Back to Languages

    Shona - Chapter 50

    Translation by Abdullah J. M. Adini And Students

    Verse 1

    Qaaf (Mashoko aya ndemamwe ezvishamiso zviri muQur’aan, uye hapana anoziva zvaanoreva kunze kwaAllah). (Ndinopika) neQur’aan dzvene

    Verse 2

    Vanoshamiswa kuti kwakauya muyambiri kwavari (Muhammad (SAW)) kubva mukati mavo. Naizvozvo avo vasingatendi vanoti: “Ichi ndicho chishamiso!”

    Verse 3

    “Kana tichinge tafa tave huruva (tichave tinomutswa here)? Ndiko kudzoka kuri kure.”

    Verse 4

    Tinoziva izvo zvinotorwa nevhu kubva kwavari (vafi), uye tine gwaro rakachengetedzwa (gwaro remirairo)

    Verse 5

    Asi vakaramba chokwadi (Qur’aan) apo chakange chauya kwavari, nokudaro vakave vanokanganisika (havakwanisi kuona chakaipa nechakanaka)

    Verse 6

    Havana here kutarisa matenga ari pamusoro pavo, magadziriro atakaaiita uye kushongedza kwatakaaiita, uye haana kutsemuka

    Verse 7

    Uye pasi rino takariparadzira, uye tikadzika mariri makomo akamira zvakasimba, uye tikaburitsa mariri zvirimwa zvose zvakanaka

    Verse 8

    Simba rekuona uye yeuchidzo kune muranda wose uyo anocheuka kuna Allah achikumbira ruregerero

    Verse 9

    Uye tinodzikisa mvura yakakomborerwa kubva kudenga, zvadaro toburitsa mapindu uye zvirimwa zvikohwewa

    Verse 10

    Uye miti yemadheti yakareba, ine bumburudzi dzakarongedzwa, dzimwe pamusoro pedzimwe

    Verse 11

    Raramo yevaranda (vaAllah). Uye tinopa raramo nayo kunyika yakanga yaparara. Kudaro kuchave kumutswa (kuchaiitwa vakafa)

    Verse 12

    Vaivepo ivo vasati vavepo (vasingatendi vekuMakkah) vakaramba, vanhu vaNowa, uye vagari vemuRassi, uye maThamood

    Verse 13

    Uye Aad, uye Farawo, uye madzikoma aLoti

    Verse 14

    Uye vagari vemusango, uye vanhu vekuTubba’. Vose vakaramba vatumwa (vavo), nokudaro vakapiwa chirango changu

    Verse 15

    Takaneta here nezvisikwa zvokutanga? Asi vari mukusagutsikana maererano nezvisikwa zvitsva (Kumutswa kubva kuvafi)

    Verse 16

    Uye zvirokwazvo takasika munhu, uye tinoziva zvaanozevezera. Uye tiri padyo naye kukunda tsinga dzake dzepahuro (neruzivo rwedu)

    Verse 17

    (Rangarirai) kuti avo vagashiri vaviri (ngirozi dzinonyora) vanogashira (munhu wese), imwe yakagara kurudyi imwe kuruboshwe (dzichinyora mabasa ese emunhu)

    Verse 18

    Hapana izwi raanotaura asi kuti pane mutariri akamirira (kunyora pasi)

    Verse 19

    Uye kudhaka kwerufu kuchauya muchokwadi. Zvichanzi: “Izvi ndizvo zvawaidzivirira!”

    Verse 20

    Uye hwamanda icharidzwa, ndiro richava zuva rakayambirwa (zuva rekumutswa)

    Verse 21

    Uye munhu wose achauya mberi pamwechete (nengirozi) ichimutinha uye (nengirozi) kuti igopa uchapupu

    Verse 22

    (Zvichanzi kumutadzi): “Zvirokwazvo, waive usingazvizivi izvi. Zvino takubvisa zvakanga zvakakupfukidza, uye meso ako ajeka nhasi!”

    Verse 23

    Uye shamwari yake yepedyo (ngirozi) ichati: “Izvi ndizvo zvatakanyora zvatinazvo!”

