Burmese - Chapter 55 - Ar-Rahman

၁။ မဟာကရုဏာတော်ရှင်သည်။

၂။ ကျမ်းမြတ်ကုရ်အာန်ကို ထုတ်ပြန်ကြေငြာတော်မူ၏။

၃။ အရှင်မြတ်သည် လူသားကို ဖန်ဆင်းတော်မူ၏။

၄။ အရှင်မြတ်သည် လူသားကို စကားပြောခြင်းအတတ်ကို သင်ကြားပေးတော်မူ၏။

၅။ အရှင်မြတ်သည် နေနှင့်လကို အချိန်မှန်ကန်စေတော်မူ၏။

၆။ ကြယ်နက္ခတ်တာရာနှင့် မြက်သစ်ပင်အားလုံးတို့သည် အရှင်မြတ်အား ဦးညွှတ်ကြ၏။

၇။ အရှင်မြတ်သည် မိုးကောင်းကင်ကို မြင့်စွာဖန်ဆင်းတော်မူ၏၊ အတိုင်းအထွာစည်းချိန်ကိုလည်း ဖန်ဆင်းတော်မူ၏။

၈။ ယင်းသို့ဖန်ဆင်းတော်မူသည်မှာ သင်တို့သည် အတိုင်းမှန် စည်းချိန်မှန်ကို မကျူးကျော်စေဖို့ရာဖြစ်၏။

၉။ သို့သော်သင်တို့သည် အလေးတင်းတောင်းစည်းချိန်လျှာများကို ကြပ်ကြပ်မှန်ကန်စေကြလော့၊ အလေးအတိုင်း အထွာမခိုးကြလင့်။

၁ဝ။ မဟာကရုဏာတော်ရှင်သည် ဝေနေယျသတ္တဝါအပေါင်းတို့အဖို့ရာ မဟာပထဝီမြေကြီးကို ကျယ်ဝန်းပြန့်ပြူးစွာ ခင်းထားတော်မူ၏။

၁၁။ မြေပေါ်တွင် အသီးနှင့် အဖူးရှိသောစွန်ပလွံစသည်များရှိ၏။

၁၂။ ကောက်ပဲသီးနှံနှင့် မွှေးကြိုင်ပျံ့သင်းသောပန်းပင်နွယ်ပင်များလည်းရှိ၏။

၁၃။ သို့ဖြစ်၍ အို-ကြားနာရသူအပေါင်းတို့၊ သင်တို့၏ အရှင်သခင်၏ ကျေးဇူးတော်များအနက် မည်သည်ကို သင်တို့ငြင်းပယ်ကြသနည်း။

၁၄။ အရှင်မြတ်သည် လူသားကို အိုးထိန်း၏ မြေစေးကဲ့သို့ ရွှံ့မြေစေးမှ ဖန်ဆင်းတော်မူ၏။

၁၅။ ဂျင်နတ်သားကို မီးခိုးမရှိသောမီးမှ ဖန်ဆင်းတော်မူ၏။

၁၆။ သင်တို့သည် သင်တို့၏ အရှင်သခင်ကျေးဇူးရှင်များအနက် မည်သည်ကို ငြင်းပယ်ကြသနည်း။

၁၇။ အရှင်မြတ်သည် နေထွက်ရာအရပ်နှစ်ခုနှင့် နေဝင်ရာအရပ်နှစ်ခုတို့၏ အရှင်သခင်ဖြစ်တော်မူ၏။

၁၉။ အရှင်မြတ်သည် ပင်လယ်နှစ်ပြင်ကို လွှတ်တော်မူ၏၊ ရေယဉ်နှစ်ခုတွေ့ဆုံပေါင်းစပ်စေတော်မူ၏။

၂ဝ။ ထိုပင်လယ်နှစ်ပြင်ရေယဉ်တို့၏ အလယ်ကြား၌ အဆီးအတားတစ်ခုကို စီရင်ထားတော်မူ၏၊ ထိုပင်လယ်နှစ်ပြင် ရေယဉ်သည် တစ်ခုနှင့်တစ်ခုနယ်ကျူးလွန်ခြင်းမရှိချေ။

၂၁။ သင်တို့သည် သင်တို့၏ အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၂၂။ ထိုသမုဒ္ဒရာနှစ်ပြင်ရေယဉ်မှ ပုလဲသန္တာစသောရတနာများထွက်၏။

