran

    Verse 94

    Na payagang ka so sogoan rka, go talikhoding ka so manga pananakoto

    Verse 95

    Mataan! a Skami na lininding Ami ska ko gii rka zosodi

    Verse 96

    A siran so pphangmbaal sa rimbang o Allah a tohan a salakaw: Na katokawan iran bo

    Verse 97

    Na sabnsabnar a katawan Ami a mataan! a ska na ipnggagt a rarb ka so gi iran tharoon

    Verse 98

    Na pthasbikn ka so podi ko Kadnan ka, go pangpd ka ko pphamanojiod

    Verse 99

    Go zoasoatang ka so Kadnan ka taman sa kapakatalingoma rka o kapatay