    Verse 24

    (Allah vachati kune ngirozi): “Imi muri vaviri, kandai mumoto, wese aive nemukonyo asingatendi (muhumwechete waAllah nemuvatumwa vavo).”

    Verse 25

    “Muwomesi wezvakanaka, mupfurikidzi, uyo asingagutsikani.”

    Verse 26

    “Aisanganisa vamwe vanamwari naAllah. Nokudaro mukandei muri vaviri mumutongo wakaomarara.”

    Verse 27

    Wepedyo pake (Satani) achati: “Tenzi vedu! Handina kumumanikidza kuti atadze, asi ndiye akanga akarasika zvakanyanya.”

    Verse 28

    Allah vachati: “Musava munopikisana pamberi pangu, ndakatokutumidzirai yambiro kare.”

    Verse 29

    “Mashoko abva kwandiri haashanduki uye handidzvanyiriri varanda.”

    Verse 30

    Iro zuva ratichati kuGehena: “Wazara here?” Richati: “Pane vamwe here (vari kuuya)?”

    Verse 31

    Uye Paradhiso richaunzwa padyo nevatendi vanotya Allah kwete kure navo

    Verse 32

    (Zvichanzi): “Izvi ndizvo zvamakanga mavimbiswa, kune avo vanokumbira ruregerero kuna Allah, uye vanochengetedza chitsidzo chavo kuna Allah (kuti vachatevera chitendero chaAllah, Islaam).”

    Verse 33

    “Uyo aitya avo vane tsitsi dzakawanda (Allah) mune izvo zvisingaoneki uye ouya nemoyo wekukumbira ruregerero (kubva kuzvitadzo zvese).”

    Verse 34

    “Pinda mariri nerunyararo uye chengetedzo. Iri ndiro zuva rehupenyu husina magumo!”

    Verse 35

    Imomo vachawana zvido zvemoyo yavo uye tine zvizhinji (kwavari, sekuona Allah)

    Verse 36

    Uye madzinza mangani atakaparadza mushure mavo ange anemasimba kuvakunda. Uye (apo mutongo wedu wakauya) vakamhanya vachitsvaga rubatsiro kune dzimwe nzvimbo! Vakawana nzvimbo yekuhwanda here (kubva mukuparadzwa)

    Verse 37

    Zvirokwazvo, mune izvozvo mune yambiro kune uyo ane moyo kana anopa nzeve dzake achiteerera

    Verse 38

    Uye zvirokwazvo takasika matenga nenyika uye zviri pakati pawo nemazuva matanhatu, uye hatina kuneta nazvo

    Verse 39

    Nokudaro tsungirira (Muhammad (SAW)) mune zvose zvavanotaura, uye rumbidza kurumbidzwa kwaTenzi vako zuva risati rabuda uye risati ranyura (nekuita minamato yeFajr, Dhuhr ne Asr)

    Verse 40

    Uye muchidimbu cheusiku varumbidze (nekuita minamato yeMaghrib neIsha), uyezve mushure meminamato (nekuita minamato isingamanikidzirwi maSunnah nekurumbidza uchiti Subhaanallaah, Alhamdulillaah, Allaahu Akbar)

    Verse 41

    Uye teererai iro zuva apo mudaidzi achadaidzira munzvimbo iri padyo

    Verse 42

    Iro zuva ravachanzwa kusheedzera kwechokwadi. Iri ndiro richava zuva rekubuda (kubva kumakuva)

    Verse 43

    Zvirokwazvo, tisu tinopa upenyu uye tinokonzera rufu, uye kwatiri ndiko kwamuchadzokera

    Verse 44

    Pazuva iro nyika ichatsemuka, vobuda vachimhanya. Uku ndiko kuchava kuunganidza kwatiri kuri nyore

    Verse 45

    Tinoziva zvakanyanya izvo zvavanotaura. Uye (iwe Muhammad (SAW)) hausi iwe unovamanikidza (kutenda). Asi yambira neQur’aan uyo anotya tyisidziro yangu (yemurango)