၂၃။ သင်တို့သည် သင်တို့၏ အရှင်သခင်၏ ကျေးဇူးတော်များအနက် မည်သည်ကို ငြင်းပယ်သနည်း။

၂၄။ ပင်လယ်သမုဒ္ဒရာရေယဉ်ကြောဝယ် အောင်လံကဲ့သို့ ထူထောင်လွှင့်ထားသောသင်္ဘောများကို အရှင်မြတ်စိုးပိုင် တော်မူ၏။

၂၅။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၂၆။ ကမ္ဘာမြေပေါ်တွင် ရှိနေကြကုန်သောသတ္တဝါအပေါင်းတို့သည် တစ်နေ့ပျက်စီးရမည်သာတည်း။

၂၇။ ထိုအခါ သင်၏ အရှင်သခင် အနန္တတန်ခိုးတော်အာနုဘော်ရှင်၏ မျက်နှာတော်သာလျှင် ကြွင်းကျန်ရစ်လိမ့်မည်။

၂၈။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၂၉။ ကမ္ဘာမြေပြင် မိုးကောင်းကင်ဝယ် ရှိရှိသမျှတို့သည် အရှင်မြတ်အထံတော်၌ ဆုပန်ကြ၏၊ အရှင်မြတ် နေ့ရှိသမျှ စိုးမိုးအုပ်ချုပ်တော်မူလျက်ရှိ၏။

၃ဝ။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၃၁။ အို-မှီခိုသူလူသားနှင့် ဂျင်နတ်သားနှစ်မျိုးတို့၊ ငါသည် သင်တို့ကို စစ်ကြောစီရင်တော်မူမည်။

၃၂။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၃၃။ အို-လူနှင့် ဂျင်နတ်သားအပေါင်းတို့၊ သင်တို့သည် ကမ္ဘာမြေပြင် မိုးကောင်းကင်အားလုံးကို ဖောက်ထွင်းသွားနိုင် စွမ်းကြလျှင် သွားကြလော့၊ ငါခွင့်ပြုတော်မမူပဲ သင်တို့သည် ယင်းအမှုကို အလျဉ်းမပြုနိုင်ချေ။

၃၄။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၃၅။ အို-လူနှင့် ဂျင်အပေါင်းတို့၊ ငါသည် သင်တို့အပေါ်၌ မီးအပူရှိန်နှင့်တကွ ကြေးဝါမီးတောက်မီးလျှံတို့ကို စေ လွှတ်တော်မူမည်၊ သင်တို့သည် ဤဘေးဆိုးကြီးမှ မလွတ်မြောက်နိုင်ချေ။

၃၆။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၃၇။ အထက်မိုးကောင်းကင်သည် ကွဲအက်ပြိုပျက်၍ သားရေနီအလား နှင်းဆီရောင်ဖြစ်သွားသောအခါ။

၃၈။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၃၉။ ထိုနေ့တော်ကြီး၌ လူသားသော်လည်းကောင်း၊ ဂျင်နတ်သားသော်လည်းကောင်း မိမိကျူးလွန်မိခဲ့သောအပြစ် အကြောင်းကို မေးမြန်းတော်မူခြင်းခံရမည်မဟုတ်ချေ။

၄ဝ။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၄၁။ ထိုနေ့တော်ကြီး၌ အပြစ်ရှိသူတို့ကို သူတို့တွင် ပါလာသောအမှတ်အသားအားဖြင့် ခွဲခြားသိကြလိမ့်မည်၊ သူတို့၏ ဦးထိပ်ဆံနှင့် ခြေထောက်များကို ဆွဲငင်လျက် အဝီစီငရဲအတွင်းသို့ ပစ်သွင်းလိမ့်မည်။

၄၂။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၄၃။ ဤငရဲသည် ဒုစရိုက်ကောင်တို့မရှိဟု ငြင်းဆန်သောငရဲပေတည်း။

၄၄။ ထိုအခါငရဲသားတို့သည် ငရဲနှင့်ပြင်းထန်စွာပွက်ပွက်ဆူထလျက်ရှိသောရေပူအလယ်ကြားတွင် လှည့်ပတ်ပြေးလွှား ၍ တဝဲလည်လည်ရှိနေကြလိမ့်မည်။

၄၅။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၄၆။ အကြင်သူသည် မိမိ၏ အရှင်သခင်၏ ရှေ့တော်၌ မတ်မတ်ရပ်၍ စစ်ကြောစီရင်ခံရမည်ကို ကြောက်ရွံ့မိ၏၊ ထိုသူ၏ အဖို့အရာလွန်ကဲမြင့်မြတ်သောနိဗ္ဗာန်ဥယျာဉ်တော်ကြီးနှစ်ခုအသင့်ရှိ၏။

