Back to Languages

    Maranao - Chapter 69

    Translation by Guro Alim Saromantang

    Verse 1

    So phakatangkd

    Verse 2

    Antonaa so phakatangkd

    Verse 3

    Na antawaa i miyakandao rka o antonaa so phakatangkd (a giyoto so bangkit)

    Verse 4

    Piyakambokhag o pagtaw a Samod, ago so pagtaw a Ad so phakatktk

    Verse 5

    Na so pagtaw a Samod, na inibinasa kiran so lalis a minitaralo

    Verse 6

    Na so pman so pagtaw a Ad, na inibinasa kiran so ndo a domadagoos, a miyakabandbands

    Verse 7

    Piyakapangarasi Niyan kiran sa miyakapito ka gagawii, go miyakawalo ka dawndaw sa da mapta, na khaylaing ka so pagtaw roo a khipakakklit, lagid oba siran manga itado a korma a miyanga o othang

    Verse 8

    Na ba adn a khaylaing ka kiran a malalamba

    Verse 9

    Na siyogok o Pir´awn, ago so miyaonaan iyan, ago so taw sa Mo´tafikah so dosa

    Verse 10

    Go siyangka iran so sogo o Kadnan iran, na siniksa Iyan siran sa siksa a maylot

    Verse 11

    Mataan! a Skami na kagiya a lomapay so ig na riyoran Ami skano ko kapal

    Verse 12

    Kaan Ami rkano oto mabaloy a pananadm, go adn man´g skaniyan o tangila a pphamamakin´g

    Verse 13

    Na amay ka iyopn so sanggakala sa kaiyop a makaysa

    Verse 14

    Go madiyongkat so lopa ago so manga palaw, na maropt a dowa oto sa karopt a makaysa

    Verse 15

    Na sa alongan oto na makatana so phakatana (a giyoto so bangkit)

    Verse 16

    Go manga oopak so langit, na skaniyan sa alongan oto na makalmk

    Verse 17

    Go so manga malaikat na sii ko manga bagibir iyan. Na tanggongn so aras o Kadnan ka ko kaporoan iran sa alongan oto o walo (a manga malaikat)

    Verse 18

    Sa alongan oto na pakadarpaan kano na da a makapagma rkano a phagma

    Verse 19

    Na so mibgay ron so daptar iyan, sii ko kawanan iyan, na tharoon iyan a: "Kowaa niyo, na batiyaa niyo so daptar akn

    Verse 20

    Mataan! a sakn na miyatangkd akn a mataan! a sakn na khatmo akn so itongan rakn

    Verse 21

    Na skaniyan na matago ko kawyagoyag a kasosoat

    Verse 22

    Sii ko sorga a maporo

    Verse 23

    So manga onga on na manga rarani

    Verse 24

    (Tharoon kiran:) "Kang kano go inom kano sa kapipiya ginawa, sabap ko miniona niyo ko manga alongan a miyaypos

    Verse 25

    Na so pman so mibgay ron so daptar iyan sii ko diwang iyan, na matharo iyan: "Hay oba rakn bo da mibgay so daptar akn

    Verse 26

    Go di akn katawan o antonaa i itongan rakn

    Verse 27

    Hay oba bo skaniyan na miyabaloy a kapatay dn

    Verse 28

    Daa minilinding rakn o tamok akn

    Verse 29

    Miyada rakn so bagr akn

    Verse 30

    (Tharoon o Allah:) "Kowaa niyo na sangkalii niyo skaniyan

    Verse 31

    Oriyan iyan na so naraka Jahim na sombo niyo ron

    Verse 32

    Oriyan iyan na so rantay a aya karawa iyan na pito polo hasta, na zokharn iyo ron

    Verse 33

    Mataan! a skaniyan na aya btad iyan na di niyan paparatiyayaan so Allah a lbi a mala

    Verse 34

    Go di niyan i phamiis so kapakakana ko miskin

    Verse 35

    Na da a bagian iyan sa alongan nai sii a tonganay a phakaompiya on

    Verse 36

    Go da a pangn´ngkn iyan a rowar ko sago o taw ko naraka

    Verse 37

    Daa phakakan on inonta so manga baradosa

    Verse 38

    Na kna, ka pzapa ako ko nganin a pkhaylay niyo

    Verse 39

    A go so nganin a di niyo pkhaylay

    Verse 40

    Sa mataan! a skaniyan (a Qor´an) na titho a gii matharo o sogo a sslaan

    Verse 41

    Go kna a ba skaniyan katharo o pababayok, miyakayto ito a kapaparatiyaya niyo

    Verse 42

    Go kna a ba katharo a paririmar, miyakayto ito a kapphakatadm iyo

    Verse 43

    Initoron a phoon ko Kadnan o manga kaadn

    Verse 44

    Na opama ka iniangkob iyan Rkami so sabaad ko manga katharo

    Verse 45

    Na mataan a khakowa Mi skaniyan sa nggolalan ko bagr

    Verse 46

    Oriyan iyan na mataan a potoln Ami ron so ogat ko poso

    Verse 47

    Na da a pd rkano a isa bo a mamakalinding on

    Verse 48

    Na mataan! a titho a pananadm a rk o khipanananggila

    Verse 49

    Na mataan! a Skami na katawan Ami dn a mataan! a so sabaad rkano na piyakambokhag iran (so Qor´an)

    Verse 50

    Na mataan aya! a titho a kazndit a phakatana ko miyamangongkir

    Verse 51

    Go mataan aya! a titho a bnar a matatangkd

    Verse 52

    Na phoroporo on ka so ngaran o Kadnan ka a Lbi-a-mala