၄၇။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၄၈။ ထိုဥယျာဉ်တော်များ၌ ပေါက်ရောက်လျက်ရှိသောသစ်ပင်များသည် အကိုင်းအခက်ဝေဆာလျက် ရှုဖွယ်မငြီး ဖြစ်၏။

၄၉။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၅ဝ။ ထိုဥယျာဉ်တော်များ၌ ချောင်းမြောင်းနှစ်သွယ်စီးထွေထွေကျဆင်းလျက်ရှိ၏။

၅၁။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၅၂။ ထိုဥယျာဉ်တော်များ၌ သစ်သီးသစ်ဥအမျိုးမျိုး စုံတွဲစုံတွဲရှိကြ၏။

၅၃။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၅၄။ နိဗ္ဗာန်သူနိဗ္ဗာန်သားတို့သည် ထူထဲသောပိုးဖဲထည်တို့ဖြင့် ခင်းကျင်းထားသောပလ္လင်းများပေါ်၌ လှဲလျောင်းစံစား နေကြလိမ့်မည်၊ ဥယျာဉ်တော်နှစ်ခုမှ သစ်သီးသစ်ဥများသည် သူတို့အနီးအနားတွင် ကိုင်းညွတ်လျက်ရှိကြ၏။

၅၅။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၅၆။ ထိုဥယျာဉ်ဗိမာန်တော်များ၌ လူသား ဂျင်နတ်သားတို့လက်နှင့်ပင် မထိရသေးသောစက္ခုအိန္ဒြေနှင့် ပြည့်စုံသော နတ်ကညာများရှိ၏။

၅၇။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၅၈။ ထိုနတ်ကညာတို့သည် ပုလဲသန္တာနီလာမြသား ပတ္တမြားရတနာကဲ့သို့ လှပတင့်တယ်ကြည်လင်ကြ၏။

၅၉။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၆ဝ။ ကုသိုလ်ကောင်းမှု၏ အကျိုးဆက်သည် ကောင်းကျိုးသုခမှတပါးူ အခြားဖြစ်နိုင်သလား။

၆၁။ သင်တို့သည် သင်တို့၏ အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၆၂။ အဆိုပါဥယျာဉ်တော်နှစ်ခုအပြင် အခြားဥယျာဉ်ဗိမာန်နှစ်ခုလည်း ရှိသေး၏။

၆၃။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၆၄။ ဤနိဗ္ဗာန်ဥယျာဉ်တော်နှစ်ခုသည် သစ်ရွက်သစ်ဖုများနှင့် စိမ်းစိုရွှင်လန်းဖွယ်ဖြစ်၏။

၆၅။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၆၆။ ဤဥယျာဉ်တော်နှစ်ခု၌ ရေအထွေထွေစီးထွက်နေသောစိမ့်စမ်းနှစ်ခုရှိ၏။

၆၇။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၆၈။ ဤဥယျာဉ်တော်များ၌ စွန်ပလွံသီး၊ သလဲသီးစသည့်သစ်သီးသစ်ဥအမျိုးမျိုးရှိ၏။

၆၉။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၇ဝ။ ဤဥယျာဉ်တော်များ၌ အဆင်းရူပ လှပတင့်တယ် ချစ်ခင်ဖွယ်ကောင်းသောနတ်ကညာများရှိ၏။

၇၁။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၇၂။ ထိုနတ်ကညာများသည် သန့်ရှင်းဖြူစင်၍ တဲအဆောင်များတွင် စံစားနေကြ၏။

၇၃။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၇၄။ ထိုနတ်ကညာများမှာ လူယောက်ျား ဂျင်ယောက်ျားမထိသေးသောကညာအစစ်ဖြစ်ကြ၏။

၇၅။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၇၆။ ထိုနတ်ကညာများသည် မှီအုံးအစိမ်းနှင့် လှပသောကော်ဇောများအပေါ်တွင် လှဲလျောင်းလျက် စံစားနေကြ၏။

၇၇။ သင်တို့သည် သင်တို့၏အရှင်သခင်၏ ကျေးဇူးတော်များအနက် မည်သည်ကို ငြင်းပယ်ကြသနည်း။

၇၈။ အို-တမန်တော်၊ သင်၏ အရှင်သခင်သည် အနန္တတန်ခိုးတော်ရှင် ကျော်ဇော်ထင်ရှားသောအရှင်၏ နာမတော် သည် မင်္ဂလာအဖြာဖြာနှင့် ပြည့်စုံလှ၏။